ممبئي(شوبز نيوز) بالي ووڊ جي چاڪليٽي هيروئن ڪترينا ڪيف ٺگس آف هندستان جي ناڪامي باوجود پنهنجو معاوضو وڌائي ڇڏيو آهي، جنهن سبب ساڻس رابطو ڪندڙ فلمساز سخت پريشان آهن، چيو پيو وڃي ته ڪترينا ڪيف ٺگز آف هندستان جي باڪس آفيس تي ناڪامي باوجود هندستان جي فلم انڊسٽري تي ڇانيل آهي، جنهن سبب ڪيترن ئي فلمسازن پنهنجن نئين فلمن کي ڪترينا ڪيف کي ڪاسٽ ڪرڻ لاءِ رابطا جاري رکيا آهن، ڪجهه فلمسازن ميڊيا آڏو ظاهر ڪيو آهي ته ڪترينا ڪيف پنهنجو معاوضو وڌائي کين مايوس ڪيو آهي، ان حوالي سان ڪترينا ڪيف جو چوڻ آهي ته ٺگز آف هندستان ۾ سندس ڪردار کي واکاڻيو ويو آهي، هن چيو ته هو مخصوص فلمن ۾ ڪم ڪرڻ چاهي ٿي، ان ڪري هن پنهنجي معاوضي ۾ واڌ ڪئي آهي.
ڪپل شرما شادي جي وڊيو يوٽيوب تي جاري ڪري ڇڏي
ممبئي (شوبز ڊيسڪ) ڀارت جي مشهور ڪاميڊين ڪپل شرما پنهنجي شادي جي وڊيو يوٽيوب تي جاري ڪري ڇڏي آهي، يوٽيوب صارفين وڊيو ڏسندي ئي وائرل ڪري ڇڏي. 12 ڊسمبر تي گيني سان شاديءَ جي ٻنڌڻن ۾ ٻنڌجندڙ ڪپل شرما پنهنجي پرڻي جي وڊيو يوٽيوب سميت مختلف سماجي رابطن وارين ويب سائيٽس تي پڻ جاري ڪئي.
. هڪ منٽ 17 سيڪنڊن جي ڊگهي وڊيو ۾ ڪپل ۽ گيني ڇاتراٿ شادي جون مختلف رسمون نڀائيندي نظر اچي رهيا آهن، جوڙو شاديءَ جي وڳن ۾ تمام گهڻو خوبصورت نظر اچي رهيو آهي.
جيسيڪا البا جي مسڪراهٽ ديوانن جو انگ وڌائي ڇڏيو
نيويارڪ(شوبز نيوز) هالي وود جي خوبصورت ادارڪاره جيسيڪا البا جي مداحن ۾ وڏي انگ ۾ واڌ اچي وئي آهي، هڪ آمريڪي شوبز مئگزين جي سروي رپورٽ ۾ ڄاڻايو ويو آهي ته هالي ووڊ ۾ هن وقت جيسيڪا البا جي مسڪراهٽ جا چرچا آهن، جڏهن ته سندس مداحن ۾ پڻ وڏي انگ ۾ واڌ ٿي رهي آهي، مئگزين جي رپورٽ موجب جيسيڪا البا جي اڪثر مداحن جو موقف آهي ته جيسيڪا البا جي مسڪراهٽ ڪنهن به طرح مونا ليزا کان گهٽ ناهي، مئگزين جي سروي موجب هالي ووڊ ۾ هن وقت جيسيڪا البا فلمسازن جي سڀ کان پهرين چونڊ آهي، واضح رهي ته جيسيڪا البا هالي ووڊ جي ڪيترين ئي فلمن ۾ پنهنجي اداڪاري جا جوهر ڏيکاري شهرت ماڻي چڪي آهي.
