ڪوٽڙي (رپروٽر) ڪوٽڙي ۾ ڳوٺ علي آباد کوسه برادري جي ٻن ڌرين ۾ سڳاوتي تڪرار تان جهيڙو ,عورتن سميت 9 ڄڻا زخمي، اسپتال منتقل،ان ڏس ڪوٽڙي ويجهو ڳوٺ علي آباد ۾ کوسه برادري جي ٻن ڌرين ۾ سڱاوتي تڪرار تان جهيڙو ,جهيڙي جي نتيجي ۾ ٻن عورتن سميت ٻنهي ڌرين جا 9 ڄڻا زخمي ٿي پيا.
زخمين ۾ هڪ ڌر جا ،الله بچايو کوسو ، بخر کوسو ، پاندي کوسو ، ٽروھ کوسو ، نواب کوسو ، عورت سفوران ۽ ملوڪه کوسو زخمي ٿي پيو ،جڏهن ته ٻئي ڌر جا عبدالغفور ۽ گل محمد کوسو زخمي ٿي پيا آهن ، زخمين کي فوري تعلقه اسپتال ڪوٽڙي منتقل ڪيو ويو آهي
هوڏانهن پوليس ڪاروائي ڪندي ٻن ڄڻن عبدالغفور ۽ گل محمد کوسو کي گرفتار ڪري ورتو آھي ، زخمي الله بچايو کوسو موجب ٻنهي ڌرين ۾ سڱاوتي تڪرار هلندڙ هو، جوابدارن اسان جي ڳوٺ مٿان حملو ڪري اسان جا عورتن سميت 7 ڄڻا زخمي ڪري وڌا آهن .
ڪوٽڙي:سڱاوتي تڪرار تان ڌريون وڙهي پيون،ٻن عورتن سميت 9 ڄڻا زخمي
ڀارت ۾ فراڊ سان ڏهاڙي 50 هزار ڊالر ڪمائيندڙ ڪال سينٽر پڪڙجي پيو
نئين دهلي (م ڊ) ڀارتي پوليس آمرڪي شهرين کي ڌوڪو ڏئي ڏهاڙي 50 هزار ڊالر ڪمائيندڙ جعلي ڪال سينٽر ۾ ڪم ڪندڙ 126 ڄڻن کي گرفتار ڪري ورتو آهي. پوليس جو چوڻ آهي ته جوابدارن کي دهلي جي علائقي نوئڊا مان گرفتار ڪيو ويو آهي، اهي جوابدار آمريڪي شهرين کي سندن سوشل سڪيورٽي نمبر ۾ مسئلو ٻڌائيندي اهو ٺيڪ ڪرڻ لاءِ رقم گهرندا هئا. نوئڊا پوليس موجب جوابدار ٽيڪس نه ڀريندڙن کي خوف ڏياري کائن رقم هڙپ ڪندا هئا. اهو ڪال سينٽر ٽن سالن کان ڪم ڪندو رهيو آهي، ڇاپي دوران 300 ڪمپيوٽرن کي پوليس پاران پڻ هٿ ڪيو ويو آهي.
ڏوڪري: گهر جي ڀت ڪرڻ سبب ھڪ ٻار فوت، 2 زخمي
ڏوڪري: معظم ۽ شيراز مڱريو زخمي، زخمين کي تعلقا اسپتال منتقل ڪيو ويو
ڏوڪري( ن پ ا) ڏوڪري باءِ پاس لڳ ڳوٺ مڱريا ۾ گهر جي ڀت ڪرڻ سبب ھڪ ٻار فوت ٿي ويو، جڏھن تھ 2 ڄڻا زخمي ٿي پيا. ڀت ڪرڻ جي نتيجي ۾ گھر اندر راند کيڏندڙ 12 سالن جو علي ڏنو چنو ڀت جي ھيٺان اچي دٻجي فوت ٿي ويو، معظم ۽ شيراز مڱريو زخمي ٿي پيا. فوتي ٻارڙي جو لاش ۽ زخمين کي تعلقي اسپتال ڏوڪري منتقل ڪيو ويو. زخمين ۾ ھڪ ٻارڙي جي حالت ڳڻتي جوڳي ھئڻ سبب لاڙڪاڻي اسپتال منتقل ڪيو ويو. واقعي جو ڪو بھ ڪيس داخل نھ ٿي سگھيو آھي. پوليس جو چوڻ آھي تھ اتفاقي واقعو پيش آيو آھي، فوتي ٻارڙي جي وارثن اڃا تائين ڪو بھ ڪيس داخل نھ ڪرايو آھي.
