ڪراچي(رپورٽ: حبيب جمالي) ڪراچي ۾ سال 2018 دوران ٽرئفڪ قانون جي ڀڃڪڙي تي ڳرا ڏنڊ لڳڻ باوجود ٽرئفڪ جو نظام صحيح نه ٿي سگھيو، شهر جي مک روڊن تي ٽرئفڪ جام معمول بڻيل رهيو، هلندڙ سال دوران حادثن ۾ به گھٽتائي نه آئي. پوليس پاران گھڻو زور ڏنڊ وصولي تي رهيو، سڄي سال دوران 62 ڪروڙ، 22 لک ڏنڊ وصول ڪيو ويو. سال 2018 دوران ڪراچي ۾ دعوائن باوجود ٽرئفڪ نظام ۾ سڌارو نه آيو، شهر جي مک روڊن تي صبح کان سانجھي ويل شديد ٽرئفڪ جام رهي، جنهن ۾ ماڻهن منٽن جو سفر ڪلاڪن ۾ طئي ڪيو. عام شاهراهون آءِ آءِ چندريگر روڊ، شاهراهه فيصل، ڪورنگي روڊ، ايم اي جناح ۽ يونيورسٽي روڊ سميت ٻين ننڍن وڏن روڊن تي ٽرئفڪ جو شديد دٻاءُ رهيو. ٽرئفڪ پوليس پاران گھڻو زور ڏنڊ جي وصولي تي رهيو، ڪراچي ٽرئفڪ پوليس پاران جاري ڪيل انگن اکرن موجب 2018 دوران ٽرئفڪ قانون جي ڀڃڪڙي تي 62 ڪروڙ 22 لک، 50 هزار جو چالان عيوض ڏنڊ وصول ڪيو ويو. 2018 ۾ 25 لک، 66 هزار، 516 چالان ٽڪيٽون جاري ڪيون ويون. جيڪي 2017 جي ڀيٽ ۾ وڌيڪ هيون، اهڙي طرح ون وي ٽوڙڻ تي 8 لک، 22 هزار، 126 چالان ڪيا ويا. هيلمٽ بغير ڊرائيونگ ڪرڻ تي 5 لک، 15 هزار، 143 چالان، ڊرائيونگ لائسنس نه هجڻ تي 20 هزار، 569 چالان، سگنلز ٽوڙڻ تي 32 هزار، 893 چالان، ڊرائيونگ دوران موبائيل هلائڻ تي 13 هزا، 32 چالان ۽ لاپراهي سان ڊرائيونگ ڪرڻ تي 19 هزار 24 چالان ڪيا ويا. اهڙي طرح ڇتين تي ماڻهن کي ويهارڻ تي 8 هزار 352 بسن کي چالان ڪيو ويو، دونهون ڏيندڙ 15 سو 25 گاڏيون به چالان ڪيون ويون ۽ کانئن 62 ڪروڙ، 22 لک، 50 هزار ڏنڊ وصول ڪيو ويو آهي. ان کان علاوه فينسي نمبر پليٽ، غيرقانوني چنگچي رڪشا، ون وي ٽوڙڻ ۽ غلط ڊرائيونگ ڪندڙ ماڻهن کي قلم 279 تحت گرفتار ڪيو ويو پر ان باوجود ٽرئفڪ جو نظام جيئن جو تيئن رهيو، ايڊيشنل آءِ جي ڪراچي ڊاڪٽر امير شيخ دعوا ڪئي آهي ته گذريل سال جي ڀيٽ ۾ هلندڙ سال ٽرئفڪ پوليس جي ڪارڪردگي بهتر رهي آهي، هن چيو ته ميئر جي مدد سان شهر ۾ رڪشا ۽ ٽئڪسي اسٽينڊ به قائم ڪيا ويا آهن. هن چيو ته ايندڙ سال لاءِ هڪ بهترين ٽرئفڪ پلان جوڙيو ويندو ته جيئن ٽرئفڪ جي ظام ۾ اڃا به وڌيڪ بهتري اچي، شهر ۾ ٽرئفڪ جي بدترين نظام سبب هلندڙ سال دوران 182 