پنگريو(ن پ ا) مدرسي جي مولوي پاران تنگ ڪرڻ تي پنگريي جو نينگر منهن ڪري ويو. ان سلسلي ۾ پنگريو لڳ مدرسي جامع حنفيه سلطان المدارس مان پراسرار طريقي سان گم ٿيل نينگر 13 ورهيه محبت ولد رمضان ملاح مدرسي ويو، جيڪو گھر نه موٽيو، نينگر جي وارثن ڪافي ڳولا ڪئي، گھڻي ڳولا بعد نينگر هٿ اچي ويو آهي ،نينگر محبت ملاح ٻڌايو ته قاري عبدالباسط مدرسي کان هٽي ڪري ذاتي ڪم وٺندو آهي ۽ جواب ڏيڻ تي تشدد پڻ ڪندو آهي جنهن ڪري مجبور ٿي خوف مان نڪتو هئس .

باڊهه (رپورٽ: وحيد ڳاهو) 50 هزارکان مٿي آبادي رکندڙ شهر باڊهه کي باءِ پاس نه ھجڻ ڪري هتان جا رهواسي ٽرئفڪ جي سنگين مسئلي کي منهن ڏئي رهيا آهن جڏهن ته باءِ پاس نه هئڻ ڪري شهر جي وچ بازار مان اڪثر ڳري ٽرئفڪ جنهن ۾ ٽرڪون ، بسون، ٽالر ، توتڙن ۽ پلال سان ڀريل ٽريڪٽر ٽرالي گذرڻ سبب شهر ۾ ڪلاڪن جا ڪلاڪ ٽرئفڪ جام رهي ٿي جنهنڪري اسڪولي شاگرد اسڪول وڃڻ وقت ۽ موڪل بعد سخت مشڪلاتن کي منهن ڏئي رهيا آهن جڏهن ته ٽرئفڪ جام ٿيڻ ڪري سرڪاري ملازم وقت سر پنهنجي ادارن ۾ ڊيوٽين تي پڻ نه ٿا پهچي سگھن شهر ۾ حددخلين جو آزار ڏينهون ڏينهن وڌي رهيو آهي، انهيءَ تي انتظاميا خاموش تماشائي بڻيل آهي، ٽرئفڪ جي وڌي وڃڻ ۽ رستن تي حددخلين جي آزار سبب حادثا روز جو معمول بڻيل آهن، شهر کان ٻاهر نڪرڻ ۾ ئي ڪلاڪن جا ڪلاڪ لڳيو وڃن،ان سلسلي ۾ باڊهه واسين سليم احمد منگي، صدام حسين شاهاڻي ، زاهد منگي۽ ٻين روزاني پنهنجي اخبار سان ڳالهائيندي چيو ته باءِ پاس نه هجھڻ ڪري شهر جي مين بازار مان ڳري ٽرئفڪ جي گزر سبب هڪ طرف ٽرئفڪ جام ٿئي ٿي جنهن ڪري اسان کي سخت پريشاني کي منهن ڏيڻو پوي ٿو ٻئي طرف اسان جو ڪاروبار پڻ متاثر ٿئي ٿو جڏهن ته ٽرئفڪ جي جام ٿيڻ جو وڏي ۾ وڏو ڪارڻ شهر ۾ پارڪنگ جي سهولت نه هجڻ آهي جنهنڪري رڪشا، موٽر سائيڪلون، گڏهه گاڏا ۽ ڪارون شهر جي مين روڊ تي بيهڻ ڪري اڪثر ٽرئفڪ جام رهي ٿي ،جڏهن ته چونڊيل نمائيندا ڪيترائي دفعا باڊهه شهر کي باءِ پاس ڏيڻ لاءِ اعلان ته ڪري ويا آهن پر ڪيتروئي عرصو گذرڻ باوجود باءِ پاس ناهي ٺهي سگھيو ان موقعي تي باڊهه واسين سنڌ سرڪار کان مطالبو ڪيو ته باڊهه شهر کي جلد باءِ پاس جي سهولت ميسر ڪري شهر واسين جي پريشاني ختم ڪئي وڃي ٻي صورت ۾ احتجاجي تحريڪ هلائي ويندي.

