سرحد (رپورٽ عبدالحئي ساوند) گهوٽڪي ضلع جو تاريخي شھر سوالک آبادي رکندڙ سرحد انتظاميا جي نااهلي ۽ عدم دلچسپي سبب کنڊرات جو ڏيک ڏيڻ لڳو آھي گذريل ڪيترن ئي ڏينهن کان سرحد ۾ گيس جي اڻ اعلانيل لوڊشيڊنگ جاري آھي ۽ بجلي به سدائين گم رهڻ لڳي آھي، شھر جا مين روڊ به ڪيترائي سال مرمت نه ٿيڻ سبب تباه ٿي ويا آھن جڏھن ته مين بازار، محمدشاه روڊ، اسٽيشن روڊ، ملڪ محله، چنه محله، ٿاڻو چوڪ، جي ٽي روڊ، سميت مختلف علائقن ۾ گندگي جا ڍيرلڳل آھن مختلف علائقن ۾ نالين جو گندو پاڻي بيهجي وڃڻ سبب رهواسي سخت پريشان آھن، نالين جو گندو پاڻي روڊن تي بيهجي وڃڻ سبب اسڪول ويندڙ ٻارڙا ۽ نمازين کي سخت پريشانين کي منهن ڏيڻو پئجي رهيو آھي، سرحد جي شھرين کي مسئلن جي حل لاء ڪنهن مسيحا جو انتظار آھي ته هو اچي سرحد جا بنيادي مسئلا حل ڪرائي، هوڏانهن سرحد جي نالي تي ڪم ڪندڙ تنظيمن شھر جي ڀلائي يا بنيادي مسئلن جي حل لاء ڪو به قدم ناهي کنيو، ڄاڻايل تنظيمون صرف پنهنجن مفادن لاء شھرن کي گڏ ڪري شھر جو نالو استعمال ڪري پنهنجا مقصد حاصل ڪري رهيون آھن پر انهن تنظيمن مان ڪنهن به هڪ تنظيم شھر جي مسئلن جي حل لاء ڪو به قدم ناهي کنيو شھرين به سرحد جي نالي تي ڪم ڪندڙ تنظيمن کان بيزاري جو اظهار ڪيو آھي، گذريل 9 مهينن کان سرحد جي صفائي عملي جي ملازمن کي پگهارون نه ملڻ سبب صفائي عملي جي ملازمن به صفائي وارو ڪم بند ڪري ڇڏيو آھي جنهن سبب شھر گندگي جي ور چڙھي ويو آھي، گندگي سبب ڪيترين ئي بيمارين منهن ڪڍيو آھي.