اسٽيو جابس جي لگزري “وينس ٻيڙي” سندس موت کانپوءِ تيار
اسٽيو جابس موت کان اڳ منصوبو ٺاهيو، سندس زندگي ۾ مڪمل نه ٿيو
80 ميٽر ڊگهي لگزري ٻيڙي تي ڪروڙين ڊالر خرچ، فرانسسي ڊزائينر تيار ڪيو
نيويارڪ (م ڊ) 2011ع ۾ پنهنجي موت کان اڳ ايپل ڪمپني جي سربراهه اسٽيو جابس پاران هڪ مهانگي ۽ لگزڙي ٻيڙي جوڙڻ جو منصوبو جوڙيو هو، جيڪو هن مشهوري فرانسسي ڊزائنرفلپ اسٽارڪ حوالي ڪيو هو. منصوبو شروع ڪرڻ جي فوري بعد اسٽيو جابس فوت ٿي ويو هو، جڏهن ته سندس لگزري ٻيڙي کي تيار ڪيو ويو هو. ٻيڙي کي شيشي ۽ اسٽيل توڙي ٻين جديد ٽيڪنالاجي ذريعي تيار ڪيو ويو آهي. وينس نالي ٻيڙي جو افتتاح سندس گهر واري ۽ ٽن ٻارن هالينڊ ۾ 2016ع ۾ لانچ ڪئي هئي، پر هاڻي ان کي آمريڪا آندو ويو آهي. 80 ميٽر ڊگهي لگزري تي ڪروڙين ڊالر خرچ ڪيا ويا آهن. ٻيڙي جي ڊزائن به ايپل کي نظر ۾ رکندي ڪئي وئي آهي ۽ ٻيڙي ايپل جي ڪنهن پراڊڪٽ جهڙي ٽيڪنالاجي سان ڀرپور پر وزن ۾ هلڪي آهي.
حيدرآباد ۾ جامني بازار ميلو شروع، هٿ جي هنرن جا اسٽال لڳي ويا: سرن جي ورکا
عورتن جي حقن لاءِ جاکوڙيندڙ تنظيم پاران هٿ جي هنرن ۽ ديسي کاڌن کي هٿي ڏيارڻ لاءِ سنڌ ميوزم ۾ ميلو لڳايو ويو
ٻهراڙين جي عورتن کي مردن جي برابر آڻڻ لاءِ کين معاشي طور سگهارو ڪرڻ ضروري آهي: تنزيلا قمبراڻي ۽ رحيمه پنهور
حيدرآباد(رپورٽ: فقير سليم) حيدرآباد ۾ ٻن ڏينهن وارو عورتن جو جامني بازار ثقافتي ميلو شروع ٿي ويو. ٻهراڙي جي عورتن جي هٿ جي هنرن، ٻهراڙي جي کاڌن ۽ ثقافتي ڪپڙن توڙين ٻين شين جي اهميت کي اجاگر ڪرڻ ۽ ٻهراڙي جي عورتن ۾ جاڳرتا پيدا ڪرڻ لاءِ عورتن جي حقن لاءِ ڪم ڪندڙ سماجي تنظيم پاران مينا بازار طرز تي جامني بازار ثقافتي ميلو سنڌ ميوزيم ۾ لڳايو ويو آهي. ميلي ۾ مختلف شين جا اسٽال لڳايا ويا هئا، رلين، ثقافتي ويس وڳن ۽ هٿ جي ٺهيل شين جي لڳايل اسٽالن تي ٻهراڙي جون عورتون ويٺل هيون، جيڪي پنهنجون ٺاهيل شيون وڪرو ڪري رهيون، ميلي ۾ آيل ماڻهو مختلف اسٽالن تان خريداري پڻ ڪندا رهيا. ميلي ۾ ٻهراڙي جي عورتن پاران ديسي کاڌن جي هڪ هوٽل به لڳائي وئي، جتي ساڳ ۽ چانورن جي ماني ملي رهي هئي. ميلي ۾ آيل ماڻهو ساڳ ۽ چانورن جي ماني وڏي شوق سان کائيندا رهيا. ميلي ۾ لوڪ گيت ۽ ڳيچ پڻ ڳايا ويا، جڏهن ته مختلف فنڪارن پاران سرن جي ورکا ڪئي وئي، ٻهراڙي توڙي شهر مان شرڪت ڪندڙ ٻارڙا لوڪ گيتن تي جهومندا رهيا. ميلي ۾ حيدرآباد ۽ ڀرپاسي جي شهرن جي عورتن وڏي انگ ۾ شرڪت ڪئي. منفرد انداز سان ڪرايل هن ثقافتي ميلي ۾ ٻهراڙي جي عورتن جو وڏو انگ شريڪ ٿيو. ميلي ۾ شريڪ پيپزپارٽي جي ايم پي اي تنزيلا قمبراڻي، سماجي اڳواڻ رحيمه پنهور، شرڪت گاهه جي ڊائريڪٽر هميرا شيخ، تنزيلا انصاري، نزهت شيرين، زيب النساءِ ملاح، رافعه بنگش، فوزيه اشرف، ثقافتي کاتي جي عائشه ۽ ٻين ڳالهائيندي چيو ته هن ميلي جو مقصد ٻهراڙي جي عورتن جي هٿ جي هنر کي هٿي وٺرائڻ، ۽ ٻهراڙي جي کاڌن پيتن جي اهميت کي اجاگر ڪرڻ سميت عورتن کي معاشي لحاظ سان پاڻ ڀرو ڪرڻ آهي، هي ميلو ٻين ميلن کان منفرد آهي. هنن چيو ته ٻهراڙي جي عورتن کي معاشي لحاظ سان طاقتور ڪرڻ لاءِ ضروري آهي ته سندن هٿ جي هنر کي هٿي وٺرائي ان کي ڪاروبار جي شڪل ڏياري وڃي. هنن چيو ته عورتن جي حقن لاءِ جاکوڙيندڙ سماجي تنظيمون چاهين ٿيون ته عورتن کي برابري جا حق ملن ۽ هر ميدان ۾ عورتون مردن سان گڏ هلي سگهن.
