ڪراچي ( پ ن ا) پي ايس پي آفيس تي حملي بعد جوابدارن جي فرار ٿيڻ وارا سي سي ٽي وي فٽيجز منظرعام تي اچي ويا.
سي سي ٽي وي فٽيجز ۾ ٽن موٽرسائيڪلن تي سوار 6 هٿياربندن کي فرار ٿيندي ڏسي سگهجي ٿو ۽ گهٽي ۾ موجود ٻار فائرنگ جو آواز ٻڌڻ بعد خوف ۾ ڀڄندي نظر اچن پيا.
4 ڏينهن اڳ ڪراچي ۾ رضويه ٿاڻي جي حد ۾ هٿياربندن پي ايس پي جي آفيس تي حملو ڪيو هو، جنهن دوران فائرنگ جي نتيجي ۾ 2 ڪارڪن مارجي ويا ۽ 2 زخمي ٿيا هئا.
پوليس موجب هٿياربند جهانگير آباد وٽان آيا ۽ پي ايس پي جي آفيس تي حملي بعد ٻئي پاسي کان فرار ٿي ويا

ٺاروشاهه (ن پ ا) ٺاروشاهه ڀرسان پراسرار بيماري سبب گهر جو اڪيلو سهارو ٽن ٻارن جو پيءُذهني توازن وڃائي ويٺو، غربت سبب علاج کان محروم، الهه تلهه وڪرو، پيرسن امڙ شهر مان خيرات گهري پيٽ پالڻ تي مجبور، پٽ جي علاج جي لاءِ اپيل، ٺاروشاهه ڀرسان ڳوٺ اسحاق ننڍا موريا ۾ گهر جو اڪيلو سهارو ٽن ٻارن جو پيءُ 30 سالا نوجوان محمد رمضان ٻٻر پراسرار بيماري سبب ذهني توازن وڃائي ويٺو غربت سبب علاج نه ٿيڻ ڪري بي يارو مدد گار گهر ۾ پيل آهي جڏهن ته سندس امڙ مير زادي ٻٻر پنهنجي اخبار سان ڳالهائيندي چيو ته مونکي هڪ ئي پٽ جو اولاد آهي جيڪوڪجهه سال اڳ بيمار ٿي پيو هو جنهن جي علاج تي گهر جو الهه تلهه وڪرو ڪرڻ باوجود ٺيڪ نه ٿي سگهيو هن چيو ته غربت سبب سٺو علاج نه ٿيڻ ڪري هو ذهني توازن وڃائي چڪو آهي منهنجو مڙس الله بخش ٻٻر معذوري سبب هڪ جاءِ تي ويٺل آهي پٽ گهر جو واحد ڪمائيندڙ هو پٽ جي ذهني توازن وڃائڻ سبب گهر ۾ فاڪاڪشي ڪرڻ تي مجبور بڻجي ويا آهيون هن روئيندي چيو ته فاڪاڪشي کان مجبور ٿي شهر مان خيرات وٺي پٽ جو علاج ڪرائڻ سميت ٻچن جو پيٽ پالي رهي آهيان پٽ جي علاج جي لاءِ تر جي چونڊيل نمائندن وس وارن ڏانهن به ويس پر ڪنهن به اڄ ڏينهن تائين ڪابه مدد نه ڪئي آهي نوجوان پٽ کي بيماري جي بستري تي ڏسي جيءُ جهري پوندو آهي هن چيو ته ڊاڪٽر پٽ جي علاج تي لکين روپيا خرچ جو ٻڌائي رهيا آهن هنن وس وارن کي اپيل ڪندي چيو ته پٽ جو علاج ڪرائي سندس حياتي کي بچايو وڃي.

وڳڻ (ن پ ا (سيپڪو ايڪسن جي اڳواڻي ۾ وڳڻ شهر جي مختلف پاڙن ۾ بجلي چوري خلاف آپريشن ڪيو ويو، ٻرڙا ڪالوني، کبڙي مڪان محلا، بس اسٽينڊ روڊ، نصيرآباد ناڪو، وڳڻ مين چونڪ، پوراڻو بس اسٽينڊ سميت ڪيترن ئي پاڙن جا 200 کان وڌيڪ غير قانوني ڪنيڪشن ڪاٽيا ويا.
سيپڪو ايڪسئن موجب قمبر ضلعي جي سڀني تعلقن ۾ ننڊن وڏن شهرن ۾ بنا بلز جي بجلي استعمال ڪندڙ چورن خلاف اپريشن جاري آهي ۽ بجلي چوري ڪنهن به صورت ۾ برداشت نه ڪئي ويندي.

