ڀٽ شاهه (رپورٽ: راجا بوزدار ) هالا ۾ سروري جماعت پاڪستان جي اجلاس چيئرمين اڳوڻي ايم اين اي مخدوم سعيد الزمان عاطف جي صدارت ۾ ٿيو ـ جنهن ۾ سروري جماعت جماعت جا نوان عهديدارچونڊيا ويا ـ اجلاس ۾ سروري جماعت جي اڳوڻن عهديدارن ـ ميمبرن ۽ خليفن وڏي انگ ۾ شرڪت ڪئي ـ منعقد ڪيل اجلاس ۾ سروري جماعت جي روحاني پيشوا ۽ تنظيم جي سرپرست اعليٰ مخدوم جميل الزمان جي منظوري سان مخدوم سعيد الزمان عاطف چيئرمين ـ سيد نور محمد شاهه سينيئر وائيس چيئرمين ـ 5 وائيس چيئرمينن ۾ ميان مشتاق ڊوگر (پنجاب ) ـ پير عبدالرزاق ( بلوچستان ) ـ پير ڪوڙل شاهه ـ پير امجد شاهه ـ سرفراز راڄڙ مقرر ڪيا ويا ـ جڏهن تـ جنرل سيڪريٽري پير منصور ـ ايڊيشنل جنرل سيڪريٽري پير ضياءَ الحق ـ ڊپٽي جنرل سيڪريٽري انور ميمڻ ـ سيڪريٽري نشر اشاعت گل حسن درس ـ سيڪريٽري ماليات الهه رکيو ڏاهري ـ سيڪريٽري روزگار شبير راڄپر ـ سيڪريٽري صحت حميد چانهيون ـ سيڪريٽري تعليم ايوب ڪورائي کي اتفاق راءِ سان چونڊيو ويو ـ جڏهن تـ فيصلو ڪيو ويو تـ مرڪز جا وڌيڪ عهديدار بعد ۾ چونڊيا ويندا.
تحريڪ انصاف جي حڪومت 4 ووٽن تي بيٺل آھي، سندن خلاف به جي آءِ ٽيز ٺهڻ واريون آهن:راڻا ثناءُ الله
نوازشريف خلاف فيصلي ۾ ڪٿي به ڪميشن يا ڪرپشن جو ذڪر ناهي ڪيو ويو
نااهلي لڪائڻ لاءِ قيادت تي الزام هنيا پيا وڃن، حڪومت رڳو 4 ووٽن تي بيٺل آهي
اسلام آباد (م ڊ) مسلم ليگ ن جي سينيئر اڳواڻ ۽ پنجاب جي اڳوڻي صوبائي وزير راڻا ثناءُ الله چيو آهي ته نوازشريف خلاف فيصلي ۾ ڪٿي به ڪميشن يا ڪرپشن جو ذڪر ناهي، پي ٽي آءِ وارن خلاف به جي آءِ ٽيز ٺهڻ واريون آهن، اسلام آباد ۾ ميڊيا سان ڳالهائيندي راڻا ثناءُ الله چيو ته نوازشريف تي الزام آهي ته هن پٽ کان پئسا ڇو ورتا؟، فيصلي ۾ ڪرپشن جو ناهي چيو ويو، عدالتن جو احترام ڪريون ٿا، اسانکي پهرين به عدالت مان رليف مليو آهي، هن چيو ته پارليامينٽ ۾ حڪومت وٽ 156 ووٽ آهي، حڪومت رڳو 4 ووٽن جي سهاري تي بيٺل آهي، ٻڌايو وڃي ته هڪ رات ۾ 100 ارب ڪنهن ڪمايا، ريلوي جي آڊٽ پيرا شهبازشريف ڏسندو، هن چيو ته شهبازشريف جي 10 سالن جي حڪومت ۾ رپئي جي ڪرپشن جو الزام نٿو لڳائي سگهجي، شهبازشريف 100 ارب ۾ ٽي ميٽرو منصوبا مڪمل ڪرايا. وزير پنهنجي نااهلي لڳائڻ لاءِ اسان جي قيادت تي الزام هڻي رهيا آهن.
