عمرڪوٽ ( رپورٽ الله بخش آريسر ) مرحوم ڊاڪٽر علي محمد ورياماڻي ميموريل آل پاڪستان والي بال ٽورنامينٽ جو افتتاح ڪيو ويو. ٽورنامينٽ اڄ کان شروع ٿيندي.
29هين ٽورنامينٽ جي افتتاحي تقريب کي خطاب ڪندي ڊپٽي ڪمشنر عمرڪوٽ چيو ته عمرڪوٽ ۾ شخصيتن جي نالن تي آل پاڪستان والي بال شوٽنگ ٽورنامينٽ ڪرائيندڙن کي شاباس هجي،جن سدائين ضلعي ۾راندين جي حوالي سان اهم ڪردار ادا ڪيو آهي.
ٽورنامينٽ جو افتتاح ڊي سي ڪيو، ٽورنامينت ۾15 کان وڌيڪ ٽيمون حصو وٺنديون.جن ۾ آل عثمان لاهور، شوٽنگ والي بال ڪلب، 2. پنجاب پوليس اوڪاڙو والي بال ڪلب، ساهيوال والي بال ڪلب، گنج شڪر والي بال ڪلب عارف والا، جهنگ والي بال ڪرڪيٽ ڪلب، چڪوال والي بال ڪلب، مزمل ڪلب پنو عاقل، ذوالفقار ڪلب پنو عاقل ۽ ٻيون ٽيمون شامل آهن.
ٽورنامينٽ آرگنائيزر عمرڪوٽ اڪبر اعظم، شوٽنگ والي بال ڪلب طرفان هر سال ڪرايو ويندو آهي.
عمرڪوٽ ۾ آل پاڪستان والي بال ٽورنامينٽ اڄ کان شروع
پاڪستان ۾ 2 هم جنس پرست عورتن جو ڪيس پهريون ڀيرو سامهون
لاهور جي مناوان واسڻ صوبيا پنهنجي سهيلي شيزا کي زال طور پاڻ سان ترسايو
ناري کي وارث واپس وٺي ويا، مناوان ٿاڻي تي والدين خلاف اغوا ڪيس داخل ڪيو ويو
لاهور (م ڊ) لاهور ۾ ٻن هم جنس پرست عورتن جو پهريون ڪيس سامهون اچي ويو. سيشن ڪورٽ لاهور ۾ مناوان جي صوبيا پنهنجي سهيلي شيزا کي زال بڻائي پاڻ سان گڏ رکيو. والدين جي ناري کي واپس آڻڻ تي صوبيا ٻيهر شيزا کي وٺي پاڻ سان گڏ رهايو. مناوان ٿاڻي ۾ سندس والدين خلاف اغوا جو ڪيس داخل پڻ ڪرايو ويو. صوبيا ۽ شيزا مناوان جون رهواسڻ آهن، شيزا جي ماءُ عاصمه موجب شيزا هڪ مدرسي ۾ ويندي هئي جتي صوبيا شيزا سان دوستي ڪري ورتي، سندن ايڏي وڌي وئي جو ٻئي هڪ ٻئي کانسواءِ نه رهنديون هيون، شيزا جي گهر کاڻ وڃڻ تي خبر پئي ته صوبيا کيس زال بڻائي رکيو آهي. هن چيو ته هوءَ شيزا کي واپس وٺي آئي ته کيس جواب ڏنو ويو ته اها سندس گهرواري آهي، کيس نه ٿي ڇڏي سگهي، هن منهنجي ۽ خاندان خلاف مناوان ٿاڻي تي ڪيس داخل ڪرايو آهي. هوڏانهن خانگي ٽي وي چينل موجب صوبيا جيماءُ عاصمه ۽ ٻين ڀاتين ٻنهي جون تصويرون کڻي سيشن ڪورٽ ۾ پيش ٿيا، عدالت ۾ بابر علي ايڊووڪيٽ ضمانت لاءِ درخواست داخل ڪئي، سندس چوڻ آهي ته عورت عورت سان شادي نه ٿي ڪري سگهي، اسلامي قانون اجازت نه ٿو ڏئي، پوليس والدين خلاف اغوا جو ڪيس داخل ڪيو. ايڊيشنل سيشن جج انوکي ڪيس ۾ والدين ۽ سڄي خاندان جون وقتي ضمانتون 7 جنوري تائين منظور ڪندي مناوان پوليس کان رپورٽ طلب ڪئي.
