ٺل)رپورٽر)باھو کوسا ۾ ڪارنھن الزام ھيٺ آيل نوجوان تي پنج لک چٽي وجھي کيس ھميشھ لاءِ ڳوٺ نيڪالي ڏني وئي ان ڏس ۾ باهو کوسو ٿاڻي جي حد ڳوٺ عبدالله بنگلاڻي ۾ بنگلاڻي ۽ مرهيٽا برادري ۾ ھلندڙ ڪارو ڪاري تڪرار جو جرڳو بنگلاڻي برادري جي چيف مقدم جهانگير خان بنگلاڻي جي سر پينچ هيٺ ٿيو، ملهار خان بنگلاڻي ۽ سردار مرهيٽو جون ڳالهيون ٻڌڻ کان پوءِ سردار خان مرهيٽو مٿان ڪارنهن جو الزام ثابت ٿيڻ بعد مٿس پنج لک چٽي وڌي وئي،جنهن هڪ لک موقعي تي ادا ويا ،جهولي جهلڻ تي ويھ ھزار معاف ڪيا ويا باقي رقم ٽن قسطن ۾ ادا ڪندو، نوجوان کي ھميشھ لاءِ ڳوٺ نيڪالي ڏني وئي، فيصلو قبول ڪرڻ بعد ڌرين کي ڀاڪر پارايا ويا، مرهٽا برادري موجب ڏيتي ليتي جي تڪرار کي ڪارنهن جو رنگ ڏنو ويو هو.
نوابشاھ:صوفي راڳي نديم سولنگي پاران سيوھڻ پوليس خلاف احتجاج
نوابشاھ(ن پ ا) مشهور صوفي راڳي نديم فراز سولنگي پنهنجي سازندن سان گڏ راڳ ڳائي نوابشاھ پريس ڪلب ٻاهران احتجاجي مظاهرو ڪرڻ بعد بک هڙتال ڪندي چيو ته 3 ڏينهن اڳ مان محمد علي سهتي جي شادي جي ڪاڄ ۾ سيوهڻ پهتس ته اتي موجود ٺارو شاھ سان تعلق رکندڙ ايس ايڇ او سڪندر وڳڻ سندس ساٿي نظر مڱڻيجي مون مٿان حملو ڪري مونکي ۽ منهنجي ننڍن ڀائرن کي سخت تشدد جو نشانو بڻايو جنهن جي ڪري آئون بيهوش ٿي ويس تنهن کان پوء ڀت ۾ موجود ماڻهن منھنجي انهن کان جان ڇڏائي اسپتال آندو جتان مان سيوهڻ ٿاڻي تي پهتس ۽ مون سيوهڻ ٿاڻي جي ايس ايڇ او ايوب نائچ کي مون مٿان سڪندر وڳڻ ۽ سندس ساٿين پاران ٿيل تشدد جو ڪيس داخل ڪرڻ لاءِ چيو پر ايس ايڇ او منهنجي داد رسي ڪرڻ بجاءِ مونکي لاڪ اپ ڪري ٻن سپاهن سان گڏجي سخت تشدد ڪيو ۽ مونکي 4 ڪلاڪ لاڪ اپ ۾ بيگناهه بند ڪرڻ بعد آزاد ڪيو. هن چيو ته اسين فنڪار ماڻهو امن جا اسير آهيون پر مونکي دلي صدمو پهتو آهي ته وزير علي سنڌ جي تڪ سيوهڻ شهر ۾ سڪندر وڳڻ ۽ سيوهڻ جي ايس ايڇ او ايوب نائچ ۽ سندن ساٿين مون تي ۽ منهنجي معصوم ڀائرن تي تشدد ڪيو آهي. ھن مطالبو ڪيو تھ انهي معاملي جو نوٽس وٺي ٻنهي پوليس اهلڪارن خلاف ڪاروائي ڪئي وڃي ٻئي صورت ۾ سڄي سنڌ ۾ احتجاجي تحريڪ هلائندا سين.
