پيرجوڳوٺ(ن پ ا) پيرڳوٺ لڳ ڪارنهن معاملي تان فائرنگ، گوليون لڳڻ ڪري نوجوان سخت زخمي اسپتال منتقل،ان ڏس ۾ پيرڳوٺ لڳ ڳوٺ پيارو خان اڄڻ ۾ اڄڻ برادري جي ٻن ڌرين ۾ ڪارنهن معاملي تان ڇڪتاڻ ٿي جنهن ۾ هڪ ڌر طرفان فائرنگ ڪئي وئي جنهن جي نتيجي ۾ نوجوان مبارڪ اڄڻ سخت زخمي ٿي پيو جنهن کي ڳڻتي واري حالت ۾ خيرپور اسپتال منتقل ڪيو ويو جتي سندس حالت ڳڻتي واري ٻڌائي وڃي ٿي. ان ڏس ۾ ٻڌايو وڃي ٿو ته اڄڻ برادري جي دين محمد ۽ مبارڪ اڄڻ واري ڌرين ۾ ڪارنهن معاملي تان ڇڪتاڻ ٿي جنهن ۾ هڪ ڌر جي جوابدار فائرنگ ڪري ڄاڻايل نوجوان کي زخمي ڪيو.
پيرجو ڳوٺ ۾ڪارنهن معاملي تان ڇڪتاڻ،فائرنگ ۾ نوجوان مرڻينگ
ڳوٺ پيارو اڄڻ ۾ اڄڻ برادري جي هڪ ڌر ٻئي ڌر جي نوجوان مٿان فائرنگ ڪري ڏني
مبارڪ اڄڻ گولي لڳڻ سبب زخمي،ڳڻتي جو ڳي حالت ۾ اسپتال منتقل
ايف آءِ اي جي جاچ تي ڀروسو ناهي، جي آءِ ٽي سربراهه زرداري جو ڏوهي آهي: سعيد غني
ڪراچي(اسٽاف رپورٽر) مڪاني ادارن واري صوبائي وزير سعيد غني مني لانڊرنگ ڪيس جي جي آءِ ٽي سربراهه کي فوري طور هٽائڻ جو مطالبو ڪندي چيو آهي ته جي آءِ ٽي سربراهه آصف زرداري جو ڏوهي آهي، تڪراري شخص جي سربراهي ۾ ٿيندڙ جاچ ڪيئن شفاف ٿي سگهي ٿي؟. ڪراچي ۾ پريس ڪانفرنس ڪندي سعيد غني چيو ته پ پ جنهن ايف آءِ اي سربراهه تي بي اعتمادي ظاهر ڪئي، انهيءَ آفيسر جي اماڻيل نالن تي جي آءِ ٽي جوڙي وئي. سعيد غني چيو ته عام چونڊن دوران سموري آفيسرن کي هٽايو ويو پر ڊي جي ايف آءِ اي بشير ميمڻ کي نه هٽائڻ سمجهه کان ٻاهر هو. سعيد غني سوال ڪيو ته اصغر خان ڪيس ۾ ڪهڙي اڳڀرائي ٿي آهي، لڳي ٿو ته جي آءِ ٽي سربراهه کي نه هٽائڻ جو مقصد کانئس جعلي اڪائونٽس ڪيس جي جاچ ڪرائڻ هئي. هن چيو ته وزير اعظم جي صلاحڪار شهزاد اڪبر جي ڊي جي ايف آءِ ۽ ٻين سان ملاقات مان لڳي ٿو ته اهو سڀ حڪومت جي چوڻ تي ٿيو آهي.