گئس بحران:ڪراچي جي صنعتڪارن پاران سومر کان صنعتون بند ڪرڻ جو اعلان
سومر تي هڪ به صنعت نه کلندي،اڱاري تي گورنر هائوس آڏو احتجاج ڪبو: صنعتڪار
ڪراچي)رپورٽر)ڪراچي جي صنعتڪارن گئس بحران خلاف سومر تي صنعتون بند ڪرڻ جو اعلان ڪري ڇڏيو آهي،نجي ٽي وي سان ڳالهائيندي ڪراچي سائيٽ ايريا صنعتڪار ايسوسيئيشن جي صدر جو چوڻ هو ته گئس بحران سبب صنعتڪارن کي روزانو ٻن کان پنجن ارب روپين جو نقصان ٿي رهيو آهي،هن چيو ته سومر کان ڪراچيءَ ۾ سموريون صنعتون بند ڪيون وينديون،سومر تي هڪ به صنعت نه کلندي،هن چيو ته اڱاري تي گورنر هائوس ڪراچي آڏو احتجاج ڪيو ويندو،هن جو وڌيڪ چوڻ هو ته گئس جي بحران ڪري صنعتڪارن کي سخت نقصان ٿي رهيو آهي.
راجا خان مھر آصف زرداري کي 4 ڀلوڙ اٺ سوکڙي طور ڏنا
خانپور مھر: گھوٽڪي ضلعي جي ياترا تي آيل اڳوڻي صدر آصف زرداري کي پ پ ايم پي اي علي نواز عرف راجا خان مھر 4 ڀلوڙ اٺ تحفي ۾ ڏنا. واضح رھي تھ مھر سردار وٽن ايندڙ مھمانن کي ڀلوڙ نسل جا اٺ، گھوڙا ۽ ڳئون تحفي طور ڏيندا رھندا آھن.
پي سي بي ھيڊڪوچ مڪي آرٿر جي دفاع ۾ ميدان ۾ اچي وئي
لاهور (اسپورٽس ڊيسڪ) قومي ٽيم جو مينيجر طلعت علي سينيئر رانديگرن کي گٿا لفظ ڳالهائيندڙ هيڊ ڪوچ مڪي آرٿر جي دفاع لاءِ ميدان تي اچي ويو.
پي سي بي پاران جاري ڪيل پڌرائي ۾ وضاحت ڪئي وئي آهي ته سنچورين ٽيسٽ جي ٻئين ڏينهن راند ختم ٿيڻ تي مڪي آرٿر جي مينجمينٽ ۽ رانديگرن سان ملاقات ٿي هئي، پر ان ۾ ڪا ڳالهه معمول کان هٽيل نه هئي.
قومي ٽيم جي مينيجر طلعت علي جو چوڻ آهي ته پاڪستان ٽيم جي مينجمينٽ ۽ رانديگر متحد ۽ هاڪاري نتيجا ڏيڻ لاءِ پرعزم آهن.
ياد رهي ته سنچورين ٽيسٽ جو ٻيو ڏينهن ختم ٿيڻ تي ميڊيا ۾ اهي اطلاع هئا ته هيڊ ڪوچ مڪي آرٿر غيرذميواراڻي بيٽنگ تي سينيئر رانديگرن سان ڏند چڪ ڏنا هئا، ۽ ڊريسنگ روم ۾ پڻ ٽوڙ ڦوڙ به ڪئي.
سنڌ حڪومت ۾ تبديلي جي ڳالهه ڪندڙ احمقن جي جنت ۾ رهن ٿا:پيپلز پارٽي
حليم عادل شيخ ۽ خرم شير زمان لينڊ مافيا جا سرپرست آهن:مرتضيٰ بلوچ
ملير (ن پ ا) پي ٽي آءِ پاران سنڌ ۾ حڪومت جي تبديلي متعلق ڳالهيون اهي ڪري رهيا آهن جيڪي احمقن جي جنت ۾ رهن ٿا ۽ اهي ماڻهو ميڊيا ۾ پنهنجو نالو ڏيڻ لاءِ آصف زرداري ۽ بلاول ڀٽو تي تنقيد ڪري پنهنجي ننڍي قد کي وڌائڻ جي ناڪام ڪوشش ۾ مصروف آهن، پيپلز پارٽي ملير جي قومي ۽ صوبائي اسمبلي جي ميمبرن غلام مرتضيٰ بلوچ، سردار ڄام عبدالڪريم، سيد آغا رفيع الله، راجا رزاق بلوچ، محمد ساجد جوکيو، محمد سليم بلوچ، محمود عالم ڄاموٽ پنهنجي جاري ڪيل بيان ۾ وڌيڪ چيو آهي ته پيپلز پارٽي کي سنڌ جي عوام ڀرپور مينڊيٽ ڏنو آهي پيپلز پارٽي پي ٽي آءِ وانگر ڪنهن چور دروازي سان ڪنهن ٻئي جو مينڊيٽ کسي سنڌ جي اقتدار ۾ نه آئي آهي، پي ٽي آءِ اڳواڻ حليم عادل شيخ ۽ خرم شير زمان لينڊ مافيا جا سرپرست آهن ۽ هو پنهنجي مقصدن حاصل ڪرڻ لاءِ پارٽيون تبديل ڪندا آهن، حليم عادل شيخ ملير جي لينڊ مافيا ڪاليج جو پرنسپل آهي جنهن جو مقصد صرف غريب عوام جي زمينن تي قبضو ڪرڻ آهي، پي ٽي آءِ جا ٻئي اڳواڻ حليم عادل شيخ ۽ خرم شيرزمان آصف زرداري ۽ بلاول ڀٽو تي تنقيد ڪري پنهنجو پاڻ کي ميڊيا ۾ زنده رکڻ جي ناڪام ڪوشش ڪري رهيا آهن، اسان پي ٽي آءِ وارن کي ٻڌائڻ چاهيون ٿا ته پيپلز پارٽي ٽن طاقتور آمرن جو مقابلو ڪيو آهي ۽ هاڻي به عمراني مارشلا جو مقابلو ڪرڻ اسان لاءِ معمولي ڳالهه آهي، پي ٽي آءِ صرف ۽ صرف لوٽن جي جماعت آهي ان ۾ سڀ کان وڏو لوٽو حليم عادل شيخ پاڻ آهي، ان لاءِ جيڪڏهن آصف زرداري، بلاول ڀٽو ۽ ڀٽو خاندان جي متعلق پي ٽي آءِ جي ڊرامي بازي بند نه ٿي ته اسانکي دفاع ڪرڻ ايندو آهي ۽ سنڌ جو عوام آصف زرداري ۽ بلاول ڀٽو تي جان قربان ڪرڻ لاءِ به تيار آهي، ڳڙهي خدا بخش جي جلسي پي ٽي آءِ جون ننڍو حرام ڪري ڇڏيون آهن ڇو ته ان جلسي ۾ لکن جي تعداد ۾ ماڻهن ڀٽو خاندان سان محبت ۽ عقيدت ڪرڻ لاءِ آيا هئا، پي ٽي آءِ سنڌ حڪومت جي تبديلي جو خواب ڏسڻ ڇڏي ڏئي ۽ پنهنجي وفاقي حڪومت بچائڻ جي فڪر ڪري ڇو ته جنهن ڏينهن آصف زرداري مفاهمت جو جادو ڏيکارڻ شروع ڪيو ته عمران خان وزيراعظم هائوس مان سڌو واپس بني گالا ويندو، پيپلز پارٽي اهڙي جي آئي ٽي کي رد ڪري ٿي جيڪا صرف مفروضن تي ٻڌل هجي.
پيپلز پارٽي 8 ضلعن تائين محدود ٿي وئي آهي:صفدر عباسي
عوام وڏيرن بدران انھن کي ووٽ ڏئي جيڪو سندن مسئلا حل ڪري:ناهيد خان
لاڙڪاڻو(رپورٽر) پاڪستان پيپلز پارٽي ورڪرس ۽ گرينڊ ڊيموڪريٽڪ الائنس پاران محترمه بينظير ڀٽو جي يارهين ورسي جي موقعي تي کيس خراج عقيدت پيش ڪرڻ لاءِ مقامي هال ۾ عوامي ميڙاڪو ڪوٺايو ويو. ميڙاڪي کي خطاب ڪندي ڊاڪٽر صفدر عباسي چيو ته شهيد محترمه بينظير ڀٽو جي وڇوڙي کي يارنهن سال گذري چڪا آهن پر ائين پيو لڳي ته هو اڄ به اسان سان گڏ آهي. هن چيو ته اڄ پيپلز پارٽي جي سياست 8 ضلعن تائين محدود ٿي وئي آهي جيڪا انهن جي تباهيءَ جي نشاني آهي،جي ڊي اي اڳواڻ ۽ ايم پي اي معظم علي عباسي چيو ته اڄ سياست فائدي لاءِ ٿي رهي آهي ۽ هر طرف اين آر او جي گونج ٻڌي رهيا آهيون جڏهن ته ان جي ڀيٽ ۾ عوام مايوسي جو شڪار آهي. هن چيو ته شهيد محترمه پنهنجي مشن تي ڪم ڪندي شهيد ٿي وئي پر پيپلز پارٽي وارا شهيدن جي مشن کي ڇڏي صرف ڪرپشن جي پويان لڳا پيا آهن،ناهيد خان عباسي چيو ته جيڪو عوام کي بنيادي سهولتون فراهم ڪري عوام ان کي ووٽ ڏئي پنهنجي سوچ کي تبديل ڪري، عوام پاڻ بچائڻ لاءِ وڏيرن ۽ ڀوتارن وٽ يرغمال ٿيڻ بجاءِ پنهنجي مستقبل جي لاءِ سوچن ته هو جن وڏيرن کي ووٽ ڏئي اسيمبلين ۾ آڻن ٿا بعد ۾ اهي ئي عوام جي ووٽ کي اسيمبلين اندر پنهنجي مفاد لاءِ استعمال ڪندا آهن. عوامي ميڙاڪ کي عمران شاهه، همٿ علي ڪلهوڙو ۽ ٻين پڻ خطاب ڪيو.
