ڪنڌڪوٽ: پوليس ۽ تعليم کاتي جي ڪرپٽ ڪامورن اينٽي ڪرپشن عملدارن سان ڳجهي ريت معاهدو ڪري گرفتار نه ڪرڻ جي صورت ۾ ڳري رقم ڏيڻ جي آڇ ڪئي آهي. پنهنجي اخبار کي مليل ڄاڻ موجب اينٽي ڪرپشن عملدارن ڏيتي ليتي ڪري معاملو لئه مٽي ڪرڻ لاءِ به تيار آهن، پر ڪيس عدالت ۾ هئڻ سبب کين ڏکيائيون پيش اچي رهيون آهن.
تعليم کاتي ۾ جعلي ڀرتين ذريعي ساڍا 17 ڪروڙ ڪرپشن، گرفتاري خواب بڻيل
ڪنڌڪوٽ: ڪنڌڪوٽ جي تعليم کاتي ۾ جعلي ڀرتين ذريعي ڪروڙين رپيا ڪرپشن جو انڪشاف، اينٽي ڪرپشن جي جاچ ڪاغذي ڪارروائي تائين محدود ٿي وئي. پنهنجي اخبار کي مليل ڄاڻ موجب ڪامورن 115 جعلي ڀرتيون ڪري 2012 کان 2015ع تائين پگهارن جي مد ۾ 17 ڪروڙ ڪرپشن ڪئي. اينٽي ڪرپشن پاران مليل رپورٽ موجب، اڳوڻو پرنسپل ايجوڪيشن عبدالرحيم بهلڪاڻي آفيسرن کي پئسا ڏئي 115 جعلي ڀرتيون ڪرايون، جڏهن ته جعلي ملازمن جي نالي تي ماهور 25 هزار پگهار به مقرر ٿي، جيڪو ٽن سالن تائين جاري رهيو. ذريعن موجب ڪيس ۾ ڄاڻائي ڪاموري استاد، چوڪيدار، پٽيوالا ۽ ٻين پوسٽن تي 115 ڄڻن کي ڀرتي ڪرائي ڪوڙيون آءِ ڊيز ٺهرائي پئسا ڪڍرائيندو رهيو. اينٽي ڪرپشن موجب جعلي ڀرتين جو اڳوڻو پرنسپل اسپيشل ايجوڪيشن ڪشمور ڪنڌڪوٽ عبدالرحيم بهلڪاڻي، سيڪشن آفيسر ڪراچي ڊاڪٽر ڪشور ڪمار، سيڪشن آفيسر ڪراچي ناز پروين، اڳوڻو ميڊيڪل آفيسر ڪنڌڪوٽ هيرالدين گجراڻي، ايم ايس ڪنڌڪوٽ سول اسپتال نظير احمد اعواڻ ۽ ٻين خلاف ڪيس داخل ڪيو.
اينٽي ڪرپشن جي جاچ رڳو ڍونگ! ڪنڌڪوٽ جي پوليس ۽ تعليم کاتن ۾ 60ڪروڙ کان وڌيڪ گهوٻيون
ڪنڌڪوٽ: اينٽي ڪرپشن جي جاچ رڳو ڍونگ! ڪنڌڪوٽ جي پوليس ۽ تعليم کاتن ۾ 60ڪروڙ کان وڌيڪ گهوٻيون، عملدارن کي کلي ڇوٽ، پوليس ۾ 2013 کان 17ع جعلي ڀرتين، ڪوڙن بلن جي مد ۾43 ڪروڙ ڪرپشن ٿي، ڪيس داخل ٿيڻ باوجود ڪنهن وک کڻڻ جي تڪليف نه ڪئي، تعليم کاتي ۾ به ڀينگ، چئن سالن ۾ ساڍا 17ڪروڙ ڳڙڪائجي ويا، سنڌ سرڪار جي حڪم تي اينٽي ڪرپشن ڪاغذي ڪارروائي ڪري آجي آهي. پنهنجي اخبار کي مليل ڄاڻ ۽ اينٽي ڪرپشن جي 40 صفحن تي ٻڌل رپورٽ موجب، ڪنڌڪوٽ جي پوليس کاتي ۾ 2013ع کان 2017ع ۾ 43 ڪروڙ رپيا ڪرپشن جو انڪشاف ٿيو آهي. مليل ڄاڻ موجب ايس ايس پي آفيس جو اڳوڻو اڪائونٽنٽ بشير احمد ٻرڙو،گل زبير ڊومڪي، ضلعي جي ناڻي واري آفيس جي اڳوڻي اڪائونٽنٽ عبدالعزيز بلو، حسن الدين ديناري، سليمان