سنچورين (اسپورٽس ڊيسڪ) پاڪستاني ٽيم جو فاسٽ بالر محمد عباس فٽ ٿي ويو، ڏکڻ آفريقا خلاف ٻين ٽيسٽ ميچ ۾ شرڪت ڪندو. قومي فاسٽ بالر زخمي ٿيڻ سبب سنچورين ٽيسٽ ۾ شرڪت نه ڪري سگهيو هو.
قومي ٽيم جي مئنيجمينٽ ٻڌايو ته فاسٽ بالر محمد عباس هاڻي مڪمل طور فٽ ٿي ويو آهي.
محمد عباس انجري سبب سنچورين ٽيسٽ ۾ شرڪت نه ڪري سگهيو هو، هاڻي مڪمل طور فٽ ٿيڻ سان ئي هو ڏکڻ آفريقا خلاف ٻين ٽيسٽ ۾ ميدان تي لهندو.
ڪرائيسٽ چرچ (اسپورٽس ڊيسڪ) نيوزيلينڊ ۽ سريلنڪا وچ ۾ ٽيسٽ ميچ دوران هڪ ئي ڏينهن 14 وڪيٽون ڪري پيون. باڪسنگ ڊي ٽيسٽ ۾ سريلنڪن ڪپتان دنيش چنديمل ٽاس کٽي پهريان ميزبان ٽيم کي کيڏڻ جي دعوت ڏني ته سرنگا لڪمل ۽ ڪمارا تباهي ڪندڙ بالنگ ڪندي نيوزيلينڊ جا 66 رنسن تي 6 رانديگر پويلن موڪلي ڇڏيا. ٽم سائوٿي زبردست مزاحمت ڪندي نيوزيلينڊ کي مڪمل تباهي کان بچائي ورتو. ٽم سائوٿي ۽ بي جي واٽلنگ پاران ڀائيواري ڪندي اسڪور کي 172 رنسن تائين پهچايو. ٽم سائوٿي 68 رنسون ٺاهيون، جڏهن ته واٽلنگ 46 رنسون ٺاهيون. سريلنڪا طرفان لڪمل ڪيريئر بيسٽ بالنگ ڪندي 5 شڪار ڪيا ۽ ڪمارا 3 وڪيٽون حاصل ڪيون. جواب ۾ سريلنڪا پڻ ڍينگو ڍيري ثابت ٿيڻ لڳي ۽ ٽم سائوٿي بيٽنگ کانپوءِ بالنگ ۾ پاڻ ملهايو ۽ 3 شڪار ڪندي سريلنڪا جا 40 رنسن تي 4 وڪيٽون ڪرائي ڇڏيون. ڏينهن جي پڄاڻي تي سريلنڪا 4 وڪيٽن جي نقصان تي 88 رنسون ٺاهي ورتيون آهن. اينجلو ميٿيوز ۽ سلوا ٻئين ڏينهن جي راند جي شروعات ڪندا.
ڪوٽڙي (رپورٽر) ڪوٽڙي ۾ آل پاڪستان بلائينڊ ڪرڪيٽ سپر ليگ جا شاندار مقابلا جاري آهن، ڪي پي سنڌ ۽ بلوچستان پنجاب ٽيم کي شڪست ڏئي ڇڏي.
پاڪستان بلائينڊ ڪرڪيٽ ڪائونسل جي انتظام هيٺ ڪرايل ٽي ٽوئنٽي سپر ليگ جي ٻئين ڏينهن 2 ميچون کيڏيون ويون. پهرين ميچ ۾ سنڌ ٽيم ٽاس کٽي پهريان بيٽنگ جو فيصلو ڪيو، جيڪو غلط ثابت ٿيو، سنڌ مقرر 20 اوررن ۾ 6 وڪيٽن جي نقصان تي 246 رنسون ٺاهيون، جن ۾ثناءُ الله شاندار 96 رنسون ٺاهيون،ڪي پي جي بالرن شاهزيب 2، مطيع الله هڪ وڪيٽ ورتي، جڏهن ته سنڌ ٽيم جا 3 بيٽسمين رن- آئوٽ ٿيا.
جواب ۾ ڪي پي جي بيٽسمينن 3 وڪيٽن جي نقصان تي 19 اوررن ۾ 247 رنسن جو هدف ماڻي ميچ کٽي. ايوب خان 47 بالن تي 84 رنسون ٺاهيون، جڏهن ته مطيع الله 21بالن تي 47 رنسون اسڪور ٺاهي ٽيم جي ڪاميابي ۾ اهم ڪردار نڀايو. سنڌ جي بالرن ظفر اقبال 2 ۽ شفيع الله هڪ وڪيٽ ورتي.
