غوثپور (ن پ ا) غوثپور ۾ 5 ڏينهن اڳ بجاراڻي ۽ تيغاڻي برادري جي ٻن ڌرين ۾ جهيڙي دوران مارجي ويل نوجوان دوست علي بجاراڻي جا قاتل گرفتار نه ٿيڻ خلاف متاثر ڌُر طرفان انڊس هاءِ وي تي ڌرڻو هنيو ويو، جنهن جي نتيجي ۾ ڪيتري ئي دير تائين روڊ جي ٻنهي پاسن کان گاڏيون بيٺل رهيون. مظاهرين ٽائرن کي باهيون ڏئي پوليس خلاف نعريبازي ڪئي. مظاهري سبب مختلف شهرن ويندڙ گاڏين سوڌو شهيد بينظير ڀٽو جي ورسيءَ ۾ شرڪت لاءِ ويندڙ پ پ ڪارڪنن جا قافلا به رُڪجي ويا. مظاهرين چيو ته قتل ڪيس داخل ٿيڻ باوجود پوليس جوابدارن کي گرفتار نه پئي ڪري.
غوثپور: نوجوان جا قاتل گرفتار نه ٿيڻ خلاف بجاراڻي برادري جي ماڻهن جو ڌرڻو، انڊس هاءِ وي تي گاڏيون بيهجي ويون
5 ڏينهن اڳ جهيڙي دوران قتل ٿيل نوجوان دوست علي بجاراڻي جي وارثن ڌرڻو هنيو
ڪيس داخل ٿيڻ باوجود پوليس جوابدارن کي گرفتار نٿي ڪري: مظاهرين
پاڪستان ۽ برطانيه وچ ۾ قيدين جي مٽاسٽا جو معاهدو ٿي ويو
پاڪستان ۽ برطانيه وچ ۾ قيدين جي مٽاسٽا جو معاهدو ٿي ويو
ٻنهي ملڪن ۾ قيد شهري رهيل سزا پنهنجي ملڪ ۾ ڪاٽيندا: پڌرنامو
اسلام آباد ( ن پ ا) پاڪستان ۽ برطانيه وچ ۾ قيدين جي مٽا سٽا جو معاهدو ٿي ويو، ٻنهي ملڪن ۾ قيد شهري پنهنجي رهيل سزا پنهنجي ملڪ ۾ ڪاٽيندا.
گهرو وزارت طرفان جاري ڪيل پڌرنامي موجب پاڪستان ۽ برطانيه وچ ۾ قيدين جي مٽا سٽا وارو معاهدو مڪمل ٿي ويو، جنهن تي برطانيه جي هاءِ ڪمشنر ٿامس ڊريو ۽ پاڪستان جي گهرو سيڪريٽري اعظم سليمان صحيحيون ڪيون.
معاهدي جي پڌرنامي موجب معاهدي جي منظوري برطانوي گهرو وزير جي سيپٽمبر واري دوري دوران ڏني وئي هئي، جنهن تحت ٻنهي ملڪن جي قيدين کي هڪٻئي حوالي ڪيو ويندو ۽ ٻنهي ملڪن ۾ قيد شهري پنهنجي رهيل سزا پنهنجي ملڪ ۾ ڪاٽيندا.
برطانوي هاءِ ڪمشنر جو چوڻ آهي ته پاڪستان سان قيدين جي مٽاسٽا جو وارو معاهدو ٻنهي ملڪن ۾ سهڪار کي وڌيڪ مضبوط بڻائيندو.
