حيدرآباد(رپورٽر)ڄامشورو روڊ تي لطيف آباد رھواسين جي ڪار سان حادثو پيش آيو. ڪار ڊرائيور موقعي تي فوت ٿي ويو جڏھن تھ ڪار سوار 3 ڄڻا زخمي ٿي ويا. پوليس لاش ۽ زخمين کي اسپتال پھچايو.
”مهرن جي دعوت“ آصف زرداري کانپوءِ گورنر عمران ۽ متحده اڳواڻن جي خانڳڙهه ياترا
پيپلزپارٽي ڪهڙي ميدان تي جنگ وڙهڻ جون ڌمڪيون ڏئي رهي آهي، اسان ڌمڪين کان نه ڊڄنداسين: گورنر عمران اسماعيل
سنڌ ۾ گورنر راڄ لاڳو ڪرڻ واري آپشن تي غور بابت ڄاڻ ناهي، خواهش آهي ته سنڌ حڪومت مدو پورو ڪري: سکر ۾ ڳالهيون
سکر ( ن پ ا) سنڌ جي گورنر عمران اسماعيل جي آءِ ٽي رپورٽ کي افسوسناڪ قرار ڏيندي چيو آهي ته اسان جي ڪوشش آهي ته سنڌ سرڪار مدو پورو ڪري، منهنجي ڄاڻ ۾ اهڙي ڪا به ڳالهه ناهي ته سنڌ ۾ گورنر راڄ لاڳو ٿي رهيو آهي، ڌمڪين ۾ نه اينداسين، احتساب جو عمل جاري رهندو، جن چوري ڪئي، انهن کي ڀوڳڻو پوندو.
سکر پهچڻ بعد سرڪٽ هائوس ۾ ايم ڪيو ايم اڳواڻ خواجا اظهار الحسن سان گڏ ميڊيا سان ڳالهائيندي گورنر عمران اسماعيل چيو ته جي آءِ ٽي رپورٽ انتهائي افسوسناڪ آهي، پ پ ڪهڙي ميدان تي وڙهڻ چاهي ٿي، هر ميدان تي منهن ڏيڻ لاءِ تيار آهيون، ڌمڪين ۾ نه اينداسين، احتساب جو عمل جاري رهندو ۽ جن چوري ڪئي، انهن کي ڀوڳڻو پوندو.
هن چيو ته منهنجي علم ۾ اهڙي ڪا به ڳالهه ناهي ته سنڌ ۾ گورنر راڄ لاڳو ٿي رهيو آهي، مان گورنر جي حيثيت ۾ چوان پيو ته گورنر راڄ جو ڪو به امڪان ناهي، پ پ چاهي ٿي ته گورنر راڄ لڳي ۽ هو سياسي شهيد ٿين.
حيدرآباد: گئس سلينڊر ڌماڪي جي 5 زخمين مان نينگري فوت
ڳوٺ ڇٽو مير بحر ۾ گئس سلينڊر ڌماڪي سبب 5 ڄڻا زخمي ٿيا هئا
حيدرآباد(رپورٽر)گئس سلينڊر ڌماڪي جي نتيجي ۾ زخمي ٿيل 5 ڄڻن مان 14 ورهين جي نينگري فوت ٿي ويو.
راهوڪي ٿاڻي جي حد ۾ ڳوٺ ڇٽو مير بحر ۾ گئس سلينڊر ڌماڪي جي نتيجي ۾ 5 ڄڻا زخمي ٿيا هئا، جن کي اسپتال منتقل ڪيو ويو، زخمين مان 14 ورهين جي عائشه ملاح زخمن جي سٽ نه سهندي دم ڏئي ڇڏيو.
منهنجو امتحان شروع ٿي چڪو، نتيجو رٽائر ٿيڻ بعد ايندو: چيف جسٽس
عوام فيصلو ڪندو ته ڪيترن واعدن تي عمل ڪيو اٿم: چيف جسٽس ثاقب نثار
ڪي پي جي هيلٿ سسٽم ۾ بهتري ناهي آهي: لاهور ۾ ڪانووڪيشن کي خطاب
لاهور ( م ڊ ) چيف جسٽس آف پاڪستان ميان ثاقب نثار چيو آهي ته منهنجو امتحان شروع ٿي چڪو آهي، جنهن جو نتيجو رٽائرمينٽ کانپوءِ نڪرندو، عوام جي خدمت لاءِ ٽن ڪلاڪن کان وڌيڪ ننڊ ناهيان ڪندو، چيف جسٽس جي حيثيت ۾ ڪيل وعدن مان ڪيترن تي عمل ڪيو، اهو عوام تي ڇڏيان ٿو.