قاضي احمد ڌرڻي ڪيس ۾ 20 آبادگارن جي ضمانت منظور
ڪمند جا اگهه لاءِ ڌرڻو هڻڻ تي 600 ماڻهن تي ڪيس داخل ٿيو
20 آبادگارن جي 20-20 هزار روپين عيوض ضمانت منظور
نوابشاهه (رپورٽر) سنڌ آبادگار بورڊ جي سڏ تي سورنھن ڊسمبر تي قومي شاھراھ تي لڳل آبادگارن جي ڌرڻي خلاف ضلعي انتظاميه آبادگارن جي خلاف قومي شاھراھ بند ڪرڻ تي قاضي احمد ٿاڻي تي ڪيس داخل ڪيو ويو ھو جنھن ۾ پنجيتاليھه نامزد جوابدارن سميت ڇھ سئو آبادگار شامل ھئاجن مان ڄاڻايل پنجيتاليھه جوابدارن مان سيد اظھرمقبول شاھ، اسدالله آرائين ،شاھمراد گبول، شريف انڙ، علي نواز انڙ، عبدالرزاق آرائين سميت 20 جوابدارن کي گذريل ڏينھن ڊسٽرڪٽ اينڊ سيشن ڪورٽ جي جج ظھور احمد ھڪڙو جي عدالت مان گرفتاري کان اڳ عبوري ضمانت جي درخواست سندن وڪيل سيد ناصرشاھ پاران داخل ڪئي وئي هئي جنھن تي سيشن جج ظھور احمد ھڪڙو ھر ھڪ جوابدار جي ويھ ھزار جي عيوض ضمانت منظور ڪندي اڄ جمعي جي ڏينھن پيش ٿيڻ جو حڪم جاري ڪيو جنھن کانپوء جوابدار اڄ جوابدارن جي ضمانت پڪي ڪئي وئي آھي.
مٺي ۾ سهولتن جي کوٽ وڌيڪ ٻن ٻارن جي حياتي کسي ورتي
سول اسپتال مٺي ۾ علاج هيٺ 2 ٻارڙيون فوت ٿي ويون ، 45 ٻارڙا داخل ، وارث پريشان
هلندڙ سال دوران 606 ٻارڙا فوت ٿي چڪا ، حڪومت سکڻن اعلانن کانسواءِ ڪي قدم نه کنيا
مٺي(رپورٽر) سول اسپتال مٺي ۾ خوراڪ جي کوٽ ۽ مختلف بيمارين وگهي وڌيڪ ٻه ٻارڙيون فوت ٿي ويون جنهن کانپوءِ هلندڙ مهيني دوران فوتي ٻارڙن جو انگ وڌي 39 ٿي ويو آهي جڏهن ته هلندڙ سال دوران فوت ٿيل ٻارڙن جو انگ 606 ٿي ويو آهي .فوتي ٻارڙن ۾ ڳوٺ ٻگهليار جي محبوب سميجو جي تازي ڄاول ٻارڙي ۽ ڳوٺ پٻي جي وانڊ جي رهواسي ڀاڻجي ڀيل جو تازو ڄاول ٻارڙو شامل، اسپتال ۾ هن وقت 45 ٻارڙا زير علاج آهن . سهولتن جي کوٽ سبب روز ٻاڙرا فوت ٿي رهيا آهن پر حڪومت ان طرف ڌيان ڏيڻ لاءِ تيار ناهي .
پي ايس ايل جا نشرياتي حق وڪرو ڪيا ويا،دلچسپي وٺندڙ سڀني اميدوارن جا ٿورائتا آهيون: احسان ماني
لاهور (اسپورٽس ڊيسڪ) پاڪستان ڪرڪيٽ بورڊ پي ايس ايل جي نشريات وارا حق وڪرو ڪري ڇڏيا. پي سي بي جي پڌرائي موجب نشرياتي ۽ لائيو اسٽريمنگ جي معاملا طئي ڪيا ويا آهن، ان حوالي سان ٻين تفصيلن تي غور ويچار ڪندي ميڊيا کي ڄاڻ ڏني ويندي.
پي سي بي موجب بلز ڪنسورشيم سان ٽن سالن جو معاهدو ڪيو ويو آهي، هن سال جي معاهدي سان بورڊ کي گذريل معاهدي جي ڀيٽ ۾ 358 سيڪڙو وڌيڪ پئسا ملندا.
