ماسڪو (ا ڊ) روس پاران جديد هائپر سونڪ نيوڪليئر ميزائل جو ڪامياب تجربو ڪري ورتو آهي. ايون گرڊ نالي ان ميزائل جو ڪامياب تجربو ڪيو ويو.
روسي صدر ولاديمير پيوٽن پاران ميزائل تجربي بابت روسي عوام سان مخاطب ٿيندي چيو ته روس وٽ جديد اسٽريٽجڪ دفاعي هٿيار اچي ويو آهي، جنهن سان ملڪ جي ڏهاڪن تائين حفاظت ڪري سگهجي ٿي. ايون گرڊ ميزائل تجربي کي روسي صدر پاران روس سان گڏ پوري دنيا لاءِ اهم قرار ڏنو. هن چيو ته روس وٽ نئين قسم جو اسٽريٽجڪ هٿيار آهي، جيڪو روس ۽ روسي عوام جي حفاظت جو ضامن آهي.
روس جو هائپر سونڪ نيوڪليئر ميزائل جو ڪامياب تجربو
روس وٽ جديد اسٽريٽجڪ دفاعي هٿيار آهن: روسي صدر ولاديمير پيوٽن
شاهه محمود قريشي جي روسي هم منصب سان ملاقات، ٻطرفن لاڳاپن ۽ خطي جي صورتحال تي ڳالهيون
ماسڪو ( انٽرنيشنل ڊيسڪ ) پرڏيهي وزير شاهه محمود قريشي روسي هم منصب سان ملاقات ڪئي، ملاقات ۾ ٻه طرفن لاڳاپن ۽ خطي جي بدلجندڙ صورتحال تي خيالن جي ڏي وٺ ڪئي. پرڏيهي وزير شاهه محمود قريشي 4 ملڪي دوري جي چوٿين مرحلي ۾ ماسڪو پهتو. جتي ايئرپورٽ تي اعليٰ سطحي وفد پرڏيهي وزير جو آڌر ڀاءُ ڪيو. ماسڪو ۾ پرڏيهي وزير شاهه محمود قريشي روس جي پرڏيهي وزير سرگئي ليوروف سان ملاقات ڪئي جنهن ۾ ٻه طرفن لاڳاپن ۽ خطي جي بدلجندڙ صورتحال تي خيالن جي ڏي وٺ ڪئي وئي، انکانسواءِ اڳواڻن افغانستان ۾ امن استحڪام جي جاري ڪوشش تي به خاص ڳالهه ٻولهه ڪئي.
اڪبر لغاري کي سنڌي ٻولي اختياري جي چيئرمين جي اضافي ذميواري سونپي وئي
ڪراچي(پڌرائي) سنڌ سرڪار ثقافت واري سيڪريٽري غلام اڪبر لغاري کي سنڌي ٻولي اختياري جي چيئرمين جي اضافي چارج سونپي ڇڏي آهي.
حيدرآباد جي پيٽرول پمپ گاڏين ۾ پيٽرول بجاءِ پاڻي ڀري ڇڏيو، احتجاج
ڀٽائي نگر ۾ ھڪ خانگي پيٽرول پمپ تي پيٽرول ۾ پاڻي ملايو ويو
جنهن ٽينڪر ۾ پيٽرول اچڻو هو، ان ۾ غلطي سان پاڻي آيو: مئنيجر
حيدرآباد(رپورٽر)ڀٽائي نگر ٿاڻي جي حد ۾ ھڪ خانگي پيٽرول پمپ تي پيٽرول ۾ پاڻي ملائڻ جو انڪشاف ٿيو آھي. شھرين عملي جي اهڙي چوري پڪڙي ورتي آھي ۽ شھرين ان عمل خلاف سخت احتجاج به ڪيو. شهرين ٻڌايو ته اسان پيٽرول ڀرايو ته گاڏين ۾ رڳو پاڻي ڀرجي آيو.پمپ جي مئنيجر محمد علي جو چوڻ آھي ته سندن ڪو ڏوھ نه آھي جنهن ٽينڪر ۾ پيٽرول اچڻو هو ان ۾ پاڻي ڀرجي آيو ،جنهن سبب غلطي سان گاڏين ۾ پاڻي ڀرجي ويو
مٺي ۾ حددخلين خلاف آپريشن جاري، شهري روڊن تي نڪري آيا
انتظاميا بيوس، ٻن واپاري ڀائرن کي ماءُ جون آخري رسمون ڪرڻ جيتري مهلت نه ڏني!