ميراڻي، سب اڪائونٽنٽ غلام مصطفيٰ لاشاري، نيشنل بئنڪ جي 6 ملازمن ممتاز سولنگي، ڪريم بخش دائودپوٽو، صدرالدين چنو ۽ الله ڏنو چنو سميت 17 عملدارن جي ڪرپشن جي انڪشاف کانپوءِ سنڌ سرڪار نوٽيس وٺندي اينٽي ڪرپشن کي جاچ جو حڪم ڏنو. پنهنجي اخبار کي مليل ڄاڻ موجب پوليس کاتي ۾ ڪرپشن جو ماسٽر مائينڊ ڪشمور ڪنڌڪوٽ پوليس کاتي جو اڳوڻو اڪائونٽنٽ بشير ٻرڙو نيشنل بينڪ مان خزاني آفيس جي نالي تي ڪوڙين آءِ ڊيز ذريعي ڪروڙين رپيا ڪڍرائي قومي ناڻي کي نقصان پهچايو. سنڌ حڪومت جي هدايت تي اينٽي ڪرپشن جي سرڪل آفيسر شاهد بشير کوسو عملدارن خلاف ڪيس داخل ڪرايو، پر جوابدارن جلد عدالتن مان ضمانتون حاصل ڪري ورتيون. ذريعن موجب، 2012 کان 2014 ع ۾ يونس چانڊيو، عمر طفيل، عمر سلامت سميت ٻين ايس ايس پيز جي دور ۾ ڪرپشن جا کاتا کوليا ويا. ڪرپشن ڪيس ۾ نامزد جوابدار اڳوڻو اڪائوٽنٽ بشير ٻرڙو 7 مهينن کان منظر عام تائين غائب ٿي دبئي فرار ٿي ويو آهي. اينٽي ڪرپشن ٽيم ڪيس جي جاچ ۾ اڳڀرائي ڪرڻ ۾ مڪمل طور ناڪام نظر اچي رهي آهي، جڏهن ته ڪرپٽ ڪامورن کي مختلف وقتن تي ڇوٽ به ڏيڻ جو سلسلو جاري آهي.
سي سي آءِ جي گذريل اجلاس ۾ سنڌ جي احتجاجن جو ڪو به کڙتيل نه نڪتو
ڪراچي: ڪائونسل آف ڪامن انٽريسٽ (سي سي آءِ ) جو ايندڙ اجلاس مجموعي طور تي 41هون ۽ پاڪستان تحريڪ انصاف جي حڪومت ۾ ٽيون اجلاس ٿيندو. سي سي آءِ جي ماضي وارن اجلاسن ۾ سنڌ جي احتجاجن جو ڪو کڙتيل ئي ناهي نڪتو. جڏهن ته پي ٽي آءِ سرڪار پنهنجي حڪومتي مُدي ۾ 2 ڀيرا سي سي آءِ اجلاس گھرائي چُڪي آهي. عمران خان جي سرڪار پاران ايندڙ اجلاس ٽيون ڀيرو ڪيو ويندو.
91ع واري ٺاهه تحت پاڻي لاءِ آواز اٿاريو وڃي:ادريس راجپوت
ڪراچي: پاڻي ماهر ادريس راجپوت سنڌ حڪومت کي تجويز ڏيندي چيو آهي ته صوبي کي 1991ع پاڻي ٺاھ تحت 8.6 ملين ايڪڙ فوٽ ڏيارڻ لاءِ اجلاس ۾ آواز اٿاريو وڃي. ادريس راجپوت “پنهنجي اخبار” سان ڳالهائيندي چيو آهي ته سنڌ سرڪار پاران 91ع پاڻي ٺاھ ۾ 10 ملين ايڪڙ فوٽ پاڻي گھريو هو. پر وفاق 8.6 ملين ايڪڙ فوڙ ڏيڻ تي راضپو ظاهر ڪيو هو. پر هاڻي وفاقي سرڪار سنڌ کي اهو پاڻي به نه پيو ڏئي. هن وڌيڪ چيو ته سي سي آءِ اجلاس ۾ اهو پڻ زور ڀريو وڃي ته بلوچستان ۽ خيبرپختونخواھ کي پاڻي جي کوٽ وارو حصو به کڻڻ گھرجي. سنڌ کي پاڻي ۾ هر ڏينهن جو حصو ملڻ گھرجي.