هوڏانهن چيئرمين پي سي بي احسان ماني جو چوڻ هو ته هدف کان وڌيڪ حاصل ڪرڻ ۾ ڪامياب ٿيا آهيون، معاهدو ان ڳالهه جي شاهدي آهي ته شوقين اسپانسرز جي پي ايس ايل ۾ گهڻي دلچسپي آهي. هن چيو ته نشرياتي حقن ۾ دلچسپي وٺندڙ سڀني اميدوارن جا ٿورائتا آهيون.
حڪومت ۽ نيب جو ڳٺ جوڙ آهي، پ پ کي سيف الرحماني احتساب جو نشانو بڻايو پيو وڃي: بلاول جو ترجمان
وزير اعظم جي صلاحڪار جي جَي آءِ ٽي ميمبرز سان ملاقات ۽ هٿ ٺوڪين شاهدن کي گهرائڻ معنيٰ رکندڙ آهي: مصطفيٰ کوکر
سمجهه ۾ اچي ويو ته وزيرن جا بيان ئي نيب ۽ ايف آءِ اي جي جاچ جو بنياد آهي، موجوده ڪاررواين کي احتساب نٿو چئي سگهجي : جاري ڪيل بيان
ڪراچي (اسٽاف رپورٽر) پيپلز پارٽي جي چيئرمين بلاول ڀٽو زرداري جي ترجمان مصطفيٰ نواز کوکر چيو آهي ته حڪومت، نيب ۽ ايف آءِ اي جو ڳٺ جوڙ آهي، پ پ کي هڪ ڀيرو ٻيهر سيف الرحماني احتساب جو نشانو بڻايو پيو وڃي. ڪراچي مان جاري ڪيل بيان ۾ بلاول جي ترجمان چيو ته وزير اعظم جي صلاحڪار جي جَي آءِ ٽي ميمبرز سان ملاقات ۽ هٿ ٺوڪين شاهدن کي گهرائڻ معنيٰ رکندڙ آهي. هن چيو ته سمجهه ۾ اچي ويو ته وزيرن جا بيان ئي نيب ۽ ايف آءِ اي جي جاچ جو بنياد آهي، موجوده ڪاررواين کي احتساب نٿو چئي سگهجي. هن چيو ته سليڪٽيڊ وزير اعظم ۽ سندس ٽيم کي ڄيڪو وڻي ڪري، پ پ ميدان ۾ مقابلو ڪندي. بلاول جي ترجمان وڌيڪ چيو ته پ پ قيادت خلاف ميڊيا تي ڪوڙيون ڪهاڻيون نشر ڪرائڻ وفاقي وزيرن جو ڪارنامو آهي.
حيدرآباد ۽ سکر بجلي چوري ۾ اڳڀرا، قومي اسيمبلي ۾ تفصيل پيش
اسلام آباد (رپورٽ: ايم بي سومرو) حيدرآباد ۽ سکر ۾ سڀ کان وڌيڪ بجلي چوري ٿيڻ جو انڪشاف ٿيو آهي، پي ٽي آءِ ميمبر نزهت پٺاڻ جي سوال تي لکت ۾ جواب ڏيندي بجلي جي وفاقي وزير عمر ايوب خان ٻڌايو ته سال 2017-18 ۾ گوجرانوالا ڪمپني کانسواءِ ملڪ جون ٻيون بجلي ڪمپنين مليل هدف کان وڌيڪ لائين لاسز ڪيا. وفاقي وزير جواب ۾ ڄاڻايو ته حيدرآباد ڪمپني ۾ 29.9 سيڪڙو لائين لاسز سان گڏ 7.3 سيڪڙو بجلي چوري ٿي، جڏهن ته سکر 36.7 سيڪڙو لائين لاسز ۽ 6.9 بجلي چوري سان ٻئي نمبر تي رهيو. لاهور اليڪٽرڪ سپلاءِ ڪمپني 11.8 سيڪڙو بدران 13.8 سيڪڙو لائين لاسز ڪيا، جڏهن ته 2 سيڪڙو بجلي چوري ٿي. فيصل آباد ڪمپني مقرر هدف 10.2 