ڳڙھي حسن(ن پ ا)ڳڙھي حسن لڳ پنج سال اڳ اغوا ٿيل 12 سالن جي الطاف کوسي جي بازيابي لاءِ پوليس ڪک ڀڃي ٻيڻو نه ڪيو. مغوي نينگر جي والد حبيب الله کوسو پريس ڪلب پهچي احتجاج ڪيو. ان موقعي تي پيرسن دانهيو ته پٽ جي اغوا ۾ ملوث جوابدار سرعام گهمي رهيا آهن، پر پوليس ڪارروائي نه ڪري رهي آهي. هن مطالبو ڪيو ته سندس مغوي پٽ کي بازياب ڪرائي انصاف فراهم ڪيو وڃي.
ٺل:سرڪاري گاڏي جو موٽرسائيڪل کي ٽڪر.نوجوان زخمي
شھرين گاڏي کي گھيري ورتو.سرڪاري گارڊن ھٿيار تاڻي ورتا.ٻنھي ڌين ۾ ٺاھ ٿي ويو. پوليس
ٺل(ن پ ا)اي سيڪشن ٿاڻي جي حد باءِ پاس تي تيز رفتار ايڪسئن جي سرڪاري گاڏي جي موٽرسائيڪل سان ٽڪر ٿي پيو جنھن سبب موٽر سائيڪل سوار نينگر عزيز احمد پٽ فيض محمد لاشاري شديد زخمي ٿي پيو جنهن کي سرڪاري اسپتال داخل ڪرايو. ايڪسئن پنهنجي گاڏي ڪاهي فرار ٿي رهيو هو ته شهرين سرڪاري گاڏي جي آڏو بيهي روڪي ورتو جنهن تي ايڪئسن جي گارڊن شهرين مٿان هٿيار تاڻي ورتا. گارڊن ۽ شهرين ۾ منهن ماري ٿي پئي. اطلاع تي پوليس پهچي ڊائيور سميت سرڪاري گاڏي ڪاهي اي سيڪشن ٿاڻي تي بيهاري ڇڏي. علائقي جي بااثر شخص جي مداخلت تي ٻنهي ڌرين ۾ ٺاه ڪرايو ويو. ايس ايڇ او ٺل موجب ٻنهي ڌرين ۾ ٺاه ٿي ويو آھي.
ٺل: نينگر کي گاڏيءَ جو ٽڪر هڻي فرار ٿيندڙ ايڪسيئين سوگهو، ايم پي اي سهراب سرڪي جي ڀاءُ ايڪسيئن کي ڇڏائي ورتو
گاڏي روڪڻ تي ايڪسيئن جي گارڊز ۽ پوليس اهلڪار شهرين کي داٻا ڏيندا رهيا
ٿاڻي تي شهرين ۽ ايڪسيئن ۾ ڳالهيون، آبپاشي انجنيئر لياقت سرڪي ايڪسيئن کي ڇڏايو
ٺل (ن پ ا) ڊيرا مراد جمالي جو ايڪسيئن نذير لاکٽي ٺل ۾ نوجوان کي گاڏيءُ جو ٽڪر هڻڻ بعد فرار ٿيڻ جي ڪوشش ڪري رهيو هو ته شهرين کيس سوگهو ڪري ورتو. شهرين طرفان گاڏي روڪڻ کانپوءِ ايڪسيئن جا گارڊز توڙي سندس سيڪيورٽي اسڪواڊ ۾ شامل پوليس اهلڪار شهرين سان وڙهي پيا. ايڪسيئن جي گارڊز، پوليس اهلڪارن ۽ شهرين وچ ۾ ڪيتري ئي دير تائين جهيڙو هلندو رهيو، جنهن بعد ڌُريون ٺل ٿاڻي تي پهتيون. ايڪسيئن ۽ سندس گارڊز موقف هو ته گاڏيءَ غلطي مان لڳي آهي، پر اسان فرار نه ٿي رهيا هئاسين. جڏهن ته شهرين جو چوڻ هو ته ايڪسيئن ڄاڻي واڻي وچ شهر ۾ تيز رفتاري سان گاڏي هلائي ۽ نينگر کي ٽڪر لڳڻ بعد کيس اسپتال منتقل ڪرڻ بدران پاڻ فرار ٿيڻ جي ڪوشش ڪري رهيو هو. اُن دوران ايم پي اي سهراب سرڪي جو ڀاءُ ۽ آبپاشي انجنيئر لياقت سرڪي پهچي نينگر کي ٽڪر هڻندڙ ايڪسيئن جي جان ڇڏائي. جڏهن ته شهرين کي خالي دلاسا ڏئي خاموش ڪرايو ويو.