سجل علي کي خوابن جو شهزادو ملي ويو، خاندانن ۾ رابطا شروع
ٽي وي ڊرامن کان شهرت ماڻڻ بعد فلم انڊسٽري ۾ به ڌاڪو ڄمائيندڙ سجل مائٽن کي راضي ڪري ورتو
ڪراچي( شوبز نيوز) پاڪستان فلم انڊسٽري ۾ شهرت جو ڌاڪو ڄاميئدڙ خوبصورت ادارا سجل علي کي خوابن جو شهزادو ملي ويو آهي، ٽي وي ڊرامن کان شهرت ماڻڻ بعد فلم انڊسٽري ۾ به ڌاڪو ڄمائيندڙ سجل مائٽن کي پڻ پنهنجي پسند جي حوالي سان راضي ڪري ورتو آهي، خانداني ذريعن جو چوڻ آهي ته سجل علي جي خوابن جو شهزادو شوبز جي دنيا سان تعلق نٿو رکي، جڏهن ته ٻنهي خاندانن وچ ۾ هڪ ٻئي ڏانهن اچ وڃ جو سلسلو شروع ٿي چڪو آهي ۽ شادي جي حوالي سان جلد باضابطه ڳالهيون ٿينديون. سجل علي مختلف ٽي وي چينلن تي ڊرامن ۾ زبردست شهرت ماڻي چڪي آهي.
مٿن چڪرابورتي بيمار ٿي پيو، علاج لاءِ آمريڪا منتقل
ممبئي (شوبز ڊيسڪ) ماضي جي مشهور اداڪار مٿن چڪرابورتي بيمار ٿي پيو. ڀارتي ميڊيا موجب مٿن چڪرورتي کي 9 سال پراڻو چيلهه جو سور وڌڻ سبب علاج لاءِ آمريڪا منتقل ڪيو ويو آهي. سندس علاج لاس اينجلس جي اسپتال ۾ ڪرايو ويندو. جڏهن ته مٿن جي حالت خطري کان ٻاهر ٻڌائي پئي وڃي، پرکيس چيلهه ۾ تمام گهڻو سور آهي. گذريل 9 سالن کان مٿن کي چيلهه ۽ پٺي جي سور جي شڪايت هئي، ان ڪري کيس 2016 دوران اسپتال ۾ به داخل ڪرايو ويو هو.
عامر خان پاران سلمان خان کي سالگرهه مبارڪ
ممبئي (شوبز ڊيسڪ) بالي ووڊ اداڪار عامر خان سلمان خان کي 53هين سالگرهه تي واڌايون ڏنيون. ڀارتي ميڊيا موجب اداڪار عامر خان سماجي رابطن واري ويب سائيٽ ٽوئٽر تي سلمان خان کي جنم ڏهاڙي جون واڌيون ڏيندي نيڪ خواهشن جو پيغام جاري ڪيو.
پيغام ۾ عامر خان لکيو ته ”سلمان سالگره جون تمام گهڻيون واڌايون، هي سال تو لاءِ گذريل سالن کان وڌيڪ بهتري گذري“.
شاهه رخ خان به ”مي ٽو“ مهم تي خاموشي ٽوڙي ڇڏي
گهرواري سوڌو گڏ ڪم ڪندڙ عورتن جي عزت ڪندو آهيان: شاهه رخ خان
ممبئي (شوبز ڊيسڪ) مي ٽو مهم بابت ڳالهائيندي بالي ووڊ ڪنگ شاهه رخ چيو آهي ته پنهنجي گهرواري گوري خان ۽ گڏ ڪم ڪندڙ عورتن جي عزت ڪندو آهيان. ڀارتي ميڊيا موجب هڪ انٽرويو ۾ بالي ووڊ ۾ پکڙيل مي ٽو مهم بابت ڳالهائيندي شاهه رخ چيو ته آئون ٽن شين عزت، عزت ۽ عزت تي ڀروسو رکندو آهيان.
هن چيو ته عزت جو مطلب برابري هوندو آهي، منهنجو مقصد سوشل ميڊيا تي هلندڙ هيش ٽيگ واري برابري ناهي.
سندس چوڻ هو ته منهنجي عورت دوستن کي به منهنجي ڪمزورين بابت ڄاڻ هجڻ گهرجي، پنهنجي وڏي پٽ آريان کي عورتن جي عزت ڪرڻ جي نصيحت ڪندو آهيان.
رنوير سنگهه جي ”سمبا“ 4 ڏينهن ۾ 100 ڪروڙ ڪمائيندي
ممبئي (شوبز ڊيسڪ) بالي ووڊ جي هن سال جي آخري فلم “سمبا” ريليز ڪئي وئي، فلم ڊسٽريبيوٽرن ۽ تجزئي نگارن جو چوڻ آهي ته فلم 4 ڏينهن ۾ 100 ڪروڙ ڪلب ۾ شامل ٿي ويندي.
