لکي غلام شاھ(رپورٽ: فھيم حيدر منگي ) لکي غلام شاھ لڳ ڳوٺ قبوجامي واسي ڳوڙهاري عورت اميران زال ڪريمڻ انڍڙ کي رستم (بيسڪ هيلٿ سينٽر) ۾ پ پ ايڇ آء جي ڊاڪٽرياڻين پاران ويم ڪرڻ کان انڪار ،عورت کي سکر نيو پئي ويو تہ رستي ۾ رڪشي اندر ٻار کي جنم ڏنو ،متاثر عورت جي ماء مسمات سڪينا انڍڙ جو ٻار کڻي ڊاڪٽر اڳيان دانهون ڪيون پر اسپتال عملي عورت ۽ ٻار کي ٽريٽمينٽ ڏئي گهر روانو ڪري ڇڏيو ،متاثر عورت جي امڙ سڪينا انڍڙ ميڊيا ۽ ڊاڪٽر آڏو دانهيندي چيو تہ منهنجي ڌيء اميران کي 2 جاڙا ٻار هئا هڪ ٻار کي منهنجي ڌيء ڳوٺ ۾ ئي جنم ڏنو. جڏهن تہ ٻئي ٻار کي جنم ڏيارڻ لاء کيس رستم اسپتال رات جو کڻائي آيس .تہ رستم اسپتال ۾ موجود ڊاڪٽرياڻين ويم ڪرڻ کان انڪار ڪري ڇڏيو ،مجبور ٿي اسان پنهنجي نياڻي کي سکر منتقل پئي ڪيو .تہ رستي ۾ ڳوٺ صادق جي وانڍ وٽ ٻئي ٻار کي بہ چنگچي رڪشا ۾ جنم ڏنو ،جڏهن تہ رابطو ڪرڻ تي ڊاڪٽر منظور احمد چنو ٻڌايو تہ بلڪل اسان وٽ اهو ڪيس ٿيو هو. پر عورت جي حالت خراب هجڻ ڪري ڊاڪٽرياڻين ڪيس کڻڻ کان انڪار ڪيو هو ،پر عورت رستي ۾ ٻار کي جنم ڏنو. بعد ۾ عورت ۽ ٻنهي ٻارڙن جي سٺي نموني ٽريٽمينٽ ڪئي آهي 3 ڄڻا خطري کان ٻاهر آهن .
ڊاڪٽر جو علاج کان جواب، رستم ۾ عورت رڪشا ۾ ٻار ڄڻيو
ڳوٺ قبو حامي جي رهواسڻ اميران انڍڙ کي رستم بي ايڇ سي آندو ويو
ڊاڪٽرن عورت جو ويم ڪرائڻ بدران کيس واپس موٽائي ڇڏيو
ڪراچي جي مختلف علائقن ۾ گئس جو پريشر گهٽجي ويو،رڌ پچاءُ ۾ ڏکيائيون
ڪراچي (اسٽاف رپورٽر )ڪراچي جي مختلف علائقن ۾ گھريلو گيس جو پريشر گھٽجي ويو، رڌ پچاءُ ڪندڙ عورتون سخت پريشان، ان حوالي سان ڪالهه شام کان رات دير تائين خاص طور تي گلشن اقبال، سچل ڳوٺ، سفوران واري علائقي ۽ صدر جي ڪجهه علائقن ۾ گھريلو گيس جو پريشر معمول کان گھٽجي وڃڻ سبب رڌ پچاءُ وارين عورتن کي سخت ڏکيائي پيش آئي. ان سلسلي ۾ شهرين جو چوڻ آهي ته گيس جو پريشر معمول موجب آڻي تڪليفن کان بچايو وڃي.
