ممبئي (شوبز ڊيسڪ) بالي ووڊ ادڪار شاره رخ خان چيو آهي ته هر انسان ۾ کوٽون هونديون آهن، هر عيب کان پاڪ رڳو الله جي ذات آهي. ڀارتي ميڊيا موجب اداڪاره شاه رخ خان هڪ انٽرويو ۾ چيو ته هو پنهنجي غلطين ۽ کوٽن باوجود اڄ هڪ اسٽار آهي، کوٽن کان پاڪ ناهيان، ڪيتريون ئي کوٽون ۽ خوبيون هر انسان ۾ هونديون آهن. هن چيو ته مداح غلطين ۽ کوٽن باوجود پسند ڪن ٿا، مون کي رقص نٿو اچي، نه ئي خوبصورت آهيان ۽ بهترين اداڪاري به نٿو ڪري سگهان، جيڪڏهن مون ۾ کوٽون نه هجن ها ته مان بهترين ادڪار هجان هان.
ممبئي (شوبز نيوز ) صبا قمر ۽ عرفان خان جي بالي ووڊ فلم ” هندي ميڊيم“ بلاڪ باسٽر ثابت ٿي هئي، جنهن ڀارت ۾ 3 سئو ڪروڙ روپين جو بزنس ڪيو هو، هاڻ ان ڪامياب فلم جو سيڪيول ٺاهيو ويندو. ڀارتي ميڊيا موجب فلسمازن ان سلسلي ۾ عرفان خان سان لنڊن ۾ ملاقات پڻ ڪئي، جيڪو نيورو اينڊوڪرائن ڪينسر جي علاج ڪرائي رهيو آهي،فلم هدايتڪار بالي ووڊ بادشاهه شاهه رخ خان ۽ ڪاجول کي ” هندي ميڊيم “ جي سيڪوئل ۾ ڪاسٽ ڪرڻ جو فيصلو ڪيو آهي. دنيش ويجان ۽ ڀوشن ڪمار جي پروڊڪشن ۽ ساڪت چوڌري جي هدايتڪاري هيٺ ٺاهيل فلم هندي ميڊيم جي ڪهاڻي چاندني چوڪ جي شادي شدا جوڙي جي زندگي تي ٻڌل آهي، جيڪي پنهنجي نينگري کي انگريزي اسڪول ۾ داخل ڪرائڻ لاءِ دهلي لڏي ويندا آهن.
ممبئي (شوبز نيوز) بالي ووڊ ڪوئين ڪنگنا راناوت جي نئين فلم “ماني ڪرنيڪا” جون پهريون جهلڪيون جاري ڪيون ويون آهن. ٽن منٽن جي ٽريلر ۾ ڪنگنا کي هڪ عام ڇوڪري مانو کان جهانسي جي راڻي ۽ هڪ آزادي پسند راڻي جي ڪردار ۾ ڏيکاريو ويو آهي. ايسٽ انڊيا ڪمپني جهانسي تي قبضو ڪرڻ چاهي ٿي، جڏهن ته ساڳي وقت هندستاني انگريزن خلاف بغاوت جو اعلان ڪن ٿا. فلم جي مک ڪردار ۾ ڪنگنا راناوت شامل آهي، جڏهن ته ڊيني ڊينزونگپا فلم ۾ غلام غوث خان جو ڪردار ادا ڪيو آهي. فلم جا ٻيا اهم ڪردار جشو سين گپتا، سريش اوبراءِ، اتل ڪولڪرني، زيشان ايوب ادا ڪري رهيا آهن. ايڪشن ۽ تجسس سان ڀرپور فلم کي 25 جنوري تي ريليز ڪيو ويندو.
ممبئي (شوبز نيوز) بالي ووڊ جي خوبصورت اداڪارا ڪترينا ڪيف پنهنجي شادي جي حوالي سا نيٺ بيان ڏنو آهي. ممبئي ۾ پنهنجي نئين ايندڙ فلم “زيرو” جي مشهوري تقريب دوران صحافين پاران شادي جي حوالي سان پڇيل سوال جي جواب ۾ ڪترينا ڪيف چيو ته سندس شادي جي سڀني کي فڪر آهي ته مان ڪڏهن ڪنديس، پر منهنجو مڃڻ آهي ته شادي لاءِ ڪا منصوبابندي ناهي ڪبي، مان اها وقت تي ڇڏي ڏني آهي. شادي اهڙي شيءِ ناهي جو توهان انٽرنيٽ تي وڃي بٽڻ دٻايو ۽ گهوٽ حاضر ٿي وڃي، ان ۾ وقت لڳندو آهي، منهنجي لاءِ شادي جي منصوبابندي غير ضروري آهي. جيڪڏهن شادي ٿيڻي هوندي ته پاڻ ئي ٿي ويندي. ڪترينا ڪيف چيو ته جيڪڏهن مونکي ضرورت محسوس ٿي شادي لاءِ پاڻ کي پيش ڪري ڇڏيندس.