لاڙڪاڻو(بيورو رپورٽ) باقراڻي تعلقي جي ڳوٺ ميان اسحاق کونهارو جي رهواسي پيرسن علي محمد ابڙو 11 سال اڳ قتل ٿي ويل پٽ جي قاتلن جي گرفتاريءَ لاءِ پريس ڪلب اڳيان احتجاج ڪيو. ان موقعي تي هن الزام لڳايو ته سال 2007ع ۾ نوجوان پٽ علي اڪبر ابڙو کي بااثرن عبدالرزاق موجائي ۽ الهه ڏنو موجائي قتل ڪيو هو، واقعي جو ڪيس حد جي باقراڻي ٿاڻي تي داخل آهي جنهن ۾ پوليس عبدالرزاق موجائي کي روپوش قرار ڏئي کيس گرفتار نه پئي ڪري.

جيڪو ڪيس تان هٿ کڻڻ لاءِ موتمار ڌمڪيون ڏئي رهيو آهي ان خلاف حد جي پوليس کي شڪايت ڪئي پر ڪاروائي نه پئي ڪري جنهن ڪري مون سميت منهنجي گهر ڀاتين کي جان جو خطرو آهي. هن آءِ جي سنڌ، ڊي آءِ جي ۽ ايس ايس پي لاڙڪاڻو کي اپيل ڪئي ته نوجوان پٽ جي قاتلن کي گرفتار ڪري انصاف ڪيو وڃي.

لاڙڪاڻو(بيورو رپورٽ) گاجي کهاوڙ تعلقي جي ڳوٺ لڌو خان ساکاڻي جي رهواسي بچل ساکاڻي بااثرن جي مبينا زيادتين خلاف پريس ڪلب اڳيان احتجاج ڪيو. ان موقعي تي هن الزام لڳايو ته منهنجي ديهه جوڳي ۾ ساڍا چار ايڪڙ زرعي زمين آهي جنهن تي نهال ميراڻي، مهرو ميراڻي، ممتاز ميراڻي قبضي جي ڪوشش ڪري رهيا آهن جن خلاف حد جي ٿاڻي جي پوليس کي شڪايت ڪئي پر پوليس به سندن جي خلاف ڪاروائيءَ لاءِ تيار نه آهي. هن آءِ جي سنڌ، ڊي آءِ جي لاڙڪاڻو ۽ ايس ايس پي قمبر شهدادڪوٽ کي اپيل ڪئي ته زرعي زمين تي قبضي جي ڪوشش ڪندڙ بااثرن خلاف ڪاروائي ڪري انصاف ڪيو وڃي.

لاڙڪاڻو(بيورو رپورٽ) لاڙڪاڻي شهر جي مختلف علائقن جي رهواسين گندو پاڻي نيڪال نه ٿيڻ خلاف پريس ڪلب اڳيان احتجاجي مظاهرو ڪري ميئر خلاف سخت نعريبازي ڪئي. ان موقعي تي حيدري محلا، ڪوثر مل، حسيني محلا، عارباڻي محلا، بروهي محلا ۽ نشتر روڊ جي رهواسين اظهر ڀٽي، جبار جمالي، طارق ڪلهوڙو، امجد کهاوڙ، عمران شاهه ۽ ٻين دانهيو ته علائقي ۾ لڳل ڊسپوزل مشين گذريل 6 ڏينهن کان ناڪاره بڻيل آهي جنهن ڪري گندو پاڻي گهٽين ۽ روڊن تي تلاءُ جيان بيٺل آهي جنهن کي نيڪال ڪرائڻ لاءِ ميونسپل عملي طرفان ڪي به جوڳا قدم ناهن کنيا ويا ان لاءِ ڪيترائي ڀيرا ميئر ۽ يوسي چيئرمين کي شڪايتون ڪيون پر هو مسئلا حل ڪرڻ لاءِ سنجيده نه آهن. هنن مطالبو ڪيو ته گندو پاڻي نيڪال ڪرائي ناڪاره ڊسپوزل مشين ٻئي هنڌ منتقل ڪري فوري طور صفائي سٿرائي جو ڪم شروع ڪيو وڃي ٻي صورت ميئر جي آفيس جو گهيراءُ ڪري سخت احتجاج ڪيو ويندو.

