نئي دهلي (اسپورٽس ڊيسڪ) وزيراعظم عمران خان جي اقليتن بابت پيغام تي سخت ردعمل ڏيندي اڳوڻي ڀارتي ڪرڪيٽر محمد ڪيف چيو آهي ته اسان کي توهان جي ليڪچر جي ضرورت ناهي. سماجي رابطن واري ويب سائيٽ ٽوئيٽر تي محمد ڪيف چيو ته ورهاڱي وقت پاڪستان جي حصي ۾ 20 سيڪڙو اقليتون آيون هيون، جڏهن ته هاڻي انهن جو انگ گهٽجي رڳو 2 سيڪڙو رهجي وئي آهي. ان کان اڳ وزيراعظم عمران خان قائد اعظم جي سالگره تي پيغام ۾ چيو هو تهٿ نئون پاڪستان قائد اعظم جو پاڪستان آهي، اسان يقيني بڻائينداسين ته ڀارت جي ڀيٽ ۾ پاڪستان ۾ اقليتن کي برابري واري سطح تي مقام ملي. سماجي رابطن واري ويب سائيٽ ٽوئيٽر تي عمران خان لکيو هو ته قائد اعظم اقليتن کي برابري جو شهري بڻائڻ چاهي پيو، هن اهڙي پاڪستان جو تصور ڪيو، جيڪو رحم، جمهوريت ۽ انصاف تي ٻڌل هجي.
اڳوڻي ڀارتي ڪرڪيٽر جو عمران خان جي بيان تي سخت ردعمل
اسان کي توهان جي ليڪچر جي ضرورت ناهي: اڳوڻو ڀارتي ڪرڪيٽر محمد ڪيف
ورهاڱي بعد پاڪستان ۾ 20 سيڪڙو اقليتون هيون، هاڻي 2 سيڪڙو بچيون آهن
بيٽسمينن ذميواري جو مظاهرو نه ڪيو: سرفراز احمد
ميچ ۾ واپسي لاءِ اڄ بالرن کي 5 وڪيٽون جلد وٺڻيون پونديون
بيٽسمينن کي ٻي اننگ ۾ ذميواري جو مظاهرو ڪرڻو پوندو
سينچورين(اسپورٽس نيوز) قومي ڪرڪيٽ ٽيم جي ڪپتان سرفراز احمد چيو آهي ته مون سميت ڪنهن به بيٽسمين ذميواري جو مظاهرو نه ڪيو، ان ڪري وڏو اسڪور نه ڪري سگهياسين، سينچورين ٽيسٽ جي پهرين ڏينهن جي راند جي پڄاڻي تي ميڊيا سان ڳالهائيندي هن چيو ته ٽيسٽ ميچ کٽڻ لاءِ بيٽسمينن کي ٻي اننگ ۾ ذميواري جو مظاهرو ڪرڻو پوندو، هن چيو ته ميچ ۾ واپسي لاءِ اڄ بالرن کي ڏکڻ آفريڪا جون باقي رهيل 5 وڪيٽون جلد وٺڻيون پونديون.
، جيڪڏهن بالرن سٺي ڪارڪردگي ڏيکاري ته ميچ کٽڻ جي پوزيشن ۾ اچي وينداسين.
هاشم آملا اسان جي بيٽنگ لائين جو جبل آهي: فيف ڊيو پليسس
سينچورين (اسپورٽس ڊيسڪ) ڏکڻ آفريڪا جي ڪپتان فيف ڊيوپليسس پنهنجي سينيئر ساٿي رانديگر هاشم آملا تي ٿيندڙ تنقيد کي رد ڪندي چيو آهي ته آملا سندن بيٽنگ لائين جو جبل آهي. پاڪستان خلاف ٽيسٽ کان اڳ ميڊيا سان ڳالهائيندي فيف ڊيو پليسس چيو ته هاشم آملا 3 نمبر تي بيٽنگ جو جبل آهي، جنهن هميشا رنسون اسڪور ڪيون آهن. سندس چوڻ هو ته آملا تي تنقيد درست ناهي، هو سينيئر رانديگر آهي، جلد فارم ۾ واپس اچي ويندو، گذريل سال رنسون اسڪور نه ڪري سگهيو هو پر نئين سيزن ۾ هو تازو توانو ٿي ميدان ۾ لهندو. ڏکڻ آفريڪي ڪپتان چيو ته پاڪستان جي بالنگ لائين خطرناڪ آهي، جنهن سان منهن ڏيڻ لاءِ حڪمت عملي جوڙي آهي.