سنڌ سرڪار پارن سي سي آءِ اجلاس ۾ پاڻي ڪيس ۽ معدني وسيلن لاءِ آواز اٿارڻ جو فيصلو
ڪراچي (رپورٽ: شاهد ميراڻي )وفاق سي سي آءِ اجلاس لاءِ صوبن کان تجويزون گھُري ورتيون، سنڌ سرڪار پاڻي معاملن ۾ ناجائزين، گئس ۽ ٻين معدني وسيلن مان گھٽ حصو ملڻ خلاف اجلاس ۾ آواز اٿارڻ لاءِ تياري شروع ڪري ڇڏي آهي. سنڌحڪومت پاران 91ع ٺاھ تحت پاڻي نه ملڻ ۽ گئس گھٽ ملڻ خلاف ڀرپور نموني اجلاس ۾ سنڌ جو ڪيس وڙهڻ لاءِ ماهرن سان صلاح مشورا شروع ڪيا ويا آهن. ان سلسلي ۾ ڄاڻ موجب ته وفاقي حڪومت پاران ڪائونسل آف ڪامن انٽريسٽ ( سي سي آءِ ) اجلاس لاءِ سنڌ، بلوچستان، پنجاب ۽ خيبرپختونخواھ کان ايجنڊا لاءِ تجويزون گھرائي ورتيون آهن. ان سلسلي ۾ ذريعن موجب سنڌ حڪومت پاران ڄاڻايل اجلاس ۾ سنڌ سان پاڻي،گئس ۽ ٻين معدني وسيلن جي ورڇ ۾ وفاقي سرڪار جي ناجائزن خلاف ڀرپور نموني ڪيس وڙهڻ جو فيصلو ڪندي پاڻي ۽ قدرتي وسيلن جي ماهرن سان صلاح مشورا شروع ڪري ڇڏيا آهن. ان سلسلي ۾ وزيراعليٰ هائوس جي ترجمان جو چوڻ آهي ته سي سي آءِ اجلاسن ۾ صوبي سان ٿيندڙ ناجائزن خلاف آواز اٿاريو ويندو. ڪراچي کي گھٽ پاڻي ملڻ وارو معاملو به اهم آهي.هن چيو ته ٻين ڪهڙن اشوز تي تياري ڪئي پئي وڃي ان بابت في الحال معلومات ناهي. هوڏانهن توانائي کاتي جي صوبائي وزير امتياز شيخ رابطو ڪرڻ تي “پنهنجي اخبار” سان ڳالهائيندي چيو آهي ته سنڌ سان گئس جي ورهاست ۾ وفاق ناجائزيون ڪري پيو. اجلاس ۾ اهو معاملو اهم آهي اٿاريو ويندو. جيئن سنڌ سان ناانصافي نه ٿئي.
گهوٽڪي جي مهرسردارن کان خالد لنڊ وڏو زميندار
اسلام آباد: سنڌ جي گھوٽڪي ضلعي ۾ وڏي ۾ وڏا آبادگار تصور ٿيندڙ سردار محمد بخش خان مهر، علي محمد خان مهر، علي نواز خان مهر جي پنهنجن نالن تي ظاهر ڪيل زرعي زمين تحت انهن مهر سردارن کان ذاتي نالي تي خالد لنڊ وٽ وڌيڪ زرعي زمين آهي. ان حساب سان گھوٽڪي ضلعي ۾ ذاتي نالي تي وڌ ۾ وڌ زمين رکندڙ خالد لنڊ آهي. جڏهن ته نوشهري فيروز ۾ مرتضي خان جتوئي پاران ظاهر ڪيل زرعي زمين کان وڌيڪ نوشهري فيروز سيد مراد علي شاھ وٽ وڌيڪ زمين آهي. اهڙي ريت خيرپور ضلعي ۾ ڪيتين جا مالڪ تصور ٿيندڙ نعيم کرل، راشد شاھ، صدر الدين شاھ جي نالي ظاهر ڪيل زمين کان منظور وساڻ وٽ وڌيڪ زرعي زمين آهي..
محمد بخش مهر وٽ ٽن ڪروڙن جي 153 ايڪڙ زمين
اسلام آباد؛ مهر برادريءَ جي سردار اڳوڻي ايم پي اي سردار محمد بخش خان مهر وٽ ڪل زرعي زمين 153 ايڪڙ آهي جنهن جي ڪل قيمت 3 ڪروڙ 2 لک 40 هزار روپيا ڄاڻائي وئي آهي. صوبائي اسيمبلي جي اڳوڻي ميمبر غلام مجتبي اسراڻ 152 ايڪڙ زرعي زمين جو مالڪ آهي جنهن جي هن قيمت ناهي ڄاڻائي. اڳوڻي ايم پي اي ۽ اڳوڻي صوبائي وزير منظور وساڻ پنهنجي 485 ايڪڙ زرعي زمين ظاهر ڪئي آهي. سانگھڙ مان چونڊيل اڳوڻي ايم پي اي سعيد خان نظاماڻي پنهنجي ۽ اولاد نالي 204 ايڪڙ زمين ڄاڻائي آهي. اڳوڻو وڏو وزير ارباب غلام الرحيم 181 ايڪڙ زرعي زمين جو مالڪ آهي
مرتضيٰ جتوئي وٽ 675، نواب وساڻ 15 صدرالدين شاهه 358 ايڪڙ
اسلام آباد: لاڙڪاڻي جي اڳوڻي ايم اين اي حزب الله ٻگھيي 303 ايڪڙ زمين ڄاڻائي آهي جنهن جي ڪل قيمت ناهي ڄاڻائي وئي. نوشهري فيروز مان چونڊيل قومي اسيمبلي جي اڳوڻي ميمبر غلام مرتضي خان جتوئي پنهنجي، گهرواري ۽ اولاد نالي ڪل زمين 675 ايڪڙ زمين ۽ ان جي ڪل پراڻي ماليت 81 لک 56 هزار ڄاڻائي آهي. خيرپور مان چونڊيل اڳوڻي ايم اين اي نواب وساڻ وٽ 15 ايڪڙ زمين آهي ۽ اڳوڻي ايم اين اي پير صدرالدين شاھ 358 ايڪڙ زمين ۽ اڳوڻي ايم اين اي سيد ڪاظم علي شاھ 201 ايڪڙ زمين ڄاڻائي آهي. بدين مان چونڊيل اڳوڻي قومي اسيمبلي جي ميمبرڪمال چانگ وٽ 930 ايڪڙ زمين آهي جنهن جي هن 20 ڪروڙ 90 هزار روپيا ماليت ڄاڻائي آهي.