لاڙڪاڻو(بيورو رپورٽ) لاڙڪاڻي شهر جي شهباز ڪالوني جي رهواسي پورهيت محمد عظيم ميمڻ بااثرن جي مبينا زيادتين خلاف گهر ڀاتين سان گڏجي پريس ڪلب اڳيان احتجاجي مظاهرو ڪيو. ان موقعي تي هن ميڊيا آڏو دانهيندي ٻڌايو ته مون منور علي ڪلهوڙو کان سروي نمبر 398 شهباز ڪالوني ۾ 6 لک روپين عيوض 1200 چورس فوٽ پلاٽ خريد ڪيو جنهن پلاٽ جا سمورا پئسا کيس ڏئي چڪو آهيان، ڪجهه ڏينهن اڳ مون ڄاڻايل پلاٽ تي جڳهه ٺهرائڻ لاءِ سِرون ۽ ٻيو مٽيريل لهرائي جڳهه جي ڪم جي شروعات ڪئي جنهن تي بااثر منور علي ڪلهوڙو مون کي روڪي جڳهه ٺهرائڻ کان منع ڪري موتمار ڌمڪيون ڏئي رهيو آهي هن اپيل ڪئي ته بااثر خلاف ڪارروائي ڪئي وڃي.

لاڙڪاڻو(رپورٽ نادرابڙو) لاڙڪاڻي ۾ آپڪا پاران مطالبن جي مڃتا لاءِ احتجاجي ريلي ڪڍي پريس ڪلب اڳيان احتجاجي مظاهرو ڪيو ويو. جنهن ۾ لاڙڪاڻي ۽ قمبر شهدادڪوٽ ضلعن سان واسطو رکندڙ تعليم، پاپوليشن، آبپاشي، لاڙڪاڻو ڊولپمينٽ اٿارٽي سميت ٻين کاتن جي ڪلارڪن وڏي انگ ۾ شرڪت ڪئي.

جن هٿن ۾ پلي ڪارڊ ۽ بئنر کڻي نعريبازي ڪندا رهيا. ان موقعي تي ڊويزنل صدر رفيق احمد جتوئي، قمبر شهدادڪوٽ جي صدر غلام مصطفيٰ بليدي، آپڪا پاپوليشن جي صدر محمد پيرل دايو، عبدالنبي دايو، اعجاز ميراڻي، مسڪين ڀٽو، محمد ڪامل سرگاڻي ۽ ٻين چيو ته هن وقت تائين گريڊ هڪ کان 16 جي سرڪاري ملازمن جي اولادن کي نوڪريون نه ملي سگهيون آهن ۽ نه ئي سرڪاري ملازمن جي رهيل ڪيڊرن کي اپ گريڊ ڪيو ويو آهي. هنن چيو ته ملازمن کي ٽائيم اسڪيل، يوٽيلٽي الائونس، پگهارن ۽ پينشن ۾ مهانگائي جي تناسب سان واڌ، ايف بي گروپ انشورنس، پروموشن سميت ٻيا جائز مطالبا منظور ناهن ڪيا ويا جڏهن ته ادارن ۾ ڪچن ۽ ڪانٽريڪٽ ملازمن کي پڪو ناهي ڪيو ويو ۽ نه ئي هن وقت تائين لاڙڪاڻه ڊولپمينٽ اٿارٽي جي ملازمن جون رهيل پگهارون جاري ڪري آن لائين ڪيون ويون آهن. ملازمن سنڌ جي وڏي وزير، سيڪريٽري سنڌ سميت ٻين وس وارن کي اپيل ڪئي ته ملازمن جا جائز مطالبا منظور ڪيا وڃن ٻي صورت سڄي سنڌ ۾ احتجاجي تحريڪ هلائي ويندي.