ٺل: زمين جي تڪرار تان جوابدارن گھر تي حملو ڪري پيرسن جا ڏند ڀڄي ڇڏيا
ٺل(ن پ ا)ڳوٺ مهراڻ ۾ زمين جي تڪرار تان پهوڙ برادري جي ٻن ڌرين ۾ جهيڙو ٿي پيو.جوابدارن پيرسن عبدالطيف پهوڙ جي گھر تي حملو ڪري ھن جا ڏند ڀڄي ڇڏيا ۽ جوابدار فرار ٿي ويا. واقعي خلاف پيرسن پنهنجي زال سميت جوابدارن جي گرفتاري لاءِ پريس ڪلب آڏو احتجاجي مظاهرو ڪندي چيو ته پنج جريب زمين تي بااثر جوابدار قبضو ڪرڻ چاهين ٿا. احتجاج ڪرڻ تي هنن منهنجي گهر تي حملو ڪري مونتي تشدد ڪري ڏند ڀڄي ڇڏيا آهن. ھن چيو ته پوليس وٽ دانهيو آهي پر پوليس جوابدارن کي گرفتار نه ٿي ڪري. پيرسن گهر ڪئي تھ جوابدارن کي گرفتار ڪري اسان سان انصاف ڪيو وڃي.
ٺل: درگاھ جي قبرستان واري زمين تي قبضي خلاف فقير جو ٻارن سميت احتجاج
ٺل(ن پ ا)درگاه يار محمد شاه جي قبرستان تي قبضي خلاف درگاه جي فقير ظھور احمد ڪنراڻي ٻارڙن سميت پريس ڪلب اڳيان احتجاجي مظاهرو ڪيو. انهي موقعي تي هن چيو ته قبرستان جي ڪيترن ئي جريبن تي بااثر ماڻهن قبضا ڪري ورتا آھن احتجاج ڪرڻ تي ابتو اسان مٿان ڪيس ڪيا ويا آھن ۽ ڌمڪيون ملي رهيون آهن. هن چيو تھ روينيو عملدار ۽ پوليس وٽ به دانهيو آھي پر اڳين ڌر بااثر ھئڻ جي ڪري ڪا بھ داد رسي نھ ٿي. هن گهر ڪئي ته انصاف ڪيو وڃي ۽ درگاه جي قبرستان مان ناجائز قبضو ختم ڪرايو وڃي.
