بينوئي (اسپورٽس ڊيسڪ) پاڪستان پريڪٽس ميچ ۾ ڏکڻ آفريڪا انويٽيشن اليون کي شڪست ڏئي ڇڏي. ميچ جي ٽئين ڏينهن 197 رنسن جي هدف جي جواب ۾ امام الحق ۽ حارث سهيل جي شاندار بيٽنگ سبب پاڪستان گهربل هدف 4 وڪيٽن تي حاصل ڪري ڪاميابي ماڻي. بينوئي ۾ کيڏيل پريڪٽس ميچ جي ٽئين ڏينهن حارث سهيل 73 ۽ امام الحق 66 رنسن جي شاندار اننگ کيڏي. هوڏانهن ڏکڻ آفريڪا ۽ پاڪستان جي ٽيمن ۾ ٽن ٽيسٽ ميچن تي ٻڌل پهرين ميچ 26 کان 30 ڊسمبر تائين سنچورين ۾ کيڏي ويندي.
لاهور (اسپورٽس نيوز) پاڪستان ۾ عالمي ڪرڪيٽ بحال ڪرڻ لاءِ پي سي بي پنهنجون ڪوششون تيز ڪري ڇڏيون آهن. ان حوالي سان ايندڙ سال پاڪستان ۽ آسٽريليا ۾ ايندڙ سال يو اي اي ۾ پنج ون ميچن جي سيريز ٿيندي. پي سي بي ڪرڪيٽ آسٽريليا کان اپيل ڪئي آهي ته پي ايس ايل جو ڪامياب ميچون ٿين کانپوءِ آسٽريليا سڪيورٽي جو جائزو وٺي پوءِ پاڪستان اچڻ يا نه اچڻ جو فيصلو ڪري. ان حوالي سان ڪرڪيٽ آسٽريليا جي ترجمان پاران جاري ڪيل بيان ۾ چيو آهي ته پاڪستان ۾ سڪيورٽي صورتحال بهتر ٿي آهي، پاڪستان جي دوري بابت غور ڪري رهيا آهيون پر ان حوالي سان رانديگرن توڙي آفيشلز سان رابطا جاري آهن. سندس چوڻ هو ته هو پي سي بي سان رابطي ۾ آهن ۽ دوري بابت غور ڪري رهيا آهن. آسٽريليا پاران جيڪڏهن پاڪستان جي دوري لاءِ راضي ٿي وئي ته سندس 20 سالن کانپوءِ سندس پهريون پاڪستان دورو هوندو.
جيڪب آباد (رپورٽر) جيڪب آباد ۾ ميونسپل ڪميٽي جي بي ڌياني سبب 4 ڪروڙ جي لاڳت سان ٺهيل فٽبال ميدان نيڪال جي پاڻي هيٺ اچي ٻڌي ويو، رانديگر انتظاميه جي بي ڌياني خلاف روڊن تي نڪري آيا.
فيفا جي نگراني ۾ ٺهيل شاهه عبد الطيف اسٽيڊيم ۾ شهر جي نيڪال جو پاڻي وهڻ لڳو، پاڻي سبب سڄو ميدان خراب ٿي ويو. هوڏانهن فٽبال ايسوسي ايشن جي صدر نظر محمد بروهي، ڪوچ سهراب کوسي ۽ حاجي اصغر بروهي سميت ٻين رانديگرن اتنظاميه خلاف احتجاج ڪيو.
رانديگرن جو چوڻ هو ته ڪيترائي ڀيرا ميونسپل ڪميٽي جي عملدارن کي شڪايت ڪئي، جواب ۾ چيو ويو ته عملو شادي تي ويل آهي، جنهن سبب ڪم متاثر ٿي رهيو آهي.
هنن چيو ته اسان جي شڪايتن ڪو به ڌيان نه ويو، نالين جو گندو پاڻي اوور ٽاپ ٿي ميدان ۾ داخل ٿي ويو آهي، جنهن سبب اڄ اسان جي ٿيندڙ ميچ به نه ٿي سگھي، سکيا لاءِ ايندڙ رانديگر به مايوس ٿي ويا آهن.