سيڪڙو بدران 10.6 سيڪڙو لائين لاسز ڪيا، 0.4 سيڪڙو بجلي چوري ٿي. بجلي واري وزير لکت ۾ جواب ڏنو ته اسلام آباد ڪمپني ۾ 9.1 سيڪڙو لائين لاسز ٿيڻ سان گڏ 0.4 سيڪڙو بجلي چوري ٿي. عمر ايوب موجب ملتان ۾ 16.6سيڪڙو لائين لاسز، 1.6 بجلي چوري ٿي، پشاور ڪمپني 38.1 سيڪڙو لائين لاسز ڪئي، جڏهن ته 6.1 سيڪڙو بجلي چوري ٿي. وفاقي وزير موجب ڪوئيٽا بجلي سپلاءِ ڪمپني ۾ مقرر هدف 17.5 بدران 22.4 سيڪڙو لائين لاسز سان گڏ 4.9 سيڪڙو بجلي چوري ٿيڻ جي شڪايت ملي، جڏهن ته 2016-17 ۾ لاهور اليڪٽرڪ ۾ 2 سيڪڙو، گجرانوالا ۾ 0.2 سيڪڙو، فيصل آباد اليڪٽرڪ ۾ 0.4 سيڪڙو، اسلام آباد ۾ 0.4 سيڪڙو، ملتان ۾ 1.9 سيڪڙو پشاور اليڪٽرڪ ۾ 0.7 سيڪڙو، حيسڪو ۾ 8.0 سيڪڙو، سکر اليڪٽرڪ ۾ 8.2 سيڪڙو، ڪو.ٽا اليڪٽرڪ سپلاءِ ۾ 5.6 سيڪڙو بجلي چوري ٿي. جواب موجب سال 2015-16 ۾ لاهور اليڪٽرڪ سپلاءِ ڪمپني ۾ 2.1 سيڪڙو، گجرانوالا ۾ 0.6 سيڪڙو، فيصل آباد ۾ زيرو، اسلام آباد ۾ 0.4 سيڪڙو، ملتان ۾ 1.4 سيڪڙو، پشاور اليڪٽرڪ ۾ 1.9 سيڪڙو، حيسڪو ۾ 3.9 سيڪڙو، سکر اليڪٽرڪ ۾ 8.2 سيڪڙو ۽ ڪوئيٽا اليڪٽرڪ سپلاءِ ڪمپني ۾ 6.4 سيڪڙو بجلي چوري ٿي.
وفاق جي سنڌ ۾ رڳو 6 لک 60 هزار بيروزگار هجڻ جي دعويٰ
2016 کان 2018 تائين ملڪ ۾ بيروزگار ماڻهن جو تعداد با بت انگ اکر جاري نھ ڪيا ويا
اسلام آباد (بيورو رپورٽ) وفاقي حڪومت سينيٽ ۾ ملڪ اندر صوبي وار بيروزگارن بابت ويهن سالن جي سروي جا تفصيل پيش ڪري ڇڏيا آهن. سروي رپورٽ ۾ وفاقي حڪومت دعوي ڪئي آهي ته سال 2015 ع ۾ سنڌ صوبي اندر بيروزگارن جو ڪل تعداد 6 لک 60 هزار هو. تفصيل موجب مسلم ليگ (ن) جي سينيٽر چوڌري تنوير جي سوال جو لکت ۾ جواب ڏيندي شماريات جي وزارت پاران سينيٽ ۾ 1991ع کان 2015ع تائين بيروزگارن بابت ڪيل سروي جا صوبي وار تفصيل پيش ڪيا آهن. ڄاڻايل وزارت پاران لکت ۾ سينيٽ کي آگاھ ڪيو ويو آهي ته سنڌ صوبي ۾1991ع ۾ بيروزگارن جو تعداد 2 لک پنجاھ هزار، 1992ع ۾ 2 لک 70 هزار، 1993ع ۾ سنڌ ۾ بيروزگارن جو تعداد گھٽجي 1 لک 90 هزار تي پهتو. 1994ع ۾ سنڌ صوبي اندر بيروزگارن جو تعداد 2 لک 30 هزار، 1995 ۾ هڪ ڀيرو ٻيهر سنڌ ۾ بيروزگارن جو انگ گھٽجي 2 لک 10 هزار تي پهتو. جڏهن ته ڄاڻايل وزارت پاران 1996ع جا تفصيل نه ڄاڻايا