گوجرانولا انٽر ڊسٽرڪٽ جوڊو چيمپئن شپ کٽي ورتي
گوجرانوالا (اسپورٽس ڊيسڪ) گوجرانوالا پنجاب انٽر ڊسٽرڪٽ جوڊو چيمپئن شپ کٽي ورتي.
سٽي اسپورٽس ڪامپليڪس ۾ ٿيل جوڊو چيمپئن شپ ۾ پنجاب جي 18 ضلعن سان تعلق رکندڙ 150 رانديگرن حصو ورتو، جن ۾ مختلف وزن جي حساب سان مقابلا ٿيا. ڇوڪرن سان گڏ ڇوڪريون به پنهنجا جوهر ڏيکارڻ ميدان ۾ لٿيون.
فائنل مقابلو سخت مقابلي بعد گوجرانولا کٽيو.
چيمپئن شپ جو انتظام ڪندڙن جو چوڻ هو ته جوڊو جاپاني ڪُشتي آهي، پاڪستان ۾ ان راند جو تمام گهڻو ٽيلنٽ موجود آهي.
ڪوٽڙي ۾ بلائينڊ ڪرڪيٽ سپرليگ ۾ سنڌ پهرين ميچ کٽي ورتي
ڪوٽڙي (رپورٽر) ڪوٽڙي ۾ جاري بلائنڊ ڪرڪيٽ سپرليگ ۾ سنڌ ۽ ڪي پي ميچون کٽي ورتيون.
پاڪستان بلائينڊ ڪائونسل جي انتظام هيٺ جاري بلائينڊ ڪرڪيٽ سپرليگ جي ٽئين ڏينهن پنجاب پهريان بيٽنگ ڪندي 20 اورن ۾ 8 وڪيٽن جي نقصان تي 219 رنسون ٺاهيون، بيٽسمين نثار علي 61 ۽ رياست علي 42 رنسون ٺاهي نمايان رهيا، جڏهن ته ڪي پي جي بالرن مجيب الرحمان 2 وڪيٽون ورتيون ,متيع الله ,اعجاز ۽ شاهزيب هڪ-هڪ وڪيٽ ورتي، هڪ رانديگر رن-آئوٽ ٿيو،
جواب ۾ڪي پي ٽيم 19 اوورن ۾ 5 وڪيٽن جي نقصان تي هدف پورو ڪري ميچ کٽي، بيٽسمين معين 70بالن تي 92 رنسون اسڪور ڪيون، ايوب خان 17 بالن تي 30 رنسون اسڪور ڪري ٽاپ اسڪورر رهيا. پنجاب جي بالرن احتشام ٽي وڪيٽون ورتيون ۽ هڪ وڪيٽ ادريس ورتي.
ٻي مئچ ۾ سنڌ 8 وڪيٽن جي نقصان تي بلوچستان کي شڪست ڏني. بلوچستان ٽاس کٽي پهريان بيٽنگ ڪندي مقرر اوورن ۾ٽن وڪيٽن تي 209 رنسون ٺاهيون، بلوچستان جي بيٽسمين اسلم 35 بالن تي 62، بدر 36 بالن تي 40 ۽ شاهزيب 19 بالن تي 36 رنسون ٺاهيون. سنڌ جي بالرن صادق ۽نواز هڪ-هڪ وڪيٽ ورتي.
