پيرجوڳوٺ (ن پ ا) ڪنگري لڳ اوچتو باهه لڳڻ ڪري 10 جريب ڪمند جو فصل سڙي رک، لکين روپين جو نقصان، رپورٽ موجب ڪنگري لڳ ڳوٺ گلڻ ناريجو ۾ اوچتو باهه لڳڻ ڪري آبادگار محمد گلڻ ناريجو، نذير احمد، حاجي ميهر ناريجو جو بيٺل 10 جريب ڪمند سڙي رک ٿي ويو جنهنڪري آبادگارن کي لکين روپين جو نقصان پئجي ويو، ان ڏس ۾ آبادگارن محمد گلڻ ناريجو، حاجي ميهر ۽ ٻين ٻڌايو ته اوچتو باهه لڳڻ ڪري اسان جو 10 جريب تيار ٿيل ڪند سڙي رک ٿي ويو جنهنڪري اسان جو لکين روپين جو نقصان ٿي ويو آهي، هنن سنڌ جي وڏي وزير ۽ زراعت کاتي جي صوبائي وزير کان گھر ڪئي ته ٿيل نقصان جو ازالو ڪري اسان کي مالي بدحالي کان بچايو وڃي.

پڊعيدن (ن پ ا) پڊعيدن جا روڊ ۽ پلون ٽٽي تباهه ٿي ويون، مرمتي ڪم نه ٿيڻ خلاف رهواسين ڌرڻو هنيو. پڊعيدن کان نوشھروفيروز، ڀرياروڊ، نوابشاھ ۽ ٻين شهرن ڏانهن ويندڙ روڊ ۽ انهن تي قائم پلون ٽٽي تباهه ٿي ويون آهن. رهواسين رحمت الله مري، شاهه بيگ مري ۽ ٻين نوابشاهه روڊ تي ڌرڻو هنيو، جنهن سبب ٽريفڪ معطل ٿي وئي. ان موقعي تي مظاهرين دانهيو ته حڪومتي بي حسي سبب روڊ رستا تباهه آهن، جنهن سبب حادثا به معمول بڻيل آهن. هنن مطالبو ڪيو ته روڊن ۽ پلن جي مرمت ڪرائي تڪليف کان بچايو وڃي.

مٽياري )رپورٽر)مٽياري جي ڪچي واري علائقن ۾ ناياب پکين جو شڪار نه رڪجي سگهيو،جنگلي جيوت کاتو خاموش تماشائي بڻيل آهي،ان ڏس ۾ مٽياري ٻيلي ۾ علائقي جي وڏيرن ناياب نسل جي پکين جي شڪار ۾ واڌ اچي رهي آھي،جڏھن ته غير قانوني طور ٿيندڙ شڪار کي روڪڻ لاءِ جنگلي جيوت کاتي به ڪنهن به قسم جو ڪو ٻوٽو نه ٻاريو آھي،ذريعن جو چوڻ آھي ته جنگلي جيوت کاتي جا ڪجهه عملدار به بااثرن کي شڪار جو دعوتون ڏئي گهرائين ٿا. ذريعن کان معلوم ٿيو آھي ڪچي جي علائقن جنهن ۾ پيرو جي ڍنڍ، ڇنڊڻ موري،ڳوٺ مصري جکريجا،ڳوٺ بچو ڳهيلو،بائوديرو،سيکاٽ،ڪلياڻ ٻيلو،کيبراڻي،سالارو،بٺو فاريسٽ،قادربخش کوسو، ڳوٺ يارمحمد کوسو ،ڍگهه ڍنڍ ۽ ٺارو شاھ جي پهي واري علائقن ۾ شڪار ٿين ٿا ،جن ۾ ناياب پکي جن ۾ تتر، بٽير، ڀورا تتر، ڪارا تتر،ايراني تتر، آڙي, پيڙ پکي،چيغلو پکي،نيرڳ پکي ۽ ٻين ڪيترن ئي قسمن جا پکي شامل آھن.هوڏانهن رابطي ڪرڻ تي ڊويزنل فاريسٽ آفيسر ٻڌايو آھي ته ڪيترن ئي ماڻھن ٻيلي اندر ليز تي کنيل زمينن تي پنهجيون رکون قائم ڪيل آھن باقي انهن خلاف ڪاروائي جنگلي جيوت کاتي وارا ئي ڪري سگهن ٿا.

