بينوني (اسپورٽس نيوز) پاڪستان ڏکڻ آفريڪا جي ڊگهي دوري تي پنهنجي پهرين امتحان پريڪٽس ميچ کان شروعات ڪئي آهي. ٽن ڏينهن جي پريڪٽس ميچ جي ٻي ڏينهن پاڪستان پنهنجي پهرين اننگز 306 رنسن تي ڊڪليئر ڪري ڇڏي، بابر اعظم ۽ اظهر علي شاندار راند ڪندي ناٽ آئوٽ سينچريون اسڪور ڪيون. جواب ۾ ڏکڻ آفريڪا اليون 5 وڪيٽن جي نقصان تي 161 رنسون ٺاهي 174 رنسن جي برتري حاصل ڪري ورتي آهي، ٽئين ڏينهن جي راند جاري آهي، ڏکڻ آفريڪا اليون طرفان اين برانڊ 71 رنسن جي اننگز کيڏي، جڏهن ته پاڪستان طرفان محمد عامر 3 شڪار ڪيا.

ايڊليڊ (اسپورٽس نيوز) اڳوڻي آسٽريلوي فاسٽ بالر ڊينس لِلي ڀارتي ڪپتان ورات ڪوهلي جو مداح نڪتو. ڊينس للي جو چوڻ آهي ته ڪوهلي دنيا جو بهترين بيٽسمين آهي، ان ۾ ڪو شق ناهي ته هو ٻين سڀني کان اڳتي آهي، وٽس بال کي اڳ ۾ ڏسڻ جي صلاحيت آهي، جيڪا هڪ وڏي بيٽسمين جي نشاني آهي. پنهنجي فاسٽ بالنگ سان بيٽسمينن ۾ خوف پيدا ڪندڙ ڊينس للي چيو ته ڪوهلي ارادي، تيڪنيڪ ۾ بهترين آهي. ڊينس للي پاران ڀارتي فاسٽ بالر جسپريت ڀمرا جون به تعريفون ڪيون. ياد رهي ته ڀارت ۽ آسٽريليا وچ ۾ ٽئين ٽيسٽ ميچ 26 ڊسمبر کان شروع ٿيندي.

لاهور (اسپورٽس نيوز) پاڪستان ڪرڪيٽ ٽيم جي آلرائونڊر محمد حفيظ کي بنگلاديش پريميئر ليگ ۾ شرڪت لاءِ پي سي بي اين او سي جاري ڪري ڇڏيو آهي. محمد حفيظ 3 جنوري تي بي پي ايل ۾ شرڪت لاءِ ڍاڪا روانو ٿيندو. ٽيسٽ ڪرڪيٽ تان رٽائر ٿيندڙ پي ايس ايل ۾ لاهور قلندرز جو ڪپتان مقرر ڪيو ويو آهي.

ڍاڪا (اسپورٽس نيوز) بنگلاديش ڪرڪيٽ بورڊ پاران اڳوڻي آسٽريلوي ڪپتان اسٽيو سمٿ تي بنگلاديش پريميئر ليگ ۾ شرڪت ڪرڻ تي پابندي لڳائي ڇڏي آهي. بنگلاديش پريميئر ليگ پاران اعتراض واريو هو ته سندس ٽورنامينٽ ۾ شرڪت قانون جي خلاف آهي، جنهنڪري ايندڙ بي پي ايل جي ايڊيشن ۾ سندس شرڪت کان روڪيو وڃي. بنگلاديش ڪرڪيٽ بورڊ پاران فرنچائيز جي شڪايت کانپوءِ اسٽيو سمٿ کي ٽورنامينٽ ۾ شرڪت کان روڪي ڇڏيو. واضح رهي ته اسٽيو سمٿ، ڊيوڊ وارنر آسٽريليا طرفان ڏکڻ آفريڪا خلاف ٽيسٽ ۾ بال خراب ڪرڻ جي ڪيس ۾ هڪ سال جي پابندي کي منهن ڏئي رهيا آهن.