حڪومت اچڻ وقت سعودي سان لاڳاپا سٺا نه هئا: شاهه محمود
شڪيل آفريدي جي بدلي عافيه جي آزادي جو ڳالهيون غلط آهن: پرڏيهي وزير
حڪومت سعودي عرب ۽ يو اي اِي سان لاڳاپا بهتر ڪري ورتا آهن
ملتان( م ڊ) پرڏيهي وزير شاهه محمود قريشي انڪشاف ڪيو آهي ته اسان جي حڪومت اچڻ وقت سعودي سان لاڳاپا سٺا نه هئا، جڏهن ته شڪيل آفريدي جي بدلي عافيه صديقي جي آزادي واريون خبرون بي بنياد ۽ ڪوڙيون آهن. ملتان ۾ ميڊيا سان ڳالهائيندي پرڏيهي وزير شاهه محمود قريشي جو چوڻ هو ته آءِ ايم ايف کي اسان شرطن ۾ لچڪ ڏيکارڻي پوندي، اسان کي گهڻيون ڏکيون حالتون مليون آهن، جڏهن اسان آياسين ته سعودي عرب سان تلخيون هلي رهيون هيون پر هاڻ سعودي حڪومت 3 ارب ڊالر پاڪستان کي ڏيڻ جو فيصلو ڪيو آهي. هن چيو ته متحده عرب امارات سان به گرم جوشي نه پئي وٺي وڃي پر عمران خان يو اي اِي جو دورو ڪيو ۽ انهن جو وفد هتي آيو، ڪم جي لاءِ جاءِ ڏٺي ۽ رپورٽ پيش ڪئي، ايندڙ هڪ کان 2 مهينن ۾ يو اي اِي جو سربراهه پاڪستان جو دورو ڪرڻ جي خواهش رکي ٿو، اِهو بهترين پرڏيهي پاليسي جو ثبوت آهي. پرڏيهي معاملن جي حوالي سان آئون اِهو چئي سگهان ٿو ته تبديلي اچي ناهي رهي پر اچي وئي آهي. پرڏيهي وزير جو چوڻ هو ته پاڪستان افغانستان ۾ امن جي لاءِ ڪوششون ڪندو رهندو، افغانستان گڏجي ويهڻ جو فيصلو ڪيو آهي پر اصل فيصلو اُتي جي عوام جو آهي ته ڇا هو گڏجي ويهڻ چاهي ٿي؟ آمريڪا به پنهنجي پاليسي تي نظرثاني ڪئي آهي ۽ شرطن کان سواءِ ڳالهين جو آغاز ڪيو آهي، طالبان جي ڪجهه ماڻهن کي ماحول سازگار بڻائڻ جي لاءِ آزاد ڪيو ويو آهي. هن چيو ته والاريل ڪشمير ۾ مسلسل ڀارتي جارحيت جاري آهي، پاڪستان ان مسئلي کي هر فورم تي کنيو، عمران خان يو اين جي سيڪريٽري جنرل سان به ڳالهيون ڪيون آهن هو ڪشميرين جي حق خود اراديت جي لاءِ پنهنجو ڪردار ادا ڪري ۽ وادي ۾ انساني جي سنگين ڀڃڪڙين کي روڪيو وڃي.
ڀڄي ناهيان ويو، نياڻين سان ملڻ آمريڪا ۾ آهيان: خواجه آصف
اسلام آباد (م ڊ) اڳوڻي وفاقي وزير ۽ مسلم ليگ ن اڳواڻ خواجه آصف پرڏيهه ڀڄي وڃڻ جي افواهن کي بي بنياد قرار ڏيندي چيو آهي ته مان پنهنجي نياڻين سان ملاقات لاءِ آمريڪا ۾ آهيان ۽ جلد ئي وطن واپس اچي ويندس. هڪ خانگي ٽي وي چئنل سان ڳالهائيندي خواجه آصف چيو ته مان هن وقت آمريڪا ۾ موجود آهيان جتي پنهنجي نياڻين سان ملڻ لاءِ آيو آهيان. هن چيو ته ميڊيا تي هلندڙ خبرون بي بنياد آهن ۽ جلد ڏيهه واپس اچي رهيو آهيان. افواهه آهن ته نيب جي گرفتاري کان بچڻ لاءِ خواجه آصف ٻن هفتن کان پرڏيهه ۾ ترسيل آهي.