رانديگرن اعليٰ اختيارين کان مطالبو ڪيو ته ميدان مان بنا دير گندو پاڻي ڪڍيو وڃي ته جيئن راند متاثر نه ٿي سگهي.
سکر (رپورٽ: ممتاز بخاري) اڳوڻي فٽبالر ۽ ڪوچ امداد حسين شاهه چيو آهي ته پاڪستان ۾ فٽبال ڌيان نه ڏيڻ سبب پروفيشنل راند ناهي رهي، قومي توڙي هيٺين سطح وارن رانديگرن کي معاوضو نه هئڻ برابر ملڻ تي ڪهڙو نتيجو ايندو. پنهنجي اخبار سان ڳالهائيندي روهڙي سان تعلق رکندڙ 60 ورهين جي اڳوڻي فٽبالر ۽ هاڻوڪي ڪوچ امداد حسين شاهه چيو ته هن چيو ته8 سال اڳ فيفا ملڪ ۾ فوٽ بال جون 5 اڪيڊميون ڏنيون، جن ۾ 2 پنجاب ۽ 3سنڌ لاءِ هيون، سنڌ ۾ رڳو ڪراچي جي هاڻ مڪمل ٿي آهي باقي سکر ۽ جيڪب آباد واريون اڪيڊميون اڃان تائين رولڙي جو شڪار آهن، اهڙي حالتن ۾ اسان عالمي معيار تي ڪيئن پورو لهنداسين. هن چيو ته قومي سطح جي راندگيرن کي به سٺو معاوضو نه ٿو ملي، ٻيو اڪيڊميون مڪمل نه ٿيون ٿين. هن چيو ته هتي هاڻي فٽبال پروفيشنل راند ناهي رهي. سڄو ڏينهن مزدوري يا نوڪري ڪري شام جو فٽبال کيڏڻ سان ڪهڙو نتيجو ايندو؟ قومي فٽبال ٽيم مضبوط نه ٿيڻ جو مک سبب ٻڌائيندي امداد شاهه چيو ته اصل ۾ فٽبال بنگال ۾ وڌيڪ کيڏي ويندي هئي،بنگلاديش ٺهڻ بعد ملڪ جي فٽبال راند زوال ڏانهن هلي وئي، رانديگرن جي پذيرائي ختم ٿي وئي.ڇو ته 1971ع کان اڳ سنڌ جا رانديگر بنگلاديش ويندا هئا، بعد ۾ لياري ۾ وڃي ڪو چاڙهو ٿيو. هن چيو ته سندس چوڻ هو ته ملڪ ۾ فٽبال جي ڪوچ ۽ فٽبالر کي ڏهاڙيءَ تي هڪ هزار به مس ملي ٿو، جنهن سبب ٽيلنٽ ضايع ٿي رهيو آهي! امداد شاهه جو چوڻ هو ته هاڻي فرانس، جرمني، اسپين، برازيل، ميڪسيڪو، مصر، سعودي عرب ۽ ايران سميت دنيا جي ٻين ملڪن ۾فٽبال جو جنون آهي، جنهن سبب هو اڳتي آهن. سندس چوڻ هو ته ڪيمپ لڳي ٿي ته هزار رپيا ڏهاڙي ٿي ملي.ڪابه راند سکڻ لاءِ عمر 8 کان 18 سال هئڻ آئيڊيل آهي، ان ڪري اسڪول فٽبال شروع ٿيڻ اهم آهي ۽ اتي سٺو ڪوچ به لازمي هجي. ٻي پاسي هن وقت ڪيترن ئي ادارن فٽبال ٽيمون ختم ڪري ڇڏيون آهن. هن هڪ سوال جي جواب ۾ هن چيو ف بال ۾ سٽيبازي مشڪل آهي.
نوشھروفيروز (ن پ ا) نوشهري فيروز ۾ سيد مٺل شاهه بخاري ميموريل ٽي ٽوئنٽي ٽورنامينٽ جي ٻي مئچ ۾ موري جي ٽيم قريشي ڪرڪيٽ ڪلب نوشهري فيروز جي ٽيم ڀٽائي ڪرڪيٽ ڪلب کي 4 وڪيٽن تان شڪست ڏئي ڇڏي.
