ڪوٽ لالو (ن پ ا) اسٽيشن روڊ تي تيز رفتار موٽر سائيڪل چين ٽٽڻ سبب ڪري پئي، جنھن سبب موٽر سائيڪل سوار 20 سالن جو نوجوان محمد جمن پٽ حاڪم خاصخيلي سخت زخمي ٿي پيو. زخمي نوجوان کي اسپتال منتقل ڪيو ويو.

خيرپور (رپورٽر)چار ڏينهن اڳ خيرپور ۾ اي سيڪشن ٿاڻي جي حد پوليس چوڪي واري ڳوٺ ڀرسان هٿياربندن هٿان ڦر دوران مزاحمت ڪرڻ تي زخمي ڪيل قائد عوام يونيورسٽي اسلام آباد جو شاگرد عرفان ڦلپوٽو اڃان تائين هوش ۾ اچي نه سگهيو آهي نه ئي واقعي ۾ ملوث ڄاڻايل جوابدارن جي گرفتاري عمل هيٺ اچي سگهي آهي. ان سلسلي ۾ عرفان ڦلپوٽي جي والد وقار احمد ڦلپوٽو، ڀاءُ مرتضيٰ ڦلپوٽي ۽ ڏاڏي حاجي رستم ڦلپوٽو پريس ڪلب خيرپور ۾ صحافين اڳيان دانهيندي ٻڌايو ته عرفان چار ڏينهن گذرڻ جي باوجود بيهوشي واري حالت ۾ سکر جي اسپتال ۾ داخل آهي. هنن آءِ جي سنڌ، ڊي آءِ جي سکر ۽ ايس ايس پي خيرپور کان مطالبو ڪيو ته واقعي جو نوٽيس وٺي واقعي ۾ ملوث جوابدارن کي فوري طور تي گرفتار ڪيو وڃي ٻي صورت ۾ سخت احتجاج ڪيو ويندو.

خيرپور(رپورٽ: عرفان ڦلپوٽو) ڪراچي جي علائقي شاهراهه فيصل تي پوليس ۽ ڦورن وچ ۾ فائرنگ جي نتيجي ۾ ڪنب واسي پورهيت اشرف علي مهراڻي گولي لڳڻ سبب زخمي ٿي پيو هو. زخمي پورهيت کي اسپتال منتقل ڪيو ويو، جتي ڊاڪٽرن هفتو علاج کانپوءِ کيس فارغ ڪري ڇڏيو آهي. پورهيت گهمڻ ڦرڻ کان لاچار ٿي ويو آهي. پورهيت پنهنجي اخبار کي ٻڌايو ته مان شاهراهه فيصل تان گذري رهيو هئس ته پوليس ۽ ڦورن وچ ۾ فائرنگ ٿي پئي، جنهن دوران مونکي پٺيان گولي لڳي وئي. پورهيت مطالبو ڪيو آهي ته سندس مالي سهائتا ڪئي وڃي.

خيرپور)رپورٽر)خيرپور ۾ پراڻي بس اسٽينڊ تي قائم دڪان ڊاهڻ ۽ سوين پورهيتن کي بيروزگار ڪرڻ واري عمل خلاف ٽئين ڏينهن به سيشن ڪورٽ خيرپور آڏو علامتي بک هڙتال جاري رهي ڪالهه بک هڙتالي ڪئمپ تي پورهيتن جي اڳوانن عاشق حسين بگٽي، لالا شاهد حسين پٺاڻ، امداد ڦلپوٽو، عزيز الله شيخ، منور شيخ، توقير مانڊڻ، سليم منگي، بابر شيخ، عبدالرزاق شيخ، لياقت آرائين سميت سوين دوڪاندارن ۽ پورهيتن شرڪت ڪئي ان موقعي تي اڳواڻن دانهيندي چيو ته پراڻي بس اسٽينڊ تي قائم ڊينٽرن، پينٽرن، مڪينيڪل، هوٽل، اسپيئر پارٽس جي قديمي دوڪانن کي نام نهاد حڪمرانن، ڇاڙتن جي چرچ تي دوڪاندارن سميت دوڪانن تي ڪم ڪندڙ سوين پورهيتن کي بيروزگار ڪري اسان جي ٻچڙن کي بک ۽ بدحالي واري زندگي گذارڻ تي مجبور ڪري ڇڏيو آهي ، اسان جي ٻچن تي رحم ڪري اسان کي متبادل جڳهه ڏني وڃي ته جيئن اسان پنهنجي ٻچن جو گذر سفر ڪري سگهون جيستائين اسان کي متبادل جڳهه نه پئي ڏني وڃي تيستائين اسان جي بک هڙتالي ڪئمپ جاري رهندي.

