ڪنب (ن پ ا) ڪنب جي جي صحافي وحيد ڄامڙو جي گرفتاري خلاف يونين آف جرنلسٽ ڪوٽڏيجي جي سڏ تي هريش ڪمار، همت تمراڻي، سليم رضا لنڊ، شاهد سومرو، شاهرخ سومرو، امير بخش گوپانگ، شاهد حاجاڻو، احمد علي رند، امان الله بگٽي سميت ٻين جي اڳواڻي ۾ مظاهرو ڪيو ويو. ان موقعي تي صحافين دانهيو ته ڪنب جي صحافي وحيد ڄامڙو کي بنا جواز راڻيپور ٿاڻي جي ايس ايڇ او گرفتار ڪري لاڪپ ڪري ڇڏيو آهي، جيڪو ظلم آهي، هنن وس وارن کان مطالبو ڪيو آهي ته صحافي کي آزاد ڪري ايس ايڇ او خلاف ڪارروائي ڪئي وڃي.

فيض گنج (رپورٽ: رياض سولنگي) فيض گنج جي سرڪاري اسپتال ڪوس گهر ۾ تبديل ٿي وئي آهي، مريضن کي دعوائون ملڻ مشڪل، ايم ايس سرڪاري دوائون کپائي ڇڏيون، صحت کاتي نوٽيس نه ورتو. فيض گنج جي سرڪاري اسپتال ۾ ڊاڪٽرن ۽ دوائن جي کوٽ سبب مريض پريشانيون ڀوڳڻ تي مجبور آهن. پنهنجي اخبار جي سروي موجب، ايم ايس جي ملي ڀڳت سان ڊاڪٽرن خانگي ڪلينڪون کولي ورتيون آهن،جنهن سبب سرڪاري اسپتال ۾ ايندڙ مريضن کي ذاتي ڪلينڪن تي اچڻ جي صلاح ڏني پئي وڃي. صحت کاتي پاران ڪنهن به ايمرجنسي صورتحال کي منهن ڏيڻ لاءِ ڏنل ايمبولينس توڙي ٻيون گاڏيون مرمت نه ٿيڻ جي ڪري تباهه ٿي ويون آهن. سرڪاري اسپتال اندر دل ۽ عورت جو ويم گهر 5 ڪروڙ رپين جي لاڳت سان تعمير ڪيو ويو، پر انتظامي نااهلي ان عمارت کي به تباهي جي ور چاڙهي ڇڏيو. اسپتال ۾ لڳل 8 سي سي ٽي وي ڪئمرائون خراب آهن، جنهن سبب ڪنهن اڻوڻندڙ واقعي جا فوٽيج نه ملي سگهندا.

دوڙ (ن پ ا) دڙو ۾ بنيادي سهولتون اڻلڀ، جديد دور ۾ به رهواسي ڌڪا کائڻ تي مجبور، خبر موجب، دوڙ جي ڳوٺ ڪريم بخش وڳڻ، ڳوٺ لڌوخان واسوڻو، ڳوٺ جھان خان رند، ڳوٺ امير بخش وساڻ، ڳوٺ چوڌري عنايت راجپوت، ڳوٺ سوالي خان رند، ڳوٺ لودو، ڳوٺ صوبيدار، ڳوٺ گلڻ بروهي، يونين ڪائونسل خان محمد جلباڻي جي ڪيترن ئي ڳوٺن جا رهواسي سهولتن کان محروم آهن. پنهنجي اخبار جي سروي دوران ڳوٺاڻن غلام نبي واسوڻو، قربان ڪنڀر، وسيم وڳڻ، محمد حسن وساڻ، علي حسن واسوڻو، بخت خان، شهزاد رند، ڪامريڊ حبيب الله پنهور ۽ ٻين دانهيو ته ھر مھيني يوسي لاءِ لکين رپين جي بجٽ ملي ٿي، جيڪا يوسي چيئرمين ملي ڀڳت ڪري هڙپ ڪري وڃن ٿا. هنن ٻڌايو ته چونڊيل نمائندا به عام چونڊن دوران سکڻا دلاسا ڏئي ووٽ وٺڻ کانپوءِ گم ٿي ويا آهن.

خيرپورناٿن شاھ (ن پ ا) خيرپور ناٿن شاهه ۾ نامياري شاعر وفا ناٿن شاهي جي نالي سان منصوب لائبريري 6 سال گذرڻ باوجود مڪمل نه ٿي سگهي، جڏهن ته ملازم گهر ويٺي پگهار وٺي رهيا آهن.شھر ۾ لائبريري نه هجڻ ڪري شاگرد توڙي اديب ڪتابن جي مطالعي کان محروم آھن. شاگردن اياز ٻرڙو، حافظ انور کوهارو، فقير علي حسن، سهيل چانڊيو، سنڌو ملاح، ماجد ٻگهيو، حافظ حاجن لغاري ۽ ٻين پريس ڪلب پهچي احتجاج ڪيو. ان موقعي تي مظاهرين دانهيو ته لائبريري نه هئڻ سبب کين ڏکيائيون پيش اچي رهيون آهن، جڏهن ته 6 سال گذرڻ باوجود ڪم اڻپورو هئڻ سمجهه کان ٻاهر آهي. هنن الزام مڙهيو ته بااثر لائبريري تي قبضو ڪري ورتو آهي، جنهن ڪري ڪم رلي ويو آهي، نوٽيس ورتو وڃي.

خيرپور (ن پ ا) شهر جي پراڻي بس اسٽاپ وٽان دڪان ڊاهڻ خلاف دڪاندارن ٻارن سميت ٽئين ڏينهن به علامتي بک هڙتال جاري رکي.سيشن ڪورٽ ٻاهران علامتي بک هڙتال ڪندڙ ساجد ملڪ، عاشق حسين بگٽي، اعجاز جاگيراڻي، غلام قاسم ڪلهوڙو ۽ ٻين دانهيو ته ضلعي انتظاميان بلڊر مافيا سان ملي ڀڳت ڪري اسان جا 126 دڪان، ھوٽلون بنا جواز ڊاھي پٽ ڪري ڇڏيون آهن، جنهن جي ڪري ھڪ ھفتي کان اسان جي گھر جا چلها نه ٻريا آهن ۽ ٻچا بکون ڪاٽي رهيا آهن. هنن چيو ته 6 ڏينهن کان احتجاج ڪرڻ باوجود ڪو به چونڊيل نمائندو بک هڙتالي ڪئمپ تي لڙي ناهي آيو. ھنن چتاءُ ڏنو تھ متبادل دڪان نه ڏنا ويا ته مرڻ گھڙي تائين بک هڙتال جاري رھندي.

پنوعاقل(ن پ ا) پني عاقل ۾ پ پ شهيد ڀٽو جو ورڪرز ڪنوينشن، پارٽي اليڪشن ۾ ميرٽ جو خيال رکڻ جو عزم ورجايو ويو. پني عاقل ۾ ٿيل ڪنوينشن ۾ اعجاز منگي، تاج محمد ڊومڪي، قربان ڪلوڙ، اسحاق جسڪاڻي، شاهد جتوئي سميت خيرپور گهوٽڪي سکر سميت مختلف ضلعن مان اڳواڻن ۽ ڪارڪنن شرڪت ڪئي. ڪنوينشن ۾ اڳواڻن شڪايت ڪئي ته پارٽي چونڊن ۾ ميرٽ جو خيال ناهي رکيو ويندو، جنهن سبب پارٽي کي نقصان پهچي رهيو آهي. ڪنوينشن ۾ اڳواڻن عزم ورجايو ته پارٽي چونڊن ۾ ميرٽ جو خاص خيال رکيو ويندو.

پکو(ن پ ا) پکي ۾ عام واهپي وارين شين جا اگهه ٻيڻا، گوشت ۽ سبزيون به مهانگيون،عوام پريشان، خبر موجب، پکو شهر ۽ ڀرپاسي وارن علائقن ۾ عام واهپي وارين شين جي اگهن ۾ پاڻمرادو واڌ ڪري شهرين کي ڦريو پيو وڃي. وڳڻ، نصير آباد ۽ ٻين شهرن ۾ سرڪاري ريٽ لسٽن تي عمل نه ٿيو. دڪاندار ننڍو گوشت 800، ننڍو گوشت 350، مڇي 300رپيا في ڪلو جي حساب سان وڪرو ٿي رهي آهي، جڏهن ته سبزين جي اگهن ۾ به واڌ ڪري پٽاٽا 50رپيا، ٽماٽا 60رپيا، گوبي 50رپيا، پالڪ 40 رپيا، ڀينڊيون 80 رپيا، توريون 70 رپيا في ڪلو وڪرو ڪيون پيون وڃن. انتظامي نااهلي سبب دڪاندار فروٽن ۽ ميون جي اگهن ۾ به واڌ ڪري صوف 180رپيا في ڪلو، نارنگي60، ڏاڙهون 200 رپيا، گجر 50، زيتون50 رپيا في ڪلو جي حساب سان وڪرو ڪيا پيا وڃن، جڏهن ته خشڪ ميون جا اگهه آسمان سان ڳالهيون ڪري رهيا آهن. سياسي سماجي تنظيمن جي اڳواڻن زاهد خشڪ، رضا علي سامٽيو، سرائي سامٽيو، دلمراد ۽ ٻين پنهنجي اخبار کي ٻڌايو ته مارڪيٽ ڪاميٽي جي مقرر ريٽ لسٽن تي عمل نه ٿي رهيو آهي، دڪاندار شهرين کان هٿ ٺوڪيا اگهه اوڳاڙي رهيا آهن، پر ڪير ڪارروائي ڪرڻ لاءِ تيار نه آهي.

ڪوٽڙي (ن پ ا) ڪوٽڙي سائيٽ جي علائقي جي خدا جي بستي مان 22 ورهيه ثنا مرزا پر اسرار نموني گم ٿي وئي، ڪوٽڙي سائيٽ جي علائقي خدا جي بستي جي رهواسڻ 22 ورهيه ثنا مرزا ولد سهيل مرزا پراسرار نموني گم ٿي وئي،سندس وارثن پاران ناري جو پيءُ سھيل مرزا ڪوٽڙي سائيٽ ٿاڻي تي ناري جي اغوا ڪرڻ واري اين سي داخل ڪرائي ڇڏي آهي،سندس والد موجب ثنا کي ٻه ڄڻا اغوا ڪري ويا آهن ، رابطو ڪرڻ تي ايس ايڇ او سائيٽ آدم ابڙو موجب ناري جي والد سهيل مرزا جي پاران ثنا کي اغوا ڪرڻ جي اين سي داخل ڪرائي وئي آهي،جاچ ڪري رهيا آهيون.