ڇور(ن پ ا) ڇور ڀرسان سورهيه بادشاه ه ڪرڪيٽ ٽيم دستگير ڪلب کي هارائي ٽيپ بال ٽورنامينٽ کٽي ورتي.
ڳوٺ نوھيون ۾ مست ميرل فقير جي ياد ۾ڪرايل ٽيپ بال ڪرڪيٽ ٽورنامينٽ جي فائنل مقابلي ۾ پهرين بيٽنگ ڪندي ڳيريلي جي ٽيم دستگير ڪلب مقرر 10 اوورن ۾ 65 رنسون ٺاهيون.
جواب ۾نوهيون جي ٽيم سورهيه بادشاهه گهربل هدف 5 وڪيٽن جي نقصان تي ماڻي ٽورنامينٽ پنهنجي نالي ڪئي.
ان موقعي تي خاص مهمان استاد يوسف ۽ ٻين فاتح ٽيم جي ڪپتان اشرف نهڙي کي ٽرافي ۽ ٻين رانديگرن ۾ انعام ورهايا.
ڪراچي (اسپورٽس ڊيسڪ) چيف جسٽس ڪرپشن فري پاڪستان سائيڪل ڊوڙ عرفان بلوچ کٽي ورتي.
16 ڪلوميٽر ڊگهي سائيڪل ڊوڙ ۾ ذوهيب ٻئين ۽ اشعر بلوچ ٽئين پوزيشن ماڻي. ڊپٽي ڪمشنر جي آفيس وٽان خاص مهمان عابد علي ايڊووڪيٽ مقابلي جو افتتاح ڪيو.
سنڌ سائيڪلنگ ايسوسي ايشن جي چيئرمين ۽ مقابي جي خاص مهمان عابد علي ايڊووڪيٽ ڊپٽي ڪمشنر جي آفيس کان مقابلي جي شروعات ڪرائي.
ٽيم ڪراچي ايڪسپريس جي عرفان بلوچ 21 منٽ 30 سڪينڊن ۾ مقابلو کٽيو. ذوهيب بلوچ 3 سڪينڊ جي فرق سان ٻين پوزيشن ماڻي، جڏهن ته ٽيم ملير ٽائيگر جي اشعر بلوچ 5 سيڪنڊن جي فرق سان ٽئين پوزيشن حاصل ڪئي.
ميلبورن (اسپورٽس ڊيسڪ) آسٽريلوي ڪوچ جسٽن لينگر ڀارت خلاف رٿيل باڪسنگ ڊي ڪرڪيٽ ٽيسٽ ميچ ۾ پيٽر هينڊز ڪامب جي جاءِ تي مچل مارش کي شامل ڪرڻ جو اشارو ڏئي ڇڏيو.
آسٽريلوي ڪوچ پنهنجي بيان ۾ چيو ته ٽيم متوازن ڪرڻ لاءِ بالنگ آل رائونڊر هجڻ سبب اسان مچل مارش کي باڪسنگ ڊي ٽيسٽ ۾ کيڏائڻ تي غور ڪري رهيا آهيون، سندس تجربو به وڌيڪ آهي.
هن چيو ته اميد آهي ته مچل مارش بال ۽ بيٽ سان بهترين ڪارڪردگي ڏيکاري ٽيم کي سوڀ ڏيارڻ ۾ اهم ڪردار نڀائيندو. سندس چوڻ هو ته پيٽر هينڊز ڪامب ۽ مچل مارش ٻئي صلاحيتن وارا رانديگر آهن، ٻئي اسپنرز سٺو کيڏندا آهن، ان ڪري اسان لاءِ فيصلو ڪرڻ ڏکيو آهي، جڏهن ته ٽيم بهتر مفاد ۾ سخت فيصلو ڪرڻو پوندو.
ممبئي (اسپورٽس ڊيسڪ) ڀارتي ڪرڪيٽ بورڊ آسٽريليا خلاف ون ڊي، نيوزلينڊ خلاف ون ڊي ۽ ٽي ٽوئنٽي سيريز لاءِ ڌار ڌار ٽيمن جو اعلان ڪري ڇڏيو.