سائره بانو 50، نزهت پٺاڻ 20 مهرين ڀٽو 15 ايڪڙن جي مالڪ
اسلام آباد: قومي اسيمبلي ۾ مخصوص سيٽن تي آيل سائره بانو وٽ 50 ايڪڙ، پي ٽي آءِ جي ايم اين اي نزهت پـٺاڻ وٽ 20 لک ماليت جي زرعي زمين آهي. قومي اسيمبلي جي ميمبر مهرين ڀٽو وٽ 15 ايڪڙ، مسرت رفيق مهيسر وٽ 10 ايڪڙ زمين آهي.
شيري رحمان وٽ ڀٽ شاهه ۾ 3 ايڪڙ زمين موجود
اسلام آباد: سينيٽ جي چونڊيل ميمبر شيري رحمان پنهنجي ڀٽ شاھ ويجھو 3 ايڪڙ زمين ڄاڻائي آهي. سينيٽر سسئي پليجو وٽ 300 ايڪڙ زرعي زمين آهي. سينيٽر اسلام الدين شيخ وٽ 171 ايڪڙ زرعي زمين آهي جنهن جي ڪل ماليت 4 ڪروڙ 86 لک 57 هزار 6 سئو 44 روپيا ڄاڻائي آهي. بدين سان واسطو رکندڙ سينيٽر ڊاڪٽر سڪندر مينڌرو وٽ 221 ايڪڙ زمين آهي جنهن جي ماليت 45 لک روپيا ڄاڻائي وئي.. سينيٽر سيد مظفر حسين شاھ وٽ ڪل 478 ايڪڙ زمين آهي جنهن مان 252 ايڪڙ سندس نالي ۽ 216 ايڪڙ زرعي زمين سندس گھرواري جي نالي تي آهي.
نادر مگسي سنڌ جو سڀ کان وڏو زميندار پارليامينٽيرين، نوشهري جو مراد شاهه ٻئي نمبر تي
اسلام آباد (رپورٽ: ايم بي سومرو) سنڌ اسيمبلي جي ميمبرن مان سڀ کان وڌيڪ 5 هزار 7 سئو 10 ايڪڙ زرعي زمين رکڻ سبب مير نادر مگسي وڏي ۾ وڏو زميندار طور سامهون آيو آهي جڏهن ته ٻئي نمبر تي گهڻي زرعي زمين 3 هزار 3 سئو چار ايڪڙ نوشهري فيروز مان چونڊيل ايم پي اي سيد مراد علي شاھ وٽ آهي. اهڙيءَ ريت ترتيبوار نواب سردار خان چانڊيو ٽئين، ملڪ اسد سڪند چوٿين، مير شبير بجاراڻي پنجين، نواب تيمور ٽالپور ڇهين، محمد علي ملڪاڻي ستين، معظم عباسي اٺين، مخدوم رفيق الزمان نائين، شرجيل انعام ميمڻ ڏهين، نور احمد ڀرڳڙي يارهين، اويس شاھ ٻارهين ۽ وريام فقير تيرهين نمبر تي سنڌ اسيمبلي جي چونڊيل ميمبرن ۾ چوٽيءَ جا زميندار اڀري سامهون آيا آهن. جڏهن ته سنڌ اسيمبلي جي ميمبرن مان سڀ کان گھٽ 2 ايڪڙ زرعي زمين سهيل انور سيال وٽ هجڻ جو انڪشاف ٿيو آهي. تفصيل موجب سنڌ اسيمبلي جي چونڊيل ميمبرن جي اثاثن جا لکت ۾ “پنهنجي اخبار” وٽ دستاويزن موجب سکر مان چونڊيل سنڌ اسيمبلي جي ميمبر سيد ناصر حسين شاھ وٽ 223 ايڪڙ زرعي زمين آهي جنهن ۾ 167 ايڪڙ زمين سندس نالي جڏهن ته 40 ايڪڙ زمين سندس گھرواري ۽ 6 ايڪڙ زمين سندس پٽ جي نالي آهي. سيد ناصر حسين شاھ پنهنجي زرعي زمين جي موجوده قيمت اثاثن ۾ نه ڄاڻائي آهي. اڳوڻي اپوزيشن ليڊر سيد خورشيد شاھ جي ڀائٽي ۽ نياڻي صوبائي وزير سيد اويس شاھ 551 ايڪڙ زرعي زمين جو مالڪ آهي جنهن جي ڪل قيمت 62 لک 70 هزار روپيا ڄاڻائي وئي آهي. سکر مان چونڊيل صوبائي اسيمبلي جي ميمبر ڄام اڪرام الله خان خانداني ورثي ۾ مليل 91 ايڪڙ زرعي زمين جڏهن ته گھوٽڪيءَ ۾ 11 لک ماليت جي زرعي زمين جو مالڪ آهي. ڄام اڪرام الله گھوٽڪيءَ ۾ ڪيتري ايراضي تي ٻڌل زرعي زمين جو مالڪ آهي ان جا تفصيل ظاهر نه ڪيا آهن. سيد خورشيد شاھ جو پٽ ايم پي اي سيد فرخ احمد شاھ 50 ايڪڙ زرعي زمين جو مالڪ آهي جنهن جي ڪل پراڻي قيمت 7 لک 50 هزار آهي. سنڌ اسيمبلي جي ميمبر علي گوهر خان