اسلام آباد (رپورٽر) ناڻي ۽ اقتصادي معاملن واري وفاقي وزير اسد عمر چيو آهي ته ڀارت سميت خطي جي سمورن ملڪن سان واپار ۽ مضبوط لاڳاپا چاهيون ٿا، حڪومت جي ڪوشش آهي ته اهڙي پاليسي ٺاهي وڃي جنهن ۾ پوري ملڪ کي فائدو ٿئي، ڪوئيٽا ۾ چيمبر آف ڪامرس اينڊ انڊسٽري جي ميمبرن کي خطاب وفاقي وزير اسد عمر چيو ته گوادر ۾ ايڪسپورٽ پروسيسنگ زون ۽ اسپيشل اڪنامڪ زون ٺاهيا پيا وڃن، سي پيڪ جي ايندڙ مرحلي ۾ صنعت ۽ واپار کي هٿي ڏيڻي آهي، هن چيو ته غربت جو خاتمو، ڪاروباري سرگرمين کي هٿي وٺرائڻ ۽ نوجوانن کي روزگار فراهم ڪرڻ اسان جي اولين ترجيح آهي، پاڪ ايران واپار کي هٿي وٺرائڻ لاءِ مهيني ۾ رپورٽ تيار ڪرڻ جي هدايت ڪئي آهي، حلال فوڊز جي عالمي مارڪيٽ ۾ بلوچستان موثر ڪردار ادا ڪري سگهي ٿو.
شاهه محمود قريشي جون افغان صدر، افغاني ۽ ايراني هم منصبن سان ملاقاتون
ڪابل (انٽرنيشنل ڊيسڪ) پرڏيهي وزير شاهه محمود قريشي 3 ڏينهن جي 4 ملڪي دوري جي پهرين مرحلي ۾ افغان صدر اشرف غني ۽ ايراني هم منصب سان ڌار ڌار ملاقاتون ڪيون.
ڪابل ۾ شاهه محمود قريشي افغان صدر اشرف غني ۽ افغان هم منصب صلاح الدين رباني سان وفدن جي سطح تي ملاقات ڪئي. ملاقات دوران گڏيل دلچسپي وارن معاملن، علائقائي ۽ عالمي صورتحال، افغان مفاهمتي عمل، معيشت جي مختلف شعبن ۾ سهڪار وڌائڻ تي خيالن جي ڏي وٺ ڪئي وئي.
پرڏيهي وزير شاهه محمود قريشي چيو ته افغانستان ۾ امن ۽ استحڪام نه رڳو ٻنهي ملڪن لاءِ پر سڄي خطي لاءِ بهتري جو سبب بڻجندو.
هن چيو ته پاڪستان سدائين افغانستان ۾ امن ۽ سلامتي جي ڳالهه ڪئي آهي.
ملاقات ۾ صلاح الدين رباني افغان عمل بابت ٿيل اڳڀرائي کان آگاهه ڪيو ۽ پاڪستان جي ڪوششن جي واکاڻ ڪئي. جڏهن ته شاهه محمود قريشي خطي ۾ جٽادار امن ۽ استحڪام لاءِ رابطا وڌائڻ تي زور ڏنو.
افغان صدر افغان عمل لاءِ ڀرپور ڪردار نڀائڻ تي وزيراعظم عمران خان ۽ پرڏيهي وزير شاهه محمود جو ٿورو مڃيو.
ٻي پاسي افغان صدر ۽ افغان هم منصب سان ملاقات بعد شاهه محمود قريشي ايران جي راڄڌاني تهران پهتو، جتي هن ايراني پرڏيهي وزير جواد ظريف سان ملاقات ڪري اهم معاملن تي خيالن جي ڏي وٺ ڪئي.
ملاقات ۾ ٻنهي شخصيتن پاڪ-ايران لاڳاپن ۽ خطي جي صورتحال تي تفصيلي ڳالهه ٻولهه ڪئي. ملاقات ۾ سيڪريٽري پرڏيهي تهمينه جنجوعه ۽ وفد جا ٻيا ميمبر به موجود هئا.
