سپريم ڪورٽ لاهور رجسٽري ۾ ٻڌڻي دوران چيف جسٽس چيو ته آصف زرداري ۽ بلاول جو سوا ڪروڙ رپيا خرچ اومني ادا ڪندي هئي، جڏهن ته سندن ڪتن جو گوشت ۽ هيٽر توڙي لانڊري جا بل به جعلي اڪائونٽس مان ادا ڪيا ويندا هئا.
ڏيپلو:رليف راشن بيگ نھ ملڻ خلاف ڳوٺاڻن جو احتجاج ڪري روڊ بلاڪ
ڏيپلو(ن پ ا)رليف راشن بيگ نه ملڻ خلاف ڳوٺاڻن آنٻو ڀيل، ماووجي ڪولھي، نگو ڀيل، جانو زال مڪو ڪولھي، سامي زال نٿو، سامون زال ڪلو، مصران زال آنٻو ۽ٻين عورتن، وارثن سميت ڳوٺاڻن ٻئي ڏينهن به احتجاجي مظاهرو ڪندي روڊ بلاڪ ڪري ڇڏيو.
ڪوٽڙي ۾ ٽيون ٽي- 20 پاڪستان بلائينڊ ڪپ: چئني صوبن وچ ۾ مقابلا شروع
پهرين ميچ ۾ پنجاب بلائينڊ ٽيم پاران سنڌ جي ٽيم کي 213 رنسن جو ٽارگيٽ ڏئي ڇڏيو
پاڪستان ٽي ٽوئنٽي بلائينڊ ڪپ ٽورنامينٽ جو افتتاح ڪمشنر حيدرآباد پاران ڪيو ويو
ڪوٽڙي (ڌڻي بخش باريجو) ڪوٽڙي ۾ پاڪستان بلائينڊ ڪائونسل جي ڪوششن سان ٽيون پاڪستان بلائينڊ ٽي 20 سپر ليگ ٽورنامينٽ شروع ٿي ويو آھي. ٽورنامينٽ جي افتتاحي تقريب ۾ چئني صوبن جي ٽيمن شرڪت ڪئي. تقريب ۾ خاص مهمان طورڪمشنر حيدرآباد عباس بلوچ شرڪت ڪئي. ان موقعي تي تقريب کي خطاب ڪندي ڪمشنر حيدرآباد عباس بلوچ چيو ته اسپيشل نوجوانن لاء اهڙا راندين جا موقعا ٿيڻ تمام بهتر عمل آھي، اسين پنهنجي ڊويزن اندر اسپيشل رانديگرن لاء ٽورنامينٽ جو بهتر موقعا فراهم ڪنداسين. هن چيو ته ٽورنامينٽ بهتر اثر ڇڏيندو، حيدرآباد ڊيوزن جي اسپيشل رانديگرن لاء سندن نوڪري وارو مسئلو به حل ڪرايو ويندو. هن چيو ته اسپيشل رانديگرن جي گهڻائي آهي پر ڪوٽا صرف ٽي سيڪڙو رکيل آھي، ان جي باوجود سندن وس آهر مدد ڪرڻ جي ڪوشش ڪئي ويندي. ٽورنامينٽ جي پهرين مئچ ۾ پنجاب ۽ سنڌ جي ٽيمن ۾ مقابلو آهي، جنهن ۾ پنجاب پهريان بيٽنگ ڪندي 18 اورن ۾ چار رانديگرن جي آئوٽ ٿيڻ تي 212 رنسون ٺاهي ورتيون، جڏهن ته پنجاب جي ٽيم جي رانديگرن ۾ نثار علي 70 رنسون ٺاهيون ۽ محسن خان 65 رنسون ٺاهيون. سنڌ پنجاب جي 213 رنسن جي هدف لاءِ بيٽنگ ڪري رهي آهي.