لاڙڪاڻو(بيورو رپورٽ) تعلقي قمبر جي ڳوٺ علي بخش پنهور جي رهواسين پوليس جي مبينا زيادتين خلاف پريس ڪلب اڳيان احتجاجي مظاهرو ڪيو. ان موقعي تي نعمان پنهور الزام لڳايو ته 15 ڊسمبر جي شام ماهي مڪول ٿاڻي جي پوليس ايس ايڇ او عبدالغفور چانڊيو جي اڳواڻيءَ ۾ گهر تي چڙهائي ڪري گهر ڀاتين کي تشدد جو نشانو بڻايو ۽ بعد ۾ پٽ مور پنهور کي گرفتار ڪيو ويو، پوليس ڀڃ ڊاهه ڪري بندوق، ٻه ڪڪڙ، 52 هزار روڪ رقم، ٻه تولا سونا زيور ۽ ٻيو سامان کڻي وئي.

بعد ۾ پوليس پٽ جي آزاديءَ لاءِ 50 هزار روپيه رشوت طلب ڪئي.

نه ڏيڻ جي صورت ۾ هن منهنجي ٻن پٽن راحب علي مور علي پنهور مٿان الڳ الڳ ايف آءِ آرون داخل ڪيون آهن. هنن آءِ جي سنڌ کي اپيل ڪئي ته داخل ڪيس ختم ڪري پوليس چڙهائي دوران کڻي ويل سامان واپس ڪرائي ايس ايڇ او ماهي مڪول عبدالغفور چانڊيو، اي ايس آءِ منور لاهوري ۽ پوليس اهلڪار پيرل چانڊيو خلاف ڪاروائي ڪئي وڃي ٻي صورت احتجاج جو دائرو وڌايو ويندو.

لاڙڪاڻو(بيورو رپورٽ) پاڪستان ايئر فورس جي ميڊيڪل برانچ جي ڪمبيٽ سپورس ڪورس ۾ رجسٽريشن شروع ٿي وئي آهي جاري ڪيل پڌرائي موجب ميڊيڪل برانچ ۾ رجسٽريشن جي آخري تاريخ 31 ڊسمبر مقرر ڪئي وئي آهي، جي ڊي ايم اوز برانچ ۾ اينيٿيٽس، آرٿو پيڊڪ سرجن، ريڊيولاجسٽ، ميڊيڪل اسپيشلسٽ طورشموليت جا خواهشمند ايم بي بي ايس ڊگري ۽ هڪ سال هائوس جاب، ايف سي پي ايس/ ايف آر سي اي/ ايف آرسي ايس/ ايم آر سي پي/ آمريڪن بورڊ مان ڊپلوما ڪندڙ اهل هوندا. سندن عمر 24 کان 28 سال هجڻ گهرجي. جڏهن ته نيورو سرجن لاءِ ايف سي پي ايس/ ايف آر سي ايس/ ايم آرسي ايس جي ڊگري رکندڙ ڊاڪٽر جن جي عمر 29 کان 48 سال هجي اهل هوندا. گائنالاجسٽ لاءِ ايف سي پي ايس/ ايم آر سي او جي/ ايف آر سي اوجي/ ڊپلوما آمريڪن بورڊ جي ڊگري رکندڙصرف عورتون درخواستون ڏئي سگهن ٿيون. ان کانسواءِ سرجيڪل اسپيشلسٽ لاءِ ايف سي پي ايس/ ايف آر سي ايس/ ڊپلوما آمريڪن بورڊ، پيٿالاجسٽ لاءِ ايف سي پي ايس/ايم آر سي(پي اي ٽي ايڇ) ڊپلوما آمريڪن بورڊ، آءِ اسپيشلسٽ لاءِ ايف سي پي ايس/ ايف آر سي ايس، اي اين ٽي لاءِ ايف سي پي ايس/ ايم آر سي ايس (اي اين ٽي) ايف آر سي ايس (اي اين ٽي) جي ڊگري هجڻ لازمي آهي.

