منهڙو(ن پ ا)منهڙو ڀرسان دريا خان مري ٿاڻي جي حد ڳوٺ بودلو ڏاهري جي رهواسي 16ورهيه نوجوان عابد علي ولد مور ڏاهري ذهني توازن صحيح نه هئڻ ڪري بودلو موري کان ٽي ڏينهن اڳ روهڙي ڪئنال ۾ ٽپو ڏئي ڇڏيو هو ،جنهن جو 3 ڏينهن گذرڻ باوجود لاش هٿ نه اچي سگهيو آهي،نوجوان جا وارث ۽ وڏي انگ ۾ علائقي واسي لاش جي ڳولا لاءِ بودلو موري، يوسف ڏاهري موري،دوروفال موري،سن موري،هبيري موري ۽ روهڙي ڪئنال جي مختلف هنڌن تي رات ڏينهن نوجوان جي مڙھ جي انتظار ۾ ويٺل آهن ٻي طرف نوجوان جي وارثن پاران سندس ڳوٺ ۾ تڏو وڇايو ويو آهي .

اسلام ڪوٽ(رپورٽر)اسلام ڪوٽ ۾ حددخلين خلاف شروع ڪيل آپريشن جي ڪوريج دوران اينٽي انڪروچمينٽ فورس جي اهلڪارن پاران پريس ڪلب جي صدر غازي بجير، سجاول بجير ۽ ٻين صحافين تي تشدد واري واقعي جو سنڌ حڪومت جي نوٽيس بعد ايس ايس پي ٿرپارڪر عمران قريشي ۽ اي ڊي سي ون ڪبيرشاھ جانچ بعد اهلڪارن کي ڏوهي پڻ قرار ڏنو هو،، واقعي جي انڪوائري مڪمل ٿيڻ جي باوجود ملوث اهلڪارن خلاف ڪابه ڪاروائي ناهي ٿي سگهي هو ڪاروائي کان آجا آهن ،اينٽي انڪروچمينٽ فورس معاملي کي لئه مٽي ڪرڻ ۾ لڳي ويئي آهي ۽ انهن کي بچائڻ جي ڪوشش ڪئي پئي وڃي،صحافين طرفان ايس ايس پي اينٽي انڪروچمينٽ فيصل بشير ميمڻ سان بار بار رابطي جي ڪوشش ڪئي ويئي پر انهي فون اٽينڊ ڪرڻ جي زحمت نه ڪئي ، واقعي خلاف ٿر جي سمورن شهرن جا صحافي سراپاءُ احتجاج بڻيل آهن،ڪالھ به اسلام ڪوٽ ۾ صحافين غازي بجير،مبارڪ بجير،اشوڪ شرما،عبدالغني بجير،سڪندر علي، الطاف اسماعيل بجير،ڪرشن سنگھ،سجاول بجير،احمد علي سانگي ۽ ٻين واقعي خلاف ٽين ڏينهن به پريس ڪلب آڏو احتجاجي مظاهرو ڪيو،ٻئي پاسي صحافين طرفان اڄ کان سڄي سنڌ ۾ احتجاج جو سڏ ڏنو ويو آهي ۽ سنڌ جي صحافي برادري کي ساٿ ڏيڻ جي اپيل ڪئي ويئي آهي.

حيدرآباد(رپورٽ:فقير سليم)حيدرآباد ۾ پوليس جون موبائلون ڏوهارين خلاف ڪاررواين ڪرڻ بجاءِ ڀاڄيون ڍوئڻ لڳيون،ان ڏس ۾ هڪ فوٽو جنرلسٽ جي ڪئمرا ڀاڄيون ڍوئنيدڙ هڪ پوليس وين نمبر ايس پي 562 اي جي تصوير پنهنجي ڪئمرا ۾ فلمبند ڪري ورتي

سنڌي ادبي سنگت ۽ جسقم اڳواڻن سرمد جي مزار تي گلن جي چادر چاڙهي دعا گهري
سرمد سنڌ ۽ سنڌ واسين جو آواز هو، هن نوجوانن ۾ جاڳرتا آندي: سجاد، ايوب ۽ ٻين جو خطاب
پيرجوڳوٺ (رپورٽر) پير جو ڳوٽ ڀرسان تقريب ڪوٺائي سنڌي جي قومي ۽ البيلي راڳي سرمد سنڌ جي 22 هين ورسي سادگي سان ملهائي وئي.
پريالوءِ ۾ سنڌي ادبي سنگت ۽ جسقم اڳواڻن امجد مهيسر، سجاد ميراڻي، مخدوم شمس جي اڳواڻي ۾ سنڌ ڌرتي جي ناليواري ۽ ٻيجل راڳي سرمد سنڌي جي مزار تي حاضري ڀري گلن جي چادر چاڙهي ۽ دعا پڻ گهري.
ان موقعي تي سجاد ميراڻي، ايوب لاشاري، هاشم راهوجو ۽ مختيار ڀٽي سميت ٻين جو چوڻ هو ته ته سرمد سنڌي پنهنجي ڪلا وسيلي سنڌ جي نوجوانن ۾ جاڳرتا ۽ شعور آندو ۽ سدائين سنڌ جي ڳالھه ڪئي.
هنن چيو ته سرمد جو آواز سنڌ ۽ سنڌ واسين جو آواز هو، پر اڄ سرمد سنڌي جي سرڪاري سطح تي ورسي به نه پئي ملهائي وڃي.

خيرپور (رپورٽر)ڪنب لڳ شھباز ڪالوني مان واپاري فرهاد علي ملاح جو 19 ورهيه نوجوان پٽ احسن علي ملاح ٽن ڏينھن کان گم ٿي ويو آهي جنهن کان پوءِ نوجوان جي وارثن ۾ شديد بي چيني پکڙيل آهي. لاپتا ٿي ويل نوجوان جي والد فرحاد علي ملاح جو چوڻ آهي ته ٽي ڏينهن اڳ سندس پٽ گهر کان شهر طرف ڪنهن ڪم ڪار سانگي نڪتو جنهن بعد هو واپس نه موٽيو آهي ،ڪنب ٿاڻي تي اطلاع ڏيڻ ۽ سندس ڳولها ڪرڻ جي باوجود سندس ڪوبه ڏس پتو نه پئجي سگهيو آهي. هن چيو ته اسان جي ڪنهن سان به دشمني نه آهي.