ڇاڇرو (ن-پ-ا)ڇاڇرو شھر ۾ ٿر جي مختلف ڳوٺن ۾ آر او پلانٽ تي ملازمت ڪندڙ ملازمن جو پگهارون نه ملڻ خلاف احتجاجي مظاهرو ڌرڻو، اڀ ڏاريندڙ نعرا، مختلف ڳوٺن جي آر او پلانٽ ملازمن الهجڙيو نهڙي ذوالفقار نهڙي نهال مينگهواڙ علي محمد راهمون قاضي راهمون سنجر خان راهمون اقبال راهمون دودو خان ٻين مظاهرو ڪيو، مظاهرين جو چوڻ هيو ته اسان جا ٻچا بکون ڪاٽي رهيا آهن،جڏهن ته ٿر ۾ آر او پلانٽ هلائيندڙ نجي ڪمپني پگهارون نه پئي ڏي، آر او پلانٽ آپريٽر جو چوڻ آهي ته گذريل پنج مهينن کان پگهارون بند آهن،آر او پلانٽ هلائڻ اسان بند ڪري ڇڏيا آهن، اسان جا مطالبا منظور ڪيا وڃن.

نوشهروفيروز(رپورٽر) سول اسپتال نوشهروفيروز کي اپ گريڊ نه ڪرڻ خلاف احتجاجي ريلي ڪڍي وئي، ريلي مهراڻ چوڪ کان شروع ٿي ۽ شهر جو گشت ڪرڻ بعد پريس ڪلب پهتي جتي علامتي بک هڙتال ڪئي وئي. احتجاج ڪندڙ اسپتال کي سهولتون ڏيو جا نعره هڻي رهيا هئا، ريلي جي اڳواڻي سنڌي ادبي سنگت ضلع نوشهروفيروز جي رابطه سيڪريٽري سيد مختيار علي شاهه، سول اسپتال بچايو ايڪشن ڪميٽي جي اڳواڻن يونس راڄپر، خادم سيال، سڪندر جروار، سيد شمس الدين، عزيز ڦل ۽ ٻين چيو ته سول اسپتال ۾ علاج جون بنيادي سهولتون ميسر ناهن، جنهن ڪري اسپتال ايندڙ مريض سخت پريشان ٿين ٿا. اسپتال جي دل ۽ گردن واري وارڊ کي ايس اين اي نه هئڻ ڪري وارڊن ۾ مڪمل اسٽاف، ڊاڪٽر ۽ دوائون ناهن جنهن ڪري دل ۽ گردن وارن مريضن کي تمام گهڻو ڀوڳڻو پوي ٿو. هنن چيو ته انتظاميه هٿ وٺي اسپتال مان 45 ڊاڪٽر وڏن شهرن ڏانهن بدلي ڪري ڇڏيا آهن جنهن ڪري اسپتال ۾ ڊاڪٽرن جي کوٽ پيدا ٿي آهي، اسپتال ۾ سرجن ڊاڪٽر نه هجڻ ڪري غريب مريضن جا آپريشن به نه ٿا ڪيا وڃن، هنن مطالبو ڪيو ته سول اسپتال کي اپ گريڊ ڪرڻ لاءِ وڏي وزير جي جاري ڪيل ليٽر تي فوري طور تي عمل ڪري شهرين کي علاج جهڙي بنيادي سهولت فراهم ڪئي وڃي.

ميان صاحب ( ن پ ا ) پوليس 20 ڏينهن اڳ اغوا بعد قتل ڪيل نوجوان جا قاتل گرفتار ڪري نه سگهي، وارثن پوليس جي ڪارڪردگي مان مايوسي جو اظهار ڪندي انصاف جي اپيل ڪئي آهي.
نوجوان محمد حنيف کي اغوا بعد قتل ڪرڻ وارو ڪيس داخل هئڻ باوجود ميان صاحب پوليس سندس قاتلن کي 20 ڏينهن گذرڻ باوجود گرفتار ڪري نه سگهي.
نوجوان جي وارثن جو چوڻ آهي ته ڪيس ۾ نامزد جوابدارن جي گرفتاري لاءِ پوليس هيل تائين ڪي به جوڳا اپاءُ نه ورتا آهن، پوليس جي ڪارڪردگي انتهائي مايوس ڪندڙ آهي، معاملو جو نوٽيس وٺي قاتلن کي گرفتار ڪيو وڃي ۽ انصاف جي فراهمي کي يقيني بڻائڻ لاءِ جوڳا قدم کنيا وڃن