خيرپور (رپورٽر)ڪنب لڳ شھباز ڪالوني مان واپاري فرهاد علي ملاح جو 19 ورهيه نوجوان پٽ احسن علي ملاح ٽن ڏينھن کان گم ٿي ويو آهي جنهن کان پوءِ نوجوان جي وارثن ۾ شديد بي چيني پکڙيل آهي. لاپتا ٿي ويل نوجوان جي والد فرحاد علي ملاح جو چوڻ آهي ته ٽي ڏينهن اڳ سندس پٽ گهر کان شهر طرف ڪنهن ڪم ڪار سانگي نڪتو جنهن بعد هو واپس نه موٽيو آهي ،ڪنب ٿاڻي تي اطلاع ڏيڻ ۽ سندس ڳولها ڪرڻ جي باوجود سندس ڪوبه ڏس پتو نه پئجي سگهيو آهي. هن چيو ته اسان جي ڪنهن سان به دشمني نه آهي.

پيرجوڳوٺ(ن پ ا)وڏا ماڇيون لڳ هٿياربندن هٿان ڪيري وين يرغمال، ڦرلٽ بعد ڇڏيو ويو،ان ڏس ۾ وڏا ماڇيون لڳ مانگ اسٽاپ وٽ هٿياربندن ڪيري وين مالڪ نويد ميمڻ کي ڊرائيور سميت هٿيارن جي زور تي يرغمال بنائي 90 هزار روپيه روڪ، موبائيل ۽ ٻيو سامان ڦر ڪيو جڏهن ته مزاحمت ڪرڻ تي کين تشدد جو نشانو بنائي فرار ٿي ان ڏس ۾ ٻڌايو وڃي ٿو ته نويد ميمڻ جيڪو ڪيري وين ذريعي موبل آئل ۽ آٽوز جو سامان وڪرو ڪندو آهي ۽ هوُ وڏا ماڇيون مان سامان وڪرو ڪرڻ بعد ٺيڙهي وڃي رهيو هو.

ڪنب (ن پ ا) ڪنب جي جي صحافي وحيد ڄامڙو جي گرفتاري خلاف يونين آف جرنلسٽ ڪوٽڏيجي جي سڏ تي هريش ڪمار، همت تمراڻي، سليم رضا لنڊ، شاهد سومرو، شاهرخ سومرو، امير بخش گوپانگ، شاهد حاجاڻو، احمد علي رند، امان الله بگٽي سميت ٻين جي اڳواڻي ۾ مظاهرو ڪيو ويو. ان موقعي تي صحافين دانهيو ته ڪنب جي صحافي وحيد ڄامڙو کي بنا جواز راڻيپور ٿاڻي جي ايس ايڇ او گرفتار ڪري لاڪپ ڪري ڇڏيو آهي، جيڪو ظلم آهي، هنن وس وارن کان مطالبو ڪيو آهي ته صحافي کي آزاد ڪري ايس ايڇ او خلاف ڪارروائي ڪئي وڃي.

فيض گنج (رپورٽ: رياض سولنگي) فيض گنج جي سرڪاري اسپتال ڪوس گهر ۾ تبديل ٿي وئي آهي، مريضن کي دعوائون ملڻ مشڪل، ايم ايس سرڪاري دوائون کپائي ڇڏيون، صحت کاتي نوٽيس نه ورتو. فيض گنج جي سرڪاري اسپتال ۾ ڊاڪٽرن ۽ دوائن جي کوٽ سبب مريض پريشانيون ڀوڳڻ تي مجبور آهن. پنهنجي اخبار جي سروي موجب، ايم ايس جي ملي ڀڳت سان ڊاڪٽرن خانگي ڪلينڪون کولي ورتيون آهن،جنهن سبب سرڪاري اسپتال ۾ ايندڙ مريضن کي ذاتي ڪلينڪن تي اچڻ جي صلاح ڏني پئي وڃي. صحت کاتي پاران ڪنهن به ايمرجنسي صورتحال کي منهن ڏيڻ لاءِ ڏنل ايمبولينس توڙي ٻيون گاڏيون مرمت نه ٿيڻ جي ڪري تباهه ٿي ويون آهن. سرڪاري اسپتال اندر دل ۽ عورت جو ويم گهر 5 ڪروڙ رپين جي لاڳت سان تعمير ڪيو ويو، پر انتظامي نااهلي ان عمارت کي به تباهي جي ور چاڙهي ڇڏيو. اسپتال ۾ لڳل 8 سي سي ٽي وي ڪئمرائون خراب آهن، جنهن سبب ڪنهن اڻوڻندڙ واقعي جا فوٽيج نه ملي سگهندا.