جواب ۾ سنڌ جي رانديگرن 17 اوون ۾ ٻن وڪيٽ جي نقصان تي گهربل هدف ماڻي ميچ پنهنجي نالي ڪئي. سنڌ جي بيٽسمين هارون 40 بالن تي 71، راشد 30 بالن تي 47 رنسون ٺاهي نمايان رهيا. سنڌ پنهنجي ٽن مئچن مان پهرين ڪاميابي حاصل ڪئي.
سکر: انٽر ڪاليجز ۽ اسڪول ڪرڪيٽ چيمپئن شپ ۾ لاڙڪاڻو فاتح
فائنل ۾ گلوبل ڪاليج ٽيم ڊگري ڪاليج نصير آباد جي ٽيم کي 9 وڪيٽن تان شڪست ڏني, گلوبل ڪاليج جي ٽيم جي ڪپتان مظهر کي 30 رنسون ٺاهڻ تي ميچ جو بهترين رانديگر جو اعزاز مليو
سکر (بيورو رپورٽ) سکر ۾لاڙڪاڻي جي ٽيم انٽر ڪاليج ۽ اسڪول چيمپئن شپ پنهنجي نالي ڪري ورتي. تعليمي بورڊ لاڙڪاڻو جي انتظام هيٺ ڪرايل انٽر ڪاليج ۽ اسڪول چئمپين شپ جي فائنل ۾ گلوبل ڪاليج لاڙڪاڻو جي ٽيم نصير آباد جي ڊگري ڪاليج ٽيم کي 9 وڪيٽن تان شڪست ڏئي اعزاز ماڻيو.
فائنل مقابلي ۾ پهرين بيٽنگ ڪندي ڊگري ڪاليج نصيرآباد جي ٽيم 46 رنسون ٺاهي آل آئوٽ ٿي وئي، جواب ۾ گلوبل ڪاليج لاڙڪاڻو جي ٽيم گهربل هدف 6 اوورن ۾ مڪمل ڪري چيمپئن شپ پنهنجي نالي ڪئي. لاڙڪاڻي جي ٽيم جي ڪپتان مظهر علي کي 30 رنسون ٺاهڻ تي بهترين رانديگر قرار ڏنو ويو.
خاص مهمان تعليمي بورڊ لارڪاڻو جي سيڪريٽري احمد خان، ڊائريڪٽر اسپورٽس تعليمي بورڊ لاڙڪاڻو محمد رمضان جمالي، خادم حسين گوپانگ، زاهد علي، ظهور علي ۽ ٻين فاتح ٽيم ۽ فائنل مقابلو هارائيندڙ ٽيم ۾ ٽرافي، ميڊل ۽ روڪ رقم انعام ورهايا. جڏهن ته ڪرڪيٽ چئمپين شپ ۾ 16 ڪاليجن ۽ اسڪولجن جي ٽيمن حصو ورتو.
ڀارت خلاف ٽيسٽ۾ ٻارڙو آسٽريلوي ٽيم جو ڪپتان بڻيو
دل جي بيماري ۾ مبتلا معصوم آرچي شلر جي ڪپتاني جي خواھش ھئي
ميلبورن (اسپورٽس ڊيسڪ) ڀارت خلاف باڪسنگ ڊي ٽيسٽ ميچ ۾ 7 ورهين جو ٻارڙو آسٽريلوي ٽيم جو اعزازي ڪپتان بڻيو. ميلبورن ۾ ڪالهه شروع ٿيل باڪسنگ ڊي ٽيسٽ ۾ آرچي شلر آسٽريلوي ٽيم جي شريڪ ڪپتان جو اعزاز ماڻيو. نينگر آرچي شلر پيدائش بعد دل جي موذي مرض ۾ مبتلا آهي، آرچي شلر ڪرڪيٽ جو وڏو مداح آهي.سندس ڪيتريون ئي سرجريون ٿي چڪيون آهن. کائنس والد پڇيو هو ته هو ڇا ڪرڻ چاهي ٿو ته ٻارڙي جواب ڏنو ته آسٽريلوي ڪرڪيٽ ٽيم جي ڪپتاني ڪرڻ چاهيان ٿو. ڪالهه ڪرڪيٽ آسٽريليا ٻارڙي جي خواهش پوري ڪئي. گذريل مهيني گڏيل عرب امارات ۾ ٿيل سيريز دوران آرچي شلر کي اسڪواڊ ۾ پڻ شامل ڪيو ويو هو.