هوڏانهن ٻي ميچ ۾ بلوچستان ۽ پنجاب ۾ مقابلو ٿيو. پنجاپ ٽيم ٽاس کٽي بيٽنگ جو فيصلو ڪيو، پنجاب مقرر اوورن ۾ 6 وڪيٽن جي نقصان تي 227 رنسون ٺاهيون، جن ۾ بيٽسمين رياست علي 44 بالن تي 88 ۽ ڪامران خان 34 بالن تي 54 رنسون ٺاهيون. بلوچستان جي بالرن شاهزيب 2 وڪيٽون ورتيون، جڏهن ته ڪاشف ۽ اڪرم هڪ-هڪ وڪيٽ ورتي. 2 بيٽسمين رن-آئوٽ ٿيا.
جواب ۾ بلوچستان ٽيم گهربل هدف 16 اوورن ۾ هڪ وڪيٽ جي نقصان تي ماڻي ميچ کٽي. بلوچستان جي بيٽسمين بدر منير شاندار سنچري هڻي 120 رنسون ٺاهيون، ڪي پي ڪي جي بالر محسن هڪ وڪيٽ ورتي.
سڊني (اسپورٽس ڊيسڪ) آسٽريليا پاڪستان دورو پي ايس ايل جي لاهور ۽ ڪراچي جي ميچن سان مشروط ڪري تجويز ڪيل شيڊول ۾ به ترميم ڪري ڇڏي.
ڪرڪيٽ آسٽريليا جي سڪيورٽي ٽيم ۽ 3 عملدار مارچ جي پهرين هفتي ۾ پي سي بي جي مهمان بڻجندا، جيڪي 17 مارچ تي پي ايس ايل فائنل سميت سموري سڪيورٽي صورتحال جو جائزو وٺي رپورٽ ڏيندا.
ڪرڪيٽ آسٽريليا ۽ حڪومت ان رپورٽ جي روشني ۾ سمورا معاملا طئي ڪندا.
ڪرڪيٽ آسٽريليا اختيارين پاڪستان ٽيم اماڻڻ جو اشارو ڏنو پر اڃا تائين قطعي فيصلو ڪرڻ کان اڳ سڪيورتي صورتحال جي تسلي ۽ وقت وٺڻ چاهين ٿيون، جنهن سبب ميچن جو شيڊول به تبديل ڪيو پيو وڃي.
ڪراچي (اسپورٽس ڊيسڪ) ڏکڻ آفريڪا خلاف پهرين ٽيسٽ کان اڳ پاڪستان ٽيم کي وڏو چڪو لڳي ويو، محمد عباس انجري سبب ميچ کان ٻاهر ٿي ويو.
ڪنڌ جي انجري سببب فاسٽ بالر محمد عباس سنچورين ٽيسٽ ۾ حصو نه وٺي سگهندو، جڏهن ته ان کان اڳ به محمد عباس ڏکڻ آفريڪا جي انوي ٽيشن اليون خلاف پريڪٽس ميچ ۾ به نظر نه آيو هو.
گذريل مهيني محمد عباس نيوزلينڊ خلاف دبئي ٽيسٽ دوران فيلڊنگ ڪندي انجري جو شڪار ٿيو هو، جنهن کيس سيريز جي ٽئين ميچ نه کيڏائي وئي هئي. سندس جاءِ تي شاهين آفريدي کي کيڏايو ويو هو.
پروٽيز خلاف پهرين ٽيسٽ ميچ ۾ پاڪستاني فاسٽ بالر ۾ محمد عامر، شاهين آفريدي ۽ حسن علي شامل هوندا.
پورٽز ايلزبيٿ (اسپورٽس نيوز) ڏکڻ آفريڪا پاران پاڪستان خلاف پهرين باڪسنگ ٽيسٽ ميچ لاءِ ڊين پيٽرسن کي ويرون فلينڊر جي جڳهه تي ٽيم ۾ شامل ڪري ڇڏيو آهي. ڪرڪيٽ سائوٿ آفريڪا جي ترجمان پاران جار ي ڪيل بيان ۾ چيو ته 29 سالن جو ڊين پيٽرسن پاڪستان خلاف ڊيبيو ڪندو، جيڪو فرسٽ ڪلاس ڪرڪيٽ ۾ 321 وڪيٽون حاصل ڪري چڪو آهي. ڊين پيٽرسن ڏکڻ آفريڪا لاءِ ٽن ون ڊي ميچن ۽ اٺ ٽي 20 ميچن ۾ نمائندگي ڪري چڪو آهي. ڊين پيٽرسن پاڪستان خلاف بهتر پرفارم ڪرڻ لاءِ پراميد آهي، سندس چوڻ هو ته هو باڪسنگ ڊي ٽيسٽ کي يادگار بڻائڻ لاءِ ڀرپور ڪوشش ڪندو.
