ڪٺ پتلي ون يونٽ لاءِ آيو، آمريتي قوتن سان ويڙهه ڪنداسين ۽ 18هين ترميم تي هر قسم جي حملي کي روڪينداسين: بلاول

آصف زرداري جو وڏو گناهه اهو اهي ته هن پاڪستان کپي جو نعرو هنيو: پ پ چيئرمين

ڪٺ پتلي کي حڪومت ڏيڻي هئي ته کيس پريڪٽس ڪرايو ها: ڳڙهي خدا بخش ۾ خطاب

ڳڙهي خدا بخش ڀٽو (رپورٽر) پاڪستان پيپلزپارٽي جي چيئرمين بلاول ڀٽو زرداري جي آءِ ٽي رپورٽ کي هڪ ڀيرو ٻيهر رد ڪندي چيو آهي ته ملڪ ۾ ون يونٽ لڳائڻ لاءِ ڪٺ پتلي کي آندو ويو، هن ويڙهه ۾ اڳئين مورچي تي هوندس، سليڪٽيڊ وزيراعظم کي اندازو ئي ناهي ملڪ هٿن مان نڪري پيو، جيڪڏهن حڪومت ڪٺپلي کي ڏيڻي هئي ته ٿوري ان کي پريڪٽس ڪرايو ها، ڳڙهي خدابخش ۾ شهيد بينظير ڀٽو جي روسي موقعي تي جلسي کي خطاب ڪندي پ پ چيئرمين بلاول ڀٽو زرداري چيو ته نام نهاد ٺيڪدار نشي ۾ گم آهي، وفاق ڪمزور ٿيندو پيو وڃي، اچو غيرجمهوري قوتن خلاف پاڻ کي نئين جنگ لاءِ تيار ڪيون، مان اڳئين مورچي تي ٿيندس، هي اها ئي جنگ آهي جيڪا شهيد ذوالفقار علي ڀٽو ۽ بينظير ڀٽو وڙهي، اسان سڀ ڀٽو آهيون، ويڙهه لاءِ تيار آهيون، بلاول ڀٽو چيو ته اڄوڪي ڏينهن تي منهنجي امڙ ۽ اوهان جي ليڊر کي کسيو ويو. شهيد بينظير ڀٽو جي خواب کي پورو ڪرڻو آهي، اسان جيلون ڏٺيون، آمرن جو مقابلو ڪيو، تون ڪهڙي باغ جي موري آهين؟، ڳڙهي خدابخش: هي ڪهڙو احتساب آهي، جنهن جو نشانو رڳو اپوزيشن آهي، ماضي وانگر اڳوڻي صدر آصف زرداري خلاف ظلم ڪيو پيو وڃي، اسين ڄمي مقابلو ڪنداسين، آصف زرداري جو وڏو گناهه اهو اهي ته هن پاڪستان کپي جو نعرو هنيو، پاڪ، ايران گيس لائين منصوبو ڏنو، اڄ اهو مڪمل ٿئي ها ته گيس بحران نه هجي ها،آصف زرداري 18 هين ترميم کي آئين جي اصل روح ۾ بحال ڪيو، 18هين ترميم تي هر حملو روڪينداسين، هي ڪٺ پتلي اين ايف سي ايوارڊ مان صوبن کي ملندڙ حصو کسڻ چاهي ٿو، پر اسان ايئن ٿيڻ نه ڏينداسين، سڀني يزيدن کي چوان ٿو منهنجي جسم ۾ شهيد بينظير ڀٽو ۽ شهيد ذوالفقار ڀٽو جو رت آهي، غيرجمهوري قوتن جو مقابلو ڪنداسين، جلد ملڪ کي ڪٺ پتلي کان به آجو ڪرائينداسين، هن مني لانڊرنگ ڪيس ۾ جي آءِ ٽي رپورٽ کي ڪوڙو قرار ڏيندي چيو ته جي آءِ ٽي رپورٽ رڳو ڪوڙ آهي، مني لانڊرنگ کان ڳالهه ناشتي جي بلن تائين پهتي، عدالت کي پوليٽيڪل انجنيئرنگ لاءِ استعال ڪيو پيو وڃي، اميد آهي معزز جج صاحب رپورٽ کي ردي جي ٽوڪري ۾ اڇلائيندا، هن چيو ته جيڪڏهن اوهان ۾همٿ آهي ته بي نامي وزيراعظم ۾ هٿ وجهي ڏيکاريو، اوهان کان ايس ايس پي ظاهر جا قاتل نٿا ملن، باقي منهنجي ناشتي جو بل ملي ويو، هن چيو ته هي ڪهڙو وزيراعظم آهي جنهن کي رپئي جو ملهه گهٽجڻ جي خبر ناهي،هنن کان بلوچستان جي مائرن جو آواز به برداشت نٿو ٿئي، نوازشريف جي سزا کانپوءِ پنجاب ۾ جيڪي نعرا لڳا انهن جو تصوير به نه ڪيو هو، هن حڪمرانن کان سوال ڪندي چيو ته ٻڌايو بينظير ڀٽو ۽ ذوالفقار علي ڀٽو جي خون سان ڪڏهن انصاف ٿيندو؟سندس خون سان ڪڏهن انصاف ٿيندو، بلاول ڀٽو جذباتي تقرير ڪئي، شعر پڙهي ماحول گرمائي ڇڏيو.