ملاقات دوران شاهه محمود قريشي جو چوڻ هو ته پاڪستان ايران ان سياسي ۽ اقتصادي لاڳاپا وڌيڪ مستحڪم ڪرڻ چاهي ٿو. هن چيو ته پاڙيسري ملڪن سان لاڳاپن ۾ بهتري اسان جي پرڏيهي پاليسي جي پهرين ترجيح آهي.
ان موقعي تي ايراني پرڏيهي وزير جواد ظريف جو چوڻ هو ته ايران ٻنهي ملڪن جا بهتر لاڳاپا ۽ پاڪستان ٻطرفي سهڪار کي هٿ ڏيارڻ لاءِ پرعزم آهي.
هوڏانهن 4 ملڪي دوري دوران پرڏيهي وزير چين ۽ روس به ويندو.
آصف زرداري جو 26 ڊسمبر تي جي آءِ ٽي رپورٽ بابت حڪمت عملي جي اعلان ڪندو : ترجمان
پيپلزپارٽي ڀڄڻ وارن مان ناهي، بلاول ڀٽو کي نشانو بڻايو ويو ته ڪارڪن ۽ عوام روڊن تي هوندو
سپريم ڪورٽ جي حڪم باوجود رپورٽ ڳجهي نه رکي وئي، موجوده احتساب رڳو اپوزيشن لاءِ آهي
ڪراچي (م ڊ) آصف زرداري جو جي آءِ ٽي رپورٽ بابت 26 ڊسمبر تي حڪمت عملي جي اعلان جو فيصلو، پيپلزپارٽي چيو آهي ته موجوده احتساب اپوزيشن جو صفايو ۽ حڪومت کي مضبوط ڪرڻ لاءِ آهي، ڪراچي ۾ پ پ چيئرمين بلاول ڀٽو جي ترجمان مصطفيٰ نواز کوکر، مرتضيٰ وهاب ۽ ٻين اڳواڻن سان گڏ پريس ڪانفرنس ڪندي چيو ته سپريم ڪورٽ فيصلي ۾ چيو هو ته جي آءِ ٽي رپورٽ ڳجهي هوندي، عدالتي حڪمن جي ڀڃڪڙي ڪري جي آءِ ٽي رپورٽ تي ميڊيا ۾ بحث ڪيو ويو، آصف علي زرداري 26 ڊسمبر تي جي آءِ ٽي رپورٽ بابت حڪمت عملي جو اعلان ڪندو، موجوده احتساب ۾ صرف ۽ صرف اپوزيشن اڳواڻ اچن ٿا، جنهن جو مقصد صرف اپوزيشن جو صفايو ۽ حڪومت کي مضبوط ڪرڻ آهي،هن چيو ته سمورا قدم سليڪٽيڊ حڪومت کي تحفظ ڏيڻ لاءِ ڪيا پيا وڃن، پ پ لاءِ هي الزام نوان ناهن،پ پ سدائين عدالتن ۾ پنهنجي بي گناهي ثابت ڪئي، پ پ انهن مان ناهي جيڪا ميدان ڇڏي ڀڄي وڃي، اسان مقابلو ڪنداسين، پ پ ترجمان چيو ته بلاول ڀٽو زرداري کي نشانو بڻايو ويو ته ڪارڪن ۽ عوام روڊن تي هوندو، بلاول کان ان وقت جو حساب ورتو پيو وڃي جڏهن هو هڪ سال جو هو.