خانپور ڀرسان روڊ حادثا،نينگر ۽ عورت سميت 6 ڄڻا زخمي
خانپور( رپورٽر) خانپور لڳ انڊس ھائي وي تي ٽن مختلف روڊ حادثن سبب ھڪ نينگر ۽ عورت سميت 6 ڄڻا زخمي ٿي پيا،خانپور لڳ انڊس ھائي وي تي گوھر شاخ اسٽاپ لڳ ٻن موٽرسائيڪلن م آمھون سامھو ٽڪر ٿي پيو، جنھن سبب 2 ڄڻا رحمت الله پھوڙ ء محمد سليمان منگي زخمي ٿي پيا ،جن کي خانپور اسپتال آندو جتان رحمت الله پھوڙ کي شديد زخمي ھجڻ سبب کيس سول اسپتال شڪارپور ريفر ڪيو ويو، ھوڏانھن فيضو اسٽاپ ويجھو ڪار جو سائيڪل سوار شاہ محمد منگي کي ٽڪر لڳڻ سبب زخمي ٿي پيو، جنھن کي پڻ خانپور اسپتال آڻي طبي امداد ڏني وئي جڏھن خانپور انڊس ھاءِ وي تي ون فائيو وٽ موٽر سائيڪل سان نينگر اڪبر ٻرڙو ٽڪرجڻ سبب نينگر۽ موٽر سائيڪل سوار عمير ڀيو ۽ ھڪ عورت (پ) زخمي ٿي پئي جن کي پڻ خانپور اسپتال آندو ويو.
ڪنڌڪوٽ جي عدالت ۾ سي آءِ اي انچارج خلاف ٻه پٽيشنون داخل
ڪنڌڪوٽ (رپورٽر)ڊسٽرڪٽ سيشن جج جي عدالت ۾ سي آئي اي انچارج شعبان ملھڻ خلاف فريادي علي گل نصيراڻي ۽ پنھل لولائي ڊسٽرڪٽ سيشن جج جي عدالت ۾ٻه پٽيشنون داخل ڪرايون آھن ، فريادين پٽيشن ۾ ڄاڻايو آھي ته 5 ڏينھن اڳ دڙي اسٽاف وٽ سي آئي اي انچارج پاران چئن ڳوٺاڻن غلام فريد، اظھرالدين نصيراڻي، احمد لولائي ۽ عبدالجبار لولائي کي بيگناهه گرفتار ڪري غوثپور ٿاڻي تي لاڪپ ڪري ڇڏيو، وارثن کان آزادي جي لاءِ 5 لک روپيا طلب ڪيا جو نه ڏيڻ جي صورت ۾ انھن مٿان ڪوڙا ڪيس داخل ڪرايا،ان حوالي سان ڊسٽرڪٽ سيشن جج جي عدالت سي آئي اي انچارج ۽ ايس ايڇ او غوثپور کي رڪارڊ سميت سومر ڏينھن طلب ڪري ورتو،ٻئي طرف رابطو ڪرڻ تي سي آئي اي انچارج شعبان ملھڻ پنھنجي اخبار سان ڳالھائيندي چيو ته نه مونکي ڪا پٽيشن جي خبر آھي ۽ نه ئي مونکي ڪوئي عدالت طرفان پٽيشن جو نوٽيس مليو آھي.
مانجهند ڀرسان ڪار ڊرائيور جي ڪنٽرول مان نڪري وئي،هڪ فوت،3 زخمي
ڄامشورو (رپورٽر) انڊس هاءِ وي مانجهند شهر ۾ ڪار ڊرائيور جي ڪنٽرول مان نڪري کاهي ۾ ڪري پئي، حادثي جي نتيجي ۾ قاسم آباد واسي سلمان مهر فوت ٿي پيو، جڏهن ته ٽي ڄڻا فهيم عمراڻي، شهزاد ۽ سيد طالب شاهه شديد زخمي ٿي پيا،فوتي ۽ زخمين کي تعلقه مانجهند منتقل ڪيو ويو.