پيپيلزپارٽي جي سي اي سي جو اجلاس 26 ڊسمبر تي نئين ديرو هائوس تي طلب
نئون ديرو(رپورٽر) پاڪستان پيپلز پارٽي جي سينٽرل اگزيڪٽو ڪاميٽيءَ جو اجلاس نئون ديرو هائوس ۾ 26 ڊسمبر تي طلب ڪيو ويو آهي . پ پ پ سٽي نئون ديرو جي انفاميشن سيڪريٽري دليپ ڪمارموجب پاڪستان پيپلز پارٽي جي چيئرپرسن ۽ سابق وزير اعظم شهيد بنظير ڀٽو جي يارهين ورسيءَ جي موقعي تي پاڪستان پيپلز پارٽي پاران سينٽرل اگزيڪيٽو ڪاميٽيءَ جو اجلاس 26 ڊسمبر 2018 تي شام جو 6 بجي نئون ديرو هائوس ۾ طلب ڪيو ويو آهي معمول موجب اجلاس ۾ سينٽرل اگزيڪيٽو ڪاميٽيءَ جا سمورا ميمبر شرڪت ڪندا اجلاس ۾ ملڪي سياسي صورتحال جو جائزو وٺڻ سميت شهيد بينظير ڀٽو جي خدمتن کي ڀيٽا پيش ڪئي ويندي.
ڳڙهي خيرو ٽريڪ تي 9 سالن کان ٽرين نه هلي، اسٽيشن ۽ پٽڙي زبون حال
1924 ۾ وڇايل تاريخي ريلوي ٽريڪ 2010 جي مها ٻوڏ ۾ تباهه ٿيو ،9 سال گذرڻ باوجود بحال نه ٿيو
ڪيترن هنڌن تي ٽريڪ تي قبضا ٿي چڪا ،ماڻهو زمين کيڙي فصل پوکڻ لڳا ،ريلوي اختياريون ننڍ ستل
ڳڙهي خيرو (رپورٽ ساگر ڀٽي) ريلوي کاتي جي نااهلي سبب 9 سال گذرڻ باوجود ٽرين سروس ٻيھر بحال نه ٿي سگھي آهي. 2010ع واري ٻوڏ ۾ هتي ريلوي سروس بند ڪئي وئي هئي . 1924ع ۾ ٺھيل ريلوي اسٽيشن جي خوبصورت عمارت ھن وقت کنڊر ۾ تبديل ٿي وئي. مالڪي نه ٿيڻ ڪري ماڻھو ريلوي اسٽيشن جي خوبصورت عمارت کي ڊاهي سرون ، لوھي سريا، در ، دريون ۽ ٻيو قيمتي ۽ تاريخي سامان چورائي ويا، جنھن سبب شاندار ماضي رکندڙ عمارت جا هاڻ صرف نشان رھجي ويا آھن. ريلوي اسٽيشن جي مالڪي نه ھجڻ ڪري قبضا مافيا به جاڳي پئي ريلوي اسٽيشن جي عمارت، ڪوارٽرز ۽ ٽريڪ تي قبضا ڪيا ويا آهن. ريلوي لائين ھيٺيان لڳل قيمتي ڪاٺ جون پٽيون به ماڻھو پٽي کڻي ويا جن مان در ۽ درين جاچوڪاٺ ٺهرايا ويا آهن. ماڻھن زمينن تان گذرندڙ ريلوي ٽريڪ تي قبضه ڪري زرعي زمين آباد ڪري ڇڏي آھي. 1924 ۾ پھريون ڀيرو ڳڙهي خيرو ۾ ريلوي لائن وڇائي وئي، جيڪا دوداپور ، الله آباد کان رتوديرو ، بنگل ديرو کان لاڙڪاڻي تائين ھوندي ھئي، جنھن کي ڇوٽي لائين سڏيو ويندو هو. ان کانپوءِ 1932ع ڳڙهي خيرو کي تعلقي جو درجو مليو ته ريلوي لائين کي به اپ گريڊ ڪري لاڙڪاڻو کان قمبر، شھدادڪوٽ، ڳڙهي خيرو، اوسته محمد، جيڪب آباد تائين نئين لائن وڇائي وئي. ان وقت اوستا محمد به سنڌ جو حصو ھيو. ان دور ۾ ھتان ڏينھن ۾ 3 ٽرينون ھلنديون ھيون. واپاري به مال گڏي وسيلي چانور ڪراچي موڪليندا ھئا..