عابدي جو قتل وڏو سانحو آهي، دهشتگردن کي ٻيهر ڪر کڻڻ نه ڏبو: شهريار آفريدي
ڪراچي (رپورٽر) مملڪتي گهرو وزير شهريار آفريدي چيو آهي ته علي رضا عابدي جو قتل وڏو سانحو آهي، ڪراچي ۾ دهشتگردن کي ٻيهر ڪر کڻڻ نه ڏينداسين، ڪراچي ۾ مملڪتي گهرو وزير شهريار آفريدي ۽ وفاقي وزير علي زيدي گورنر عمران اسماعيل سان ملاقات ڪئي، گورنر کين علي رضا عابدي جي قتل واقعي ۾ ٿيل اڳڀرائي کان آگاهه ڪيو، ان موقعي تي مملڪتي گهرو وزير شهريار آفريدي ميڊيا سان ڳالهائيندي چيو ته قانون لاڳوڪندڙ ادارا گڏيل آپريشن ذريعي شرپسندن جي نيٽ ورڪ جو خاتمو آڻن،علي رضا عابدي جو قتل وڏو سانحو آهي، امن دشمن عنصرن خلاف سخت قدم کنيا وڃن، ڪراچي واسي پريشان نه ٿيو، حڪومت اوهان سان گڏ آهي، اسان کي هڪ ٽيم بڻجي دهشتگردي خلاف وڙهنداسين، ڪراچي سميت پوري پاڪستان کي پرامن بڻايو ويندو.
ملير جي جج جو ٿاڻي تي ڇاپو: وڪيل سڪندر شر بازياب: ھڙتال، عدالتي ڪارروائين جو بائڪاٽ
پوليس خلاف جمعي تائين احتجاج جاري رکڻ جو اعلان، عدالتي ڪارروائين جو بائڪاٽ ڪبو
ملير پوليس سڪندر شر کي گرفتار ڪري قانون جا بخيا اڊيڙي ڇڏيا آهن: ملير بار ايسوسيئيشن
ملير (رپورٽر(جوڊيشل مئجسٽريٽ نمبر 9 ملير آصف اڪبر شاھ لطيف ٿاڻي تي ڇاپو ھڻي باندي بنايل ملير بار جي نائب صدر سينيئر وڪيل سڪندر شر کي بازياب ڪرائي ورتو ۽ ايس ايڇ او شاھ لطيف کي رڪارڊ سميت سيشن ڪورٽ ملير طلب ڪيو،ان واقعي خلاف وڪيلن ملير ڪورٽ آڏو هاءِ وي تي احتجاجي مظاھرو ڪري ڌرڻو ھنيو.جنھن سبب ايندڙ ويندڙ ٽريفڪ معطل ٿي وئي.مظاھرين وڪيلن چيو ته شاھ لطيف پوليس بي ڏوھي وڪيل اڳواڻ کي ڪوڙي ايف آءِ آر داخل ڪري گرفتار ڪيو .جنھن کي عدالتي ڇاپي بعد بازياب ڪرايو ويو آھي.انھن چيو ته پوليس گردي ڪنھن به صورت قبول نه ڪئي ويندي ۽ ايس ايڇ او شاھ لطيف نيڪ محمد کوسو کي معطل ڪري سندس خلاف ڪاروائي ڪئي وڃي. ٻئي طرف ايس ايڇ او شاھ لطيف صحافين کي ٻڌايو ته پوليس لينڊ گريبر راجا آصف کي گرفتار ڪيو ھو جنھن تي ۲۵ ايف آء آر داخل آھن .انکي ڇڏائڻ لاء وڪيل رات جو شراب جي نشي ۾ ڌت ٿي ٿاڻي تي آيو ۽ پوليس سان بدتميزي ڪئي گھٽ وڌ ڳالھايو. جنھن کانپوءِ وڪيل اڳواڻ کي گرفتار ڪري ميڊيڪل ڪرايو ويو، ميڊيڪل رپورٽ ۾ پڻ نشو ثابت ٿيو آھي, هن چيو ت مون ڪو به غلط قدم نه کنيو آھي قانون جي دائري ۾ رھي قانوني ڪاروائي ڪئي آھي. ٻئي طرف ملير بار پاران واقعي خلاف ٽي ڏينهن هڙتال جو اعلان ڪيو آھي.