لاهور ۾ سروسز انسٽيٽيوٽ آف ميڊيڪل سائنسز جي ڪانووڪيشن کي خطاب ڪندي چيف جسٽس چيو ته مان پنهنجي پوري زندگي ۾ انصاف جي حصول لاءِ ڪم ڪيو ۽ زندگي جو مقصد به پنهنجي پيشي سان سچو رهڻ آهي.
چيف جسٽس ميان ثاقب نثار چيو ته پيشوراڻي زندگي ۾ سچي نيت سان ذميواري نڀائڻ به اصل خدمت آهي، منهنجو امتحان شروع ٿي چڪو آهي، جنهن جو نتيجو منهنجي رٽائرمينٽ کانپوءِ نڪرندو.
عبدالغني ۽ انور مجيد جي آءِ ٽي جي الزامن کي رد ڪري ڇڏيو
جي آءِ ٽي 294 ماڻهن جا بيان رڪارڊ ڪيا، رپورٽ ۾ انهن جا نالا نه آهن: سُپريم ڪورٽ ۾ جواب
رڪارڊ به رپوٽ ۾ شامل نه آهي، جي آءِ ٽي جي سفارش منظور ڪرڻ بنيادي حقن جي ڀڃڪڙي هوندي: جواب
اسلام آباد (رپورٽر) مني لانڊرنگ اسڪينڊل ۾ گرفتار اومني گروپ جي عبدالغني مجيد ۽ انور مجيد سُپريم ڪورٽ ۾ جواب جمع ڪرائيندي جي آءِ ٽي جي الزامن کي رد ڪري ڇڏيو. جواب ۾ عدالت کي استدعا ڪئي وئي آهي ته جي آءِ ٽي رپورٽ ۾ لڳايل الزامن کي رد ڪيو وڃي، جي آءِ ٽي وٽ اهڙو ڪوبه بنيادي اختيار نه آهي جو معاملو نيب ڏانهن موڪلڻ جي سفارش ڪري، تنهن ڪري جي آءِ ٽي جي ڪنهن به سفارش جي منظوري ڏيڻ بنيادي حقن جي ڀڃڪڙي هوندو. جواب ۾ عبدالغني مجيد ۽ انور مجيد چيو ته جي آءِ ٽي جن 294 ماڻهن جا بيان رڪارڊ ڪيا، اُنهن جا نالا ظاهر نه ڪيا ويا آهن، جڏهن ته جنهن رڪارڊ جو جائزو ورتو ويو، اُن کي به رپورٽ ۾ شامل نه ڪيو ويو آهي. اسان بيڏوهي آهيون.
ملير: شاھھ لطيف ٽائون ٿاڻي جو ايس ايڇ او معطل ٿيڻ بعد وڪيلن جي ٽن ڏينھن کان جاري ھڙتال ختم
ملير (ن پ ا) ملير بار ايسوسيئيشن جي نائب صدر جي گرفتاري خلاف وڪيلن پاران ڪيل هڙتال ايس ايڇ او جي معطلي بعد ختم ڪئي وئي.
ڪجهه ڏينهن اڳ وڪيل اڳواڻ سڪندر شر کي گرفتار ڪرڻ خلاف وڪيلن عدالتي ڪارروائي جو بائيڪاٽ ڪري ڪم ڇڏ هڙتال ڪئي ۽ جنهن جو ڊسٽرڪٽ اينڊ سيشن جج ملير مشتاق احمد نوناري نوٽيس ورتو.