وڏا حادثا ٿيا. هلندڙ سال دوران ٽرئفڪ جي بدترين نظام سبب وڏا روڊ حادثا ٿيا، جنهن جي نتيجي ۾ ڪيترائي ماڻهو اجل جو شڪار ۽ ڪيترائي معذور ٿيا. ٽرئفڪ پوليس جي رپورٽ موجب ضلعي سائوٿ ۾ 21 وڏا حادثا، سٽي ۾ 6، اوڀر ۾ 34، اولهه ۾ 49، سينٽرل ۾ 26، ڪورنگي ۾ 20، ۽ ملير ضلعي ۾ 26 وڏا روڊ حادثا ٿيا، شاهراهه فيصل تي موٽرسائيڪلن لاءِ الڳ لائين جو ڪو به فائدو نه ٿيو، قانون تي عمل ڪرائڻ لاءِ مقرر عملو اوٻاسيون ڏيندو رهيو. شاهراهه فيصل تي حادثن کي نظر ۾ رکندي موٽرسائيڪل وارن لاءِ الڳ لائين رکي وئي، ڪراچي پوليس چيف جي هدايتن تي موٽرسائيڪل وارن لاءِ الڳ لائين ته ٺهي وئي پر موٽرسائيڪلون مجال آهي ان لائين ۾ هلن، قانون تي عمل ڪرائڻ لاءِ 14 ڪرولا ڪارن ۽ 14 موٽرسائيڪلن تي تربيت يافته عملو مقرر ڪيو ويو پر پوءِ به ڪو فائدو نه ٿيو، موٽرسائيڪل وارا شاهراهه فيصل تي پنهنجي مرضي سان ڊرائيونگ ڪندا رهيا.

ٽنڊو محمد خان (رپورٽ: امتياز مڱريو) ٽنڊو محمد خان ضلعي هيل تائين سرڪار طرفان 840 اسڪول قائم ڪيا ويا آهن، جن مان 208 اسڪول رڳو اِن ڪري بند آهن جو اُتي استادن سوڌو ٻيو عملو مقرر نه ٿي سگهيو آهي، جڏهن ته 142 اسڪول اهڙا آهن، جتي عمارت جي اڏاوت مڪلم ناهي ٿي ۽ ٻارڙا شيلٽر ليس اسڪول ۾ تعليم پرائڻ تي مجبور آهن. اُن کانسواءِ ضلعي ۾ 197 اسڪول زبون حالي جو شڪار آهن. ضلعي جي سمورن تعلقن مان رڳو ٽنڊو محمد خان شهر ۾ هڪ بوائز ۽ هڪ گرلز اسڪول قائم ڪيل آهي، جتي بيچلر ۽ ماسٽرز جي ڊگري جا به ڪلاس ورتا وڃن ٿا. ضلعي ۾ 2 نينشل ووڪيشنل ٽريننگ انسٽيٽيوٽ قائم ٿيل آهن، جتي بينظير ڀٽو شهيد يوٿ ڊولپمينٽ پروگرام تحت مستحق ٻارن کي هُنري سِکيا ڏني ويندي آهي. شهر جي گورنمينٽ بوائز ايليمينٽري اسڪول ۾ اٽڪل 800 شاگرد ۽ شاگردياڻيون تعليم حاصل ڪن ٿييون، پر ڊگهي عرصي کان اسڪول جي عمارت زبون حالي جو شڪار هجڻ باوجود عملي سوڌو شاگردن ۾ هر وقت خوف پکڙيل هوندو آهي. هن اسڪول ۾ شفٽن جي حساب سان شاگردن کي تعليم ڏني وڃي ٿي. سموري ضلعي ۾ رڳو 2 هاير سيڪنڊري اسڪول ۽ 40 سيڪنڊري اسڪول قائم ڪيل آهن، پر ڳوٺ ڪوڙو خان لاشاري ۾ اهڙي جاءِ تي گرلز اسڪول قائم ڪيو ويو آهي، جنهن جي ڀرپاسي ۾ آبادي ناهي ۽ اُن ڪري ئي