ڳڙهي خيرو: ”لاکي پير“ نالي قدرتي چشمي تي وڏي انگ ۾ ماڻهن جي آمد، مريض به اچن ٿا
قدم قدرتي چشمي مان پهاڙين جو پاڻي ڇوڙ ٿئي ٿو، خارش جا مريض چشمي جو پاڻي پيئن ٿا
چشمي تي سياح يا مريض 3 کان 4 ڏينهن رهي پوءِ واپس ويندا آهن، پيچرا پٿريلا آهن
ڳڙهي خيرو ( رپورٽ: ساگر ڀٽي) ڳڙهي خيرو ڀرسان بلوچستان جي علائقي باريجا جي جابلو پٽي ۾ ”لاکو پير “ جي نالي سان مشهور گرم پاڻي جا قدرتي چشمي کي خارش جي مريضن لاءِ مفيد سمجهيو وڃي ٿو. انهي عقيدي ۾ پري پري جا ماڻهو خارش جي مريضن کي وٺي اچي چشمي جو پاڻي پيارين ٿا. ان کانسواءِ سياحت لاءِ پڻ بهترين جڳهه هجڻ ڪري ڪيترائي ماڻهو پڪنڪ ملهائڻ اچن ٿا. پٿريلو رستو هجڻ ڪري منزل تائين پهچڻ ۾ ماڻهن کي انتهائي سخت ڏکيائين مان گذرڻو پوندو آهي. ماڻهو جڏهن اتي پهچن ٿا ته سڪون محسوس ڪن ٿا انهن پهاڙن جي وچ ۾ سوين سال قديم ” پير لاکو ” جي نالي سان بزرگ جو روزو پڻ ٺهيل آهي جيڪو عقيدت مندن لاءِ مقدس آهي جتي عقيدت مند اچي زيارت ڪرڻ سان گڏ باس باسن ٿا ۽ مراد پوري ٿيڻ تي سکان پڻ کڻي اچن ٿا. آڳاٽي وقت ۾ هتي هندو برادري طرفان ميلو لڳندو هو مگر بد امني وڌي وڃڻ ڪري هندن ميلو لڳائڻ ۽ درگاه تي اچڻ بند ڪري ڇڏيو . درگاه جي دروازي تي هڪ وڏو گهنڊ بہ لڳل آهي جنهن کي وڄائي عقيدت مند اندر داخل ٿيندا آهن ۽ دعا گهرندا آهن، مگر روزي اندر مزار بجاءِ هڪ کٽ پيل آهي جنهن تي مختلف قسمن جون سوين چادرون وڇايل آهن. روايتن موجب ” لاکي پير ” جون ٽي درگاهون آهن ان ڪري سندس مزار نه ٺاهي وئي آهي. درگاھ جي ڀرسان پهاڙن مان نڪرندڙ گرم پاڻي جا چشما خارش جي تمام مرضن لاء شفا جو زريعو بڻيل آهن جتي پوري ملڪ مان خارش جا مريض وهنجڻ اچن ٿا ۽ پاڻي ڀري کڻي وڃن ٿا. خارش ۾ مبتلا مريض گرم پاڻي مان وهنجڻ بعد سڪون محسوس ڪن ٿا. درگاھ جي ڀرسان مسافرن جي رهڻ لاءِ قديم گھر به آهن جيڪي قديم پٿرن مان ٺاھيا ويا آهن.شهري علائقن کان تمام پري هجڻ ڪري هتي ايندڙ مريض ۽ سياح پنهنجي لاءِ کاڌي پيتي جو سامان ۽ ٿاءُ پاڻ سان گڏ کڻي اچن ٿا . خارش ۾ مبتلا مريض هتي 3 کان 4 ڏينهن رهندا آهن. درگاھ تائين پهچڻ ۾ مسافرن کي انتهائي ڏکيو سفر طئه ڪرڻو پوندو آهي روڊ جي سهولت نه هجڻ ۽ جبل مٿان چڙهي ان کي پار ڪري درگاھ تي پهچن ٿا. باريجه ڳوٺ کان اڳتي درگاه تائي صرف موٽر سائيڪل تي وڃي سگهجي ٿو ٻي ڪنهن گاڏي جو رستو ڪونهي.