ڄامشوري ۾ ريجنل پاسپورٽ آفيس بند،شهرين جو احتجاج

ڄامشورو (رپورٽر) نواز حڪومت ۾ قائم ڄامشورو ريجنل پاسپورٽ آفيس کي وفاق پاران بند ڪرڻ جو نوٽيفڪيشن جاري ڪيو ويو آهي ،ڄامشورو پاسپورٽ آفيس آڏو شھرين دربان عالماڻي وسعت الله تيوڻو .حافظ جميل احمد لغاري .حاجي مير حسن بليدي ۽ ٻين جي اڳواڻي ۾ احتجاج آفيس بند ڪرڻ واري عمل جي سخت مذمت ڪندي صحافين سان ڳالهائيندي چيو آھي ته پاسپورٽ آفيس بند ڪرڻ سان ضلعي جا ماڻھو جن ۾ عورتون، ضعيف،نوجوان دربدر ٿي ويندا، ھتي نوري آباد، ڪوٽڙي، ڄامشورو، ٿاڻو بولا خان، مانجهند، سيوهڻ ۽ ڀان شهرن جا ماڻھو ويجهو هجڻ ڪري سهولت حاصل ڪري رهيا آهن. پاسپورٽ سنڌيونيورسٽي سوسائٽي ڄامشورو ۾ روزانو 50 کان 60 پاسپورٽ ٺهرائڻ لاء ماڻهو اچن ٿا جنهن ۾ عوامي ماڻھن جي سهولت سميت وفاقي حڪومت به ڪمائي ٿي پوء به وفاقي حڪومت ريجنل پاسپورٽ آفيس کي بلاجواز بند ڪرڻ جي مذمت ڪجي ٿي هنن چيو ته وزير اعظم عمران خان کان مطالبو ٿا ڪريون ته فوري طور تي پاسپورٽ آفيس کي بند ڪرڻ وارو نوٽيفڪيشن واپس ورتو وڃي ٻئي صورت ۾ احتجاجي تحريڪ هلائي ويندي.

“پنھنجو ڪم ڇُٽو” قاضي احمد پوليس ھاڻي صحافت سيکارڻ لڳي

قاضي احمد جو ايديشنل ايس ايڇ او صحافت سيکاريندي

قاضي احمد (ن پ ا) قاضي احمد پوليس پنهنجي ڪارڪردگي بهتر ڪرڻ بدران صحافين کي صحافت سيکارڻ جو ڪم پنهنجي ڪُلهن تي کڻي ورتو. قاضي احمد پريس ڪلب ۾ تقريب دوران خطاب ڪندي ايڊيشنل ايس ايڇ او امام بخش مري پوليس جي ڪارڪردگي ۽ ڪاروهنوار کي بهتر ڪرڻ لاءِ اسٽريٽجي يا پاليسي ٻڌائڻ بدران صحافين کي صحافت سيکارڻ جي ڪوشش ڪئي. تقريب کي خطاب ڪندي ايڊيشنل ايس ايڇ او چيو ته صحافي سرڪاري طور تصديق ڪرائڻ کانپوءِ خبر ڏيندا ته کين پريشاني جو منهن ڏسڻو نه پوندو. اُن موقعي تي ڊي ايس پي مقبول ميمڻ عوام کي باخبر رکڻ لاءِ صحافين کي پوليس جي ڪارڪردگي رپورٽ ڏيڻ بدران صحافتي ضابطه اخلاق جون ڪاپيون ورهايون. ايڊيشنل ايس ايڇ او ۽ ڊي ايس پي جو وڌيڪ چوڻ هو ته ڪوڊ آف ڪنڊڪٽ جي ڀڃڪڙي کان پاسو ڪرڻ ڪامياب صحافت جي ضمانت آهي.