ميان صاحب )ن پ ا (ميان صاحب ڀرسان شڪارپور کان مائٽن وٽ آيل معصوم ٻارڙي تيز بخار ۾ ڊاڪٽر جي مبينا انجڪيشن لڳڻ سبب فوت، وارثن ڊاڪٽر تي غلط انجيڪشن لڳائڻ جو الزام هنيو آهي،ان ڏس ۾ ميان صاحب لڳ ڳوٺ درزي واهه جي چانڊيا برادري جي ڳوٺاڻن علي رضا چانڊيو ۽ ٻين ميان صاحب پهچي صحافين آڏو دانهيندي چيو آهي ته اسان جي ٻن مهينن جي معصوم ننڍڙي شائنزہ ڌي ربڏنو چانڊيو ( شڪارپور واسي ) جيڪا پنهنجن وارثن سان ڳوٺ گهمڻ لاء آيل هئي،کيس تيز بخار هو ، علاج لاءِ جيڪب آباد جي هڪ خانگي ڊاڪٽر وٽ کڻي ويا سين جتي ڊاڪٽر ننڍڙي کي بخار ۾ انجيڪشن ڪئي ، اسان گهر پهتا سون ته ننڍڙي دم ڌڻي حوالي ڪيو. هنن گهر ڪئي ته غفلت ڪندڙ ڊاڪٽر خلاف ڪارروائي ڪئي وڃي،هوڏانهن معصوم ٻارڙي جي فوت ٿيڻ بعد سندس وارثن ۾ روڄ راڙو پئجي ويو.

ميهڙ(ن پ ا)ميهڙ لڳ ڳوٺ سوڀو خان مگسي ۾22 ورهين جي نوجوان سجاد پٽ خدابخش لنڊ غربت ۽ بيروز گاري کان تنگ ٿي گهر ۾ پيل زهريلي زرعي دوا پي آپگهات ڪري ڇڏيو، آپگهات ڪندڙ نوجوان کي ڳوٺ سوڀو خان مگسي جي قبرستان ۾ مٽي ماءُ حوالي ڪيو ويو آھي،خودڪشي ڪندڙ نوجون سجاد لنڊ جي والد جو چوڻ ھو ته بيروز گاري ۽ غربت سبب گهرو حالتن کان سندس پٽ ڪجه وقت کان پريشان ۽ مايوس رهندو هو ،جنهن کان پوءِ ھن گهر ۾ پيل زهريلي زرعي دوا پي ڇڏي، جنهن سبب هو فوت ٿي ويو.

کپرو(ن پ ا)کپرو پوليس جو سول اسپتال ڀر سان مينهن جي واڙي تي ڇاپو چار موٽر سائيڪلون ۽ 6 گاڏين جون نمبر پليٽون هٿ ڪري اويس قائم خاني کي گرفتار ڪيو ويو،گرفتار جوابدار جي نشاندهي تي واحد رند، اسحاق رند ۽ ماجد جٽ کي حراست ۾ وٺي حارث قائمخاني جي فرياد تي 5 جوابدارن تي ڪيس ڪري ورتو آھي ،ايس ايڇ او رابطو ڪرڻ تي ٻڌايو ته کپرو مان موٽرسائيڪل جي چورين جي وارداتن جي وڌڻ تي تفتش ڪئي ٿه ڄاڻ ملي ته هڪ گروه اوچتو سرگرم ٿي ويو آھي.خفيه ڄاڻ تي سول اسپتال ڀر سان قائم مينهن جي واڙي تي ڇاپو هنيو جنهن دورانهن چار موٽر سائين ۽ 6 کان وڌيڪ گاڏين جا نمبرپليٽ هٿ آيا آھن جوبدارن تي ڪيس داخل ڪري وڌيڪ جاچ ڪري رهيا آهيو .