ايڊليڊ (اسپورٽس نيوز) اڳوڻي آسٽريلوي فاسٽ بالر ڊينس لِلي ڀارتي ڪپتان ورات ڪوهلي جو مداح نڪتو. ڊينس للي جو چوڻ آهي ته ڪوهلي دنيا جو بهترين بيٽسمين آهي، ان ۾ ڪو شق ناهي ته هو ٻين سڀني کان اڳتي آهي، وٽس بال کي اڳ ۾ ڏسڻ جي صلاحيت آهي، جيڪا هڪ وڏي بيٽسمين جي نشاني آهي. پنهنجي فاسٽ بالنگ سان بيٽسمينن ۾ خوف پيدا ڪندڙ ڊينس للي چيو ته ڪوهلي ارادي، تيڪنيڪ ۾ بهترين آهي. ڊينس للي پاران ڀارتي فاسٽ بالر جسپريت ڀمرا جون به تعريفون ڪيون. ياد رهي ته ڀارت ۽ آسٽريليا وچ ۾ ٽئين ٽيسٽ ميچ 26 ڊسمبر کان شروع ٿيندي.
لاهور (اسپورٽس نيوز) پاڪستان ڪرڪيٽ ٽيم جي آلرائونڊر محمد حفيظ کي بنگلاديش پريميئر ليگ ۾ شرڪت لاءِ پي سي بي اين او سي جاري ڪري ڇڏيو آهي. محمد حفيظ 3 جنوري تي بي پي ايل ۾ شرڪت لاءِ ڍاڪا روانو ٿيندو. ٽيسٽ ڪرڪيٽ تان رٽائر ٿيندڙ پي ايس ايل ۾ لاهور قلندرز جو ڪپتان مقرر ڪيو ويو آهي.
ڪراچي (اسپورٽس نيوز) پاڪستان ڪرڪيٽ ٽيم جي اڳوڻي ڪپتان ۽ ڀلوڙ رانديگر يونس خان چيو آهي ته رانديگرن کي پنهنجا بنياد مضبوط ڪرڻا پوندا، هو جلد آئوٽ ٿي ويندو هو پر انهن غلطين کي سڌارڻ جي ڀرپور ڪوشش ڪندو هو. ڪراچي ۾ پي سي بي ايڪڊمي مان عورت ڪرڪيٽرن کي يونس خان ليڪچر ڏنو، جنهن ۾ ڪوچ به موجود هئا. يونس خان چيو ته جڏهن هو ڪريز تي ويندو هو ته پهريان ست اٺ بال کيڏڻ ڏکيو هوندو هو، راند کان وڌيڪ زندگي جو پريشر کي قابو ڪرڻ سکو. هن چيو ته عورت ڪرڪيٽر حساس هونديون آهن، ڪوچ ان دوران سندن خاص خيال رکندا آهن، ڪوچز کي عورتن جي راند تي وڌيڪ ڌيان ڏيڻ جي گهرجي، جڏهن ته عورتون ميدان ۾ اچي ويون آهن ته کين گهڻيون قربانيون ڏيڻيون پونديون.
لاهور (اسپورٽس ڊيسڪ) پاڪستان ڪرڪيٽ بورڊ هڪ ڀيرو ٻيهر ڪرڪيٽ آسٽريليا سان رابطي جو فيصلو ڪيو آهي. ذريعن موجب پي سي بي ڪرڪيٽ آسٽريليا سان جنوري ۾ هڪ ڀيرو ٻيهر رابطي ڪندو ۽ پاڪستان ۾ ون ڊي ميچون کيڏڻ لاءِ ڳالهه ٻولهه ڪندو. پاڪستان ۽ آسٽريليا وچ ۾ 5 ون ڊي ميچن تي ٻڌل سيريز 19 کان 31 مارچ تائين گڏيل عرب اماراتن ۾ شيڊيول آهي. پي سي بي جي خواهش آهي ته پي ايس ايل جي ميچن بعد گهٽ ۾ گھٽ 2 ون ڊي ميچون ڪراچي ۾ کيڏيون وڃن. ان حوالي سان شروعاتي ڳالهه ٻولهه به ڪرڪيٽ آسٽريليا سان ڪئي وئي، پر معاملو اڳتي نه وڌي سگهيو هو. پي سي بي جنوري مهيني وچ ۾ وارن ڏينهن ۾ هڪ ڀيرو ٻيهر ڪرڪيٽ آسٽريليا سان ان معاملي تي ڳالهه ٻولهه ۾ درخواست ڪندو ته پاڪستان ۾ ميچون کيڏڻ بابت فيصلو پي ايس ايل جي ميچن کي ڏسي ڪيو وڃي. پي سي بي ڪرڪيٽ آسٽريليا سان پي ايس ايل جي ميچن لاءِ پنهنجو وفد به پاڪستان اماڻڻ جي به درخواست ڪندو.