سکر جي علائقي نئون پنڊ مان نينگري اغوا

سکر)رپورٽر)سکر جي علائقي نئون پنڊ مان مبينا طور نوجون ڇوڪري فضا ڀيو اغوا ٿي وئي آهي، ناري جي وارثن طرفان نئون پنڊ ٿاڻي تي 8 ڄڻن خلاف ڪيس داخل ڪيو ويو آهي،ناري جي وارث اشتياق ڀيو جي فرياد تي فضا جي اغوا جو ميراڻي برادري جي تنوير، وزير، غلام شبير، ظهير، صابر سميت 8 جوابدارن خلاف ڪيس داخل ڪرايو ويو آهي،هوڏانهن علائقي ۾ چئوٻول آهن ته ڇوڪري فضا ڀيو نوجوان تنوير ميراڻي سان پسند جي شادي لاء گهران نڪري وئي آهي

خيرپور ڀرسان ڳوٺ ۾ باهه لڳي وئي،4 گهر سڙي ويا

خيرپور(رپورٽر)خيرپور ڀرسان ڪوٽڏجي ٿاڻي جي حد ڳوٺ ديهه سوهو ۾ جاويد ڀٽي جي گهر کي اوچتو باهه لڳي وئي، تيز باهه مختيار ڀٽي،عباس ڀٽي ۽ پرويز ڀٽي جي گهرن کي لپيٽ ۾ آڻي ورتو ۽ گهرن ۾ رکيل اناج،هنڌ بسترا، کٽون سميت الهه تلهه سڙي رک ٿي ويو آهي،باهه جي اطلاع تي ڳوٺ واسين فوري طور تي باهه وساڻ جي ڪوشش ڪئي پر تيز باهه تي ضابطو اچي نه سگهيو اطلاع تي فائر برگيڊ جي 2 گاڏين پهچي وڏين ڪوششن بعد باهه تي ضابطو آندو. متاثرن ميڊيا کي ٻڌايو ته باهه لڳڻ جو ڪارڻ معلوم ٿي نه سگهيو،اوچتو تيز باهه گهرن کي لپيٽ ۾ آڻي ورتو نتيجي ۾ سمورو الهه تلهه سڙي رک ٿي ويو .

پ پ قيادت جو اي سي ايل ۾ نالو شامل ڪرڻ بدمعاشي آهي: ترجمان

پرويز مشرف جو نالو اي سي ايل ۾ ناهي، آصف زرداري جو نالو شامل ڪيو ويو: عامر پراچا

پي ٽي آءِ انتقام کي احتساب پئي ڪوٺي، ڪيس کي منهن ڏينداسين

ڪراچي (م ڊ) اڳوڻي صدر آصف علي زرداري جي ترجمان جو نالو اي سي ايل ۾ شامل ڪرڻ تي رد عمل اچي ويو، ترجمان آصف علي زرداري چيو آهي ته عدالتي فيصلي کان پهرين نالو اي سي ايل ۾ شامل ڪرڻ بدمعاشي آهي، پرويز مشرف جو نالو اي سي ايل ۾ ناهي، آصف زرداري جو شامل ڪيو ويو، ترجمان آصف زرداري عامر فدا پراچا جو چوڻ هو ته پي ٽي آءِ انتقام کي ڪرپشن خلاف ڪارروائي قرار ڏئي رهي آهي، آصف زرداري ملڪ کان ٻاهر نه پيو وڃي، ڪيسن کي منهن ڏينداسين