اوٻاوڙو: 7 سال گذرڻ باوجود اسپورٽس ڪامپليڪس مڪمل نھ ٿيو
ٺيڪيدار 2 سالن کان ڪم اڌ ۾ ڇڏي گم.اختياريون نوٽس وٺي ڪم مڪمل ڪرائين.رانديگر
اوٻاوڙو(ن پ ا)اوٻاوڙو ڪروڙين رپين جي لاڳت سان منظور ڪرايل اسپورٽس ڪمپليڪس جو ڪم 7 سال گذرڻ باوجود مڪمل نھ ٿي سگھيو. ٺيڪيدار ڪم اڌ ۾ ڇڏي ٻن سالن کان غائب ٿي ويو آهي ۽ جنهنڪري نوجوان گهٽين ۽ ٻئي هنڌ راند کيڏڻ تي مجبور آهن، هتان جي نوجوانن وٽ فٽبال، ڪرڪيٽ، بيڊمينٽن، والي بال، هاڪي ۽ ٻين راندين لاءِ ڪو به ميدان نه آهي ۽ هوڏانهن رانديگرن ۽ اوٻاوڙو جي شھرين امجد علي ڀٽي، خادم حسين ڀٽي، جميل احمد سومرو، سرفراز احمد مھر، اڪرم ڀٽي، زاهد حسين عباسي، شاهنواز عباسي، ملڪ بھارام، نادر شر، سجاد حسن ڀٽي، بخت علي ڀٽي ۽ ٻين“پنهنجي اخبار”سان ڳالهائيندي چيو آهي ته سنڌ حڪومت پاران منظور ڪيل اسپورٽس ڪمپليڪس جو ڪم 7 سال گذرڻ باوجود به مڪمل نه ٿي سگهيو آهي ۽ اسان کي راندين لاءِ ڪو به ميدان ناهي جو اسان پنهنجون صلاحتيون اجاگر ڪري سگهون. اسان سنڌ حڪومت،راندين جي وزير ۽ ٻين اعلي اختيارين کي اپيل ڪيون ٿا ته اوٻاوڙو شهر ۾ 7 سال اڳ سنڌ حڪومت پاران منظور ڪيل اسپورٽس ڪمپليڪس جلد تيار ڪرائي ڏنو وڃي ته جئين اسان راندين ذريعي پنهنجي ملڪ قوم ۽ سنڌ جو نالو روشن ڪري سگهون. .
اڳوڻي صوبائي وزير تعليم ڄام مھتاب حسن ڏهر“پنهنجي اخبار”سان رابطو ڪرڻ تي ٻڌايو ته ٺيڪيدار جي نااهلي سبب اهيو اسپورٽس ڪمپليڪس 7 سال گذرڻ باوجود به مڪمل نه ٿي سگهيو آهي ۽ ٺيڪيدار ڪافي وقت کان غائب آهي جنهن لاءِ مون سنڌ جي وڏي وزير سيد مراد علي شاھ ۽ سيد ناصر شاھ سان رابطو ڪيو آهي جلد ان اسپورٽس ڪامپليڪس کي مڪمل ڪرائي رانديگرن کي پنهنجون صلاحيتون اجاگر ڪرڻ لاءِ ميدان مھيا ڪيو ويندو ته جيئن اوٻاوڙو جا نوجوان گهٽين بدران اسپورٽس ڪامپليڪس ۾ راند کيڏي پنهنجون صلاحيتون اجاگر ڪري سنڌ جو نالو روشن ڪن. ھوڏانھن ٺيڪيدار سان رابطو ڪرڻ جي ڪوشش ڪئي وئي پر رابطو نھ ٿي سگھيو.
