سامارو (ن پ ا) سامارو ۾ واٽر ڪورس جو موڳو لٽي پاڻي بند ڪرڻ خلاف آبادگارن احتجاجي مظاهرو ڪري ڌرڻو هنيو. آبادگارن عبدالله گهيلڙو، علي بهادر گهيلڙو، ستار سولنگي، رمضان سولنگي، رحيم دين پٺاڻ ۽ ٻين جي اڳواڻي ۾ ڌرڻو هنيو. ان موقعي تي آبادگارن دانهيو ته آبپاشي عملدارن عدالتي حڪم جي ابتڙ هير واهه مان نڪرنڊ واٽر ڪورس بند ڪري ظلم ڪيو آهي. هنن دانهيو ته پاڻي بند ٿيڻ سبب ڪڻڪ جي پوکائي ڏکي ٿي پئي آهي، نوٽيس وٺي پاڻي ڏنو وڃي.

گولاڙچي(ن پ ا) گولاڙچي تعلقي جي شھرن گولاڙچي، ڪڙيوگهنور، ترائي ، کوراهه شھر ۾ نقلي ٻج، ڀاڻ ۽ دوائون سرعام فروخت ٿيڻ لڳا آهن، جنهن جي ڪري آبادگارن کي وڏي پيماني تي نقصان ٿيڻ جو انديشو آهي. غير رجسٽرڊ ٿيل ڪپمنين طرفان بااثر واپارين ذريعي نقلي ٻج، دوائون ۽ ڪيمڪل وارو ڀاڻ تيار ڪري وڪرو ڪرڻ جو انڪشاف پڻ ٿيو آهي، جنهن ۾ ڪيترائي علائقي جا بااثر واپاري ملوث آھن. انھن جي زريعي گولاڙچي، ڪڙيوگهنور، ترائي ۽ کورواهه ۾ غير قانوني زرعي دوائن جا دوڪان سرعام هلڻ لڳا آهن. پيسٽيسائيڊ جي آڙ ۾ آبادگارن جو معاشي قتل عام ٿي رھيو آهي جيڪڏھن جلد ئي هنن خلاف ڪاروائي نه ٿي سگهي ته ايندڙ وقت ۾ آبادگارن کي وڏي معاشي نقصان ٿيڻ جو خدشو آهي. انهي سلسلي ۾ آبادگارن خدابخش رند، حبيب ملاح، اعجاز خاصخيلي ۽ ٻين چيو آهي ته گذريل سال به نقلي ٻج ۽ ڀاڻ جي ڪري زمينون ايوريج نه ڏئي سگهيون جنهن ڪري ڪافي نقصان پڻ ٿيو ھو، هن دفعي پڻ رائيس ملون توڙي واپاري ٻج ۽ ڀاڻ جا نقلي ڪمپنين جا سيمپل مارڪيٽ مان خريد ڪري وڪرو ڪري رهيا آهن، جنهن خلاف اگر قانوني ڪاروائي عمل ۾ نه آنندي وئي ته ڪافي نقصان جو انديشو آهي. ملاوٽي عنصر پنهنجي ڪاروبار ۾ تمام ھوشيار آهن جن بابت ڪيتريون ئي شڪايتون ڪيون ويون آھن پر ڪجهه به نه ٿي سگهيو آهي. ھتان جي آبادگارن زراعت کاتي جي صوبائي وزير اسماعيل راھو، زراعت کاتي بدين ۽ اعليٰ اختيارين کي اپيل ڪئي آهي ته جلد کان جلد هنن خلاف ڪاروائي عمل ۾ آندي وڃي ٻئي صورت ۾ ڪورٽ ۾ پٽيشن داخل ڪرائي ويندي ۽ سخت احتجاج ڪيو ويندو

قاضي احمد (ن پ ا) اڳوڻي صدر آصف زرداري، پ پ چيئرمين بلاول ڀٽو زرداري، فريال ٽالپر، وڏي وزير مراد علي شاهه ۽ ٻين اڳوانن جا نالا اي سي ايل ۾ شامل ڪرڻ خلاف قاضي احمد ۾ پ پ اڳواڻن احتجاجي مظاهرو ڪيو. ان موقعي تي انجنيئر غفار جتوئي، نبي بخش ماڃوٺو، غلام نبي زرداري، سليم خاصخيلي ۽ ٻين چيو ته تحريڪ انصاف جي حڪومت پ پ قيادت خلاف انتقامي ڪارروايون ڪندي نالا اي سي ايل ۾ شامل ڪيا آهن.