ٺڪراٺو (رپورٽ: ممتازعلي مهر) ٺڪراٺو ۽ ڀرپاسي مختلف واهن ۾ 20 ڏينهن کان پاڻي نه پهتو آهي، جنهن سبب هزارين ايڪڙ فصل تباهه ٿي رهيو آهي. ان سلسلي ۾ بمبلي مائينر، لٺ مائينر ۽ مبارڪپور مائينر ۾ ويهن ڏينهن کان پاڻي بند هجڻ سبب آبادگار پريشان آهن. انهن جو هزارين ايڪڙن تي پوکيل ڪڻڪ جو فصل اڃ تي بيٺل آهي، جڏهن ته ڪيترن ئي هنڌن تي ڪڻڪ ۽ ڄانڀي جو فصل پوکجي نه سگهيو آهي، هيٺانهن علائقن ۾ رات ڏينهن بيڪا مشين زريعي آبادگار فصل ڀرائڻ ۾ مصروف آهن، جنهن تي هزارين روپيا ڊيزل خرچ ڪري چڪا آهن. ورياسي علائقن ۾ جرجوپاڻي کارو هجڻ ڪري آبادگار فصل پوکي نه سگهيا آهن. پهرئين پاڻي تي ڪاهيل فصل به سڪڻ لڳا آهن. آبادگارن فقير گهنور مڱريو اعجازمهر ۽ ٻين جو چوڻ ھو ت ڪڻڪ جي سيزن ۾ پاڻي صرف هڪ هفتو آيو هو جنهن تي فصل پوکيو سين ۽ پاڻي جي آسري تي هزارين روپين جاڊيزل ساڙي ڪڻڪ جوفصل پوکيو سين پر هاڻي پوکيل فصل لاء پاڻي ناهين هنن چيو بمبلي مائينر لٺ مائينر ۽ مبارڪپور مائينر جو ڪو ڌڻي سائين ناهي تنهن ڪري جڏھن مرضي پوين ٿي بندڪري ٿاڇڏين باقي پني عاقل جي سمورن واهن ۾ پاڻي هلي پيو هنن چيو هيٺانهي وارن علائقن ۾ ته ماڻھون ٽوٽاٽڪر بيڪامشين ذريعي ڀرائين پر مٿانهين ورياسي ٿر جي علائقن ۾ چوپائي مال پيارڻ لاء پاڻي ناهي هن موسم جوٺڪراٺي جي مٿاهن ورياسن علائقن ۾ سوين ايڪڙن تي طور ڄانڀي جوفصل پوکيو ويندو آھي جيڪو اڃا پوکجي ناهي سگهيو ۽ مال جي چاري لا گاه ناهن پوکجي سگهيا آبادگارن آبپاشي جي اعلاعملدارن کان مطالبوڪيو ته بمبلي مائينر لٺ مائينر ۽ مبارڪپور مائينر جي آبادگارن کي پاڻي ڏئي سندن فاقاڪشي کان بچايو وڃي.

نبي سرروڊ(ن پ ا) نبي سر ۾ رولو ڪتن جو آزار برقرار آهي، انتظاميا پاران ڪتا مار مهم شروع نه ڪرڻ سبب رهواسين ۾ ڏهڪاءُ پکڙيل آهي. رهواسين پنهنجي اخبار کي ٻڌايو ته رولو ڪتن هڪ هفتي اندر ٻڪرين جا ڪيترائي ڦر ماري ڇڏيا آهن، ڊپ آهي ته ڪٿي ٻارڙن کي به زخمي نه ڪري وجهن.

ميرپورخاص (بيورو رپورٽ) ميرپورخاص پريس ڪلب جي چونڊ جي حوالي سان جنرل باڊي جو اجلاس راشد سليم جي صدارت هيٺ ٿيو. اجلاس ۾ آفتاب قادري، ابوبڪر رند، عاطف بلوچ، عزيز خان، سليم آزاد، سيد محمدخالد، محمد صالح اوٺو، شاهد ڪيهر، واحد پهلواني، شاهد خاصخيلي، صديق ساگر، شيرمحمد ملڪاڻي، نجيب سانڀري، شوڪت پنهور ۽ ٻيا شريڪ ٿيا. اجلاس ۾ گذريل ڪاروائي ۽ سال 2018 جي خرچن جي منظوري ڏني وئي. اجلاس ۾ موجوده باڊي جو مُدو پورو ٿيڻ تي پريس ڪلب جي نئين باڊي جي چونڊ جي حوالي سان مشورو وٺڻ تي سينئر صحافين پاران صدارت لاءِ راشد سليم، نائب صدر شوڪت پنهور، جنرل سيڪريٽري آفتاب قادري، خزانچي ابوبڪررند جڏهن ته جوائنٽ سيڪريٽري لاءِ عزيز خان جا نالا تجويز ڪيا ويا ۽ چونڊ لاءِ خواهشمند اُميدوارن جي کي پئنل پيش ڪرڻ جو چيو ويو ڪوبه پئنل يا اُميدوار سامهون نه اچڻ تي اجلاس ۾ اڪثريت راءِ سان تجويز ڪيل نالن کي بنا مقابلي ڪامياب ٿيڻ جو اعلان ڪيو ويو.