مهر وٽ 380 ايڪڙ زرعي زمين آهي جنهن جي ڪل قيمت 1ڪروڙ 71 لک ڄاڻائي وئي آهي. علي گوھر مهر جي پنهنجي نالي تي 303 ايڪڙ زرعي زمين آهي جنهن جي ڪل ماليت 1 ڪروڙ 66 لک جڏهن ته سندس گھرواري جي نالي تي 77 ايڪڙ زرعي زمين آهي جنهن جي ڪل ماليت 5 لک روپيا ڄاڻائي وئي آهي. سنڌ اسيمبلي جو ميمبر علي نواز خان مهر 19 ڪروڙ 31 لک 12 هزار 212 روپين جي اثاثن جو مالڪ آهي ۽ وٽس ڪيتري زرعي زمين آهي اثاثن ۾ ظاهر ڪونه ڪيا آهن. گھوٽڪي مان چونڊيل ايم پي اي عبدالباري پتافي 202 ايڪڙ زرعي زمين جو مالڪ آهي جنهن جي ڪل ماليت 34 لک 34 هزار ڄاڻائي وئي آهي. ايم پي اي آغا سراج دراني وٽ ڪل ڏيڍ سئو ايڪڙ زمين آهي جنهن جي ماليت 72 لک 20 هزار روپيا آهي. ساڳئي ئي ضلعي شڪارپور مان چونڊيل ايم پي اي شهريار خان مهر 112 ايڪڙ زرعي زمين جو مالڪ آهي جنهن جي ڪل ماليت 87 لک 79 هزار ڄاڻائي وئي. امتياز احمد شيخ وٽ 143 ايڪڙ زرعي زمين آهي جنهن جي ڪل ماليت 15 لک 25 هزار ڄاڻائي وئي آهي. امتياز شيخ خيرپور ضلعي جي گمبٽ تعلقي جي ڪچي واري علائقي راضي ديري ۾ 132 ايڪڙ زمين جي خريد قيمت 14 لک جڏهن ته لکي تعلقي ۾ 11 ايڪڙ زمين جي قيمت 1 لک 25 هزار ڄاڻائي آهي. لاڙڪاڻي مان چونڊيل ايم پي اي فريال ٽالپور وٽ 320 ايڪڙ زرعي زمين آهي جنهن جي ڪل ماليت 3 ڪروڙ 9 لک آهي. سهيل انور سيال پنهنجي زرعي زمين 2 ايڪڙ ظاهر ڪئي آهي جنهن جي قيمت 55 هزار آهي. لاڙڪاڻي مان چونڊيل ٻئي ايم پي اي معظم عباسي وٽ 683 ايڪڙ زمين آهي جنهن جي ڪل ماليت نه ڄاڻائي وئي آهي. ايم پي اي حذب الله ٻگھيي وٽ 303 ايڪڙ زرعي زمين آهي. قمبر شهدادڪوٽ مان صوبائي اسيمبلي جي ميمبر گنهور علي خان اسراڻ 204 ايڪڙ زرعي زمين جو مالڪ آهي جنهن جي هن قيمت ناهي ڄاڻائي. ايم پي اي مير نادر علي مگسي پنهنجي، گهرواري ۽ اولاد جي نالي ڪل زرعي زمين 5 هزار 710 ايڪڙ ڄاڻائي آهي جنهن ۾ 4 هزار 599 ايڪڙ زرعي زمين بلوچستان ۾ جڏهن ته گھرواري ۽ ڌيءَ جي نالي تي ديھ شهدادڪوٽ ۾ 229 ايڪڙ، قبي سعيد خان ۾ ڌيءَ ۽ گھرواري نالي 270 ايڪڙ جڏهن ته جاتي ۽ سجاول ۾ گھرواري ۽ ڌيءَ جي نالي تي 612 ايڪڙ زمين شامل آهي. نادر مگسي مٿي ڄاڻايل ڪل زرعي زمين سميت زرعي مشينري جي ماليت 2 ڪروڙ 47 لک 52 هزار روپيا ڄاڻائي آهي. سنڌ اسيمبلي جي ميمبر نواب سردار خان چانڊيو 1 هزار 482 ايڪڙ زرعي زمين ڄاڻائي آهي. هن زرعي زمين سميت غير متحرڪ اثاثن جنهن ۾ گھر ۽ پلاٽ به شامل آهن ڪل ماليت 12 ڪروڙ 54 لک 26 هزار 800 روپيا ڄاڻائي آهي. ايم پي اي برهان خان چانڊيي وٽ 349 ايڪڙ زرعي زمين آهي جنهن جي هن ماليت ناهي ڄاڻائي. جيڪب آباد مان چونڊيل سنڌ اسيمبلي جي ميمبر ممتاز حسين جکراڻي پنهنجي ڪل زرعي زمين 134 ايڪڙ ڄاڻائي آهي. جڏهن ته ايم پي اي ڊاڪٽر سهراب سرڪيءَ وٽ 135 ايڪڙ زمين آهي. ايم پي اي اسلم ابڙي پنهنجي اثاثن ۾ غيرآباد زمين جو پاڻ کي مالڪ ظاهر ڪيو آهي پر ان جي ايراضي نه ڄاڻائي آهي. ڪشمور مان چونڊيل ايم پي اي سردار غلام عابد خان سندراڻي ڪل 329 ايڪڙ زرعي زمين