وڪيلن جي سخت احتجاج بعد شاهه لطيف ٿاڻي جي ايس ايڇ او نيڪ محمد کوسو کي معطل ڪري معاملي جي جاچ لاءِ ايس پي ايسٽ عبدالله ميمڻ کي جاچ آفيسر مقرر ڪيو ويو، جنهن کانپوءِ وڪيلن اڄ هڙتال ختم ڪري عدالتي ڪارروائي ۾ حصو ورتو
پ پ کانپوءِ پي ٽي آءِ به خانڳڙهه جو رُخ ڪري ورتو، اڄ گورنر عمران اسماعيل خانڳڙهه ياترا تي پهچي رهيو آهي
پي ٽي آءِ سان واسطو رکندڙ سنڌ جو گورنر خانڳڙهه ۾ اڄ رات گذاريندو، سندس دعوت جا انتظام
گورنر کي علي گوهر مهر ۽ يو اي اي جي تعليم واري وزير دعوت ڏني آهي
خانپور مهر(ن پ ا) اڳوڻي صدر آصف زرداري کانپوءِ پي ٽي آءِ سان واسطو رکندڙ سنڌ جو گورنر به مهرن سان ملاقاتون ڪرڻ لاءِ اڄ خانڳڙهه ياترا تي پهچي رهيو آهي. گورنر عمران اسماعيل جي ڊي اي اڳواڻ سردار علي گوهر مهر جي دعوت تي خانڳڙهه اڄ خانڳڙهه پهچندو. جڏهن ته خانڳڙهه ياترا تي گورنر سان گڏ پي ٽي آءِ اڳواڻ حليم عادل شيخ به هوندو. ذريعن جو چوڻ آهي ته گڏيل عرب امارتن جي تعليم واري وزير شيخ النهيان مبارڪ طرفان گورنر عمران اسماعيل لاءِ دعوت جا انتظام ڪيا ويا آهن ۽ گورنر رات خانڳڙهه ۾ گذارڻ بعد سڀاڻي ڪراچي واپس ويندو. واضح رهي ته اڳوڻو صدر آصف زرداري ۽ پ پ چيئرمين بلاول ڀٽو زرداري گذريل ڏينهن پ پ ايم پي اي علي نواز مهر عرف راجا خان مهر جي دعوت تي خانڳڙهه پهتو هو، جتي ٻنهي اڳواڻن پيپلز پارٽي جي جلسي کي خطاب ڪيو. ذريعن امڪان ظاهر ڪيو آهي ته گورنر عمران اسماعيل جي دوري دوران پ پ مخالف مهر ڀائرن سان سنڌ اندر پ پ ۾ فارورڊ بلاڪ ٺاهڻ واري معاملي تي ڳالهيون ڪيون وينديون.
اوٻاوڙي ۾ مڙس ڪارنهن تهمت مڙهي زال کي ماري ڇڏيو، وارثن جو انڊس هاءِ وي تي لاش رکي ڌرڻو
کنڀڙا ٿاڻي جي حد ۾ جوابدار عزيز الله بُگٽي فائرنگ ڪري زال بيبُل بُگٽي کي قتل ڪري ڇڏيو
متاثر ڌُر جو انڊس هاءِ وي تي لاش رکي ڌرڻو، روڊ جي ٻنهي پاسن کان ڪيتري ئي دير تائين گاڏيون بيٺل
اوٻاوڙو (ن پ ا) اوٻاوڙي ڀرسان ڪارنهن الزام مڙهي جوابدار ڀاءُ ۽ ڏيرن سان گڏجي زال کي قتل ڪري ڇڏيو. کنڀڙا ٿاڻي جي حد ۾ جوابدار عزيز الله بُگٽي ڪارنهن تهمت مڙهي زال بيبُل بُگٽي کي فائرنگ ڪري قتل ڪري ڇڏيو. مقتول عورت جي ڀاءُ احمد بُگٽي الزام هنيو آهي ته جوابدار عزيز الله بُگٽي بيگناهه ڀيڻ کي قتل ڪيو آهي. قتل ۾ جوابدار جا ڀائر ۽ سئوٽ رُستم، شريف، مير حسن، حنيف ۽ آدم بُگٽي به شامل آهن. واقعي بعد متاٿر ڌُر قومي شاهراهه تي لاش رکي ڌرڻو هنيو، جنهن جي نتيجي ۾ روڊ جي ٻنهي پاسن کان ڪيتري ئي دير تائين گاڏيون بيٺل رهيون.
