خيرپور (رپورٽر ) ثقافت کاتي حڪومت سنڌ طرفان خيرپور جي تاريخ، فطري ۽ مختلف ثقافتي رنگن کي اجاگر ڪرڻ لاءِ ٻن ڏينهن وارو ثقافتي ميلو اوپن ايئر ٿيٽر آرٽس ڪائونسل خيرپور ۾ شروع ٿي ويو آهي، جنهن ۾ هٿ جي هنر جي نمائش، راڳ رهاڻ ۽ اسٽيج ناٽڪ پيش ڪيو ويندو. ميلي جو افتتاح سنڌ جو اڳوڻو وڏو وزير سيد قائم علي شاهه جيلاني ڪندو. ميلي جي پهرين ڏينهن تي هٿ جي هنر جي نمائش سان گڏ ٻيا مختلف اسٽال لڳايا ويندا جڏهن ته شام جو اسٽيج ناٽڪ “فنا ڪيو فراق” پيش ڪيو ويندو، جنهن بعد راڳ رهاڻ جي محفل منعقد ڪئي ويندي جنهن ۾ سنڌ جا ناليوارا راڳي سرن جي ورکا ڪندا. ميلي جي ٻئي ڏينهن تي هٿ جي هنر جي نمائش، مختلف اسٽال لڳائڻ ۽ راڳ رنگ جي محفل کان پوءِ ميلو پنهنجي پڄاڻيءَ تي پهچندو. ان سلسلي ۾ ميلي جا سمورا انتظام مڪمل ڪيا ويا آهن.
خيرپور ۾ مختلف ثقافتي رنگن کي اجاگر ڪرڻ لاءِ ٻن ڏينهن وارو ثقافتي ميلو شروع
ٻن ڏينهن تائين جاري رهندڙ ميلي جو افتتاح سنڌ جو اڳوڻو وڏو وزير سيد قائم علي شاهه ڪندو
ثقافتي ميلي ۾ هٿ جي هنر جي نمائش، راڳ رهاڻ، اسٽيج ناٽڪ پيش ڪيا ويندا، انتظام مڪمل
“نوجوان کي ناحق باندي ڇو بڻايو” خيرپور ۾ ايس ايڇ او سوڌو پوليس اهلڪار عدالت طلب
خيرپور جي عدالت ڀرڳڙي پاڙي جي پيرسن عورت پٽ کي باندي بڻائڻ خلاف درخواست تي نوٽيس ورتو
عدالت شاهه لطيف ٿاڻي جي ايس ايڇ او ۽ ٻين اهلڪارن کي طلب ڪري ورتو
خيرپور (رپورٽر) فرسٽ ايديشنل سيشن جج شاهد احمد اعواڻ جي عدالت خيرپور ۾ ڀرڳڙي پاڙي جي رهواسڻ پيرسن عورت مسمات نظيران خاتون زال محمد عمر رند جي نوجوان پٽ گل محمد عرف ڪلو رند کي ناحق باندي بڻائڻ واري معاملي جو نوٽيس وٺندي شاهه لطيف ٿاڻي جي ايس ايڇ او، هيڊ ڪانسٽيبل قربان علي جمالي ۽ هيڊ ڪانسٽيبل گلشن جسڪاڻي خلاف نوٽيس جاري ڪندي ناحق باندي بڻايل نوجوان کي عدالت ۾ پيش ڪرائڻ جو حڪم جاري ڪري ڇڏيو آهي. عدالت اهڙي ڪاروائي مسمات نظيران خاتون رند جي درخواست ملڻ بعد ڪئي
خيرپور جي عدالت منشيات ڪيس ۾ هڪ جوابدار کي اشتهاري قرار ڏئي ڇڏيو
خيرپور (رپورٽر)سيشن جج مس صدف کوکر جي عدالت پيرڳوٺ ٿاڻي جي هڪ منشيات جي ڪيس ۾ جوابدار ڄاڻايل ڳوٺ غلام محمد جاگيراڻي جي رهواسي عرض محمد عرف گنگو ولد دوست محمد جاگيراڻي کي اشتهاري قرار ڏئي ڇڏيو آهي. هوڏانهن سيڪنڊ سول جج سجاد نعيم گدي جي عدالت پڻ ٽنڊومستي ٿاڻي جي هڪ پوليس مقابلي جي ڪيس ۾ جوابدار ڄاڻايل ڳوٺ ڦوڙي چانڊيو جي رهواسي چانڊيه برادري جي رشيد عرف نظير ولد حبيب الله، محمد ابراهيم ولد رمضان ۽ سجاد ولد خير محمد چانڊيو خلاف پڻ قلم 87/88 جي ڪاروائي ڪندي کين اشتهاري قرار ڏئي سندن ملڪيت ضبط ڪرڻ جو حڪم جاري ڪري ڇڏيو آهي.