پي ٽي آءِ ”نو ايڪشن ٽاڪ اونلي“ واري سرڪار آهي: احسن اقبال
نارروال (م ڊ) ن ليگ اڳواڻ احسن اقبال تحريڪ انصاف حڪومت کي ”نو ايڪشن اونلي ٽاڪ“ واري سرڪار قرار ڏئي ڇڏيو آهي. وزيراعظم عمران خان جي خطاب تي ردعمل ڏيندي اڳوڻي وفاقي وزير چيو ته عمران خان 3 سئو ڏينهن کانپوءِ به اها ئي تقرير ڪندو، ڀلي سڄي اپوزيشن سان جيل ڀري ڇڏيو، تڏهن به اهي ڊيليور نٿا ڪري سگهن ڇو ته حڪومت وٽ نظريو، صلاحيت ۽ روڊ ميپ ناهي. سندس چوڻ هو ته هن حڪومت 125 ڏينهن ۾ گذريل 10 سالن کان وڌيڪ مهانگائي ڪئي آهي ۽ معيشت جو ڦيٿو جام ڪري ڇڏيو آهي، اهي ن ليگ جا منصوبا پنهنجي کاتن ۾ وجهي حڪومت هلائڻ جي ڪوشش ڪري رهيا آهن.
ٽنڊي آدم ويجھو ٽرڪ جي ٽڪر ۾ نينگر فوت
ٽنڊوآدم ( نمائندو ) ٽنڊوآدم حيدرآباد روڊ تي ڳوٺ غازي خان ڪاتيار وٽ تيز رفتار ٽرڪ جي ٽڪر م 8 سالا ٻاررو شڪيل پٽ محمد شريف ڪاتيارٿڏي تي فوت ٿي ويو لاش تعلقه اسپتال آڻڻ بعد ضروري ڪارروائي بعد وارث لاش ڳوٺ غازي خان ڪاتيار کڻائي ويا ٻارڙي جو لاش گهر پهچڻ تي قهرام مچي ويو سٽي پوليس ٽرڪ ڊرائيور گلباز کي گرفتار ڪري ورتو آهي
ڏانئڻ غربت هڪ وڌيڪ حياتي کسي ورتي، ماتلي ۾ عورت جو آپگهات
ماتلي(ن پ ا) ماتلي ۾ ڏانئڻ غربت هڪ وڌيڪ هوا ڄائي کان حياتي کسي ورتي. ماتلي جي ڳوٺ مونڌرو ڪولھي ۾ ناري نيلان ڪولھڻ ڳچيءَ ۾ رسو ٻڌي آپگهات ڪري ڇڏيو. اطلاع تي پوليس پهچي عورت جو لاش اسپتال منتقل ڪيو، جتان ضروري ڪارروائي کانپوءِ وارثن حوالي ڪيو ويو. رابطو ڪرڻ تي ناري جي وارثن ٻڌايو ته نيلان جي 2 سال اڳ پرتاب سان شادي ٿي، غربت سبب زال مڙس وچ ۾ سدائين جهيڙو ٿيندو رهندو هو.