دريائي وهڪرن ۾ لاٿ،سنڌ جي حصي ۾7000 ڪيوسڪ جي ڪٽوتي

ڪشمور (رپورٽ :جي ايم کوسو )سنڌو درياءَ جي وھڪرن ۾ ٻيھر لاٿ جڏھن ته تونسه بئراج وٽان ست ھزار ڪيو سڪس پاڻي گھٽائي ڇڏيو ان ڏس ۾اڄ کان دريائي وھڪرن ۾ ٻيھر گھٽتائي اچي وئي جڏھن ته تونسه کان سنڌ جي حصي ۾ ٽيھ ھزار ڪيو سڪس مان ست ھزار ڪيو سڪس گھٽائي 23 ھزار ڪيو سڪس ڪيو ويو آھي،ايندڙ ٽن ڏينھن ۾ گڊو بيراج وٽ 19 ھزار ڪيو سڪس ٿي ويندو ،جڏھن ته ھن وقت گڊوبيراج وٽ مٿون وھڪرو 26 ھزار ڪيوسڪس آھي،جڏھن ته ھيٺيون وھڪرو23 ھزار ڪيو سڪس آھي ،جڏھن ته چشمه بيراج وٽان به وھڪرن ۾ريڪارڊ گھٽتائي پڻ اچي وئي آھي ھوڏانھن بلوچستان جي لاءِ ٽي ھزار ڪيو سڪس ھن وقت پٽ فيڊر ۾ ڇڏيو وڃي ٿو،جڏھن ته ٽن ڏينھن اندر بلو چستان جي کڻت ۾ وڌيڪ گھٽتائي اچي ويندي، ان باري ۾ گڊو بيراج جي انجيئر شاھنواز ڀٽو چيو ته دريائي وھڪرن ۾ ريڪارڊ گھٽتائي اچي ويندي ھن چيو ته پنج جنوري تي سکر بيراج جي ڪينالن جي وارابندي ٿيڻ کان پو ء گڊوبيراج جي ڪينال گھوٽڪي فيڊر ڊيزر پٽ فيڊر ۽ بي ايس فيڊر کي پاڻي ڇڏيو ويندو ياد رھي ته گڊو بيراج جي ڪمانڊ ايريا ۾ پوکيل ڪڻڪ : سرنھن : مٽر: فصل سوڪھڙي جو شڪار ٿي ويا

پنوعاقل مان 2 معصوم ٻارڙا لاوارث حالت ۾ هٿ

پنوعاقل )ن پ ا )مهراڻ اسڪول وٽان ٻه ٻار لاوارث حالت ۾ هٿ آيا آهن،شهري علي گوهر چنو پاران پوليس حوالي ايس ايڇ او حڪيم لانگاه چيو ته ٻارڙا ڳالهائڻ جهڙا به ناهن،مسلسل روئندا رهن ٿا،شهر ۾ اعلان به ڪرايون ٿا ،پر هن وقت تائين سندن وارث هٿ اچي نه سگهيا آهن.