نوشهري فيروز جي ڊگري ڪاليج جي ميدان تي کيڏي ويندڙ ٽورنامينٽ جي ٻي ميچ ۾ڀٽائي ڪرڪيٽ ڪلب ٽاس کٽي پهرين کيڏندي مقرر اوورن ۾ 9 وڪيٽن جي نقصان 189 رنسون ٺاھي سگهي. جن ۾ امان اللّه وسطڙو 23 بالن ۾ 45 رنسون ۽ صدام 30 بالن ۾ 39 رنسون ٺاھي نمايان رھيا.
جواب ۾ قريشي ڪرڪيٽ ڪلب مورو مليل حدف 6 وڪيٽن جي نقصان ماڻي ميچ کٽي. جن ۾ واستي 6 بالن ۾ 30 رنسون ۽ آصف علي 14 بالن ۾ 37 رنسون ٺاھي ٽيم جي ڪاميابي ۾ اهم ڪردار نڀايو.
لاهور (اسپورٽس ڊيسڪ) پاڪستان ڪرڪيٽ ٽيم جي اڳوڻي ڪپتان شعيب ملڪ ۽ ڀاتي ٽينس اسٽار ثانيه مرزا وڏي انتظار بعد نيٺ پنهنجي پٽ جي تصوير جاري ڪري ڇڏي.
شعيب ملڪ سماجي رابطن واري ويب سائيٽ ٽوئيٽر تي پنهنجي مداحن سان پٽ اذهان جي تصوير جاري ڪندي لکيو ته تيز ترين قطار ۾ زندگي جيئڻ به هڪ تفريح ٿي سگهي ٿي، هاڻي دنيا کي هيلو چوڻ جو وقت ٿي ويو آهي.
شعيب ملڪ ۽ ثانيه مرزا کي هن سال 31 آڪٽوبر تي پٽ پيدا ٿيو هو، جنهن جو نالو اذهان مرزا ملڪ رکيو ويو.
لاهور (اسپورٽس نيوز ) پاڪستان ڪرڪيٽ ٽيم جي اوپنر احمد شهزاد مٿان ڪرڪيٽ کيڏڻ تان پابندي جو وقت ختم ٿي ويو آهي. احمد شهزاد هلندڙ سال جولاءِ دوران ڊوپ ٽيسٽ مثبت آئي هئي، جنهنڪري پاڪستان ڪرڪيٽ بورڊ پاران مٿس پابندي مڙهي وئي هئي. احمد شهزاد وڏي عرصي کان ڪرڪيٽ ٽيم ۾ شامل ناهي رهيو، ڊسيپلين جي ڀڃڪڙي توڙي سندس ڪارڪردگي سبب ٽيم کان کيس ٻاهر رکيو ويو. پابندي ختم ٿيڻ کانپوءِ احمد شهزاد نئين جوش سان ڪرڪيٽ ۾ واپسي جو امڪان آهي. امام الحق ۽ فخر زمان جي شاندار ڪارڪردگي سبب به کيس ٽيم ۾ واپسي ڏکي بڻائي ڇڏي آهي، انڪري احمد شهزاد کي پي ايس ايل ذريعي پنهنجي ڪارڪردگي ڏيکارڻ جو بهترين موقعو آهي.