جڳديش ملاڻي جي اڳواڻي ۾ ڌرڻو، انتظاميا سان چڪريون، عملدار مشنري ڇڏي ڀڄي ويا
مٺي(ن پ ا) مٺي جي مهيشوري محلي ۾ ميونسپل ڪميٽي جي انتظاميا حددخليون ختم ڪرڻ جي اوٽ ۾ مسڪينن جا اجها ڊاهي پٽ ڪري ڇڏيا. مهيشوري محلي ۾ واپاري ڀائرن لجپت سکاڻي ۽ هوتچند سکاڻي جي گهر جون ديوارون ڊاهڻ ڊاهڻ لاءِ انتظاميا مشينري ڪاهي پهتي ته ٻنهي ڀائرن ماءُ جون آخري رسمون ادا ڪرڻ تائين گهر جون ڀتيون نه ڊاهڻ جي گهر ڪئي، پر عملدارن سندن هڪ نه ٻڌي ۽ سندن گهر جون ڀتيون ڊاهي پٽ ڪري ڇڏيو، جنهن تان شهرين تاءُ ۾ اچي احتجاج ڪيو. شهرين جي احتجاج سبب عملدار مشينري ڇڏي ٻڄي ويا. متاثرن مطالبو ڪيو ته آپريشن جي آڙ ۾ انسانيت جي تذليل ڪئي وئي آهي، نوٽيس ورتو وڃي.
شڪارپور ۾ مچ ڪچهري،سگهڙن ڏور،بيت ۽ ڳجهارتن ذريعي محفل مچائي ڇڏي
شڪارپور(ن پ ا) سماجي تنظيم دن پاران سياري جي سرد راتين ۾ مچ تي محبتن جا ميلا جاري، ڳوٺ نور محمد ڪلهوڙو ۾ ” سگهڙ ڪچهري” ۾ سگهڙن ڏور، بيتن ۽ ڳجهارتن ذريعي محفل کي مهو بڻائي ڇڏيو، سياري جي سرد راتين ۾ ” مچ ” تي محبتن سان ڀرپور سگهڙ ڪچهريون منعقد ڪرڻ لاءِ سماجي تنظيم دن سرگرم عمل آهي انهي سلسلي ۾ ڳوٺ نور محمد ڪلهوڙو ۾ ” مچ ” تي شاندار ” سگهڙ ڪچهري” منعقد ڪري محبتن سان ڀرپور ميلو مچايو ويو”سگهڙ ڪچهري” ۾ ناليوارن سگهڙن حاڪم ڪوري، علي محمد ڀيو، اعجاز ڪلهوڙو ۽ ٻين ڳجهارتون، ڏور ، بيت ۽ سينگار پيش ڪري محفل ۾ واه واه جي ڌوم مچائي ڇڏي، رات جو دير تائين مچ تي مچايل محفل کي سماجي تنظيم ڊولپمينٽ انسٽيٽيوشنس نيٽ ورڪ (دن )جي چيف ايگزيڪيوٽو مجاهد ڀٽو، سماجي اڳواڻن، سلطان رند، حاڪم گل مهر ۽ دن جي پروگرام مئنيجر جميل ايوب مهر خطاب ڪندي چيو ته سنڌ صوفين، درويشن ۽ ساڃاه وندن جي سرزمين آهي جتان محبت ۽ ڀائيچاري جو درس ملندو رهيو آهي انهن چيو ته اڄ دنيا مذهبن، فرقن، قبيلائي توڙي نسلي نفرتن ۾ ورهائجي وئي آهي جنهن کي صوفين ۽ درويشن جي محبت ڀري نظريي سان ميڙي مٺ ڪري خدا جي ٺاهيل ڪائنات کي جنت نظير نڻائي سگهجي ٿو اڳواڻن زور ڀريو ته سنڌ جي روائتي مچ ڪچهرين ۽ سگهڙ ڪچهرين کي هڪ ڀيرو ٻيهر آباد ڪجي ڇاڪاڻ ته اهڙيون ڪچهريون محبتن کي عام ڪرڻ لاءِ وڏي اهميت رکن ٿيون.