نوازشريف اڊيالا جيل منتقل، ابتدائي طبي معائنو مڪمل
سزا ملڻ بعد اڳوڻي وزيراعظم کي اڊيالا جيل جي خاص سيل ۾ منتقل ڪيو
نواز شريف کي اڱاري تي صبح جو ڪوٽ لکپت جيل لاھور منتقل ڪيو ويندو
اسلام آباد (م ڊ) نيب ٽيم نوازشريف کي احتساب عدالت کان اڊيالا جيل منتقل ڪري ڇڏيو، سندس ابتدائي طبي معائنو مڪمل ڪيو ويو، العزيزيه ريفرنس ۾ احتساب عدالت مان سزا ملڻ کانپوءِ نيب باقائده طور اڳوڻي وزيراعظم ميان نوازشريف کي گرفتار ڪري احتساب عدالت کان اڊيالا جيل جي خاص سيل ۾ منتقل ڪيو، جتي اڳوڻي وزيراعظم ميان نوازشريف جو ابتدائي طبي معائنو مڪمل ڪيو ويو آهي، ذريعن موجب نوازشريف کي اڱاري تي صبح جو اڊيالا جيل کان ڪوٽ لکپت جيل منتقل ڪيو ويندو.
علي محمد مهر ۽ علي گوهر مهر کي اغوا معاملي تي سپريم ڪورٽ جا نوٽيس
ڪراچي(رپورٽر)سپريم ڪورٽ ڪراچي رجسٽري وفاقي وزير علي محمد مهر ۽ سندس ڀاءَ علي گوهر مهر کي اغوا معاملي ۾ نوٽيس جاري ڪري ڇڏيا آهن،سپريم ڪورٽ ڪراچي رجسٽري ۾ درخواستگذار قمبر علي شاهه پنهنجي درخواست ۾ چيو آهي ته علي محمد مهر،سندس ڀاءُ علي گوهر مهر ٻين ماڻهن سان گڏجي 2015 ۾ سندس گهر تي حملو ڪيو،حملي وقت انهن سان ٻيا به ڪيترائي ماڻهو گڏ هئا،هنن منهنجي ٻن ڀائرن فرمان علي شاهه ۽ عمران علي شاهه کي اغوا ڪيو،جيڪي اڃا تائين بازياب نه ٿيا آهن،هن درخواست ڪئي ته سندن مٿان اغوا جو ڪيس داخل ڪيو وڃي.جسٽس مقبول جي سربراهي ۾ ٻه رڪني بئنچ علي محمد مهر سندس ڀاءُ علي گوهر مهر ۽ ٻين کي نوٽيس جاري ڪري ڇڏيا آهن.
نواز انتقام کي منهن ڏنو، عمران خان جو وارو آهي: مريم اورنگزيب
اليڪشن چور حڪومت ميڊيا تي ڪنٽرول چاهي ٿي، سينسرشپ مڙھي وئي آهي
اسلام آباد (رپورٽر) مسلم ليگ ن جي ترجمان مريم اورنگزيب چيو آهي ته نوازشريف انتقامي سياست کي منهن ڌئي رهيو آهي،هاڻي عمران خان جي حساب جو وارو اچي ويو آهي، ن ليگ ترجمان مريم اونگزيب وفاقي وزير فواد چوڌري جي بيان جي رد عمل ۾ چيو آهي ته الحمدالله نوازشريف خلاف هڪ رپئي جي ڪرپشن يا ڪميشن ثابت نه ٿي، اڍائي سالن جي سخت احتساب باوجود نيب نوازشريف خلاف ڪرپشن ثابت نه ڪري سگهيو، نه وري پنهنجي الزامن جو ڪو ثبوت ڏئي سگهيو آهي، اڄ عمران خان جا ڪوڙا الزام بي نقاب ٿي ويا.