ٺل: نينگر کي گاڏيءَ جو ٽڪر هڻي فرار ٿيندڙ ايڪسيئين سوگهو، ايم پي اي سهراب سرڪي جي ڀاءُ ايڪسيئن کي ڇڏائي ورتو
گاڏي روڪڻ تي ايڪسيئن جي گارڊز ۽ پوليس اهلڪار شهرين کي داٻا ڏيندا رهيا
ٿاڻي تي شهرين ۽ ايڪسيئن ۾ ڳالهيون، آبپاشي انجنيئر لياقت سرڪي ايڪسيئن کي ڇڏايو
ٺل (ن پ ا) ڊيرا مراد جمالي جو ايڪسيئن نذير لاکٽي ٺل ۾ نوجوان کي گاڏيءُ جو ٽڪر هڻڻ بعد فرار ٿيڻ جي ڪوشش ڪري رهيو هو ته شهرين کيس سوگهو ڪري ورتو. شهرين طرفان گاڏي روڪڻ کانپوءِ ايڪسيئن جا گارڊز توڙي سندس سيڪيورٽي اسڪواڊ ۾ شامل پوليس اهلڪار شهرين سان وڙهي پيا. ايڪسيئن جي گارڊز، پوليس اهلڪارن ۽ شهرين وچ ۾ ڪيتري ئي دير تائين جهيڙو هلندو رهيو، جنهن بعد ڌُريون ٺل ٿاڻي تي پهتيون. ايڪسيئن ۽ سندس گارڊز موقف هو ته گاڏيءَ غلطي مان لڳي آهي، پر اسان فرار نه ٿي رهيا هئاسين. جڏهن ته شهرين جو چوڻ هو ته ايڪسيئن ڄاڻي واڻي وچ شهر ۾ تيز رفتاري سان گاڏي هلائي ۽ نينگر کي ٽڪر لڳڻ بعد کيس اسپتال منتقل ڪرڻ بدران پاڻ فرار ٿيڻ جي ڪوشش ڪري رهيو هو. اُن دوران ايم پي اي سهراب سرڪي جو ڀاءُ ۽ آبپاشي انجنيئر لياقت سرڪي پهچي نينگر کي ٽڪر هڻندڙ ايڪسيئن جي جان ڇڏائي. جڏهن ته شهرين کي خالي دلاسا ڏئي خاموش ڪرايو ويو.
ڪراچي ۾ اينڪرپرسن مهڪ مهر مڙس سوڌو چوريءَ جي الزام ۾ گرفتار، جوڙي طرفان آئيس واپرائڻ لاءِ چوري ڪرڻ جو انڪشاف
مهڪ مهر ۽ سندس مڙس آئيس جو نشو ڪرڻ لاءِ گاڏيون چوري ڪندا هئا: ايس ايس پي سهائي
جوڙي جي قبضي مان چوري جي ڪار، پسٽل ۽ ٻيو سامان هٿ آيو: سهائي عزيز ٽالپر
ڪراچي) ن پ ا) ڊفنيس پوليس چوري جي الزام ۾ عورت اينڪر پرسن کي مڙس سوڌو گرفتار ڪري ورتو، ايس ايس پي سهائي عزيز ٽالپر دعويٰ ڪئي آهي ته جوڙو آئيس نشي جو عادي آهي، نشي لاءِ گاڏيون چوري ڪندو آهي.
ڪراچي ۾ پريس ڪانفرنس ڪندي ايس ايس پي سهائي عزيز ٽالپر چيو ته ڊفينس پوليس هڪ بنگلي تي ڇاپو هڻي عورت اينڪر پرسن مهڪ مهر کي مڙس سوڌو گرفتار ڪري ورتو، هن چيو ته ڇاپي دوران ٻنهي جي قبضي مان چوري ڪيل ڪار، پسٽل ۽ ٻيو چوري جو سامان هٿ آيو آهي.
سهائي عزيز ٽالپر چيو ته اينڪرپرسن مهڪ مهر ۽ سندس مڙس شعيب احمد پسند جي شادي ڪئي هئي، جوڙو آئيس نشي جو عادي آهي، جيڪو نشي جي لت پوري ڪرڻ لاءِ گاڏيون ۽ گاڏين جو سامان چوري ڪندو آهي، گرفتار خيرپور واسڻ مهڪ مهر ٽن مختلف چنئلز تي اينڪر پرسن طور ڪم ڪري چڪي آهي، جوڙو پڙهيل لکيل ۽ چالاڪ آهي.
