لاهور : آءِ جي جيلز پنجاب پاران پروفيسر ميان جاويد جي موت بعد هٿڪڙيون لڳل تصويرون وائرل ٿيڻ جي جاچ شروع ڪئي وئي آهي. سرگوڌا يونيورسٽي جا غير قانوني ڪيمپسز کولڻ جي الزام ۾گرفتار چيف ايگزيڪيوٽو  پروفيسر ميان جاويد جي موت وقت هٿڪڙيون لڳل تصويرون سوشل ميڊيا تي وائرل ٿيڻ بعد پنجاب جي وڏي وزير عثمان بوزدار نوٽيس وٺي آءِ جي پنجاب کان رپورٽ طلب ڪئي.  انسپيڪٽر جنرل جيلز پنجاب مامري جي جاچ شروع ڪري ڇڏي آهي. جاچ دوران جيل ۾ مقرر پوليس اهلڪارن سميت ڊاڪٽرن کان پڇاڳاڇا ڪئي پئي وڃي ته ڪوتاهي ڪٿي ٿي آهي؟ پروفيسر ميان جاويد کي دير سان اسپتال آندو ويو يا ڊاڪٽرن دير جو مظاهرو ڪيو؟ وڏي وزير کي اڄ رپورٽ پيش ڪئي ويندي.

لاهور(مانيٽرنگ ڊيسڪ) سرگوڌا يونيورسٽي لاهور ڪيمپس جي سي اي او ميان جاويد کي جيل مان اسپتال کڻي وڃڻ جي سي سي ٽي وي وڊيو سامهون اچي وئي. وڊيو ۾ ميان جاويد کي اسٽريچر تي جيل مان ٻاهر آندو پيو وڃي، جڏهن ته ايمبو بيگ سان مصنوعي ساهه به ڏنو پيو وڃي، جڏهن ته هڪ شخص ميان جاويد جي دل جي ڌڙڪن بحال ڪرڻ لاءِ سي پي آر ڪندي به نظر اچي رهيو آهي. ريسڪيو ذريعن موجب وڊيو ۾ اسٽريچر تي موجود ميان جاويد جي هٿن ۾ ڪابه هٿڪڙي نظر نه اچي رهي آهي، ميان جاويد کي منجهند 2 لڳي 14 منٽ تي ڪيمپ جيل کان ٻاهر آندو ويو ۽ 2 لڳي 19 منٽن تي ايمبولنس ذريعي اسپتال روانو ڪيو ويو. خانگي ٽي وي چئنل جي رپورٽ موجب ميان جاويد جيل جي ان حصي ۾ قيد هو، جيڪو نيب جي جوابدارن لاءِ مخصوص ٿيل آهي. ميان جاويد 3 ڏينهن کان سيني ۾ تڪليف جي شڪايت ڪري رهيو هو پر کيس اسپتال منتقل نه ڪيو ويو، ميان جاويد کي هٿڪڙيون سندس فوت ٿيڻ کانپوءِ لڳائي غير انساني رويي جو مظاهرو ڪيو ويو.

اسلام آباد(رپورٽر) “وزير اعظم بڻايو” اسلام آباد ۾ همراهه پول تي چڙهي ويو. اسلام آباد جي علائقي بليو ايريا ۾ همراهه بلڊنگ تي لڳل موبائيل سنگل ٽاور تي چڙهي آپگهات جي ڪوشش ڪئي. پوليس ۽ ٻين ادارن جي اهلڪارن موقعي تي پهچي پول تي چڙهي ويل همراهه کي هيٺ لاهي ورتو. پول تي چڙهي ويل همراهه کي پاڪستان جو جهنڊو ويڙهيل هو، هو دانهي رهيو هو ته ملڪ جون حالتون خراب آهن، وزير اعظم بڻايو سڀ ٺيڪ ڪري ڇڏيندس.

لاهور(م ڊ) ايڊن گارڊن جي ڪيترن ئي متاثرن زمان پاڪ ٻاهران حتجاجي مظاهرو ڪندي مطالبن جي حق ۾ نعريبازي ڪئي، احتجاج سبب زمان پارڪ جي روڊن تي ٽريفڪ جام ٿي وئي. احتجاج جي ڪري ڪينال روڊ تي گاڏين جون ڊگهيون قطارون لڳي ويون ڪنهن به اڻ وڻندڙ صورتحال کي منهن ڏيڻ ۽ مظاهرو ڪندڙن کي وزير اعظم جي گهر زمان پارڪ جي اندر وڃڻ کان روڪڻ جي لاءِ پوليس جي ڳري نفري مقرر ڪئي وئي هئي. جڏهن ته ڀرپاسي وارن روڊن تي ٽريفڪ جو دٻاءُ وڌي ويو جنهن سبب شهرين کي سخت ڏکيائين منهن ڏيڻو پيو ۽ منٽن جو سفر ڪلاڪن ۾ طئي ٿيو.