ن ليگ ترجمان جو چوڻ هو ته فواد صاحب اوهان ٻين تي الزام لڳائڻ بدران عليمه باجي جو حساب ڏيو،جهانگير ترين جي لٽيل رقم پاڪستان واپس آڻيو، فيصلو اچڻ کانپوءِ حڪومتي ٽيم بوکلاهٽ جو شڪار آهي ته نوازشريف خلاف ڪرپشن ثابت نه ٿي سگهي، هاڻي عمران خان جي احتساب جو وقت اچي ويو آهي ۽ عمران عليمه باجي جي نالي ٺاهيل بي نامي ملڪيت جو جواب ڏي، نوازشريف 165 پيشيون ڀوڳي تاريخ رقم ڪئي، هاڻي عمران خان جي جواب ڏيڻ جو وقت آهي. مريم اورنگزيب جو چوڻ هو ته اليڪشن چور حڪمرانن ميڊيا ۾ بدترين سينسرشپ لاڳو ڪئي آهي،حڪومت ميڊيا جا فنڊ روڪي ميڊيا تي ڪنٽرول ڪرڻ چاهي ٿي.
مني لانڊرنگ ڪيس جي ڀيٽ ۾ نوازشريف ويچارو آهي، جي آءِ ٽي زرداري سسٽم کي وائکو ڪيو: شهزاد اڪبر
اسلام آباد (م ڊ) وزيراعظم جي صلاحڪار شهزاد اڪبر چيو آهي ته مني لانڊرنگ ڪيس کي ڏسجي ته نوازشريف ويچارو آهي، جي آءِ ٽي رپورٽ ڇرڪائي ڇڏيو آهي، اومني گروپ ذريعي سنڌ حڪومت استعمال ٿي، مراد علي شاهه به ان معاملي ۾ ملوث آهي، اسلام آباد ۾ فواد چوڌري سان گڏ پريس ڪانفرنس ڪندي وزيراعظم جي صلاحڪار بيريسٽر شهزاد اڪبر جو چوڻ هو ته جي آءِ ٽي رپورٽ سنڌ ۾ زرداري سسٽم کي بي نقاب ڪيو، سنڌ جا ماڻهو زرداري سسٽم کان واقف آهن، اسان گري لسٽ ۾ ڇو آهيون، جي آءِ ٽي رپورٽ ڏسي خبر پئجي وڃي ٿي، جعلي اڪائونٽس ذريعي پئسا هڪ کان ٻي ۽ ٻي کان ٽئين کي منتقل ٿيا، اومني گروپ کي خريدڻ بعد سنڌ حڪومت ان انڊسٽري لاءِ اسڪيم ڪڍندي هئي، مختلف شعبن جي سسبڊي مد ۾ 60 ارب رپيا جعلي اڪائونٽس ۾ منتقل ڪيا ويا، اومني جي اثاثن جي ڪل رقم 15 ارب کان وڌيڪ نه هئي، اثاثا وڌيڪ ڏيکاري اومني گروپ کي سنڌ بينڪ ۽ نيشنل بينڪ کان 54 ارب رپين جو قرض ڏنو ويو، جي آءِ ٽي رپورٽ مطابق ڪيس جو مرڪزي ڪردار آصف زرداري آهي،بلاول لاءِ 27 ٻڪرن جي قرباني به جعلي اڪائونٽ مان ڪئي وئي، فريال ٽالپر جي ڊفينس واري گهر ۽ زرداري جي نوابشاهه واري گهر لاءِ رقم به جعلي اڪائونٽ مان ڏني وئي.