ڀارتي بورڊ جي سليڪشن ڪميٽي جي چونڊيل اسڪواڊ ۾ اڳوڻي ڪپتان مهندرا سنگهه ڌوني جي ٻيهر واپس ٿي، ريشب پنت کي ون ڊي اسڪواڊ مان ڊراپ ڪيو ويو، جڏهن ته سريش رائنه بدستور ٽيم جاءِ ٺاهڻ ۾ ناڪام رهيو، آل رائونڊر هرديڪ پانڊيا انجري کان ڇوٽڪاري بعد ٻيهر اسڪواڊ ۾ واپسي ڪئي، فاسٽ بالر اميش ياديو ٻنهي اسڪواڊز ۾ جاءِ ٺاهڻ ۾ ناڪام رهيو.
آسٽريليا ۽ نيوزلينڊ خلاف چونڊيل ون ڊي اسڪواڊ ۾ ڪپتان ويرات ڪوهلي، نائب ڪپتان روهت شرما، لوڪيش راهول، شيکر ڌون، امباتي رائيڊو، دنيش ڪارٿڪ، ڪيدر جاديو، ڌوني، پانڊيا، ڪلديب ياديو، يزويندر، جديجا، ڀونشور ڪمار جسپريت ڀمرا، خليل احمد ۽ محمد شامي شامل آهن.
نيوزلينڊ خلاف چونڊيل ٽي 20 اسڪواڊ ۾ ڪپتان ويرات ڪوهل، نائب ڪپتان روهت شرما، لوڪيش راهول، ريشب پنت، دنيش ڪارٿڪ، ڪيدر جاديو، ڌوني، هرديڪ پانڊيا، ڪرونل پانڊيا، ڪلديپ ياديو، يوزويندر اڇامل، جسپريت بمرا ۽ خليل احمد شامل آهن.
سڊني (اسپورٽس ڊيسڪ) بگ بيش ليگ ۾ شاندار مقابلا جاري آهن، سڊني ٿنڊر سڊني سڪسرز کي 21 رنسن هارائي ڪاميابي ماڻي. سڊني جي شوگرائونڊ اسٽيڊيم تي کيڏيل ميچ ۾ سڊني سڪسرز ٽاس کٽي پهرين فيلڊنگ جو فيصلو ڪيو، جيڪو غلط ثابت ٿيو.
اوپنر بيٽسمين 63 رنسن جي مدد سان سنڊني ٿنڊر مقرر اوورن ۾ 9 وڪيٽن جي نقصان تي 169 رنسون ٺاهيون. ٻين بيٽسمينن ۾ سيمز 28، فرگوسن 23 ۽ ڪپتان شين واٽسن 19 رنسون ٺاهيون. سڊني سڪسرز جي بالرن ڪوران 3 ، ڪيفي 2، ايبٽ ۽ ورشوئس هڪ هڪ وڪيٽ حاصل ڪئي.
170 رنسن جي هدف پويان لڳندي سڊني سڪسرز مقرر اوورن ۾ 9 وڪيٽن جي نقصان تي 149 رنسون ٺاهي هٿيار ڦٽا ڪيا. ڪوران 62، سين ايبٽ 35، هينري ڪس 15 رنسون ٺاهي نمايان رهيا. سڊني ٿنڊر طرفان بهترين بالنگ ڪندي سيمز ۽ فواد احمد 3-3 شڪار ڪيا، جڏهن ته ڪُڪ، گرين ۽ رين برڊ هڪ-هڪ وڪيٽ ورتي.
بهترين بيٽنگ جو مظاهرو ڪندڙ بٽلر کي ميچ جو بهترين رانديگر قرار ڏنو ويو.
اسلام ڪوٽ (رپورٽر) ٿر فائونڊيشن جي سهڪار سان دِيا وومين فٽبال ڪلب پاران شروع ڪيل فٽبال ٽورنامينٽ ۾ سنڌ جي 12 سالن کان گهٽ عمر وارين ڇوڪرين جي ٽيمن جا مقابلا جاري آهن. عورتاڻي ترقي جي صوبائي وزير اسيمبلي شهلا رضا ٽورنامينٽ جو افتتاح ڪيو.
ٽورنامينٽ ۾ ٿر فائونڊيشن پرائمري اسڪولن جي ڇوڪرين جي ٽيمن سميت سنڌ جي 8 ضلعن ڪراچي، ميرپورخاص، حيدرآباد، سکر، خيرپور ۽ حب جي ڇوڪرين جي ٽيمن شرڪت ڪئي.
