پيرس (اسپورٽس ڊيسڪ) اڳوڻو فرانسيسي رانديگر سيبسٽين گروسجين ٻن سالن لاءِ فرانس ڊيوس ڪپ ٽيم جو ڪپتان مقرر ٿي ويو.
40 ورهين جو فرانسيسي رانديگر کي ڪيريئر دوران 4 اي ٽي پي ٽائٽل کٽڻ جو اعزاز حاصل آهي ۽ هن 2010 ۾ عالمي ٽينس تان رٽائرمينٽ ورتي هئي. گروسجين پنهنجي بيان ۾ چيو ته قومي ڊيوس ڪپ ٽيم جو ڪپتان مقرر ٿيڻ مون لاءِ فخر جوڳي ڳالهه آهي. هن چيو ته آئون هر چيلنج کي منهن ڏيڻ لاءِ پوري طرح تيار آهيان.
گروسجين 2001 ۾ ڊيوس ڪپ فاتح ٽيم جو حصو هو.

ڪوٽڙي (رپورٽر) ڪوٽڙي ۾ پاڪستان بلائنڊ ڪرڪيٽ ٽي ٽوئنٽي ٽورنامينٽ شروع ٿي وئي، پهرين ڏينهن ٿيل ٻن ميچن ۾ پنجاب سنڌ ۽ بلوچستان ڪي پي کي شڪست ڏني.
پاڪستان بلائنڊ ڪرڪيٽ ڪائونسل جي انتظام هيٺ شروع ٿيل ٽي ٽوئنٽي ٽورنامينٽ جي افتتاحي ميچ ۾ سنڌ ٽيم ٽاس کٽي پهرين فيلڊنگ جو فيصلو ڪيو، جيڪو غلط ثابت ٿيو.
پنجاب ٽيم 4 وڪيٽن جي نقصان تي 212 رنسون ٺاهيون، بيٽسمين نثار علي 70 ۽ محسن خان 65 رنسون ٺاهيون.
جواب ۾ سنڌ ٽيم مقرر اوورن ۾ ٽن وڪيٽن جي نقصان تي 204 رنسون ٺاهي سگهي. ميچ کٽڻ بعد پنجاب ٽيم جي رانديگرن خوشي ۾ جهمريون پڻ هنيون.
ٻي ميچ ۾ بلوچستان ٽيم ڪي پي کي 32 رنسن تان شڪست ڏئي ميچ پنهنجي نالي ڪئي. بلوچستان ٽيم ٽاس کٽي پهرين بيٽنگ جو فيصلو ڪيو. پهرين بيٽنگ ڪندي بلوچستان جي ٽيم مقرر اوورن ۾ ٽن وڪيٽن جي نقصان تي 210 رنسون ٺاهيون، بيٽسمين اڪرم شاندار بيٽنگ ڪندي 130 ۽وقاص علي 36 رنسون ٺاهيون.
جواب ۾ ڪي پي ٽيم 6 وڪيٽن جي نقصان تي 178 رنسون ٺاهي سگهي، ڪي پي جي بيٽسمين ايوب خان 35 ۽ معين علي 41رنسون ٺاهي ٽاپ اسڪورر رهيا.
هوڏانهن افتتاحي تقريب ۾ وڏي انگ ۾ ماڻهن شرڪت ڪئي، جڏهن ڪمشنر حيدرآباد خاص مهمان طور شرڪت ڪئي.
تقريب کي خطاب ڪندي ڪمشنر حيدرآباد چيو ته اسپيشل نوجوانن لاءِ راندين جا موقعا ٿيڻ تمام بهتر عمل آھي، حيدرآباد ڊويزن جي اسپيشل رانديگرن جي نوڪري وارو مسئلو به حل ڪنداسين. هن چيو ته حيدرآباد ڊويزن ۾ جيڪڏهن ڪرڪيٽ ميدانن تي قبضا آھن ته رهواسي شڪايت ڪن ته جيئين اسان قبضا ختم ڪرائي سگهون.