پشاور: وحشي صفت نوجوان پنھنجي والد، 3 ڀائرن ۽ چاچي کي قتل ڪرڻ بعد آپگھات ڪري ڇڏيو
واردات بعد نوجوان آپگھات ڪري ڇڏيو، جوابدار ذهني مريض هو، جاچ ڪريون پيا: پوليس
پشاور (م ڊ) پشاور ۾ نوجوان پٽ ۽ ڀائرن سميت 5 گهرڀاتين کي قتل ڪري آپگهات ڪري ڇڏيو، ٿڪال واري علائقي ۾ هڪ نوجوان گوليون هڻي پنهنجي پيءُ، ٽن ڀائرن ۽ چاچي کي قتل ڪري ڇڏيو، جنهن کانپوءِ جوابدار پنهنجي زندگي جو به انت آندو، پوليس واقعي واري هنڌ پهچي لاش ضروري ڪارروائي لاءِ اسپتال پهچايا، واقعي بابت پوليس جو چوڻ آهي ته نوجوان ذهني مريض هو، جنهن پنهنجي 5 گهرڀاتين کي قتل ڪرڻ بعد پاڻ به آگهات ڪيو آهي، واقعي جي وڌيڪ جاچ ڪئي پئي وڃي.
حمزه شهباز ۽ سندس ڪٽنب ٻنهي هٿن سان ملڪ کي لٽيو آهي: فياض الحسن
حمزه جو پيءُ، چاچو ۽ پاڻ جيل ۽ عدالتن جا چڪر پيا ڪاٽن، اڃا عمران خان اناڙي آهي؟
جهڙي طرح ملڪ لٽيو ويو، اهڙي ئي جذبي سان جواب ڏنو وڃي: صوبائي وزير
لاهور( م ڊ ) پنجاب جي سڌ سماءَ واري وزير فياض الحسن چوهاڻ چيو آهي ته حمزه شهباز جو پيءُ، چاچو ۽ پاڻ جيل ۽ عدالتن جا چڪر ڪاٽي رهيا آهن پوءِ به حمزه شهباز چوي ٿو ته عمران خان اناڙي آهي، جهڙي طرح ملڪ لٽيو، اهڙي ئي جذبي سان احتساب جي ادارن کي جواب ڏين.
لاهور ۾ ڳالهائيندي صوبائي وزير فياض الحسن چوهاڻ حمزه شهباز جي بيان تي ردعمل ظاهر ڪندي چيو ته حمزه شهباز ۽ سندس خاندان ٻنهي هٿن سان ملڪ کي لٽيو ۽ ڦريو آهي، ڇا 165 کرب رپيا ڦرڻ وارن جون پيشيون عوام جي نظر ۾ اهميت نه ٿيون رکن؟
صوبائي وزير چيو ته جهڙي طرح ملڪ لٽيو ويو، اهڙي ئي جذبي سان احتساب جي ادارن کي جواب به ڏنو وڃي، فياض الحسن چوهاڻ وڌيڪ چيو ته حمزه شهباز جو پيءُ، چاچو ۽ پاڻ جيل ۽ عدالتن جا چڪر ڪاٽي رهيا آهن پوءِ به حمزه شهباز چوي ٿو ته عمران خان اناڙي آهي.