سڊني (اسپورٽس نيوز) آسٽريليا جي ڀلوڙ بيٽسمين ۽ ڏکڻ آفريڪا خلاف ٽيسٽ ميچ دوران بال خراب ڪرڻ جي ڪيس ۾ هڪ سال جي پابندي کي منهن ڏيندڙ اسٽيون سمٿ ان سڄي واقعي جي ذميواري قبول ڪري ورتي آهي. هلندڙ سال مارچ کانپوءِ پهريون ڀيرو پريس ڪانفرنس ڪندي اسٽيو سمٿ چيو ته ان وقت هو واقعو ٿيڻ کان روڪي سگهڻ جي پوزيشن ۾ هيو پر اهو نه روڪڻ سندس ڪپتاني ۽ اڳواڻي جي ناڪامي هئي. هن چيو ته فيلڊ تي هڪڙي شيءِ ٿي رهي هئي جنهن کي هو چاهي هان ته روڪي سگهي ها. هن چيو ته ان واقعي کانپوءِ اهڙا ڏينهن به آيا، جڏهن هو پنهنجي ڪمري کان نڪري نه سگهندو هو. سندس چوڻ هو ته آسٽريليا ڪرڪيٽ ٽيم ۾ پهريون ڀيرو اهو واقعو ٿيو آهي، ٻين ٽيمن ۾ اهو واقعو ٿيندو هوندو يا نه مونکي خبر ناهي پر هر ٽيم چاهيندي آهي ته بال سونگ ڪري. اسٽيون سمٿ کي ڪالهه بنگلاديش پريميئر ليگ ۾ شرڪت کان روڪيو ويو، جڏهن ته هو پي ايس ايل ۾ پڻ شريڪ ٿيندو.
ٽنڊوالهيار (ن پ ا) ٽنڊي الهيار ۾ مبارڪ جروار هاءِ اسڪول جي ٽيم 6 وڪيٽن تان پراونشل بوائز هاءِ اسڪول کي شڪست ڏئي ٽورنامينٽ پنهنجي نالي ڪري ورتو. ڊسٽرڪٽ ايجوڪيشن سيڪنڊري آفيس طرفان ڪرايل ٽورنامينٽ ۾ 15 هاءِ اسڪولن جي ٽيمن حصو ورتو. جن مان پراونشل هاءِ اسڪول ۽ مبارڪ جروار هاءِ اسڪول ٽيمون فائنل ۾ جاءِ ٺاهي. فائنل مقابلي ۾ پراونشل هاءِ اسڪول جي ٽيم ٽاس کٽي پهرين بيٽنگ ڪندي مقرر 10 اوورن ۾ 85 رنسون ٺاهيون. جواب ۾ مبارڪ جروار هاءِ اسڪول جي ٽيم 4 وڪيٽن جي نقصان تي مليل هدف آخري اوور ۾ ماڻي ٽورنامينٽ کٽي ورتي. ان موقعي تي ڊي اي او سيڪنڊري مٺو اوڏ ڪامياب ٽيم جي ڪپتان فرحان عمراڻي کي ونر ٽرافي ڏني، جڏهن ته ٽي اي او رشيد احمد بوزدار فائنل هارائيندڙ ٽيم جي ڪپتان هريش ڪمار کي رنرز اپ ٽرافي ڏني. ڊي اي او مٺو اوڏ جو چوڻ هو ته ضلعي جي نوجوانن ۾ ڪرڪيٽ سميت ٻين راندن جو وڏو ٽيلنٽ آهي. جنهن کي اجاگر ڪرڻ جي سخت ضرورت آهي.
ڪينبيرا (اسپورٽس ڊيسڪ) بگ بيش ليگ جي ٽئين ميچ ۾ سڊني ٿنڊر ڊڪ ورٿ لوئس سسٽم تحت ميلبورين اسٽارس کي 15 رنسن تان شڪست ڏئي ڇڏي. منوڪا اول ميدان تي بگ بيش ليگ جي کيڏيل ٽئين ميچ ۾ ميلبورن اسٽارس ٽاس کٽي فيلڊنگ جو فيصلو ڪيو.
سڊني ٿنڊر دعوت ملڻ تي بيٽنگ ڪندي مقرر اوورن ۾ 5 وڪيٽن جي نقصان تي 181 رنسون ٺاهيون،
سنگها شاندار بيٽنگ ڪندي 63 رنسون ٺاهيون، جڏهن ته سيمس 34، واٽسن 22 ۽ جوز بٽلر 20 رنسون ٺاهي نمايان رهيان. ميلبورين طرفان زامپا ۽ لمِڪهاني 2-2 وڪيٽون ورتيون، جڏهن ته ڊي جي براوو هڪ وڪيٽ ورتي.
