اڳوڻي وزير اعظم نواز شريف کي هڪ ڀيرو ٻيهر گرفتار ڪيو ويو آهي، لڳي ٿو ته مٿس ڏمر اڃان ٽريو ناهي. اهو ته اڳ ئي ظاهر هو ته هن ڀيري کيس رعايت ملڻ جو ڪو امڪان ناهي پر هتي معاملو زرداري جو به آهي ته مني لانڊرنگ ڪيس ۾ هن جي مٿان به سزا جي تلوار لڙڪي رهي آهي. ڇا نواز شريف جي گرفتاري زرداري لاءِ نياپو ته ناهي ته هو به پنهنجو جيل وڃڻ جو سامان ٻڌي وٺي؟
حميرا شيخ/ ڪراچي
ڪجهه ماڻهو اهي ڳالهيون ڪن ٿا ته آصف علي زرداري ڪا ڪرپشن نه ڪئي آهي ان ڪري سندس گرفتاري جو ڪو جواز ڪونهي، زرداري مٿان رڳو کيس سياسي طور بليڪ ميل ڪرڻ لاءِ دٻاءُ وڌو پيو وڃي. مونکي انهن دوستن جي سمجهه تي حيرت آهي تهجيڪڏهن زرداري ايترو ئي فرشتو آهي ته پوءِ هن هيڏي ساري ملڪيت آندي ڪٿان؟
زوهيب حسن/ حيدرآباد
”پنهنجي اخبار“ ۾ محترم امر جليل جو انٽرويو پڙهيم، پهرين ئي سوال سوچڻ تي مجبور ڪري ڇڏيو جنهن ۾ امر جليل چيو آهي ته سنڌ ۾ لڳندڙ ادبي ميلن سان ادب کي ڪو فائدو ناهي پر انهن سان رڳو ماڻهو اچي هڪٻئي سان ملن ٿا، ٻين لفظن ۾ اهو چئجي ته فقط پڪنڪ پوائنٽس آهن، جتي ماني ٽڪي ملي ٿي، ڪتاب وڪرو ٿين ٿا ۽ بس! سائين جو خيال پنهنجي جاءِ تي پر منهنجي خيال ۾ ته سنڌ ۾ جهڙي ريت ادبي ميلن جو رجحان وڌيو آهي ان سان ادبي سرگرمين ۾ به اضافو ٿيو آهي، نوان خيال ۽ موضوع بحث هيٺ اچن ٿا، انهن ئي ميلن ۾ امرجليل پاڻ به ويندو رهيو آهي جي اهي ميلا ايترا ئي بي فائدي آهن ته پوءِ امرجليل پاڻ انهن ميلن ۾ ڇو ٿو وڃي؟
شهاب الدين- ڪراچي
ڪرپشن جون ڳالهيون ته کوڙ ٿيون ڪيون وڃن، اهو ڪير به نٿو ٻڌائي ته عوام جي رت پورهئي جي ڪمائي ڦريندڙن جو احتساب ڪير ۽ ڪڏهن ڪندو؟ نه ئي اها خبر ٿي پوي ته اهو لٽيل ناڻو ويو ڪيڏانهن؟ هتي حالت اها آهي ته مهانگائي وڃي ٿي ڏينهون ڏينهن وڌندي، حڪومت ته ڪانهي ڪا مشڪرن جو ٽولو آهي، پهرين گرمي جي ڏينهن ۾ بجلي بند ته هاڻي وري سياري جي مند ۾ گيس بند! ڀاڄين ۽ بيدن جا اگهه ئي نرالا آهن، سمجهه کان ٻاهر آهي ته ماڻهو ايتري ٿوري آمدني مان ٻار پڙهائي يا ٻارن کي کارائي؟
حميد لاشاري- ٽنڊوالهيار
سماجي ويب سائيٽون هونئن ته سماجي رابطن ۽ ڄاڻ لاءِ هئڻ گهرجن ، پر اسان وٽ سنڌي مردن جو وڏو انگ هنن سماجي رابطن وارين ويب سائٽن کي پنهنجي ٺرڪ پوري ڪرڻ ۽ عورتن کي ڦاسائڻ واري هٿيار طور استعمال ڪري رهيا آهن، تازو تنوير آريجو جو واقعو اسان جي سامهون آهي، هيءُ هڪڙي تنوير آريجو انهيءَ عذاب تان پردو کنيو آهي پر ڏٺو وڃي ته هر عورت جيڪا فيس بوڪ استعمال ڪري ٿي، اها ان حراسمينٽ جوشڪار ٿئي ٿي. اِن باڪس ميسجز جي ڀرمار ٿئي ٿي، ميسجز ۾ اڪثر ماڻهو خراب وڊيوز به موڪلين ٿا. اڳ بس اسٽاپن ، مارڪيٽن ۾ تنگ ڪرڻ وارا ٿورا هوندا هئا. پر هاڻي فيس بڪ تي هر عورت سوين مردن هٿان حراسمينٽ جو شڪار ٿئي ٿي. اسان عورتن جي فيس بڪ جي لسٽ ۾ جيترا مرد ايڊ هوندا آهن انهن مان اڌ جيترا ميسجز تي بلاڪ هوندا آهن، تمام وڏا وڏا نالا، اديب، شاعر، صحافي،فنڪار جن کي اسان پبلڪ فگر سمجهي ايڊ ڪريون ٿيون اهي ايڊ ٿيندي ئي مجنان ٿيو پون، اسان انهن مردن کي جنسي بگهڙ سمجهئون ٿيون، جيڪي اسان کي فيس بڪ تي به جيئڻ ڪو نه ٿا ڏين. اسان سڀني عورتن کي تنوير آريجو وانگر انهن ميسجز جا اسڪرين شاٽس رکڻ گهرجن.
جميلا ميمڻ – لاڙڪاڻو