سري ديوي جي ننڍي ڌيءُ به بالي ووڊ قدم رکڻ لاءِ تيار
جهانوي ڪپور کانپوءِ خوشي ڪپور به فلمن ۾ ڪم ڪندي
ڪرن جوهر خوشي ڪپور ۽ ميزان جعفري کي ايندڙ فلم ۾ متعارف ڪندو
ممبئي (شوبز نيوز) بالي ووڊ جي مرحوم اداڪاره سري ديوي جي وڏي ڌيءُ جهانوي ڪپور کانپوءِ هاڻي سندس ننڍي ڌيءُ خوشي ڪپور به بالي ووڊ ۾ ڪم ڪرڻ لاءِ تيار ٿي وئي آهي. ڪرن جوهر پاران نيها ڌوپيا جي شو، نو فلٽر نيها ۾ ڳالهائيندي چيو ته هو ايندڙ سال فلم ٺاهي رهيو آهي، جنهن ۾ خوشي ڪپور سان گڏ جاويد جعفري جو پٽ ميزان جعفري پڻ اهم ڪردار ادا ڪندو. ڪرن جوهر ميزان جعفري بابت ڳالهائيندي چيو ته هن ۾ هڪ اسٽار بڻجڻ جو سموريون خوبيون موجود آهن. ڪرن جوهر چيو ته سندس فلم 2019 ۾ ريليز ٿيندي جنهن ۾ مک ڪردار خوشي ڪپور ۽ ميزان جعفري ادا ڪندا.
ملي سائرس هيمسورٿ سان شادي جي تصديق ڪري ڇڏي
ملي سائرس سوشل ميڊيا ذريعي آسٽريلوي اداڪار سان شادي جي تصديق ڪئي
ليام هيمسورٿ ۽ ملي سائرس آچر ڏينهن شادي ڪئي، خاص تقريب به ٿي
لاس اينجلس (شوبز نيوز) آمريڪي پاپ ڳائڻي ملي سائرس آسٽريلوي اداڪار سان شادي جي تصديق ڪري ڇڏي آهي. سوشل ميڊيا ذريعي جاري ڪيل بيان ۾ ملي سائرس پنهنجي ور سان گڏ مٺي جي تصيور شيئر ڪئي، هن شادي جي حوالي سان تصوير به شيئر ڪئي، جيڪا آچر ڏينهن ٿيڻ جون خبرون ميڊيا تي هلي رهيون آهن. ٻئي ڄڻا ڏهه سال اڳ “لاسٽ سانگ” فلم جي شوٽنگ دوران مليا، جنهن کانپوءِ سندن وچ ۾ لاڳاپن جون خبرون هلنديون رهيون آهن. جوڙي پاران 2012ع ۾ مڱڻي ڪئي هئي پر اها هڪ سال اندر ئي ختم ٿي وئي هئي، پر هلندڙ سال نومبر ۾ هڪڀيرو ٻيهر سندن شادي جون خبرون سامهون آيون هيون.
جيڪو چيو ان تي ڪو به افسوس ناهي: نصيرالدين شاهه
مان پنهنجا چيل لفظ واپس نه وٺندس: نصيرالدين شاهه جو ردعمل
اداڪار جي حمايت ۾ ڪيترائي شوبز ستارا توڙي سياسي اڳواڻ نڪري آيا
ممبئي (شوبز نيوز) ڀارت جي ڀلوڙ اداڪار نصيرالدين شاهه ڀارت ۾ انتهاپسندن جي تنقيد کانپوءِ جواب ڏيندي چيو آهي ته هو پنهنجا لفظ واپس نه وٺندو، هن جيڪو چيو کيس ان تي ڪو به افسوس ناهي. ڪجهه ڏينهن پهريان ڀارت ۾ وڌندڙ انتهاپسندي خلاف ڳالهائڻ تي نصيرالدين شاهه کي انتهاپسندن پاران تنقيد جو نشانو بڻائيندي کيس غدار قرار ڏنو ويو هو، پر سندس حمايت ۾ ڪيترائي اداڪار توڙي سياسي اڳواڻ به ميدان تي آيا. نصيرالدين شاهه چيو ته هن جيڪو چيو ان تي قائم آهي، کيس پنهنجن لفظن تي ڪو به افسوس ناهي.