ٺل ۾ پلاٽ جي تڪرار تان ليڊي هيلٿ ورڪر تي حملو، ايل ايڇ وي ۽ سندس ڀاءُ زخمي
ٺل ٿاڻي تي ليڊي هيلٿ ورڪر بُشريٰ آرائين جي فرياد تي حملي جو ڪيس داخل ڪيو ويو
ٺل(ن پ ا)ٺل جي باء پاس وٽ پلاٽ جي معامري تي آرائين ۽ کوسن وچ ۾ تڪرار ڪر کنيو آهي، جنهن ۾ لٺيون ۽ سروٽا لڳڻ سبب ليڊي هيلٿ سپروائيزر بشري آرائين ۽ ان جو ڀاء اڪرم آرائين زخمي ٿي پيا. ٺل ٿاڻي تي بشري آرائين جي فرياد تي اڳوڻي سيڪريٽري تعليم شفيق کوسو جي پٽ محمد خان کوسو ۽ ٻين مٿان اين سي داخل ڪئي ويئي آهي.
ننڍي کنڊ جي سدابهار گلوڪار محمد رفيع جي 93 سالگرهه ملهائي پئي وڃي
امرتسر ۾ جنم وٺندڙ محمد رفيع پنهنجي پهرين پرفارمنس 13 سالن جي عمر ۾ ڏني
محمد رفيع ننڍي کنڊ جي وڏين ٻولين، پنجابي، اردو، مراٺي، سنڌي ۽ ٻين ٻولين ۾ گيت ڳايا
ڪراچي (شوبز نيوز) ننڍي کنڊ جي سدابهار گلوڪار محمد رفيع جي اڄ 93 سالگرهه ملهائي پئي وڃي. 24 ڊسمبر 1924ع تي ڀارتي پنجاب امرتسر ۾ جنم وٺندڙ محمد رفيع پنهنجي پهرين پرفارمنس 13 سالن جي عمر ۾ ڏني، جڏهن ته هن بالي ووڊ ۾ پلي بيڪ سنگر طور 1944ع ۾پنهنجي ڪيريرئر جي شروعات ڪئي، جڏهن ته هن آل انڊيا ريڊيو تي پڻ ڳايو. محمد رفيع ننڍي کنڊ جي وڏين ٻولين، پنجابي، اردو، مراٺي، سنڌي. هنڌي ۽ ٻين ٻولين ۾ گيت ڳايا. شروعاتي ڪيريئر دوران هن بالي ووڊ جي ڪيترن ئي هدايتڪارن سان گڏ ڪم ڪيو، جڏهن ته بالي ووڊ جي هر ڪامياب فلم ۾ سندس گيت شامل ڪيا ويندا هئا. محمد رفيع ڀارت ۾ رڪارڊ 68 فلم فيئر ايوارڊن سان گڏ ڀارت جو قومي ايوارڊ ۽ پدما شري ڀوشن پڻ ماڻيو، جڏهن ته هن 55 ورهين جي عمر ۾ 31 جولاءِ 1980ع تي لاڏاڻو ڪري ويو.
نواز شريف جي مستقبل جو فيصلو ٿيڻ ۾ باقي ٿورو وقت
نواز شريف خلاف العزيزيه ۽ فليگ شپ ريفرنسز تي فيصلو اڄ جاري ڪيو ويندو، سيڪيورٽي هاءِ الرٽ
فيصلو جاري ٿيڻ کان اڳ وڏي انگ ۾ ليگي ڪارڪن اسلام آباد جي احتساب عدالت پهتل
اسلام آباد (رپورٽر) اسلام آباد جي احتساب عدالت طرفان نواز شريف خلاف العزيزيه ۽ فليگ شپ ريفرنسز تي محفوظ ڪيل فيصلو اڍائي وڳي تائين جاري ٿيڻ جا امڪان آهن. احتساب عدالت جو جج ارشد ملڪ طرفان فيصلو جاري ڪرڻ دوران نواز شريف جي عدالتي ڪمري ۾ موجود هجڻ جا امڪان آهن. فيصلو جاري ٿيڻ کان نواز ليگ جا ڪارڪن توڙي اڳواڻ وڏي انگ ۾ احتساب عدالت پهچي ويا آهن. فيصلي کان اڳ انتظاميا طرفان اسلام آباد ۾ سيڪيورٽي جا غيرمعمولي انتظام ڪيا ويا. واضح رهي ته اسلام آباد جي احتساب عدالت طرفان سُپريم ڪورٽ کان آخري مهلت ملڻ بعد العزيزيه ۽ فليگ شپ ريفرنسز تي فيصلو محفوظ ڪيو هو.