شاهه لطيف ٽائون ٿاڻي جي ايس ايڇ او کي هٽائڻ جو فيصلو، ملير ۾ ايس ايڇ او جي حمايت ۽ مخالفت ۾ مظاھرا
ملير بار جي سڏ تي ايس ايڇ او نيڪ محمد کوسو خلاف احتجاج، عدالتي ڪارروائين جو بائيڪاٽ
ايس ايس پي ملير طرفان ايس ايڇ او کي هٽائڻ جو فيصلو، اڄ وڪيلن کي آگاهه ڪيو ويندو: ذريعا
ملير (رپورٽر) ملير بار جي وڪيلن ۽ شاهه لطيف ٽائون ٿاڻي جي پوليس وچ ۾ ڪوڙن ڪيسز تان پيدا ٿيل تڪرار نه نبري سگهيو. ملير پريس ڪلب آڏو ايس ايڇ او شاهه لطيف ٽائون نيڪ محمد کوسو جي حمايت ۾ احتجاجي مظاهرو ڪيو ويو آهي. نيشنل هاءِ وي تي ٿيل مظاهري دوران شاهه لطيف ٽائون واسي گلزار جسڪاڻي، اسرار احمد، زرينا بيگم ۽ ٻين ايس اڇي او نيڪ محمد کوسو جي حمايت ۾ نعريبازي ڪئي. ٻئي پاسي ملير بار طرفان سينيئر وڪيل سڪندر شر تي شراب نوشي جو ڪيس داخل ڪرڻ ۽ کيس گرفتار ڪرڻ خلاف اڄ به عدالتي ڪارروائين جو بائيڪاٽ ڪيو ويو. وڪيل سڪندر شر ايس ايڇ شاهه لطيف ٽائون کي معطل نه ڪرڻ جي صورت ۾ بُک هڙتال ڪرڻ جو چتاءُ ڏئي ڇڏيو. ذريعن موجب ايس ايس پي ملير ايس ايڇ او شاهه لطيف ٽائون نيڪ محمد کوسو کي معطل ڪري ڇڏيو آهي، پر ان حوالي سان باضابطا طور ڄاڻ نه ڏني وئي آهي. ذريعن موجب ايس ايس پي ملير طرفان ملير بار جي عهديدارن سان ڳالهين دوران ايس ايڇ او کي هٽائڻ بابت آگاهه ڪيو ويندو.
خيرپورناٿن شاھ:موٽرسائيڪل ۽ چنگچي رڪشا ۾ ٽڪر.6 ڄڻا زخمي
لياقت کوسو، علي مراد کوسو ۽ عرفان کوسو جي حالت ڳڻتي جوڳي.لاڙڪاڻي اسپتال منتقل
خيرپورناٿن شاھ(ن پ ا) ڀرسان ڳوٺ پيڄاهو لنڪ روڊ تي ٻن موٽر سائيڪلن ۽ چنگچي رڪشا ۾ ٽڪر ٿي پيو جنهن جي نتيجي ۾6 ڄڻا لياقت علي کوسو، علي مراد کوسو، عرفان کوسو، عبدالحڪيم کوسو، فيروز کوسو ۽ گلبهار کوسو شديد زخمي ٿي پيا، جن کي تعلقا اسپتال آندو ويو. ٽن ڄڻن لياقت علي کوسو،علي مراد کوسو ۽ عرفان کوسوجي حالت ڳڻتي جوڳي ھجڻ ڪري لاڙڪاڻي اسپتال منتقل ڪيو ويو آھي.
سنڌ جي خوبصورت شهر حيدرآباد کي اجاڙڻ جون تياريون
بلديه جي گارڊن واري شعبي پاران وڻن کي ڇانگڻ بهاني واڍي شروع ڪئي وئي
هن موسم ۾ وڻن جا پن ڇڻن ٿا، جنهن سبب وڻن کي ڇانگي رهيا آهيون: گارڊن آفيسر
حيدرآباد ( ن پ ا) سنڌ جي خوبصورت شهر حيدرآباد کي اجاڙڻ جون تياريون، وڻن کي ڇانگڻ بهاني واڍي شروع ڪئي وئي.
حيدرآباد شهر ۾ بلديه جي گارڊن واري شعبي پاران مختلف هنڌن تان وڻ وڍيا پيا وڃن، گارڊن آفيسر عارف جو چوڻ آهي ته هن موسم ۾ وڻن جا پن ڇڻن ٿا، جنهن سبب وڻن کي ڇانگي رهيا آهيون.