آرمي چيف 14 دهشتگردن کي موت جي سزا جي منظوري ڏئي ڇڏي
انهن دهشتگردن جي ڪاررواين ۾ 13 فوجي ۽ 3 عام شهري شهيد ٿيا: آءِ ايس پي آر
فوجي عدالتن طرفان وڌيڪ 20 دهشتگردن کي به قيد جي سزا ڏني وئي
راولپنڊي ( م ڊ ) آرمي چيف فوجي جوانن ۽ عام شهرين کي نشانو بڻائيندڙ 14 دهشتگردن جي موت جي سزا جي منظوري ڏئي ڇڏي، آءِ ايس پي آر موجب موت جي سزا ماڻيندڙ دهشتگرد سنگين ڪاررواين ۾ ملوث هئا، جن ۾ 16 ڄڻا شهيد ٿي ويا، انهن دهشتگردن جو نشانو بڻجندڙن ۾ 13 فوجي ۽ 3 عام شهري شامل آهن، آءِ ايس پي آر جو چوڻ هو ته سزا ماڻيندڙ دهشتگردن مواصلات جي نظام، پوليس اسٽيشنز ۽ ادارن کي به تباهه ڪيو، انهن وٽان هٿيار ۽ ڌماڪيدار مادو به هٿ آيو هو، آءِ ايس پي آر موجب فوجي عدالتن طرفان وڌيڪ 20 دهشتگردن کي به قيد جي سزا ٻڌائي وئي
ٻن مهينن دوران بيماري ورتل 10 ماڻهو حياتيون وڃائي ويٺا
چڪاس واري ٽيسٽ جي سهولت ختم هجڻ سبب رهواسي پريشان
ميرپورماٿيلو : ميرپورماٿيلو ڀرپاسي گذريل ٻن مھينن ۾ ڪاري ڪامڻ وگھي 10 کان وڌيڪ ماڻھو مري ويا آھن جنھن ڳوٺ دريا گبول جو 20 سالن جو نوجوان صدام گبول ـ ڳوٺ گلاب بوزدار جو 22 ورھين جو نديم بوزدار ـ جروار جو رھواسي نانڪ رام ـ وارث علي گبول ـ محمد گبول ۽ ٻيا شامل آھن.ميرپورماٿيلو سول اسپتال ۾ ڪاري ڪامڻ جي چڪاس ۽ مرض جي مقدار چيڪ ڪرڻ لاء ٿيندڙ پي سي آر ٽيسٽ پڻ نومبر 2017 کان بند ڪئي وئي آھي ٽيسٽ مھانگي ھجڻ جي ڪري سوين مريض ٽيسٽ ڪرائڻ کان رھجي ويا آھن جڏھن ته مرض جي تشخيص ڪرڻ ڏکيو ٿي ويو آھي.