نوابشاهه(رپورٽر)اومني گروپ کي ٻانڌي شوگر مل لاءِ پنهنجي زمين ڏيندڙ مومن ڏاهري ڪجهه ڏينهن اڳ وفات ڪري ويو آهي اي سي ايل پاران جاري ڪيل لسٽ ۾ نالو ڏسي سندس وارث حيرت ۾ اچي ويا ،وزارت داخلا پاڪستان طرفان جاري ڪيل اي سي ايل لسٽ ۾ ضلعي شهيد بينظير آباد سان تعلق رکندڙ اڳوڻو صدر پاڪستان ۽ ايم اين اي آصف علي زرداري، پاڪستان پيپلزپارٽي جو چيئرمين بلاول ڀٽو زرداري، ايم پي اي فريال ٽالپر، ايم پي اي حاجي علي حسن زرداري، ٺيڪيدار طارق عزيز عرف پپو چنا ۽ سندس ڀاءُ خالد مسعود چنا جو نالو اي سي ايل ۾ شامل آهي، اي سي ايل ۾ شامل نوابشاهه ضلعي جي ٻانڌي شهر جي زميندار مومن ڏاهري اومني گروپ کي پنهنجي زمين وڪرو ڪئي هئي جنهن جي قيمت پڻ هن وصول ڪئي جڏهن ته 10 ڊسمبر تي مومن ڏاهري فوت ٿي چڪو آهي انهي جو نالو به اي سي ايل لسٽ جي چوٿين نمبر تي شامل آهي ,فوت ٿيندڙ مومن ڏاهري جي ڀاءُ رئيس عبدالغفار ڏاهري ٻڌايو ته منهنجي ڀاءُ مومن ڏاهري اومني گروپ کي 145 ايڪڙ زمين خريد ڪري ڏني هئي جنهن جي اومني گروپ ڪجهه ادائيگي ڪئي هئي ڪجهه رهت آهي جيڪو مونکي منهنجي ڀاءُ حياتي ۾ ٻڌايو ته منهنجا ڪجهه پيسا اومني گروپ ڏانهن رهن ٿا ۽ منهنجي ڀاءُ جي 14 ايڪڙ زمين جيڪا اومني گروپ کي منهنجي ڀاءُ رجسٽري ڪري نه ڏني هئي اها زمين به شوگر مل جي قبضي هيٺ آهي هن چيو ته اسين پهريان ئي ڏکايل آهيون پر مرحوم ڀاءُ جو نالو اي سي ايل لسٽ ۾ ڏسي وڌيڪ ڏک ٿيو آهي نه هن ڪا ڪرپشن ڪئي آهي اسان خانداني زميندار آهيون ۽ اسان پنهنجي پراپرٽي کپائي آهي ڪا ڪرپشن نه ڪئي آهي.

نوابشاهه( رپورٽر ) تعلقه ٿاڻي جي پوليس جوا جي اڏي تي ڇاپو 3 هڻي جوابدار گرفتار ڪري ورتا،ان ڏس ۾تعلقه ٿاڻي نوابشاهه جي پوليس دعويٰ ڪئي آهي ته انهن بلاول مائنر جي ڀرسان هلندڙ جوا جي اڏي تي ڇاپو هڻي ٽن جوارين بلو شر، علي حسن زرداري ۽ محب علي زرداري کي گرفتار ڪري انهن جي قبضي مان 8 هزار روپيا روڪ، تاش جي ڊٻي، هڪ موٽر سائيڪل بغير ڪاغذن جي هٿ ڪئي ۽ جوابدارن خلاف پنج جوا ايڪٽ تحت ڪيس داخل ڪري ڇڏيو.