زرداري،بحريا ۽ اومني گروپن تي ملڪيتن جي خريد ۽ وڪري تي پابندي
سُپريم ڪورٽ آصف زرداري کي نوٽيس جاري ڪري ڇڏيا، 31 ڊسمبر تي جواب طلب
عدالتي حڪم تي جي آءِ ٽي رپورٽ جون ڪاپيز آصف زرداري ۽ اومني گروپ جي وڪيلن حوالي ڪيون ويون
لاهور (م ڊ) سُپريم ڪورٽ مني لانڊرنگ ڪيس ۾ جي آءِ ٽي طرفان رپورٽ پيش ڪرڻ بعد زرداري،بحريا ۽ اومني گروپن تي زمينن جي خريداري ۽ وڪري تي پابندي لڳائي ڇڏي آهي. سُپريم ڪورٽ لاهور رجسٽري ۾ ٻڌڻيءَ دوران جي آءِ ٽي جي رپورٽ جو جائزو وٺڻ بعد عدالت آصف زرداري کي نوٽيس جاري ڪندي جي آءِ ٽي رپورٽ تي 31 ڊسمبر تائين جواب ڏيڻ جو حڪم ڏئي ڇڏيو آهي. ٻڌڻيءَ دوران عدالت جي حڪم تي آصف زرداري ۽ اومني گروپن جي وڪيلن کي جي آءِ ٽي رپورٽ جون ڪاپيون ڏنيون ويون. چيف جسٽس ريمارڪس ڏيندي چيو ته لڳي ٿو ته اربين رپين جا کانچا آهن، معاف نه ڪنداسين، اومني گروپ وارن جي مڳي ختم ناهي ٿي، اهي اربين رپيا کائي ويا پوءِ به بدمعاشي ڪري رهيا آهن.
ڊرامو پيا ڪن ، ايم ڪيو ايم لنڊن توڙي پاڪستان هڪ آهن : مصطفيٰ ڪمال
ايم ڪيو ايم باني مهاجرن جا ٻچا کاڌا ، هاڻ کيس سياست ڪرڻ نه ڏبي
اسان جي ڪارڪنن تي حملا ڪيا پيا وڃن ، دهشتگردن جو مقابلو ڪنداسين
ڪراچي (رپورٽر) پي ايس پي سربراهه مصطفيٰ ڪمال جو چوڻ آهي ته ايم ڪيو ايم لنڊن ۽ پاڪساتن هڪ آهن ، هو الڳ هجڻ جو ڊرامو پيا ڪن . عباسي شهيد اسپتال ۾ ميڊيا سان ڳالهه ٻولهه ڪندي مصطفيٰ ڪمال چيو ته پي ايس پي جي ڪري شهر ۾ امن قائم ٿيو ،هاڻ سندن ڪارڪنن تي حملا ڪيا پيا وڃن ،تازو سندن ٻن ڪارڪنن کي شهيد ڪيو ويو ، ڪارڪنن جوقاتل ايم ڪيو ايم پاڪستان ٺاهيندڙن کي سمجهون ٿا ،اسان هر دهشتگردي جو مقابلوڪنداسين ڪنهن کان به ڊڄڻ وارا نه آهيون .هن چيو ته ايم ڪيو ايم جو باني سڀ کان وڏو دهشتگرد آهي هن مهاجرن جا ٻچا کاڌا کيس ڪڏهن به معاف نه ڪنداسين .