لاش تي سياست فواد چوڌري ئي ڪري سگهي ٿو: مريم اورنگزيب
عمران ٻن پيشين تي ڪاوڙجي پيو، 165 ڀيرا پيش ٿئي ها ته آپگھاتي حملو ڪري ها
لاهور (م ڊ) مسلم ليگ ن جي ترجمان مريم اورنگزيب چيو آهي ته فوت ٿيل ماڻهو بابت اهڙو بيان بيمار ذهنيت ۽ بي حسي جي انتها آهي، لاش تي سياست فواد چوڌري ئي ڪري سگهي ٿو،. فواد چوڌريءَ جي بيان تي رد عمل ظاهر ڪندي مريم اورنگزيب چيو ته لاش تي سياست فواد چوڌري ئي ڪري سگهي ٿو، اهڙي قسم جو بيان بيمار ذهنيت ۽ بي حسي جي انتها آهي. هن چيو ته عمران خان صاحب ٻن پيشين تي پنهنجي وڪيل کي ڇنڊ پٽي، جيڪڏهن کيس 165 ڀيرا پيش ٿيڻو پوي ها ته آپگهاتي حملو ڪري ها. سندس چوڻ هو ته ميان جاويد جي لاڏاڻي تي عوامي تنقيد کان بچڻ لاءِ ڦڙتيون ڏيکاريون پيون وڃن، نيب کي ڪنهن فرد جي سماجي رتبي، عزت، بيماري ۽ زندگي سان ڪا به دلچسپي ناهي. مريم اورنگزيب چيو ته شهباز شريف لاءِ ميڊيڪل بورڊ جي تجويز تي مجرماڻي دير ڪئي وئي، نيب طرفان ميڊيڪل بورڊ جي رپورٽ ڏيڻ ۾ ڄاڻي ٻجهي دير ڪئي وئي، اهو رويو ڪينسر مان صحتياب ٿيل مريض بابت اختيار ڪيو پيو وڃي، بار بار نيب کي درخواست ڪئي وئي، ٻن کان اڍائي هفتن جي دير جو جواب ڪير ڏيندو. مسلم ليگ ن جي ترجمان چيو ته جيل کاتي جي بي حسي جو رويو نهايت افسوس جوڳو ۽ مذمت جوڳو آهي، احتساب جي نالي تي انتقامي روين جي افسوس جوڳي تاريخ نه لکي وڃي
چڪ ۾ وچ شهر مان هٿياربند واپاري کان لکين رپيا ڦر ڪري فرار
لکي غلام شاھ(رپورٽ فھيم حيدر منگي ) چڪ شھر جي مين بازار ۾ ٽي نامعلوم هٿياربند هندو واپاري پرائمري استاد پريم چند جي ڪريانا اسٽور تي چڙھائي ڪري دوڪاندارمٿان هٿيارسڌا ڪري ورتا .دوڪاندار کان روڪ رقم ڦر ڪري هٿياربند موٽرسائيڪل تي چڙھي فرارٿي ويا .هندو واپاري کان ڦر جي اطلاع تي چڪ پوليس ۽ سوين شھري پهچي ويا .پوليس ۽ واپاري وچ ۾ بند ڪمري ۾ ڳالهيون پوليس واپس ٿي.آخري اطلاعن تائين هندو واپاري کان ٿيل ڦر جوپتو پئجي نہ سگهيو نہ ئي ڪيس داخل ڪيو ويو .ٻئي طرف وچ شھرمان ٿيل ڦرواقعي جي شھرين پاران سخت لفظن ۾ مذمت ڪندي چيو ته چڪ پوليس کان ڦرٿيل رقم واپس ڪرائڻ جو مطالبو ڪيو.
پاڻي ڪميشن سربراهه جسٽس(ر) امير هاني مسلم جيڪب آباد پهتو، منصوبن ۾ دير تي عملدارن کي ڇنڊ
تلائن جي ڀڪن ۾ سيمو،انجنيئر ناھيان پر عقل آهي ته هي سڀ ناقص ڪم ٿيل آهي: هاني
امير هاني مسلم ڊي سي، ميونسپل چيئرمين ۽ ٻين کي 29 ڊسمبر تي ڪراچي گھرائي ورتو
جيڪب آباد (ن پ ا) واٽر ڪميشن جي سربراهه جسٽس(ر) امير هاني مسلم جيڪب آباد جي پاڻي منصوبن ۾ ناقص مٽيريل استعمال ۽ ڪوتاهين تي ٺيڪيدار سميت سموري عملدارن کي ڪراچي گهرائي ورتو آهي.
جسٽس رٽائرڊ امير هاني مسلم جيڪب آباد پهچي کير ٿر تي تلائن جو دورو ڪيو، جنهن دوران آبپاشي سيڪريٽري جمال شاھ، مڪاني ادارن واري سيڪريٽري خالد حيدر شاھ ٻين ساڻس گڏ هئا.