پرٿ (اسپورٽس نيوز) آسٽريليا ۽ ڀارت ۾ وچ ۾ ٻي ٽيسٽ دوران ٽيمن جي ڪپتانن ورات ڪوهلي ۽ ٽم پين ۾ سخت جملن جي ڏي وٺ ٿي آهي، ٽيم دوران ٻنهي ڄڻن پاران جارحاڻو انداز اختيار ڪيو. ٻنهي رانديگرن ۾ جملن جي ڏي وٺ ان وقت ٿي جڏهن ڪينگرو ڪپتان ڀارتي ڪپتان ڪوهلي کي چيو ته توهان ايڏوڪول ٿيڻ جي ڪوشش ڇو پيا ڪيو، جنهن تي ڪوهلي پڻ جملا چيا. امپائر گيفيني معاملي کي ڏسندي کين هدايت ڪئي ته توهان ٻئي ڪپتان آهيو، راند تي ڌيان ڏيو. ان دوران هو هڪٻئي سان ٿوري دوري کان ٽڪرائجڻ کان رهجي ويا. ٻنهي وچ ۾ لفظي جنگ ان وقت ختم ٿي، جڏهن محمد شامي جي بال تي ٽم آئوٽ ٿيو ۽ ڪوهلي مٿس خاموشي سان ڪاوڙ ڏيارڻ جي ڪوشش ڪئي.
پرٿ ( اسپورٽس نيوز ) آسٽريليا جي ڀارت خلاف چئن ٽيسٽ ميچن تي ٻڌل سيريز جي ٻي ميچ ۾ بيٽنگ جاري آهي، ٽيسٽ ميچ جي پهرين ڏينهن جي راند جي پڄاڻي تي آسٽريليا 6 وڪيٽن تي 277 رنسون ٺاهي ورتيون آهن. آسٽريلوي ڪپتان ٽم پين پرٿ ٽيسٽ ۾ ٽاس کٽي پهريان بيٽنگ ڪرڻ جو فيصلو ڪيو. آسٽريليا طرفان مارڪس هيرس ۽ ايرون فنچ اننگز جي شروعات ڪئي. ٻنهي اوپنرن شاندار راند جو مظاهرو ڪندي پهرين وڪيٽ لاءِ 112 رنسن جي ڀائيواري قائم ڪندي پنهنجون ففٽيون مڪمل ڪيون. آسٽريليا جي پهرين وڪيٽ 112 رنسن تي ڪري جڏهن ايرون فنچ 6 چوڪن جي مدد سان 50 ٺاهي جسپريت بمرا جي ايل بي ڊبيلو ٿيو، جنهن بعد عثمان خواجه به وڏي اننگز کيڏڻ ۾ ناڪام ثابت ٿيو ۽ 5 رنسن تي ياديو جو شڪار بڻيو. مارڪس هيرس کي 70 رنسن تي واهاري آئوٽ ڪيو. هينڊس ڪومب کي 7 رنسن تي اشانت شرما پويلين جو رستو ڏيکاريو. هڪ موقعي تي آسٽريليا جون تڪڙيون چار وڪيٽون ڪري پيون پر شان مارش ۽ ٽي ايم هيڊ جي سٺي ڀائيواري سان آسٽريليا کي سهارو مليو. هيڊ کي اشانت شرما، جڏهن ته مارش کي وهاري آئوٽ ڪيو. پهرين ڏينهن جي راند جي پڄاڻي تائين آسٽريليا 6 وڪيٽن تي 277 رنسون ٺاهيون، ڪپتان ٽم پين 16 ۽ پيٽر ڪمنز 11 رنسن تي ٻي ڏينهن جي راند جي شروعات ڪندا.