جوهي ڀرسان ڪانڌين کان ڦرلٽ، احتجاج، اطلاع باوجود پوليس نه پهتي
دادو(رپورٽر) جوهي جي حاجي لنڪ روڊ تي حادثي ۾ فوت ٿيل ميان ڏتو کوسو جو مڙھ سول اسپتال دادو کان ڪاڇي جي باز مال کوسو نيو پئي ويو ته جوهي ڀرسان حاجي خان لنڪ روڊ تي 12 هٿياربند ڦورن ايمبولنس ۽ ان سان گڏ موٽر سائيڪلن تي ويندڙ ڳوٺاڻن کي هٿيارن جي زور تي روڪي 2 موٽر سائيڪلون ۽ 8 موبائيل سيٽ ڦر ڪري ڀڄي ويا آهن فوتي ڳوٺاڻي جي وارثن پاران جوهي پوليس کي اطلاع ڏنو پر پوليس ٻن ڪلاڪن تائين واقعي واري هنڌ نه پهتي ڳوٺاڻن محبوب ، اعجاز کوسو ، شريف لنڊ ۽ ٻين احتجاج ڪندي چيو ته ميت سان گڏ هئڻ باوجود،انسانيت کان ڪريل ڦورن کائن ڦر ڪئي آهي ٻئي طرف ايس ايس پي دادو پرويز احمد عمراڻي جو چوڻ آهي اهڙي واقعي جو اطلاع آهي جلد پوليس واقعي ۾ ملوث جوابدار گرفتار ڪري ڦر ڪيل سامان واپس ڪرائيندي.
نوازشريف کي فليگ شپ ريفرنس مان ٽيڪنيل طور بري ڪيو ويو: فواد چوڌري
آصف زرداري ۽ نوازشريف بي نقاب ٿي ويا، نواز جي دفاع لاءِ سندس ٻار به نه آيا
اومني ذريعي سنڌ حڪومت کي استعال ڪيو ويو، ان معاملي ۾ مراد شاهه به ملوث آهي
اسلام آباد (م ڊ) سڌ سماءَ واري وفاقي وزير فواد چوڌري چيو آهي ته آصف زرداري ۽ نوازشريف اڄ بي نقاب ٿي ويا،فليگ شپ ريفرنس ۾ نوازشريف کي ٽيڪنيڪل بنيادن تي بري ڪيو ويو، وفاقي وزير پريس ڪانفرنس ڪندي چيو ته دنيا جي ڪرپٽ ماڻهن ۾ نوازشريف جو نالو آهي، پاناما ڪيس کي انجام تي پهچائڻ لاءِ عمران خان جي قيادت ۾ ڊگهي جدوجهد ڪئي، هن چيو ته نوازشريف پرڏيهه ۾ اولاد جي نالي تي مڪليتون خريد ڪيون، حسن نواز جي گرفتاري کانپوءِ فليگ شپ ريفرنس اڳتي وڌندو، پاناما ڪيس اپريل ۾ سامهون آيو هو، نوازشريف کي تمام وڏو موقعو مليو،پر ڪنهن به فورم تي وضاحت نه ڪري سگهيو،نوازشريف جي دفاع لاءِ ٻار به نه آيا، اومني گروپ ذريعي سنڌ حڪومت کي استعمال ڪيو ويو، ان سموري معاملي ۾ مراد علي شاه به ملوث آهي.
نيب نوازشريف کي وٺي اڊيالا رواني، سڀاڻي ڪوٽ لکت منتقلي جو امڪان
اسلام آباد (م ڊ) نيب ٽيم نوازشريف کي وٺي احتساب عدالت کان اڊيالا جيل رواني ٿي وئي، العزيزيه ريفرنس ۾ احتساب عدالت مان سزا ملڻ کانپوءِ نيب باقائده طور اڳوڻي وزيراعظم ميان نوازشريف کي حراست ۾ وٺي عدالت کان اڊيالا جيل وٺي وئي، ذريعن موجب نوازشريف کي سڀاڻي صبح جو اڊيالا جيل کان ڪوٽ لکپت جيل منتقل ڪيو ويندو.
”نواز شريف کي ڪوٽ لکپت جيل ۾ رکيو وڃي“ عدالت جو حڪم
عدالت نواز طرفان اڊيالا جيل کان ڪوٽ لکپت جيل منتقل ڪرڻ واري درخواست منظور ڪئي
اسلام آباد (رپورٽر) اسلام آباد جي احتساب عدالت نواز شريف کي اڊيالا کان ڪوٽ لکپت جيل منتقل ڪرڻ جو حڪم ڏئي ڇڏيو. نواز شريف کي العزيزيه ريفرنس ۾ سزا ملڻ بعد وڪيل خواجه حارث طرفان نواز شريف کي اڊيالا کان ڪوٽ لکپت جيل منتقل ڪرڻ لاءِ درخواست داخل ڪئي. عدالت درخواست منظور ڪندي نواز شريف کي لاهور جي ڪوٽ لکپت جيل ۾ رکڻ جو هڪم ڏئي ڇڏيو.
