اسلام ڪوٽ(ن پ ا )اسلام ڪوٽ ۾ حد دخلين خلاف شروع ڪيل آپريشن ڪالھ پنجين ڏينهن به جاري رهيو،اسسٽنٽ ڪمشنر شنڪر لال ۽ مختيارڪار عبدالغفار لاکير جي اڳواڻي ۾ روينيو ۽ ميونسپل عملي پاران ڪالھ به اسلام ڪوٽ شهر جي مين مارڪيٽن سميت لنڪ روڊن تي وڏي مشينري ذريعي آپريشن ڪري ڪيترن ئي غريبن جي اجهن توڙي دڪانن جي ٿلهن کي ڊاهي پٽ ڪيو ويو،انهي سلسلي ۾ متاثرن الزام هڻندي چيو آهي ته روينيو انتظاميه حد دخلين جي آڙ ۾ سالن کان اڏيل اسان جي اجهن کي ڊاهي پٽ ڪري ڇڏيو آهي،اسان سخت سيءُ ۾ دربدر ٿي رهيا آهيون،هوڏانهن اسسٽنٽ ڪمشنر شنڪر لال ۽ مختيارڪار عبدالغفار لاکير جو چوڻ آهي ته اسان ڪنهن سان به ناجائزي نه ڪئي آهي،دڪاندارن دڪانن جي اڳيان ٿلها ۽ ڇاپرا ٺاهي روڊ سوڙها ڪري ڇڏيا هئا،جن کي هٽرائي روڊ ويڪرو ڪيو پيو وڃي،شهر جي گئوچر جي زمين تي ماڻهو قبضا ڪري سرڪاري زمين کي وڪرو ڪري رهيا هئا،جن کان گئوچر جي زمين خالي ڪرائي پئي وڃي.

اسلام ڪوٽ(ن پ ا) ڳوٺ ڪونڀاريو جي ميگھواڙ برادري جي عورتن ۽ مردن جو بااثرن جي ظلم خلاف احتجاج. ڳوٺاڻن لجپت، ساجن، لڇمڻ، ڏونگر، پريمي، شانتي، گڏي ۽ ٻين پريس ڪلب آڏو دانهيندي چيو ته مقامي بااثر وڏيرن اسان جو جيئڻ جنجال ڪري ڇڏيو آهي. ڄاڻايل بااثر ڇھن مھينن کان تنگ ڪري رهيا آهن،گذريل ڏينهن منھنجي پٽ کي بااثرن مارڪٽ ڪئي. ھنن گھر ڪئي آھي تھ اختياريون نوٽيس وٺن ۽ اسان کي انصاف فراھم ڪيو وڃي

سرحد (رپورٽ عبدالحئي ساوند) گهوٽڪي ضلع جو تاريخي شھر سوالک آبادي رکندڙ سرحد انتظاميا جي نااهلي ۽ عدم دلچسپي سبب کنڊرات جو ڏيک ڏيڻ لڳو آھي گذريل ڪيترن ئي ڏينهن کان سرحد ۾ گيس جي اڻ اعلانيل لوڊشيڊنگ جاري آھي ۽ بجلي به سدائين گم رهڻ لڳي آھي، شھر جا مين روڊ به ڪيترائي سال مرمت نه ٿيڻ سبب تباه ٿي ويا آھن جڏھن ته مين بازار، محمدشاه روڊ، اسٽيشن روڊ، ملڪ محله، چنه محله، ٿاڻو چوڪ، جي ٽي روڊ، سميت مختلف علائقن ۾ گندگي جا ڍيرلڳل آھن مختلف علائقن ۾ نالين جو گندو پاڻي بيهجي وڃڻ سبب رهواسي سخت پريشان آھن، نالين جو گندو پاڻي روڊن تي بيهجي وڃڻ سبب اسڪول ويندڙ ٻارڙا ۽ نمازين کي سخت پريشانين کي منهن ڏيڻو پئجي رهيو آھي، سرحد جي شھرين کي مسئلن جي حل لاء ڪنهن مسيحا جو انتظار آھي ته هو اچي سرحد جا بنيادي مسئلا حل ڪرائي، هوڏانهن سرحد جي نالي تي ڪم ڪندڙ تنظيمن شھر جي ڀلائي يا بنيادي مسئلن جي حل لاء ڪو به قدم ناهي کنيو، ڄاڻايل تنظيمون صرف پنهنجن مفادن لاء شھرن کي گڏ ڪري شھر جو نالو استعمال ڪري پنهنجا مقصد حاصل ڪري رهيون آھن پر انهن تنظيمن مان ڪنهن به هڪ تنظيم شھر جي مسئلن جي حل لاء ڪو به قدم ناهي کنيو شھرين به سرحد جي نالي تي ڪم ڪندڙ تنظيمن کان بيزاري جو اظهار ڪيو آھي، گذريل 9 مهينن کان سرحد جي صفائي عملي جي ملازمن کي پگهارون نه ملڻ سبب صفائي عملي جي ملازمن به صفائي وارو ڪم بند ڪري ڇڏيو آھي جنهن سبب شھر گندگي جي ور چڙھي ويو آھي، گندگي سبب ڪيترين ئي بيمارين منهن ڪڍيو آھي.