تاريخي ٺاروشاھ ريلوي اسٽيشن تي قبضا، ڪوارٽرن بعد گرائونڊ تي والار، پٽڙيون چوري ٿي ويون
ريلوي جي بچيل پلاٽن تي قبضا خورن ديرا ڄمائي پڪيون اڏاوتون جوڙي ڇڏيون
مافيا جي سرگرمين سبب هريپور ۾ جهيڙا روز جو معمول بڻيل، لکين رپين جو لوهه ۽ اثاثا غائب
ٺاور شاهه (رپورٽ: بشارت سومرو) ساهتي پرڳڻي جي تاريخي شهر ۽ نامياري راڳي ۽ شاعر ماسٽر چندر جي جنم ڀومي ٺاروشاهه جي تاريخي ريلوي اسٽيشن تي قبضا ٿي ويا آهن. پهريان ريلوي جي ڪواٽرن تي قبضا ڪيا ويا ۽ هاڻي ريلوي جي بچيل پلاٽن تي قبضا خورن ديرا ڄمائي پڪيون اڏاوتون جوڙي ڇڏيون آهن جڏهن ته ريلوي جي سرڪاري پلاٽ جيڪو راندين لاءِ ڇڏيو ويو هيو ان کي به نه بخشيو ويو اتي به بااثر قبضا مافيا هوٽلون ۽ مال جا واڙا قائم ڪري جنڪشن جي سونهن اجاڙي ڇڏي آهي قبضا مافيا جي سرگرمين سبب هريپور جي علائقي ۾ جهيڙا روز جو معمول بڻيل آهن، جڏهن ته ريلوي اسٽيشن جي مالڪي نه ٿيڻ ۽ ريلوي انتظاميا جي بي ڌياني سبب ريل جون قيمتي پٽڙيون ڪيترن ئي ميلن تائين چوري ٿي ويون آهن. سياسي سماجي اڳواڻن رضا محمد بهڻ، علي شير ڪيريو، ظفر چارڻ، مشتاق عباسي، ذاڪر عباسي، نصير ابڙو۽ ٻين پنهنجي اخبار سان ڳالهائيندي چيو ته اسان جي ساهتي پرڳڻي جي خوبصورت تاريخي شهر کي قبضا خور مافيائن بدصورت بڻائي ڇڏيو آهي خاص ڪري اسان جي تاريخي جنڪشن اسٽيشن کي جنهن جي سرڪاري پلاٽن توڙي سرڪاري ڪوارٽرن کي ريلوي پڊعيدن ۽ محرابپور جي عملدارن جي ملي ڀگت ڪري قبضا خورن کان ڳري رشوت ۽ ماهوار منٿلي عيوض قبضا مافيا سرڪاري پلاٽ ۽ سرڪاري ڪوارٽرن کي قبضي ۾ آڻي ڇڏيو آهي سرڪاري پلاٽن تي ڏينهن ڏٺي جو قبضا ڪري اتي پڪا گهر ۽ هوٽلون قائم ڪيون ويون آهن جڏهن ته راندين لاءِ ڇڏيل گرائونڊ ۾ مال جا واڙا ۽ مانڊڙيون رکي ريلوي اسٽيشن جي سونهن هٿ وٺي اجاڙي وئي آهي هنن چيو ته نه ڃاڻ اسان ڪيترائي دفعا احتجاج بک هڙتالون ڪرڻ سان گڏ لکت ۾ ريلوي انتظاميه ۽ پوليس کي شڪايتون ڪيون آهن پر ڪنهن به لڳاپيل انتظاميا بااثر قبضا خورن خلاف نالي ماتر شوڪاز نوٽيس ڪڍي خاموش تماشائي بڻيل آهي، جنڪشن اسٽيشن جيڪا انگريزن جي دور ۾ هلندي هئي، جنهن ۾ انڊيا کان ٺاروشاھ ڄائي نامياري راڳي ماسٽر چندر سن 1955ع سيپٽمبر ۾ سفر ڪري ٺاروشاھ پهتو هو، ٺاروشاھ ريلوي جي سرڪاري ڪاغذن ۾ هن سيڪشن جو آغاز آگسٽ 1929ع ٻڌايو ويو آهي. جيڪو 1991ع جي جولاءِ مهيني ۾ پڄاڻي تي پهتو. انگريز سرڪار طرفان علائقي جي عوام جي سهولت لاءِ ٺهرايل هي ٽريڪ محرابپور کان پڊعيدن 70 ڪلوميٽر، اهڙي ريت پڊعيدن کان ٽنڊوآدم 176 ڪلوميٽرن تي وڇايل هو. انهي جي وچ ۾ 26 ريلوي اسٽيشنون 5 جنڪشن، ٽنڊوآدم، سڪرنڊ، پڊعيدن، ٺاروشاهه ۽ محرابپور هيون. جيڪي 1991ع ۾ سرڪار جي هڪ ئي ڌڪ سان ختم ٿي ويون. انهن جنڪشنن ۾ 3 ٽنڊوآدم، پڊعيدن ۽ محرابپور ته پنهنجي مين لائين تي هجڻ جي ڪري زندهه رهيون. باقي رهيل 2 ختم ٿي ويون، جنهن ۾ ٺاروشاهه به شامل آهي.