نوابشاهه(ن پ ا) نوابشاهه ۾ آبادگارن اسڪارپ عملدارن خلاف احتجاجي مظاهرو ڪيو. آبادگارن سياڻو ڏاھري، ابراهيم، احمد نواز ابڙو ۽ ٻين جي اڳواڻي ۾ پريس ڪلب آڏو احتجاجي مظاهرو ڪيو، جنهن دوران نعريبازي ڪئي وئي. ان موقعي تي آبادگارن دانهيو ته دولتپور سم نالو روھڙي ڪئنال جي اولهندي پاسي سان گڏوگڏ يوسف ڏاھري موري تائين ٺھيل آھي، ڪامورن جي نااھلي سبب سم نالي جو ڪم اڌ ۾ رهجي ويو ۽ گندگي پاڻي سان ڀرجي ويو آهي. نالي جو زهريلو پاڻي ڇوڙ ٿيڻ سبب زمينون غير آباد ٿي رهيون آهن، نوٽيس ورتو وڃي.

منهڙو(ن پ ا)منهڙو ڀرسان دريا خان مري ٿاڻي جي حد ڳوٺ بودلو ڏاهري جي رهواسي 16ورهيه نوجوان عابد علي ولد مور ڏاهري ذهني توازن صحيح نه هئڻ ڪري بودلو موري کان ٽي ڏينهن اڳ روهڙي ڪئنال ۾ ٽپو ڏئي ڇڏيو هو ،جنهن جو 3 ڏينهن گذرڻ باوجود لاش هٿ نه اچي سگهيو آهي،نوجوان جا وارث ۽ وڏي انگ ۾ علائقي واسي لاش جي ڳولا لاءِ بودلو موري، يوسف ڏاهري موري،دوروفال موري،سن موري،هبيري موري ۽ روهڙي ڪئنال جي مختلف هنڌن تي رات ڏينهن نوجوان جي مڙھ جي انتظار ۾ ويٺل آهن ٻي طرف نوجوان جي وارثن پاران سندس ڳوٺ ۾ تڏو وڇايو ويو آهي .

شاهپورجهانيان(ن پ ا)شاهپورجهانيان کان 6 ڪلو ميٽر پري قومي شاهراھ تي تيز رفتار ٽرالر جي ٽڪر ۾ موٽرسائيڪل سوار ڳوٺ صالح راهو واسي 2ڄڻا نثار علي راھو ۽ صاحب علي راهو سخت زخمي ٿي پيا جڏهن ته ٽرالر ڊرائيور ٽرالر سميت فرار ٿي ويو،گڏ ٿيل ماڻھن ۽ پوليس زخمين کي فوري طور مقامي اسپتال آندو،جن کي ڊاڪٽر طبي امداد بعد نوابشاھ اسپتال ريفر ڪري ڇڏيو،ٻڌايو وڃي پيو ته زخمي ٿيل ٻئي ڄڻا ڪم سانگي شھر آيل هئا ۽ شھر مان واپس پنهنجي ڳوٺ صالح راهو وڃي رهيا هئا ته رستي ۾ قومي شاهراھ تي ساڻن حادثو پيش آيو.

دوڙ (ن پ ا) دڙو ۾ بنيادي سهولتون اڻلڀ، جديد دور ۾ به رهواسي ڌڪا کائڻ تي مجبور، خبر موجب، دوڙ جي ڳوٺ ڪريم بخش وڳڻ، ڳوٺ لڌوخان واسوڻو، ڳوٺ جھان خان رند، ڳوٺ امير بخش وساڻ، ڳوٺ چوڌري عنايت راجپوت، ڳوٺ سوالي خان رند، ڳوٺ لودو، ڳوٺ صوبيدار، ڳوٺ گلڻ بروهي، يونين ڪائونسل خان محمد جلباڻي جي ڪيترن ئي ڳوٺن جا رهواسي سهولتن کان محروم آهن. پنهنجي اخبار جي سروي دوران ڳوٺاڻن غلام نبي واسوڻو، قربان ڪنڀر، وسيم وڳڻ، محمد حسن وساڻ، علي حسن واسوڻو، بخت خان، شهزاد رند، ڪامريڊ حبيب الله پنهور ۽ ٻين دانهيو ته ھر مھيني يوسي لاءِ لکين رپين جي بجٽ ملي ٿي، جيڪا يوسي چيئرمين ملي ڀڳت ڪري هڙپ ڪري وڃن ٿا. هنن ٻڌايو ته چونڊيل نمائندا به عام چونڊن دوران سکڻا دلاسا ڏئي ووٽ وٺڻ کانپوءِ گم ٿي ويا آهن.