اليڪشن ڪميشن آصف زرداري جي نااهليءَ لاءِ پي ٽي آءِ طرفان داخل درخواست ٻڌڻي لاءِ منظور ڪري ورتي
شروعاتي ٻڌڻي دوران رڳو درخواستگذار جو موقف ٻڌو ويندو: اليڪشن ڪميشن
اليڪشن ڪميشن ۾ آصف زرداري خلاف درخواست تي ٻڌڻي ايندڙ هفتي ٿيڻ جو امڪان
اسلام آباد( ن پ ا ) اليڪشن ڪميشن آصف زرداري جي نااهلي بابت پي ٽي آءِ جي درخواست شروعاتي ٻڌڻي لاءِ منظور ڪري ورتي، ايندڙ هفتي ٻڌڻي ٿيڻ جو امڪان ظاهر ڪيو پيو.
اليڪشن ڪميشن جي 5 رڪني بينچ خرم شير زمان جي درخواست جو جائزو وٺڻ بعد شروعاتي ٻڌڻي لاءِ منظوري ڏني، شروعاتي ٻڌڻي دوران رڳو درخواستگذار کي نوٽيس جاري ڪري سندس موقف ٻڌو ويندو.
آصف زرداري خلاف درخواست تي شروعاتي ٻڌڻي ايندڙ هفتي ٿيڻ جو امڪان ظاهر ڪيو پيو وڃي، درخواست ۾ پي آءِ اي جي خرم شير زمان آصف زرداري تي اثاثا لڪائڻ جو الزام هڻندي کيس نااهل قرار ڏيڻ جي استدعا ڪئي آهي.
واضح رهي ته ڪجهه وقت اڳ وفاقي وزير فواد چوڌري الزام هنيو هو ته آصف زرداري امريڪا ۾ هڪ اپارٽمينٽ جو مالڪ آهي ۽ هن اهو اپارٽمينٽ پنهنجي اثاثن ۾ ظاهر ناهي ڪيو.
رنوير ۽ سارا جي فلم “سمبا” جو نئون گانو ريليز ٿي ويو
ميرا والا ڊانس گانو سارا علي خان ۽ رنوير تي فلمايو ويو آهي
نيها ڪَڪَڙ ۽ نڪاش عزيز پاران ڳايل گيت ڪمار لکيو آهي
ممبئي (شوبز نيوز ) بالي ووڊ اداڪارن رنوير سنگهه ۽ سارا علي خان جي نئين فلم سمبا ريليز لاءِ تيار آهي، فلم جي ريليز ٿيڻ کان هڪ ڏينهن اڳ نئون گيت جاري ڪيو ويو آهي، جڏهن ته ميرا والا ڊانس نالي گاني کي نيها ڪَڪَڙ ۽ نڪاش عزيز ڳايو آهي، جڏهن ته ڪمار پاران گيت کي لکيو آهي. سمبا ۾ رنوير سنگهه هڪ ڪرپٽ پوليس آفيسر ڪو ڪردار ادا ڪري رهيو آهي. روهت شيٽي جي هديتڪاري ۾ ٺهندڙ فلم کي 28 جمعي ڏينهن ريليز ڪيو ويندو. فلم کي ڪرن جوهر پروڊيوس ڪري رهيو آهي، جڏهن ته سارا علي خان ۽ رنوير سنگهه مرڪزي ڪردار ادا ڪري رهيا آهن.
نيوزيلينڊ پاران سريلنڪا خلاف ون سيريز لاءِ ٽيم جو اعلان
جيمز نيشم، ڊوگ بريسويل کي به 3 ون ڊي ميچن لاءِ ٽيم ۾ شامل ڪيو ويو
سريلنڪا ۽ نيوزيلينڊ وچ ۾ ٽن ون ڊي ميچن جي سيريز 3 جنوري کان شروع ٿيندي
ويلنگٽن (اسپورٽس ڊيسڪ) نيوزيلينڊ پاران سريلنڪا خلاف ون ڊي سيريز لاءِ ٽيم جو اعلان ڪري ڇڏيو آهي. مارٽن گپٽل جي وڏي عرصي کانپوءِ عالمي ڪرڪيٽ ۾ واپسي ٿي آهي. ٽن ون ڊي ميچن جي سيريز لاءِ ڪيويز پاران پاڪستان خلاف ڊراپ ڪيل جيمز نيشم ۽ ڊوگ بريسويل کي پڻ شامل ڪيو ويو آهي. ٽيم ۾ ڪين وليمسن (ڪپتان) ٽرينٽ بولٽ، ڊوگ بريسويل، جيمز نيشم، مارٽن گپٽل، ميٽ هينري، لوڪي فرگوسن، هينري نڪولس، ڪولن منرو، ٽم اسٽافئر، اش سوڍي، ٽم سائوٿي ۽ روس ٽيلر شامل آهن. نيوزيلينڊ ايندڙ سال ورلڊ ڪپ کان اڳ 11 ون ڊي ميچن، سريلنڪا، ڀارت ۽ بنگلاديش خلاف کيڏندي جنهن کي نظر ۾ رکندي ٽيم جي چونڊ ڪئي وئي آهي.
