ممبئي (شوبز ڊيسڪ) بالي ووڊ اداڪار سلمان خان جي فلم ”ڀارت“ جي آخري شيڊول جي عڪسبندي نئين سال جي شروعات ۾ مڪمل ٿيندي. ان سلسلي ۾ هدايتڪار علي عباس ظفر جو چوڻ هو ته فلم ”ڀارت“ جي پنجاب ۽ دهلي شيڊول جي عڪسبندي مڪمل ڪئي وئي آهي، جنهن بعد هاڻي فلم جي آخري شيڊول جي عڪسبندي نئين سال جي شروعات ۾ ڪئي ويندي. فلم ۾ اداڪار سلمان خان، ڪترينه ڪيف سان گڏ ديشا پتاني، تبو ۽ ٻيا شامل آهن، جڏهن ته فلم ايندڙ سال عيد تي ريليز ڪئي ويندي.
ممبئي (شوبز نيوز) بالي ووڊ اداڪارا تپسي پنو پاران ٽوئٽر تي هڪ مداح کي ڏنل جواب گوگل ٽرينڊ بڻجي ويو آهي. ٻه ڏينهن اڳ تپسي پنو جي ٽوئٽر تي سندس مداح ظاهري ۽ جسماني تعريف ڪئي، جنهن تي تپسي جواب ڏنو ته کيس پنهنجو پورو جسم سٺو لڳندو آهي. تپسي پنو مداح کان سوال ڪندي چيو ته کيس جسم مان سيريبرم cerebrum وار حصو پسند آهي، توهان کي ڪهڙو پسند آهي. تپسي پنو جيئن ئي اهو لفظ استعمال ڪيو ته ڀارت ۾ ماڻهو ان لفظ کي گوگل ڪرڻ لڳا ۽ ان ڏينهن کان اڄ تائين سيريبرم ڀارت ۾ سڀ کان وڌيڪ گوگل ذريعي ڳولجهندڙ لفظ آهي. ان کانپوءِ سوشل ميڊيا تي پڻ اهو ٽرينڊ بڻجي ويو ۽ مداح تپسي جي جواب کي پسند ڪرڻ لڳا.
ممبئي (شوبز نيوز) بالي ووڊ جي خوبصورت اداڪارا نرگس فخري بالي ۾ ڪيتري عرصي کان ڪا به فلم نه ڪئي آهي، جڏهن ته هاڻي هوءَ خوف ۽ دهشت سان ڀرپور فلم اماوس ۾ ڪم ڪندي، جنهن جو ٽريلر جار ڪيو ويو آهي. اماوس ۾ نرگس فخري سان گڏ سچن جوشي مک ڪردار ادا ڪري رهيا آهن. خوفناڪ فلمون ڊائريڪٽ ڪندڙ ڀوشن پٽيل جي نئين فلم کي ايندڙ سال جنوري تي نمائش لاءِ پيش ڪيو ويندو، سندس ان کان اڳ راگني ايم ايم ايس، اَلون، 1920 ايول ريٽرنس جهڙيون فلمون ڏئي چڪو آهي.
ممبئي (شوبز نيوز) بالي ووڊ اداڪار جيڪي شيروف جو پٽ ٽائيگر شيروف بالي ۾ پنهنجا پير مضبوط ڪرڻ ۾ ڪامياب ٿي ويو آهي، سندس فلم باغي سيريز جي ٽئين فلم جو اعلان ڪيو ويو آهي. فلم جي هدايتڪار ساجد ناڊيا والا پاران فلم کي 2020ع ۾ ريليز ڪرڻ جو اعلان ڪري ڇڏيو آهي. باغي سيريز جون پهريون ٻه فلمون باڪس آفيس تي ڪامياب ٿيون هيون، جنهن کانپوءِ باغي ٿري جو اعلان ڪيو ويو. فلم جي هيرو ٽائيگر پاران ٽوئٽر ذريعي فلم جو پوسٽر پڻ جاري ڪيو.