سڊني (اسپورٽس ڊيسڪ) آسٽريليا پاڪستان دورو پي ايس ايل جي لاهور ۽ ڪراچي جي ميچن سان مشروط ڪري تجويز ڪيل شيڊول ۾ به ترميم ڪري ڇڏي.
ڪرڪيٽ آسٽريليا جي سڪيورٽي ٽيم ۽ 3 عملدار مارچ جي پهرين هفتي ۾ پي سي بي جي مهمان بڻجندا، جيڪي 17 مارچ تي پي ايس ايل فائنل سميت سموري سڪيورٽي صورتحال جو جائزو وٺي رپورٽ ڏيندا.
ڪرڪيٽ آسٽريليا ۽ حڪومت ان رپورٽ جي روشني ۾ سمورا معاملا طئي ڪندا.
ڪرڪيٽ آسٽريليا اختيارين پاڪستان ٽيم اماڻڻ جو اشارو ڏنو پر اڃا تائين قطعي فيصلو ڪرڻ کان اڳ سڪيورتي صورتحال جي تسلي ۽ وقت وٺڻ چاهين ٿيون، جنهن سبب ميچن جو شيڊول به تبديل ڪيو پيو وڃي.

لاهور (اسپورٽس ڊيسڪ) پاڪستان ڪرڪيٽ ٽيم جي اڳوڻي هيڊ ڪوچ ڊيوڊ واٽمور چيو آهي ته سرفراز احمد کي ٽيسٽ ڪپتاني تان نه هٽائڻ گهرجي. هڪ انٽرويو ۾هن پي سي بي ۽ سليڪشن ڪميٽي کي مشورو ڏنو ته ٽنهي طرز جي ڪرڪيٽ ۾ تسلسل آڻڻ جي ضرورت آهي ۽ سرفراز احمد قيات لاءِ مناسب آهي.
ڊيوڊ واٽمور جو چوڻ هو ته اهو چوڻ سولو آهي ته ڪپتان تبديل ڪري ڇڏيو ته سڀ ٺيڪ ٿي ويندو، پر هن وقت صورتحال اها آهي ته سرفراز احمد پاڪستاني ٽيم جي ڪامياب ڪپتان آهي ۽ مڪي آرٿر به ائين ئي سمجهي ٿو، ان ڪري ٽيسٽ ٽيم جي ڪپتاني سان ڇيڙ ڇاڙ نه ڪئي وڃي.

شھدادڪوٽ ( رپورٽر ) شهداد ڪوٽ ۾ مرحوم عبدالرزاق جي ياد ۾ ڪرايل ميچ ۾ يونائٽيڊ ڪرڪيٽ ٽيم الحسيني ڪرڪيٽ ٽيم کي 59 رنسن تان شڪست ڏئي ڇڏي.
شهدادڪوٽ اسٽيڊيم ۾ کيڏيل ميچ ۾ يونائيٽيڊ ٽيم پهرين بيٽنگ ڪندي 202 رنسون ٺاھيون، جنهن جي جواب ۾ الحسيني ڪرڪيٽ ٽيم 143 رنسون ٺاھي آل آئوٽ ٿي وئي. احسان 55 ۽ عرفان گوپانگ 51 رنسون ٺاهيون.
ان موقعي تي خاص مهمان آزاد فورم شھدادڪوٽ جا اڳواڻ لياقت علي جوڻيجو ۽ زيب سنڌي فاتح ٽيم کي انعامي رقم ڏني.
ميچ دوران ڪامينٽيٽر جون ذميواريون جهوني ڪرڪيٽر وليم بلوچ هو، کيس به انعام طور رقم ڏني وئي.

خيرپور (رپورٽر) خيرپور ڀرسان ملهه مقابلا ڪرايا ويا، سنڌ جي ڀلوڙ ملهه پهلوانن مخالف پهلوانن کي دسي هوڪرا ڪرائي ڇڏيا. پريالوءِ جي ڪرڪيٽ اسٽيڊيم ۾ سماجي اڳواڻ حسين مهر پاران ڪرايل ملهه مقابلن ۾ سنڌ جي مختلف ضلعن جي ڀلوڙ ملهه پهلوانن وڏي انگ ۾ شرڪت ڪئي، ملهه پهلوانن سندرا ٻڌي ۽ ملهه ماري داد ماڻيو.
ملاکڙي ۾ پهلوان اويس گهانگهرو پهريون نمبر ماڻيو، محمد خان ڦل ٻئين ۽ ديدار جمالي ٽئين پوزيشن ماڻي. خاص مهمانن طور پ پ پ ايم اين اي سيد جاويد علي شاهه جيلاني، پ پ پ اڳواڻ اڏيل ڦلپوٽو، سينيئر وڪيل عبدالستار مهر شرڪت ڪئي.
ان موقعي تي سيد جاويد علي شاهه ملاکڙي ۾ پهرين پوزيشن حاصل ڪندڙ اويس گهانگهرو کي 20 هزار روڪ انعام ڏنو، جڏهن ته ٻئين ۽ ٽئين پوزيشن ماڻيندڙ ملهه پهلوانن کي پڻ علائقي واسين وڏي انگ ۾ ملهه مارڻ تي داد ڏيڻ سان گڏ روڪ رقم طور انعام پڻ ڏنا.
ملاکڙي ۾ ٻارڙن سميت علائقي واسين وڏي انگ ۾ شرڪت ڪئي. جڏهن ته سڪيورٽي لاءِ پوليس طرفان سخت انتظام پڻ ڪيا ويا هئا.