زرداري جي سياست بلاول جي مستقبل کي خطري ۾ وجهي ڇڏيو آهي:صفدر عباسي ۽ ناھيد خان
نئون ديرو(رپورٽر) پاڪستان پيپلز پارٽي ورڪرز جي ناهيد خان ۽ ڊاڪٽر صفدر عباسي ڪارڪنن جي وڏي قافلي سان ڳڙهي خدابخش ڀٽو پهچي شهيد راڻي محترمه بينظير ڀٽو، شهيد ذوالفقار علي ڀٽو، بيگم نصرت ڀٽو ۽ ٻين شهيدن جي مزارن تي حاضريون ڀري گلن جون چادرون چاڙهي فاتحه خواني ڪئي. ان موقعي تي ڪارڪنن جذباتي انداز ۾ “زندهه هي بي بي زندهه هي”، “تيري قاتل زندهه هين – بي بي هم شرمنده هين”. مزار تي حاضري کانپوءِ ڊاڪٽر صفدر عباسي چيو ته اڄ جي ڏينهن اسان کي شهيد بي بي جي جمهوري جدوجهد کي ياد ڪرڻ گهرجي ۽ اهو به ياد رکڻ گهرجي ته شهيد ذوالفقار علي ڀٽو جيڪا کيس سياسي سوچ ڏني ان تي 30 سالن تائين ثابت قدم رهي. زندگيءَ کي خطرو هئڻ باوجود هڪ ڏينهن لاءِ به پوئتي نه هٽي. هن چيو ته اڳوڻي صدر آصف علي زرداري جي سياست بلاول ڀٽو زرداريءَ جي مستقبل کي خطرن ۾ وجهي ڇڏيو آهي ۽ منهنجي دعا آهي ته ان جي راهن ۾ جيڪي به پٿر آهن انهن کان بچي اڳتي قدم وڌائي. ميڊيا سان ڳالهائيندي ناهيد خان چيو ته شهيد بي بي اسان جي ليڊر، استاد ۽ سڀ ڪجهه هئي جيڪا اڄ اسان جي وچ ۾ نه آهي. پر جيڪا ان جي سوچ ۽ فلسفو هو اهو اڄ به زندهه آهي. اڄ جهڙيءَ طرح غربت وڌي رهي آهي ۽ سياسي فضا آلوده ٿيندي پئي وڃي ۽ جهڙيءَ طرح ڌرتي سياستدانن لاءِ تنگ ٿيندي پئي وڃي، مان سمجهان ٿي ته اڄ هن دور ۾ شهيد محترمه جهڙي ليڊر جي ملڪ کي تمام گهڻي ضرورت آهي. هن چيو ته هن ملڪ کي اڄ نيشنل ليڊر جي تمام گهڻي ضرورت محسوس ٿي رهي آهي ۽ جيڪي به ليڊر هن وقت آهن اهي فقط پنهنجي تڪن يا علائقن جا ليڊر نظر اچن ٿا چئني صوبن جي زنجير واري علامت ڪنهن ۾ به نظر نٿي اچي. جيڪا به ملڪ ۾ جمهوريت آهي اها شهيد بينظير ڀٽو جي ڪري ئي آهي. شهيد محترمه بينظير ڀٽو گهڻو وقت اڳ ۾ طالبان سان ڳالهيون ڪرڻ جي ڳالهه ڪئي هئي جنهن تي تنقيد ڪئي وئي ۽ اڄ آمريڪا جي چوڻ تي طالبان سان ڳالهيون ڪرڻ جي ڳالهه ڪئي پئي وڃي.