ڪراچي جي شاهه فيصل ڪالوني مان پوريل هٿيار هٿ
شهرين وٽ پوکڻ لاءِکڏا کوٽيا ته مشڪوڪ دٻا هٿ آيا،رينجرز کي اطلاع
دٻن مان ايس ايم جي جا 33 سئو رائونڊ ۽ 400 ڪارتوس هٿ ڪيا ويا
ڪراچي (رپورٽر) ڪراچي جي شاهه فيصل ڪالوني مان زمين ۾ پوريل هٿيار هٿ ڪيا ويا آهن .شاهه فيصل ڪالوني ۾ شهرين وڻ پوکڻ لاءِ کڏا کوٽيا ته انهن کي 15 مشڪوڪ دٻا هٿ آيا جنهن کانپوءَ رينجرز کي اطلاع ڏنو ويو .ريجنرز جو چوڻ آهي ته انهن دٻن مان ايس ايم جي جا 33 سئو رائونڊ ۽ رائفل جا 400 ڪارتوس هٿ ڪيا ويا آهن .
ساليانو نواب شبير چانڊيو لانگ رينج شوٽنگ مقابلو عبيد ابراهيم کٽي ورتو
اٺين لانگ رينج شوٽنگ مقابلي ۾ سردار جمال لغاري ٻي ۽ ميان رفيق 3 پوزيشن حاصل ڪئي
وڏو وزير مراد علي شاهه، اسپيڪر سراج دراني، نثار کهڙو، امتياز شيخ، مڪيش ڪمار چاولا خاص مهمان طور شريڪ
ميهڙ(رپورٽ: پاويل جوڻيجو) هر سال جيان هن سال به ايم پي اي نواب غيبي سردار چانڊيو ۽ برهان چانڊيو پاران نواب شبير احمد چانڊيو جي ياد ۾ اٺين لانگ رينج شوٽنگ جو مقابلو غيبي ديرو ڀرسان گڙتل واري علائقي ۾ ڪرايو ويو، جنهن ۾ ملڪ جي مختلف شهرن ۽ علائقن جي توبچين حصو ورتو. لانگ رينج شوٽنگ ۾ وڏي وزير سيد مراد علي شاهه، سنڌ اسيمبلي اسپيڪر آغا سراج دراني، پيپلز پارٽي سنڌ جي صدر نثار احمد کهڙو، صوبائي وزير امتياز شيخ مڪيش چاولا ۽ ٻين مهمان خاص طور شرڪت ڪئي. ان موقعي تي نواب شبير احمد چانڊيو اٺين لانگ رينج شوٽنگ جي مقابلي ۾ پهرين پوزيشن عبيد ابراهيم ٻئين، پوزيشن سردار جمال لغاري ۽ ٽئين پوزيشن ميان رفيق حاصل ڪئي. مقابلي جي فاتح ۽ شوٽنگ ۾ حصو وٺندڙ نوجوانن کي رائيفل ۽ شيلڊون انعام طور ڏنيون ويو. ايم پي اي نواب سردار احمد خان چانڊيو وڏي وزير سيد مراد علي شاهه کي رائيفل ۽ شيلڊ گفٽ طور پيش ڪئي. تقريب ۾ شهيد محترمه بينظير ڀٽو ۽ مرحوم نواب شبير احمد خان چانڊيو جي ايثال ثواب لاءِ دعا پڻ گهري وئي، جڏهن ته آيل مهمانن کي سنڌ جي ثقافت ٽوپي ۽ اجرڪ جا تحفا پڻ ڏنا ويا. اٺين لانگ رينج شوٽنگ مقابلي جي پروگرام ۾ ضلع ڪائونسل دادو جي چئيرمين اشرف خان سولنگي، سچوا چئيرمين عبدالمالڪ چانڊيو، پ پ شهيد ڀٽو اڳواڻ عنيد حسين جتوئي، رئيس قربان چانڊيو سميت ٻين سياسي سماجي شخصيتن وڏي انگ ۾ شرڪت ڪئي.