اسڪول ۾ ڪابه تعليم نٿي ڏني وڃي، اهڙي ريت يوسف خان چانگ جي گورنمينٽ گرلس ايليمينٽري اسڪول کي پڻ آبادي نه هئڻ سبب تالو لڳل آهي. آبادي کان پري ۽ ٻهراڙي وارن علائقن ۾ قائم ڪيل اسڪولن کي بااثر وڏيرن پنهنجي اوطاق بڻائي ڇڏيو آهي. اهو به انڪشاف ٿيو آهي ته ضلعي ۾ اهڙا به اسڪول آهن، جتي بااثر وڏيرن جي زمينون آباد ٿيڻ بعد ڪڻڪ توڙي سارين جا ديرا قائم ڪيا ويندا آهن. ضلعي جي هيڊڪوارٽر ٽنڊي محمد خان شهر ۾ ڇوڪرين جي تعليم لاءِ پرائمري اسڪول قائم نه ٿيل آهي ۽ نه ئي چونڊيل نمائندن توڙي سنڌ سرڪار هن انتهائي اهم پاسي تي هيل تائين ڌيان ڏنو آهي. نتيجي ۾ بوائز پرائمري اسڪولن ۾ ڇوڪرين کي شفٽن جي حساب سان تعليم ڏني ويندي آهي.، گذريل 13 سالن جي عرصي ۾ ضلعي جي 300 کان وڌيڪ اسڪولن لاءِ سرپ سرپ 1، سرپ 2 ۽ سرپ 3 جي نالي تي هر اسڪول جي چوديواري، باٿ روم، پانيءَ جي ٽينڪس ۽ ٻين سهولتن لاءِ 2 ارب رُپيا جاري ٿي چڪا آهن، پر حقيقت ۾ انهن اسڪولن ۾ اهڙي قسم جون شاگردن لاءِ ڪي به سهولتون نظر نه اچي رهيون آهن. ان حوالي سان ملندڙ ڄاڻ موجب ٽنڊو محمد خان، بلڙي شاھ ڪريم ۽ ٽنڊو غلام حيدر تعلقن جي مختلف ڳوٺن علي محمد مير بحر ، گاماڻي خاصخيلي ، لاکاٽ ، ملاڪاتيار ، علي محمد اعواڻ ، شيخ ڀرڪيو، گهرام وساڻ ۽ ستر موري سوڌو مختلف علائقن جي ڪيترن ئي اسڪولن ۾ بنيادي سهولتون اڻلڀ آهن. جڏهن ته ٽنڊو محمد خان جي يونين ڪائونسل ٽنڊو سائينداد جي ڳوٺ علي محمد اعواڻ ۾ تعليم جي حوالي سان ايمرجنسي لاڳو ٿيل آهي، پر اڃا تائين هن اسڪول ۾ مستقبل جا معمار فرنيچر کانسواءِ تعليم پرائڻ تي مجبور آهن. حيرت جهڙي ڳالهه آهي ته اسڪول ۾ پڙهائي حاصل ڪرڻ لاءِ ايندڙ شاگردن لاءِ رڳو هڪ استاد مقرر ٿيل آهي. جيڪو پنهنجي وِت ۽ وس آهر شاگردن کي سمورا نصاب مضمون پڙهائڻ جي ڪوشش ڪندو رهي ٿو، ضلعي جو ايجوڪيشن ورڪس کاتو گذريل 10 سالن دوران 6 سو ڪروڙ روپيا خرچ ڪرڻ باوجود تدريسي عمارتون مڪمل ڪرائڻ ۾ ناڪام ٿي ويو آهي، جنهن ۾ ٽنڊو محمد خان ضلعي جو ميگا پروجيڪٽ پبلڪ اسڪول 13 سال گذرڻ باوجود مڪمل نه ٿي سگهيو، جنهن تي هن وقت تائين 50 ڪروڙ کان وڌيڪ رقم خرچ ٿي چڪي آهي پر لاڳاپيل اختيارين جي مجرماڻي سستي ۽ لاپرواهين جي ڪري