گهوٽڪي ۾ 24 هزار ماڻهو ڪاري ڪامڻ ۾ مبتلا ،4 مهينن کان سرڪاري دوائون بند
ضلعي اندر ميرپورماٿيلو، گهوٽڪي ،اوٻاوڙ جي اسپتالن ۾ هيپاٽائيٽس سينٽرز قائم ٿيل ،24 هزار مريض رجسٽرڊ ٿيل
سمورن سينٽرز تي گذريل چار مهينن کان سرڪاري دوائون نه آيون ،اڳ ٿيل ڪورس به اثر وڃائڻ لڳو ، مريض پريشان
ميرپور ماٿيلو (رپورٽ برڪت ميراڻي ) گھوٽڪي ضلعي اندر ھيپاٽائيٽس بي ـ سي ـ ڊي جي مرض ۾ خطرناڪ حد تائين واڌ ٿي وئي آهي ، سرڪاري انگن اکرن موجب ضلعي ۾ 20 هزار ماڻهو هن مرض ۾ بتلا آهن ، سرڪار طرفان انهن کي ملندڙ دوائون گذريل 4 مهينن کان بند آهن جن سبب انهن ماڻهن جون زندگيون داءُ تي لڳل آهن . ميرپورماٿيلو، ڏھرڪي ، اوٻاوڙو سول اسپتال ۾ قائم ھيپاٽائيٽس سينٽر تي مرض ۾ مبتلا مرد توڙي عورت رجسٽرڊ مريضن جو تعداد 24000 کان مٿي آھي. ميرپورماٿيلو 17500 مريض سي ۾ مبتلا آھي بي جي مريضن جو تعداد 1400 آھي جن مان 2058 مريض اھڙا آھن جن پنھنجو علاج مڪمل نه ڪرايو آھي ھن مھل ميرپورماٿيلو سينٽر تي ھيپاٽائيٽس سي جا 230 مريض علاج ھيٺ آھن جڏھن ته بي جا 430 مريض آھن جن جو علاج ھلندڙ آھي ان کان علاوه ھڪ ھزار کان مٿي اھڙا مريض آھن جيڪي بچاء وارو ڪورس ڪرائڻ جي انتظار ۾ آھن پر چار مھينن کان سنڌ حڪومت طرفان علاج بند ڪيو ويو آھي جنھن جي ڪري انھن مريضن جون زندگيون داء تي لڳل آھن ضلعي گھوٽڪي جي سول اسپتال گھوٽڪي ۾ قائم سينٽر تي پڻ رجسٽرڊ مريضن جو تعداد 3500 آھي گذريل 6 مھينن ۾ انھن رجسٽرڊ مريضن جو تعداد 1800 کان مٿي آھي ھن مھل تايئين سي جي 777 ۽ بي جي 352 مريضن پنھنجو علاج مڪمل ڪرايو آھي جڏھن ته سوين اھڙا مريض آھن جيڪي ان مرض ۾ مبتلا ھجڻ باوجود ڪورس نه ملڻ ڪري زندگي ۽ موت سان جنگ ڪري رھيا آھن اوٻاوڙو تعلقي ۾ ھيپاٽائيٽس ۾ مبتلا مريضن جو تعداد 620 بي جي مريضن جو تعداد 95 آھي ان سينٽر تي پڻ چارمھينن کان علاج نه ملڻ ڪري سوين مريض علاج لاء رلي رھيا آھن.