حيدرآباد: رينجرز آفيس ٻاهران دستي بم هٿ ڪيو ويو، علائقي کي ڪڙو
حيدرآباد (رپورٽر) حيدرآباد جي قاسم آباد واري علائقي مان رينجرز آفيس ٻاهران دستي بم هٿ ڪيو ويو آهي. قاسم آباد ۾ رينجرز جي آفيس ٻاهران شڪي ٿيلهو موجود هجڻ جو اطلاع ڏنو ويو، جنهن بعد بم ڊسپوزل اسڪواڊ پهچي آفيس جو معائنو ڪيو ۽ ٿيلهي مان دستي بم هٿ ڪيو ويو. اُن موقعي تي رينجرز اهلڪارن علائقي کي ڪڙو چاڙهي ڇڏيو ۽ رينجرز آفيس جي چوڌاري گاڏين جي اچ وڃ کي بند ڪيو ويو.
شام ۾ آمريڪي فوج جي موجودگي وڏي غلطي هئي: ايران
آمريڪي فوج جي موجودگي سبب شام ۾ عدم استحڪام پيدا ٿيو: ايران
تهران (ا ڊ) ايران چيو آهي ته شام ۾ آمريڪي فوج جي موجودگي وڏي غلطي هئي، جنهنڪري خطي ۾ عدم استحڪام پيدا ٿيو. پرڏيهي خابرو اداري موجب ايران جي پرڏيهي کاتي پاران آمريڪا جي شام مان فوج نيڪالي تي ردعمل ڏيندي چيو ته شام ۾ آمريڪي فوج جي موجودگي نه صرف وڏي غلطي هئي پر اها نظرياتي ڇڪتاڻ جو سبب پڻ بڻيل رهي. ترجمان موجب ايران پهرين ڏينهن کان شام ۾ آمريڪي فوج جي موجودگي جو مخالف هو، آمريڪي فوج جي موجودگي ڪنهن به صورت ۾ سٺو قدم قرار نٿو ڏئي سگهجي، انڪري سڄو خطو خطري هيٺ اچي ويو هو.
سنڌ هاءِ ڪورٽ طرفان عارف علوي جي صدر طور چونڊ خلاف درخواست ٻڌڻي جوڳي قرار، ڌُرين کي 1 جنوري تائين جواب ڏيڻ جو حڪم
سنڌ هاءِ ڪورٽ ۾ ٻڌڻي، درخواستگذار عظمت ريحان طرفان عارف علوي تي عدالتي رڪارڊ ۾ ٽيمپرنگ جو الزام مڙهيو
عدالت درخواست ٻڌڻي لاءَ منظور ڪندي وفاقي حڪومت ، اليڪشن ڪميشن ۽ ڌرين کان جواب طلب ڪري ورتو
ڪراچي ( ن پ ا ) سنڌهاءَ ڪورٽ عارف علوي جي ملڪ جي صدر طور چونڊ خلاف داخل درخواست ٻڌڻي لاءِ منظور ڪري ورتي آهي .عظمت ريحان نالي شهري سنڌهاءَ ڪورٽ ۾ درخواست داخل ڪرائي آهي جنهن ۾ هن موقف اختيار ڪيو آهي ته داڪٽر عارف علوي عدالتي رڪارڊ ۾ ٽيمپرنگ ڪئي آهي ۽ عدالتي رڪارڊ ۾ ٽيمپرنگ ڪندڙ شخص ملڪ جو صدر نٿو ٿي سگهي . درخواست گذار موقف اختيار ڪيو آهي ته سنڌ هاءَ ڪورٽ جو موجوده چيف جسٽس به عارف علوي خلاف حڪم نامو جاري ڪري چڪو آهي .ڊاڪٽر عارف علوي ٽرسٽ جو ڪو ٽرسٽي آهي .درخواست گذار جو چوڻ آهي ته ڊاڪٽر عارف علوي 1977کان عدالت ۾ هلندڙ ڪيس ۾ ٽي ڀيرا غلط حلف نامو جمع ڪرائي غلط بياني ڪئي آهي ،هن غلط دستاويز جمع ڪرائي هاڪس بي تي 18 سئو 10 ايڪڙ زمين حاصل ڪرڻ جي حوالي سان فيصلو پنهنجي حق ۾ ڏياريو .عدالت اهڙي درخواست کي فوري طور ٻڌڻ جوڳو قرار ڏيندي منظور ڪري ورتو آهي .عدالت ڌرين کان پهرين جنوري تائين جواب طلب ڪري ورتو آهي .درخواست ۾ وفاقي حڪومت ، اليڪشن ڪميشن ۽ ٻين کي ڌر بنايو ويو آهي .