مقامي ماڻهن لاءِ روزگار جا در بند، پنجاب مان ماڻهو گهرائي ڀرتي ڪيا ويا
پڪو ڪرڻ جون شڪايتون ڊي سي ۽ ليبر آفيسر پڻ نظرانداز ڪرڻ لڳا
ڇهن سالن کان ڪم ڪريون پيا پڪو ناهي ڪيو ويو: پورهيت
ڪوٽڙي: صنعتي زون ۾ مقامي ماڻھن لاء پڻ نوگو ايريا بڻيل آھي، ڪارخانن ۾ ڪم ڪندڙ اڪثريت پورھيتن جي پنجاب جي مختلف شھرن مان گھرايل پورھيتن جي ھجي ٿي جڏھن ته مقامي پورھيت لاء اڪثر ھتان جي ڪارخانن جا گيٽ بند ھجن ٿا. ھوڏانھن پنھنجي حقن جي حاصلات ۽ سالن کان ڪم ڪندڙ پورھيتن کي پڪو ڪرڻ لاء وڏي تعداد ۾ پورھيت ڊي سي ڄامشورو ۽ ليبر آفيسرن وٽ دانھيندا رھن ٿا پر سندن ڪو به داد رسي نه ٿي ٿئي، سائيٽ جي ڪارخانن ۾ ڪم ڪندڙ عورت پورھيت مختيار چهواڻ، آزاد قادر پنهور ، وفا بلوچ، شوڪت خاصخيلي ، ممتاز علي ۽ ٻين ٻڌايو ته گذريل 6 سالن کان ھڪ ڪاٽن جي ڪارخاني ۾ ٺيڪيداري نظام ھيٺ ڪم ڪريون ٿا 8 کان 10 ڪلاڪ روزانو پورھيو ڪرڻ جي موٽ ۾ 500 روپيه ڏھاڙي ادا ڪئي وڃي ٿي. ھنن موجب ٺيڪيداري نظام تحت ٺيڪيدار ھر ھفتي پئسن جي ادائيگي ڪري ٿو جيڪڏھن بيماري سبب ھو موڪل ڪندا آھيون ته ڏھاڙي ڪٽي ويندي آھي ھنن جو چوڻ ھو ته ٺيڪيدار جڏھن به چاھي ڪم کان جواب ڏئي ڇڏي ٿو باقي سالانه بونس پڪو ٿيڻ علاج وغيره ڪرائڻ سميت ڪا به سھولت مھيسر نه آھي جيڪڏھن ڪو به پورھيت بيمار ٿي پوندو آھي ته ھو پنھنجي خرچ تي علاج ڪرائيندو آھي. مل جو ڪارڊ وغيره به نه ڏنو ويندو آھي، 18 سالن کان گھٽ عمر جي پورھيتن فرقان شيخ، علي رضا سومرو، سرمد سولنگي ۽ ٻين ٻڌايو ته غربت سبب ڪارخانن ۾ ڪم ڪريون ٿاڦٽين جي ڪارخاني ۾ رنگ کاتي ۾ ڪم ڪريون ٿا جتي ٺيڪيدار 8 ڪلاڪ ڪم ڪرائي 500 روپيه ڏھاڙي ڏيندو آھي جڏھن ته 12 ڪلاڪ عيوض 750 روپيه ملندا آهن، ڪارخانن ۾ ڪم دوران معذور ٿيل پورھيت خالد پنهور، احسان احمد ۽ ٻين ٻڌايو ته ڦٽين جي ڪارخانن ۾ ڪم ڪندا هئاسين. رات جي شفٽ ۾ ڪم ڪندي ھٿن جون آڳريون ۽ ھٿ اچانڪ مشين ۾ اچي ويا جنھن سبب معذور ٿي وياسون. ھنن جو چوڻ ھو ته مل انتظاميا رڳو نالي ماتر علاج ڪرايو پر ڪو به معاوضو ادا ڪرڻ بنا گھرن ڏانھن روانو ڪري ڇڏيو ۔مهيني ۾ 1500 روپيه ڏنا ويندا آهن، پورھيت اڳواڻن اڪبر ميمڻ، امجد مستوئي، ظهير ميراڻي ۽ ٻين جو چوڻ ھو ته ڪارخانن ۾ ليبر قانون تي عمل نه پيو ڪيو وڃي. اڪثر ڪارخانن ۾ ٺيڪداري راڄ قائم آھي جنھن ڪري پورھيتن کي ڪو به قانوني حق نٿو ملي ھنن چيو ته ڪارخانن ۾ يونين سازي تي پابندي لڳل آھي 2012 جي نئين ليبر آرڊيننس تي به عمل نٿو ڪيو وڃي۔ جيڪڏھن ليبر قانون تي عمل ڪيو وڃي ته پورھيتن کي سمورا حق ملي سگھن ٿا، رابطي ڪرڻ تي وڪيل منصور احمد چنه ٻڌايو ته ڪارخانن ۾ ليبر قانون تي عمل نه ڪرڻ قانون جي سنگين ڀڃڪڙي آھي ننڍي عمر جي ٻارن کان پورھيو وٺڻ پڻ قانوني ۽ اخلاقي ڏوهه آھي، ليبر ڊائريڪٽر ڄامشورو عبدالصمد سومرو جو چوڻ ھو ته جيڪو به پورھيت شڪايت کڻي اچي ٿو ان جي درخواست تي قانوني قدم کڻون ٿا، ٺيڪيداري نظام سميت ليبر قانون تي عمل ڪرائڻ لاء مل انتظاميا کي ليٽر لکيا آھن ۽ انھن کي ليبر قانون تي عمل ڪرڻ لاء سختي سان ھدايتون ڏنيون آھن، ڪوٽڙي ايسوسيئشن آف ٽريڊ اينڊ انڊسٽري جي اڳوڻي چيئرمين خليل بلوچ ٻڌايو ته هي سنڌ جو ٻئي نمبر وڏو صنعتي زون آھي هزارين پورهيت ڪم ڪن ٿا، قانون موجب کين سهولتون فراهم ڪرڻ اسان جو فرض آھي، بجلي، گيس مهانگي هئڻ سبب ڪيترائي مسئلا پيش اچن ٿا، روڊ رستن سميت ٻيون سهولتون نه هئڻ ڪري ٻاهران انويسٽر نه ٿا اچن وفاقي توڙي صوبائي حڪومت کي ڪيترائي ڀيرا لکيو آهي پر ڪو به ڪم نه ٿو ٿئي پورهيتن کي مڪمل تحفظ ۽ حق ڏنا وڃن ٿا، ڊپٽي ڪمشنر ڄامشورو ڪيپٽن (ر) فريد الدين مصطفيٰ رابطي ڪرڻ تي چيو ته ضلعي ڄامشورو ۾ قائم ڪارخانه ليبر قانون تي عمل ڪرڻ جا پابند آھن، جيڪو به ليبر قانون جي ڀڃڪڙي ڪندو ان خلاف ڪاروائي ڪئي ويندي.
”ٺيڪيداري نظام“ ڪوٽڙي سائيٽ جي فيڪٽريز ۾ ڪم ڪندڙ پورهيت بنيادي حقن کان محروم
150 ڪارخانن مان 130 اڃا به هلندڙ، ٺيڪيداري نظام سبب پورهيتن کي ڪي به حق ملي نه سگهيا
مختلف ڪارخانن ۾ ڪم ڪندڙ پورهيتن کي سوشل سيڪيورٽي، اولڊ ايج بينيفٽ سميت ڪي سهولتون نه مليون
ڪوٽڙي )رپورٽ: مجيد پنهور( ڪوٽڙي سائيٽ 1962 ۾ ٻن فيز تي 2175 ايڪڙن تي مشتمل 150 مان ھن وقت 130 جي ننڊا وڏا ڪارخانه هلندڙ آهن ۔ جن ۾ 25 ھزار کان مٿي پورھيت ڪم ڪن ٿا قائم ٿيل انھن ڪارخانن ۾ اڪثريت ڦٽين، جيننگ، سگريٽ، چمڙو، سرف، تارون، بيٽريون، آئل، ڪاغذ، ٽرانسفارمر، هارڊ بورڊ، پکا، چانور، موٽرسائيڪل آئل ۽ اٽي جا ڪارخانا شامل آھن جن ۾ ڊيلي ويجز ۽ ٺيڪيداري نظام رائج ھجڻ سبب ڪيترن ئي سالن کان ڪم ڪندڙ پورھيت به پڪا ٿي نه سگھيا آھن جڏھن ته ليبر قانون موجب جيڪو به پورھيت ٽن مھينن تائين ڪنھن به ڪارخاني ۾ پورھيو ڪري ٿو ان کي پڪو ڪرڻ لازمي ھجي ٿو پر ھتي پڪو ڪرڻ ۽ ٻيا حق گھرڻ تي پورھيتن کي نوڪرين کان برطرف ڪيو ٿو وڃي. ليبر قانون تي عمل نه ٿيڻ ڪري پورھيت پڪو ٿيڻ سان گڏ رٽائرمينٽ، پينشن، گريجوئيٽي، سالانه