جيڪب آباد ڀرسان ٻه موٽرسائيڪلون ٽڪرائجي ويون،پيءُ فوت،ٻه پٽ زخمي
جيڪب آباد)رپورٽر)جيڪب آباد ڀرسان شمبي شاھ لڳ ٻه موٽرسائيڪلون ٽڪرائجي ويون،هڪ ڄڻو فوت ۽ ٻه ڄڻا زخمي ٿي پيا،صدر ٿاڻي جي حد شنبي شاھ لڳ ٻن موٽرسائيڪلن ۾ آمھون سامھون ٽڪر ٿي پيو ٽڪر جي نتيجي ۾ 50 ورهين جو عبداللطيف جکراڻي موقعي تي فوت ٿي ويو، جڏهن ته سيف الدين ۽ قمرالدين جکراڻي شديد زخمي ٿي پيا،علائقي واسين لاش ۽ زخمين کي سول اسپتال پهچايو،جتي زخمين جو علاج ڪيو پيو وڃي اطلاع ملڻ تي فوتي ۽ زخمين جا وارث اسپتال پھتا لاش کڻائي ڪري پنهنجي ڳوٺ روانا ٿي ويا ،صدر پوليس جي اھلڪار رابطي ڪرڻ تي ٻڌايو ته حادثو اسان جي حد ۾ ناھي ٿيو ،بلوچستان جو حد آهي اھا پوليس وڌيڪ ڪاروائي ڪندي ٻي پاسي فوتي ۽ زخمي پاڻ ۾ پيءُ پٽ آھن جن جو تعلق بلوچستان جي ٻڌائي پئي وڃي.
اسلام ڪوٽ ۾ پنجين ڏينهن به حددخلين خلاف آپريشن،متاثرين جو احتجاج
اسلام ڪوٽ(ن پ ا )اسلام ڪوٽ ۾ حد دخلين خلاف شروع ڪيل آپريشن ڪالھ پنجين ڏينهن به جاري رهيو،اسسٽنٽ ڪمشنر شنڪر لال ۽ مختيارڪار عبدالغفار لاکير جي اڳواڻي ۾ روينيو ۽ ميونسپل عملي پاران ڪالھ به اسلام ڪوٽ شهر جي مين مارڪيٽن سميت لنڪ روڊن تي وڏي مشينري ذريعي آپريشن ڪري ڪيترن ئي غريبن جي اجهن توڙي دڪانن جي ٿلهن کي ڊاهي پٽ ڪيو ويو،انهي سلسلي ۾ متاثرن الزام هڻندي چيو آهي ته روينيو انتظاميه حد دخلين جي آڙ ۾ سالن کان اڏيل اسان جي اجهن کي ڊاهي پٽ ڪري ڇڏيو آهي،اسان سخت سيءُ ۾ دربدر ٿي رهيا آهيون،هوڏانهن اسسٽنٽ ڪمشنر شنڪر لال ۽ مختيارڪار عبدالغفار لاکير جو چوڻ آهي ته اسان ڪنهن سان به ناجائزي نه ڪئي آهي،دڪاندارن دڪانن جي اڳيان ٿلها ۽ ڇاپرا ٺاهي روڊ سوڙها ڪري ڇڏيا هئا،جن کي هٽرائي روڊ ويڪرو ڪيو پيو وڃي،شهر جي گئوچر جي زمين تي ماڻهو قبضا ڪري سرڪاري زمين کي وڪرو ڪري رهيا هئا،جن کان گئوچر جي زمين خالي ڪرائي پئي وڃي.
انساني حقن لاءِ جاکوڙيندڙ عورتن جي مسئلن لاءِ ريپڊ ريسپانس نيٽ ورڪ قائم
ڪلثوم ڀٽي فوڪل پرسن مقرير،نيٽ ورڪ ۾ صحافي، وڪيل ۽ پوليس عملدار شامل
معاشري مان تشدد جي خاتمي لاءِ سڀني کي اڳتي اچڻو پوندو: امداد انڙ
حيدرآباد)رپورٽ؛ فقير سليم) حيدرآباد ۾ انساني حقن لاءِ جاکوڙيندڙ عورتن توڙي مردن کي درپيش مسئلن ۾ مدد لاءِ وڪيلن، صحافين ۽ سول سوسائٽي جي نمائندن تي مشتمل ريپڊ ريسپانس نيٽورڪ قائم ڪيو ويو آهي، سماجي تنظيم ڊي سي ايچ ڊي پاران هڪ مقامي هوٽل ۾ ڪوٺايل گڏجاڻي ۾ مختلف ڌرين شرڪت ڪئي، گڏجاڻي ۾ ڳالهائيندي نغمه شيخ چيو ته انساني حقن جي خلاف ورزي جي خلاف هونئن ته سڀئي جاکوڙ ڪريون پيا، پر انهن جاکوڙيندڙ ماڻهن کي درپيش مسئلن ۽ انهن جي قانوني توڙي اخلاقي مدد جي ضرورت آهي، انهي نيٽ ورڪ جي قيام لاءِ اسين چاهيون ٿا ته حيدرآباد جا مختلف با شعور ماڻهو گڏ ٿين
ڊيموڪريٽڪ ڪميشن فار هيومن ڊيولپمينٽ جي ڪوآرڊينيٽر ڪلثوم ڀٽي چيو ته اسان وٽ سڀ کان ڏکيو ڪم ڪنهن متاثر جي مدد ڪرڻ آهي، هتي ناانصافين جا ڪيترائي ڪيس سامهون اچن ٿا، انهن جي خلاف مرد آواز اٿارين ته انهن کي ڪيترائي مسئلا درپيش آهن، پر عورتون انهن کان وڌيڪ پريشاني کي منهن ڏين ٿيون، عورتن کي ته هڪ ٻاهر جا خطرا ته ٻيو وري سندن گهر جا به ڪيترائي مسئلا درپيش آهن، ته هن وقت اهڙي نيٽورڪ جي ضرورت آهي جيڪو انهن ماڻهن جي مدد ڪري،.