لاس اينجلس (شوبز نيوز) هالي ووڊ جي ٿري ڊي اينيميٽڊ ڪاميڊي فلم “دي سيڪريٽ لائيف پيٽس 2” جو ٽريلر جاري ڪيو ويو آهي. فلم جو پهريون حصو 2016ع ۾ جاري ڪيو ويو هو، جڏهن ته فلم جي سيڪيول کي ٿري ڊي ۾ پيش ڪيو ويندو. هدايتڪار ڪرس رينائوڊ جي فلم ڪهاڻي گهر ۾ پاليل جانورن جي زندگي جي چوڌاري گهمي ٿي. فلم ۾ مزاح سان گڏ تجسس به شامل آهي، جڏهن ته پالتو جانورن جي حرڪتن سبب گذريل ڀيري به فلم مداحن کي تمام گهڻو متاثر ڪيو هو، پر هن سال مداحن کي وڌيڪ انتظار ڪرڻو پوندو ڇو ته فلم کي ايندڙ سال 7 جون تي ريليز ڪيو ويندو.
دبئي (شوبز نيوز) ڪنگ خان شاهه رخ پنهنجي نئين ايندڙ فلم “زيرو” جي مشهوري لاءِ دبئي پهتل آهي. ڪنگ خان گذريل فلم جي ناڪامي کانپوءِ پنهنجي نئين فلم جي ڪاميابي لاءِ تمام گهڻي محنت ڪري رهيو آهي ۽ فلم جي مشهوري لاءِ ڏينهن رات هڪ ڪري ڇڏي آهي. شاهه رخ خان جي نئين فلم ڪرسمس جي موقعي تي ريليز ٿيندي، جنهن ۾ ڪترينا ڪيف ۽ انوشڪا شرما پڻ اهم ڪردار ادا ڪري رهيون آهن.
ممبئي (شوبز ڊيسڪ) بالي ووڊ ڊمپل گرل نيٺ شادي ۾ رنبير ڪپور جي شرڪت نه ڪرڻ تي خاموشي ٽوڙي ڇڏي. ڀارتي ميڊيا سان ڳالهائيندي دپيڪا پڊوڪون چيو ته منهنجي ۽ رنبير جي سٺي دوستي هئي، پر شاديءَ بعد اسان ٻنهي هڪ ٻئي سان ناهي ڳالهايو ۽ ڪو رابطو به ناهي ڪيو. هن چيو ته شادي ۾ رنبير جو نه اچڻ مون لاءِ حيران ڪندڙ نه هو، ڇو ته اسان ٻنهي جيڪو رشتو هو، ان ۾ شيءِ ممڪن آهي ۽ اهو ئي رشتي جو حسن به آهي. سندس چوڻ هو ته ان بابت مان وڌيڪ ڪا به ڳالهه نٿي ڪرڻ چاهيان.
ڪراچي (شوبز ڊيسڪ) فلمي دنيا جي سڀ کان ناليواري ۽ اهم ايوارڊ آسڪر ڏيندڙ اداري پرڏيهي ٻولين جي ڪيٽيگرين سميت 9 مختلف ڪيٽيگرين جي فلمن کي شارٽ لسٽ ڪري ورتو، پاڪستاني فلم پرڏيهي ٻولي واري ڪيٽيگري ۾ نه چونڊجي سگهي. پاڪستان جي آسڪر اڪيڊمي هلندڙ سال 18 سيپٽمبر تي فلم “ڪيڪ” کي پرڏيهي ٻولي جي ڪيٽيگري لاءِ اماڻيو هو. پاڪستاني فلم جو مقابلو دنيا جي 93 ملڪن جي فلمن سان هو. ان ڪيٽيگري ۾ پاڪستان ۽ ڀارت سميت ڏکڻ ايشيائي، يورپي، آفريقي، ۽ وچ اوڀر ۽ آمريڪي ملڪن مان فلمون اماڻيون ويون هيون. جنهن ۾ رڳو پاڪستاني پر ڀارتي فلم به شارٽ لسٽ نه ٿي سگهي. آسڪر اڪيڊمي پرڏيهي ٻولي جي ڪيٽيگري لاءِ مجموعي طور 9 فلمن کي شارٽ لسٽ ڪيو، جن ۾ ڏکڻ ايشيا جي ملڪ جي ڪا به فلم شامل ناهي.
