تنگواڻي(ن پ ا) تنگواڻي ڀرسان ڳوٺ صحبت باجڪاڻي ۾ نصير محمد باجڪاڻي جي گهر جي ڀت ڪري پئي. جنهن جي نتيجي ۾ 8 سالن جي شاهدان ، 6 سالن جي ممتازان ، 10 سالن جو سرمد باجڪاڻي ۽ عمران علي لاشاري دٻجي زخمي ٿي پيا. مقامي ماڻهن ٻارڙن کي ملبي مان ڪڍي اسپتال منتقل ڪيو، جتي ٻن ٻارڙن جي حالت ڳڻتي جوڳي هئڻ سبب لاڙڪاڻي ريفر ڪيو ويو.

ٽنڊوالھيار(رپورٽر)بڪيراشريف شھر جي ملاح پاڙي ۾ چنيسر سيال نالي شخص مٿان پنھنجي ڀائٽي کي گھر ۾ بند ڪري جنسي حوس جو نشانو بڻائڻ جو الزام هنيو ويو آهي، نينگر جي ماءُ مسمات شارو سيال ميڊيا سان ڳالھائيندي لڙڪ لاڙي زارو قطار روئيندي ٻڌايو ته پنھنجي پٽ کي جوابدار چنيسر سخت مارڪٽ ڪري جنسي حوس جو نشانو بنايو،جنھن جي دانهن بڪيراشريف پوليس کي ڏني،جن جوابدار کي گرفتار ڪرڻ بجاءِ سول اسپتال جوميڊيڪل سرٽيفڪيٽ ڏئي ٽاري ڇڏيو،ھن اعليٰ اختيارين کي اپيل ڪئي ته مون سان انصاف ڪري جوابدار چنيسر کي گرفتار ڪيو وڃي.

ٽنڊوآدم ( ن پ ا ) ٽنڊوآدم لڳ چنگچي رڪشه ڪلٽي 8 سالا ٻارڙي فوت ،5 عورتن سميت 7 ڄڻا زخمي اسپتال داخل رپوٽ موجب ٽنڊوآدم لڳ ڳوٺ احمد ٻرڙا ويجهو تيز رفتار چنگچي رڪشا بريڪ فيل ٿيڻ سبب ڪلٽي ٿي پئي جنهن جي نتيجي ۾ باگڙي خاندان جي 8 سالا ٻارڙي ديوي ڀارتي ڌيءَ ڪنيها ٿڏي تي فوت ٿي ويئي جڏهن ته 5 عورتون لڇمي زال لڇمڻ، لونگي زال ڀڳوان ، جوڳي ڌيءَ لڇمڻ ، سعيده ڌيءَ لڇمڻ، جيوڻي زال ڀيرو سميت ڪرشن ۽ ڀيرو زخمي ٿي پيا جن کي تعلقه اسپتال داخل ڪيو ويو آهي ٽنڊوآدم سٽي ۽ بي سيڪشن پوليس حادثي کان بي خبر رهيا ٻڌايو پيو وڃي ته حادثي جو شڪار باگڙي خاندان شادي جي تقريب ۾ شرڪت لاءِ شهدادپور وڃي رهيو هو ته حادثو پيش آيو

سجاول جوڻيجو ( ن پ ا) سجاول جوڻيجو لڳ عرضي ڀٽو ۾ اڍائي جريب زمين جي معاملي تان ڀٽا ڌر جي ٻن ڌرين ۾ جھيڙو ٿي پيو جنھن ۾ سروٽا ۽ لٺيون لڳڻ سبب حاجي مير داد ڀٽو جي ڌر جا ٻه ڄڻا فھد حسين ۽ وسيم ڀٽو زخمي ٿي پيا جڏھن تـ قربان ڀٽو جي ڌر جا شوڪت علي ۽ برڪت ڀٽو زخمي ٿي پيا سجاول جوڻيجو پوليس زخمين کي ليٽر ڏئي اسپتال ڏانھن نيو ويو ھوڏانھن پوليس ٻنھي ڌرين جي چئن ڄڻن کي گرفتار ڪري لاڪپ ڪري ڇڏيو آھي.

شڪارپور (رپورٽر) شڪارپور ڀرسان سنڌ واھ لنڪ روڊ تي تيز رفتار ڪار ۽ موٽر سائيڪل وچ ۾ ٽڪر ٿي پيو، جنهن نتيجي ۾ موٽر سائيڪل سوار رستم واسي 40 سالن جو غلام محمد مهر عرف ڪوڙو مھر ٿڏي تي فوت ٿي ويو، جڏهن ته هڪ ڄڻو عبدالله مهر سخت زخمي ٿي پيو جن کي پوليس ۽ ڀرپاسي جي ماڻهن آر بي يو ٽي سول اسپتال شڪارپور پهچايو، جتي پوليس اهلڪارن ٻڌائيندي چيو ته ڪار سوار رستم ڏانهن ويندڙ موٽر سائيڪل سوارن کي ٽڪر هڻي فرار ٿي ويو، جنهن جي ڳولها ڪئي پئي وڃي جڏهن ته هنن فوتي جي لاش ۽ زخمي کي اسپتال منتقل ڪيو، ٻئي پاسي آربي يو ٽي سول اسپتال انتظاميا خانپور جي حد ڄاڻائي فوتي جو لاش ضروري ڪارروائي لاءِ خانپور کڻي وڃڻ لاءِ چيو، جنھن بعد فوتي جو لاش بنا پوسٽ مارٽم جي سندس وارث روئيندا پٽيندا رستم کڻائي ويا،جڏهن ته زخمي نوجوان کي طبي امداد ڏني پئي وڃي، هوڏانهن آخري اطلاعن تائين واقعي جو ڪوبه ڪيس داخل نه ٿي سگهيو هو.