شهيد بينظير ڀٽو جي ورسي: سنڌ جي 23 ايس ايس پيز ۽ 57 ڊي ايس پيز کي ڊيوٽي تي مقرر ڪيو ويو
حيدرآباد ( ن پ ا) شهيد بينطير ڀٽو جي ورسي جي سڪيورٽي لاءِ سنڌ جا 23 ايس ايس پيز، 57 ڊي ايس پيز ۽ 8 اي ايس پيز مقرر
شهيد بينظير ڀٽو جي 11 هين ورسي جي موقعي تي هزارين پوليس اهلڪارن کي سڪيورٽي لاءِ مقرر ڪيو ويو آهي، ان کانسواءِ سنڌ جا 23 ايس ايس پيز، 57 ڊي ايس پيز ۽ 7 اي ايس پيز به ورسي جي سڪيورٽي لاءِ ڊيوٽي ڏئي رهي رهيا آهن.
ڊيوٽي چارٽ موجب ايس ايس پي دادو پرويز احمد عمراڻي، ايس پي عمرڪوٽ، اعجاز احمد شيخ، ايس پي قمبر شهدادڪوٽ ذوالفقار علي مهر، ايس ايس پي شڪارپور ساجد حسين سبدزوئي، نوشهروفيروز جو ايس ايس پي طارق ولايت، ايس پي سجاول امير سعود مگسي، ايس ايس پي سانگهڙ ذيشان شفيق صديقي، اڪيلي عورت ايس پي نسيم آرا پنهور، ايس پي ڪشمور ڪنڌڪوٽ حيدر رضا، ايس پي حيدرآباد سرفراز نواز شيخ، ايس پي جيڪب آباد عبدالقيوم پتافي، ايس پي مٽياري عمران رياض، ايس پي بدين حسن سردار نيازي، ايس پي خيرپور عمر طفيل، ايس ايس پي شهيدبينظير آباد تنوير حسين تنيو، ايس پي جامشورو توقير محمد نعيم، ايس پي گهوٽڪي ڊاڪٽر اسد اعجاز ملهي، ايس پي ميرپورخاص عابد بلوچ، ايس پي ٽنڊو محمد خان ذوالفقار ٽالپر، مسعود بنگش، ڪامران نواز پنجوٺا، امداد شاه ۽ شاهجهان خان کي ڳڙهي خدابخش ۽ نئون ديرو هائوس سميت مختلف هنڌن تي ڊيوٽي لاءِ مقرر آهن.
ساڳي ريت 8 اي ايس پيز به ڳڙهي خدابخش سميت مختلف هنڌن تي ورسي جي موقعي تي سڪيورٽي تي مقرر آهن، جن ۾ شڪارپور جو فاروق احمد، گمبٽ جو عمران خان نيازي، ٺٽي جو سرفرازورڪ، سانگهڙ جو اظهر خان، سکر جو محمد سميع ملڪ، حيدرآباد جو عبدالله لڪ، خيرپور جو مظهراقبال ۽ ميرپورخاص جو اي ايس پي عمران مرزا شامل آهن، سنڌ جي مختلف ضلعن جي 57 ڊي ايس پيز کي پڻ ٽن ڏينهن لاءِ ورسي جي ڊيوٽي تي مقرر ڪيو ويو آهي، ڄاڻايل پوليس آفيسر 26 ڊسمبر کان 28 ڊسمبر تائين ورسي جي سڪيورٽي لاءِ ڊيوٽي ادا ڪرڻ بعد واپس پنهنجن ضلعن ڏانهن ويندا.