ويا آهن. 1997ع ۾ سنڌ اند صرف 2 لک 20 هزار، 1998ع ۽ 2000ع ۾ ٿيل سروي موجب سنڌ اند ڪل بيروزگارن جو تعداد 2 لک 40 هزار، جڏهن ته 2002ع ۾ ٿيل سروي موجب بيروزگارن جو تعداد 4 لک 80 هزار، 2004ع جي سروي موجب سنڌ ۾ بيروزگارن جو تعداد 6 لک 10 هزار، 2006ع ۾ 5 لک 10 هزار، 2007ع ۾ 4 لک، 2008ع ۾ 3 لک 90 هزار، 2009ع ۾ 4 لک 40 هزار، 2010ع ۾ 5 لک 60 هزار، 2011ع ۾ 7 لک، 2013ع ۾ 7 لک 70 هزار، 2014ع ۾ 5 لک 80 هزار. سال 2015ع سنڌ صوبي اندر بيروزگارن جو ڪل تعداد صرف 6 لک 60 هزار هجڻ جي دعوي ڪئي وئي آهي. لکت ۾ ٻڌايو ويو آهي ته 2015ع کانپوءِ 2017ع ۾ ملڪ اندر بيروزگارن بابت ليبر سروي ڪئي وئي آهي جنهن جي رپورٽ کي مرتن ڪيو پيو وڃي. سينيٽ ۾ ڏنل جواب موجب، ملڪ ۾ بيروزگارن بابت ٿيل آخري سروي 2015ع موجب ملڪ اندر مجموعي طور تي بيروزگارن جو انگ 36 لک 20 هزار هو جن ۾ ڪي پي ڪي صوبي ۾ بيروزگارن جو تعداد 5 لک 10 هزار، پنجاب ۾ 23 لک 20 هزار، بلوچستان ۾ 1 لک 30 هزار بيروزگار هئا..
واٽر ڪميشن جو سکر ۾ واٽر سپلاءِ ۽ ڊرينيج اسڪيمون پبلڪ هيلٿ انجنيئرنگ کاتي کي منتقل ڪرڻ جو حڪم
هاڻي ڪو بهانو نه هلندو، ملازمن جي بدلين تي عمل ڪيو وڃي: امير هاني مسلم
واٽرسپلاءِ ۽ ڊرينيج اسڪيمن جي پبلڪ هيلٿ انجنيئرنگ کاتي ڏانهن منتقل ڪيو وڃي
سکر (رپورٽر) سنڌ واٽر ڪميشن جي سربراهه جسٽس رٽائرڊ امير هاني مسلم چيو آهي ته واٽرسپلاءِ ۽ ڊرينيج اسڪيمن جي پبلڪ هيلٿ انجنيئرنگ کاتي ڏانهن منتقلي ۽ ملازمن جي بدلي وارين هدايتن تي عمل ڪيو وڃي، ڪو به بهانو نه هلندو، اسڪيمن تي ڊيوٽي جوائن نه ڪندڙ ملازمن کي گهر وڃڻو پوندو ۽ کين ٽرمينيٽ ڪيو ويندو.
واٽر ڪميشن جي سربراهه اهڙيون هدايتون ڊي سي آفيس سکر ۾ سکر ۽ لاڙڪاڻو ڊويزنن جي اعليٰ انتظامي، لوڪل گورنمينٽ، پبلڪ هيلٿ انجنيئرنگ ۽ ٻين لاڳاپيل آفيسرن سان گڏجاڻي جي صدارت دوران ڪيون، جنهن ۾ سيڪريٽري پبلڪ هيلٿ انجنيئرنگ اينڊ رورل ڊولپمينٽ ڊپارٽمينٽ جمال مصطفيٰ سيد، سيڪريٽري لوڪل گورنمينٽ خالد حيدرشاهه ۽ ڪمشنر سکر/لاڙڪاڻو ڊويزن رفيق احمد ٻرڙو سميت سمورن ضلعن جي ڊي سيز، ايگزيڪيوٽو انجنيئرز پبلڪ هيلٿ، لوڪل گورنمينٽ آفيسرن، ميئر سکر بيريسٽر ارسلان اسلام شيخ، ميئر لاڙڪاڻو اسلم شيخ ۽ ٻيا شريڪ ٿيا.