سڄي ملڪ ۾ وڻن جي واڍي سبب ماحوليات تي واضح ناڪاري اثر پون ٿا، اهڙي صورتحال ۾ وڌيڪ وڻ لڳائڻ بدران حيدرآباد ۾ وڻن جي واڍي سمجهه کان ٻاهر آهي، سنڌ سرڪار کي معاملي جو نوٽيس وٺي وڻ جي واڍي روڪرائڻ گهرجي
“سانگهڙ ۾ هاڃو” گهر اندر ڀِت ڪرڻ سبب ٻن ٻارن سوڌو 3 ڄڻا فوت ٿي ويا
ڳوٺ گهنڊڻ ۾ ڀِت ڪرڻ سبب عورت پوپري، نينگر گلستان ۽ گلشن فوت
زخمي نينگر گُلزار کي ڳڻتي جوڳي حالت ۾ نواب شاهه اسپتال منتقل ڪيو ويو
سانگهڙ ن پ ا) سانگهڙ ڀرسان گهر جي ڀت ڪرڻ سبب هڪ عورت ۽ ٻار فوت ٿي ويا. ڳوٺ گهندڻ ۾ ڳوٺاڻي پير بخش چانگ جي گهر ۾ صبح ساڻ ورانڊي جي ڀِت ڪري پئي، جنهن جي نتيجي ۾ 25 ورهين جي پوپري، 9 ورهين جو گلستان ۽ 5 سالن گلشن فوت ٿي ويا، جڏهن ته نينگر گلزار کي انتهائي ڳڻتي جوڳي حالت ۾ نواب شاهه اسپتلا منتقل ڪيو ويو آهي. واقعي کانپوءِ علائق ۾ سوڳ واري لهر پکڙجي وئي، جڏهن ته ڳوٺاڻي پير بخش جي گهر ۾ قيامت صغريٰ جهڙا منظر برپا ٿي ويا.
خانواهڻ: منشيات ۽ جوا جو ڪاروبار وڌي ويو، نوجوان نسل تباهه ٿيڻ لڳو
پوليس منشيات ۽ جوا جي ڪاروبار کي روڪڻ بدران ڏهاڙيون ڪمائڻ جو ذريعو بڻائي ورتو
خانواهڻ ۾ شاگرد ڪچي شراب سوڌو ٻيو نشو واپرائڻ لڳا، کين روڪڻ وارو ڪير به نه آهي
خانواهڻ (ن-پ-ا) خانواھڻ۔ خانواھڻ ۾ پوليس انتظاميه پاران منشيات جي خريد و فروخت ۽ جوا جي اڏن جي کلي ڇوٽ، نوجوان نسل تباھ ٿيڻ لڳو، پوليس انتظاميه غير قانوني ڌنڌن کي ڪمائي جو ذريعو بڻائي ڇڏيو، تاريخي شھر خانواھڻ پوليس انتظاميه جي مجرماڻي غفلت سبب اصل سڃاڻپ وڃائي ويٺو، سياسي، سماجي ڌرين پاران احتجاج جو چتاءُ، خبر موجب خانواھڻ ديھات تنيا بقا شاهه ۽ ٻين ڳوٺن ۾ پوليس انتظاميه غير قانوني ڌنڌن جي روڪٿام بدران انھن کي عام ڪرڻ جو ڪارڻ بڻجي ويئي خانواھڻ پوليس اندر غير قانوني ڌنڌن کي ڪمائي جو ذريعو بڻائي جوا ۽ منشيات جي واھپي جي کلي ڇوٽ ڏيئي ڇڏي آھي، جنھن سبب خانواھڻ جي سمورن شھري توڙي ٻھراڙي وارن علائقن خانواھڻ تنيا بقا شاهه ديھات ۽ٻين ننڍن توڙي وڏن ڳوٺن ۽ شهرجي مين چونڪن ۽ محلن ۾ جوا جا اڏا ۽ ڪچي شراب جي بٺيون پوليس جي سرپرستي ۾ هلي رهيون آهن جتان اسڪولي شاگردبه ڪچوشراب خريدڪري