اردو جي عظيم شاعر مرزا غالب جي 222 هين سالگرهه ملهائي پئي وڃي
ڪراچي (م ڊ) اردو ٻولي کي نئون ساهه ڦوڪيندڙ ۽ ننڍي کند جي عظيم شاعر مرزا غالب جو اڄ 222 هون جنم ڏينهن ملهايو پيو وڃي. مرزا غالب جو اصل نالو اسد الله بيگ هو، هو ۲۷ ڊسمبر ۱۷۹۷ع تي ڀارت جي شهر آگره ۾ ڄائو، مرزا غالب پنهنجي شاعري سان اردو ٻولي ۾ تازگي بخشي، سندس نالو وڏن شاعرن ۾ لکيو وڃي ٿو، هو ننڍپڻ ۾ ئي يتيم ٿي ويو هو، جنهن بعد کيس پنهنجي چاچي نصرالله بيگ پاليو، جڏهن مرزا غالب ۸ سالن جو ٿيو ته سندس چاچو به لاڏاڻو ڪري ويو، ۱۳ سالن جي عمر ۾ مرزا غالب جي شادي ٿي، شادي کان پوءِ غالب پنهنجو اباڻو وطن ڇڏي دلي لڏي ويو، مرزا غالب جي شاعريءَ ۾ انسان ۽ ڪائنات جي مسئلن سان گڏ محبت ۽ زندگي سان پيار ڪرڻ جو پيغام ملي ٿو. مرزا غالب 1869ع ۾ لاڏاڻو ڪيو، جڏهن ته مغل بادشاهت جو زوال هن پنهنجي اکين سان ڏٺو. مرزا غالب جي زندگي تي شاعر گلزار پاران بهترين ڊرامو پڻ ٺاهيو، جنهن ۾ ڀلوڙ اداڪار نصيرالدين شاهه غالب جو ڪردار ادا ڪري وڏو داد حاصل ڪيو.
“هزارين شاگرد پريشان” لطيف يونيورسٽي جو سپلا سان ڳالهين بعد نئون امتحاني شيڊول جاري ڪرڻ جو فيصلو
انتظام پورا ڪري ورتا هئا، سپلا جي احتجاج سبب امتحان ملتوي ڪرڻا پيا: يونيورسٽي ترجمان
آن لائين فارم گم ڪرڻ کانپوءِ ڪاليج ڏانهن خالي فارم ڪاليجز ڏانهن موڪليا ويا آهن: سپلا
سکر (رپورٽر) شاهه عبداللطيف يونيورسٽي جي اختيارين ڪاليج سائيڊ جي ملتوي ٿيل امتحاني پيپر جو نئون شيڊول سپلا سان ڳالهين بعد جاري ڪرڻ جو فيصلو ڪري ورتو. سنڌ پروفيسرس اينڊ ليڪچررز ائسوسيئيشن طرفان ڪاليج سائيڊ جي امتحانن لاءِ انتظام اڻپورا هجڻ ڪري ڪاليج سائيڊ جي امتحانن جي بائيڪاٽ جو اعلان ڪيو ويو هو. يونيورسٽي انتظاميا ۽ سپلاءِ وچ ۾ تڪرار شدت اختيار ڪرڻ بعد يونيورسٽي انتظاميا سکر ۽ لاڙڪاڻي ڊويزن ۾ 28 ڊسمبر تي رٿيل ڪاليج سائيڊ جا امتحان ملتوي ڪيا ويا. ذريعن موجب يونيورسٽي انتظاميا چيو آهي ته سپلا اڳواڻن سان ڳالهيون ڪامياب ٿيڻ بعد ڪاليج سائيڊ جي امتحانن نئون شيڊول جاري ڪيو ويندو. شاهه عبداللطيف يونيورسٽي جي ترجمان جو چوڻ آهي ته ڪاليج سائيڊ جي امتحانن لاءِ سمورا انتظام مڪمل آهن، پر سپلا جي احتجاج سبب امتحان ملتوي ڪرڻا پيا. سپلا سکر ۽ لاڙڪاڻو ڊويزن جي صدر اصغر علي شاهه ۽ سيڪريٽري مشتاق ڦلپوٽو جو چون آهي ته جن شاگردن آن لائين فارم ڀريا هئا، يونيورسٽي انتظاميا انهن شاگردن جا فارم گُم ڪري ڇڏيا ۽ هاڻ ڪاليجن ڏانهن خالي فارم موڪلي هدايتون جاري ڪيون ويون آهن ته شاگردن کان جلد فارم ڀرايا وڃن. واضح رهي ته شاهه عبداللطيف يونيورسٽي ۽ سپلا وچ ۾ تڪرار سبب سکر ۽ لاڙڪاڻي ڊويزن جي 85 کان وڌيڪ ڪاليجن جا 60 هزار شاگرد رُلي ويا آهن. شاگردن ٻُڏتر ۾ آهن ته کين امتحانن لاءِ سلپون ڪڏهن ملنديون ۽ نئون شيڊول ڪڏهن جاري ٿيندو.