لاهور (شوبز نيوز) لالي ووڊ اداڪارا ميرا جي بينڪ اڪائونٽ مان هيڪر لکين روپيا ڪڍرائي ويا آهن. لاهور ۾ ميڊيا سان ڳالهائيندي ميرا چيو ته سندس اڪائونٽ مان 4 لکن جي رقم غائب ٿي وئي آهي، جيڪا هڪير چورائي ويا آهن. ميرا چيو ته هن ان حوالي سان بينڪ سان ڳالهايو پر بينڪ طرفان ڪو به جواب ناهي آيو، تنهنڪري جلد پريس ڪانفرنس ڪندس. ان موقعي تي اداڪارا چيو ته هو جلد پنجاب جي ثقافت واري وزير فياض الحسن چوهاڻ سان ملاقات ڪندي ۽ حڪومت کان اپيل ڪندي ته فلم ٺاهڻ ۾ سندس مدد ڪئي وڃي.
ممبئي (شوبز ڊيسڪ) بالي ووڊ اداڪار شاهه رخ خان چيو آهي ته جيڪڏهن آريان خان چاهي ٿو ته هو ضرور اداڪاري ڪري. ڀارتي ميڊيا موجب فلمساز ڪرن جوهر طرفان شاهه رخ جي پٽ آريان خان کي فلم انڊسٽري ۾ متعارف ڪرائڻ واري بيان تي ڳالهائيندي اداڪار شاهه رخ خان چيو ته ڪرن جوهر تمام سٺو ماڻهو آهي، کيس حق آهي ته هو ائين ڪري، ڇو ته هو سٺو دوست آهي پر جيڪڏهن آريان چاهي ته ضرور ائين ٿئي. هن چيو ته آريان فلمساز ٿيڻ چاهي ٿو، پر فلمساز ٿيڻ لاءِ به کيس سکڻ ۽ تعليم پرائڻ لاءِ 5 کان 6 سال جو وقت گهربل هوندو. شاهه رخ خان جي فلم ”زيرو“ هلندڙ مهيني 21 تي ريليز ڪئي ويندي.
ممبئي (شوبز ڊيسڪ) بالي ووڊ اداڪار سيف علي خان جي ڌيءُ ساره علي خان چيو آهي ته اداڪار بنا منهنجي زندگي اڻپوري ناهي. ڀارتي ميڊيا موجب اداڪاره ساره علي خان جو چوڻ هو ته اداڪاري جو مقصد حقيقت پسندي ۽ ان سان سلهاڙيل رهڻ آهي. هن چيو ته مون کي خوشي آهي ته شوقينن منهنجي حقيقت پسندي جي واکاڻ ڪئي پر اداڪاري ۾ جتي داد مليو اتي تنقيد به ٿيندي آهي ۽ اهي ٻئي شيون گڏ هلڻ گهرجن. سندس چوڻ هو ته اداڪاري پسند آهي ۽ اداڪاري بنا منهنجي زندگي اڻپوري آهي، مان اهڙن ڪردارن کي اوليت ڏيندي آهيان، جيڪي دلچسپي جو سبب هوندا آهن. ساره علي خان فلم ”سمبا“ ۾ ادڪار رنوير سنگهه سان مرڪزي ڪردار ۾ نظر ايندي، جيڪا 28 ڊسمبر تي ريليز ٿيندي.