ان موقعي تي ڪور ڪمانڊر ڪراچي ليفٽيننٽ جنرل ھمايون عزيز چيو ته ٿر تبدلي ٿيندو ۽ پاڪستان وارو نعرو سچ ثابت ٿي رهيو آهي، ٿر جهڙي علائقي ۾ اھڙي قسم جا ايونٽس ساراهه جوڳا آهن.
هن چيو ته ٿر جا ٻار انتھائي ھوشيار ۽ محنتي آهن، ٿر جي ٻارن کي آئون فوجي جنرل ڏسڻ چاهيان ٿو.
ٻي پاسي ڊي ٿرپارڪر آصف جميل شيخ چيو ته ٿر فائونڊيشن جو ڪم واکاڻ جوڳو آهي، جنهن ڏورانهين علائقي ۾ پروگرام ڪرايو. هن چيو ته ھتان جي ٻارڙين ۾ وڏو ٽيلينٽ موجود آهي، جنهن ٽيلينٽ کي اڀارڻ يقينن وڏو ڪم آھي.
ان موقعي تي ٿر فائونڊيشن جي تعليم واري شعبي جي مينيجر سبين شاهه چيو ته اسان فٽبال جي 8 ئي ضلعن جي ٽيمن کي ڦڙت ڏٺو سين. هن چيو ته ٿر فائونڊيشن جو مشن رڳو تعليم ئي نه پر ٿر جي عورتن کي هر طرح سان بااختيار بڻائڻ لاءِ ٻيا موقعا پڻ فراهم ڪري رهي آهي.
ٽورنامينٽ ۾ ڪور ڪمانڊر ڪراچي ليفٽيننٽ جنرل ھمايون عزيز ۽ ڊي سي ٿرپارڪر آصف جميل ٻارڙن ۾ ٽرافيون ۽ سرٽيفڪيٽ ورھايا.
يوسف قاضي 85 ۽ ڪامران 45 رنسون ٺاهيون، يوسف ميچ جو بهترين رانديگر قرار
نوشھروفيروز (رپورٽر) نوشهري فيروز ۾ سيد مٺل شاهه ميموريل ٽي ٽوئنٽي ڪرڪيٽ ٽورنامينٽ جا شاندار مقابلا جاري آهن. يونس ڪرڪيٽ ڪلب 94 رنسن تان مهراڻ ڪرڪيٽ کي شڪست ڏئي ڇڏي.
ڊگري ڪاليج جي ميدان تي جاري ٽي ٽوئنٽي ٽورنامينٽ جي ميچ ۾ مهراڻ ڪرڪيٽ ٽيم ٽاس فيلڊنگ جو فيصلو ڪيو، جيڪو غلط ثابت ٿيو. دعوت ملڻ تي بيٽنگ ڪندي يونس ڪرڪيٽ ڪلب جي ٽيم مقرر اوورن ۾ 9 وڪيٽن جي نقصان تي220 رنسون ٺاھيون. يوسف قاضي 48 بالن تي 85 رنسون ۽ ڪامران 22 بالن تي 45 رنسون ٺاھي نمايان رھيا.
220 رنسن جي جواب ۾ مهراڻ ڪرڪيٽ ڪلب جي ٽيم 16 اوورن ۾ 106 رنسن تي ڍير ٿي وئي. يونس ڪرڪيٽ ٽيم جي آصف 4 شڪار ڪيا، جڏهن ته احمد سراج ۽ ڪامران 2-2 وڪيٽون ورتيون.
يونس ڪرڪيٽ ٽيم جي بيٽسمين يوسف قاضي کي 85 رنسون ٺاهڻ تي ميچ جو بهترين رانديگر قرار ڏنو ويو.
ڪوٽڙي (رپورٽر) ڪوٽڙي ۾ پاڪستان بلائنڊ ڪرڪيٽ ٽي ٽوئنٽي ٽورنامينٽ شروع ٿي وئي، پهرين ڏينهن ٿيل ٻن ميچن ۾ پنجاب سنڌ ۽ بلوچستان ڪي پي کي شڪست ڏني.