امير هاني مسلم آڏو رهواسين شڪايتون ڪيون ته تلائن جي ڪم ۾ ناقص مٽيريل استعمال ڪيو پيو وڃي، جنهن سبب ڀڪون سيمو ڪري رهيون آهن، جنهن تي جسٽس (ر) امير هاني مسلم عملدارن تي ڪاوڙ جو اظهار ڪندي چيو ته مان انجنيئر ناهيان، پر ايترو عقل آهي ته هيءَ ناقص مٽيريل استعمال ٿيڻ جو نتيجو آهي.
جسٽس(ر) امير هاني مسلم پاڻي منصوبي سان لاڳاپيل ، ٺيڪيدار، ڪنسلٽنٽ، آفيسرن سميت ڊي سي جيڪب آباد ۽ ميونسپل ڪميٽي جي چيئرمين کي 29 ڊسمبر تي ڪراچي طلب ڪري ورتو آهي.
پاڪستان جي سڀ کان ڊگهي شخص نصير سومري جي حالت لاڳيتي خراب
ڪراچي (اسٽاف رپورٽر ) پاڪستان جو ڊگھو شخص نصير سومرو ساھ جي بيماري سبب 4 ڏينهن کان ڪراچي جي دارالصحت اسپتال ۾ وينٽيليٽر تي پيل آهي. سندس ڀاءُ رياض سومرو جو چوڻ آهي ته انفيڪشن ۽ ساھ جي تڪليف سبب اسپتال داخل ٿيل نصير سومري جي عيادت يا آٿت ڏيڻ لاءِ ڪو به چونڊيل نمائندو ناهي پهتو. نصير سومرو جي ڀاءُ چيو آهي ته 4 ڏينهن کان نصير سومرو وينٽيليٽر تي پيل آهي.
پيپلزپارٽي هميشه عورتن جي حقن لاءِ جدوجهد ڪئي آهي: شهلا رضا
ننڍي ڄمار جي شادين جي حوالي سان قانون جي عملداري لاءِ ڪارروائي ڪئي پئي وڃي
ميرپورخاص (بيورورپورٽ) صوبائي وزير وومين ڊيولپمنٽ شهلا رضا چيو آهي ته پيپلزپارٽي هميشه عورتن جي حقن جي تحفظ ۽ برابري واري حقن لاءِ جدوجھد ڪئي آهي پيپلزپارٽي عورتن تي تشدد ۽ سندن حقن جي حق تلفي ڪندڙن خلاف سخت قانوني سازي ڪئي آهي ۽ شهيد راڻي بينظير ڀٽو عورتن جي حقن جي علمبردار رهي آهي شهيد راڻي جي عورت جي حقن جي فلسفي کي اسين اڳتي کڻي هلي رهيا آهيون اهڙن خيالن جو اظهار هن ميرپورخاص ۾ وومين اينڊ چائيلڊ پروٽيڪشن سيل ۽ وومين ٿاڻي جي دوري دوران ڳالهائيندي ڪيو. انهي موقعي تي ڊي آئي جي ميرپورخاص ثاقب اسماعيل ميمڻ، ايس ايس پي عابد بلوچ ۽ ٻيا پوليس عملدار موجود هئا. هن چيو ته عورتن ۽ ٻارن تي تشدد جي واقعن کي ڪنهن به صورت ۾ برداشت ن ڪيو وينديو ۽ ننڍي عمر ۾ شادين جي حوالي سان پاس ٿيل قانون جي ڀڃڪڙي ڪندڙن خلاف قانون مطابق سخت ڪاروائي ڪئي پئي وڃي. انهي موقعي هن ڊي آئي جي ۽ ايس ايس پي ميرپورخاص کي هدايتون ڏيندي چيو ته عورتن ۽ ٻارن تي تشدد، ننڍي عمر ۾ شادين ۽ عورتن کي حراسان ڪرڻ وارن واقعن ۾ ملوث جوابدارن خلاف سخت ڪاروائي ڪئي وڃي. انهي موقعي تي ڊي آئي جي ۽ ايس ايس پي ميرپورخاص صوبائي وزير کي عورتن ۽ ٻارن تي تشدد، عورتن کي جنسي حراسان ڪرڻ وارين شڪايتن، ڪيسن ۽ پوليس پاران ڪيل ڪاروائي جي حوالي سان بريفنگ ڏني.