خيرپورناٿن شاھ (ن پ ا) خيرپور ناٿن شاهه ۾ نامياري شاعر وفا ناٿن شاهي جي نالي سان منصوب لائبريري 6 سال گذرڻ باوجود مڪمل نه ٿي سگهي، جڏهن ته ملازم گهر ويٺي پگهار وٺي رهيا آهن.شھر ۾ لائبريري نه هجڻ ڪري شاگرد توڙي اديب ڪتابن جي مطالعي کان محروم آھن. شاگردن اياز ٻرڙو، حافظ انور کوهارو، فقير علي حسن، سهيل چانڊيو، سنڌو ملاح، ماجد ٻگهيو، حافظ حاجن لغاري ۽ ٻين پريس ڪلب پهچي احتجاج ڪيو. ان موقعي تي مظاهرين دانهيو ته لائبريري نه هئڻ سبب کين ڏکيائيون پيش اچي رهيون آهن، جڏهن ته 6 سال گذرڻ باوجود ڪم اڻپورو هئڻ سمجهه کان ٻاهر آهي. هنن الزام مڙهيو ته بااثر لائبريري تي قبضو ڪري ورتو آهي، جنهن ڪري ڪم رلي ويو آهي، نوٽيس ورتو وڃي.

خيرپور (ن پ ا) شهر جي پراڻي بس اسٽاپ وٽان دڪان ڊاهڻ خلاف دڪاندارن ٻارن سميت ٽئين ڏينهن به علامتي بک هڙتال جاري رکي.سيشن ڪورٽ ٻاهران علامتي بک هڙتال ڪندڙ ساجد ملڪ، عاشق حسين بگٽي، اعجاز جاگيراڻي، غلام قاسم ڪلهوڙو ۽ ٻين دانهيو ته ضلعي انتظاميان بلڊر مافيا سان ملي ڀڳت ڪري اسان جا 126 دڪان، ھوٽلون بنا جواز ڊاھي پٽ ڪري ڇڏيون آهن، جنهن جي ڪري ھڪ ھفتي کان اسان جي گھر جا چلها نه ٻريا آهن ۽ ٻچا بکون ڪاٽي رهيا آهن. هنن چيو ته 6 ڏينهن کان احتجاج ڪرڻ باوجود ڪو به چونڊيل نمائندو بک هڙتالي ڪئمپ تي لڙي ناهي آيو. ھنن چتاءُ ڏنو تھ متبادل دڪان نه ڏنا ويا ته مرڻ گھڙي تائين بک هڙتال جاري رھندي.

خيرپور(رپورٽر)خيرپور ڀرسان ڪوٽڏجي ٿاڻي جي حد ڳوٺ ديهه سوهو ۾ جاويد ڀٽي جي گهر کي اوچتو باهه لڳي وئي، تيز باهه مختيار ڀٽي،عباس ڀٽي ۽ پرويز ڀٽي جي گهرن کي لپيٽ ۾ آڻي ورتو ۽ گهرن ۾ رکيل اناج،هنڌ بسترا، کٽون سميت الهه تلهه سڙي رک ٿي ويو آهي،باهه جي اطلاع تي ڳوٺ واسين فوري طور تي باهه وساڻ جي ڪوشش ڪئي پر تيز باهه تي ضابطو اچي نه سگهيو اطلاع تي فائر برگيڊ جي 2 گاڏين پهچي وڏين ڪوششن بعد باهه تي ضابطو آندو. متاثرن ميڊيا کي ٻڌايو ته باهه لڳڻ جو ڪارڻ معلوم ٿي نه سگهيو،اوچتو تيز باهه گهرن کي لپيٽ ۾ آڻي ورتو نتيجي ۾ سمورو الهه تلهه سڙي رک ٿي ويو .