اسلام ڪوٽ(رپورٽر)اسلام ڪوٽ ۾ حددخلين خلاف شروع ڪيل آپريشن جي ڪوريج دوران اينٽي انڪروچمينٽ فورس جي اهلڪارن پاران پريس ڪلب جي صدر غازي بجير، سجاول بجير ۽ ٻين صحافين تي تشدد واري واقعي جو سنڌ حڪومت جي نوٽيس بعد ايس ايس پي ٿرپارڪر عمران قريشي ۽ اي ڊي سي ون ڪبيرشاھ جانچ بعد اهلڪارن کي ڏوهي پڻ قرار ڏنو هو،، واقعي جي انڪوائري مڪمل ٿيڻ جي باوجود ملوث اهلڪارن خلاف ڪابه ڪاروائي ناهي ٿي سگهي هو ڪاروائي کان آجا آهن ،اينٽي انڪروچمينٽ فورس معاملي کي لئه مٽي ڪرڻ ۾ لڳي ويئي آهي ۽ انهن کي بچائڻ جي ڪوشش ڪئي پئي وڃي،صحافين طرفان ايس ايس پي اينٽي انڪروچمينٽ فيصل بشير ميمڻ سان بار بار رابطي جي ڪوشش ڪئي ويئي پر انهي فون اٽينڊ ڪرڻ جي زحمت نه ڪئي ، واقعي خلاف ٿر جي سمورن شهرن جا صحافي سراپاءُ احتجاج بڻيل آهن،ڪالھ به اسلام ڪوٽ ۾ صحافين غازي بجير،مبارڪ بجير،اشوڪ شرما،عبدالغني بجير،سڪندر علي، الطاف اسماعيل بجير،ڪرشن سنگھ،سجاول بجير،احمد علي سانگي ۽ ٻين واقعي خلاف ٽين ڏينهن به پريس ڪلب آڏو احتجاجي مظاهرو ڪيو،ٻئي پاسي صحافين طرفان اڄ کان سڄي سنڌ ۾ احتجاج جو سڏ ڏنو ويو آهي ۽ سنڌ جي صحافي برادري کي ساٿ ڏيڻ جي اپيل ڪئي ويئي آهي.