شڪارپور۾ عورت سوڌو ٽن جوابدارن کي 75 ڪلو چرس رکڻ تي عمر قيد جي سزا ملي وئي
ڊسٽرڪٽ اينڊ سيشن جج روشن علي، سندس زال بختاور ڪلاڪ ۽ اوشاق ڦلپوٽو کي سزا ٻڌائي
ڪائنات تُنيو کي آزاد ڪرڻ جو حڪم، ڏنڊ نه ڀرڻ تي جوابدار وڌيڪ 6-6 مهينا قيد ڪاٽيندا
شڪارپور(رپورٽ) ڊسٽرڪٽ اينڊ سيشن جج شڪارپور چرس رکڻ جو ڏوهه ثابت ٿيڻ تي ھڪ عورت سوڌو 3 جوابدارن کي عمر قيد ۽ پنج پنج لک رپيا ڏنڊ جي سزا ٻڌائي ڇڏي، جڏهن ته ڪيس ۾ نامزد عورت کي ڏوهه ثابت نه ٿيڻ تي آزاد ڪيو ويو آهي. شڪارپور پوليس 2017ع ۾ سلطان ڪوٽ ٿاڻي جي حد سومرا واھي ڀرسان مھراڻ ڪار ۾ ويندي ٻن عورتن سميت چئن ڄڻن کي 75 ڪلو چرس رکڻ جي ڏوهه ۾ گرفتار ڪيو هو. جن ۾ لاڙڪاڻي جا رھواسي زال مڙس روشن علي ۽ بختاور ڪلال، ڪائنات تنيو ۽ اوشاق ڦلپوٽو شامل ھئا. عدالت عورت ڪائنات تنيو مٿان چرس رکڻ جو ڏوھ ثابت نه ٿيڻ تي کيس آزاد ڪيو ويو آھي. عدالتي حڪم ۾ چيو ويو آهي ته ڏنڊ نه ڀرڻ جي صورت ۾ جوابدارن کي وڌيڪ 6-6 مهينا قيد ڪاٽڻي پوندي.
سکر: سي آءِ اي پوليس جو مقابلو ڪوڙو قرار، گرفتار شخص باعزت بري
پوليس 2 مهينا اڳ قربان ميراڻي کي مقابلي دوران گرفتار ڪرڻ جي دعويٰ ڪئي هئي
پوليس قربان ميراڻي جي قبضي مان ڪلاشنڪوف هٿ اچڻ جي به دعويٰ ڪئي هئي
سکر (رپورٽر) سي آءِ اي پوليس جو مقابلو ڪوڙو قرار، 2 مهينا اڳ گرفتار ڪيل شخص باعزت بري، سکر جي سيشن ڪورٽ ۾ قربان ميراڻي جي گرفتاري بابت پوليس جي درخواست تي ٻڌڻي ٿي، عدالت سي آءِ اي پوليس جي مقابلي کي ڪوڙو قرار ڏيندي گرفتار قربان ميراڻي کي باعزت بري ڪري ڇڏيو، سي آءِ اي پوليس 2 مهينا اڳ سي آءِ اي سکر پوليس قربان ميراڻي نالي شخص کي مقابلي دوران گرفتار ڪرڻ ۽ سندس قبضي مان ڪلاشنڪوف هٿ اچڻ جي دعويٰ ڪئي هئي، جنهن بعد مٿس جهانگڙو ۽ ايئرپورٽ ٿاڻن تي ڪيس داخل ڪيا ويا
يو اي اي پاران اسٽيٽ بينڪ ۾ 3 ارب ڊالر جمع ڪرائڻ جو اعلان
رقم جمع ڪرائڻ جو مقصد پاڪستان جي مالي صورتحال ۾ بهتري آڻڻ آهي: يو اي اي
ڏکي گهڙي ۾ ساٿ ڏيڻ تي يو اي اي سرڪار جا ٿورائتا آهيون: عمران خان