ڄامشورو: ڪوهستان ۾ پيدا ٿيل ڪاري ڏڪار بابت تونگ يونين ڪائونسل جي وائيس چيئرمين زمان گبول، ڪائونسلر رحيم سهتاڻي رابطو ڪرڻ تي ٻڌايو ته برسات نه پوڻ ڪري ڪوهستان جي ماڻهن جو گذر سفر متاثر ٿيو آھي اسان جو چوپايو مال تي گذر آھي اسان جي يوسي جا 20 ڳوٺ آھن جتان لڏپلاڻ گهڻي ٿي آھي ڇاڪاڻ ته ڪافي سالن کان برساتون نه پيون آهن. تنهنڪري گاھ ئي ناهي ٿيو ۽ چوپايو مال بک مري رهيو هو.ڪيترا خاندان مال ڪاهي ويا ڪجھ وري ٿاڻي بولاخان جي آس پاس ۽ دروات ڊيم جو پاسو وٺي وڃي ويٺا آھن، هنن چيو ته ڊي سي ڄامشورو ۽ اي سي بولاخان اسان جي مٿان سروي جي ذميواري اسان کي ڏني جنهن کانپوءِ سروي ڪئي وئي جنهن مان خبر پئي ته صرف تونگ يوسي ۾ 18هزار ماڻهو متاثر ٿيا آهن. ۽ 80 هزار کان وڌيڪ جانور چارو نه ملڻ ڪري متاثر ٿيا پر انتظاميه اسانجي سروي رپورٽ رد ڪري ڇڏي. هنن چيو ته هر خاندان کي ٽن مرحلن ۾ ڪڻڪ ڏيڻ جو آسرو ڏنو ويو مطلب تي هر مهيني ڪڻڪ جو ڪٽو ملندو پر هڪڙو دفعو ڏئي ٻن مهينن کان ڪڻڪ ڏيڻ ئي بند ڪري ڇڏي.

ڄامشورو: لائيو اسٽاڪ ٿاڻي بولاخان جي ڊپٽي ڊائريڪٽر ذوالفقار علي ڀٽو رابطو ڪرڻ تي ٻڌايو ته ڏڪار سبب سڄو ڪوهستان متاثر آھي، پنجاھ سيڪڙو چوپايو مال ڪوهستان مان نڪري چڪو آھي لڏپلاڻ صرف ڪوهستان واسي مال جو چارو ختم ٿيڻ ڪري ڪندا آھن ڪوهستان ۾ سرڪاري انگ اکرن ۾ ساڍا اٺ لک جانور آھن جنهن مان اڌ اڃا ڪوهستان ۾ موجود آھن. جانورن کي بيمارين جي بچاءَ جي ويڪسيئن ٿئي پئي باقي مال لاء چار ملي ناهي سگهيو، چارو ملندو ته ڏينداسين . هن چيو ته هڪ لک 12 هزار جانورن کي ويڪسين ڪئي آھي. هن محل سياري سبب جانورن ۾ کنگھ، زڪام، تيڪ، ارڙي، ڦڦڙي، بليڪ واٽر، گل گهوٽو واريون بيماريون عام جام آهن ان جي ويڪسيئن ٿي رهي آھي.

ڄامشورو: ڊپٽي ڪمشنر ڄامشورو فريد الدين مصطفيٰ رابطو ڪرڻ تي ٻڌايو ته ڪوهستان مان ايتري لڏپلاڻ ناهي ٿي برساتون نه پوڻ ڪري ڏڪار پيدا ٿيو آھي پر اڪثر علائقن ۾ سولر ٽيوب ويل لڳل آھن اسان دراوت ڊيم مان ست ڳوٺن لاء واٽر سپلا جي اسڪيم لاء پي سي ون تيار ڪئي آھي ان کان علاو ڪوهستان جي ڏڪار سبب متاثر ڳوٺن ۾ سولر ٽيوب ويل لڳرائڻ لاء سنڌ سرڪار کي لکيو آھي، هن چيو ته 29 هزار ماڻهن کي ڪڻڪ ڏينداسين في الحال 10 هزار ماڻهن کي ڏني آھي.