ڄام صاحب(ن پ ا) ڄام صاحب۾ ڇوڪرين لاءِ پرائمري اسڪول جي نئين ٺهندڙ عمارت جو ڪم رولڙي جو شڪار ٿي ويو ۽ 2 سال گذرڻ باوجود ڪم مڪمل نه ٿي سگهيو آهي. شھرين خميسو خان وسطڙو، ڄام معشوق علي شر، ڊاڪٽر لعل خان چيو آهي ته ٺيڪيدار اسڪول جي عمارت جو ڪم اڌ ۾ ڇڏي هليو ويو آهي، تعليم کاتي جون اختياريون به ڪو نوٽيس نه ٿيون وٺن. هنن مطالبو ڪيو ته اسڪول جي عمارت جلد مڪمل ڪئي وڃي ته جيئن نياڻيون تعليم پرائي سگهن.

ٽنڊوآدم (رپورٽ: وارث قمبراڻي) ٽنڊوآدم ۾ ريلوي اختيارين حيدرآباد ريلوي جي اسسسٽنٽ انجينيئر حافظ بدرجي اڳواڻيءَ م پوليس ۽ عملي مخدوم خليق الزمان ڪالوني۽ چانڊيا ڪالوني ۾ ڪارروائي ڪري 60 کان وڌيڪ گهر ،اوطاقون، مينهن جا واڙا ۽ دڪان ڊاهي پٽ ڪري ڇڏيا متاثرين جن ۾ اڪثريت پورهيتن ۽ ڏهاڙي تي ڪم ڪندڙ مزدورن جي آهي گهر ڊهڻ بعد کليل آسمان هيٺ ويٺل آهن متاثرن ۾ بگو مگسي، خادم ماڇي ، امداد چانڊيو، علي ڏنو ماڇي، امجد ٿهيم، منير چانڊيو، ۽ ٻيا شامل آهن دانهيو آهي ته اسين گذريل 30 _40 سالن کان گهر اڏي ويٺل آهيون اسان کان مقامي ريلوي پوليس۽ عملدارن پئسه وٺي پلاٽ ڏنا سڄي ڄمار ڪمائي ڪک ٺاهياسين جيڪي ڊاهي بي گهر ڪيو ويو آهي سياري جي مند م ٻچڙن کي ڪيڏانهن وٺي وڃون هنن متبادل رهائش ڏيڻ جي گهر ڪئي آهي جڏهن ته اسسٽنٽ انجينيئر حافظ بدر جو چوڻ آهي ته سپريم ڪورٽ جي حڪمن تي ڪارروائي ڪري رهيا آهيون جتي به قبضا هوندا اهي ختم ڪيا ويندا

جمال شاھ (ن پ ا)پيپلزپارٽي جي حڪومت سنڌ کي تباه ڪري ڇڏيو آهي ايندڙ ڪجه ڏينهن ۾ پيپلزپارٽي جا اهم اڳواڻ گرفتار ٿيندا،اهڙن خيالن جو اظهار فنڪشنل ليگ اڳواڻ ۽ پير آف جمال شاه سيد آصف علي شاه جيلاني ميڊيا سان ڳالهائيندي ڪيو. هن چيو ته پيپلز پارٽي جي حڪومت صرف پنهنجا پيٽ ڀرڻ ۾ پوري آهي جڏهن ته سنڌ واسين جي کيس ڪابه پرواه ناهي هن چيو ته پيپلز پارٽي سنڌ جا اهم اڳواڻ ڪرپشن جي الزام ۾ تمام جلد گرفتار ٿيندا هن چيو ته قاضي احمد تعلقي جي اڳوڻي ايم پي اي ڊاڪٽر بهادر ڏاهري ۽ ضلعي شهيد بينظير آباد جي ايم اين اي سيد غلام مصطفي شاه تي پڻ ڪرپشن جا ڪيس داخل ٿيندا جڏهن ته سنڌ ۾ جي ڊي اي جي حڪومت ٺهندي ۽ ايندڙ اليڪشن پ پ جو ڪوبه اميدوار اليڪشن ۾ حصو نه وٺندو .