تعليم جي حوالي سان انتهائي غيرمعمولي منصوبو رولڙي جو شڪار آهي، جڏهن ته ڀٽ ڌڻي جي تڙ ڏاڏي حضرت شاھ عبدالڪريم بلڙي واري جي شهر ۾ بوائز ڪاليج جو ڪم به 13 سالن گذرڻ باوجود پورو ناهي ٿي سگهيو. ساڳي ريت ٽنڊو غلام حيدر تعلقي ۾ ايجوڪيشن ورڪس کاتي پاران تعمير ڪرايل گورنمينٽ بوائز ڪاليج جي بلڊنگ وارو ڪم تعليم کاتي جي بي ڌياني ۽ ڪرپشن سبب هيل تائين شروع ٿي نه سگهيو آهي، سنڌ جي تعليم کاتي سان لاڳاپيل ايجوڪيشن ورڪس کاتي ۾ ڪم ڪندڙ ايگزيڪيوٽو انجنيئر ميان تسنيم آرائين جنهن تي عمرڪوٽ ضلعي جي ڪنري مرچ منڊي جي تعمير ۾ ڪروڙين روپين جي ڪرپشن کانپوءِ نيب ڪورٽ مان ضمانت تي هئڻ باوجود ٽنڊو محمد خان ۾ ڪيترن سالن کان سياسي پشت پناهي سبب مقرر ٿيل آهي، جنهن پنهنجي مخصوص ٺيڪيدار راشد انٽرپرائيز جي نالي تي مختلف اسڪولن جا ٺيڪا کڻي ڪروڙين روپين جي مبينا طور ڪرپشن ڪئي آهي. جڏهن ته ايگزيڪيوٽو انجنيئر سنڌ سنواريو پروگرام تحت آيل 35 لک روپيه پنهنجي ٺيڪيدار کي گورنمينٽ پرائمري اسڪول نبي بخش پتافي جي تعمير لاءِ جاري ڪيا، جيڪو ڳوٺ زاهد پتافي جي نالي سان ماتلي باءِ پاس تي موجود آهي جو هڪ روپئي جو به ڪم نه ڪرايو آهي. 35 لک اسڪول جي تعمير لاءِ جاري ٿيڻ باوجود اسڪول جو بنياد به نه کنيو ويو آهي، ساڳي پروگرام تحت لائق نظاماڻي ۽ سيدپور جا اسڪول مڪمل ڪرايا ويا آهن، سنڌ سرڪار 2018 ۾ سي ايم اسڪيم تحت ضلعي ٽنڊو محمد خان جي 82 اسڪولن کي ماڊل اسڪول بنائڻ لاءِ ڪروڙين روپيه جاري ڪيا، جنهن تحت هر اسڪول تي 1 کان 15 لک رُپين تائين خرچ ڪرڻا هئا، پر لاڳاپيل اختيارين عام ماڻهن کي فائدو نه ڏنو ۽ نتيجي ۾ پئسا خرچ نٿ ٿيڻ سبب 2018 ۾ رکيل فنڊز جون رقمون ليپس ٿي ويون. هن اسڪيم تحت 68 پرائمري اسڪول ۽ 14 سيڪنڊري اسڪول ماڊل اسڪول طور تيار ڪيا ويندا، جن ۾ 6 اهم نقطا شامل ڪيا ويا آهن، جن ۾ هر ماڊل اسڪول ۾ 6 ڪمرا، هر ڪلاس الڳ ، هر ڪلاس ۾ الڳ استاد هئڻ لازمي آهن. جڏهن ته ماڊل اسڪول جي بنيادي سهولت ۾ صاف پاڻي ، واش روم ، بائونڊري وال ۽ بجلي جون سهولتون موجود هونديون ، جڏهن ته ميڊيم وائيز هر ٻار کي سرڪاري ڪتاب مهيا ڪيا ويندا ۽ هر ماڊل اسڪول ۾ 17 گريڊ جو هڪ هيڊماسٽر مقرر ڪيو ويندو، ڊسٽرڪٽ ايجوڪيشن آفيسر پرائمري آپا رشيده سومرو چيو آهي ته تعليم کاتي ۾ بائيوميٽرڪ سسٽم اچڻ کانپوءِ استادن جي حاضري وڌي آهي، منهنجي ڪوشش هوندي آهي ته مختلف اسڪولن جو پاڻ دورو ڪري سندن مشڪلاتون معلوم ڪريان ۽ ان جي حل لاءِ ڪوششون وٺان، هن چيو ته سنڌ حڪومت جي سي ايم اسڪيم تحت 2018 ۾ ماڊل اسڪول بنائڻ وارو سيڪنڊري جي ڊي او جو ڪم آهي جنهن جي مون کي ڪا به ڄاڻ ناهي. تعليم کاتي ٽنڊو محمد خان جي بائيوميٽرڪ سسٽم جي چيف مانيٽرنگ آفيسر عبدالحليم لغاري ٻڌايو ته بائيوميٽرڪ سسٽم اچڻ کانپوءِ اسڪولن ۾ حاضري 100 سيڪڙو آهي، سڄي ضلعي اندر بائيوميٽرڪ ڪندڙ مانيٽرز جو انگ 9 آهي، جيڪي روزاني بنياد تي اسڪولن جو سرپرائيزڊ وزٽ ڪندا آهن، ضلعي ۾ مقرر ڪيل بائيوميٽرڪ مانيٽرز کي سنڌ سيڪريٽريٽ هيڊآفيس مان سڌي ريت ميسيج اچڻ ۽ ڊائريڪشن ملڻ کانپوءِ مقامي سطح تي مشڪلاتون پيش اچي رهيون آهن، ڇاڪاڻ ته ان کان پهرين ضلعي سطح تي مانيٽرن کي اسڪول وزٽ ڪرڻ جو شيڊول ڏنو ويندو هو جيڪو هيڊآفيس جي مداخلت سبب ان ۾ دشواري پيش اچي رهي آهي.

حيدرآباد)رپورٽ؛ فقير سليم) حيدرآباد ۾ انساني حقن لاءِ جاکوڙيندڙ عورتن توڙي مردن کي درپيش مسئلن ۾ مدد لاءِ وڪيلن، صحافين ۽ سول سوسائٽي جي نمائندن تي مشتمل ريپڊ ريسپانس نيٽورڪ قائم ڪيو ويو آهي، سماجي تنظيم ڊي سي ايچ ڊي پاران هڪ مقامي هوٽل ۾ ڪوٺايل گڏجاڻي ۾ مختلف ڌرين شرڪت ڪئي، گڏجاڻي ۾ ڳالهائيندي نغمه شيخ چيو ته انساني حقن جي خلاف ورزي جي خلاف هونئن ته سڀئي جاکوڙ ڪريون پيا، پر انهن جاکوڙيندڙ ماڻهن کي درپيش مسئلن ۽ انهن جي قانوني توڙي اخلاقي مدد جي ضرورت آهي، انهي نيٽ ورڪ جي قيام لاءِ اسين چاهيون ٿا ته حيدرآباد جا مختلف با شعور ماڻهو گڏ ٿين
ڊيموڪريٽڪ ڪميشن فار هيومن ڊيولپمينٽ جي ڪوآرڊينيٽر ڪلثوم ڀٽي چيو ته اسان وٽ سڀ کان ڏکيو ڪم ڪنهن متاثر جي مدد ڪرڻ آهي، هتي ناانصافين جا ڪيترائي ڪيس سامهون اچن ٿا، انهن جي خلاف مرد آواز اٿارين ته انهن کي ڪيترائي مسئلا درپيش آهن، پر عورتون انهن کان وڌيڪ پريشاني کي منهن ڏين ٿيون، عورتن کي ته هڪ ٻاهر جا خطرا ته ٻيو وري سندن گهر جا به ڪيترائي مسئلا درپيش آهن، ته هن وقت اهڙي نيٽورڪ جي ضرورت آهي جيڪو انهن ماڻهن جي مدد ڪري،.