ڪراچي ( م ڊ ) گڏيل عرب امارتن پاڪستان کي 3 ارب ڊالر ڏيڻ جو اعلان ڪري ڇڏيو، وزيراعظم ڏکي گهڙي ۾ ساٿ ڏيڻ تي يو اي اي سرڪار جا ٿورا مڃيا، ابوظهبي فنڊ فار ڊولپمينٽ موجب ايندڙ ڪجهه ڏينهن اندر اسٽيٽ بينڪ ۾ 3 ارب ڊالر جمع ڪرايا ويندا، جنهن جو مقصد پاڪستان جي مالي صورتحال ۾ بهتر آڻڻ آهي، يو اي اي طرفان 3 ارب ڊالر جمع ڪرائڻ بعد اسٽيٽ بينڪ جا ذخيرا 11 ارب ڊالر کان وڌي ويندا، واضح رهي ته ابوظهبي فنڊ فار ڊولپمينٽ پاڪستان ۾ پهريان ئي 8 منصوبن جي فنڊنگ ڪري رهيو آهي، جن جي مجموعي لاڳت ڏيڍ ارب درهم آهي، ٻئي پاسي وزيراعظم عمران خان ٽوئيٽ ذريعي يو اي اي سرڪار جا ٿورا مڃيا ۽ چيو ته يو اي اي ڏکي گهڙي ۾ پاڪستان جو ساٿ ڏنو، اهو قدم اسان جي عزم ۽ دوستي جي عڪاسي ڪري ٿو، جيڪو سالن کان قائم آهي
شاگردياڻين ۾ منشيات جو واهپو 75 سيڪڙو وڌي ويو: وفاقي وزير شيرين مزاري
اسلام آباد ( م ڊ ) انساني حقن واري وفاقي وزير شيرين مزاري چيو آهي ته اسلام آباد جي نجي اسڪولن ۾ شاگردياڻين طرفان منشيات جي استعمال ۾ 75 سيڪڙو واڌ ٿي آهي، قومي اسيمبلي ۾ ڳالهائيندي شيرين مزاري چيو ته اسلام آباد جي نجي اسڪولن ۾ شاگردياڻين طرفان منشيات جو استعمال ڪرڻ تمام اهم مسئلو آهي، ائين ته نه ٿا ڪري سگهون ته سڀ ڪجهه ڏسون ۽ پوءِ لڪائي ڇڏيون، وفاقي وزير چيو ته هڪ غلط فهمي پيدا ٿي هئي ته 75 سيڪڙو شاگردياڻيون منشيات استعمال ڪري رهيون آهن، ائين بلڪل ناهي، سروي ۾ اهو ظاهر ٿيو آهي ته شاگردياڻين طرفان منشيات جي استعمال ۾ 75 سيڪڙو واڌ ٿي آهي ۽ اهو مسئلو تمام وڏو آهي، حل ٿيڻ گهرجي.
سيتاروڊ ۾ شارٽ سرڪٽ سبب دڪان کي باهه ،لکين روپين جو نقصان
باهه سبب دڪان ۾ پيل واشنگ مشين ، پڪا ،ٽي وي ۽ ٻيون سامان رک
لکين روپين جو نقصان ٿيو آهي ،مدد ڪئي وڃي : متاثر دڪاندار جي اپيل
سيتارو(رپورٽر)سيتاروڊ جي مُکُ شاهي بازار دڪان کي شارٽ سرڪٽ سبب باهه لڳي وئي جنهن سبب دڪان ۾ پيل لکين روپين جو سامان سڙي رک ٿي ويو ، دڪاندار مدد جي اپيل ڪئي آهي .باهه سبب دڪان ۾ موٽر وائيڊنگ جون تارون،موٽر،واشنگ مشين،پکا،سولر ٽارچ ۽ ٻيو سامان سڙي رک ٿي ويو . متاثر دڪاندار زاهد حسين ميمڻ ٻڌايو ته رات ٻارهين وڳي بجلي ايندي آھي ممڪن آھي ته ان مان باھ لڳي هجي پر حيرت آھي ته بازار ۾ چوڪيدار مقر ٿيل آھي جنهن کي به ڪا خبر نه پئي جيڪو بر وقت اطلاع ڏي ۽ وڌيڪ ٿيندڙ نقصان بچائي سگهي ها .هن چيو ته 20 لکن جو نقصان ٿيو آھي سرڪار کي اپيل آهي ته مدد ڪئي وڃي ..