ڪلوئي(ن پ ا)ڪلوئي ۾ ڏڪار متاثر عورتن امدادي راشن نه ملڻ خلاف احتجاج ڪيو ان ڏس ۾ ڪلوئي لڳ خواجه علاء الدين هشيو ڪولهي پاڙو ۾ ڏڪار متاثرن پاران امدادي راشن نه ملڻ خلاف احتجاج ڪيو، احتجاج ڪندي مارٿان ٻائي، ڪويتا ٻائي، پونا، جمنا، ميگهي، پاروتي، ماوجي ڪولهي، ٻڌو ميگھواڙ، چيتن ڪولهي ۽ ٻين سوين عورتن ۽ مردن دانهيندي چيو ته علائقي ۾ ڪاري ڏڪار واري صورتحال آهي ان باوجود اسان جي ڪيترن ئي مستحق عورتن جا نالا لسٽن مان گم ڪيا ويا آهن، هنن الزام هڻندي چيو ته عملي وارا رات جو لڪ چوري ۾ امدادي راشن کڻي آيا جيڪي متاثرن بجاءِ من پسند ماڻهن ۾ ورهائي واپس موٽي ويا ۽ ڳوٺ ۾ ڪيترن ئي مستحق ڏڪار متاثر حاملا ۽ کير پياريندڙ عورتن کي امدادي راشن نه ڏنو ويو آهي، هنن چتاءُ ڏيندي چيو ته اگر اسان جي ڳوٺ ۾ سمورن مستحقن کي امدادي راشن نه مليو ته اسان روڊن تي نڪري ايندا سين ۽ سخت احتجاج ڪنداسين، هنن اعلي اختيارين کان امدادي راشن جي منصفاڻي ورڇ ڪرائڻ جي گهر ڪئي آھي.

اسلام ڪوٽ:شھر ۾ امڪاني کلندڙ شراب جي گتي خلاف مختلف مذهبي تنظيمن جي يو آء، اهلحديث، ايف آء ايف سميت شهرين طرفان مولوي اللھ بخش نهڙئي، يامين سومرو، عبدالخاق سميجو، عبدالرحيم سميجو جي اڳواڻي ۾ ريلي ڪڍي وئي. اڳواڻن جو چوڻ ھو تھ شراب جي گتي سان سماجي براين ۾ واڌ ايندي جنھن ڪري ان کي بند ڪيو وڃي.احتجاج ڪندڙن چيو تھ شراب جو گتو بند نھ ڪيو ويو تھ پوءِ احتجاج جو دائرو وڌايو ويندو.

ڪراچي(نمائندن وٽان)اسلام ڪوٽ جي صحافين تي اينٽي انڪروچمينٽ عملي پاران مبينه تشدد ڪرڻ خلاف مختلف شهري ۾ صحافين پاران احتجاج ڪيو ويو،ان ڏس ۾ آيل رپورٽن مطابق ٿر جي صحافي برادري سينئر صحافين ممتاز نهڙيو، اعجاز بجير،امتيازڌاراڻي،ولي خان نهڙيو،سومار راهمون،عارف علي دل، خالد عمراڻي،جهامن مصراڻي ۽ ٻين جي اڳواڻي ۾ عوامي پريس ڪلب آڏو احتجاجي مظاهري کي خطاب ڪندي چيو ته اسلام ڪوٽ ۾ شھرين جي ڪوريج لاءِ پهتل صحافين غازي بجير،سڌير راٺوڙ،سجاول بجير ۽ ٻين مٿان تشدد سنڌ سرڪار جي کليل غنڊاگردي آھي. جنهن جي مذمت ۽ ملوث اهلڪارن کي گرفتار ڪرڻ جو مطالبو ڪريون ٿا. ڏيپلو ۾ عوامي تحريڪ جي فاروق مريداڻي، تنوير لنگھو،اسد مياڻو، شھري اتحاد جي نجم جوڻيجو،راجيش پوراڻي،لڇمڻ ولاسائي،انيل ولاسائي، منيش پروانو ،صحافين محمد علي مريداڻي ، نريش موراڻي، ساگر ڏيپلائي ،رياض بجير ۽ ٻين پريس ڪلب ڏيپلو اڳيان احتجاج ڪيو،فيض گنج ۾ رياض سولنگي،لطيف ابراهيم چانگ،شاهد جاويد راجپوت،وجاهت چانگ،رياض خاصخيلي ۽ ٻين ڳالهائيندي چيوته اسلام ڪوٽ جي صحافين تي تشدد ڪرڻ وارو عمل مذمت جوڳو عمل آهي،هنن چيوته حددخيلن جي آڙ ۾ صحافين تي تشدد ڪيو ويو آهي،هنن چيوته صحافي حق سچ لکن ٿا جن کي حق سچ لکڻ تان روڪڻ لاء اهڙيون ڪاروائيون ڪيون پيون وڃن هنن سنڌ حڪومت کان مطالبو ڪندي گهر ڪئي صحافين تي تشدد ڪندڙ اهلڪارن تي ڪيس داخل ڪري صحافين کي تحفظ فراهم ڪيو وڃي.