اوٻاوڙي لڳ ڪار جي ٽڪر ۾ موٽرسائيڪل سوار فوت
اوٻاوڙو (ن پ ا) اوٻاوڙو لڳ ريتي لنڪ روڊ تي تيز رفتار ڪار ۽ موٽر سائيڪل ۾ ٽڪر ٿي پيو جنهن جي نتيجي ۾ 30 ورهين جو نوجوان مشتاق احمد پٽ ڪٽو گهنيو موقعي تي فوت ٿي ويو ۽ جڏهن ته ڪار ڊرائيور مشتاق پٽ رانجهون چاچڙ شديد زخمي ٿي پيو جتي آس پاس جي ماڻهن پهچي ڪري فوتي ۽ زخمي کي ڳڻتي جوڳي حالت ۾ تعلقه اسپتال اوٻاوڙو پهچايو جتي لاش پوسٽ مارٽم بعد وارثن حوالي ڪيو ويو ۽ زخمي کي طبي امداد فراهم ڪرڻ بعد نازڪ حالت ۾ رحيم يار خان اسپتال ريفر ڪيو ويو ۽ فوتي نوجوان جو لاش گهر پهچڻ تي روڄ راڙو مچي ويو ۽ نوجوان پٽ جي اچانڪ وڇوڙي جو ٻڌي امڙ کي بيهوشي جا دورا پوڻ لڳا ۽ هوڏانهن آخري اطلاع تائين اهڙي اتفاقي واقعي جو ڪيس داخل نه ٿي سگهيو آهي.
بنگلديري ڀرسان تيز رفتار ڪار جي ٽڪر ۾ نينگر فوت
رتوديرو (ن پ ا)رتوديرو ڀرسان بنگلديرو وٽ روڊ ڪراس ڪندي 12 ورهين جو نينگر محمد بخش پٽ محمد اسماعيل تيز رفتار ڪار جي ٽڪر ۾ فوت ٿي ويو،ان ڏس ۾رتوديرو ڀرسان بنگلديرو اسٽاپ وٽ لاڙڪاڻي روڊ تي روڊ ڪراس ڪندڙ ٻارهن ورهين جي نينگر محمد بخش پٽ محمد اسماعيل چهواڻ کي تيز رفتار ڪار ٽڪر هنيو، جنهن بعد هو ٿڏي تي فوت ٿي ويو، فوتي نينگر جو لاش تعلقه اسپتال آندو ويو جتان ضروري ڪاروائي بعد وارثن حوالي ڪيو ويو، پوليس ڪار ڊرائيور سميت پنهنجي حراست ۾ وٺي ڇڏيو، جڏهن ته فوتي نيگر جو تعلق رتوديرو جي يوسي بنگلديرو جي ڳوٺ مصري خان چهواڻ سان آھي،
ڪرپٽ عنصرن جو گهيرو ڪيئن تنگ ڪجي؟ نيب پاران اڄ کليل ڪچهري ٿيندي
ڪراچي(اسٽاف رپورٽر) قومي احتساب بيورو پاران اڄ ڪراچي ۾ کلي ڪچهري ڪرائي ويندي. نيب ترجمان موجب، کلي ڪچهري ۾ شهرين کي شرڪت جي دعوت ڏني وئي آهي ته جيئن ڪرپشن ۾ ملوث عنصرن جي نشاندهي ٿي سگهي. ڊي جي نيب فاروق اعواڻ چيو آهي ته شهري قومي ناڻي کي نقصان پهچائيندڙن جي نشاندهي ڪن، ڪرپٽ عنصرن کي ڪٽهڙي ۾ آڻڻ وقت جي اهم گهرج آهي.