بي بي ايل: پرٿ اسڪارچرز ايڊليڊ اسٽرائڪرز کي گهمائي لاٿو
ايڊليڊ (اسپورٽس ڊيسڪ) بگ بيش ليگ ۾ پرٿ اسڪارچرز ايڊليڊ اسٽرائيڪرز کي 7 وڪيٽن تان بدترين شڪست ڏئي ڇڏي.
بگ بيش ليگ جي نائين ميچ ۾ پرٿ اسڪارچرز ٽاس کٽي پهرين فيلڊنگ جو فيصلو ڪيو. بيٽنگ جي دعوت ملڻ تي ايڊليڊ اسٽرائيڪرز کيڏندي 88 رنسن تي ڍير ٿي وئِي. ويٿرلينڊ 22، والينٽي ۽ راشد خان 21-21 رنسون ٺاهي نمايان رهيا.
پرٿ اسڪارچرز جي بالر رچرڊسن شاندار ڪارڪردگي جو مظاهرو ڪندي 3 اوورن ۾ 7 رنسن عيوض 3 شڪار ڪيا، جڏهن ته بيهرينڊراف ۽ اي جي ٽاءِ 2-2 ۽ ڪولٽر نيل ۽ ڊي جي وِلي هڪ-هڪ وڪيٽ ورتي.
89 رنسن جي جواب ۾ پرٿ اسڪار چرز 18 اوورن ۾ ٽن وڪيٽن جي نقصان تي هدف ماڻي ميچ کٽي. بوسيستو 36، ڪپتان ٽرنر 24 ۽ انگليز 22 رنسون ٺاهي ٽيم کي ڪامياب بڻايو.
ايڊليڊ اسٽرائيڪرز طرفان اسٽان ليڪ ۽ والينٽي هڪ-هڪ وڪيٽ ورتي، جڏهن ته هڪ رانديگر رن-آئوٽ ڪيو.
پرٿ اسڪارچرز جي بالر رچرڊسن کي 3 وڪيٽون وٺڻ تي ميچ جو بهترين رانديگر قرار ڏنو ويو.
انٽر ڪالجيٽ باسڪيٽ بال چيمپئن شپ ۾ ملتان کي شڪست
فائنل مقابلي ۾ بنون جي ٽيم 40-50 تان ملتان جي ٽيم کي شڪست ڏئي ٽائيٽل پنهنجي نالي ڪيو, چيمپئن شپ ۾ 15 ٽيمن حصو ورتو
ملتان (اسپورٽس ڊيسڪ) بنون جي ٽيم ملتان کي شڪست ڏئي انٽر ڪاليجٽ باسڪيٽ بال چيمپئن شپ پنهنجي نالي ڪري ورتي.
تعليمي بورڊ ميدان ۾ ٿيل انٽرڪاليجٽ باسڪيٽ بال چيمپئن شپ جي فائنل مقابلي ۾ بنون ۽ ملتان جي ٽيمن سخت مقابلو ڪيو، راند جي پڄاڻي تي بنون جي ٽيم 40 جي ڀيٽ ۾ 50 پوائنٽن تان ٽائٽيل پنهنجي نالي ڪري سوڀ جو جشن ملهايو.
چيمپئن شپ ۾ ڪل 15 ٽيمن حصو ورتو، جڏهن ته بهترين ڪارڪردگي ڏيکاريندڙ رانديگرن کي ٽرافيون ۽ روڪ رقم جا انعام به ڏنا ويا.