اوٻاوڙي جا 2 يتيم ٻارڙا اپاهج،امڙ علاج لاءِ گهر جو سامان به وڪڻي ڇڏيو

معصوم الله بخش ۽ اڪرم ٿهيم امڙ جي سهاري تي زندگي گذارڻ تي مجبور

ٻئي ٻارڙا هلڻ ڦرڻ کان به لاچار،امڙ گهرن ۾ ڪم ڪار ڪري سندن علاج ڪرائي ٿي

اوٻاوڙو(ن پ ا) اوٻاوڙو جي خانپور محلي جا رهواسي 2 يتيم معصوم ٻارڙا 12 ورهين جو الله بخش ٿهيم ۽ 6 ورهين جو اڪرم ٿهيم ڄنگھن جي پراسرار بيماري ۾ مبتلا ٿي ويا آهن جنهن سبب معصوم ٻارڙا هلڻ ڦرڻ کان لاچار بڻجي ويا آهن ۽ ڪنهن به تڪ جي چونڊيل نمائندن متاثر خاندان سان واهر نه ڪئي آهي ان سلسلي ۾ معذور ٻارڙن جي امڙ ۽ مامي منير احمد ٿهيم پنهنجي اخبار کي ٻڌايو آهي ته ٻارڙا ننڍپڻ کان صحتياب هيا پر 3 يا 4 سالن جي عمر ۾ منهنجي ٻارڙن کي پراسرار بيماري وڪوڙي وئي ،جنهن سبب معصوم ٻارڙا هلڻ ڦرڻ کان لاچار بڻجي ويا آهن، ٻارڙن جي امڙ جو چوڻ هو ته گهر جو سامان کپائي ٻارڙن جو علاج ڪرائي رهيا آهيون پر علاج ڪرائڻ باوجود به ڪو فرق نه پيو آهي ۽ اسان غريب آهيون انهن جو پيءُ وفات ڪري ويو آهي ۽ مان ماڻهن جي گهرن ۾ ڪم ڪري انهن کي پالي رهي آهيان هن چيو ته آئون غريب بيواهه عورت آهيان ماڻهن جي گهرن ۾ ٻوهاري ڪري گهر جو گذر سفر ڪندي آهيان، مان هن وقت ٻچڙن جي علاج لاءِ سخت پريشاني کي منهن ڏئي رهي آهيان اسان وٽ ايتري رقم ناهي جو اسان ٻچڙن جو علاج ڪراچي يا لاهور مان ڪرائي سگهون ۽ اسان هن تڪ جي چونڊيل نمائندن توڙي وزير اعلي سنڌ ۽ ٻين اعلي اختيارين کي اپيل ڪيون ٿا ته منهنجي ٻچڙن جو سرڪاري خرچ تي علاج ڪرايو وڃي .

عنايت عمراڻي کي گرفتار ڪرڻ خلاف خيرپور ۾ پ پ (ش ڀ) جو احتجاج

خيرپور (رپورٽر)ڪراچي پوليس پاران مقابلو ڄاڻائي قتل ڪيل پ پ شهيد ڀٽو اڳواڻ اسد عمراڻي جي ڀاءُ عنايت عمراڻي مٿان ڪيس داخل ڪري گرفتار ڪرڻ واري عمل خلاف خيرپور ۾ پ پ شهيد ڀٽو جي ڪارڪنن طرفان احتجاجي مظاهرو ڪيو ويو. ان موقعي تي اڳواڻن فضل شيخ، اشفاق سرڪي، مشتاق سرڪي، عاشق جمالي، فواد حداد، سڪندرسومرو، گل محمد، قمرالزمان ڏنور، ارشاد حسين مڱريو، شيرازجماڻي، عامر جماڻي چيو ته پوليس انتقامي ڪاروائي تحت پ پ شھيد ڀٽو اڳواڻن ۽ ڪارڪنن تي ڪوڙا ڪيس داخل ڪري رھي آهي، عنايت عمراڻي جو ڏوهه اھو آهي جو ھو پنهنجي بيگناهه قتل ڪيل ڀاءُ اسد عمراڻي جي قاتلن جي گرفتاري لاءِ مسلسل احتجاج ڪري رهيو ھو جنهن سبب سندس خلاف ڪوڙا ڪيس داخل ڪري کيس گرفتار ڪيو ويو آهي. ھنن وس وارن کان مطالبو ڪيو ته فوري طور تي اسد عمراڻي جي خون سان انصاف ڪيو وڃي ۽ عنايت عمراڻي کي فوري طور تي آزاد ڪيو وڃي.