ڊسٽرڪٽ بار حيدرآباد جي صدر امداد انڙ چيو ته ڪنهن به سماجي خدمت دوران متاثر ٿيندڙ هيومن رائٽس ۽ وومين رائٽس ڊفينڊر کي مفت ۾ قانوني مدد فراهم ڪرڻ لاءِ ڊسٽرڪٽ بار تيار آهي، اسان وٽ جيڪو به صدر هوندو اهو انهي نيٽورڪ جو رضاڪاراڻا ميمبر هوندو، هن چيو ته هن نيٽورڪ ۾ ميڊيا، پوليس ۽ عورتن جي حقن لاءِ جاکوڙيندڙ گڏجي جدوجهد ڪندا ته معاشري مان تشدد جو خاتمو اچي سگهي ٿو،
وومين ڊيولپمينٽ جي ڪمپلينٽ سيل جي انچارج قرت العين شاه چيو ته اسان وٽ جيڪي ادارا اڳي سرڪاري طور عورتن جي مدد لاءِ ميدان ۾ آهن، انهي جو اسٽاف به غير محفوظ آهي، کين عدالتن جا چڪر ڪاٽڻا ٿا پون، ضلعي ڪائونسل جي ميمبر زيب النساءِ ملاح چيو ته اسان وٽ اسان جي ڳوٺ ۾ عورتن تي تشدد کي روڪڻ لاءِ لڙاڪو نيٽورڪ موجود آهي، جنهن ۾ شامل مرد ۽ عورتون پنهنجي ڳوٺ ۾ عورتن تي تشدد خلاف آواز اٿاريندا آهن ۽ انهن جي مدد ڪندا آهن، ته جيڪڏهن ماڻهو ڪنهن به مسئلي جي حل لاءِ عملي طور ميدان ۾ ايندو ته ڪاميابي پري ناهي،
ايڇ آر سي پي جي انچارج غفرانا آرائين چيو ته عورتن تي تشدد ته وڏو مسئلو آهي پر جيڪي ماڻهو کنڀجي وڃن ٿا،انهي جي مالڪي جي به ضرورت آهي، انهي نيٽورڪ سان انهن ماڻهن جي مدد ٿي سگهي ٿي جيڪي جبري گمشدگين خلاف آواز اٿارين ٿا، رافيعه بنگش چيو ته اسان وٽ عورتن جي لاءِ شيلٽر هوم آهي، اتي ايندڙ عورتن جا وارث عدالتن ۾ وڃي اسان جي خلاف ڪيس داخل ڪرائين ٿا. گڏجاڻي ۾فرزانه پنهور، پرڀو ستياني، دارلامان جي شبنم عزيز، ايڊووڪيٽ صبا عروج، فضل چانڊيو، سيد صدر حسين، سوشل ويلفئير کاتي جو منير احمد ڀٽي، ظفر احمد برني، منصور ڏاهري، وومين پروٽيڪشن سيل ماروي اعواڻ، ابرار اعواڻ، شاهده پنهور، رقيه بنگش، منير آصف. سنيئر صحافي جئه پرڪاش موراڻي ۽ ٻيا به موجود هئا

ميهڙ( ن پ ا) 5 ڏينهن کان اغوا ڄاڻايل واپاري ضمير ڏيرو کي ميهڙ پوليس حوالي ڪرڻ جو انڪشاف ٿيو آهي، پر پوليس اڃا به سندس گرفتاري ظاهر نه ڪئي.
پوليس جي ذريعن موجب واپاري کي کنڀي گم ڪندڙ وارثن جي احتجاج سبب کيس ميهڙ جي اي سيڪشن ٿاڻي تي ڇڏي ويا، پر پوليس اڃا تائين سندس گرفتاري ظاهر نه ڪئي.
رابطو ڪرڻ تي ميهڙ جي اي سيڪشن ٿاڻي جي پوليس معاملي تي ڪجهه به ٻڌائڻ کان انڪار ڪري ڇڏيو، واضح رهي ته ڪجهه ڏينهن کان واپاري ضمير ڏيرو جاوارث سراپا احتجاج هئا.