پوءِ به عقيدت مند ۽ خارش جا مريض ڏکيو رستو پار ڪري ھتي پھچن ٿا، گرم پاڻي تي ٻارن سان وهنجڻ آيل مولوي امان الله ٻڌيو ته خارش جي مريضن لاءِ هتي گرم پاڻي جا چشما آهن ، مريض جڏهن علاج ڪرائڻ بعد ٺيڪ نٿا ٿين ته هتي اچي وهنجڻ بعد صحتياب ٿيندا آهن، گرم پاڻي جا چشما خارش جي تمام مرضن لاءِ انتهائي مفيد آهن. ماڻهو هتي اچي نه صرف وهنجن ٿا پر ٻين خارش جي مريضن لاءِ هتان پاڻي به ڀري کڻي وڃن ٿا. لاکو پير تي گهمڻ آيل غلام مصطفيٰ جمالي، خليل احمد ٻٻر، سلطان احمد بروهي ۽ ٻين ٻڌايو ته جابلو علائقن سان چاه رکندڙ ماڻهن لاءِ هي تمام خوبصورت ۽ سستو پڪنڪ پوائنٽ آهي، هتي گرم ۽ ٿڌي پاڻي جا چشما، جبل ۽ خوبصورت ٻوٽا تفريح جو ذريعو بڻيل آهن. هتي نه صرف خارش جا مريض اچن ٿا پر پهاڙن جا شوقين تفريح لاءِ پڻ اچن ٿا. مگر هتي بلوچستان حڪومت طرفان ايندڙ ماڻهن لاءِ ڪا به سهولت ميسر ڪونهي هتي رهائش توڙي پيئڻ جي پاڻي جي به سهولت ڪونهي جنهن ڪري سخت رستن کي پار ڪري هتي ايندڙ سياحن کي ڪافي ڏکيائين کي منهن ڏيئڻو پوي ٿو حڪومت کي گهرجي ته باريجه ڳوٺ کان درگاھ تائين روڊ ٺهرائي ايندڙ سياحن لاءِ سھولتون ميسر ڪيون وڃن اگر حڪومتي سطح تي اپاءَ ورتا وڃن ته ھن مقام کي بھترين پڪنڪ پوائنٽ بڻائي حڪومت ناڻو ڪمائي سگهي ٿي..
ڦل واسي جو اباڻي ملڪيت مان حصو نه ڏيڻ تي ڀائرن خلاف احتجاج
ڦل (رپورٽر) ڦل پريس ڪلب ۾ احتجاج ڪندي اصغر علي ڦل چيو ته منھنجا ڀائر سڪندر ۽ سرور ڦل ڦل شھر جي سومرا محلا ڀرسان بابي جي ملڪيت مان 3 ايڪڙن تي مشتمل زرعي زمين کپائي اتي پلاٽنگ لاء زمين وڪرو ڪن پيا مان به انھن جو ڀاء آھيان مون کي ڪو به حصو نه پيا ڏين مان حصو گھرڻ تان چون پيا ته توکي حصو نه ڏينداسين ڀلي ڪجھ به ڪر ان لاء مان پلاٽ وٺندڙن کي اپيل ٿو ڪيان ته پلاٽ نه وٺن اگر ڪنھن پلاٽ ورتا ته اھي پاڻ ذميوار ھوندا ھن ايس ايس پي نوشھروفيروز سيشن جج نوشھروفيروز سميت وس وارن کي اپيل ڪئي ته مون پنھنجي پلاٽ مان حصو ڏياريو وڃي نه ته مان احتجاج جو دائرو وڌائيندس ۽ ڪورٽ سڳوري جو در کڙڪائيندس.
”ڳڙهي خيري ۾ واپڊا عملدارن جو ڪمال“ بجليءَ جون تارون لڪڙن تي ٽنگي ڇڏيون
دوداپور فيڊر جا پول ڪري پوڻ بعد عملدارن بجلي جون تارون لڪڙن تي ٽنگي ڇڏيون آهن: شهري
خوف آهي ته ڪو حادثو نه پيش اچي، عملدارن کي شڪايتون ڪرڻ باوجود ڪو به کڙ تيل نه نڪتو: شهري
ڳڙهي خيرو (ن پ ا) ڳڙھي خيرو ۾ واپڊا اختيارين ڪمال جو ڪم ڪندي بجلي جي 11 ھزار وولٽ جون تارون ٿنڀن بجاءِ لڪڙن تي ٽنگي ڇڏيون. ڳڙهي خيرو جي دوداپور فيڊر تي بجلي جا ٿنڀا ڪرڻ کانپوءِ واپڊا عملدارن نوان پول ھڻڻ بدران بجلي جي تارن کي لڪڙن تي ٽنگي ڇڏيو آهي. جنهن ڪري رهواسين ۾ خوف پکرجي ويو آهي. شهرين چيو آهي ته ٿوري به تيز هوا آئي ته اهي لڪڙا ڪرِي پوندا ۽ خدا نه ڪري ڪو نقصان ٿي سگهي ٿو.