پنهنجي ملڪيت ۾ ظاهر ڪئي آهي جنهن جي قيمت هن نه ڄاڻائي آهي. حاجي عبدالرئوف کوسو پنهنجي ملڪيت ۾ 161 ايڪڙ زمين ڄاڻائي آهي. مير شبير علي بجاراڻي پنهنجي، پنهجي گھرواري ۽ اولاد نالي اثاثن ۾ ڪل 882ايڪڙ زرعي زمين ڄاڻائي آهي. شبير بجاراڻي زرعي زمين، گھر ۽ پلاٽن جي مجوعي قيمت 2 ڪروڙ 80 لک ڄاڻائي آهي. نوشهري مان چونڊيل ايم پي اي مراد علي شاھ پنهنجي ۽ پنهنجي گھرڀاتين جي نالي تي ڪل 3 هزار 387 ايڪڙ زمين ظاهر ڪئي آهي. سيد سرفراز حسين شاھ وٽ 317 ايڪڙ زمين آهي. عارف مصطفي جتوئي پنهنجي زرعي زمين 78 ايڪڙ ڄاڻائي آهي. نواب شاھ مان چونڊيل سنڌ اسيمبلي جي ميمبر عذرا فضل پيچوهو 263 ايڪڙن کان وڌيڪ زرعي زمين جي مالڪ آهي. ايم پي اي طارق مسعود آرائين وٽ 116 ايڪڙ زرعي زمين آهي جنهن جي ڪل ماليت 15 لک 70 هزار ڄاڻائي وئي آهي. غلام قادر ڄانڊيي پنهنجي ڪل زرعي زمين 154 ايڪڙ زمين ڄاڻائي آهي. ايم پي اي خان محمد ڏاهري وٽ 216 ايڪڙ زمين آهي جنهن جي هن ڪل ماليت 85 لک 88 هزار ڄاڻائي آهي. خيرپور مان سنڌ اسيمبلي جي چونڊيل ميمبرن مان سيد قائم علي شاھ پنهنجي 65 ايڪڙ زرعي زمين ڄاڻائي آهي. ڊاڪٽر رفيق ٻانڀڻ وٽ 116 ايڪڙ زمين آهي. صوبائي اسيمبلي جي ميمبر نعيم کرل وٽ 187 ايڪڙ زمين آهي. سيد محمد راشد شاھ وٽ 464 ايڪڙ زمين آهي جنهن جي ماليت 5 ڪروڙ ڄاڻائي وئي آهي. صوبائي اسيمبلي جو ميمبر منور وساڻ 300 ايڪڙن جو مالڪ آهي. ايم پي اي ساجد ٻانڀڻ پنهنجي 126 ايڪڙ زمين ۽ ان جي قيمت 6 ڪروڙ 30 لک ڄاڻائي آهي. جڏهن ته مٽياري ضلعي مان صوبائي اسيمبلي جي ميمبر مخدوم رفيق الزمان وٽ 602 ايڪڙ زرعي زمين آهي. ايم پي اي مخدوم محبوب الزمان پنهنجي زمين جي ايرضي 220 ايڪڙ ظاهر ڪئي آهي. ٽنڊي محمد خان مان چونڊيل ايم پي اي عبدالڪريم سومرو 52 ايڪڙ زمين جو مالڪ نڪتو. ساڳئي ضلعي ٽنڊي محمد خان جي ايم پي اي اعجاز حسين شاھ وٽ 65 ايڪڙ زرعي زمين آهي. بدين مان چونڊيل سنڌ اسيمبلي جي ميمبر مير الله بخش ٽالپور اليڪشن ڪميشن وٽ پنهنجي زمين 236 ايڪڙ ظاهر ڪئي آهي جنهن جي هن 5 ڪروڙ روپيا ماليت ظاهر ڪئي وئي. ايم پي اي بشير احمد هاليپوٽو وٽ 212 ايڪڙ زمين آهي جنهن جي ماليت 2 ڪروڙ ڏيکاري آهي. حسنين مرزا 492 ايڪڙ زرعي زمين جو مالڪ آهي جنهن 2 ڪروڙ 3 لک 50 هزار روپيا ڄاڻائي وئي آهي. ايم پي اي اسماعيل راهو پنهنجي زمين پنهنجي ۽ اولاد نالي ڪل 467 ايڪڙ ظاهر ڪئي آهي. بدين مان چونڊيل ايم پي اي تاج محمد ملاح وٽ 143 ايڪڙ زمين آهي. دادو مان چونڊيل ايم پي اي پير مجيب الحق وٽ صرف 65 ايڪڙ زمين آهي جنهن جي قيمت 14 لک روپيا آهي. سيد غلام شاھ جيلاني 202 ايڪڙ زمين جو مالڪ نڪتو جنهن جي قيمت 22 لک 50 هزار آهي. سنڌ اسيمبلي جي ميمبر عبدالعزيز جوڻيجي وٽ 374 ايڪڙ زمين آهي جنهن جي ڪل پراڻي ماليت 17 لک 3 هزار 250 روپيا آهي. فياض ٻٽ وٽ 54 ايڪڙ زمين آهي جنهن جي ماليت 11 لک 20 هزار روپيا آهي. حيدرآباد جي ايم پي اي سنڌ اسيمبلي جي ميمبر ڄام خان شوري وٽ 262 ايڪڙ زرعي زمين آهي جنهن جي قيمت هن 1 ڪروڙ 