بالي ووڊ سلطان سلمان خان 53 ورهين جو ٿي ويو
سلمان خان بالي ووڊ باڪس آفيس جو به سلطان، تڪراري به رهيو
سلو ڀائي درجنين بالي ووڊ جون مشهور ۽ ڪامياب فلمون ڪري چڪو
ممبئي (شوبز نيوز) بالي ووڊ جو سلطان سلمان خان 53 ورهين جو ٿي ويو آهي. سلمان خان 27 ڊسمبر 1965ع ۾ سليم خان جي گهر ڄائو. هن بيوي هو تو ايسي سان پنهنجي فلمي ڪيريئر جي شروعات ڪئي پر سندس پهرين ڪامياب فلم جنهن ۾ هن هيرو طور ڪم ڪيو اها ميني پيار ڪيا” هئي جيڪا 1989ع ۾ ريليز ٿي هئي. ميني پيار ڪيا، ڀارت سان گڏ عالمي سطح تي ڪامياب ٿي. ان کانپوءِ سلمان خان باغي، صنم بيوفا ۽ ٻيون فلمون ڪري بالي ووڊ ۾ پير ڄمايو. انداز اپنا اپنا باڪس آفيس تي ناڪام ٿي پر نقادن پاران سلمان جي ان فلم ۾ اداڪاري جي ساراهه ٿي. سلمان خان 2009ع کانپوءِ وڏيون ڪاميابيون ماڻيندو رهيو آهي، جنهن جي شروعات وانٽڊ سان ٿي. سلمان خان دبنگ فلم پڻ ڪيترائي رڪارڊ ٽوڙيا. سلمان جي ايندڙ فلم ڀارت جلد ريليز ٿيندي، جڏهن ته هو پنهنجي ڪيريئر ۾ جيل ڪاٽي چڪو آهي، جڏهن ته مختلف اداڪارائن سان سندس لاڳاپا پڻ خبرن ۾ رهيا آهن.
نيپرا بجلي جي اگهن ۾ 31 پيسا لاٿ ڪري ڇڏي
بجلي اگهن ۾ لاٿ نومبر جي ماهوار فيول ايڊجسٽمينٽ جي مد ۾ ڪئي وئي: نيپرا
بجلي اگهن ۾ لاٿ سان واهپيدارن کي 2 ارب رپين جو رليف ملندو: نيپرا
اسلام آباد ( ن پ ا ) بجلي جي اگهن ۾ 31 پيسا لاٿ ڪئي وئي، نيپرا موجب بجلي اگهن ۾ لاٿ سان واهپيدارن کي 2 ارب رپين جو رليف ملندو.
بجلي اگهن بابت ٻڌڻي نيپرا جي ٻڌڻي رحمت الله بلوچ جي صدارت ۾ ٿي، جنهن دوران بجلي جي اگهه ۾ 31 پيسا في يونٽ لاٿ جي منظوري ڏني وئي، نيپرا موجب بجلي اگهن ۾ لاٿ نومبر جي ماهوار فيول ايڊجسٽمينٽ جي مد ۾ ڪئي وئي.
نيپرا جو چوڻ آهي ته سينٽرل پاور پرچيزنگ ايجنسي بجلي جي اگهن ۾ لاٿ جي درخواست ڏني هئي ۽ اگهن ۾ لاٿ سان واهپيدارن کي 2 ارب رپين جو رليف ملندو.