لاهور (م ڊ) حڪمران پارٽي تحريڪ انصاف جي آفيشل ٽوئيٽر اڪائونٽ تان ڏکڻ پنجاب سيڪريٽريٽ بابت اعلان هٽائي ڇڏيو. تحريڪ انصاف جي آفيشل ٽوئٽر اڪائونٽ تان ڪيل ٽوئيٽ ۾ ايندڙ سال پهرين جولاءِ کان ڏکڻ پنجاب جي الڳ انتظامي سيڪريٽريٽ جو اعلان ڪيو هو. ٽوئيٽ ۾ اهو به چيو ويو هو ته ڏکڻ پنجاب جو الڳ چيف سيڪريٽري ۽ الڳ آءِ جي پوليس به مقرر ڪيا ويندا جڏهن ته ڏکڻ پنجاب جي ترقياتي بجيٽ به سندس پاڻ وٽ هوندو. ميڊيا تي اهڙي خبر نشر ٿيڻ کانپوءِ پي ٽي آءِ آفيشل ٽوئيٽر اڪائونٽ تان ڄاڻايل ٽوئيٽ ڊليٽ ڪري ڇڏي آهي.

اسلام آباد (م ڊ) قومي احتساب بيورو آشيانه هائوسنگ اسڪينڊل ۾ ضمني ريفرنس داخل ڪري ڇڏيو، ريفرنس ۾ شهباز شريف سميت 13 جوابدارن کي نامزد ڪيو ويو آهي. نيب آشيانه هائوسنگ اسڪينڊل ۾ احتساب عدالت ۾ ضمني ريفرنس داخل ڪيو آهي. ريفرنس ۾ موقف اختيار ڪيو ويو آهي ته شهباز شريف آشيانه هائوسنگ اسڪينڊل م قومي ناڻي کي ڪروڙين رپين جو نقصان پهچايو آهي. ريفرنس ۾ شهباز شريف سميت 13 جوابدارن کي نامزد ڪيو ويو آهي. ٻين جوابدارن ۾ بلال قدوائي، شاهد شفيق، منير ضياءَ، ڪامران ڪياني، احد چيما، چوڌري صادق، شاهد محمود به شامل آهن.

اسلام آباد(بيورو رپورٽ) اسلام آباد هاءِ ڪورٽ پي ٽي وي ڪرپشن ڪيس ۾ گرفتار ڊاڪٽر شاهد مسعود جي ضمانت واري درخوسات رد ڪري ڇڏي. تفصيل موجب اسلام آباد هاءِ ڪورٽ ۾ ڊاڪٽر شاهد مسعود جي ضمانت واري درخواست جي ٻڌڻي ٿي. جسٽس محسن اختر پي ٽي وي ڪرپشڻ جو فيصلو ٻڌائيندي شاهد مسعود جي ضمانت واري درخواست خارج ڪري ڇڏي. اسلام آباد هاءِ ڪورٽ 20 ڊسمبر تي پي ٽي وي ڪرپشن ڪيس ۾ ڊاڪٽر شاهد مسعود جي ضمانت واري درخواست تي فيصلو محفوظ ڪيو هو. ڊاڪٽر شاهد مسعود کي گذريل مهيني 23 نومبر تي ضمانت واري درخواست خارج ڪرڻ بعد اسلام آباد هاءِ ڪورٽ جي اڱڻ مان گرفتار ڪيو ويو هو. وفاقي جاچ اداري ايف آءِ اي جي موجب ڊاڪٽر شاهد مسعود تي مبينا طور تي 3 ڪروڙ 80 لک جي بدعنواني جو الزام آهي.

ٽيڪسلا (م ڊ) پيٽروليم واري وفاقي وزير غلام سرور خان چيو آهي ته تعليم مسلم ملڪن جي ترجيح ئي ناهي رهي. ملڪ هن وقت سخت معاشي بحران جو شڪار آهي، تعليم جيان پيٽروليم جي صنعت کي به تباهه ڪيو ويو آهي. گورنمينٽ ڪاليج آف ٽيڪنالاجي ٽيڪسلا ۾ انعام ورهائڻ جي تقريب کي خطاب ڪندي وفاقي وزير چيو ته پاڪستان ۾ اڍائي ڪروڙ ٻار تعليم جي سهولت کان وانجهيل آهن، جڏهن ته اڍائي ڪروڙ ميٽرڪ ۽ انٽر تائين پڙهڻ کانپوءِ تعليم ڇڏي ڏين ٿا، اسان جي ٻارن کي تعليم موجب نوڪريون نه ٿيون ملن، کين پڙهائي لکائي قابل بڻايون ٿا ته اهي آمريڪا ۽ برطانيا ۾ وڃي پنهنجون خدمتون انجام ڏين ٿا. سندس چوڻ هو ته اسان ملڪ ۾ هڪ جهڙي تعليمي نصاب لاءِ ٽاسڪ فورس ٺاهي آهي، اهو ڪم ڏکيو لڳي رهيو آهي پر اسان جي حڪومت ان لاءِ قدم کڻي پئي، اسان دنيا جي تعليمي ميدان ۾ گهڻو پوئتي آهيون ۽ هن وقت يونيورسٽيون اسان جي گهرج آهن،