شيخ ڀرڪيو ( ن پ ا) شيخ ڀرڪيو ۾ تيز رفتار ٽرالر موٽرسائيڪل مٿان چڙهي وڃڻ جي نتيجي ۾ هڪ نوجوان فوت ٿي ويو.
ٽنڊوالهيار چوڪ تي ٽرالر سامهون ايندڙ موٽرسائيڪل مٿان چڙهي ويو، جنهن جي نتيجي ۾ موٽر سائيڪل سوار 18ورهين نور احمد ٿهيم چيپاٽجي فوت ٿي ويو.
حادثي بعد فوتي جو لاش اسپتال پهچايو ويو، جتان ضروري ڪارروائي بعد لاش وارثن حوالي ڪيو ويو، مڙهه گهر پهچڻ تي قهرام مچي ويو

شھدادڪوٽ )رپورٽر )شھدادڪوٽ جي سيپڪو آفيس ۾ ايس اي سيپڪو لاڙڪاڻو،ڊي سي ايم،آر او سيپڪو لاڙڪاڻو جي کليل ڪچھري ۾ شھرين شڪايتن جا انبار لڳائي ڇڏيا،ان ڏس ۾ ايس اي سيپڪو لاڙڪاڻو محمد خان سوھو،ڊي سي ايم سيپڪو مختيار انصاري،آر او شاھمراد جتوئي شھدادڪوٽ جي سيپڪو آفيس ۾ کلي ڪچھري ڪئي،شھرين واڌو بلن ۽ بجلي جي ھٿراڌو لوڊ شيڊنگ سميت ٻين مسئلن تي شڪايتن جا انبار لڳائي ڇڏيا،کليل ڪچھري دوران شھرين مير شاھنواز مگسي،حبدار ميرجت، قربان سومرو، ڪرم مگسي،مبين مستوئي سميت ٻين سيپڪو آفيسرن کي شڪايتون ڪندي چيو ته بجلي چوري ۾ لوڪل سيپڪو جا ملازم ملوث آھن رشوت نه ڏيڻ تي بجلي ڪاٽي ٽرانسفارمر لاھڻ سميت بيگناه ڊڊيڪشن بل لڳائي شھرين کان ڳرا بل وصول ڪيا وڃن ٿا جڏھن ته بجلي جي روزانو 12 کان 18 ڪلاڪ ھٿرادو لوڊ شيڊنگ ڪئي وڃي ٿي، ان موقعي تي ايس اي لاڙڪاڻو محمد خان سو ھو ميڊيا سان ڳالھائيندي چيو ته اينٽي ٿيفٽ پروگرام تحت ڊويزن سميت شھدادڪوٽ ۾ بجلي جي چوري ۽ ڪنڊا ڪنيڪشن جي خاتمي ۽ بقاياجات جي وصولي لاءِ مختلف ھنڌن تي کليل ڪچھريون ڪري عوام سان ٿيندڙ زيادتين واڌو بلن جي شڪايتن ٻڌڻ ۽ عوام جي شڪايتون ختم ڪرڻ لاء کلي ڪچھري ڪري رهيا آھيون ايس اي محمد خان سوھو جو چوڻ ھو ته 3 لک کان وڌيڪ آبادي رکندڙ شھر شھدادڪوٽ ۾ 16 ھزار رجسٽرڊ ڪنيڪشن آھن، جنهن مان 6 ھزار پي ڊي ڪنيڪشن ٿيل آھن، سندن جو چوڻ ھو ته پي ڊي ٿيل ڪنيڪشنن ٻيھر کولي ھلايا ويندا ـ نون ڪنيڪشنن لاء شھداڪوٽ ۾ ھڪ ھزار ميٽر ڏنا ويا آھن عوام کي گھرجي ته بجلي چوري واري سوچ کي ختم ڪري نوان ميٽر لڳرائين، ٻن مھينن اندر بجلي جي لوڊ شيڊنگ جو خاتمو آندو ويندو ان ۾ عوام کي ڀرپور سھڪار ڪرڻ گهر جي، بجلي چوري ۾ ملوث واپڊا عملدارن خلاف قانوني ڪاروائي پڻ ڪئي ويندي؛ ان موقعي تي انجنيئر سيپڪو قمبر خليل احمد چانڊيو؛ ايس ڊي او نثاراحمد شيخ؛ ايملائيز يونين اڳواڻ علي محمد جتوئي ۽ ٻيا موجود ھئا

سامارو ( ن پ ا) سامارو ۾ وڏي ماکي جي حملي جي نتيجي ۾ عورتن ۽ ٻارڙن سميت 13 ڄڻا زخمي ٿي پيا، جن کي اسپتال منتقل ڪيو ويو. درگاهه سيد بچل شاهه وٽ ويٺل ماکي رهواسين تي حملو ڪيو، جنهن جي نتيجي ۾ عزيزان، سوناري، فيروزان، ٽيڪم، رجب، پريم روھت، پيارو سوڌو 13 ڄڻا زخمي ٿي پيا، جن کي اسپتال منتقل ڪيو ويو.