سينيٽ ۾ اپوزيشن خلاف ڪاررواين تي احتجاج، پيپلزپارٽي جو واڪ آئوٽ
اسلام آباد (بيورو رپورٽ) سينيٽ جي اجلاس ۾ مخالف ڌر خلاف انتقامي ڪارروايون ڪرڻ تي احتجاج. پيپلز پارٽي جو واڪ آئوٽ، ڪورم جي نشاندهي، اجلاس بنا ڪارروائي جي اڻ اعلانيل مدي تائين ملتوي. سينيٽ جو اجلاس سينيٽ چيئرمين صادق سنجراڻي جي صدارت ۾ ٿيو ته پوائنٽ آف آرڊر تي ڳالهائيندي پيپلز پارٽي جي اڳواڻ شيري رحمان چيو ته هي ايوان ٻُسو ٻُسو لڳي رهيو آهي ڇو ته مخالف ڌر جا ميمبر پنهنجي قيادت سان عدالتن اڳيان جھڪڻ لاءِ عدالتن ۾ موجود آهن. هن چيو ته سپريم ڪورٽ ۾ جي آءِ ٽي رپورٽ پروجيڪٽر ذريعي ڏيکاري وئي، پيپلز پارٽي جي قيادت کي تڪراري بنائڻ جي ڪوشش ٿي رهي آهي. احتساب جي نالي تي قوم سان مذاق ڪيو پيو وڃي. هن چيو ته وزيراعظم جي احتساب بابت خصوصي معاون ايف آءِ اي جي عملدارن سان ملاقاتون ڪيون، گواهن سان مليو. هي ڪهڙو مذاق بنايو پيو وڃي. هي ڪهڙي قسم جي جي آءِ ٽي ٺهي آهي. توهان احتساب ڪرڻ چاهيو ٿا ته ڪيو، پيپلز پارٽي ۽ مخالف ڌر ان لاءِ حاضر آهي. اسان، عوام ۽ عدالتن کي مسلسل جواب ڏيندا رهيا آهيون. هن چيو ته سرگوڌا يونيورسٽي جو پروفيسر سرڪاري تحويل ۾ فوت ٿيو. تدفين وقت سندس جسم زنجيرن سان جڪڙيل هو، ڇا هي مديني جي رياست آهي؟ جتي ذوالفقار علي ڀٽو، بينظير ڀٽو ۽ ان جي پارٽي کي انصاف نه ٿو ملي. هن چيو ته آصف زرداري 11 سال جيل ڪاٽيو پر سندس خلاف ڪو ڪيس ثابت نه ٿيو پر آئين ٽوڙڻ وارن کي مڪمل ڇوٽ ڏني وئي آهي ته اهي ملڪ کان ٻاهر آهن. احتساب رڳو مخالف ڌر جو ڇو ٿي رهيو آهي؟ وزير اعظم جي فيملي ميمبرن پنهنجا اثاثه ظاهر نه ڪيا. اوهان پنهنجي ملڪيت کي ريگيولر پيا ڪيو. توهان سئو ڏينهن ۾ 50 هزار ماڻهن جا گھر ڊاٺا آهن ۽ هڪ لک ماڻهن کي بيروزگار ڪيو آهي. هنن جا انوکا لاڏلا معافيون حاصل ڪري رهيا آهن، کين ڇوٽ مليل آهي. ايف آءِ اي جي ڊي جي بشير ميمڻ جو ڀاءُ پيپلز پارٽي خلاف چونڊ وڙهي چڪو آهي. هي ڪهڙو احتساب آهي، احتساب جي نالي تي مخالف ڌر کان انتقام ورتو