اسلام آباد (بيورو رپورٽ) سينيٽ جي اجلاس ۾ مخالف ڌر خلاف انتقامي ڪارروايون ڪرڻ تي احتجاج. پيپلز پارٽي جو واڪ آئوٽ، ڪورم جي نشاندهي، اجلاس بنا ڪارروائي جي اڻ اعلانيل مدي تائين ملتوي. سينيٽ جو اجلاس سينيٽ چيئرمين صادق سنجراڻي جي صدارت ۾ ٿيو ته پوائنٽ آف آرڊر تي ڳالهائيندي پيپلز پارٽي جي اڳواڻ شيري رحمان چيو ته هي ايوان ٻُسو ٻُسو لڳي رهيو آهي ڇو ته مخالف ڌر جا ميمبر پنهنجي قيادت سان عدالتن اڳيان جھڪڻ لاءِ عدالتن ۾ موجود آهن. هن چيو ته سپريم ڪورٽ ۾ جي آءِ ٽي رپورٽ پروجيڪٽر ذريعي ڏيکاري وئي، پيپلز پارٽي جي قيادت کي تڪراري بنائڻ جي ڪوشش ٿي رهي آهي. احتساب جي نالي تي قوم سان مذاق ڪيو پيو وڃي. هن چيو ته وزيراعظم جي احتساب بابت خصوصي معاون ايف آءِ اي جي عملدارن سان ملاقاتون ڪيون، گواهن سان مليو. هي ڪهڙو مذاق بنايو پيو وڃي. هي ڪهڙي قسم جي جي آءِ ٽي ٺهي آهي. توهان احتساب ڪرڻ چاهيو ٿا ته ڪيو، پيپلز پارٽي ۽ مخالف ڌر ان لاءِ حاضر آهي. اسان، عوام ۽ عدالتن کي مسلسل جواب ڏيندا رهيا آهيون. هن چيو ته سرگوڌا يونيورسٽي جو پروفيسر سرڪاري تحويل ۾ فوت ٿيو. تدفين وقت سندس جسم زنجيرن سان جڪڙيل هو، ڇا هي مديني جي رياست آهي؟ جتي ذوالفقار علي ڀٽو، بينظير ڀٽو ۽ ان جي پارٽي کي انصاف نه ٿو ملي. هن چيو ته آصف زرداري 11 سال جيل ڪاٽيو پر سندس خلاف ڪو ڪيس ثابت نه ٿيو پر آئين ٽوڙڻ وارن کي مڪمل ڇوٽ ڏني وئي آهي ته اهي ملڪ کان ٻاهر آهن. احتساب رڳو مخالف ڌر جو ڇو ٿي رهيو آهي؟ وزير اعظم جي فيملي ميمبرن پنهنجا اثاثه ظاهر نه ڪيا. اوهان پنهنجي ملڪيت کي ريگيولر پيا ڪيو. توهان سئو ڏينهن ۾ 50 هزار ماڻهن جا گھر ڊاٺا آهن ۽ هڪ لک ماڻهن کي بيروزگار ڪيو آهي. هنن جا انوکا لاڏلا معافيون حاصل ڪري رهيا آهن، کين ڇوٽ مليل آهي. ايف آءِ اي جي ڊي جي بشير ميمڻ جو ڀاءُ پيپلز پارٽي خلاف چونڊ وڙهي چڪو آهي. هي ڪهڙو احتساب آهي، احتساب جي نالي تي مخالف ڌر کان انتقام ورتو پيو وڃي. هن چيو ته هن ايوان کان ٻاهر جيڪڏهن ائين ٿيندو ته اسان هن ايوان کي ائين بي معنيٰ هلڻ نه ڏينداسين. جنهن تي قائد ايوان شبلي فراز چيو ته هڪ طرفو احتساب ٿيڻ بابت اپوزيشن چرچو بڻايو آهي. نواز شريف پنهنجي حڪومت ۾ نااهل ٿيو ان سان پي ٽي آءِ جو ڪو تعلق نه آهي. نيب چيئرمين پيپلز پارٽي ۽ ن ليگ مقرر ڪيو. ماضي ۾ انهن جي ڪرپشن تي پڙدو رکيو ويندو هو. پي ٽي آءِ حڪومت ادارن کي مداخلت کان پري رکيو آهي ۽ اسان چاهيون ٿا ته اهي آزادي سان ڪم ڪن. هن چيو ته پيپلز پارٽي 5 سال حڪومت ڪئي ان جي قاتلن کي انجام تائين ڇو نه پهچايو. هن چيو ته آصف زرداري مٿان ڪيس آهن، هي تنهنڪري دٻاءُ رکي رهيا آهن. جنهن تي اپوزيشن سينيٽ مان واڪ آئوٽ ڪري ٻاهر هلي وئي. ان دوران سڌ سماءُ جو وزير فواد چوڌري جواب ڏيڻ لاءِ اٿيو ته پيپلز پارٽي جي سينيٽر سسئي پليجو ڪورم پورو نه هجڻ جي نشاندهي ڪري ڇڏي جنهن تي سينيٽ چيئرمين ايوان جي ڪارروائي روڪي ڳڻپ ڪرائي ته ڪورم پورو نه هيو جنهن ڪري سينيٽ جي ڪارروائي اڌ ڪلاڪ لاءِ ملتوي ڪئي وئي. تيسيتائين سينيٽ چيئرمين حڪومتي ڌر کي مخالف ڌر کي پرچائڻ جي هدايت ڪئي. اڌ ڪلاڪ کانپوءِ سينيٽ جو اجلاس ٻيهر شروع ٿيو. مخالف ڌر اجلاس ۾ اچڻ کان حڪومت کي کتو جواب ڏئي ڇڏيو. جنهن سبب ڪورم پورو نه ٿي سگھيو ۽ سينيٽ جو اجلاس بنا ڪنهن معمول جي ڪارروائي جي اڻ ڄاتل مدي تائين ملتوي ڪيو ويو.