دبئي (اسپورٽس ڊيسڪ) آءِ سي سي ٽي 20 رينڪنگ ۾ پاڪستاني بيٽسمين بابر اعظم 858 پوائنٽن سان پنهنجي پوزيشن برقرار رکي آهي.
آءِ سي سي پاران جاري ڪيل ٽي ٽوئنٽي رينڪنگ موجب بابر اعظم پنهنجي پهرين پوزيشن تي برقرار آهي، جڏهن ته فخر الزمان تنزلي بعد پنجين نمبر تي پهتو، رينڪنگ ۾ ٽئين پاڪستاني جو نمبر 28هون آهي.
بيٽنگ ۾ نيوزلينڊ جو ڪولن منرو ٻئين ۽ آسٽريلوي ڪپتان ايرون فنچ ٽئين نمبر تي موجود آهن.
بالنگ جي شعبي ۾ شروعاتي 10 نالن ۾ پاڪستان جا ٽي بالر شامل آهن.
افغانستان جو نوجوان ليگ اسپنر راشد خان بدستور پهرين نمبر تي موجود آهي، جڏهن ته پاڪستان جو شاداب خان ٻئين، ڀارت جو ڪلديپ ياديو ٽئين، انگلينڊ جو عادل رشيد چوٿين۽ آسٽريليا جو ايڊم زمپا پنجين نمبر تي آهن.
اهڙي ريت نيوزلينڊ جو ايش سوڍي ڇهين، بنگلاديش جو شڪيب الحسن ستين، پاڪستان جو فهيم اشرف اٺين، عماد وسيم نائين ۽ ڏکڻ آفريڪا جو عمران طاهر ڏهين نمبر تي آهن.
هوڏانهن آل رائونڊرن جي لسٽ ۾ پاڪستان جي ڪارڪردگي مايوس ڪندڙ هي، شروعاتي 10 رانديگرن ۾ پاڪستان جو رڳو هو رانديگر ۾محمد حفيظ شامل آهي.
آسٽريليا جو گلين ميڪس ويل پهرين نمبر تي موجود آهي، جڏهن ته ٻئين تي بنگلاديش جو شڪيب الحسن ۽ ٽئين نمبر تي افغانستان جو محمد نبي موجود آهن.
پاڪستان جو محمد حفيظ 192 پوائنٽن سان 10هين نمبر تي آهي، جنهن بعد پاڪستان ٻيو رانديگر شعيب ملڪ 193 پوائنٽن سان 13هين نمبر تي موجود آهي.

خيرپور (رپورٽر) خيرپور ۾ خيرپور جي ينگ هاڪي ڪلب دوستاڻي ميچ ۾ سکر هاڪي ٽيم کي شڪست ڏئي ڇڏي.
ضلعي هاڪي ايسوسي ايشن ۽ سکر جي ڪيئر هاڪي ڪلب جي سهڪار سان خيرپور جي بخت علي ڏھوٽ اسٽيڊيم ۾ خيرپور جي ينگ هاڪي ڪلب ۽ سکر جي ڪيئر هاڪي ڪلب ۾ دوستاڻي ميچ کيڏي وئي.
ميچ ۾ سخت مقابلي بعد ينگ ھاڪي ڪلب هڪ جي ڀيٽ ۾ ٻن گولن تان ڪيئر هاڪي ڪلب کي شڪست ڏني.
ان موقعي تي خاص مھمان سيد ذاڪر حسين زيدي، رياض علي ڏھوٽ ۽ سيڪريٽري ڪيئر ھاڪي ڪلب سکر نعمان شيخ فاتح ٽيم ۾ انعام ورهايا.