باڪسنگ ڊي ٽيسٽ: پوجارا جي سينچري، ڀارت 443 رنسن تي اننگز ڊڪليئر ڪري ڇڏي

آسٽريليا بنا ڪنهن نقصان تي ٻي ڏينهن جي پڄاڻي تي 8 رنسون ٺاهي ورتيون

پهرين اننگز ۾ ورات ڪوهلي 82 رنسون ٺاهيون، پيٽ ڪمنز 3 وڪيٽون حاصل ڪيون

ميلبورن (اسپورٽس ڊيسڪ) ڀارت ۽ آسٽريليا ۾ ٽئين ٽيسٽ ميچ جي ٻي ڏينهن ورات ڪوهلي پاران 443 رنسن تي پنهنجي پهرين اننگز ڊڪليئر ڪري ڇڏي، جواب ۾ آسٽريليا ڏينهن جي پڄاڻي تي بنا ڪنهن نقصان جي 8 رنسون ٺاهي ورتيون آهن. ڀارت طرفان ٻي ڏينهن جي شروعات ورات ڪوهلي ۽ چتيشور پوجارا ڪئي ۽ اسڪور کي 295 تائين پهچايو.
ورات ڪوهلي غلط شاٽ کيڏندي 82 رنسن تي آئوٽ ٿي ويو، جڏهن ته پوجارا 102 رنسون ٺاهي ويو. رشي پانٽ 39 اسڪور ڪيو، جڏهن ته روهت شرما 63 رنسون ٺاهي ناٽ آئوٽ رهيو. ورات ڪوهلي پاران ڏينهن جي پڄاڻي کان ٿوري دير پهريان اننگز 443 رنسن تي ڊڪليئر ڪئي.
آسٽريليا طرفان پيٽر ڪمنز 3 وڪيٽون حاصل ڪيون. جواب ۾ ٻي اننگز ۾ ڏينهن جي پڄاڻي تائين ڪينگروز بنا ڪنهن نقصان جي 8 رنسون ٺاهي ورتيون آهن.

ناروي ۾ چور ڪار ۾ ڦاسڻ بعد مدد لاءِ پاڻ ئي پوليس کي گهرايو

ڊيلرشپ مان ڪار چورائڻ جي ارادي سان نوجوان ڦاسي پيو، مدد لاءِ فون ڪال ڪئي: پوليس

جاچ بعد چوري ڪندڙ 17 ورهين جي نوجوان کي وارثن سان ڪرسمس ملهائڻ لاءِ ڇڏيو ويو

اوسلو (دلچسپ نيوز) ناروي ۾ چوري ڪندڙ نوجوان ڪار ۾ ڦاسڻ بعد مدد لاءِ پاڻ ئي پوليس کي گهرايو. پوليس جو چوڻ هو ته هڪ نوجوان ڊيلرشپ وٽان ڪار چورائڻ جي ڪوشش ڪئي، پر هو پاڻ ئي ڪار ۾ ڦاسي پيو. جنهن بعد هن مدد لاءِپولي سکي گهرايو.
ترونديلاگ پوليس ٽوئيٽ ڪيو ته 17 ورهين جو نوجوان صبح 8 وڳي کان اڳ پوليس کي فون ڪيو، نوجوان ٻڌايو ته هو والوو جي ڊيلر شپ مان ڪار چورائيندي ڦاسي پيو هو.
پوليس جو چوڻ هو ته جاچ بعد نوجوان کي وارثن سان ڪرسمس ملهائڻ لاءِ ڇڏيو ويو.
هوڏانهن ايبي جو چوڻ هو ته ڏکيايي ۾ ڦاسڻ تي نوجوان پوليس کي ئي گهرائڻ مناسب سمجهيو، پوليس کي ائين فون ڪال ڪئي جيئن مصيبت ۾ ڦاسڻ وقت ڪنهن دوست کي ڪبي آهي. هن چيو ته نوجوان ڪار چورائڻ ۾ تجربيڪار نه هو.

ڪنڌڪوٽ پوليس بيوس! عورت پٽ سوڌي ڏوهارين جي قيدياڻي، وارث سراپا احتجاج

گذريل ڏينهن هٿياربندن اربيلي کي پٽ سوڌو اغوا ڪيو، پيءُ کي هٿ پير ٻڌي وحشياڻو تشدد جو نشانو بڻايو ويو

وارثن رستم شيخ، شاهنواز، علي نواز، خير خاتون، وزيران، حڪيمان ۽ ٻين ايس ايس پي آفيس آڏو احتجاج ڪيو

