گرهوڙ شريف (ن پ ا ) شھيدعبدالرحيم گرهوڙي جي درگاه جي حوالي سان مشھور سنڌڙي تعلقي جو شھر گرھوڙ شريف بنيادي سھوليتن کان وانجھيل. 15 هزار جي آبادي جو شهر گرهوڙ شريف بنيادي مسئلن جي ور چڙھيل. سهولتن کان محروم درگاه گرهوڙشريف جي مزار تي ڪوبه ترقياتي ڪم نه ٿي سگهيو. سانگهڙ ميرپورخاص جي قومي توڙي صوبائي سيٽن تي چونڊ وڙھندڙ اميدوار درگاه گرهوڙ شريف تي حاضري ڀرڻ کان پوء پنھنجي چونڊ مھم شروع ڪندا آھن پر اليڪشن ۾ ڪاميابي کان پوء ھن درگاه توڙي شھر تي ڪوبه توجھھ ڏيڻ لاء تيار نه آھي جنهن ڪري هي تاريخي شھر هن وقت کنڊرات وارو ڏيک ڏي ٿو. هن شھر ۾ گذريل 10 سالن کان ڪوبه ترقياتي ڪم نه ٿي سگهيو چونڊيل نمائندن عوام سان وعدا ڪيا جيڪي پڻ وفا نه ٿي سگهيا. درگاه گرهوڙ شريف تي هر نئين چنڊ جي پهرين سومر تي سائو سومر جي ڏينهن ميلو پڻ لڳندو آھي جتي هزارين زائرين مرد، عورتون ۽ معصوم ٻار درگاه تي حاضري ڀرڻ لاء پنجاب، بلوچستان سميت ٻين صوبن کان حاضري ڀرڻ ايندا آھن پر درگاه جو مسافرخانو توڙي پيئڻ جي پاڻي جي حوالي سان انھن کي وڏي مشڪلات کي منهن ڏيڻو ٿو پوي.

کراچي(ن پ ا)ايس ايس پي ڏکڻ سيد پير محمد شاھ جي ھدايتن تي ايس ايڇ او بوٽ بيسن ۽ چوڪي انچارج شيرين جناح ڪالوني سرور شاھ ڪاروائي ڪندي ھڪ مفرو ملزم کي پسٽل ۽ رائونڊ سميت گرفتار ڪري ورتو.پوليس گشت جي دوران ملزم مظھر حسين کي ھندو ڳوٺ مان گرفتار ڪيو. گرفتار ملزم تي جيڪسن ٿاڻي تي غير قانوني ھٿيار رکڻ جو ڪيس داخل ڪري وڌيڪ جاچ شروع ڪئي وئي آھي.

ٺل(ن پ ا)اي سيڪشن ٿاڻي جي حد باءِ پاس تي تيز رفتار ايڪسئن جي سرڪاري گاڏي جي موٽرسائيڪل سان ٽڪر ٿي پيو جنھن سبب موٽر سائيڪل سوار نينگر عزيز احمد پٽ فيض محمد لاشاري شديد زخمي ٿي پيو جنهن کي سرڪاري اسپتال داخل ڪرايو. ايڪسئن پنهنجي گاڏي ڪاهي فرار ٿي رهيو هو ته شهرين سرڪاري گاڏي جي آڏو بيهي روڪي ورتو جنهن تي ايڪئسن جي گارڊن شهرين مٿان هٿيار تاڻي ورتا. گارڊن ۽ شهرين ۾ منهن ماري ٿي پئي. اطلاع تي پوليس پهچي ڊائيور سميت سرڪاري گاڏي ڪاهي اي سيڪشن ٿاڻي تي بيهاري ڇڏي. علائقي جي بااثر شخص جي مداخلت تي ٻنهي ڌرين ۾ ٺاه ڪرايو ويو. ايس ايڇ او ٺل موجب ٻنهي ڌرين ۾ ٺاه ٿي ويو آھي.

حيدرآباد(ن پ ا) 16 ڊسمبر تي مردہ حالت ۾ مليل 10 سالن جي پرڪاش سوچي جا قاتل پوليس گرفتار نھ ڪري سگھي. 4 ڊسمبر تي گم ٿيل پرڪاش جو 16 ڊسمبر تي جي او آر ڪالوني مان تشدد ٿيل ۽ ھٿ ٻڌيل لاش مليو ھو. جنھن جو 6 ڏينھن کانپوءِ ڪيس داخل ڪيو ويو ھو.3 ايس ايڇ اوز تي ٻڌل جاچ ڪاميٽي بھ ڪو ٻوٽو ٻاري نھ سگھي. پرڪاش جي قتل کانپوءِ ريلوي اسٽيشن تي خيرات گھرندڙ ننڍي عمر جي پينو فقير ٻارڙن ۾ سخت خوف آھي. پرڪاش جي مائٽن پاران ڪنھن تي بھ شڪ ظاھر نھ ڪيو ويو ھو. پرڪاش جي ڀاءُ راج سوچي جو چوڻ آھي تھ اسان کي ڪنھن تي بھ شڪ ڪونھي پوليس قاتل گرفتار ڪري اسان سان انصاف ڪري.

ٺاروشاھ(ن پ ا)ٺاروشاھ ۽ آسپاس جي ڪيترن ئي ڳوٺن جي سوين ماڻهن جي علاج جو واحد مرڪز رورل هيلٿ سينٽر ٺاروشاھ عوام لاءِ بي لاڀ بڻجي ويو. اسپتال ۾ ڊاڪٽر نه هئڻ ۽ طبي سهولتون نه ملڻ خلاف ايس يو پي، جسقم، نوجوان اتحاد جي اڳواڻن رضا بهڻ، نادر راڄپر، لالا جانشير ڏاهري، پريل کوسو، جي ايم سومرو ۽ ٻين جي اڳواڻيءَ ۾ شهرين پريس ڪلب اڳيان احتجاج ڪيو. مظاهرين دانهيو ته ٺاروشاھ اسپتال ۾ ڊيوٽي تي مقرر ڊاڪٽر ڊيوٽي ڪرڻ بجاءِ پنهنجون پرائيويٽ ڪلينڪس هلائين ٿا، جنهن سبب پري پري جي ڳوٺن کان سرڪاري اسپتال ۾ ايندڙ مريض اسپتال ۾ ڊاڪٽر موجود نه هئڻ ڪري سخت پريشانين کي منهن ڏين ٿا ۽ پرائيوٽ ڪيلنڪن تي علاج ڪرائڻ تي مجبور آهن. هنن سيڪريٽري هيلٿ ۽ ٻين بالا آفيسرن کان مطالبو ڪندي چيو ته ڊيوٽي ۾ غفلت ڪندڙ ڊاڪٽرن خلاف ڪاروائي ڪري اسپتال ۾ ڊاڪٽرن کي ڊيوٽي تي پابند ڪيو وڃي ۽ مريضن لاءِ علاج جون بهتر سهولتون فراهم ڪيون وڃن.