ڪراچي (م ڊ) سنڌ جي وڏي وزير سيد مراد علي شاهه چيو آهي ته جي آءِ ٽي مونکي گهرائڻ کانسواءِ ئي ڏوهاري بڻائي ڇڏيو، جي آءِ ٽي 700 ماڻهن کي گهرايو پر نه مونکي گهرايو نه پارٽي قيادت جو موقف ٻڌو، هڪ نجي ٽي وي سان ڳالهه ٻولهه ڪندي وڏي وزير سيد مراد علي شاهه جو چوڻ هو ته جي آءِ ٽي رپورٽ سپريم ڪورٽ جمع ٿيڻ کان اڳ ئي ليڪ ٿي،هڪ سوال جي جواب ۾ هن چيو ته مڃون ٿا ته سنڌ بينڪ سنڌ حڪومت جي ملڪيت آهي پر ان تي منهنجو اثر ناهي، آئون بينڪ جي بورڊ آف ڊائريڪٽرز جو حصو نه آهيان، ڪابه سياسي شخصيت بينڪ جي بورڊ آف ڊائريڪٽر ۾ شامل نه هوندي آهي.

مسوڀرڳڙي:(ن پ ا) مسو ڀرڳڙي ۾ پوليس ڪارروائي ڪري ٻن منشيات فروشن کي گرفتار ڪري ورتو. ٽنڊو حيدر ۾ پوليس ڪارروائي دوران آصف قريشي کي گرفتار ڪري سندس قبضي مان 5 لٽر ڪچو شراب هٿ ڪري ورتو. هوڏانهن چيڪنگ دوران اسماعيل عرف مٺو ميمڻ کي گرفتار ڪري منشيات واريون سوپاريون هٿ ڪيو ويو. پوليس ٻنهي ڄڻن تي منشيات ايڪٽ تحت ڪيس داخل ڪري ڇڏيو.

جمال شاھ (ن پ ا)پيپلزپارٽي جي حڪومت سنڌ کي تباه ڪري ڇڏيو آهي ايندڙ ڪجه ڏينهن ۾ پيپلزپارٽي جا اهم اڳواڻ گرفتار ٿيندا،اهڙن خيالن جو اظهار فنڪشنل ليگ اڳواڻ ۽ پير آف جمال شاه سيد آصف علي شاه جيلاني ميڊيا سان ڳالهائيندي ڪيو. هن چيو ته پيپلز پارٽي جي حڪومت صرف پنهنجا پيٽ ڀرڻ ۾ پوري آهي جڏهن ته سنڌ واسين جي کيس ڪابه پرواه ناهي هن چيو ته پيپلز پارٽي سنڌ جا اهم اڳواڻ ڪرپشن جي الزام ۾ تمام جلد گرفتار ٿيندا هن چيو ته قاضي احمد تعلقي جي اڳوڻي ايم پي اي ڊاڪٽر بهادر ڏاهري ۽ ضلعي شهيد بينظير آباد جي ايم اين اي سيد غلام مصطفي شاه تي پڻ ڪرپشن جا ڪيس داخل ٿيندا جڏهن ته سنڌ ۾ جي ڊي اي جي حڪومت ٺهندي ۽ ايندڙ اليڪشن پ پ جو ڪوبه اميدوار اليڪشن ۾ حصو نه وٺندو .

ڳيريلو (ن پا) ڳيريلي ڀرسان ڳوٺ عمر ڀيو ۾ معمولي ڳالهه تان ابڙا برادري جي ٻن ڌرين ۾ جهيڙو لٺين لڳڻ سبب هڪ عورت سميت ٻه ڄڻا زخمي ٿي پيا، پيرائتي خبر موجب ڳيريلي ڀرسان ڳوٺ عمر ڀيو ۾ ابڙا برادري جي ٻن ڌرين وچ ۾ معمولي ڳالهه تان جهيڙو ٿي پيو جنهن جي نتيجي ۾ لٺين ۽ ڪهاڙين لڳڻ ڪري مسمات ڪريمت خاتون ۽ سليم ابڙو سخت زخمي ٿي پيا، ڳيريلو پوليس زخمين کي طبي امداد لاءِ ليٽر ڏيئي تعلقي اسپتال ڏوڪري روانو ڪري فياض محبت مقصود ارشاد ابڙو خلاف اين سي داخل ڪري ورتي آهي.