ڪشمور ۾ ڪار جو ٻن موٽرسائيڪلن کي ٽڪر، ٻه ڄڻا فوت،5 زخمي
ڪشمور(ن پ ا)ڪشمور ويجهو روجھان انڊس هاءِ وي تي خوفناڪ روڊ حادثو، ڪار ۽ ٻن موٽرسائيڪلن ۾ ٽڪر لڳڻ جي نتيجي 2 ڄڻا ٿڏي تي فوت عورتن سميت 5 ڄڻا زخمي ٿي پيا،ان ڏس ۾ ڪشمور ويجهو روجھان انڊس هاءِ وي تي تيز رفتار ڪار جي ٻن موٽرسائيڪلن کي ٽڪر لڳڻ جي نتيجي ۾ ڪشمور واسي 45 ورھين جو ماستر نور احمد گولاٽو ۽ 30 سالن جو بڊاڻي واسي شھزادو چاچڙ ٿڏي تي فوت ٿي ويا جڏهن ته حادثي ۾ 2 عورتن سميت 5 ڄڻا زخمي ٿي پيا زخمين کي روجھان جي اسپتال نيو ويو،جڏهن فوتي ڪشمور واسي نور احمد گولاٽو ۽ بڊاڻي جي رھواسي شھزادو چاچڙ جو لاش اباڻي ڳوٺ پھچايو ويو، حادثي بعد روجھان پوليس ڪار کي پنهنجي تحويل ۾ وٺي ڇڏيو ڪار ڊرائيور فرار ٿيڻ ۾ ڪامياب ٿي ويو ،حادثي ۾ فوت ٿيلن جا لاش گهرن ۾ پھچڻ تي ڪھرام مچي ويو ،اھڙي واقعي سوڳ وارو ماحول ڇائنجي ويو.
ڍوري ناري لڳ ٽرين جي ٽڪر ۾ عورت فوت
ڍورونارو(ن پ ا) ڍورو نارو ويجهو ٽرين جي ٽڪر ۾ عورت چيڀاٽجي فوت ٿي وئي. ڳوٺ قاضي سومرو واسڻ ڌائي ڀيل ٽرين ھيٺيان اچي فوت ٿي وئي. اطلاع تي پوليس پهچي فوتڻ جو لاش اسپتال منتقل ڪيو،جتان ضروري ڪارروائي کانپوءِ وارثن حوالي ڪيو ويو. وارثن پنهنجي اخبار کي ٻڌايو ته عورت جو ذهني توازن درست نه هو.
”مان جوئي آهيان، سوئي آهيان“ فيم موٽڻ شاهه بيماري جي بستري داخل
صوفي راڳي غربت سبب موٽڻ شاهه علاج ڪرائڻ کان به لاچار، سرڪار بھ سار نه لڌي
بابا سخت بيمار آهي، اسان ۾ علاج ڪرائڻ جي سگهه ناهي: موٽڻ شاهه جو پٽ
پير جوڳوٺ (رپورٽ: بلاول جوڻيجو) صوفي راڳي سيد موٽڻ شاهه بيماري جي بستري ڀيڙو ٿيويو آهي، غربت سبب علاج ڪرائڻ کان به لاچار آهي. ان سلسلي ۾ سنڌ جو مشهور صوفي راڳي “مان جوئي آهيان سوئي آهيان” “گھنڊ کول ديدار ويکائو مين آيا مک ويکڻ” مشهور ڪلام چئي شهرت جي بلندين تائين پهچندڙ سيد موٽڻ شاهه گذريل 4 سالن کان وٺي بيماري ڪري هن ڳائڻ ڇڏي ڏنو آهي. سيد موٽڻ شاهه جي پٽ پنهنجي اخبار کي ٻڌايو ته کيس باٿ روم تائين سهارو ڏئي آندو وڃي ٿو. هن چيو ته بابا جي سخت بيمار ٿيڻ ڪري سخت پريشان آهيون ۽ مسڪين ٿي وڃڻ ڪري هن جو علاج به نه ٿا ڪرائي سگھون.
موٽڻ شاهه سنڌي، اردو، پشتو، سرائڪي، فارسي ٻولين ۾ گيت ڳايا
پير جوڳوٺ: سنڌ جي مشهور صوفي راڳي سيد موٽڻ شاهه پنجن ٻولين سنڌي، اردو، پڇتو، سرائڪي، فارسي زبانن ۾ گيت ڳايا جيڪي اڄ به مشهور آهن. صوفي راڳي سيد موٽڻ شاهه کي ننڍپڻ کان ئي ڳائڻ جو شوق هو جيڪو مقامي سطح تي ٿيندڙ محفلن ۾ شريڪ ٿيندو هو ۽ بعد ۾ مشهور صوفي راڳي استاد غلام حسين خاصخيلي کان سکيا وٺي راڳ جي دنيا ۾ باقائدي پير پاتو.