عوام لاءِ تفريح گاهه رهندڙريلوي اسٽيشن ڀوت بنگلو بڻجي وئي
ڳڙھي خيرو : ماضي ۾ ڳڙهي خيرو ريلوي اسٽيشن عوام لاءِ بھترين تفريح گاھ ھوندي ھئي. جيڪا هنئير تباهه ٿيڻ کانپوءَ ڀوت بنگلي جو ڏيک ڏئي رهي آهي ، ماضي ۾ هن خوبصورت عمارت ۽ باغ کي ڏسڻ لاء شام جو شھري ريلوي اسٽيشن جو رخ ڪندا ھئا. اونھاري ۾ بڙ جي گھاٽن وڻن جي ڇانوَ ماڻھن کي سڪون ڏيندي ھئي. مسافر ريلوي اسٽيشن کان شھر تائين ٽانگي تي چڙھي گھوڙي جي ٽاپن مان لطف اندوز ٿيندا هئا. ريلوي اسٽيشن ، ريل گاڏي توڙي ٽانگا ھاڻي صرف ماضي جو قصو بڻجي ويا آهن.
شهرين پاران تاريخي ٽريڪ کي ٻيهر بحال ڪرڻ جي گهُر
ريل سروس شروع ٿيڻ سان عام شهرين ۽ واپارين کي فائدو رسندو : ابرار شاهه
شيخ رشيد ٻين هنڌن تي ٽريڪ وڇائي پيو ، هتي به ڪم ٿيڻ گهرجي : اي ڊي کوکر
ڳڙهي خيرو : شھرين ريلوي واري وفاقي وزير کان مطالبو ڪيو آهي ته سنڌ جي تاريخي ريلوي ٽريڪ کي بحال ڪري اتي ٻيهر ريل هلائي وڃي .شهرين اي ڊي کوکر ، سيد ابرار شاھ ، غلام مصطفي جمالي ۽ ٻين ٫ پنھنجي اخبار ، سان ويچار ونڊيندي ٻڌايو ته شاندار ماضي رکندڙ ڳڙهي خيرو جي ريلوي اسٽيشن ھن وقت کنڊر ۾ تبديل ٿي وئي آهي. ڪڏھن ھن ريلوي اسٽيشن تي ماڻھن جو ھجوم ھوندو ھئا. ٻوڏ کان اڳ ۾ به ھتي ريل سروس ھوندي ھئي پر ٻوڏ ۾ بند ٿيل ريل سروس 9 سال گذرڻ باوجود ٻيھر بحال نه ڪئي وئي آهي جنھن ڪري ھتان جا شھري ريل جھڙي عام بنيادي سھولت کان محروم آھن . اگر ريل سروس بحال ڪئي وڃي ته واپارين کي به فائدو ٿيندو. انھن چيو ته ريلوي وارو وفاقي وزير شيخ رشيد نوان ريلوي ٽريڪ وڇائڻ ۽ نوان ريل اسٽاپ ڏئي رھيو آھي پر ڳڙهي خيرو جي بند ٿيل ريل سروس بحال ڇو نه پئي ڪئي وڃي. ھنن چيو ته ڳڙهي خيرو جي بند ٿيل ريلوي سروس بحال ڪري ھتان جي عوام کي ريل جي سھولت ڏني وڃي.