جواب ۾ ميلبورين اسٽارس کي ڊڪ ورٿ لوئس سسٽم تحت ميچ کٽڻ لاءِ 89 رنسون گهربل هيون، ميلبورين 8 اوورن ۾ 6 وڪيٽن جي نقصان تي 74 رنسون ٺاهي سگهي. جنهن ۾ لرڪن 28، براوو 11 ۽ ڊين 7 رنسون ٺاهي نمايان رهيا. سڊني ٿنڊر طرفان سيمز 3 شڪار ڪيا، جڏهن ته ميڪ اينڊريو، گرين ۽ سانڌو هڪ هڪ وڪيٽ ورتي.
بينوني (اسپورٽس نيوز) پاڪستان ڏکڻ آفريڪا جي ڊگهي دوري تي پنهنجي پهرين امتحان پريڪٽس ميچ کان شروعات ڪئي آهي. ٽن ڏينهن جي پريڪٽس ميچ جي ٻي ڏينهن پاڪستان پنهنجي پهرين اننگز 306 رنسن تي ڊڪليئر ڪري ڇڏي، بابر اعظم ۽ اظهر علي شاندار راند ڪندي ناٽ آئوٽ سينچريون اسڪور ڪيون. جواب ۾ ڏکڻ آفريڪا اليون 5 وڪيٽن جي نقصان تي 161 رنسون ٺاهي 174 رنسن جي برتري حاصل ڪري ورتي آهي، ٽئين ڏينهن جي راند جاري آهي، ڏکڻ آفريڪا اليون طرفان اين برانڊ 71 رنسن جي اننگز کيڏي، جڏهن ته پاڪستان طرفان محمد عامر 3 شڪار ڪيا.
ايڊليڊ (اسپورٽس نيوز) اڳوڻي آسٽريلوي فاسٽ بالر ڊينس لِلي ڀارتي ڪپتان ورات ڪوهلي جو مداح نڪتو. ڊينس للي جو چوڻ آهي ته ڪوهلي دنيا جو بهترين بيٽسمين آهي، ان ۾ ڪو شق ناهي ته هو ٻين سڀني کان اڳتي آهي، وٽس بال کي اڳ ۾ ڏسڻ جي صلاحيت آهي، جيڪا هڪ وڏي بيٽسمين جي نشاني آهي. پنهنجي فاسٽ بالنگ سان بيٽسمينن ۾ خوف پيدا ڪندڙ ڊينس للي چيو ته ڪوهلي ارادي، تيڪنيڪ ۾ بهترين آهي. ڊينس للي پاران ڀارتي فاسٽ بالر جسپريت ڀمرا جون به تعريفون ڪيون. ياد رهي ته ڀارت ۽ آسٽريليا وچ ۾ ٽئين ٽيسٽ ميچ 26 ڊسمبر کان شروع ٿيندي.
حيدرآباد دکن (اسپورٽس ڊيسڪ) پاڪستاني ڪرڪيٽر جي گهر واري ۽ ڀارتي ٽينس اسٽار ثانيه مرزا چيو آهي ته خراب نظر کان بچائڻ لاءِ پنهنجي پٽ جون تصويرون منظر عام تي نه آنديون. هڪ انٽرويو ۾ ثانيه مرزا چيو ته توهان اسان کي قدامت پسند يا بيوقوف به چئي سگهو ٿا، پر منهنجو نظر لڳڻ تي يقين آهي. هن چيو ته آئون ۽ شعيب فيصلو ڪيو ته جيترو ممڪن ٿي پنهنجي پٽ کي عوامي نظرن ۾ آڻڻ کان بچائينداسين، ان لاءِ اسان سوشل ميڊيا تي سندس منهن واريون تصويرون جاري ناهيون ڪندا، هاڻي اذهان انهن شين لاءِ تمام ننڍو آهي. ثانيه مرزا جو چوڻ هو ته ٽينس کي ياد ڪري رهي آهيان ۽ ٻيهر کيڏڻ لاءِ وڌيڪ انتظار نه ٿي ڪري سگهان. هن چيو ته آپريشن ذريعي ٻار جي پيدائيش ۽ پراڻي انجريز سبب گهربل فٽنيس حاصل ڪرڻ ۾ اڃا وقت لڳندو. ثانيه مرزا چيو ته ڪا تاريخ ته نٿي ڏئي سگهان پر ايندڙ سال ٽينس ڪورٽ ۾ واپسي جو ارادو آهي.