جيڪب آباد ۾ قلات جو بااثر نوجوان هٿيارن ۽ باڊي گارڊن سميت گرفتار
جيڪب آباد)رپورٽر)جيڪب آباد پوليس جي ڪارروائي بلوچستان سان تعلق رکندڙ بااثر خاندان جو نوجوان ھٿيارن ۽ پنهنجي باڊي گارڊن سميت گرفتار، سياسي مداخلت بعد بااثر نوجوان آزاد، جيڪب آباد جي صدر پوليس شنبي شاھ لڳ بلوچستان کان ايندڙ بااثر جي ويگو گاڏي کي روڪي ورتو جنھن مان چار ڪلاشنڪوف 16 ميگزين ۽ 480 غير قانوني گوليون ھٿ ڪيون ويون، پوليس بااثر سميت چئن جوابدارن کي گرفتار ڪري صدر ٿاڻي ۾ لاڪپ ڪري ڇڏيو، سياسي مداخلت بعد پوليس بااثر ۽ ويگو گاڏي گم ڪري چئن محافظن خلاف ايڇ سي پرويز دشتي جي مدعيت تي جوابدارن منظور احمد، شاھ جھان، غلام جان بروهي ۽ سعيد احمد دايو خلاف ڪيس داخل ڪري گرفتاري ظاھر ڪري ڇڏي آهي صدر پوليس جي منشي رابطي ڪرڻ تي ٻڌايو ته شنبي شاھ لڳ پوليس چئن جوابدارن کي ھٿيارن سان ڏسي گرفتار ڪري ورتو آهي گرفتار ٿيلن مان ٽن جو تعلق بلوچستان جي علائقي قلات ۽ ھڪ جو اوسته محمد سان ٻڌايو پيو وڃي جڏھن ته ان سلسلي ۾ ايس ايڇ او صدر سان رابطو ڪيو ويو ته ان ايس پي صاحب سان گڏ ھئڻ جو جواز ڄاڻائي موبائل بند ڪري ڇڏيو، ايس ايس پي عبدالقيوم پتافي سان رابطي ڪرڻ جي ڪوشش ڪئي وئي ته ان موبائيل نمبر اٽينڊ ڪو نه ڪيو ، باخبر ذريعن کان معلوم ٿيو آهي ته بااثر نوجوان جي سڃاڻپ قلات واسي آغا ڪريم جي نالي سان ٿي آهي جنهن جو تعلق قلات جي ھڪ بااثر خاندان سان ٻڌائي پئي وڃي..
آصف زرداري گرفتار ٿيو ته عوام وٽ وينداسين: اعجاز جکراڻي
جي آءِ ٽي نئين ڳالهه ناهي، پ پ خلاف هميشه سازشون ٿينديون رهيون آهن
اڳ به آصف زرداري کي بي گناهه يارهن سال قيد رکيو ويو، ان جو احساب ڏنو وڃي
ڳڙهي خيرو ( رپورٽر ) پاڪستان پيپلز پارٽي لاڙڪاڻي ڊويزن جي صدر ۽ اڳوڻي ايم اين اي ۽ وفاقي وزير مير اعجاز خان جکراڻي محمد پور اوڍو ۾ ميڊيا سان ڳالهائيندي چيو تہ پيپلز عوامي پارٽي آهي ۽ عوام جي طاقت تي يقين رکندي آهي ، اگر آصف زرداري کي گرفتار ڪيو ويو ته پوءِ اسان عوام وٽ وينداسين. پيپلز پارٽي خلاف ھميشہ سازشون ٿينديون رهيون آهن ھاڻوڪي جي آئي ٽي نئين ڳالھ ناھي اڳي به پيپلز پارٽي جي اڳواڻن خلاف ڪڏھن ايف آئي اي تي ڪڏھن ٻين ادارن کان ڪاميٽيون جوڙايون ويون اڳي بہ زرداري صاحب کي ناحق 11 سال قيد ۾ رکيو ويو اڃان تائين ان جو به حساب ڪتاب نه ڏنو ويو آهي ته ان کي جيل ۾ ڇو وڌو ويو ان مٿان ته ڪو ڪيس به ثابت نه ٿيو آھي 11 سال زندگي جا ان کي ڪير موٽائي ڏيندو.