پاڻي بحران برقرار، بلوچستان کي سنڌ جي حصي مان واڌو پاڻي فراهم
تربيلا وٽ پاڻي جي سطح 1416 فوٽ رهجي وئي، سنڌو، چناب ۽ جهلم جا وهڪرا بدستور گهٽيل
سکر (رپورٽ: ممتاز بخاري) سنڌ جي ٽنهي بيراجن وٽ لاڳيتو ٻن مهينن کان پاڻي جي کوٽ برقرار آهي، جيڪا اڄ وڌي مجموعي طور 28.75 سيڪڙو ٿي وئي، جڏهن ته ڪنٽرول روم سکر پاران جاري ٿيل انگن اکرن موجب ارسا جي هدايتن تي 91ع ٺاهه جي ابتڙ نومبر مهيني جي ٻي هفتي کان بلوچستان کي سنڌ جي حصي مان سکر ۽ گڊو بيراجن وٽان واڌو پاڻي ڏياريو پيو وڃي، جيڪو هاڻ وڌائي 33.55 سيڪڙو ٿي ويو آهي. سکر بيراج جي ڪنٽرول روم جي انچارج عزيز سومرو موجب پاڻي جي اها ايلوڪيشن ارسا پاران جاري ڪئي پئي وڃي. بلوچستان کي زيرو سيڪڙو کوٽ ڏبي، سنڌ جا انگ اکر غلط آهن، بلوچستان کي اڄ به 40 سيڪڙو گهٽ پاڻي پيو ملي ٿو. سنڌ کي کوٽ 38 سيڪڙو کڻڻي آهي پر اهي 32 سيڪڙو کڻن پيا. هوڏانهن رابطو ڪرڻ تي ارسا جي ترجمان خالد رانا “پنهنجي اخبار” کي ٻڌايو ته تربيلا ۽ منگلا ڊيمن ۾ پاڻي ذخيرا گهٽجي وڃڻ بعد انهن مان پاڻي کڻت به گهٽائي وئي آهي. تربيلا ڊيم ۾ پاڻي جي سطح 1416.4 فوٽ رهجي وئي آهي“ جتان کڻت 5 هزار ڪيوسڪ گهٽائي وئي آهي. منگلا ۾ پاڻي جو مٿانهون وهڪرو هڪ هزار ڪيوسڪ گهٽجي 16700 ڪيوسڪ ٿي ويو آهي، هيٺاهون وهڪرو 20000 مان گهٽائي 15000 ڪيوسڪ ڪيو ويو آهي. گڊو بيراج وٽ مٿانهون وهڪرو 26870 ۽ هيٺاهون وهڪرو 23376 ڪيوسڪ ريڪارڊ ڪيو ويو آهي، جتي پاڻي جي کوٽ 23.25 سيڪڙو ريڪارڊ ڪئي وئي آهي، جڏهن ته گڊو وٽان بلوچستان کي 1320 ڪيوسڪ پاڻي ڏنو پيو وڃي، جيڪو 91ع واري معاهدي کان 38.50 واڌو آهي. سکر بيراج وٽ پاڻي جو وهڪرو 18240 ريڪارڊ ڪيو ويو ، جتي پاڻي کوٽ 33.30 ٿي وئي آهي، بلوچستان کي اتان کير ٿر ڪينال وسيلي 500 ڪيوسڪ پاڻي ڏنو پيو وڃي، جيڪو سندن حصي کان 27.60 سيڪڙو وڌيڪ آهي. ڪوٽڙي بيراج وٽ به پاڻي جي کوٽ 29.70 سيڪڙو ٿي وئي آهي، اتي پاڻي جي فراهمي 2760 ڪيوسڪ آهي. منگلا ڊيم ۾ پاڻي جي سطح 1110.85فوٽ رهجي وئي آهي جتي پاڻي جي آمد رڳو 5591 ڪيوسڪ آهي، اتان کڻت 21000 ڪيوسڪ ڪئي وئي آهي. پنجاب ۾ مرالا وٽان به رڳو 5513 ڪيوسڪ پاڻي فراهم ٿي رهيو آهي . ڪوٽڙي ۽ پنجند وٽ هيٺاهون وهڪرو بدستور ٻڙي آهي.
اپوزيشن جي هر ڳالهه قبول پر احتساب کان پوئتي نه هٽنداسين: وزير اعظم
اسان ڪوبه ڪيس ناهي ٺاهيو، اهي سڀ ڪيس پراڻا آهن، اپوزيشن چوي ٿي ته اسان انتقامي ڪارروائين جو نشانو بڻايون پيا
ماضي ۾ ماڻهن پئسو ٺاهڻ لاءِ حڪومت کي استعمال ڪيو ۽ ڪرپشن بچائڻ لاءِ اسيمبلين جي اوٽ ورتي ؛ لاهور ۾ تقريب کي خطاب
لاهور(م ڊ) وزير اعظم عمران خان چيو آهي ته پارٽي ليڊر شپ کي هدايت ڪئي آهي ته اپوزيشن جي هر ڳالهه مڃي وٺو، پر اهو نٿو ٿي سگهي ته اسان احتساب کان پوئتي هٽي وڃون.
لاهور ۾ پنجاب حڪومت جي سئو ڏينهن جي ڪارڪردگي تقريب کي خطاب ڪندي وزير اعظم عمران خان چيو ته اسيمبلي ۾ روز ڊرامو ٿي رهيو آهي، اپوزيشن چوي ٿي اسان انتقام وٺي رهيا آهيون، اسان ڪوبه ڪيس ناهي ٺاهيو، اهي سڀ پراڻي دور جا ڪيس آهن.