اجلاس کي خطاب ڪندي امير هاني مسلم چيو ته آئوٽ سورسنگ خريداري ۾ ميونسپل کي فري هينڊ نه ڏينداسين، جيڪا به خريداري ٿيندي اُها ضلعي انتظاميه جي رضامنديءَ سان ڪئي ويندي ۽ زون وائيز آئوٽ سورسنگ ٿيندي ته جيئن بهتر نموني وجيلنس ٿي سگهي، هن چيو ته هو تمام جلد بخشاپور ويندو ۽ واٽرسپلاءِ اسڪيم جي غلط پلاننگ ۽ ڊزائننگ ڪندڙن جو حساب ڪتاب ٿيندو، ذميوار ماڻهن کان پئسا ڀرايا ويندا، جڏهن ته ٺل ۾ ڪروڙين رپيا ضايع ڪرڻ وارو معاملو نيب ڏانهن اماڻيو ويندو.
واٽرڪميشن جي چيئرمين ميئر سکر کان پڇاڻو ڪيو ته شهرين کي گندو پاڻي ٽريٽ ڪري پيئارڻ کان بهتر آهي ته پهريان اپ اسٽريم ۾ گندي پاڻي جو ڇوڙ روڪيو وڃي، اهڙي ڪا اسڪيم هن وقت تائين ڇونه ٺاهي وئي.
هن وڌيڪ چيو ته مرحليوار عمل وارو تاثر ختم ڪري ڇڏيو، ڌار نوٽيفڪيشن جي ضرورت ناهي، اسٽاف جِي منتقلي ۾ لوڪل گورنمينٽ پابند آهي، جيڪو ملازم اسڪيم تي ڪم نه ڪندو اُهو گهر ويندو ۽ اُن کي ٽرمينيٽ ڪيو ويندو. ميونسپلز ۾ 2-2 سئو ڪلارڪ آهن، جن جي جڳهه به ناهي اهي گهر ويٺي پگهارون جو مزو ماڻي رهيا آهن، اوور اسٽاف کي سرپلس پول ۾ وجهي استعمال هيٺ آڻڻو آهي
ڪراچي: حد دخلين خلاف ڪارروائي دوران مزاحمت، آپريشن روڪيو ويو پوليس اھلڪار واپس روانا
ڪالاپل ويجهو پوليس ۽ دڪاندارن وچ ۾ چڪريون، اهلڪارن تي پٿراءُ به ڪيو ويو
آپريشن سرڪلر ريلوي جو ٽريڪ خالي ڪرڻ لاءِ ڪيو ويو هو
ڪراچي(م ڊ ) ڪراچي ۾ سرڪلر ريلوي جو ٽريڪ خالي ڪرائڻ لاءِ ڪيل آپريشن سخت مزاحمت سبب روڪيو ويو، رهواسين ۽ دڪاندانن سان چڪرين دوران اهلڪارن تي پٿراءُ ڪيو ويو.
ڪالا پل ويجهو هزاره ڪالوني ۽ ڀرپاسي وارن هنڌن تان حد دخليون هٽائڻ لاءِ شهري انتظاميه پوليس جي مدد سان آپريشن شروع ڪيو ته کين سخت مزاحمت کي منهن ڏيڻو پيو.