اڳوڻي آسٽريلوي بالر، ڪوهلي کي چيلنج ڏئي ڇڏيو
ميلبورن (اسپورٽس ڊيسڪ) ڀارتي ڪپتان ويرات ڪوهلي تي تنقيد ڪندي اڳوڻي آسٽريلوي بالر مچل جانسن چيو آهي ته آسٽريليا خلاف ميلبورن ٽيسٽ ۾ ڪوهلي سنچري ٺاهڻ ۾ ناڪام ويو ته کيس رٽائرمينٽ جو اعلان ڪرڻ گهرجي. سماجي رابطن واري ويب سائيٽ ٽوئيٽر تي مچل جانسن هڪ روڊ جي تصوير جاري ڪئي، جيڪا ٽيسٽ پچ جي عڪاسي ڪري رهي هئي. هوڏانهن ڀارتي صارفين ڊگهي وقت کان ويرات ڪوهلي تي تنقيد ڪندڙ مچل جانسن تي پڻ جوابي تنقيد ڪئي، جنهن تي جانسن ويرات ڪوهلي لاءِ وڏو چيلنج رکيو ته سنچري ٺاهي يا رٽائرمينٽ ڏئي.
سنچورين ٽيسٽ جو پهريون ڏينھن بالرن جي نانءُ : ڏکڻ آفريقا جي اڌ ٽيم 127 تي آئوٽ، پاڪستاني ٽيم 181 رنسون ٺاھي سگھي
پهرين اننگ ۾ محمد عامر ۽ شاهين آفريدي 2-2 شڪار ڪيا، حسن علي هڪ وڪيٽ ورتي
سنچورين: (اسپورٽس ڊيسڪ) پاڪستان ۽ ڏکڻ آفريقا ۾ پهرين ٽيسٽ جي پهرين ڏينهن پاڪستان جي سڄي ٽيم 181 رنسن تي آئوٽ ٿي وئي، جڏهن ته ڏکڻ آفريقا جي اڌ ٽيم به 127 رنسن تي پويلين موٽي.
سينچورين ۾ پاڪستان ۽ ڏکڻ آفريقا ۾ ٽن ٽيسٽ ميچن تي ٻڌل سيريز جي پهرين ميچ جي پهرين ڏينهن بيٽسمين بالرن آڏو ڄمي کيڏڻ ۾ ناڪام ويا. پاڪستاني ٽيم ٽاس کٽي پهرين بيٽنگ جو فيصلو ڪيو. پاڪستاني بيٽسمين ڏکڻ آفريقا جي بالرن آڏو نه بيهي سگهيا، سموري ٽيم 181 رنسن تي پويلين ڀيڙي ٿي.
ڪپتان سرفراز احمد ۽ اوپننگ بيٽسمين امام الحق بنا ڪنهن رنس ٺاهڻ جي آئوٽ ٿيا، جڏهن ته اظهر علي 36، فخر زمان 12، شان مسعود 19، اسد شفيق 7، ياسر شاهه 4 ۽ محمد عامر هڪ رنس ٺاهي آئوٽ ٿيا.
بابر اعظم ۽ حسن علي نائين وڪيٽ تي 67 رنسن جي ڀائيواري جوڙي، جڏهن ته 178 رنسن جي ڪل اسڪور تي بابر اعظم 71 رنسن تي ربادا جو شڪار بڻيو. پاڪستان جي آخري وڪيٽ 181 رنسن تي شاهين آفريدي جي ڪري.
پاڪستان طرفان پهرين اننگ ۾ بابر اعظم 71، اظهر علي 36 ۽ حسن علي 21 رنسن ٺاهي نمايان رهيا. ٻي پاسي ڏکڻ آفريقا طرفان ڊيان اوليور شاندار بالنگ جو مظاهرو ڪندي 6 شڪار ڪيا، جڏهن ته ڪگيسو رابادا 3 ۽ ڊيل اسٽين هڪ وڪيٽ حاصل ڪئي.