بونس، موڪلن، علاج، تعليم، نياڻين جي شادي لاء ڏاج فنڊ ۽ ٻين بنيادي حقن کان مرحوم آھن. سنڌ حڪومت پورھيت جي گهٽ ۾ گهٽ پگھار 16 ھزار روپيه مقرر ڪرڻ جو اعلان ڪيو ھو پر ان تي به ڪٿي ڪٿي عمل ٿي نه سگھيو آھي. ڦٽين جي ڪارخانن ۾ ڪم ڪندڙ اڪثريت ننڍن ٻارن ۽ عورتن جي ھجي ٿي جن کان گھٽ معاوضي تي ڪم ورتو پيو وڃي. ھڪ اندازي موجب ڪوٽڙي جي ڪارخانن ۾ ٽي کان چار هزار ننڍا ٻار ۽ ٻن ھزارن جي لڳ ڀڳ عورتون پورھيو ڪن ٿيون جيڪي دز سبب ٽي بي، ساھ ۽ گلي جي ڪينسر ۾ وڪوڙجي وڃن ٿا جن جو علاج نالي ماتر ڪرائي کين نوڪرين کان جواب ڏنو وڃي ٿو. ٻئي پاسي ڪارخانن ۾ يونين سازي تي پابندي ھجڻ سبب پورھيت پنھنجن حقن لاء ڪو به آواز اٿاري نه ٿا سگھن. اڪثر ڪارخانن ۾ انتظاميان پاران پاڪيٽ يونين ٺاھيل ھجن ٿيون جيڪي پورھيتن بجاء مل مالڪن جي ترجماني ڪن ٿيون ۔ جڏهن ته ڦٽين جي ڪارخانن ۾ ڪم ڪندي پورھيتن جا ھٿ ۽ آڳريون ھٿ ۽ ٻانھن مشينن ۾ اچڻ سبب ڪٽجي وڃن ٿا اهڙن پورھيتن کي قانون مطابق مڪمل علاج ڪرائي معاوضو پڻ ادا ڪرڻو ھجي ٿو پر ھتي متاثر ٿيل پورھيتن جو نالي ماتر علاج ڪرائي کين بنا معاوضي گھرن ڏانھن روانو ڪيو وڃي ٿو سنڌ جي ھن ٻئي وڏي صنعتي زون ۾ ليبر ڊاريڪٽر ۔ ليبر آفيسر سميت ليبر عملدار مقرر ھجن ٿا پر اھي پورھيتن جي ڪا به داد رسي ڪرڻ بجاء مل مالڪن سان ملي ڀڳت ڪري پورهيت لاء ڪو به قدم نه ٿا کڻن.
سنڌ اين ايف سي لاءِ ميمبر نامزد ڪيو آھي : اسد عمر
اسلام آباد )رپورٽر)آخرڪار سنڌ درڪار اين ايف سي ڪميشن لاءِ ميمبر نامزد ڪري ڇڏيو آھي سنڌ صوبي مان نامزدگي بعد وفاقي ناڻي وزارت اٺين اين ايف سي ايوارڊ ڏيڻ لاءِ ڏھين اين ايف سي ڪميشن قائم ڪرڻ لاءِ سمري صدر ڊاڪٽر عارف علوي کي اماڻي ڇڏي آھي ناڻي وزير اسد عمر صحافين سان ڳالهائيندي چيو آھي ته سنڌ صوبي مان نامزدگي ملي آھي اين ايف سي ڪميشن قائم ڪرڻ لاء سمري صدر کي اماڻي آھي جيئن صدر اين ايف سي ڪميشن قائم ڪري ٿو ،اين ايف سي ڪميشن جو فوري اجلاس طلب ڪيو ويندو هن چيو ته مان ارڙھين ترميم جي حق ۾ آھيان آئين تحت صوبن جو وسيلن ۾ موجود حصو گهٽ نٿا ڪري سگهون پر تمام وڏا خرچ هاڻي به وفاق جي ذمي آھن ارڙھين ترميم تحت جيڪي شعبا صوبن کي مليا آھن انهن تي صوبن کي خرچ ڪرڻ گهرجي ان حوالي سان اين ايف سي ڪميشن ۾ صوبن سان گالھ ٻول ٿيندي ياد رهي ته سنڌ صوبي کان سوا باقي ٽي صوبا اين ايف سي ڪميشن ۾ پهنجا ميمبر نامزد ڪري چڪا ھئا رڳو سنڌ صوبي مان نامزدگي باقي هئي جيڪا ٿي وئي آھي.