ڊسٽرڪٽ بار حيدرآباد جي صدر امداد انڙ چيو ته ڪنهن به سماجي خدمت دوران متاثر ٿيندڙ هيومن رائٽس ۽ وومين رائٽس ڊفينڊر کي مفت ۾ قانوني مدد فراهم ڪرڻ لاءِ ڊسٽرڪٽ بار تيار آهي، اسان وٽ جيڪو به صدر هوندو اهو انهي نيٽورڪ جو رضاڪاراڻا ميمبر هوندو، هن چيو ته هن نيٽورڪ ۾ ميڊيا، پوليس ۽ عورتن جي حقن لاءِ جاکوڙيندڙ گڏجي جدوجهد ڪندا ته معاشري مان تشدد جو خاتمو اچي سگهي ٿو،
وومين ڊيولپمينٽ جي ڪمپلينٽ سيل جي انچارج قرت العين شاه چيو ته اسان وٽ جيڪي ادارا اڳي سرڪاري طور عورتن جي مدد لاءِ ميدان ۾ آهن، انهي جو اسٽاف به غير محفوظ آهي، کين عدالتن جا چڪر ڪاٽڻا ٿا پون، ضلعي ڪائونسل جي ميمبر زيب النساءِ ملاح چيو ته اسان وٽ اسان جي ڳوٺ ۾ عورتن تي تشدد کي روڪڻ لاءِ لڙاڪو نيٽورڪ موجود آهي، جنهن ۾ شامل مرد ۽ عورتون پنهنجي ڳوٺ ۾ عورتن تي تشدد خلاف آواز اٿاريندا آهن ۽ انهن جي مدد ڪندا آهن، ته جيڪڏهن ماڻهو ڪنهن به مسئلي جي حل لاءِ عملي طور ميدان ۾ ايندو ته ڪاميابي پري ناهي،
ايڇ آر سي پي جي انچارج غفرانا آرائين چيو ته عورتن تي تشدد ته وڏو مسئلو آهي پر جيڪي ماڻهو کنڀجي وڃن ٿا،انهي جي مالڪي جي به ضرورت آهي، انهي نيٽورڪ سان انهن ماڻهن جي مدد ٿي سگهي ٿي جيڪي جبري گمشدگين خلاف آواز اٿارين ٿا، رافيعه بنگش چيو ته اسان وٽ عورتن جي لاءِ شيلٽر هوم آهي، اتي ايندڙ عورتن جا وارث عدالتن ۾ وڃي اسان جي خلاف ڪيس داخل ڪرائين ٿا. گڏجاڻي ۾فرزانه پنهور، پرڀو ستياني، دارلامان جي شبنم عزيز، ايڊووڪيٽ صبا عروج، فضل چانڊيو، سيد صدر حسين، سوشل ويلفئير کاتي جو منير احمد ڀٽي، ظفر احمد برني، منصور ڏاهري، وومين پروٽيڪشن سيل ماروي اعواڻ، ابرار اعواڻ، شاهده پنهور، رقيه بنگش، منير آصف. سنيئر صحافي جئه پرڪاش موراڻي ۽ ٻيا به موجود هئا
شهبازشريف نواز دور جي آڊٽ اعتراضن کان ڌار، معاملو ذيلي ڪاميٽين حوالي
اسلام آباد (بيورو رپورٽ) پبلڪ اڪائونٽس ڪميٽي جي پهرين اجلاس ۾ مسلم ليگ (ن) جي دور حڪومت جي آڊٽ اعتراضن کان پبلڪ اڪائونٽس ڪميٽي جي چيئرمين شهباز شريف الڳ ٿيڻ جو اعلان ڪندي مسلم ليگ (ن) جي حڪومت جي آڊٽ اعتراضن کي ڏسڻ لاءِ 3 سب ڪميٽيون ٺاهڻ جو فيصلو ڪيو آهي. پبلڪ ڪائونٽس ڪميٽي جو پهريون اجلاس ڪميٽي جي چيئرمين شهباز شريف جي صدارت هيٺ ٿيو. اجلاس ۾ سيد نويد قمر، شيري رحمان، حنا رباني کر، رانا تنوير، فخر امام، شيخ روحيل اصغر ۽ ٻين شرڪت ڪئي. اجلاس پبلڪ اڪائونٽس ڪميٽي سيڪريٽريٽ پاران ڪميٽي کي پبلڪ اڪائونٽس ڪميٽي جي دائري ۽ ڪم بابت تفصيلي بريفنگ ڏني وئي. پبلڪ اڪائونٽ ڪميٽي کي ٻڌايو ويو ته چوڌري نثار علي خان جي دوري ۾ 9 آڊٽ رپورٽون قومي اسيمبلي ۾ پيش ڪيو ويون. چوڌري نثار علي خان جي دور ۾ پبلڪ اڪائونٽس ڪميٽي جا 404 اجلاس ٿيا، ان جي دور ۾ 117 ارب 89 ڪروڙ 40 لک روپين جون وصوليون ڪيون ويون جڏهن ته نديم افضل چن جي سربراهي دوران پبلڪ اڪائونٽس ڪميٽي جا 174 اجلاس ٿيا ۽ 30 ارب 90 ڪروڙ 30 لک روپين جون وصوليون ڪيون ويون. نديم افضل چن جي سربراهي ۾ پبلڪ اڪائونٽس ڪميٽيءَ نيب کي 33 ۽ ايف آءِ اي کي 13 مامرا انڪوائري لاءِ موڪليا. سيد خورشيد احمد شاهه جي دوري ۾ پبلڪ اڪائونٽس ڪميٽي 456 اجلاس ڪيا، ان دور ۾ 355 ارب 60 ڪروڙ روپيا وصول ڪيا ويا. سيد خورشيد احمد شاهه جي دور ۾ پبلڪ اڪائونٽس ڪميٽي 168 مامرا نيب ۽ 56 مامرا ايف آءِ اي کي جاچ لاءِ اماڻيا. پبلڪ اڪائونٽس ڪميٽي نيب کان سومر يا اڱاري تي انهن ڪيسن بابت ٿيل اڳڀرائي رپورٽ طلب ڪري ورتي آهي. جڏهن ته اجلاس ۾ ايف آءِ اي جون گريڊ 19 کان گهٽ گريڊ 18 جو آفيسر شريڪ ٿيڻ تي پبلڪ اڪائونٽس جي ميمبرن سخت ناراضگي جو اظهار ڪيو ويو جڏهن ته پبلڪ اڪائونٽس ڪميٽي هدايت ڪئي ته آئينده اجلاس ۾ ڪنهن به وزارت جو گريڊ 19 جو گهٽ آفيسر شرڪت لاءِ نه اچي. پبلڪ اڪائونٽس ڪميٽي جي اجلاس ۾ فيصلو ڪيو ويو ته مسلم ليگ (ن) جي دور حڪومت جي آڊٽ اعتراضن جي جائزي لاءِ 3 کان 4 سب ڪميٽيون ٺاهيون وينديون. شهباز شريف جو چوڻ هو ته مسلم ليگ (ن) جي دور جي آڊٽ اعتراضن کي مان نه ڏسندس جيڪو طئه ٿيو آهي ته ان تي عمل ڪنداسين اسان جي دور جي آڊٽ پيرائن جي جائزي لاءِ سب ڪميٽيون ٺاهيون وينديون. هن چيو ته پبلڪ اڪائونٽ ڪميٽي جي فيصلن تي عملدرآمد لاءِ مانيٽرنگ ڪميٽي ٺاهي ويندي، جڏهن ته عوامي نوعيت جي شڪايتن توڙي معامرن تي پبلڪ اڪائونٽ ڪميٽي ڪارروائي ڪندي. پبلڪ اڪائونٽ ڪميٽي سومر ڏينهن آڊٽ پيرائن بابت آڊيٽر جنرل کان بريفنگ طلب ڪري ورتي آهي. اجلاس دوران ڳالهائيندي پبلڪ اڪائونٽس ڪميٽي جي چيئرمين شهباز شريف چيو ته اسان جو مشن بنا فرق جي احتساب هوندو، ڪنهن جي به طرفداري نه ڪنداسين. ماضي ۾ پبلڪ اڪائونٽس ڪميٽي سٺي ڪارڪردگي جو مظاهرو ڪيو آهي ۽ هي ڪميٽي به غير معمولي اهميت جوڳي آهي. مان اجلاس ۾ شريڪ ٿيندڙ تمام ميمبرن