جيڪب آباد شهر ۾گئس جي لوڊشيڊنگ، شھري پريشان، احتجاج
جيڪب آباد ( ن پ ا ) جيڪب آباد شھر ۾ گئس لوڊشيڊنگ خلاف شهرن احتجاجي مظاهرو ڪري ڌرڻو هنيو، ڌرڻي سبب ٽريفڪ معطل ٿي وئي.شهرين ۽ مختلف سياسي سماجي ڪارڪنن دلمراد لاشاري، ڪاشف شيخ ۽ ٻين جي اڳواڻي ۾ احتجاجي مارچ بعد پريس ڪلب پريس آڏو ڌرڻو هنيو ۽ علامتي بک هڙتال به ڪئي وئي.
احتجاج ڪندڙن چيو ته جيڪب آباد شھر ۾ سياري جي موسم ۾ ھٿرادو گئس جي لوڊشيڊنگ ڪئي پئي وڃي، جنهن سبب گهرن ۾ رڌ پچاءُ ۽ ٻيا ڪم ڪار سخت متاثر ٿي رهي آهن، ھٿرادو گئس جي لوڊشيڊنگ ختم ڪئي وڃي، ٻي صورت ۾ شٽربند هڙتال جو سڏ ڏنو ويندو.
ڳڙهي خيري ۾ جديد طريقي سان گڏهن جي حجامت ڪندڙ ماڻهن جي دلچسپي جو مرڪز بڻيل
خميسو ٻرڙو ڪجهه عرصي کان موٽر سائيڪل ذريعي مشين هلائي گڏهن جي بُت تي وڌي ويل وار لاهي ٿو
ماڻهو گڏهن کي وٺي ايندا آهن ته کين حجامت ڪري صاف سُٿرو بڻايان: خميسو ٻُرڙو
ڳڙهي خيرو (ن پ ا) ڳڙهي خيري ۾ ڊگهي عرصي کان گڏهن جي حجامت ڪندڙ شخص ماڻهن جي دلچسپي جو مرڪز بڻيل آهي. خميسو ٻرڙو پهرين گڏهن جي حجامت ڪندو هو پر ڪجهه عرصي کان هو موٽر سائيڪل ذريعي مشين هلائي گڏهن جي حجامت ڪري ٿو. خميسي ٻرڙي جو چوڻ آهي ته شهر جا ماڻهو حجامت لاءِ گڏهه وٺي ايندا آهن ۽ هو معمولي پئسن تي گڏهن جي بُت تي وڌي ويل وار لاهيندو آهي. واضح رهي ته اداڪار عامر خان جي فلم ”ٿري ايڊيٽ“ ۾ به عامر خان سائنسدانن جي هڪ اڪيڊمي کوليندو آهي، جنهن ۾ هڪ اهڙو سين به نظر ايندو آهي، جتي ٻاررا موٽر سائيڪل ذريعي مشين هلائي جانورن جي حجامت ڪندا آهن.