ڪلوئي(ن پ ا)سڄي ٿر جيان ڪلوئي تعلقي ۾ ڏڪاري حالتون برقرار آهن، ڪلوئي لڳ ستون ميل لڳ ڳوٺ ارباب احسان فارم واسي پورهيت پريم ڪولهي جو هڪ ڏينهن جو ڄاول ٻارڙو مبينا بک بدحالي ۽ بيمارين وگهي فوت ٿي ويو آهي. پورهيت دانهيندي چيو منهنجي گهر واري انتهائي ڪمزور هئي مقامي اسپتال عملي پاران ڪمزور ۽ ڳورهاري عورتن لاءِ آيل راشن پڻ نه ڏنو ويو ۽ ٻار انتهائي ڪمزور پيدا ٿيو،جنهن کي اسان اسپتال کڻي وڃي رهيا هئاسين ته رستي ۾ ٻارڙو فوت ٿي ويو، رهواسين اعلي اختيارين کان نوٽيس وٺڻ جو مطالبو ڪيو آهي. ٻئي طرف ڳورهاري ۽ ڪمزور عورتن کي امدادي راشن نه ملڻ ۽ سوين ڳوٺ سروي ۾ شامل نه هجڻ خلاف يوسي گرڙاٻه ،ستون ميل ۽ ٻين علائقن جي مختلف ڳوٺن لال ساهڙ، ٻانڌو، ڏمڀرلي، اتادو سومرا، ڊاڀو سميجا، سپڻاڻي سومرا، ارباب احسان فارم ۽ ٻين ڳوٺن مان آيل ڏڪار متاثر ڳوٺاڻن منظور ساهڙ، لکاڏنو ساهڙ، مانجھي، عالم، قربان، ڀائي خان، کيتو مل، ميوو ۽ ٻين امدادي راشن لاءِ سندن ڳوٺ سروي نه ٿيڻ خلاف دانهيندي چيو ته يوسي گرڙاٻه جا ڄاڻايل سمورا ڳوٺ اڃا تائين امدادي راشن لاءِ سروي پڻ نه ڪيا ويا آهن. رابطو ڪرڻ تي صحت کاتي ٿرپارڪر جي ڊي ايڇ او علاو الدين سومرو جو چوڻ آهي ته هي راشن صرف ڳورهاري ۽ ڪمزور عورتن جو آهي جڏهن ته علائقي ۾ ڏڪاري حالتن سبب هر ماڻهون چاهي ٿو ته راشن جو سامان کين ملي جيڪو ممڪن نه آهي.

مٺي: رابطو ڪرڻ تي مٺي سول اسپتال جي انچارچ اي ايم ايس ڊاڪٽر چمن شرما چيو ته دوائن جي وڌيڪ خريداري ان ڪري ناهيون ڪري سگهيا ته سيشن جج. ڊپٽي ڪمشنر سميت مختلف لاڳاپيل آفيسرن تي مشتمل ڪميٽي ٺاهي وئي جنهن جي اجازت بعد ئي دوائون خريد ڪري سگهبيون. هن چيو ته اسپتال ۾ دوائن جي کوٽ ناهي مريض اجايو الزام تراشيون ڪن پيا، باقي تيل جي مد ۾ بجيٽ ختم ٿي آھي اسان پينٽرول پمپن تان اوڌر تي تيل وٺي ڪم کي هلايون پيا.