لاس اينجلس(شوبز نيوز) فلپائني گلوڪاره، اداڪاره، ماڊل ۽ ٽي وي ميزبان ڪيٽريونا گري مس يونيورس 2018ع جو تاج کٽي ورتو آهي. پرڏيهي ميڊيا موجب فلپائني آسٽريلوي گلوڪاره، اداڪاره ۽ ٽي وي ميزبان ڪيٽريوناگري بينڪاڪ ۾ ٿيل 2018ع جي مس يونيورس جي حسن جو مقابلو کٽي ورتو، جنهن ۾ هن 93 ٻين ملڪن جي عورتن کي شڪست ڏني. مس يونيورس جي حسن جي مقابلي ۾ مس يونيورس 2017ع جي ڏکڻ آفريقا جي ڪامياب اميدوار ڊيمي لي ليگ نيل پيٽرس پنهنجو تاج ڪيٽريونا گري کي پارايو. حسن جي مقابلي جي پهرين رنر اپ ڏکڻ آفريقا جي تمارين گرين جڏهن ته ٻئين رنر اپ وينزويلا جي اسٽيهفني گوٽيرز کي قرار ڏنو ويو
ممبئي (شوبز نيوز) بالي ووڊ جي نالي واري اداڪار رنوير سنگهه پنهنجي محبوبا ۽ گهرواري اداڪاره دپيڪا پڊوڪون کي روئاري ويٺو آهي. هڪ ايوارڊ تقريب دوارن رنوير سنگهه دپيڪا پڊوڪون سان محبت جو اظهار ڪيو ته هوءَ لڙڪ روڪي نه سگهي. رنوير سنگهه ايوارڊ تقريب دوران چيو ته کيس فلمن ۾ ڪڏهن کيس راڻي نه ملي پر حقيقت ۾ کيس راڻي ملي وئي آهي، مان دپيڪا سان تمام گهڻي محبت ڪيان ٿو، گذريل ڇهه سالن دوران جيڪڏهن مان پنهنجي زندگي ۾ ڪجهه حاصل ڪيو آهي ته اهو دپيڪا جي ڪري حاصل ڪيو آهي. رنوير جو ڳالهيون ٻڌي دپيڪا پنهنجي جذبن تي قابو نه ڪري سگهي ۽ روئي ڏنائين. ان دوران اداڪار رنوير سنگهه فلم پدمات ۾ ڪردار تي بهترين اداڪار جو ايوارڊ حاصل ڪيو.
لاس اينجلس (شوبز)اسپائيڊرمين اتر آمريڪا جي باڪس آفيس تي راڄ قائم ڪري ورتو آهي. اسپائيڊر مين ريليز ٿيڻ کانپوءِ سڄو هفتو شاندار بزنس ڪندي 3 ڪروڙ 54 لک ڊالر ڪمائي ڪري ورتي. اينيميٽڊ ايڪشن ۽ ايڊوينچر سان ڀرپور “اسپائيڊر مين ان ٽو دا اسپائيڊر وَرس” کي 14 ڊسمبر تي ريليز ڪيو ويو هو. ٻي نمبر تي باڪس آفيس تي ڏوهارين تي ٺهيل فلم دا ميول رهي، جنهن هڪ ڪروڙ 72 لک ڊالر ڪمائي ورتا. دا گرنچ گذريل هفتي باڪس آفيس تي ٽيون نمبر ماڻيو. رالف بريڪس دا انٽرنيٽ لڳاتار ٽن هفتن تائين باڪس آفيس تي راڄ ڪرڻ کانپوءِ گذريل هفتي چوٿين نمبر تي ڪاروبار ڪيو.
ممبئي (شوبز ڊيسڪ) مشهور بالي ووڊ اداڪار عمران هاشمي انڪشاف ڪيو آهي ته تعيلم دوران ڪاپي ڪري 75 سيڪڙو مارڪن سان پاس ٿيو هئس، پر اڄ تائين ان عمل تي وڏي شرمندگي آهي. پنهنجي نئين فلم ”چيٽ انڊيا“ جي مشهوري ۾ مصروف اداڪار عمران هاشمي هڪ انٽرويو دوران پڇيل سوال جي جواب ۾ چيو ته زندگي ۾ هڪ ڀيرو ڪاپي ڪري پاس ٿيو هئس. هن چيو ته معاشيات جي پرچن جي تياري بلڪل به نه ڪئي هئي، جن ۾ ڪاپي ڪري پاس ٿيس. اهڙي عمل تي ڳڻتي ڏيکاريندي عمران هاشمي چيو ته اڄ مون کي اهو ٻڌائيندي شرم اچي رهيو آهي، مون کي خبر آهي ته ڪاپي بلڪل به سٺو عمل ناهي، آئون اهو چوندس ته ڪنهن کي به نقل نه ڪرڻ گهرجي.
ممبئي (شوبز نيوز) بالي ووڊ توڙي ٽي وي پروگرامن جو ڪاميڊي ڪنگ ڪپيل شرما شادي کانپوءِ دعوت رکي، جنهن ۾ ڪيترن ئي اداڪارن شرڪت ڪري تقريب کي چار چنڊ لڳائي ڇڏيا. ڪپيل شرما پنهنجي دوست گيني ڇهاترا سان 12 ڊسمبر تي جهالندر ۾ شادي جي ٻنڌڻن ۾ ٻڌجي ويو هو. شادي کانپوءِ ڪپيل شرما دعوت ڪئي جنهن ۾ سندس ساٿي اداڪار شريڪ ٿيا. تقريب ۾ ڀارتي سنگهه، ڪرشنا اڀيشڪ، ڪڪو شردا، سمونا چڪرورتي شريڪ ٿيا، جڏهن ته تقريب جون تصويرون سوشل ميڊيا تي وائرل ٿي ويون آهن.