هن چيو ته پارٽي ليڊر شپ کي چئي ڇڏيو آهي ته اپوزيشن جي هر ڳالهه ٻڌو ۽ تسليم ڪيو، سعد رفيق جا پروڊڪشن آرڊر جاري ڪيو، شهباز شريف کي پي اي سي جو چيئرمين بڻائي ڇڏيو پر اهو ڪير به نه سوچي ته احتساب جي عمل کان پوئتي هٽي وينداسين.
وزير اعظم چيو ته ملڪي سالميت، مستقبل ۽ ايندڙ نسلن لاءِ ضروري آهي ته ڪرپشن ۽ بدعنواني جو خاتمو ڪيو وڃي، جڏهن ته ڪرپشن سبب ملڪ جو مستقبل به خطري ۾ پئجي ويندو آهي، اپوزيشن اهو نه چوي ته احتساب کان پوئتي هٽي وڃو.
عمران خان وڌيڪ چيو ته 22 سال اڳ ڪرپشن خلاف ئي سياست جي ميدان تي لٿو هئس، هيءَ ماڻهو پهرين حڪومت کي پئسو ٺاهڻ لاءِ استعمال ڪندا آهن ۽ پوءِ اسيمبلي کي ڪرپشن بچائڻ لاءِ استعمال ڪيو ويندو آهي پر هاڻي ائين نه ٿيندو.
هن چيو ته جڏهن ڪرپشن ٿيندي آهي ته ڀوڳڻو عوام کي پوندو آهي، جيڪڏهن بجلي، گئس مهانگي ڏينداسين ته انڊسٽري ٻين ملڪن سان مقابلو نه ڪري سگهندي، رپيو هيٺ ڪرڻ شروع ٿي ويندو ۽ ڊالر جي قيمت وڌي ويندي آهي.
هن چيو ته زمين جا 30ڪيس حل ڪرڻ ۾ 30 سال لڳي ويندا آهن، پر اسان سول پروسيجر ڪورٽس جو قانون آڻي رهيا آهيون، جنهن ذريعي هڪ سال اندر سمورن سول ڪيسن جو فيصلو ٿي ويندو.
وزير اعظم چيو ته پوليس کي سياسي بڻائڻ جو ڳرو نقصان ٿيو آهي، خاص ڪري پنجاب ۾ پوليس کي سياسي ڪرڻ جو نقصان ٿيو، سڌارا آڻي پوليس کي سياست کان پاڪ ڪنداسين.
هارين جي حوالي سان ڳالهائيندي وزير اعظم عمران خان چيو ته ڪوشش آهي ته ننڍين شين سان هارين جي مدد ڪجي، هارين کي مٿي آڻڻو پوندو ته جيئڻ 40 مڻ فصل ڏيندڙ زمين مان 80 مڻ تائين اُپت حاصل ڪري سگهجي.
نريندر مودي کي ٻڌائڻو آهي ته اوهان اقليتن سان ڪهڙو ورتاءُ ڪندا آهيو ۽ اسان ڪيئن پيش ايندا آهيون: عمران خان
اقليتن جي تحفظ جي حوالي سان ڳالهائيندي عمران خان چيو ته ڀارتي اداڪار نصير الدين شاهه جو انٽرويو پڙهي رهيو هئس ته احساس ٿيو، قائد اعظم گهڻو اڳ چيو هو هندوستان ۾ مسلمانن کي برابري جو شهري نه سمجهيو ويندو پر اسان اقليتن کي برابري جو حق ڏنو آهي.
هن چيو ته اسان ڀارت جي نريندر مودي کي پڇڻ گهرون ٿا ته اوهان پنهنجي اقليتن کي ڪهڙي ريت رکو ٿا ۽ اسان ڪهڙي ريت رکون ٿا.
وارهه ۾ بائيو ميٽرڪ سسٽم باوجود استاد نٿا اچن ، ڪيترائي اسڪول بند
ڪيترائي گرلس اسڪول به ٽيچرز نه اچڻ سبب بند ، بائيو ميٽرڪ سسٽم تي سوال اٿڻ لڳا
وارهه (رپورٽر) وارهه تعلقي اندر قائم 234بوائز پرائمري اسڪولن مان اڌ کان گهڻا اسڪول استادن جي نه اچڻ سبب بند پيل آهن ۽ استاد گهر ويٺي پگهارون کڻي رهيا آهن .بائيو ميٽرڪ سسٽم باوجود استاد اسڪولن ۾ نٿا اچن . تعلقي جي يوسي ميرپور يوسي حمل يوسي نورآباد، ڪلر ، آباد ۽ وارهه يوسي جا ڪيترائي اسڪول بند پيل آھن جڏھن ته هلندڙ اسڪولن اندر به استادن هڪ ٻئي جي سهولت خاطر ڊيوٽي جا وارا ٺاهي ڇڏيا آھن جن تحت اڌ استاد ڊيوٽي ڪندا. بائيو ميٽرڪ سسٽم ذريعي استادن کان فنگر پرنٽس وٺندڙ آفيسر هر هفتي ۾ هڪ ڀيرو وزٽ تي ويندو آھي ۽ ان ڏينهن ڪيترائي استاد اڳواٽ موڪل لکي رکي ڇڏيندا آھن ۽ ٻيا استاد لکيل درخواست ڏيکاري ڇڏيندا آهن . تعلقي جي بند پيل اسڪولن ۾ خير محمد ٻرڙو، عبدالرزاق چانڊيو شفيع محمد ڇٽو ،عبدالوارث ٽوٽاڻي، عمران آباد ڪوٽ ،سرور دري ماڇي ، مجيب گورگيج ،انورآباد ،حسين آباد محمد خان مغل سميت ڪيترائي اسڪول شامل آھن جڏھن ته گرلس پرائمري اسڪولن جي حالت پڻ ڳڻتي جوڳي آهي . تعلقي اندر 54 گرلس پرائمري اسڪولن مان 28 اسڪولن بند هجڻ جو انڪسشاف ٿيو آهي .