مٺي ۾ بک ۽ بدحالي وڌيڪ ٽن ٻارڙن کان حياتي کسي ورتي
مٺي(رپورٽر) سول اسپتال مٺي ۾ خوراڪ جي کوٽ ۽ مختلف بيمارين وگهي وڌيڪ ٽي ٻارڙا موت جو شڪار ٿي ويا آھن. جنهن کان پوءُ هلندڙ مهيني فوتي ٻارڙن جو انگ 50 ٿي ويو ۽ هلندڙ سال ٻارن جي فوتگين جو انگ 620 تي پهچي ويو آهي. تازو فوت ٿيل 3 ٻارڙن ۾ 18 مهينن جو ڀيرجي، 17 مهينن جو مدن ۽ چار سالن جو سلمان ساهڙ شامل آھن. اسپتال ۾ وڌيڪ ٻ 40 ٻارڙن کي ميل نيوٽريشن ۽ نرسري وارڊن ۾ داخل ڪيو ويو آھي . جنهن کان پوءُ اسپتال داخل ٻارن جو انگ 60 ٻڌايو وڃي ٿو.
اومني گروپ ۽ خانگي پاور پلانٽس کي سبسڊي ڪيئن ملي؟: دلچسپ حقيقت پڌري
ڪراچي)رپورٽر)اومني گروپ ۽ ٻين نجي پاور پلانٽس کي سبسڊي ڪيئن ملي،دلچسپ حقيقتون آڏو اچي ويون،پي ٽي آءِ جي سنڌ اسيمبلي جي ميمبر خرم شير زمان نجي پاور پلانٽس کي سبسڊي ڏيڻ جو ٺهراءُ منظور ڪرايو جڏهن ته پيپلز پارٽي جي ڪنهن ميمبر اومني گروپ ۽ ٻين پاور پلانٽس کي سبسڊي ڏيڻ جو ٺهراءُ پيش ڪرڻ کان انڪار ڪيو هو،ڪيپٽو پاور پلانٽس کي سبسڊي ڏيڻ جو ٺهراءُ 16 مئي 2017ع تي سنڌ اسيمبليءَ ۾ پيش ڪيو،ذريعن موجب صوبائي وزير ناصر شاهه سان اڪيلائي ۾ ملاقات کان پوءِ خرم شير زمان اهڙي قرارداد پيش ڪئي هئي، انهيءَ حوالي سان سوال اٿي رهيا آهن ته خرم شير زمان اومني گروپ ۽ پاور پلانٽس کي سبسڊي ڏيارڻ جي جو ٺهراءُ پيش ڪرڻ لاءِ ڇا ڪا ڊيل ڪئي هئي؟سنڌ اسيمبليءَ 3 جولاءِ 2017 ع تي نجي پاور پلانٽس کي سبسڊي ڏيڻ جو ٺهراءُ منظور ڪيو هو،14 جولاءِ تي ان وقت جي گورنر محمد زبير بل جي مخالفت ڪئي جنهن بعد 24 جولاءِ 2017 تي ساڳيو ئي ٺهراءُ ٻيهر منظور ڪيو ويو،پي ٽي آءِ جي ميمبر خرم شير زمان ڪنهن به مرحلي تي بل جي مخلافت نه ڪئي هئي
گئس بحران:ڪراچي جي صنعتڪارن پاران سومر کان صنعتون بند ڪرڻ جو اعلان
سومر تي هڪ به صنعت نه کلندي،اڱاري تي گورنر هائوس آڏو احتجاج ڪبو: صنعتڪار
ڪراچي)رپورٽر)ڪراچي جي صنعتڪارن گئس بحران خلاف سومر تي صنعتون بند ڪرڻ جو اعلان ڪري ڇڏيو آهي،نجي ٽي وي سان ڳالهائيندي ڪراچي سائيٽ ايريا صنعتڪار ايسوسيئيشن جي صدر جو چوڻ هو ته گئس بحران سبب صنعتڪارن کي روزانو ٻن کان پنجن ارب روپين جو نقصان ٿي رهيو آهي،هن چيو ته سومر کان ڪراچيءَ ۾ سموريون صنعتون بند ڪيون وينديون،سومر تي هڪ به صنعت نه کلندي،هن چيو ته اڱاري تي گورنر هائوس ڪراچي آڏو احتجاج ڪيو ويندو،هن جو وڌيڪ چوڻ هو ته گئس جي بحران ڪري صنعتڪارن کي سخت نقصان ٿي رهيو آهي.