جي آجيان ڪيان ٿو. ڪميٽي جو ڪم قانون مطابق ٽيم ورڪ جي ذريعي ڪرڻ جي ڪوشش ڪنداسين. پبلڪ اڪائونٽس ڪميٽي ميڊيا ۾ خبرون هلائڻ جو فورم نه آهي. اجلاس دوران پي اي سي جي ميمبر فخر امام چيو ته نيب ۽ ايف آءِ اي کي جانچ لاءِ ڪيس موڪلڻ جو طريقيڪار ڇا آهي. تنهن تي پبلڪ اڪائونٽس ڪميٽي جي سيڪريٽري کيس ٻڌايو ته اهو پبلڪ اڪائونٽس ڪميٽي جي صوابديد تي آهي. (ن) ليگ جي روحيل اصغر چيو ته مان اڳ واري پبلڪ اڪائونٽس ڪميٽي جو ميمبر به هوس جيڪي ڪيس نيب ۽ ايف آءِ اي کي موڪليا ويا هئا ان جو نتيجو ڇا نڪتو. جنهن تي سيڪريٽريءَ ڪميٽي کي ٻڌايو ته هن وقت نيب ۾ 11 ڪيسن جي جانچ ۽ 17 جي انڪوائريون هلندڙ آهن. حنا رباني کر چيو ته گلف ڪلب جا مجرم اڃان تائين گرفتار نه ٿيا آهن نيب ۽ ايف آءِ اي اڄڪلهه گهڻا سرگرم آهن. روحيل اصغر چيو ته ڇا نيب سومر ڏينهن مڪمل رپورٽ ڏيندي يا بھانو بنايو ويندو. جنهن تي پبلڪ اڪائونٽس ڪميٽي جي چيئرمين اڱاري تي نيب کان رپورٽ طلب ڪري ورتي. اهڙي ريت ان بعد ايف آءِ اي کي به بريفنگ ڏيڻ جي هدايت ڪئي وئي آهي. اجلاس دوران پبلڪ اڪائونٽس ڪميٽي چوڌري نثار ۽ سيد خورشيد شاهه جي دوري ۾ پبلڪ اڪائونٽس ڪميٽي جي ڪم بابت تعريف ڪئي.
”فريال سنڌ بينڪ جي اڇي ڪاري جي مالڪياڻي ھئي“: جي آءِ ٽي رپورٽ
سنڌ بينڪ جا فيصلا فريال ٽالپر ڪندي آهي، هن 4 من پسند آفيسر ڀرتي ڪرايا
من پسند آفيسرن ذريعي جعلي اڪائونٽ کولرايا ويا، فريال وڏي وزير جا اختيار بھ استعمال ڪيا
ڪراچي (م ڊ) فريال ٽالپر سنڌ بينڪ جي اڇي ڪاري جي مالڪياڻي نڪتي، جي آءِ ٽي رپورٽ پول پڌرو ڪري ڇڏيو، سنڌ بينڪ جي صدر بلال شيخ جو فريال ٽالپر کي لکيل خط جي آءِ ٽي رپورٽ جو حصو بڻايو ويو، جي آءِ ٽي رپورٽ ۾ انڪشاف ڪيو ويو آهي ته فريال ٽالپر سنڌ بينڪ جا فيصلا ڪندي آهي، فريال ٽالپر بينڪ جي اڇي ڪاري جي مالڪياڻي هئي ۽ سمورن معاملن جي منظوري ڏيندي رهي، جي آءِ ٽي رپورٽ ۾ وڌيڪ چيو ويو آهي ته سنڌ بينڪ ۾ فريال ٽالر 4 اهم من پسند آفيسر ڀرتي ڪرايا، نور زهري، مختيار حيدر، وسيم حيدر ۽ بدرالدين شامل آهن، نور زهري کي نوابشاهه برانچ جو مينيجر مقرر ڪرايو،فريال ٽالپر من پسند آفيسر ذريعي بينڪ ۾ جعلي اڪائونٽ کولرائيندي هئي، رپورٽ ۾ وڌيڪ چيو ويو ته سنڌ جو وڏو وزير ڪو ٻيو وڏا فيصلا ڪرڻ واري فريال ٽالپر آهي، مراد علي شاهه ناڻي واري وزير طور سنڌ بينڪ جون سمريون منطور ڪندو هو.