پيو وڃي. هن چيو ته هن ايوان کان ٻاهر جيڪڏهن ائين ٿيندو ته اسان هن ايوان کي ائين بي معنيٰ هلڻ نه ڏينداسين. جنهن تي قائد ايوان شبلي فراز چيو ته هڪ طرفو احتساب ٿيڻ بابت اپوزيشن چرچو بڻايو آهي. نواز شريف پنهنجي حڪومت ۾ نااهل ٿيو ان سان پي ٽي آءِ جو ڪو تعلق نه آهي. نيب چيئرمين پيپلز پارٽي ۽ ن ليگ مقرر ڪيو. ماضي ۾ انهن جي ڪرپشن تي پڙدو رکيو ويندو هو. پي ٽي آءِ حڪومت ادارن کي مداخلت کان پري رکيو آهي ۽ اسان چاهيون ٿا ته اهي آزادي سان ڪم ڪن. هن چيو ته پيپلز پارٽي 5 سال حڪومت ڪئي ان جي قاتلن کي انجام تائين ڇو نه پهچايو. هن چيو ته آصف زرداري مٿان ڪيس آهن، هي تنهنڪري دٻاءُ رکي رهيا آهن. جنهن تي اپوزيشن سينيٽ مان واڪ آئوٽ ڪري ٻاهر هلي وئي. ان دوران سڌ سماءُ جو وزير فواد چوڌري جواب ڏيڻ لاءِ اٿيو ته پيپلز پارٽي جي سينيٽر سسئي پليجو ڪورم پورو نه هجڻ جي نشاندهي ڪري ڇڏي جنهن تي سينيٽ چيئرمين ايوان جي ڪارروائي روڪي ڳڻپ ڪرائي ته ڪورم پورو نه هيو جنهن ڪري سينيٽ جي ڪارروائي اڌ ڪلاڪ لاءِ ملتوي ڪئي وئي. تيسيتائين سينيٽ چيئرمين حڪومتي ڌر کي مخالف ڌر کي پرچائڻ جي هدايت ڪئي. اڌ ڪلاڪ کانپوءِ سينيٽ جو اجلاس ٻيهر شروع ٿيو. مخالف ڌر اجلاس ۾ اچڻ کان حڪومت کي کتو جواب ڏئي ڇڏيو. جنهن سبب ڪورم پورو نه ٿي سگھيو ۽ سينيٽ جو اجلاس بنا ڪنهن معمول جي ڪارروائي جي اڻ ڄاتل مدي تائين ملتوي ڪيو ويو.
هر شخص کي لڳي ٿو ته مان ئي سڀ کان وڏو آهيان: ڪائره
جي آءِ ٽي رپورٽ جون ڳالهيون ته وزير به ڪندا رهيا آهن: پ پ اڳواڻ
لاهور(م ڊ ) پيپلزپارٽي جي مرڪزي اڳواڻ قمر زمان ڪائره چيو آهي ته هر شخص کي لڳي ٿو ته مان ئي سڀني کان وڏو آهيان ۽ مسئلي جو حل هُن وٽ آهي، پر مسئلن جو حل رڳو آئين تي عمل ڪرڻ ۾ آهي.
سپريم ڪور لاهور رجسٽري ٻاهران ميڊيا سان ڳالهائيندي قمر زمان ڪائره چيو ته جي آءِ ٽي رپورٽ ۾ اسان لاءِ ڪجهه به نئون ناهي، رپورٽ جون ڪيتريون ئي ڳالهيون اسان وزيرن کان به ٻڌيون، عدالتي پابندي باوجود جي آءِ ٽي رپورٽ ميڊيا تي آئي.