ساڳي ٿاڻي تي واپاري ضمير ڏيرو خلاف هڪ ٻئي واپاري روشن شيخ فراڊ جو ڪيس داخل ڪرايو هو.

مٺي ( ن پ ا)سول اسپتال مٺي ۾ خوراڪ جي کوٽ ۽ مختلف بيمارين وگهي وڌيڪ ٽي ٻارڙا موت جو شڪار ٿي ويا آھن. جنهن کان پوءُ هلندڙ مهيني فوتي ٻارڙن جو انگ 50 ٿي ويو ۽ هلندڙ سال ٻارن جي فوتگين جو انگ 620 تي پهچي ويو آهي. تازو فوت ٿيل 3 ٻارڙن ۾ 18 مهينن جو ڀيرجي، 17 مهينن جو مدن ۽ چار سالن جو سلمان ساهڙ شامل آھن. اسپتال ۾ وڌيڪ ٻ 40 ٻارڙن کي ميل نيوٽريشن ۽ نرسري وارڊن ۾ داخل ڪيو ويو آھي جنهن کان پوءُ اسپتال داخل ٻارن جو انگ 60 ٻڌايو وڃي ٿو، ٻئي پاسي ڊپٽي ڪمشنر ٿرپارڪر آصف جميل شيخ چيو آهي ته ٿر جي ڏڪار متاثرين جي مدد لاءِ امدادي سرگرميون روزانه جي بنياد تي صاف ۽ شفاف طريقي سان جاري آهن. اهڙو اظهار هن ضلعي ۾ هلندڙ امدادي سرگرمين بابت تفصيلي رپورٽ بابت جاري ڪيل بيان ۾ ڪيو. هن وڌيڪ چيو ته ضلعي جي سمورن تعلقه اسپتالن ۾ 136 پنجن سالن کان ننڍن ۽ وڏن ٻار جي علاج ڪرائڻ لاءِ او پي ڊي ٿي جنهن مان 28 ٻارڙن کي اسپتالن ۾ داخل ڪيو ويو جڏهن ته 22 ٻارڙن کي بهتر علاج جون سهولتون فراهم ڪري صحت ياب بڻائي ڊسچارج ڪيو ويو. اهڙي ريت 31 بنيادي صحت مرڪزن ۽ 18 گورنمينٽ ڊسپينسرين مان 765 ٻارڙن جو علاج ڪيو ويو. اهڙي طريقي سان لائيو اسٽاڪ کاتي ٿرپارڪر پاران ڊپٽي ڊائريڪٽر لائيو اسٽاڪ جي سربراهي ۾ روزانه جي بنياد تي 07 ڳوٺن ۾ وٽنري ڪئمپن ذريعي جانورن جي ويڪسينيشن ۽ بيمار جانورن جو علاج ڪيو پيو وڃي . اهڙي ريت آبادي جي ڀلائي واري کاتي ٿرپارڪر پاران ضلعي ۾ ڪئمپس لڳائي خانداني منصوبه بندي جي اهميت ۽ طريقي ڪار متعلق آگاهي فراهم ڪرڻ لاءِ 137 عورتن کي خانداني منصوبه بندي جا آگاهي پروگرام سان گڏوگڏ مختلف پروگرام منعقد ڪيا پيا وڃن. ڊپٽي ڪمشنر ٿرپارڪر پنهنجي رپورٽ ۾ ڄاڻائيندي چيو ته ٿر جي ڏڪار متاثرين ۾ مفت ڪڻڪ ورهاست وارو ڪم پڻ روزانه جي بنياد تي صاف ۽ شفاف نموني سان هلندڙ آهي، جنهن ۾ پهرين مرحلي تحت ٿر جي 2 لک 46 هزار 411 ڏڪار متاثر خاندانن ۾ 50 ڪلو جي حساب سان مفت ڪڻڪ ورهائي وئي آهي جڏهن ته ٻئين مرحلي تحت هن وقت تائين 2 لک 38 هزار 816 خاندانن ۾ مفت ڪڻڪ ورهائي چڪا آهيون.