پهرين اننگ جي شروعات ۾ ڏکڻ آفريقي اوپنر محتاط راند کيڏي، پر 30 رنسن بعد وڪيٽون ڪرڻ شروع ٿي ويون، اهڙي طرح ڏکڻ آفريقا 5 وڪيٽن جي نقصان تي 127 رنسون ٺاهيون. اوپنر مرڪرام 12 رنسن تي حسن جو شڪار بڻيو، اليگر کي 22 رنسن تي شاهين آفريدي پويلين ڀيڙو ڪيو. جنهن بعد ٽي بي برون 29 رنسن جي اننگز کيڏي آئوٽ ٿيو. هاشم آملا به 8 رنسن تي پويلين موٽيو. ڏکڻ آفريقي ڪپتان فاف دوپليسي بنا ڪنهن رنس ٺاهڻ جي شاهين آفريدي جو شڪار بڻيو. پهرين ٽيسٽ جي پهرين ڏينهن ڏکڻ آفريقا 5 وڪيٽن جي نقصان تي 127 رنسون ٺاهيون. باووما 38 رنسن ۽ ڊيل اسٽين 13 رنسن تان سڀاڻي ٻي ڏينهن جي راند شروع ڪندا.
آلرائونڊر امجد جاويد رٽائرمينٽ جو اعلان ڪري ڇڏيو
امجد جاويد گڏيل عرب عمارات جي ڀلوڙ رانديگر ۽ اڳوڻو ڪپتان آهي
عالمي ڪرڪيٽ تان رٽائرمينٽ وٺڻ آسان نه هئي: اڳوڻو ڪپتان امجد جاويد
دبئي (اسپورٽس ڊيسڪ) گڏيل عرب عمارات جي اڳوڻي ڪپتان ۽ آل رائونڊر امجد جاويد عالمي ڪرڪيٽ تان رٽائر ٿيڻ جو اعلان ڪيو آهي. 38 سالن جو امجد جاويد ساڄي هٿ سان فاسٽ بالنگ ڪرڻ سان گڏ بيٽنگ به ڪندو هو. هن گڏيل عرب عمارات جي 15 ون ڊي ميچن ۾ نمائندگي ڪئي، جڏهن ته 22 ٽي 20 ميچن ۾ پڻ يو اي اي طرفان کيڏيون. امجد جاويد کي وڏي عمر ۾ ٽيم ۾ شامل ڪيو ويو هو، انڪري سندس عالمي ڪرڪيٽ اندر ڪيريئر گهڻو وقت هلي نه سگهيو. امجد جاويد تيز بالنگ ڪرائڻ سان گڏ بيٽنگ به سٺي ڪندو هو، جنهنڪري هو يو اي اي جو اهم ۽ سينيئر رانديگر طور ڳڻيو ويندو هو.
ننگرپارڪر ڪرڪيٽ ٽورنامينٽ دلبر اليون سخت مقابلي ڪندي کٽي ورتو
مرحوم الهه بچايو ڪرڪيٽ ٽورنامينٽ ۾ ٿرپارڪر ضلعي 8 بهترين ٽيمن حصو ورتو
فائنل ۾ دلبر اليون سخت مقابلو ڪندي ڪنگز اليون کي 5 رنسن تان مات ڏئي ڇڏي
ننگرپارڪر (رپورٽ فيض کوسو ) ننگرپارڪر ۾ مرحوم الهبچايو مهر ميموريل ڪرڪيٽ ٽورنامينٽ ڳوٺ سوندر ۾ ٿيو. جنهن ۾ ٿرپارڪر ضلعي جي 8 بهترين ٽيمن دلبر اليون، ڪنگز اليون، شهيد غلام رحيم اليون، طوفان اليون، غوثيه اليون رامسر، غازي اليون اسلام ڪوٽ، حر مجاهد اليون، ڊينجرز اليون حصو ورتو.
ٽورنامينٽ جو فائنل ميچ دلبر اليون ننگرپارڪر ۽ ڪنگز اليون ننگرپارڪر جي وچ ۾ ٿيو، جيڪو انتهائي سخت مقابلي کانپوءِ دلبر اليون 5 رنسن تان پنهنجي نالي ڪيو. دلبر اليون پهريان بيٽنگ ڪندي 98 جو ٽارگيٽ ڏنو، جنهن جي جواب ۾ ڪنگز اليون 93 اسڪور ٺاهي سگهي.