حد دخلين خلاف آپريشن دوران پوليس سان دڪاندارن ۽ رهواسين جون چڪريون ٿيون، ان موقعي تي مڇريل ماڻهن اهلڪارن تي پٿراءُ به ڪيو، ڇڪتاڻ تيز ٿي وڃڻ جي نتيجي ۾ انتظاميه کي آپريشن روڪڻو پئجي ويو ۽ پوليس اهلڪارن سميت آپريشن دوران مقرر سموري عملي کي واپس سڏايو ويو، واضح رهي ته حد دخلين خلاف آپريشن سرڪلر ريلوي جو ٽريڪ خالي ڪرڻ لاءِ ڪيو ويو هو
ڊکڻ: معصوم نينگر مڇي جي تلاءُ ۾ ٻڏي فوت ٿي ويو
ڊکڻ (رپورٽر) معصوم نينگر مڇي جي تلاءُ ۾ ٻڏي فوت ٿي ويو، ڳوٺ ابن اوڍو ۾ 3ورهين جو معصوم نينگر ياسين اوڍو گهرن ٻاهران راند ڪندي مڇي جي تلاءُ ۾ ڪري پيو، واقعي واري هنڌ موجود ماڻهن نينگر کي ٻاهر ڪڍي نازڪ حالت ۾ اسپتال پهچائڻ جي ڪوشش ڪئي پر هن رستي ۾ ئي دم ڏنو.
نينگر جو لاش گهر پهچڻ تي ڪهرام مچي ويو ۽ علائقي ۾ سوک پکڙجي ويو، فوتي نينگر رتوديرو جو رهواسي هو، جيڪو مائٽن سان گڏ گهمڻ لاءِ ڊکڻ آيو هو.
مصري قبيلي ۾ ڪوڙ پڪڙڻ لاءِ گرم لوهه زبان تي رکڻ واري رسم اڄ تائين رائج
قاهره (دلچسپ نيوز) مصر جي هڪ قبيلي ۾ هن دور ۾ به قديم زماني جي رسم “بشعه” ذريعي ڪوڙ ۽ سچ جو فيصلو ڪيو وڃي ٿو. اتر اوڀر مصر جي بدوي قبيلي عياده ۾ ان رسم موجب شڪي همراهه کي ٽانڊن تي گرم ڪيل لوهي چمچي کي پنهنجي زبان سان چٽڻو پوي ٿو. جيڪڏهن شڪي همراهه ڪوڙو آهي ته سندس زبان سڙِ ويندي آهي، جڏهن ته معصوم (سچي) همراهه کي ان سان ڪجهه به ناهي ٿيندو.
تاريخ ۾ اها رسم قديم ميسوپوٽيميا ۾ به رائج هئي جيڪا تڏهن کان ئي هلندي پئي اچي. بدوي قبيلا سوين ورهين کان ان رسم تي عمل ڪندا پيا اچن ٿيا، پر عياده کانسواءِ ٻيا هڙئي قبيلا ان رسم تان هٿ کڻي ويا آهن. اردن ۽ سعودي عرب ۾ ان رسم تي پابندي آهي، پر مصر ۾ ان جي اجازت آهي.
آفريقي اسلامي ملڪ به ان رسم کي غير اسلامي سمجهن ٿا. بشع کي ڪوڙو پڪڙڻ وارو اوائلي اوزار به چيو وڃي ٿو.