ڪرن جوهر جي پراڊڪشن ۽ روهت شيٽي جي هدايتڪاري ۾ ٺهيل فلم سمبا ۾ رنوير سنگهه سان گڏ سيف علي خان جي ڌيءُ ساره علي خان مرڪزي ڪردار نڀايو آهي. ڀارتي ميڊيا جي هڪ رپورٽ موجب فلم ڊسٽري بيوٽر اڪشي راٿي اڳڪٿي ڪئي آهي ته سمبا 3 کان 4 ڏينهن ۾ 100 ڪروڙ جو ڪاروبار ڪري بلاڪ بسٽر ثابت ٿيندي.
هن چيو ته سمبا رڪارڊ ٽوڙ ڪمائي ڪري ڪاميابي جي حوالي سان ”چنائي ايڪسپريس“ کي به مات ڏيندي.
هوڏانهن فلمي پنڊت ترن آدرش فلم کي هر حوالي سان فاتح قرار ڏيندي رنوير سنگهه ۽ روهيت شيٽي جي به واکاڻ ڪئي آهي.
”دي ايڪسيڊنٽل پرائم منسٽر“ ۾ ڪم نه ڪرڻ چاهيو هو: انوپم کير
ممبئي (شوبز ڊيسڪ) بالي ووڊ اداڪار انوپم کير چيو آهي ته فلم “دي ايڪسيڊنٽل پرائم منسٽر“ جو حصو نه ٿيڻ چاهيو هو.
ڀارتي ميڊيا موجب انوپم کير جو چوڻ آهي ته شروع ۾ ڪيترن ئي سبب جي ڪري ان فلم جو حصو نٿو ٿيڻ چاهيو، جن مان هڪ سبب فلم جو سياسي تڪرار هو. هن چيو ته اداڪار جي حيثيت ج۾ ڊاڪٽر من موهن سنگهه جو ڪردار نڀائڻ وڏو چيلنجنگ هو. جڏهن ته فلم جو هدايتڪار وجي رتناڪر آهي، فلم جي ڪهاڻي مايانڪ تيواري لکي آهي.
بالي ووڊ جو ليجنڊ قادر خان بيماري وگھي وينٽيليٽر تي منتقل
ممبئي (شوبز ڊيسڪ) بالي ووڊ جو ليجنڊ اداڪار قادر خان کي سخت بيماري ۽ ساهه کڻڻ جي ڏکيائي سبب وينٽيليٽر تي منتقل ڪيو ويو آهي.
ورسٽائل اداڪار قادر خان ڊگهي عرصي کان بيمار رهڻ بعد هاڻي سندس طبيعت ويتر خراب ٿي وئي، کيس ڳڻتي جوڳي حالت ۾ اسپتال منتقل ڪيو ويو آهي.
ڀارتي ميڊيا موجب قادر خان بيماري سبب ڳالهائڻ ٻولائڻ بند ڪري ڇڏيو آهي، جڏهن ته کيس نمونيا بيماري به ظاهر ٿي رهي آهي.
هوڏانهن ميڊيا سان ڳالهائيندي قادر خان جي پٽ سرفراز ٻڌايو ته سندس پيءُ کي هلڻ ڦرڻ ۾ ڏکيائي ٿئي ٿي، هو هلڻ وقت هيٺ ڪرڻ کان ڊڄندو هو. هن چيو ته گذريل سال بابا جي گوڏن جو آپريشن به ٿيو هو، پر هن هلڻ ڦرڻ کان انڪار ڪري ڇڏيو هو، جنهن بعد سندس طبيعت ويتر خراب ٿيڻ لڳي.
سرفراز احمد اميد ظاهر ڪئي ته سندس والد جلد صحتياب ٿي ويندو.