واپرائين ٿاجنهن سبب شاگردن جي تعليم تباھ ٿي رهي آهي ان کان علاوه گٽڪو، مين پڙي، زيڊ21-سفينا-رجني جهڙين زهريلن شين جو وڪروعام ٿي ويو آهي ۽ جوا جا اڏا پڻ شھرن جي مختلف علائقن ۾ سرعام بنان ڪنھن ڊپ جي ھلي رھيا آھن، جنھن سبب خانواھڻ ۽ ان جي آسپاس اندر ھڪ طرف ڏوھاري سرگرمين ڪر کنيو آھي ته ٻئي طرف نوجوان نسل پڻ تباھ ٿي رھيو آھي ذريعن موجب منشيات ۽ جوا جي اڏن تان پوليس ھر مھيني لکين روپين جون منٿليون وصول ڪري رھي آھي، پوليس انتظاميه جي ناقص ڪاڪردگي سبب عوام ۾ عدم تحفظ جي لھر پئدا ٿي ويئي آھي، خانواھڻ جي ينگ ايڪشن ڪميٽي شھري اتحاد واپاري ايسوسيئيشن ملاح ويلفيئر جماعت اھلسنت غوثيا انجمن جي اڳواڻن غلام النبي سولنگي سيد زاڪر علي شاهه ڪامريڊ غلام الرسول جلباڻي ۽ سياسي، سماجي ڌرين پوليس انتظاميه جي ان ڪڌي عمل جي سخت لفظن ۾ مذمت ڪندي چتاءُ ڏنو ته پوليس انتظاميه پنھنجو قبلو درست ڪري خانواھڻ مان سماجي براين جو خاتمو نه آندو ويو ته احتجاج جو ھر رستو اختيار ڪيو ويندو.
”تعليم کاتي جو ڪارنامو“ ڳڙهي خيرو جي پرائمري اسڪول ۾ فصلن جو پاڻي داخل ٿيڻ لڳو
ڳوٺ نوشهرو جمالي ۾ پرائمري اسڪول جي بائونڊري وال نه ٺهي، اختيارين فرنيچر به ناهي
ٻارڙا زمين تي ويهي تعليم پرائڻ تي مجبور، اختيارين کي شڪايت ڪئي پر ازالو نه ٿيو: ڳوٺاڻا
ڳڙهي خيرو (ن پ ا)ڳوٺ نوشهرو جمالي ۾ قائم پرائمري اسڪول مختلف مسئلن جي ور چڙهي ويو، بائونڊري وال نه هجڻ ڪري اسڪول ۾ هر وقت آسپاس جي ٻنين جو پاڻي جمع رهي ٿو، جنهن سبب اسڪول هر وقت گندو رهندو آهي. اسڪول ۾ فرنيچر نه هجڻ سبب ٻارڙا پٽ تي ويهي تعليم پرائڻ تي مجبور آهن، جڏهن ته اسڪول کي در ۽ دريون به نه آهن. ڳوٺاڻن بشير احمد جمالي، محبوب جمالي ۽ ٻين ٻڌايو ته اسڪول ۾ ڪنهن به قسم جي سهولت نه آهي. اسڪول جي چوڌاري هر وقت گندو پاڻي رهي ٿو. اسڪول ۾ هڪڙو استاد آهي جيڪو ٻارن لاءِ ناڪافي آهي. تعليم کاتي جي اعليٰ آفيسرن کي شڪايتون ڪيون آهن پر ڪو به تدارڪ ڪو نه ڪيو ويو. ڳوٺاڻن ڊي سي جيڪب آباد ۽ تعليم کاتي جي اعليٰ آفيسرن کي اپيل ڪئي آهي ته اسڪول کي بنيادي سهولتون ڏنيون وڃن ته جيئن ٻارن کي تعليم پرائڻ ۾ پريشاني نه ٿئي.