20 لک ڄاڻائي آهي. شرجيل انعام ميمڻ 553 ايڪڙ زرعي زمين اثاثن ۾ ڄاڻائي آهي جنهن مان 83 ايڪڙ زرعي زمين پنهنجي جڏهن ته 470 ايڪڙ زمين ليز تي ورتل ڄاڻائي آهي. ٽندڊي الهيار مان چونڊيل سنڌ اسييمبلي جي ميمبر ضياءَ عباس وٽ مجموعي طور تي 1 هزار 82 ايڪڙ زرعي زمين آهي جنهن جي ڪل ماليت 1 ڪروڙ 73 لک ڄاڻائي وئي آهي. سيد ضياءَ عباس جي پنهنجي نالي 197 ايڪڙ، سندس گھرواري جي نالي 171 ايڪڙ سندس پٽ محمد حسن شاھ جي نالي 191 ايڪڙ سندس پٽ شاهنواز شاھ جي نالي 183 ايڪڙ ۽ سندس پٽ ثمر حسن شاه جي نالي 177 ايڪڙ، سندس پٽ نادر حسن شاھ جي نالي 163 ايڪڙ زمين آهي. ساڳئي ضلعي ٽنڊي الهيار مان چونڊيل ايم پي اي امداد علي پتافي وٽ 17 ايڪڙ زرعي زمين آهي. ڄامشوري مان سنڌ اسيمبلي جي چونڊيل ايم پي اي ملڪ اسد سڪندر وٽ 1 هزار ايڪڙ زرعي زمين آهي جنهن مان 604 ايڪڙ سندس نالي آهي جنهن جي ڪل ماليت 3 ڪروڙ 65 لک آهي جڏهن ته سندس گھرواري ۽ اولاد جي نالي 396 ايڪڙ زمين آهي جنهن جي ماليت 1 ڪروڙ 24 لک آهي. ڄامشوري مان چونڊيل ايم پي اي گيانومل وٽ 37 ايڪڙ زمين آهي. سنڌ جي وڏي وزير سيد مراد علي شاھ وٽ 466 ايڪڙ زرعي زمين آهي. سانگھڙ جي ايم پي اي وريام فقير وٽ 524 ايڪڙ زمين آهي جنهن جي قيمت 78 لک روپيا ڄاڻائي وئي آهي. سانگھڙ سنڌ اسيمبلي جي ميمبر ڄام مدد علي پنهنجي، گھرواري ۽ اولاد نالي 454 ايڪڙ زرعي زمين ظاهر ڪئي آهي. فراز ڏيري وٽ 112 ايڪڙ، شاهد ٿهيم پنهنجي 215 ايڪڙ زمين پنهنجن اثاثن ۾ ڄاڻائي آهي. ايم پي اي علي غلام 174 ايڪڙ زمين ڄاڻائي آهي. چونڊيل ايم پي اي شمس الدين وٽ 355 ايڪر زرعي زمين آهي. ميرپور خاص ضلعي مان چونڊيل سنڌ اسيمبلي جي ميمبر هري رام وٽ 139 ايڪڙ زرعي زمين آهي جنهن جي ماليت 1 ڪروڙ 29 لک ڄاڻائي وئي آهي. ساڳئي ضلعي مان چونڊيل صوبائي اسيمبلي جي ميمبر نور احمد ڀرڳڙي وٽ پنهنجي ۽ سندس گھرواري نالي 575 ايڪڙ زرعي زمين آهي. ايم پي اي طارق علي وٽ 149 ايڪڙ زرعي زمين ۽ ذولفقار علي شاھ وٽ 152 ايڪڙ زرعي زمين آهي. ٿرپارڪر ضلعي مان چونڊيل سنڌ اسيمبلي جي ميمبر عبدالرزاق راهمون والد جي 3 ايڪڙ زمين ۾ پاڻ کي حصيدار ڄاڻايو آهي. ارباب لطف الله وٽ 301 ايڪڙ، فقير شير محمد بلالاڻي وٽ 180 ايڪڙ ۽ محمد قاسم سومري وٽ 189 ايڪڙ زرعي زمين آهي. عمرڪوٽ ضلعي مان چونڊيل ايم پي اي نواب تيمور ٽالپور وٽ پنهنجي ۽ اولاد جي نالي 812 ايڪڙ زرعي زمين آهي. سيد سردار علي شاھ وٽ 174 ايڪڙ ۽ سيد علي مردان شاھ وٽ 162 ايڪڙ زرعي زمين آهي. ٺٽي مان چونڊيل سنڌ اسيمبلي جو ميمبر علي حسن زرداري 412 ايڪڙ زرعي زمين آهي. ڄام اويس بجار خان جوکيو وٽ 186 ايڪڙ ۽ ساڳئي ضلعي مان چونڊيل ايم پي اي رياض حسين شاھ شيرازي 377 ايڪڙ زرعي زمين جو مالڪ آهي. سجاول مان سنڌ اسيمبلي جي ميمبر محمد علي ملڪاڻي وٽ پنهنجي ۽ گھر ڀاتين نالي 717 ايڪڙ زرعي زمين آهي. ايم پي اي شاھ حسين شاھ 309 ايڪڙ زرعي زمين ڄاڻائي آهي. ڪراچي مان چونڊيل ايم پي اي سعيد غني کي ميرپور ساڪرو ۾ 122 ايڪڙ زرعي زمين آهي.