ممبئي (شوبز نيوز) بالي ووڊ اداڪاره پرنيتي چوپڙا شادي ڪرڻ لاءِ تياريون ڪري رهي آهي. بالي ووڊ ۾ شادي جي سيزن ختم ناهي ٿي، دپيڪا پڊوڪون، رنوير سنگهه، نڪ جوناس ۽ پريانڪا چوپڙا، ڪپيل شرما کانپوءِ هاڻي ڀارتي ميڊيا جي رپورٽ موجب پرنيتي چوپڙا پڻ پنهنجي ويجهي دوست چيرٽ ديسائي سان شادي جي ٻنڌڻن ۾ ٻڌجڻ لاءِ تيار آهي. چيرٽ ۽ پرنيتي چوپڙا وچ ۾ دوستي جو خبرون 2017ع کان هلي رهيون آهن، هو بالي ووڊ ۾ اسسٽنٽ ڊائريڪٽر طور ڪم ڪري رهيو آهي. چيرٽ ديسائي اگني پاٿ ۾ اسٽنٽ ڊائريڪٽر طور ڪم ڪيو هو، جڏهن ته چيرٽ ديسائي ۽ پرنيتي چوپڙا ۾ پهرين ملاقات 2016ع ۾ ٿي هئي.
ممبئي (شوبز ڊيسڪ) ڀارتي کرب پتي مڪيش امباڻي جي ڌيءُ جي شادي ۾ سڀني کان وڏي ڳالهه بالي ووڊ ستارن جي مهمان نوازي آهي، جيڪي مڪمل طور ”ڪنواريتا“ ڏسڻ ۾ آيا. اميتاڀ بچن، عامر خان، ايشوريه ۽ اڀيشيڪ بچن سوڌو ڪيترن ئي فلمي شخصيتن مهمانن کي کاڌو ڏيندي نظر آيا. تقريب ۾ شرڪ ڪندڙ مهمانن به روايتي گجراتي کاڌن سان ڀرپور انصاف ڪيو. ريلائنس انڊيسٽريز جي مالڪ مڪيش امباڻي جي ڌيءُ ايشا امباڻي سائيڪلوجي ۽ سائوٿ ايشين اسٽڊيز ۾ ماسٽرز ڪئي آهي، جڏهن ته آنند پرامل ڀارت جي مشهور ترين ڪاروباري خاندان سان واسطو رکي ٿو، ٻئي خاندان هڪ ٻئي کي 4 ڏهاڪن کان سڃاڻين ٿا.
ممبئي (شوبز ڊيسڪ) سال 2018 کي شادين جو سال چئجي ته غلط نه هوندو، هن سال ڪيترن ئي مشهور شخصيتون ۽ ستاره به شادي جي ٻنڌڻن ۾ ٻڌجي ويا، پر گوگل موجب هلندڙ سال برطانوي شهزادي هيري ۽ آمريڪي اداڪاره ميگهن مارڪل جي شادي سڀني کان مشهور شادي رهي، جڏهن ٻي نمبر تي بالي ووڊ اداڪاره پريانڪا ۽ آمريڪي گلوڪار نڪ جوناس جي شادي سڀ کان وڌيڪ گوگل تي ڳولي وئي. گوگل تي هلندڙ سال سڀ کان گهڻو ڳولي ويندڙ شادين جي لسٽ ۾ شهزادي هيري ۽ ميگهن مارڪل جي شادي پهرين نمبر تي آهي، جوڙي مئي مهيني ۾ شادي ڪئي هئي. گوگل موجب صارفين ٻي نمبر تي پريانڪا ۽ نڪ جوناس جي شادي کي سڀ کان وڌيڪ ڳوليو. لسٽ ۾ ٽئين نمبر تي ملڪه برطانيه الزبٿ ٻئين جي پوٽي شهزادي يوجين جي شادي آهي. چوٿين نمبر تي آمريڪي ٽيٽو آرٽسٽ، ماڊل، ليکڪ ۽ ٽي وي شخصيت ڪيٽ وون ڊي ۽ رافيل ريز جي شادي آهي. انهن کانسواءِ سال 2018 ۾ سڀ کان وڌيڪ ڳوليون ويندڙ شادين جي لسٽ ۾ بالي ووڊ اداڪاره دپيڪا پڊوڪون ۽ اداڪار رنوير سنگهه جي شادي پنجين نمبر تي آهي. هوڏانهن هن سال ڪيترن ئي پاڪستاني فنڪارن به شاديون ڪيون، پر ڪا به ان لسٽ ۾ جاءِ ٺاهڻ ۾ ڪامياب نه ٿي سگهي.