قبي سعيد خان ڏانهن ويندڙ روڊ جو ڪم مڪمل نه ٿيو، ڳوٺاڻا پريشان
ستانوي، بگودڙو ميرپور ٻرڙو ۽ ٻين ڳوٺن کي ملائيندڙ روڊ مڪمل نه ٿيو
اسان کي اچڻ وڃڻ ۾ سخت تڪليفن کي منهن ڏيڻو پئي ٿو: ڳوٺاڻن جون دانهون
ڪڄي پل (ن-پ-ا) قبوسعيدخان ڏانهين ويندڙ مين ستانوي لنڪ روڊ جيڪو گذريل 10 سالن کان وٺى انتظاميه جي نااهلي ۽ ٺيڪيدارن جي ڪرپشن سبب ستانوي ،بگودڙو ميرپور ٻرڙو ۽ ٻين مختلف ڳوٺن کي ملائيندڙ لنڪ روڊ جو ڪم مڪمل نه ٿي سگهيو آهي جڏهن ته ڳوٺاڻن ميڊيا سان ڳالهائيندي محمدحسن کوسو ، ڪامريڊ محمد عرس مگسي ،عاشق حسين مگسي ، سميت ٻين چيو ته قبوسعيدخان کان نڪرندڙ مين ستانوي لنڪ روڊ جو ڪم گذريل 10 سالن کان وٺي ڪرپٽ ٺيڪيدارن جي نااهلي سبب مڪمل نه ٿي سگهيو روڊ جو مڪمل نه هجڻ سبب اسان کي اچڻ وڃڻ ۾ سخت تڪليفن کي منهن ڏيڻو پئي ٿو هن مطالبو ڪندي وس وارن کان گهر ڪئي ته ستانوي مين لنڪ روڊ جو ڪم بنادير مڪمل ڪري اسان کي بيچيني مان ڪڍيو وڃي نه ته ٻئي صورت احتجاجي تحريڪ جو آغاز ڪيو ويندو.
پنوعاقل:ٿاڻي تان لاوارث ٻار گم ٿيڻ وارو معمو حل نھ ٿي سگھيو. شھرين ۾ سخت تاءُ پکڙيل
پنوعاقل (ن پ ا) پني عاقل ٿاڻي تي معصوم ٻارڙي جي گم ٿيڻ واري معاملي تعلقي جي پوليس جي ڪارڪردگي کي وائکو ڪري ڇڏيو آهي. لاوارث حالت ۾ هٿ آيل معصوم ٻارڙن جو معاملو ٿاڻي تان به پراسرار نموني گم ٿي وڃڻ وارو معاملو حل نھ ٿي سگھيو.گم ٿي ويل 2 معصوم ٻارڙن جو هن مهل تائين ڪوبه ڏس پتو نه پئجي سگهيو. واضح رهي ته ڪالهھ هڪ شهري علي گوهر چنه کي مهراڻ اسڪول وٽان ٻه ٻار لاوارث حالت ۾ مليا جنهن پوليس حوالي ڪيا ته جئين وارثن تائين اطلاع پهچي سگهي. پوليس اطلاع پاران اطلاع ڪرايا ويا.ايس ايچ او حڪيم لانگاهه ٻارن کي سنتري ۽ منشي حوالي ڪيو ته هنن معصوم ٻارڙن جو خيال رکيو وڃي. پوليس روايتي نااهلي سبب ٻه معصوم ٻارڙا نھ سنڀالي سگهي. ان واقعي جي ڪري ماڻهن ۾ تاء پکڙيل آهي. شهرين مطالبو ڪيو ته معصوم ٻارڙا جلد هٿ ڪري وارثن جو پتو لڳايو وڃي.