حيدرآباد ۾ 18 ڏينهن اڳ حادثي ۾ زخمي ٿيل لاوارث نينگر فوت
حيدرآباد (رپورٽر) حيدرآباد جي حسين آباد ٿاڻي جي حد ۾ آٽو ڀان روڊ تي 18 ڏينهن اڳ حادثي ۾ زخمي ٿيل نامعلوم نينگر سول اسپتال حيدرآباد جي آء سي يو ۾ فوت ٿي ويو آھي. راهگيرن کيس سول اسپتال ۾ داخل ڪرايو هو پر سندس وارثن جو پتو پئجي نه سگهيو و. هو 18 ڏينهن آء سي يو ۾ رهيو جتي اڄ فوت ٿي ويو. سندس لاش سول اسپتال جي مرده خاني ۾ رکيو ويو آھي. لاڳاپيل پوليس به اسپتال انتظاميه جي باربار رابطي جي باوجد ان نينگر جي ڪا واهر نه ڪئي.
ڊي سي سان منهن ماري ڪرڻ تي بدين پوليس واپاري کي کنڀي وئي
روڊ خالي نه ڪرڻ تان اهلڪارن شوروم مالڪ جون گاڏيون هٽايون ته منهن ماري ٿي
اهلڪار شعيب ڀرڳڙي کي شوروم جي گاڏين سميت کنڀي کڻي ويا، واپارين جو احتجاج
بدين ( رپورٽ: حميد سومرو) ڊي سي سان منهن ماري ڪرڻ تي بدين پوليس واپاري کي کنڀي وئي. ان سلسلي ۾ ڊپٽي ڪمشنر بدين ڊاڪٽر حفيظ احمد سيال ريلوي فٽ بال گرائونڊ تي گندي پاڻي ۾ بيٺل گاڏي ڪڍرائڻ واري ڪم جو معائنو ڪرڻ کان پوء وڃي رھيو ھو ته اسٽيشن روڊ تي حد دخلين سبب رستو نہ ملڻ تي پوليس اھلڪارن شوروم جي گاڏين کي روڊ تان ھٽائڻ شروع ڪيو ان دوران شوروم مالڪ شعيب ڀرڳڙي مزاحمت شروع ڪئي ان تي ڊي سي ء شوروم وارن م منھن ماري کان پوء پوليس شعيب ڀرڳڙي کي گرفتار ڪري کڻي وئي بعد ۾ پوليس جو 4 موبائیلن سان ميونسپل ۽ روينيو عملدارن اسٽيشن روڊ تي آپريشن ڪري ممتاز انصاري شعيب ڀرگڙي اسماعيل پٺاڻ ء ٻين جي شورومن جون بيٺل گاڏيون کڻي ويا آپريشن کان پوء واپارين دڪان بند ڪري ڇڏيا جڏھن ته گرفتار واپاري خلاف خبر لکڻ تائين ڪيس داخل نہ ٿيو ھو انهي کان اڳ واٽر سپلائي انچارج مرتضى خاصخيلي ۽ مختيارڪار بدين اڪرم ڪنڀار وچ ۾ سخت منهن ماري ٿي پئي جنهن تي تپيدار اسماعيل ميمڻ وچ ۾ پئي جهيڙو ٽاريو.