پاڪستان بلائنڊ ڪرڪيٽ ڪائونسل جي انتظام هيٺ شروع ٿيل ٽي ٽوئنٽي ٽورنامينٽ جي افتتاحي ميچ ۾ سنڌ ٽيم ٽاس کٽي پهرين فيلڊنگ جو فيصلو ڪيو، جيڪو غلط ثابت ٿيو.
پنجاب ٽيم 4 وڪيٽن جي نقصان تي 212 رنسون ٺاهيون، بيٽسمين نثار علي 70 ۽ محسن خان 65 رنسون ٺاهيون.
جواب ۾ سنڌ ٽيم مقرر اوورن ۾ ٽن وڪيٽن جي نقصان تي 204 رنسون ٺاهي سگهي. ميچ کٽڻ بعد پنجاب ٽيم جي رانديگرن خوشي ۾ جهمريون پڻ هنيون.
ٻي ميچ ۾ بلوچستان ٽيم ڪي پي کي 32 رنسن تان شڪست ڏئي ميچ پنهنجي نالي ڪئي. بلوچستان ٽيم ٽاس کٽي پهرين بيٽنگ جو فيصلو ڪيو. پهرين بيٽنگ ڪندي بلوچستان جي ٽيم مقرر اوورن ۾ ٽن وڪيٽن جي نقصان تي 210 رنسون ٺاهيون، بيٽسمين اڪرم شاندار بيٽنگ ڪندي 130 ۽وقاص علي 36 رنسون ٺاهيون.
جواب ۾ ڪي پي ٽيم 6 وڪيٽن جي نقصان تي 178 رنسون ٺاهي سگهي، ڪي پي جي بيٽسمين ايوب خان 35 ۽ معين علي 41رنسون ٺاهي ٽاپ اسڪورر رهيا.
هوڏانهن افتتاحي تقريب ۾ وڏي انگ ۾ ماڻهن شرڪت ڪئي، جڏهن ڪمشنر حيدرآباد خاص مهمان طور شرڪت ڪئي.
تقريب کي خطاب ڪندي ڪمشنر حيدرآباد چيو ته اسپيشل نوجوانن لاءِ راندين جا موقعا ٿيڻ تمام بهتر عمل آھي، حيدرآباد ڊويزن جي اسپيشل رانديگرن جي نوڪري وارو مسئلو به حل ڪنداسين. هن چيو ته حيدرآباد ڊويزن ۾ جيڪڏهن ڪرڪيٽ ميدانن تي قبضا آھن ته رهواسي شڪايت ڪن ته جيئين اسان قبضا ختم ڪرائي سگهون.
سڊني (اسپورٽس ڊيسڪ) آسٽريليا پاڪستان دورو پي ايس ايل جي لاهور ۽ ڪراچي جي ميچن سان مشروط ڪري تجويز ڪيل شيڊول ۾ به ترميم ڪري ڇڏي.
ڪرڪيٽ آسٽريليا جي سڪيورٽي ٽيم ۽ 3 عملدار مارچ جي پهرين هفتي ۾ پي سي بي جي مهمان بڻجندا، جيڪي 17 مارچ تي پي ايس ايل فائنل سميت سموري سڪيورٽي صورتحال جو جائزو وٺي رپورٽ ڏيندا.
ڪرڪيٽ آسٽريليا ۽ حڪومت ان رپورٽ جي روشني ۾ سمورا معاملا طئي ڪندا.
ڪرڪيٽ آسٽريليا اختيارين پاڪستان ٽيم اماڻڻ جو اشارو ڏنو پر اڃا تائين قطعي فيصلو ڪرڻ کان اڳ سڪيورتي صورتحال جي تسلي ۽ وقت وٺڻ چاهين ٿيون، جنهن سبب ميچن جو شيڊول به تبديل ڪيو پيو وڃي.
سانگهڙ (رپورٽر) شهداد پور ۾ اسٽوڊنٽ ڪرڪيٽ ٽيم رائل ڪرڪيٽ ٽيم کي شڪست ڏئي انٽر ڊسٽرڪٽ ٽورنامينٽ پنهنجي نالي ڪري ورتي.