اوٻاوڙي جا 2 يتيم ٻارڙا معذور، علاج لاءِ امڙ گهر جو سامان به کپائي ڇڏيو
الله بخش ۽ اڪرم ٿهيم امڙ جو سهارو بڻجڻ بدارن سندس سهاري تي زندگي گذارڻ تي مجبور
ٻئي ٻارڙا هلڻ ڦرڻ کان به لاچار، امڙ گهرن ۾ ڪم ڪار ڪري سندن علاج ڪرائي ٿي
اوٻاوڙو(ن پ ا) اوٻاوڙو جي خانپور محلي جا رهواسي 2 يتيم معصوم ٻارڙا 12 ورهين جو الله بخش ٿهيم ۽ 6 ورهين جو اڪرم ٿهيم ڄنگھن جي پراسرار بيماري ۾ مبتلا ٿي ويا آهن جنهن سبب معصوم ٻارڙا هلڻ ڦرڻ کان لاچار بڻجي ويا آهن ۽ ڪنهن به تڪ جي چونڊيل نمائندن متاثر خاندان سان واهر نه ڪئي آهي ان سلسلي ۾ معذور ٻارڙن جي امڙ مسمات زاهدان ۽ مامي منير احمد ٿهيم پنهنجي اخبار کي ٻڌايو آهي ته ٻارڙا ننڍپڻ کان صحتياب هيا پر 3 يا 4 سالن جي عمر ۾ منهنجي ٻارڙن کي پراسرار بيماري وڪوڙي وئي ،جنهن سبب معصوم ٻارڙا هلڻ ڦرڻ کان لاچار بڻجي ويا آهن،ٻارڙن جي امڙ جو چوڻ هو ته گهر جو سامان کپائي ٻارڙن جو علاج ڪرائي رهيا آهيون پر علاج ڪرائڻ باوجود به ڪو فرق نه پيو آهي ۽ اسان غريب آهيون انهن جو پيءُ وفات ڪري ويو آهي ۽ مان ماڻهن جي گهرن ۾ ڪم ڪري انهن کي پالي رهي آهيان هن چيو ته آئون غريب بيواهه عورت آهيان ماڻهن جي گهرن ۾ ٻوهاري ڪري گهر جو گذر سفر ڪندي آهيان، مان هن وقت ٻچڙن جي علاج لاءِ سخت پريشاني کي منهن ڏئي رهي آهيان اسان وٽ ايتري رقم ناهي جو اسان ٻچڙن جو علاج ڪراچي يا لاهور مان ڪرائي سگهون ۽ اسان هن تڪ جي چونڊيل نمائندن توڙي وزير اعلي سنڌ ۽ ٻين اعلي اختيارين کي اپيل ڪيون ٿا ته منهنجي ٻچڙن جو سرڪاري خرچ تي علاج ڪرايو وڃي .
سنچورين ٽيسٽ: ٻي اننگز ۾ پاڪستاني ٽيم 190 رنسن تي ڍير
پهرين ٽيسٽ ۾ پاڪستان ڏکڻ آفريقا کي کٽڻ لاءِ 149 رنسن جو هدف ڏئي ڇڏيو
پروٽيز بالر اوليوئير ٻي اننگ ۾ پاڪستاني بيٽسيمنن کي ڪريز تي بيهڻ نه ڏنو، 5 وڪيٽون ورتيون
سنچورين (اسپورٽس ڊيسڪ) ڏکڻ آفريقا خلاف پهرين ٽيسٽ جي ٻي اننگز ۾ به پاڪستاني ٽيم 190 رنسن تي ڍير ٿي وئي.
ٻي اننگز ۾ پاڪستان پنهنجي بيٽنگ 42 رنسن جي سرسي سان شروع ڪئي ته اوپنر فخر زمان 12 رنسون ٺاهي پويلين موٽيو. جنهن بعد امام الحق ۽ شان مسعود محتاط راند کيڏي، پر 100 رنسون ٺاهڻ بعد وڪيٽون ڪرڻ جو سلسلو شروع ٿيو، امام الحق 57 رنسن تي آئوٽ ٿيو.
قومي ٽيم جو تجربيڪار بيٽسمين اظهر علي ۽ اسد شفيق به ٻي اننگز ڪارڪردگي نه ڏيکاري سگهيا. اسد شفيق ۽ بابر اعظم 6-6 ٺاهي پويلين موٽيا، جڏهن ته اظهر علي کاتو کولڻ بنا آئوٽ ٿيو.