سنڌ جي البيلي راڳي سرمد سنڌي جي ورسي، سرن ۽ لفظن جي ڀيٽا پيش
حيدرآباد ۾ ٿيل تقريب ۾ تاج جويو، وشنو مل، آڪاش ملاح ۽ ٻين ڀيٽا پيش ڪئي
حيدرآباد(بيورو رپورٽ) سنڌ صوفي سنگت پاران تقريب ڪوٺائي سنڌ جي ڀلوڙ قومي راڳي سرمد سنڌي کي ڀيٽا پيش ڪئي وئي. تقريب کي خطاب ڪندي سنڌ صوفي سنگت جي اڳواڻ آڪاش ملاح، تاج جويو، وشنو مل ۽ عمير خواجه سميت چيو ته سرمد سنڌي اسان جو قومي هيرو آهي، سرمد هڪ وڏو فنڪار ۽ هڪ وڏو ڪردار هو جنهن کي هميشه ياد رکيو ويندو.
هنن چيو ته سرمد سنڌي پنهنجي دور ۾ وطن پرستي کي اڀاريو، سندس آواز ۾ سنڌ لاءِ درد هو. هو پنهنجي گيتن ذريعي سنڌ جي غريب ۽ مظلوم ماڻهن جو آواز بڻيو .27 ڊسمبر جي ڏينهن تي اسان کان هميشه لاءِ وڇڙي ويو.
سندن چوڻ هو ته سرمد سنڌي جي سنڌ لاءِ ڪيل خدمتن کي سلام پيش ڪيون ٿا، سرمد سنڌي سنڌ ۽ سنڌ جي ماڻهن سان سچو پيارو ڪندو هو ۽ هن هميشه سنڌ جي سورن کي ڳايو.
هنن چيو ته سرمد سنڌي سان سائين جي ايم سيد ۽ عبدالواحيد آريسر به تمام گهڻو پيار ڪندا هئا ۽ سندس گيت ٻڌندا هئا، هو اسان کان جسماني طور تي وڇڙي ويو آهي پر هو اسان جي دلين ۾ همشه ياد رهندو .
شاهه رخ خان منهنجي پهرين محبت آهي: فاطمه ثنا شيخ
اڄ به شاهه رخ خان سان رومانس ڪرڻ چاهيان ٿي: دنگل گرل
فاطمه ثنا پهريون ڀيرو شاهه رخ خان سان ون ٽو ڪا فور ۾ ڪم ڪيو
ممبئي (شوبز نيوز) بالي ووڊ جي دنگل اسٽار فاطمه ثنا شيخ انڪشاف ڪندي چيو آهي ته شاهه رخ خان سندس پهرين محبت هو ۽ هوءَ ننڍڙائپ ۾ سندس لاءِ روئندو هو. فاطمه ثنا شيخ چيو ته هوءَ ايترو جلدي ڪنهن کي پسند ناهي ڪندي پر شاهه رخ خان جو معاملو الڳ آهي، جڏهن پهريون ڀيرو شاهه رخ خان سان ون ٽو ڪا فور فلم ۾ ڪم ڪيو ته خبر پئي ته هو شادي شده آهي، جنهنڪري منهنجي دل ٽٽي پئي هئي ۽ تمام گهڻو رنو. هن چيو ته شاهه رخ خان سندس پهرين محبت آهي، اڄ به هو ساڻس رومانس ڪرڻ چاهي ٿي، ڇاڪاڻ ته پهرين محبت پهرين محبت هوندي آهي. فاطمه ثنا شيخ چائلڊ اسٽار طور شاهه رخ خان سان ون ٽو ڪا فور ۾ ڪم ڪيو هو.