شيخ اياز عالمي سطح جو شاعر ۽ مفڪر قرار،کيس سنڌ تائين محدود نه ڪرڻ گهرجي:اياز ميلو
هن سنڌ کي پنهجي فڪر ۾ سمايو ،اتي ئي هن عالمي امن ۽ ڀائيچاري جي ڳالھ پڻ ڪئي :عطيه دائود
حيدرآباد(بيورو رپورٽ)ليکڪن، اديبن، شاعرن ۽ مصورن چيو آهي ته شيخ اياز جو فڪر ۽ فلسفو عالمي آھي، سندس فڪر کي رڳو سنڌ تائين محدود نه ڪرڻ گهرجي .شيخ اياز جتي سنڌ کي پنهجي فڪر ۾ سمايو آھي اتي ئي هن عالمي امن ۽ ڀائيچاري جي ڳالھ پڻ ڪئي آھي. سندس نظر ۾ مظلوم طبقو اهم ھو، انڪري ئي سندس گيتن جي گونجار مان مٽي جي مهڪ اچي ٿي.
حيدرآباد جي سرد هوائن ۾ منعقد ٿيل اياز ميلي جي ٻي ڏينهن تي “حلقه ميري زنجير ڪا، اياز ۽ فهميده رياض” جي موضوع تي ٿيل هڪ ويهڪ ۾ ناليواري شاعره ۽ فهيمده رياض جي دوست عطيه دائود ڳالهائيندي چيو ته فهميده ۽ اياز جي اندر ۾ معصوم ٻار هو، انهن جون تخليقون ياگار آهن. هن چيو ته شاعر ۽ اديب قومن جا ترجمان هجن ٿا ۽ هنن ٻنهي شخصيتن پاڻ ملهايو، هن چيو ته آئون ڳوٺاڻي ڇوڪري هوندي به فهميده کان سنڌي ٻولي سکندي هئس، اياز ۽ فهميده پڙهڻ جا ديوانا هئا.
ناليواري اديب مدد علي سنڌي چيو ته اياز پهرين اردو ۾ شاعري ڪندو هو، پهرين سندس اردو مجموعو ئي مارڪيٽ ۾ آيو هو، اياز ورهاڱي وقت پريشان هو، چوندو هو ته سنڌي شاعري ڪنهن جي لاءِ ڪيان، ڪير پڙهندو؟جنهن تي محمد ابراهيم جويي کيس سنڌي شاعري ڪرڻ لاءِ آماده ڪيو ۽ کيس چيو ته هڪ ڏينهن توکي سنڌيءَ وڏو شاعر ڪري مڃيندا.
هن چيو ته اياز جي ترجمي ۾ فهيمده سنڌي لفظ شامل ڪري ڪمال ڪيو آهي، فهيمده عورتن جي جذبن کي سمجهندڙ شاعره آهي، هن بلوچستان وڃي انقلاب لاءِ وڙهندڙ نوجوانن کي ڏسڻ ٿي چاهيو.
انيس هارون اياز ۽ فهيمده جي جدوجهد تي ڳالهائيندي چيو ته آئون ميلو سجائڻ تي منتظمين کي مبارڪ باد ڏيان ٿي، فهيمده رياض جي آئون واحد دوست هئس، جنهن مونسان موڪلاڻي واري ڏينهن به ڳالهايو هو. هن چيو ته فهيمده سنڌ جي ڌرتي جو سرمايو هئي، جنهن کي هتي دفنايو وڃي ها پر ڌيءُ جي خواهش تحت کيس لاهور ۾ دفنايو ويو. اسان هر گهڙي ۾ گڏ هيونسين. هن چيو ته شيخ اياز جذبن جو شاعر هو هن جا قومي گيت گهڻا مشهور ٿيا. فهيمده جي شاعري ۾ به بي باڪي هئي، هن کي دنيا جي پرواهه نه هئي،
. سيشن ۾ حسين مسرت ڳالهائيندي چيو ته هن سيشن جو مقصد فهيمده رياض کي ياد رکڻ آهي، جيڪا اڄ اسان سان گڏ ناهي، هن سيشن جي ماڊريٽر شبنم گل هئي، جنهن چيو ته سماج ۾ دوست وڏو سرمايو هوندا آهن، دوستن جي سوچ ۽ مشن به نسل در نسل منتقل ٿيندا رهن ٿا.