هن چيو ته اسان ٻڌائينداسين ته جي آءِ ٽي جي رپورٽ پهريان ڪٿي ڪٿي ڏيکاري وئي، سياسي ماڻهن سان گڏجي اها رپورٽنگ ڪئي وئي، جي آءِ ٽي
ڪراچي: چيف سيڪريٽري جي صدارت ھيٺ اجلاس، مختلف کاتن ۾ فوتي ڪوٽا تحت 254 ڀرتيون ڪرڻ جي منظوري
چيف سيڪريٽري ممتاز ساهه جي صدارت ۾ اجلاس ، فوتي ڪوٽا تي ڀرتين جو فيصلو ڪيو ويو
تعليم ۾ 150، صحت کاتي ۾ 38 ۽ گهرو کاتي ۾ 34 ملازم ڀرتي ڪرڻ جي منظوري
ڪراچي ( ن پ ا ) ڪراچي ۾ چيف سيڪريٽري سيد ممتاز علي ساهه جي صدارت هيٺ ٿيل فيصلي ۾ فوتي ڪوٽا تي 254 ماڻهن کي ڀرتي ڪرڻ جو فيصلو ڪيو ويو آهي ،جڏهن ته معذور ڪوٽا تي به عمل ڪرڻ جو فيصلو ٿيو آهي .اجلاس ۾ فيصلو ڪيو ويو ته اسڪول ايجوڪيشن کاتي ۾ 150 ، صحت کاتي ۾ 38 ۽ گهرو کاتي ۾ 34 ملازم ڀرتي ڪيا ويندا. چيف سيڪريٽري سيد ممتاز شاهه جو چوڻ هو ته فوتي توڙي معذور ڪوٽا ۾ هاڻ بلڪل به دير برداشت نه ڪنداسين .هن چيو ته ڀرتين واري عمل کي مڪمل طور تي شفاف بنايو ويندو .اجلاس ۾ لاڳاپيل کاتن جي سيڪريٽريز به شرڪت ڪئي .
ڪرمپور ۾ پورهيت جي قتل جو ڪيس تيغاڻي برادري جي 11 ڄڻن خلاف داخل
بجاراڻي – تيغاڻي تڪرار تان 2 ڏينهن اڳ پورهيت علي بجاراڻي قتل ٿيو
نوجوان جي قتل بعد ڌرين ۾ ٺاهه جي تاريخ مقرر ڪرڻ لاءَ رٿيل گڏجاڻي ملتوي
ڪرمپور (رپورٽر)ڪرمپور ۾ بجاراڻي- تيغاڻي خوني تڪرار ۾ ٻه ڏينهن اڳ بيگناه قتل ٿيل پورهيت نوجوان دوست علي بجاراڻي جو قتل ڪيس سندس ڀائيٽي جي فرياد تي تيغاڻي برادري جي 11 جوابدارن خلاف غوثپور ٿاڻي تي داخل ڪيو ويو آهي .ڪيس ۾ غازي تيغاڻي ، نادر ،ارباب ، واحدبخش ، ثناءالله، علي محمد، محبوب،رحمت الله ۽ ٽن نامعلوم جوابدارن کي ڪيس ۾ نامزد ڪيو ويو پوليس پاران هڪ جوابدار رحمت الله عرف ٻوڙو تيغاڻي کي گرفتار ڪرڻ جي دعوي ڪئي آهي . هوڏانهن گذريل ڏينهن ٻنهي برادرين جي سردارن سردار محبوب علي بجاراڻي ، سردار تيغو خان تيغاڻي ۽ (جسم) چيئرمين رياض چانڊيو ۽ سردار منظور پنهنور جي گڏجاڻي ڪراچي ۾ رٿيل هئي جنهن ۾ خوني جهيڙي جي خاتمي لاء جرڳي جي تاريخ مقرر ڪرڻي هئي پر هن واقعي کان پوء اها گڏجاڻي ڪينسل ڪئي وئي ۽ فيصلي جي تاريخ مقرر نه ٿي سگهي .