عبدالسلام ٿهيم اسٽيڊيم ۾ قادر جوڻيجو جي ياد ۾ ڪرايل پهرين انٽر ڊسٽرڪٽ ٽورنامينٽ جي 30 اوورن تي ٻڌل فائنل ۾ اسٽوڊنٽ ڪرڪيٽ ڪلب پهرين بيٽنگ ڪندي 180 رنسون ٺاهيون.
رائل ڪرڪيٽ ڪلب جي ٽيم 24 اوررن ۾ 115 رنسن تي ڍير ٿي وئي. ان موقعي تي خاص مهمان عبدالقادر جوڻيجو ۽ رضا وساڻ فاتح ٽيم جي ڪپتان کي ٽرافي ڏني. ميچ جو بهترين رانديگر ٽنڊو آدم جي ڪاشف پرويز کي قرار ڏنو ويو، جڏهن ته ٽورنامينٽ جي بهترين رانديگر جو ايوارڊ رائل ڪرڪيٽ ڪلب شهدادپور جي قربان لاکو کي ڏنو ويو.
لاهور (اسپورٽس ڊيسڪ) پاڪستان ڪرڪيٽ ٽيم جي اڳوڻي هيڊ ڪوچ ڊيوڊ واٽمور چيو آهي ته سرفراز احمد کي ٽيسٽ ڪپتاني تان نه هٽائڻ گهرجي. هڪ انٽرويو ۾هن پي سي بي ۽ سليڪشن ڪميٽي کي مشورو ڏنو ته ٽنهي طرز جي ڪرڪيٽ ۾ تسلسل آڻڻ جي ضرورت آهي ۽ سرفراز احمد قيات لاءِ مناسب آهي.
ڊيوڊ واٽمور جو چوڻ هو ته اهو چوڻ سولو آهي ته ڪپتان تبديل ڪري ڇڏيو ته سڀ ٺيڪ ٿي ويندو، پر هن وقت صورتحال اها آهي ته سرفراز احمد پاڪستاني ٽيم جي ڪامياب ڪپتان آهي ۽ مڪي آرٿر به ائين ئي سمجهي ٿو، ان ڪري ٽيسٽ ٽيم جي ڪپتاني سان ڇيڙ ڇاڙ نه ڪئي وڃي.
نيو جرسي (اسپورٽس ڊيسڪ) آمريڪا ۾ ريفري ميچ روڪرائي ريسلر جا وڏا ڪٽرائي ڇڏيا. نيو جرسي ۾ اسڪول سطح تي ٿيندڙ ريسلنگ مقابلن ۾ ان وقت دلچسپ صورتحال پيدا ٿي جڏهن ميچ ريفري ڪلهن تائين لٽڪيل وڏن وارن واري رانديگر کي وار ڪٽڻ بنا ميچ جاري رکڻ کان روڪي ڇڏيو. ريسلر جي وار ڪترن واري وڊيو سوشل ميڊيا تي وائرل ٿي وئي.
نوجوان ريلسر اينڊريو جانسن جي ڪوچ ميچ ريفري جي فيصلي تي احتجاج ڪندي معاملو ٺاهڻ جي ڪوشش به ڪئي، پر ريفري چيو ته وار ڪتريا ويندا يا ميچ اڌ ۾ ڇڏي ناڪ آئوٽ لاءِ تيار ٿي وڃو، جنهن تي ڪوچ مجبور ٿي ريسلر جا وار ڪتري ڇڏيا.
هوبارٽ (اسپورٽس ڊيسڪ) آسٽريليا جي بگ بيش ليگ جي ستين ميچ ۾ هوبارٽ هوريڪنز ميلبورن اسٽارز کي 6 وڪيٽن تان شڪست ڏئي ڇڏي آهي. هوبارٽ هريڪنز ميچ ۾ ٽاس کٽي ميڪس ويل جي ميلبورن اسٽارز کي پهريان بيٽنگ جي دعوت ڏني، جنهن دوران ميلبورن اسٽارز پنج وڪيٽن جي نقصان تي 155 رنسون ٺاهيون، گلين ميڪسويل طوفاني بيٽنگ ڪندي پنج ڇڪن جي مدد سان 45 رنسون ٺاهي نميان رهيو جڏهن ته آرشر ۽ ڊي سي شارٽ 3 ۽ 2 وڪيٽون حاصل ڪيون. جواب ۾ هوبارٽ طرفان ڪپتان ميٿيو ويڊ 52 رنسون ٺاهيون، جڏهن ته ڊي سي شارٽ 2 وڪيٽون حاصل ڪرڻ سان گڏ 34 رنسون ٺاهيون، جنهن تي کيس ميچ جو ڀلوڙ رانديگر قرار ڏنو ويو. هوبارٽ هريڪنز ڪاميابي کانپوءِ ٽيبل پوائنٽس تي ٻئي نمبر تي اچي وئي آهي، جڏهن ته ميلبورن رينيگيڊز پهرين نمبر تي موجود آهي.