لاڙڪاڻو(بيورو رپورٽ) لاڙڪاڻي جي ڊپٽي ڪمشنر محمد نعمان صديق چيو آهي ته قومي جذبي تحت ڪم ڪرڻ سان پوليو مرض جي خاتمي کي يقيني بنائي سگھجي ٿو، جنهن لاءِ والدين جو تعاون ضروري آهي. اهڙن خيالن جو اظهار ڪالهه هن درٻار هال ۾ پوليو جي خاتمي واري ضلعي ڪاميٽي جي گڏجاڻي جي صدارت ڪندي ڪيو، گڏجاڻي ۾ گذريل پوليو رائونڊ تي ويچاريو ويو جڏهن ته ايندڙ پوليو رائونڊ متعلق پڻ حڪمت عملي جوڙي وئي. هن چيو ته ضلعي اندر هڪ ڏينهن کان پنجن سالن تائين عمر جي سمورن ٻارن کي پوليو کان بچاءَ جا ڦڙا پياري 21 جنوري کان 24 ڊسمبر 2019 تائين شروع ٿيندڙ مهم کي ڪامياب بنايو وڃي ته جيئن ڪو به ٻار ڦڙا پيارڻ کان رهجي نه وڃي.

ڏوڪري رپورٽر: (راجا ٻگھيو) ڏوڪري ڀرسان ڳوٺ سانگھرو ۾ هڪ ڏينهن اڳ زمين جي تڪرار تان جهيڙي دوران زخمي ٿيل ڪامل، ڏاڏو، رازق ڏنو سانگھرو ۽ ٻين ڳوٺاڻن مومن سانگھرو وسيم، آزاد، حسين بخش، مظفر، ۽ عمران سانگھرو ٻارڙن سميت احتجاجي مظاهرو ڪندي چيو ته رب ڏنو سانگھرو هڪ بااثر ماڻهو آهي جيڪو ڪلھ ٻين ذاتين جا ماڻهو ساڻ ڪري هٿيارن جي زور تي اسان جي ماڻهن تي حملو ڪري ٻن ڄڻن کي زخمي ڪري ڇڏيو آهي، ھنن جو وڌيڪ چوڻ هو ته هي اسان جي موروثي زمين آهي ۽ ھن زمين جو رڪارڊ اسان وٽ موجود آهي ۽ اسان روينيو رڪارڊ چيڪ ڪرائڻ لاءِ اسسٽنٽ ڪمشنر ڏوڪري کي درخواست ڏني هئي جنهن جي اسسٽنٽ ڪمشنر ڏوڪري رپورٽ ٺاهي ڊپٽي ڪمشنر لاڙڪاڻي ڏانهن اماڻي ڇڏي آهي جنهن مٿين مهيني جي چار تاريخ تي ٻنهي ڌرين کي گهرايو آهي پر ڪلھ بااثر ماڻهو رب ڏنو سانگھرو پرائيوٽ ماڻهو ساڻ ڪري هٿيارن جي زور تي اسان جي ماڻهن تي حملو ڪري ٻن ڄڻن کي زخمي ڪري ڇڏيو آهي ۽ اسان جي موروثي زمين تي قبضو ڪرڻ جي ڪوشش ڪري رهيو آهي، ھنن وڌيڪ چيو ته رب ڏنو سانگھرو هڪ بااثر ماڻهو هجڻ سان گڏوگڏ لاڙڪاڻي جي وڪيلن جي منشيگيري ڪندو آهي جنهن جي آڙ ۾ اسان جي ڳوٺ سميت تعلقي ڏوڪري جي مختلف ڳوٺن ۾ ڪيترن ئي ماڻهن جي ملڪيتن تي سول ڪورٽ ۾ ڪوڙا ڪيس داخل ڪرائي بليڪ ميل ڪندو رهندو آهي ۽ پرائيويٽ ماڻهو ساڻ ڪري هٿيارن جي زور تي قبضا ڪرڻ جي ڪوشش ڪندو آهي، اسان سان انصاف ڪيو وڃي. ٻئي پاسي ڏوڪري ٿاڻي جي ايس ايڇ او عبدالستار مگسي “پنهنجي اخبار” کي ٻڌائيندي چيو ته جهيڙي دوران ٻنهي ڌرين جا ماڻهو زخمي آهن جنهن جي ڪري ٻنهي ڌرين تي ڪيس داخل ڪيو ويو آهي ۽ گرفتاري لاءِ ڇاپا هنيا پيا وڃن.