ڪنڌڪوٽ (ن پنهنجي اخبار) ڪنڌڪوٽ پوليس ڏوهارين آڏو بيوس بڻيل، هٿياربندن هٿان پٽ سوڌو اغوا ٿيل عورت بازياب نه ٿي، سندس وارث سراپا احتجاج بڻيل آهن. نور شاهه واري علائقي ۾ هٿياربندن رستي ويندڙ پورهيت تي حملو ڪري سندس نياڻي اربيلي شيخ کي 2 سالن جي پٽ عجيب شيخ سوڌو اغوا ڪيو. وارثن رستم شيخ، شاهنواز، علي نواز، خير خاتون، وزيران، حڪيمان ۽ ٻين ايس ايس پي آفيس آڏو احتجاج ڪيو. مغوي عورت جي پيءُ رستم شيخ ٻڌايو ته هٿياربندن منهنجا هٿ پير ٻڌي تشدد جو نشانو بڻايو، جڏهن ته نياڻي کي گهلي سندس تذليل ڪئي وئي. متاثر دانهيو ته ايس ايس پي آفيس سوڌو مختلف ٿاڻن جا چڪر ڪاٽي ڪاٽي ٿڪجي پيا آهيون، پر ڪير دانهن ٻڌڻ لاءِ تيار ناهي. هنن مطالبو ڪيو ته مغوي عورت کي پٽ سوڌو بازياب ڪرائي ذميوارن خلاف ڪارروائي ڪئي وڃي.

پريالوءِ: سنڌي ادبي سنگت پاران سرمد سنڌي جي مزار تي حاضري

سريلي راڳي جي 22 ورسي جي موقعي تي وفد پاران گلن جي چادر چاڙھي دعا گھري وئي

پريالوءِ(ن پ ا)سنڌي ادبي سنگت پريالوءِ جي وفد سنگت جي سيڪريٽري سجاد ميراڻي جي اڳواڻي ۾ سنڌ ڌرتي جي سريلي راڳي ۽ سنڌ جي ٻيجل سرمد سنڌي جي 22 ورسي جي موقعي تي سندس مزار تي حاضري ڀري گلن جي چادر چاڙهي ۽ دعا پڻ گهري. ان موقعي تي سجاد ميراڻي چيو ته اسان سنڌ ثقافت کاتي کان گهر ٿا ڪريون ته پريالوءِ ۾ سرمد سنڌي جي نالي سان آڊيٽوريم ۽ لائبريري ڏني وڃي ۽ هر سال سرمد جي ورسي سرڪاري سطح تي ملهائي وڃي. ان موقعي تي نوجوان ليکڪ ۽ قومي ڪارڪن مخدوم شمس چيو ته سرمد سنڌي پهنجي ڪلا وسيلي سنڌ جي نوجوانن ۾ جاڳرتا ۽ شعور آندو. نوجوان شاعر ڪلياڻ ڪٽهڙا چيو ته سرمد جو آواز سنڌ ۽ سنڌ واسين جو آواز هو. سنگت جي وفد ۾ سيد نواز علي شاھ، هريش ڪمار، سيد اعجاز علي شاھ، عنايت ٻرڙو ۽ ٻيا پڻ شامل ھئا.

خيرپور: دڪان ڊاهڻ خلاف دڪاندارن جي علامتي بک هڙتال

ضلعي انتظاميه مافيه سان ملي ڀڳت ڪري 126 دڪان ۽ هوٽلون ڊاهي ڇڏيون: دڪاندار

متبادل دڪان نه ڏنا ويا ته مرڻ گهڙي تائين بک هڙتال ڪنداسين: دڪاندارن جو چتاءُ

خيرپور (ن پ ا) شهر جي پراڻي بس اسٽاپ وٽان دڪان ڊاهڻ خلاف دڪاندارن ٻارن سميت ٽئين ڏينهن به علامتي بک هڙتال جاري رکي.
سيشن ڪورٽ ٻاهران علامتي بک هڙتال ڪندڙ ساجد ملڪ، عاشق حسين بگٽي، اعجاز جاگيراڻي، غلام قاسم ڪلهوڙو ۽ ٻين دانهيو ته ضلعي انتظاميان بلڊر مافيا سان ملي ڀڳت ڪري اسان جا 126 دڪان، ھوٽلون بنا جواز ڊاھي پٽ ڪري ڇڏيون آهن، جنهن جي ڪري ھڪ ھفتي کان اسان جي گھر جا چلها نه ٻريا آهن ۽ ٻچا بکون ڪاٽي رهيا آهن.
هنن چيو ته 6 ڏينهن کان احتجاج ڪرڻ باوجود ڪو به چونڊيل نمائندو بک هڙتالي ڪئمپ تي لڙي ناهي آيو، متبادل دڪان نه ڏنا ويا ته مرڻ گھڙي تائين بک هڙتال جاري رکي ويندي.

پويون 1 … 22 23 24 25 26 … 99 اڳيون