صوفي راڳي موٽڻ شاهه لطيف ايوارڊ سميت ڪيترائي اعزاز ماڻي چڪو
پير جوڳوٺ: راڳ جي دنيا مڃتا ماڻيندڙ مشهور صوفي راڳي سيد موٽڻ شاهه ڪيترائي ايوارڊ ماڻيا آهن جن ۾ وڏو وزير ايوارڊ، گورنر ايوارڊ، شاهه عبداللطيف ڀٽائي ايوارڊ، سچل ايوارڊ ۽ ٻيا ڪيترائي ايوارڊ ماڻيا جيڪي هن وقت گھر جي ميز تي سجايل آهن، ايوارڊن جي باري ۾ پڇيل جي سوال جي جواب ۾ سيد موٽڻ شاهه نماڻي آواز ۾ چوي ٿو ته اهي مليل ايوارڊ منهنجي زندگي جو ته حصو ضرور آهن پر اهي پيٽ جي بک اجھائي نه ٿا سگھن انهن ايوارڊن کي ڏسي اکين ۾ لڙڪ لڙي ايندا آهن.
165 کرب لٽيندڙن جون 165 پيشيون اهميت نٿيون رکن:فياض چوهاڻ
اسلام آباد (م ڊ) پنجاب جي سڌ سماءَ وارو وفاقي وزير فياض الحسن چوهاڻ چيو آهي ته 165 کرب لٽيندڙن جون 165 پيشيون اهميت نٿيون رکن، احتساب سڀني جو ٿئي پيو، پ پ اڳواڻ به پيشيون ڀوڳي رهيا آهن، صوبائي وزير فياض چوهاڻ ميڊيا سان ڳالهائيندي چيو ته احتساب جي ميدان ۾ عمران خان جهڙو رانديگر ڪير به ناهي، اسان ليگي نه پي ٽي آءِ وارا آهيون، عدالتن جا فيصلا قبول ڪنداسين، هن چيو ته ملڪ جي هي حالت ماضي جي حڪمرانن جي ڪري آهي، 165 کرب لٽيندڙن لاءِ 165 پيشيون اهميت نٿون رکن.
ميان صاحب ۾ ٻارڙيءَ فوت،وارثن جو ڊاڪٽر تي غلط انجيڪشن لڳائڻ جو الزام
ميان صاحب )ن پ ا (ميان صاحب ڀرسان شڪارپور کان مائٽن وٽ آيل معصوم ٻارڙي تيز بخار ۾ ڊاڪٽر جي مبينا انجڪيشن لڳڻ سبب فوت، وارثن ڊاڪٽر تي غلط انجيڪشن لڳائڻ جو الزام هنيو آهي،ان ڏس ۾ ميان صاحب لڳ ڳوٺ درزي واهه جي چانڊيا برادري جي ڳوٺاڻن علي رضا چانڊيو ۽ ٻين ميان صاحب پهچي صحافين آڏو دانهيندي چيو آهي ته اسان جي ٻن مهينن جي معصوم ننڍڙي شائنزہ ڌي ربڏنو چانڊيو ( شڪارپور واسي ) جيڪا پنهنجن وارثن سان ڳوٺ گهمڻ لاء آيل هئي،کيس تيز بخار هو ، علاج لاءِ جيڪب آباد جي هڪ خانگي ڊاڪٽر وٽ کڻي ويا سين جتي ڊاڪٽر ننڍڙي کي بخار ۾ انجيڪشن ڪئي ، اسان گهر پهتا سون ته ننڍڙي دم ڌڻي حوالي ڪيو. هنن گهر ڪئي ته غفلت ڪندڙ ڊاڪٽر خلاف ڪارروائي ڪئي وڃي،هوڏانهن معصوم ٻارڙي جي فوت ٿيڻ بعد سندس وارثن ۾ روڄ راڙو پئجي ويو.