“ڪوٽڙي ۾ انتظاميا جي نااھلي” ڊرينيج سسٽم ناڪارا ھجڻ ڪري گندو پاڻي گھرن ۽ دڪانن ۾ داخل، شھري پريشان
ڊرينيج لائين بند ٿيڻ سبب شاهه لطيف چوڪ ،دريا آباد ڪالوني ۾ گٽر جو پاڻي گهرن ۾ داخل
باريچا چوڪ ،جهاجر ڪالوني ، پٺان ڪالوني واسي به گٽر جو پاڻي نيڪال نه ٿيڻ سبب پريشان
ڪوٽڙي(ن پ ا ) ڪوٽڙي جي مختلف علائقن، شاھ لطيف چونڪ، باريچا چونڪ ، ڀٽي پاڙي، دريا آباد ڪالوني ، جهاجر ڪالوني، پٽاڻ ڪالوني سميت ٻين ڪالونين ۾ گٽرن جو گندو پاڻي گهرن ۾ داخل ٿي ويو جنهن سبب علائقي واسي سخت پريشان آهن .هنن مطالبو ڪيو آهي ته سندن گهن مان گندي پاڻي جو نيڪال ڪرايو وڃي . علائقي واسين سلمان جوکيو ، شڪيل رضا صديقي ، ڪاشف حسين ڏاوچ ۽ ٻين ٻڌايو ته ميونسپل ڪميٽي ڪوٽڙي جي 2 ڪروڙ 25 لک روپيه مهينو بجيٽ هئڻ باوجود ڪوٽڙي واسي بنيادي سهولتن کان محروم آهن . هن وقت ڪوٽڙي جون مختلف ڪالونيون گٽرن جي گندي پاڻي جي هيٺ اچي ويون آهن ۔ڪيترائي ڀيرا ڊي سي ڄامشورو، ميونسپل ڪميٽي چيئرمين، چيف ميونسپل آفيسر اڳيان دانهيون آهي پر ڪو به نوٽيس وٺڻ لاء تيار ناهي.هنن چيو ته گندي پاڻي جي گهرن ۾ داخل ٿيڻ ۽ روڊن تي بيهڻ سبب ڪيترن ئي بيمارين منهن ڪڍيو .هوڏانهن رابطو ڪرڻ تي چيف ميونسپل آفيسر ڪوٽڙي اشوڪ ڪمار ٻڌايو ته 20 سال پراڻي ڊرينيج لائين آهي ، لائين چوڪ ٿيڻ سبب اهڙو مسئلو ٿيو آهي، ڪم جاري آهي جلد ئي ڊرينيج لائين بحال ڪري گندو پاڻي نيڪال ڪيو ويندو.
ملير ۾ جج ڇاپو هڻي ناحق باندي بڻايل بار جي نائب صدر کي بازياب ڪرائي ورتو
جوڊيشل مئجسٽريٽ 9 آصف اڪبر جو شاهه لطيف ٿاڻي ڇاپو، باندي بڻايل وڪيل سڪندر شر بازياب
سينيئر وڪيل جي گرفتاري خلاف وڪيلن سخت احتجاج ڪندي هاءِ وي تي ڌرڻو هنيو، ٽريفڪ معطل
ملير (ن پ ا ) جوڊيشل مئجسٽريٽ نمبر 9 ملير آصف اڪبر شاھ لطيف ٿاڻي تي ڇاپو ھڻي باندي بنايل ملير بار جي نائب صدر سينيئر وڪيل سڪندر شر کي بازياب ڪرائي ورتو ۽ ايس ايڇ او شاھ لطيف کي رڪارڊ سميت سيشن ڪورٽ ملير طلب ڪيو ان واقعي خلاف وڪيلن ملير ڪورٽ آڏو هاء وي تي احتجاجي مظاھرو ڪري ڌرڻو ھنيو.جنھن سبب ايندڙ ويندڙ ٽريفڪ معطل ٿي وئي.مظاھرين وڪيلن چيو ته شاھ لطيف پوليس بي ڏوھي وڪيل اڳواڻ کي ڪوڙي ايف آء آر داخل ڪري گرفتار ڪيو .جنھن کي عدالتي ڇاپي بعد بازياب ڪرايو ويو آھي.انھن چيو ته پوليس گردي ڪنھن به صورت قبول نه ڪئي ويندي ۽ ايس ايڇ او شاھ لطيف نيڪ محمد کوسو کي معطل ڪري سندس خلاف ڪاروائي ڪئي وڃي. ٻئي طرف ايس ايڇ او شاھ لطيف صحافين کي ٻڌايو ته پوليس لينڊ گريبر راجا آصف کي گرفتار ڪيو ھو جنھن تي ۲۵ ايف آء آر داخل آھن .انکي ڇڏائڻ لاء وڪيل رات جو شراب جي نشي ۾ ڌت ٿي ٿاڻي تي آيو ۽ پوليس سان بدتميزي ڪئي گھٽ وڌ ڳالھايو. جنھن کانپوء وڪيل اڳواڻ کي گرفتار ڪري ميڊيڪل ڪرايو ويو ، ميڊيڪل رپورٽ ۾ پڻ نشو ثابت ٿيو آھي،هن چيو ته مون ڪو به غلط قدم نه کنيو آھي قانون جي دائري ۾ رھي قانوني ڪاروائي ڪئي آھي.