انڌي انتقام جي آخري هڏڪي: مريم نواز جو عدالتي فيصلي تي ردعمل
اڍائي سالن جي ڊگهي انتقام جهڙي احتساب باوجود ڪرپشن ثابت ناهي ٿي: مريم نواز
لاهور ( م ڊ ) نوازشريف جي نياڻي مريم نواز احتساب عدالت جي فيصلي کي انڌو انتقام قرار ڏيندي چيو آهي ته هڪ کي شخص کي چوٿون ڀيرو سزا انڌي انتقام جي آخري هڏڪي آهي.
مريم نواز ٽوئيٽ ڪندي چيو ته اڍائي سالن جي ڊگهي انتقام جهڙي احتساب ۽ ٽن نسلن کي جاچڻ کانپوءِ هڪ ٽڪي جي به ڪرپشن ثابت نه ٿي، نه ڪڪ بيڪ ۽ ڪميشن ۽ نه ئي سرڪاري خزاني ۾ ردي برابر به خيانت ثابت ٿي.
مريم نواز چيو ته جيترا به فيصلا آيا، نوازشريف جي مرحوم والد جي ذاتي ڪاروبار جي حوالي سان آيا، انهن ۾ به ڪجهه نه مليو ته مفروضن تي سزائون ڏنيون ويون، اڄوڪو فيصلو نوازشريف جي امانت، سچائي ۽ ايمانداري تي هڪ وڌيڪ مهر آهي.
ٽوئيٽ ۾ مريم نواز چيو ته انشاء الله فيصلا ختم ٿي ويندا، نوازشريف جي سچائي ۽ مخالفن تي ظلم جو بار رهجي ويندو، جنهن کي اهي ڳوليندا وتندا، حڪومت، اختيار ۽ طاقت هوندا ئي ختم ٿيڻ لاءِ آهن، وقت ۽ حالتون تبديل ٿيندي دير ناهي لڳندي، ياد رکو، ظلم جڏهن وڌندو آهي ته مٽجي ويندو آهي.
نوشھروفيروز:نامياري سينئر قانوندان مير محمد سولنگي جي لاڏاڻي تي سوڳ.عدالتي ڪارونھوار بند
نوشھروفيروز(ن پ ا)ضلعي بار ايسوسئيشن نوشھروفيروز پاران مورو بار جي اڳوڻي صدر سينئر وڪيل مير محمد سولنگي جي لاڏاڻي تي نوشھروفيروز جي عدالت سميت ضلعي جي مڙني تعلقن مورو, ڪنڊيارو, ڀريا, محراب پور, جي عدالتن جو ڪاروهنوار معطل ڪيو ويو.ان موقعي تي ضلعي بار ايسوسئيشن جي صدر عبدالرحيم عباسي ۽ جنرل سيڪريٽري امتياز حسين ميمڻ پنهنجي اخبار سان ڳالهائيندي چيو ته مير محمد سولنگي ھڪ بهترين انسان ۽ قانوندان ھو ھن قانون جي بالادستي جي لاء وڏي جاکوڙ ڪئي. ھن ڪيترائي وڪيل تيار ڪيا جيڪي اڄ بي پھچ ماڻھن جا مسئلا حل ڪري رھيا آھن. ٻئي طرف محراب پور تعلقه بار جي صدر لطف اللھ سيال ۽ مورو جي سينئر وڪيل امداد حيدر سولنگي چيو ته مرحوم جي لاڏاڻي سان ھڪ خال پيدا ٿيو آھي. ھو سڄي زندگي ماڻھن جو ڀرجهلو رھيو ۽ وڪيل برادري جي حقن لاء پڻ آواز بلند ڪندو رھيو..