پکو (رپورٽ محمدرفيق مغيري) پکو شھر جي مين انڊس ھاءِ وي جي ڀر واري گرائونڊ تي والي بال جي سينيئر رانديگر شاھنواز کونھارو جي اڳواڻي ۾ لٽل شوٽنگ والي مئچ ۾ ينگ اسٽار ۽ شھباز اليون وچ ۾ دوستاڻي مئچ ٿي گذري. مئچ ۾ ٻنھي ٽيمن جي نوجوان رانديگرن خوب راند جو مظاھرو ڪيو. شروعاتي ھاف ۾ شھباز اليون جا رانديگر ينگ اسٽار جي رانديگرن مٿان حاوي ٿي پوانئٽون حاصل ڪندا رھيا. پھرئين هالف ۾ شھباز اليون 12-20 جي اسڪور سان برتري حاصل ڪري ورتي، جڏھن ته مئچ جي ٻئي ھاف شروع ٿيڻ سان ئي ينگ اسٽار جي رانديگرن سجاد ڀٽو ۽ عبدالحميد مغيري بھترين راند جو مظاھرو ڪندي مخالف ٽيم شھباز اليون جي رانديگرن کي والين سان خوب ڪٽڪو ڏنو. ينگ اسٽار جي رائيٽ سائيڊ تي بيھندڙ رانديگر عبدالحميد مخالف ٽيم کي مسلسل واليون ھڻي 15- 24 جي اسڪور سان مئچ پنھنجي نانءُ ڪري ورتي. اھڙي طرح ڪنڌي ۾ ھوڪرا پئجي ويا ۽ شوقين فاتح ٽيم جي رانديگرن کي ڪلھن تي کڻي گرائونڊ ۾ گھمايو ۽ مٿن نوٽ گھوريندا رھيا. دوستاڻي والي بال مئچ کي ڏسڻ لاءِ تر جي مختلف ڳوٺن جي سوين شوقينن حصو ورتو ۽ تاڙيون وڃائي رانديگرن کي خوب داد ڏنو. مئچ جي پڄاڻي تي عبدالحميد مغيري ۽ سجاد ڀٽو کي بھترين راند پيش ڪرڻ تي مئچ جو ھيرو قرار ڏنو ويو جن کي سينيئر رانديگر شاھنواز کونھاري انعام ڏنو. ان موقعي شاھنواز کونھاري پنهنجي اخبار سان ڳالھائيندي چيو ته راندين جا اھڙا ايونٽ ڪرائڻ سان نوجوانن ۾ تندرستي سان گڏ حوصلا افزائي ٿئي ٿي، سنڌ جي ٻھراڙين ۾ والي بال جا سٺا رانديگر آھن پر انھن جي پٺڀرائي ۽ سپورٽ نه ھجڻ ڪري اڳتي وڌي نه ٿا سگھن پر ان جي باوجود پنھنجي ڪوشش تحت اھڙا ايونٽ ڪرائي ٻھراڙين جي اھڙن رانديگرن جي ٽيلينٽ کي اڳتي آندو وڃي. سينيئر رانديگر سنڌ سرڪار ۽ راندين جي صوبائي اداري کان گهر ڪئي ته سنڌ جي ٻھراڙين ۾ ضلعي سطح جا ايونٽ ۽ ٽرائل ڪرائي نوجوان رانديگرن جي چونڊ ڪئي وڃي.
لاهور (اسپورٽس نيوز) پاڪستان ڪرڪيٽ ٽيم جي آلرائونڊر محمد حفيظ کي بنگلاديش پريميئر ليگ ۾ شرڪت لاءِ پي سي بي اين او سي جاري ڪري ڇڏيو آهي. محمد حفيظ 3 جنوري تي بي پي ايل ۾ شرڪت لاءِ ڍاڪا روانو ٿيندو. ٽيسٽ ڪرڪيٽ تان رٽائر ٿيندڙ پي ايس ايل ۾ لاهور قلندرز جو ڪپتان مقرر ڪيو ويو آهي.