ڪپتان سرفراز احمد پهرين اننگز وانگر هن اننگز ۾ به کاتو کولي نه سگهيو. محمد عامر 12 رنسون ٺاهيون.
پاڪستان طرفان شان مسعود 65 رنسون ٺاهي نمايان رهيو، جڏهن ته حسن علي 11 رنسون ٺاهيون. اهڙي طرح پاڪستان ڏکڻ آفريقا کي کٽڻ لاءِ 149 رنسن جو هدف ڏنو.
ڏکڻ آفريقا طرفان اوليوئير ٻي اننگز ۾ شاندار بالنگ ڪندي 5 رانديگرن کي آئوٽ ڪيو.
ان کان اڳ پهرين اننگز ۾ ڏکڻ آفريقا جي سموري ٽيم 223 رنسن تي آئوٽ ٿي وئي، بيٽسمين باووا 53، ڊي ڪوڪ 45 ۽ بريون 29 رنسون ٺاهي ٽاپ اسڪورر رهيا. جڏهن ته پاڪستان طرفان محمد عامر ۽ شاهين آفريد 4-4 وڪيٽون ورتيون ۽ حسن علي 2 شڪار ڪيا.
149 رنسن جو هدف ماڻڻ لاءِ ڏکڻ آفريقا پنهنجي ٻي اننگز جي شروعات ڪندي.
شاھھ سلمان ابراهيم الصاف کي ھٽائي عادل الجبير کي پرڏيھي مقرر ڪري ڇڏيو
رياض (انٽرنيشنل ڊيسڪ) سعودي بادشاهه شاهه سلمان ڪابينه ۾ اهم تبديلي ڪندي اڳوڻي ناڻي واري وزير ابراهيم الصاف کي پرڏيهي وزير مقرر ڪري ڇڏيو.
پرڏيهي ميڊيا موجب ابراهيم الصاف کي عادل الجبير جي جاءِ تي مقرر ڪيو ويندو، هوڏانهن اهي به چوٻول آهن ته ان قدم جو بنيادي سبب آڪٽوبر ۾ ترڪي جي شهر استنبول جي سعودي سفارتخاني ۾ سعودي صحافي جمال خاشقجي جو قتل جو آهي.
پرڏيهي وزير جي تبديلي سان گڏ شاهه سلمان چيف آف نيشنل گارڊ شهزادي معتب بن عبدالله جي جاءِ شهزادي عبدالله بن باندر بن عبدالعزيز جي مقرري جو شاهي فرمان جاري ڪيو آهي.
جنرل سيڪيورٽي ڍيف لاءِ جنرل خالد بن قرار الخربي جڏهن ته معساد ليبان کي نيشنل سيڪيورٽي ايڊوائز مقرر ڪيو ويو آهي.
عمران خان جي ڀارت خلاف شاندار اسپيل کي 36 سال مڪمل
ڪراچي (اسپورٽس ڊيسڪ) پاڪستان جي ناليواري آل رائونڊر ۽ هاڻوڪي وزيراعظم عمران خان جي روايتي حريف ڀارت خلاف شاندار بالنگ اسپيل کي 36 سال مڪمل ٿي ويا.
27 ڊسمبر 1982 تي ڪراچي ٽيسٽ دوران 66 ورهين جي عمران خان ڀارت خلاف 60 رنسن عيوض 8 وڪيٽون ورتيون هيون، جڏهن ته ميچ ۾ 79 رنسون ڏئي 11 ڀارتي رانديگرن کي پويلين جي راهه ڏيکاري هئي.
پاڪستان ان ميچ ۾ ڀارت کي اننگز ۽ 86 رنسن تان شڪست ڏني هئي.
عمران خان جي شاندار بالنگ کي 36 سال پورا ٿيڻ تي پاڪستان ڪرڪيٽ بورڊ پنهنجي ٽوئيٽر هينڊل تي ان ڏهاڙي کي ياد ڪندي عمران جي شاندار بالنگ جو ڏينهن ملهايو.