ڪيپ ٽائون (اسپورٽس نيوز)  ڏکڻ آفريڪا ۾ پاڪستان ڪرڪيٽ ٽيم جو امتحان شروع ٿي ويو آهي، اڄ پهرين ننڍي امتحان ۾ گرين شرٽس آفريڪا جي انوائيٽيشن اليون خلاف 3 ڏينهن جي پريڪٽس ميچ بينوني ۾ کيڏندي. ڏکڻ آفريڪا ۾ پاڪستاني ڪپتان توڙي ڪوچ بيٽنگ جي بهتري لاءِ پراميد آهن. پاڪستان ٽيم اڳ ۾ ئي ڏکيائين جو شڪار آهي، انجريز سبب سندس اهم هٿيار محمد عباس، فخر زمان زخمي ٿيل آهن، جڏهن ته شاداب خان پڻ زخمين جي لسٽ ۾ شامل آهي. ٽي ڏينهن جي پريڪٽس ميچ 21 ڊسمبر تائين جاري رهندي، جڏهن ته کيڏي ويندڙ گرائونڊ 26 ڊسمبر واري گرائونڊ کان 60 ڪلوميٽرن جي مفاصلي تي آهي.

ڪراچي (اسپورٽس نيوز) پاڪستان ڪرڪيٽ ٽيم جي اڳوڻي ڪپتان ۽ ڀلوڙ رانديگر يونس خان چيو آهي ته رانديگرن کي پنهنجا بنياد مضبوط ڪرڻا پوندا، هو جلد آئوٽ ٿي ويندو هو پر انهن غلطين کي سڌارڻ جي ڀرپور ڪوشش ڪندو هو. ڪراچي ۾ پي سي بي ايڪڊمي مان عورت ڪرڪيٽرن کي يونس خان ليڪچر ڏنو، جنهن ۾ ڪوچ به موجود هئا. يونس خان چيو ته جڏهن هو ڪريز تي ويندو هو ته پهريان ست اٺ بال کيڏڻ ڏکيو هوندو هو، راند کان وڌيڪ زندگي جو پريشر کي قابو ڪرڻ سکو. هن چيو ته عورت ڪرڪيٽر حساس هونديون آهن، ڪوچ ان دوران سندن خاص خيال رکندا آهن، ڪوچز کي عورتن جي راند تي وڌيڪ ڌيان ڏيڻ جي گهرجي، جڏهن ته عورتون ميدان ۾ اچي ويون آهن ته کين گهڻيون قربانيون ڏيڻيون پونديون.

پرٿ (اسپورٽس نيوز) آسٽريليا ۽ ڀارت ۾ وچ ۾ ٻي ٽيسٽ دوران ٽيمن جي ڪپتانن ورات ڪوهلي ۽ ٽم پين ۾ سخت جملن جي ڏي وٺ ٿي آهي، ٽيم دوران ٻنهي ڄڻن پاران جارحاڻو انداز اختيار ڪيو.  ٻنهي رانديگرن ۾ جملن جي ڏي وٺ ان وقت ٿي جڏهن ڪينگرو ڪپتان ڀارتي ڪپتان ڪوهلي کي چيو ته توهان ايڏوڪول ٿيڻ جي ڪوشش ڇو پيا ڪيو، جنهن تي ڪوهلي پڻ جملا چيا. امپائر گيفيني معاملي کي ڏسندي کين هدايت ڪئي ته توهان ٻئي ڪپتان آهيو، راند تي ڌيان ڏيو. ان دوران هو هڪٻئي سان ٿوري دوري کان ٽڪرائجڻ کان رهجي ويا. ٻنهي وچ ۾ لفظي جنگ ان وقت ختم ٿي، جڏهن محمد شامي جي بال تي ٽم آئوٽ ٿيو ۽ ڪوهلي مٿس خاموشي سان ڪاوڙ ڏيارڻ جي ڪوشش ڪئي.