انيل ڪپور ۽ سونم جي فلم “اڪ لڙڪي ڪو ديکها تو” جون جهلڪيون جاري
انيل ڪپور ۽ سونم ڪپور فلم ۾ پيءُ ۽ ڌيءُ جو ڪردار ادا ڪندي نظر ايندا
پيءُ ڌيءُ پهريون ڀيرو گڏ نظر ايندا، راجڪمار رائو به اهم ڪردار ادا ڪندو
ممبئي (شوبز نيوز) بالي ووڊ جي منفرد اداڪار انيل ڪپور ۽ سندس لاڏلي ڌيءُ سونم ڪپور جي فلم اڪ لڙڪي ڪو ديکها تو” جون پهريون جهلڪيون جاري ڪيون ويون آهن. فلم ۾ انيل ڪپور هڪ فڪرمند پيءُ جو ڪردار ادا ڪري رهيو آهي، ٽريلر موجب سونم ڪپور پنهنجي پيءُ کان ڪو راز لڪائي رهي آهي. فلم ۾ راجڪمار رائو پڻ اهم ڪردار ادا ڪري رهيو آهي، جيڪو سونم سان پيار ڪري ٿو پر هوءَ کيس پنهنجو سچ ٻڌائي ڇڏي ٿي. فلم بولڊ موضوع تي ٺاهي وئي آهي، جنهن ۾ سونم ڪپور کي هم جنس پرست جي ڪردار ۾ نظر ايندي. ٽريلر جاري ٿيڻ کانپوءِ لکين ماڻهن ٽريلر کي ڏسي ورتو آهي. فلم ۾ جوهي چاولا به نظر ايندي، جڏهن ته فلم کي ايندڙ سال فيبروري ۾ نمائش لاءِ پيش ڪيو ويندو.
ايڪشن فلمن ۾ مونکي نئين سڃاڻپ ڏني آهي: ٽائگر شيروف
هلندڙ سال منهنجي ڪيريئر جو ڪامياب سال رهيو
ٻن فلمن جي ناڪامي کانپوءِ باغي 2 جي ڪاميابي سڪون ڏياريو
ممبئي (شوبز نيوز) بالي ووڊ ۾ ٿوري عرصي ۾ ايڪشن فلمن ذريعي پنهنجي سڃاڻپ ٺاهيندڙ جيڪي شيروف جي پٽ ايڪشن هيرو ٽائگر شيروف چيوآهي ته ايڪشن فلمن کيس سڃاڻپ ڏني آهي. سندس چوڻ هو ته 2018ع سال سندس ڪيريئر لاءِ بهترين سال رهيو، ڪيريئر جي شروعات ۾ ناڪام ٿي پر بعد ۾ ايڪشن فلمن سندس ڪيريئر کي سهارو ڏنو. وڏين فلمن ۾ ڪم ڪرڻ سبب ڪاميابي لاءِ پرجوش آهيان. ٽائگر شيروف چيو ته باغي ٿري تيارين جي مرحلي ۾ آهي، کيس اميد آهي ته فلم ڪامياب ٿيندي. ٽائگر شيروف اسٽوڊنٽ آف دي ايئر 2 ۾ اداڪاري جا جلوا ڏيکاريندو جيڪا ايندڙ سال ريليز ٿيندي.
پاڪستان جي پهرين “مسلم عيسائي” گيت ڌوم مچائي ڇڏي
ڪرسمس جي موقعي تي “مسلم ڪرسچن ڪرسمس” گيت ريليز ڪيو ويو
گيت ريليز ٿيندي ئي انٽرنيٽ تي ڌوم مچائي ڇڏي، ماڻهن کي وڻي ويو
ڪراچي (شوبز نيوز) پاڪستان سميت سڄي دنيا ۾ عيسائي برادري پاران ڪرسمس وڏي عقيدت، احترام ۽ جذبي سان ملهائي وئي، ان موقعي پاڪستان ۾ پهريون ڀيرو هڪ مسلم، عيسائي گيت ريليز ڪيو ويو آهي، جيڪو ريليز ٿين کانپوءِ مشهور ٿي ويو آهي. گيت ريليز ٿيڻ کانپوءِ لکين ماڻهو ان کي ڏسي چڪا آهن. مذهبي رواداري جو مثال قائم ڪندي پهريون ڀيرو مسلمان عيسائي ڀائيچاري کي هٿي ڏيڻ لاءِ اهو گيت ريليز ڪيو ويو آهي. گيت ۾ مخلتف مذهبن وچ ۾ هم آهنگي تي زور ڏنو ويو آهي. گيت کي مسيحي مشعل ۽ مسلمان حيدر چائو ڳايو آهي. گيت ذريعي پيغام ڏنو ويو آهي ته سڀني جو خدا هڪ آهي، انڪري هڪٻئي سان محبت ذريعي رهڻ گهرجي. گيت کي سوشل ميڊيا تي تمام گهڻو شيئر ڪيو پيو وڃي، جنهن مان ان جي مقبوليت جو اندازو لڳائي سگهجي ٿو.