ممبئي (شوبز ڊيسڪ) بالي ووڊ ادڪار شاره رخ خان چيو آهي ته هر انسان ۾ کوٽون هونديون آهن، هر عيب کان پاڪ رڳو الله جي ذات آهي. ڀارتي ميڊيا موجب اداڪاره شاه رخ خان هڪ انٽرويو ۾ چيو ته هو پنهنجي غلطين ۽ کوٽن باوجود اڄ هڪ اسٽار آهي، کوٽن کان پاڪ ناهيان، ڪيتريون ئي کوٽون ۽ خوبيون هر انسان ۾ هونديون آهن. هن چيو ته مداح غلطين ۽ کوٽن باوجود پسند ڪن ٿا، مون کي رقص نٿو اچي، نه ئي خوبصورت آهيان ۽ بهترين اداڪاري به نٿو ڪري سگهان، جيڪڏهن مون ۾ کوٽون نه هجن ها ته مان بهترين ادڪار هجان هان.
اسلام آباد (شوبز ڊيسڪ) اطلاعات واري وفاقي وزير چوڌري فواد هسين فلم ۽ ٽي وي جي نامياري اداڪار اعجاز جي لاڏاڻي تي افسوس جو اظهار ڪيو. تعزيتي بيان ۾ وفاقي وزير چيو ته اڄ پاڪستان هڪ ورسٽائل فنڪار کان محروم ٿي ويو، فن جي دنيا ۾ سندس کوٽ سدائين محسوس ڪئي ويندي. هن چيو ته علي اعجاز باصلاحيت اداڪار هو، جنهن مزاحيه ۽ سنجيده ڪردار نهايت خوبصورتي سان نڀايا. اطلاعات واري وفاقي وزير چيو ته علي اعجاز مزاح کي هڪ نئون رنگ ڏنو، جڏهن ٽريجڊي ڪردار ڪيا ته ڪيترائي سال گذرڻ بعد به ماڻهو ان کي نه وساري سگهيا. چوڌاري فواد حسين دعا ڪئي ته مرحوم کي الله تعاليٰ جنت ۾ جاءِ ڏي ۽ وارثن کي صبر ڏي.
ممبئي (شوبز نيوز) بالي ووڊ جي نالي واري ڳائڻي سونو نگم پاڪستاني گلوڪارن کي ڀارتي فلمن ۾ ڪم ملڻ تي ڪاوڙجي پيو آهي. ڀارتي ميڊيا کي ڏنل هڪ انٽرويو ۾ سونو نگم چيو آهي ته سٺو هجي هان ته هو پاڪستاني هجي هان، گهٽ ۾ گهٽ پاڙيسري ملڪ مان هجڻ تي کيس فلمن ۾ ڪم ته ملي وڃي هان. هن چيو ته ميوزڪ ڪمپنيون جيڪو رويو ڀارتي گلوڪارن سان رکي رهيون آهن اهو رويو پاڪستاني گلوڪارن سان رکي ئي نٿيون ڪري سگهن. سونو نگم چيو ته موسيقي واريون ڪمپنيون ڀارتي گلوڪارن مٿان سخت شرط رکن ٿيون پر پاڪستاني گلوڪارن تي اهي شرط لاڳو نٿا ٿين. حيرانگي طور سونو نگم عاطف اسلم کي پنهنجو دوست قرار ڏيندي چيو ته ڪاش هو به پاڪستاني هجي هان، جڏهن ته هن ڀارت ۾ عاطف ۽ راحت فتح علي خان کي اهميت ڏيڻ تي ڪاوڙ جو اظهار ڪيو.
ممبئي (شوبز نيوز ) صبا قمر ۽ عرفان خان جي بالي ووڊ فلم ” هندي ميڊيم“ بلاڪ باسٽر ثابت ٿي هئي، جنهن ڀارت ۾ 3 سئو ڪروڙ روپين جو بزنس ڪيو هو، هاڻ ان ڪامياب فلم جو سيڪيول ٺاهيو ويندو. ڀارتي ميڊيا موجب فلسمازن ان سلسلي ۾ عرفان خان سان لنڊن ۾ ملاقات پڻ ڪئي، جيڪو نيورو اينڊوڪرائن ڪينسر جي علاج ڪرائي رهيو آهي،فلم هدايتڪار بالي ووڊ بادشاهه شاهه رخ خان ۽ ڪاجول کي ” هندي ميڊيم “ جي سيڪوئل ۾ ڪاسٽ ڪرڻ جو فيصلو ڪيو آهي. دنيش ويجان ۽ ڀوشن ڪمار جي پروڊڪشن ۽ ساڪت چوڌري جي هدايتڪاري هيٺ ٺاهيل فلم هندي ميڊيم جي ڪهاڻي چاندني چوڪ جي شادي شدا جوڙي جي زندگي تي ٻڌل آهي، جيڪي پنهنجي نينگري کي انگريزي اسڪول ۾ داخل ڪرائڻ لاءِ دهلي لڏي ويندا آهن.