ڪشمور(ن پ ا) گڊو بيراج ڀرسان بي ايس فيڊر مان هٿ آيل عورت جي لاش جي سڃاڻپ مسمات امرون پٺاڻ طور ڪئي وئي آهي ، پوسٽ مارٽم بعد لاش وارثن حوالي ڪيو ويو . اڄ صبح وقت بي ايس فيڊر ۾ لاش ترندي ڏسي گڊو پوليس کي اطلاع ڏنو ويو جنهن کانپوءَ پوليس ۽ ڳوٺاڻن پنهنجي مدد پاڻ تحت لاش ٻاهر ڪڍيو. ڪجهه ڪلاڪن کانپوءِ لاش جي سڃاڻپ گڊو بي ايس فيڊر ڀرسان تاج محل پاڙي جي رھواسڻ عورت مسمات امرون پٺاڻ طور ڪئي وئي 60 سالا مسمات امرون پٺاڻ جو لاش ڪشمور سول اسپتال آندو ويو جتان پوسٽ مارٽم بعد لاش وارثن حوالي ڪيو ويو .سول اسپتال ڊاڪٽرن جي رپورٽ موجب مسمات امرون جو موت پاڻي ۾ ٻڏڻ ڪري ٿيو آهي رابطو ڪرڻ تي فوتي عورت جي مڙس عبدالرسول پٺاڻ چيو ته سندس گهرواري کي مرگهي جا دورا پوندا هئا بيماري جي حالت ۾ پير ترڪڻ سبب پاڻي ۾ ڪري فوت ٿي .

ڏھرڪي ( ن پ ا ) ڏهرڪي پوليس معصوم شاگرد سان مبينا جنسي ڏاڍائي جي الزام هيٺ گرفتار ٻن جوابدار کي آزاد ڪري ڇڏيو، نينگر جي والد دانهيو آهي ته پوليس جي ڌٻاءُ تي راڄوڻي لاءِ راضي ٿي ويا آهيون پر فيصلي کان اڳ جوابدارن کي آزاد ڪرڻ زيادتي آهي، پوليس جو موقف آهي ته ڪيس داخل ڪرائڻ تائين جوابدارن کي حراست ۾ نه ٿا رکي سگهون
ڪجهه ڏينهن اڳ ڏهرڪي جي القطب ٽائون ۾ 6 هين ڪلاس جي شاگرد سان زيادتي جي جي وڊيو وائرل ٿيڻ بعد پوليس الزام هيٺ آيل ٻن جوابدارن فضل سومرو ۽ علي پنجابي گرفتار ڪيو هو، جن کي رات دير سان آزاد ڪيو ويو آهي.
رابطو ڪرڻ تي نينگر جي والد عبدلجبار ملڪ پنهنجي اخبار کي ٻڌايو ته پوليس دٻاءُ وجهي راڄوڻي لاءِ لکت ۾ راضپو حاصل ڪيو آهي، غريب آهيون، ڪجهه ڪري به نه ٿا سگهون، پر اڄ ڀرچونڊي پير ميان رفيق کان فيصلي جي تاريخ وٺڻي هئي، پر ان کان اڳ ئي پوليس جوابدارن کي آزاد ڪري ڇڏيو آهي.
رابطو ڪرڻ تي پوليس ٻڌايو ته ڌريون پاڻ ۾ ٺهي ويون آهن، جنهن سبب ڪيس به داخل ناهي ڪرايو ويو، ڪيس داخل ڪرائڻ تائين جوابدارن کي حراست ۾ نه ٿو رکي سگهجي

ميهڙ (ن-پ-ا) تحريڪانصاف تعلقي ميهڙ جي نائب صدر رئيس قربان بزنجو (بروهي ) جو ننڍو ڀاءُ عبدالله بزنجو لاڏاڻو ڪري ويو جنازه نماز اڄ عيد گاه ميهڙ ۾ ادا ڪئي ويندي ۽ گاهي مهيسر روڊ تنيه هائوس ڀرسان تڏو وڇايو ويو آهي، جتي شهرين ۽ سياسي سماجي اڳواڻن پاران مرحوم جي وارثن سان تعزيت جو سلسلو جاري آهي.