ڪچي پل شهر ۽ آسپاس ۾ رولو ڪتن جو آزار وڌي ويو
مختلف ڳوٺن ۾ رڍن ۽ ٻڪرين سميت جانورن کي ڪتا ڏاڙهڻ لڳا
رولو ڪتا ٽولن جي صورت ۾ گهمڻ لڳا، شهري سخت پريشان
ڪچي پل (ن پ ا ) ڪچي پل شھر ۽ آس پاس ۾ رولو ڪتن جو آزار وڌي ويو هڪ هفتي اندر مختلف ڳوٺن ۾ رڍن، ٻڪرين ۽ ڍورن سميت ڪيترن ئي جانور کي رولو ڪتن ڏاڙهي زخمي ڪيو آهي، جڏهن ته مالوند پريشان آهن. ڳوٺ عيد محمد جاگيراڻي، پٺاڻ خان بوجاڻي، حاجي محمد حسن مگسي، ڪچي پل شھر ۽ خان واھ ۾ رولو ڪتا ٽولن جي صورت ۾ گهمي رهيا آهن. جنهن ڪري علائقي واسي خوف ۾ ورتل آهن. ڳوٺاڻن چيو آهي ته رولو ڪتن جي آزار سبب ٻارڙا خوف ۾ وٺجي ويا آهن، جڏهن ته ميونسپل انتظاميا کي شڪايت ڪرڻ باوجود رولو ڪُتن جو آزاد ختم نه ڪرايو ويو آهي.
لڳي ٿو ته پوري کيپ "اسيمبلي" کان "اڊيالا" منتقل ٿيندي:حافظ حسين
جيڪب آباد(رپورٽر) جميعت علماء اسلام جي مرڪزي ترجمان ۽ متحده مجلس عمل جي رابطا ڪميٽي جي سربراھ حافظ حسين احمد چيو ته ميان نواز شريف کي العزيزيه ريفرنس ۾ سزا “عزيزن” جي بدولت ملي آهي، لڳي ٿو ته پوري کيپ “اسيمبلي” کان “اڊيالا” منتقل ٿي ويندي. “پنهنجي اخبار” سان ڳالهائيندي حافظ حسين احمد چيو ته العزيزيه ريفرنس ۾ جيڪڏهن نواز شريف جا پٽ پيش ٿين ھا ته اڄ معاملو مختلف ھجي ھا، العزيزيه ريفرنس جو فيصلو عزيزن جي بدولت آيو آهي، ھن چيو ته احتساب عليم کان وٺي عليمه تائين ٿيڻ کپي،اسان ته چئون ٿا احتساب سڀ جو ٿيڻ کپي ۽ احتساب کي انتقام ۾ تبديل نه ڪيو وڃي، ھن چيو ته ملڪ ۾ جيڪا صورتحال موجود آهي اگر اھا صورتحال رھي ته پوءِ پوري کيپ “اسيمبلي” کان “اڊيالا” منتقل ٿي ويندي، ھڪ سوال جي جواب ۾ ھن چيو ته اپوزيشن کي اپوزيشن ئي ڪرڻ کپي مگر اپوزيشن ان پوزيشن ۾ ناهي، اڄ به پنجاب جو ميان ۽ بي بي جي ميان جي حوالي سان جيڪو ڪجھ ٿي رهيو آهي ان باوجود ھي پاڻ ۾ اپوزيشن کي متحد ڪرڻ لاءِ تيار ناهن.
ٺل ۾ اسڪول ڀرسان نالي تي قائم ٽن گهرن کي ڊاٺو ويو
ٺل)ن پ ا)واٽر ڪميشن سربراه امير هاني مسلم جي حڪم تي ٺل جي نيو بيڪن اسڪول ڀرسان نالي تي قبضو ڪري گهر اڏيندڙ قبضا گير خلاف ڊپٽي ڪمشنر جيڪب آباد عمران علي جي نگراني ۾ آپريشن ڪري 3 گهر ڊاٺو ويا،جتي ڊپٽي ڪمشنر جيڪب آباد عمران علي ميڊيا سان ڳالهائيندي چيو ته ڪنهن کي قبضو ڪرڻ نه ڏينداسون.