پريالوءِ (رپوٽر ) پريالوءِ ۾ “ دلڙي چوي اسڪول وڃان” جي عنوان هيٺ هڪ ثقافتي پروگرام پريالوءِ ڪرڪيٽ گرائونڊ ۾ ٿي گذريو، جنهن دوران ٻارڙن ٽيبلوزپيش ڪري پنهنجي والدين سان گڏ پروگرام جي مهمان خاص ايم اين اي سيد جاويد علي شاهه سميت ٻين کان خوب داد حاصل ڪيو. پروگرام ۾ سنڌ جي ثقافت واري راند ملهه ملاکڙي جا مقابلا پڻ ٿيا، جنهن ۾ سنڌ جي مشهورملهه پهلوانن محمد خان ڦل، اويس گھانگرو ، ديدارجمالي سميت ٻين حصوورتو. ملاکڙي ۾ پهلوانن پنهنجي زورآزمائي ڪندي هڪٻئي کي دسي مٽي سان رنگي ڇڏيو. ثقافتي پروگرام جي مهمان خاص ايم اين اي سيد جاويد علي شاهه ملهه جي پهلوانن کي انعام پڻ ڏنا، جڏهن ته ثقافي پروگرام منقعد ڪرائڻ ۾ حسين مهر، وڏيرو معشوق علي ڌاريجو، راڻو خان ڦلپوٽو، گلشير مهر ڪردار ادا ڪيو.
شاهپورجهانيان (اختر آزاد ڏاهري) شاهپورجهانيان شھر جي ميلا گرائونڊ تي شھيد راڻي بينظير ڀٽو ڪرڪيٽ ڪپ ٽورنامينٽ ڪرايو ويو، جنهن جي فائنل ۾ المهراڻ ۽ شھنشاھ سخت مقابلو ڪيو. المهراڻ ٽيم ٽاس کٽي شھنشاھ ٽيم کي پهريان کيڏڻ جي دعوت ڏني، شھنشاھ ٽيم مقرر 10 اوورن ۾ 7 وڪيٽن جي نقصان تي 135 رنسون ٺاهيون ۽ المهراڻ 136 جو هدف نائين اوور ۾ 6 وڪيٽن جي نقصان تي حاصل ڪري شھيد راڻي بينظير ڀٽو ڪرڪيٽ ڪپ ٽورنامينٽ جي ٽرافي پنهنجي نالي ڪري ورتي. فاتح ڪپتان ربنواز گل ڏاهري ٽرافي وصول ڪئي. ٽورنامينٽ ۾ حسن آرائين بهترين بئٽنگ ڪري اسڪور ۾ اڳڀرو رهيو، جڏهن ته بهترين بالنگ جو ايوارڊ اعجاز ٻگهيو ۽ بهترين فيلڊنگ واري ڪارڪردگي ڏيکاريندڙ 2 رانديگرن مظھر لغاري ۽ آچر ٻگهيو کي انعام ڏنو ويو. ٽورنامينٽ جي خاص مهمان ۽ شاهپورجهانيان ٽائون ڪاميٽي جي چيئرمين حاجي خالد حسين آرائين رانديگرن ۾کي مڃتا طور انعام ڏنا. ان موقعي تي پنهنجي اخبار سان ڳالهائيندي شاهپورجهانيان ٽائون ڪاميٽي جي چيئرمين حاجي خالد حسين آرائين چيو ته رانديون نوجوانن جون ذھني ۽ جسماني صلاحيتون وڌائڻ سان، مختلف بيمارين کان به بچائين ٿيون انڪري نوجوانن کي علمي، ادبي سرگرمين سان گڏ راندين ۾ به دلچسپي وٺڻ گهرجي.