5 لک رُپيا انعام رکيل بدنام ڌاڙيل منير ناريجو گرفتار
سي آءِ اي لاڙڪاڻو نئون ديرو ۾ ڪارروائي ڪري منير ناريجو کي گرفتار ڪيو
نئون ديرو(رپورٽر) نئون ديرو جي ڀرسان ڳوٺ عزت جي وانڍ تي لاڙڪاڻو جي سي آءِ اي پوليس جي ٽيم انچارج عبدالغفار شاهه جي اڳواڻيءَ ۾ گهر تي اوچتو ڇاپو هڻي سترهن ڪيسن ۾ پوليس کي گهربل نامي گرامي ڌاڙيل علي خان عرف ميرو ناريجو کي گرفتار ڪري وٽائنس بندوق ۽ ڪارتوس هٿ ڪري ورتا آهن ان سلسلي ۾ سي آءَ اي لاڙڪاڻو جي ٽيم انچارج غفار شاهه ٻڌايو ته علي خان عرف ميرو ناريجو مٿان سترهن کان مٿي ڪيس خيرپرو،شڪارپور،لاڙڪاڻوسميت ٻين ٿاڻن تي داخل ٿيل آهن جنهن جي انعام جي رقم پنج لک روپيا رکيل ان کي گرفتار ڪري ورتو ويو آهي هوڏانهن سي آءِ اي پوليس گرفتار ڪيل ڌاڙيل کي ڳجهي هنڌ تي رکي ڇڏيو آهي
پرڏيهي پاليسي پِنڊي کان پارليامينٽ منتقل ڪئي وڃي: رضا رباني
اسلام آباد(رپورٽر) اڳوڻي سينيٽ چيئرمين ۽ پيپيلزپارٽي اڳواڻ ميان رضا رباني جو چوڻ آهي ته قانون صرف سولين تي لاڳو ڇو ٿو ٿيئي .؟ جيڪڏهن ڪجهه ادارن وٽ احتساب جو پنهنجو نظام آهي ته پوءِ سياستدانن جو احتساب به سندن ساٿي ڪري سگهن ٿا .خبر آهي ته ملڪي پرڏيهي پاليس ڪٿي ٺهندي آهي، پرڏيهي پاليس کي پنڊي کان پارليامينٽ منتقل ٿيڻ گهرجي .هن اهڙن خيالن جو اظهار سينيٽ اجلاس دوران خطاب ڪندي ڪيو .سندس چوڻ هو ته ملٽري ،عدليه سميت سمورن ادارن جو احتساب ٿيڻ گهرجي ،ٻڌايو وڃي ته رياست مشرف جي مامري تي ڇو ڪمزور ٿي وڃي ٿي ،کيس ڪورٽ يا ملڪ ڇو نٿو آندو وڃي .؟ ڇا ڏهاري ۽ ڪرپٽ رڳو سياستدان آهن .؟ هن چيو ته ملڪي ادارا پنهنجن حدن ۾ رهڻ بدران هڪٻئي جي اختيارين کي اورانگهين ٿا جنهن سبب مسئلا پيدا ٿي رهيا آهن .هن چيو ته نيب کي مخالفن خلاف هٿيار طور استعمال ڪيو پيو وڃي .هن گهر ڪئي ته نيب چيئرمين جا اختيار گهٽ ڪيا وڃن .هن چيو ته وفاقي وزير چيو ته ڪجهه مسئلا اهرا آهن جيڪي پارليامينٽ ۾ نٿا ٻڌائي سگهجن ته پوءَ ڇا اسين موسم جو احوال ٻڌڻ لاءِ هتي ويٺا آهيون ،پارليامينٽ کي مان ملڻ گهرجي ،پارليامينٽ سمورن ادارن جي ماءُ آهي .هن چيو ته سياسي پارٽين کي ريموٽ ڪنٽرول ذريعي هلايو پيو وڃي ۽ فاروڊ بلاڪ ٺاهڻ جا ماضي ۾ به ڀيانڪ نتيجا نڪتا آهن .هن جو چوڻ هو ته ماضي ۾ جيڪي به زيادتيون ٿيون آهن انهن جي ازالي ۽ مستقبل ۾ انهن کي نه دهرائڻ لاءِ ٽرٿ ريڪنسليشن ڪميشن جڻن گهرجي .
خيرپور عدالت پاران پيش نه ٿيڻ تي اي ايس آءِ سميت ٽن جوابدارن جا وارنٽ جاري
خيرپور (رپورٽر) فورٿ سول جج بهادر علي مهيسر جي عدالت ٽنڊومستي ٿاڻي جي هڪ ڪيس ۾ مسلسل غير حاضر رهندڙ گواهن اي ايس آءِ ڪفايت الله ناريجو، غلام اڪبر جتوئي ۽ غلام قاسم جتوئي جا ناقابل ضمانت گرفتاري وارنٽ جاري ڪندي کين گرفتار ڪري عدالت ۾ پيش ڪرائڻ جو حڪم ڏئي ڇڏيو آهي.