ٽورنامينٽ جي ڀلوڙ رانديگر جو ايوارڊ ننگر پارڪر جي بهترين آل رائونڊر فضل حسين، بهترين بيٽسمين انظار حسين ۽ بالر جو ايوارڊ سجاد حسين حاصل ڪيو . آخر ۾ ونر ٽيم جي ڪپتان لجپت ڪولهي ۽ رنر ٽيم جي ڪپتان نصرﷲ کوسو کي فنڪشنل مسلم ليگ ليبر ونگ ضلعي ٿرپارڪر جي نائب صدر محمد خان مهر ٽرافيون ۽ ڪيش انعام ڏنو.
ڊيل اسٽين شان پولاڪ کان ٽيسٽ وڪيٽن جو رڪارڊ کسي ورتو
ڊيل اسٽين فخر زمان کي آئوٽ ڪندي 422 شڪار مڪمل ڪيا
سينچورين (اسپورٽس ڊيسڪ) ڏکڻ آفريڪا جي تيز ترين بالر ڊيل اسٽين پنهنجي ملڪ طرفان سڀ کان وڌيڪ ٽيسٽ وڪيٽون حاصل ڪرڻ جو رڪارڊ جوڙي ورتو آهي. ڊيل اسٽين پاڪستان خلاف باڪسنگ ڊي ٽيسٽ ۾ فخر زمان کي آئوٽ ڪندي 422 وڪيٽون پوريون ڪيون ۽ اهڙي طرح هن شان پولاڪ جي 421 وڪيٽن جو رڪارڊ ٽوڙي ڇڏيو. ڊيل اسٽين 89 ٽيسٽ ميچن ۽ 162 اننگز ۾ اهو رڪارڊ پورو ڪيو. ڊيل اسٽين 2004ع ۾ انگلينڊ خلاف ڊيبيو ٽيسٽ کيڏيو هو.
باڪسنگ ڊي ٽيسٽ: ڀارت جون پهرين ڏينهن 215 رنسون
پوجارا ۽ ورات ڪوهلي آسٽريليا اڳيان ڀت بڻيل، 94 رنسن جي ڀائيواري
ميلبورن (اسپورٽس ڊيسڪ) آسٽريليا ۽ ڀارت ۾ ٽئين ٽيسٽ جي پهرين ڏينهن ڀارت شاندار ڪارڪردگي ڏيکاريندي ڏينهن جي پڄاڻي تي 2 وڪيٽن جي نقصان تي 215 رنسون ٺاهي ورتيون. ميلبورن ۾ باڪسنگ ٽيسٽ جي پهرين ڏينهن ڀارتي ڪپتان ورات ڪوهلي ٽاس کٽي پهريان بيٽنگ جو فيصلو ڪيو. جيڪو صحيح ثابت ٿيو ۽ ڀارتين شاندار ڪارڪردگي ڏيکاريندي 2 وڪيٽن جي نقصان تي 215 رنسون ٺاهي ورتيون. ڀارت طرفان ڊيبيو ڪندڙ ميانڪ اگروال شاندار بيٽنگ ڪندي 76 رنسون ٺاهيون، جڏهن ته وهاري صرف 8 رنسن تي آئوٽ ٿي ويو. پوجارا ميانڪ اگروال سان ڀائيواري ڪندي اسڪور کي اڳتي وڌايو. ڏينهن جي پڄاڻي تائين پوجارا 68 ۽ ورات ڪوهلي 47 رنسن تي ڪريز تي ڪينگروز اڳيان ڀت بڻيل رهيا. آسٽريليا طرفان پيٽر ڪمنز ٻه وڪيٽون حاصل ڪيون. ان کان اڳ ٻنهي ٽيمن ۾ چار ميچن جي سيريز هڪ هڪ تان برابر آهي.