روسي شهري کي بچائيندڙ پاڪستاني فوجين لاءِ روس جو ايوارڊ
راولپنڊي (م ڊ) آرمي چيف جنرل قمر جاويد باجوا سان روسي سفير ملاقات ڪئي آهي، جنهن ۾ خطي جي سيڪيورٽي صورتحال تي ڳالهيون ڪيون ويون.آءِ ايس پي آر مطابق آرمي چيف جنرل قمر جاويد باجوا سان روسي سفير اليگزي ديدوف ملاقات ڪئي آهي، جنهن ۾ خطي جي سيڪيورٽي صورتحال ۽ ٻن طرفن لاڳاپن تي خيالن جي ڏي وٺ ڪئي وئي. ملاقات دوران روسي سفير پنهنجي حڪومت پاران پاڪستان جي 10 فوجي آفيسرن ۽ ٻن سپاهين کي ڏنل ايوارڊ به آرمي چيف حوالي ڪيا، ان کانسواءِ روسي سفير آرمي چيف کي دولت مشترڪا ميڊل ۽ روسي جبل چاڙهو فيڊريشن جو تعارفي خط به پهچايو.آءِ ايس پي آر مطابق فوجي جوانن کي اهي ايوارڊ جولاءِ 2018ع ۾ روسي جبل چاڙهو جي مدد تي ڏنا ويا، پاڪ آرمي ايوي ايشن انتهائي مشڪل موسمي حالتن ۾ امدادي آپريشن ڪيو هو.
نوازشريف سان ملاقاتون، بابا امڙ جي تصوير گهري آهي: مريم نواز
لاهور(م ڊ) اڳوڻي وزير اعظم نواز شريف جي ڌيءَ مريم نواز چيو آهي ته ڪوٽ لکپت جيل ۾ قيد پيءُ جا حوصلا بلند آهن. ٽي ڏينهن اڳ احتساب عدالت العزيزيه اسٽيل ملز ڪيس ۾ اڳوڻي وزير اعظم نواز شريف کي 7 سال قيد ۽ اڍائي ڪروڙ ڏنڊ جي سزا ٻڌائي هئي. نواز شريف جي درخواست تي کيس اڊيالا جيل بدران لاهور جي ڪوٽ لکپت جيل منتقل ڪيو ويو. مريم نواز 5 مهينا سوشل ميڊيا کان پري رهڻ بعد ڪجهه ڏينهن اڳ ئي ٻيهر سياسي سرگرمين ۾ متحرڪ ٿي آهي ۽ هن نواز شريف کي سزا ڏيڻ بعد ڪيترائي ٽوئيٽس به ڪيا هئا. مريم نواز ٽوئيٽر تي لکيو آهي ته اڄ پيءُ نواز شريف سان ملڻ ڪوٽ لکپت جيل وئي هئي. هن وڌيڪ چيو ته ماشا الله نواز شريف جا حوصلا بلند آهن. هن چيو ته پيءُ کان پڇيم ته گهران ڪجهه گهرايان، هن چيو ته ڪلثوم جي تصوير آڻي ڏيو.نوازشريف سان حمزه شهباز، والده شميم بيگم، احسن اقبال ۽ ٻين اڳواڻن ملاقات ڪئي.
مارڪيٽ ۾ اگهه نه هجڻ سبب آبادگارن بصر ڪڍڻ بند ڪري ڇڏيو آهي: واپاري
حيدرآباد: بصرن جي واپاري حاجي نثار پالاري ٻڌايو ته مارڪيٽ ۾ اگهه نه هجڻ جي ڪري آبادگارن بصر ڪڍڻ جو سلسلو في الحال بند ڪري ڇڏيو آهي.، ٿاڻو بولاخان ۽ ٿاڻو احمد خان ۾ 15هين ڊسمبر کان بصر نڪرڻ شروع ٿيندو آهي جيڪو اپريل تائين جاري رهندو آهي.