سکر(بيورو رپورٽ) صوبائي وزير سيد ناصر حسين شاهه چيو آهي ته ملڪ کان ٻاهر ويٺل ملڪ دشمن شخص ٽارگيٽ ڪلنگ کي هٿي ڏئي رهيو آهي آصف علي زرداري ۽ فريال ٽالپر خلاف هٿ ٺوڪيو ڪهاڻيون ٺاهيون ويون ويون آهن. سکر هوائي اڏي تي ناصر شاهه ميڊيا سان ڳالهائيندي چيو ته ملڪ ۾ وڏي عرصي کان پوءِ امن قائم ٿيو هو، علي رضا عابدي جو قتل ملڪ جو امن خراب ڪرڻ آهي. ملڪ کان ٻاهر ويٺل ملڪ دشمن شخص ٽارگيٽ ڪلنگ کي هٿي ڏئي رهيو آهي. سندس چوڻ هو ته آصف علي زرداري ۽ فريال ٽالپر خلاف هٿ ٺوڪيون ڪهاڻيون ٺاهيون ويون آهن. فالودي واري کان وٺي جيڪي به اڪائونٽس نڪتا اُهي ڪيڏانهن ويا. جڏهن به انهن جو تعلق پ پ سان ناهي هوندو ته چيو ويندو آهي اُهي ٽريڊنگ اڪائونٽس آهن. هڪ سوال جي جواب ۾ هن چيو ته وڏي وزير خلاف ميڊيا تي بيان اچي رهيا آهن ته هن جو اومني گروپ مٿان هٿ آهي.

منهڙو(ن پ ا) منهڙو ڀرسان روهڙي ڪئنال ۾ ٻڏي ويل نوجوان جو 2 ڏينهن گذرڻ باوجود لاش هٿ نه آيو، مقامي ٽوٻن جي مدد سان ڳولا جاري آهي. ڳوٺ بودلو ڏاهري واسي 16 سالن جي عابد علي ڏاهري روهڙي ڪئنال ۾ ٽپو ڏئي ڇڏيو هو. رابطو ڪرڻ تي نوجوان جي وارثن ٻڌايو ته عابد جو ذهني توازن درست نه آهي، ٻن ڏينهن کان لاڳيتو ڳولا باوجود سندس لاش هٿ نه اچي سگهيو آهي.

ملير (ن پ ا) ملير ۾ يوسي پپري جي ڳوٺ الله بخش حمائتي جي رهواسي پيرسن الله ڏني حمائتي، ڇڇر حمائتي ملير پريس ڪلب اڳيان احتجاج ڪندي چيو آهي ته بااثر وڏيرو يوسف حمائتي ۽ سندس پٽ امين حمائتي منهنجي ٻن پوٽين رضيا، رشيده کي اغوا ڪري پاڻ وٽ قيد ڪري ڇڏيو آهي، هن پيرسن جوڙي چيو ته رشيده ۽ رضيا ٻنهي ڀينرن کي پپري مان اغوا ڪري يوسف حمايتي ڳاڙهو شهر لڳ پنهنجي ڳوٺ جهور ۾ قيد ڪري رکيو آهي، جڏھن ت بن قاسم ٿاڻي تي نينگرين جي اغوا جو ڪيس داخل ڪرائڻ باوجود جوابدارن خلاف ڪاروائي ڪرڻ کان انڪاري آهي، هنن چيو ته اسان جون نياڻيون يتيم آهن، جن جي حياتين کي خطرو آهي، اسان آءِ جي سنڌ، ايس ايس پي ملير، ايس ايس پي ٺٽو کي اپيل ٿا ڪريون ته اسانجون نياڻيون جلد بازياب ڪرايون وڃن.