ميهڙ (ن پ ا) سيشن ڪورٽ دادو ءِ پاڻي ڪميشن جي چيئرمين رٽائرڊ جسٽس امير هاني مسلم جي حڪم تي ميهڙ جي مين روڊ سميت شهر جي مختلف رستن تان حد دخلين هٽائڻ واري ڪاروائي شروع ڪئي وئي آهي ا ن سلسلي ۾ عدالت جي حڪم تي اڃ به اسٽنٽ ڪمشنر عبدالفتاح پنهور، ايس ايڇ او اي سيڪشن امان الله چنو، ايس ايڇ او بي سيڪشن ممتاز سرڪي، ميونسپل ميهڙ جي چيف ميونسپل آفيسر اورنگزيب مگسي، مارڪيٽ ڪاميٽي جو چيئرمين مهراب لاکير ۽ ٻين جي نگراني ۾ وڏن پوليس اٽالن جي موجودگي ۾ شهر ۾ مين روڊ، مک بازار ,ريشم گلي سميت مختلف هنڌن وٽ دڪانن جا دڪا ڇپرا، منهن ڊاهيا پيا وڃن ۽ قبضا هٽايا پيا وڃن ان سلسلي ۾ ميونسپل ميهڙ پاران حد دخلين ڪندڙ دڪاندارن کي نوٽيس پڻ جاري ڪيا ويا هئا . ان سلسلي ۾ ميهڙ شھر ۾ ناجائز حد دخلين خلاف ميهڙ شھر جي رهائشي شفيق احمد شيخ پاران ڊسٽرڪٽ سيشن ڪورٽ ۾ داخل پٽيشن تي به ميونسپل اختيارن روينيو کاتي جي عملدارن ناجائز حد دخلين ختم ڪرڻ خلاف ڪيس داخل ڪرايو هو پر عدالت جي طلب ڪرڻ تي ايس ڊي ايم ميهڙ فهيم لاکير مختيارڪارميهڙ صابر حسين ميراڻي عدالت پاران طلب ڪرڻ تي نه اچڻ جو عدالت ۾ ڪيس داخل ڪرائڻ جي حڪم بعد عدالت پاران اسٽنٽ ڪمشنر عبدالفتاح کي قبضن هٽائڻ واري ڪم جو انچارج مقرر ڪري قبضا هٽائڻ جو حڪم ڏنو هو جنهن بعد اڄ به عدالت جي حڪم تي قبضن هٽائڻ واري ڪاروائي جاري رهي، هوڏانهن قبضن هٽائڻ واري ڪاروائي دوران شهرين نظير جانوري ۽ ٻين الزام هنيو آهي ته ميونسپل ميهڙ، مارڪيٽ ڪاميٽي وارا پئسا وٺي قبضا خورن سان مليل آھن انهن پئسن عيوض قبضا ڪرايا آھن ۽ قبضن هٽائڻ واري ڪاروائي صرف ڏيکاءُ آهي بااثر حڪومتي جماعت سان واسطور رکندڙ قبضا خورن جا قبضا نه پيا هٽايا وڃن تعلقه اسپتال ميهڙ ، اريگيشن آفيس ۽ ريوينيو آفيس ڀرسان ايس ڊي ايم جي پراڻي رهائش گاه تعليم کاتي في ميل جي ايس ڊي او آفيس جي سامهون ايريگيشن کاتي جي انجنيئر ايس ڊي او جي پراڻي رهائشي عمارتن ۽ راڌڻ روڊ دان روڊس کاتي جي آفيسرن جي آفيسن ۽ رهائشي عمارتن پلاٽن ۽ گهاڙي روڊ سان ڊرينيج جي مين نالن تي ببااثرن ڌرين جا قبضا برقرار آهن صرف ريڙهي گاڏنن وارن کي هٽائڻ سان گڏ دوڪانن جي اڳيان ٺھيل منهن ڊاهيا پيا وڃن، هنن گهر ڪئي آهي ته شهر ۾ ٿيل سمورا ٿيل قبضا نا جائز حددخليون بنا سياسي فرق جي هٽايا وڃن ءِ قبضا خورن خلاف ڪاروائي ڪئي وڃي مخصوص ماڻھن خلاف ڪاروائي ٿي ته شهر جا دوڪاندار واپاري احتجاج ڪندا.