هيڊ ڪينسر کي روڪڻ ۾ مدد ڪري ٿي: تحقيق
هيڊ ڪينسر جو سبب بڻجندڙ مادي کي روڪي ٿي: چلي ۾ تحقيق
هيڊ کي دل جي بيمارين، ڪوليسٽرول خلاف به ڪم آڻي سگهجي ٿي
سينتياگو (دلچسپ) هيڊ کي ڪيترن ئي دوائن ۾ ڪم آندو ويندو آهي، پر چلي ۾ ڊاڪٽرن نئين تحقيق مان ثابت ڪيو آهي ته هيڊ ڪينسر کي وڌيڪ ڦهلجڻ ۾ پڻ ڪارآمد آهي. چلي ۾ ڊاڪٽرن هڪ تحقيق ڪئي جنهن ۾ نينو اميولشن Nanoemulsion ذريعي هيڊ تي تحقيق ڪئي جنهن دوران ڪينسر جي ڦهلاءَ ۾ هيڊ مددگار ثابت ٿي. سائسندانن پاران Fundacion Imagen de Chile ايونٽ دوران ان تحقيق کي پيش ڪيو، سائنسدانن پاران هيڊ ذريعي جانورن مٿان تجربا ڪيا، جنهن ۾ هيڊ اينٽي ڪينسر طور ڪم ڪيو ۽ ڪينسر جو سبب بڻجندڙ سيلن کي ڦهلجڻ کان روڪڻ ۾ حيراني طور 25 سيڪڙو ڪارڪردگي ڏيکاري. چلي جي سائنسدانن موجب هيڊ جا سائيڊ افيڪٽس به نه هجڻ جي برابر آهن. ڊاڪٽرن جو چوڻ آهي ته هيڊ کي کاڌي طور، يا ڦٽ مٿان ڪريم جيان استعمال به ڪري سگهجي ٿو.
”تازن ڄاول ٻارن جون فوتگيون روڪڻ لاءِ هنگامي قدم کنيا وڃن“ قومي اسيمبلي ۾ ٺهراءُ منظور
قومي اسيمبلي جي اجلاس ۾ ٻارن جي فوتگين کي روڪڻ بابت ٺهراءُ اتفاق راءِ سان منظور ڪيو ويو
ٻارن کي صاف پاڻي، خوراڪ ۽ علاج سوڌو ٻيون بنيادي سهولتون مهيا ڪيون وڃن: ٺهراءُ ۾ مطالبو
اسلام آباد: قومي اسيمبلي تازن ڄاول ٻارن جون فوتگيون روڪڻ لاءِ ٺهراءُ منظور ڪري ورتو، انساني حقن جي ڏينهن جي حوالي سان قومي اسيمبلي ۾ گڏيل ٺهراءُ پيش ڪيو ويو، جيڪو قومي اسيمبلي منظور ڪري ورتو، ٺهراءُ جي متن ۾ چيو ويو آهي ته تازن ڄاول ٻارن جون فوتگيون روڪڻ لاءِ قدم کنيا وڃن، ماءُ ۽ تازي ڄاول ٻار جي صحت لاءِ صاف پاڻي، خوراڪ، علاج ۽ تحفظ جا قدم کنيا وڃن، ٺهراءُ ۾ مطالبو ڪيو ويو ته مائرن ۽ ٻارن خلاف هر قسم جا ڏوهه روڪيا وڃن
سُپريم ڪورٽ ڪراچي ۾ متروڪ ملڪيتن تي قبضا فوري ختم ڪرائڻ جو حڪم ڏئي ڇڏيو
ڪراچي رجسٽري ۾ ٻڌڻي،عدالت پاران تاريخي ملڪيتن تان قبضا ختم نه ڪرائڻ تي ڪاوڙ ظاھر
قبضا ڪندڙ ڪامورن خلاف ڪارروائي جو حڪم، قبضن وقت حڪومت ڇا پئي ڪيو؟ عدالت