ممبئي (شوبز نيوز) بالي ووڊ ڪوئين ڪنگنا راناوت جي نئين فلم “ماني ڪرنيڪا” جون پهريون جهلڪيون جاري ڪيون ويون آهن. ٽن منٽن جي ٽريلر ۾ ڪنگنا کي هڪ عام ڇوڪري مانو کان جهانسي جي راڻي ۽ هڪ آزادي پسند راڻي جي ڪردار ۾ ڏيکاريو ويو آهي. ايسٽ انڊيا ڪمپني جهانسي تي قبضو ڪرڻ چاهي ٿي، جڏهن ته ساڳي وقت هندستاني انگريزن خلاف بغاوت جو اعلان ڪن ٿا. فلم جي مک ڪردار ۾ ڪنگنا راناوت شامل آهي، جڏهن ته ڊيني ڊينزونگپا فلم ۾ غلام غوث خان جو ڪردار ادا ڪيو آهي. فلم جا ٻيا اهم ڪردار جشو سين گپتا، سريش اوبراءِ، اتل ڪولڪرني، زيشان ايوب ادا ڪري رهيا آهن. ايڪشن ۽ تجسس سان ڀرپور فلم کي 25 جنوري تي ريليز ڪيو ويندو.
ممبئي (شوبز نيوز) بالي ووڊ جي خوبصورت اداڪارا ڪترينا ڪيف پنهنجي شادي جي حوالي سا نيٺ بيان ڏنو آهي. ممبئي ۾ پنهنجي نئين ايندڙ فلم “زيرو” جي مشهوري تقريب دوران صحافين پاران شادي جي حوالي سان پڇيل سوال جي جواب ۾ ڪترينا ڪيف چيو ته سندس شادي جي سڀني کي فڪر آهي ته مان ڪڏهن ڪنديس، پر منهنجو مڃڻ آهي ته شادي لاءِ ڪا منصوبابندي ناهي ڪبي، مان اها وقت تي ڇڏي ڏني آهي. شادي اهڙي شيءِ ناهي جو توهان انٽرنيٽ تي وڃي بٽڻ دٻايو ۽ گهوٽ حاضر ٿي وڃي، ان ۾ وقت لڳندو آهي، منهنجي لاءِ شادي جي منصوبابندي غير ضروري آهي. جيڪڏهن شادي ٿيڻي هوندي ته پاڻ ئي ٿي ويندي. ڪترينا ڪيف چيو ته جيڪڏهن مونکي ضرورت محسوس ٿي شادي لاءِ پاڻ کي پيش ڪري ڇڏيندس.
لاهور (شوبز نيوز) لالي ووڊ اداڪارا ميرا جي بينڪ اڪائونٽ مان هيڪر لکين روپيا ڪڍرائي ويا آهن. لاهور ۾ ميڊيا سان ڳالهائيندي ميرا چيو ته سندس اڪائونٽ مان 4 لکن جي رقم غائب ٿي وئي آهي، جيڪا هڪير چورائي ويا آهن. ميرا چيو ته هن ان حوالي سان بينڪ سان ڳالهايو پر بينڪ طرفان ڪو به جواب ناهي آيو، تنهنڪري جلد پريس ڪانفرنس ڪندس. ان موقعي تي اداڪارا چيو ته هو جلد پنجاب جي ثقافت واري وزير فياض الحسن چوهاڻ سان ملاقات ڪندي ۽ حڪومت کان اپيل ڪندي ته فلم ٺاهڻ ۾ سندس مدد ڪئي وڃي.