مٽياري ۾ ڪمند جي ٽرالي جو موٽرسائيڪل کي ٽڪر،خانپور واسي فوت،ٻيو زخمي
مقامي پوليس فوتي رامون ڪولهي جو لاش ۽ زخمي کي مٽياري اسپتال کڻائي آئي،زخمي حيدرآباد منتقل
مٽياري (ن پ ا)مٽياري ڀرسان شگر ل لنڪ روڊ تي موٽر سائيڪل ۽ ڪمند جي ٽرالي وچم ٽڪر ٿي پيو جنهن جي نتجي خانپور جو رهواسي رامون ڪولهي فوت ٿي ويو جڏھن ڪمليش ڪولهي زخمي ٿي پيو مقامي پوليس فوتي ۽ زخمي کي مٽياري اسپتال کڻائي آئي جتان ضروري ڪاروائي بعد لاش وارثن حوالي ڪيو ويو ۽ زخمي کي علاج لاءِحيدرآباد سول اسپتال موڪليو ويو.
حيدرآباد: پوليس 4 ڏينھن اڳ قتل ڪيس ۾ عورت سميت 2 ڄڻن کي گرفتار ڪري ورتو
حيدرآٻاد: ٽنڊو يوسف ٿاڻي جي پوليس ڪارروائي ڪري قتل ڪيس ۾ گھربل شاھ فيصل ۽ نورالنساءِ کي گرفتار ڪيو
جوابدارن پيرسن بندو کي قتل ڪرڻ بعد سندس لاش ٻوري ۾ بند ڪري گلشن رئيس واري علائقي ۾ اڇلائي ڇڏيو ھو
حيدرآباد (ن پ ا) حيدرآباد پوليس چار ڏينھن اڳ قتل جي ڪيس ۾ عورت سميت ٻن جوابدارن کي گرفتار ڪري ورتو. ٽنڊو يوسف ٿاڻي جي پوليس 4 ڏينهن اڳ قتل ڪيل پيرسن بندو عرف سوکا کي قتل ڪرڻ جي الزام هيٺ ھڪ عورت نورالنساءِ عرف پپي ۽ شاه فيصل کي گرفتار ڪيو آھي. پوليس موجب جوابدارن پيرسن بندو کي قتل ڪرڻ بعد سندس لاش ٻوري ۾ بند ڪري گلشن رئيس واري علائقي ۾ اڇلائي ڇڏيو هو.
غوثپور ۾تيغاڻي بجاراڻي تڪرار،هٿياربندن هٿان هڪ ڄڻو قتل
دوست علي بجاراڻي کي موٽرسائيڪل سوارن ڪلاشنڪوف جا برسٽ هنيا
برسٽ لڳڻ سبب دوست علي سخت زخمي،اسپتال نيئندي فوت ٿي ويو
غوثپور(ن پ ا)غوثپور ٿاڻي جي حد انڊس هائوي ڳوٺ بصر لاڙو ڀرسان شير ڳڙه بجاراڻي جو رهواسي 35 سالا نوجوان دوست علي بجاراڻي تيغاڻي برادري جي هٿياربندن هٿان بيدردي سان قتل. ٿي ويو،ان ڏس ۾ تيغاڻي بجاراڻي برادري جي قبائلي تقرار تان غوثپور ويجهو شير ڳڙه بجاراڻي جو رهواسي نوجوان دوست علي بجاراڻي شهر کان واپس ڳوٺ طرف وڃي رهيو هو ته تيغاڻي برادري جي هٿياربندن موٽر سائيڪل تي پيڇو ڪري ڳوٺ بصر اوڳاهي لاڙو ڀرسان نوجوان دوست علي بجاراڻي کي ڪلاشن ڪوف جو برسٽ هڻي گولين جو کاڄ بڻائي ڇڏيو. علائيقي واسين ۽ غوثپور پوليس. دوست علي بجاراڻي کي زخمي حالت م غوثپور اسپتال آندو پئي ويو ته رستي ۾ زخمن جا سور نه سهندي دوست علي بجاراڻي فوت ٿي ويو فوت ٿيل جو لاش پوسٽ مارٽم ڪرائڻ لاءِغوثپور رورل هيلٿ سينٽر آندو ويو جتي فوتي دوست علي بجاراڻي جو پوسٽ مارٽم ڪرڻ بعد لاش وارثن حوالي ڪيو ويو .