ڪراچي (رپورٽر) سپريم ڪورٽ ڇڏيل عمارتن تان قبضا ختم نه ڪرائڻ تي سخت ڪاوڙ جو اظهار ڪندي اهي قبضا فوري طور تي ختم ڪرائڻ جو حڪم ڏنو آهي .سپريم ڪورٽ ڪراچي رجسٽري ورهاڱي وقت هندون پاران ڇڏيل تاريخي ملڪيتن تي قبضن بابت ڪيس جي ٻڌڻي ٿي . عدالت چيو ته جنهن وقت انهن ملڪيتن تي قبضا ٿي رهيا هئا ته حڪومت ڇا ڪري رهي هئي ..؟؟ رڳو لياري اندر 17 اهڙين عمارتن تي قبضا ڪري اهي وڪرو ڪيا ويا ،. عدالت حڪم ڏنو ته شهر اندر جن به ڇڏيل ملڪيتن تي قبضا ٿيل آهن اهي فوري طور تي ختم ڪرايا وڃن ۽ انهن قبضن ۾ جيڪي ڪامورا ملوث آهن انهن خلاف به سخت ڪارروائي ڪئي وڃي ، عدالت چيو ته سنڌ بلڊنگ ڪنٽرول اٿارٽي جا ڪرپٽ ڪامورا به ان ۾ ملوث اهن انهن خلاف به ڪارروائي ڪئي وڃي . ان موقعي تي عدالت کي آگاهه ڪيو ويو ته لياري ۾ گينگ وار دوران انهن ملڪيتن تي قبضا مافيا قبضو ڪري انهن ملڪيتن کي وڪرو ڪري ڇڏيو .هاڻ اتي ڪيترائي خاندان آباد اهن ،جنهن تي عدالت چيو ته ڪنهن به صورت ۾ قبضن کي برداشت نه ڪبو ،اهي قبضا ختم ڪرايا ُڇن ۽ اتي جيڪي ماڻهو آباد آهن انهن کي ٻئي هنڌ منتقل ڪيو وڃي .
12 مئي سانحو: ڪراچي جي دهشتگردي ٽوڙ عدالت اي ڪلاس ڪيل 65 ڪيسز مان 11 کيس ٻيهر کولي ڇڏيا
11 ئي ڪيس دهشتگردي ٽوڙ عدالت ٽو منتقل ڪيا ويا، سڀاڻي ٻڌڻي ٿيندي
12 مئي سانحي جي چئن ڪيسن ۾ ميئر وسيم اختر ۽ ٻين تي فرد جرم لاڳو ٿي چڪو
ڪراچي (رپورٽر) 12 مئي سانحي جي اي ڪلاس ڪيل 65 ڪيسن مان 11 ڪيس ٻيهر کلي ويا، اي ٽي سي ٽو ۾ سڀاڻي ٻڌڻي ٿيندي، ڪراچي جي دهشتگردي ٽوڙ عدالت 12 مئي سانحي جي 65 اي ڪلاس ڪيسن مان 11 ڪيس ٻيهر کولي اي ٽي سي ٽو منتقل ڪري ڇڏيا، ڪيسن جون فائلز به اي ٽي سي ٽو منتقل ڪيون ويون، سڀاڻي ٻڌڻي ٿيندي، 12 مئي سانحي جي چئن ڪيسن ۾ ميئر ڪراچي وسيم اختر سميت 21 جوابدار نامزد آهن، جن مان وسيم اختر ۽ ٻين تي فرد جرم لاڳو ٿي چڪو آهي، واضح رهي ته سنڌ هاءِ ڪورٽ 12 مئي سانحي جي اي ڪلاس ڪيل 65 ڪيسن جو ٻيهر جائزو وٺڻ جو حڪم ڏنو هو