امن سڀني جي مفاد ۾ آهي، دوستي جي آڇ کي ڪمزوري نه سمجهيو وڃي: آرمي چيف جنرل قمر جاويد باجوه
آرمي چيف ڪراچي جي نيول اڪيڊمي ۾ پاسنگ آئوٽ پريڊ ۾ شرڪت ڪئي: آءِ ايس پي آر
پاڪستان اڻکٽ قربانين سان امن حاصل ڪيو آهي، دهشتگردن جو خاتمو اڃا باقي آهي
ڪراچي( رپورٽر) آرمي چيف جنرل قمر جاويد باجوه چيو آهي ته امن سڀني جي مفاد ۾ آهي ۽ پاڪستان جي دوستي جي آڇ کي ڪمزوري نه سمجهيو وڃي.
آءِ ايس پي آر موجب آرمي چيف جنرل قمر جاويد باجوه ڪراچي جي نيول اڪيڊمي ۾ پاسنگ آئوٽ پريڊ جو معائنو ڪيو.
ان موقعي تي آرمي چيف جنرل قمر جاويد باجوه چيو ته پاڪستان اڻکٽ قربانين کانپوءِ امن حاصل ڪيو آهي.
هن چيو ته هٿياربند فوج ۽ قانون لاڳو ڪندڙ ادارن امن جي بحالي لاءِ وڏي پئماني تي قربانيون ڏنيون آهن ۽ پنهنجا سر گهوري ملڪ ۾ امن قائم ڪرايو.
جنرل قمر جاويد باجوه جو چوڻ هو ته جديد ٽيڪنالاجي جنگ جو انداز تبديل ڪري ڇڏيو، دهشتگردي جو مڪمل خاتمو ڪرڻ باقي آهي.
پاڪ فوج جي سربراهه چيو ته پاڪستان جي نئين حڪومت ڀارت طرف به دوستي جو هٿ وڌايو آهي، ڳالهيون ئي سمورن مسئلن جو واحد حل آهن، جڏهن ته دوستي جي آڇ کي ڪمزوري نه سمجهيو وڃي.
دادو اسپتال ۾ خالي جاين لاءِ ٽيسٽ ،650 اميدوارن جي شرڪت
اسپتال ۾40 ڊسپينسر،10 اوٽي ،10 ليبارٽري ٽيڪنيشن جون پوسٽو خالي
علائقي جا چونڊيل نمائيندا پنهنجن ماڻهن کي ڀرتي ڪرائڻ لاءِ سرگرم
دادو (رپورٽر) سول اسپتال دادو ۾ 40 ڊسپينسر ، 10 ، او ٽي ٽيڪنيشن ، 10 ليبارٽري ٽيڪنيشن ۽ 5 ، ايڪسري ٽيڪنيشن جي پوسٽن لاء 650 کان وڌيڪ اميدوار ٽيسٽ ڏيڻ لاء ويٺا ، انهي دوران سيڪيورٽي جا انتظام انتهائي سخت ڪيا ويا جڏهن ٻه سو کان وڌيڪ اميدوارن کي درخواستون ۽ ڪاغذ جمع نه ڪرڻ تي ٽيسٽ ۾ ويهڻ نه ڏنو ويو ، ٽيسٽ ڏيڻ دوران هڪ ٻئي سان ڳالهائڻ تي 6 ڄڻن کي ٽيسٽ مان اٿاري ٻاهر ڪڍي ڇڏيو ٽيسٽ ڏيندڙ اميدوار کي 60 سوالن تي آبجيڪٽو پيپر ڏنو ويو ، ان سلسلي ۾ سول سرجن ڊاڪٽر عبدالرزاق جوڻيجو ٻڌايو ته ڊسپينسر ، ليبارٽري ٽيڪنيشن ، او ٽي ٽيڪنيشن ۽ ايڪسري مشين آپريٽر 65 پوسٽن لاء 650 ، اميدوار ٽيسٽ ۾ ويٺا آهن ٻئي طرف ذريعن جو چوڻ آهي ته 40 کان وڌيڪ سيٽون چونڊيل نمائيندن پاران ڏنل لسٽ وارن اميدوارن کي ڏيڻ جو فيصلو ڪيو ويو آهي.