علي عابدي جي قتل ۾ استعمال ٿيل پسٽل پهرين به استعمال ٿيو
10 ڊسمبر تي ساڳي پسٽل سان نوجوان احتشام کي نشانو بڻايو ويو: راجا عمر خطاب
ڪراچي ( م ڊ ) علي رضا عابدي جي قتل ڪيس ۾ اهم اڳڀرائي ٿي آهي، سندس قتل ۾ استعمال ڪيل هڪ پسٽل سان ڪجهه ڏينهن اڳ هڪ نوجوان کي به قتل ڪيو ويو هو، سي ٽي ڊي انچارج راجا عمر خطاب چيو آهي ته مارجي ويل نوجوان جو واسطو ڪنهن سياسي جماعت سان نه هو.
علي رضا عابدي جي قتل ۾ استعمال ٿيل 2 پسٽل جي فارينزڪ رپورٽ اچي وئي، رپورٽ جي حوالي سان ٻڌائيندي سي ٽي ڊي انچارج راجا عمر خطاب چيو ته علي رضا عابدي تي حملي ۾ استعمال ٿيل ٻن مان هڪ پسٽل 10 ڊسمبر تي ڪارروائي ۾ استعمال ڪيو ويو هو.
راجا عمر خطاب موجب 30 بور واري ان پسٽل سان 10 ڊسمبر تي لياقت آباد ۾ نوجوان احتشام کي قتل ڪيو ويو، جنهن کي 3 گوليون هنيون ويون هيون، احتشام جي وارثن موجب سندس ڪنهن به سياسي جماعت سان واسطو نه هو،
انچارج سي ٽي ڊي جو چوڻ هو ته جنهن پسٽل سان احتشام کي نشانو بڻايو هو، ان پسٽل مان ئي علي رضا عابدي تي گهڻيون گوليون فائر ڪيون ويون، حملي ۾ 2 پسٽل استعمال ڪيا ويا، ٻئي پسٽل مان رڳو هڪ گولي هلائي وئي، جنهن جي گولي ڪنهن به ٻئي واقعي سان ميچ ناهي ٿي.
راجا عمر خطاب جو وڌيڪ چوڻ هو ته علي رضا عابدي تي حملي وقت هٿياربند جي هٿن ۾ پسٽل هئا.
”مفاهمت يا مزاحمت“ اڄ پ پ جي سي اي سي اجلاس ۾ اهم فيصلن جو امڪان
نئين ديري ۾ اجلاس دوران جي آءِ ٽي رپورٽ سميت موجوده سياسي صورتحال تي مشاورت ٿيندي
لاڙڪاڻو (ن پ ا) پيپلزپارٽي جي سي اي سي جو اهم اجلاس اڄ نئون ديرو هائوس ۾ ٿي رهيو آهي، جي آءِ ٽي رپورٽ سميت مجموعي سياسي صورتحال جي حوالي سان نئين حڪمت عملي جوڙي ويندي، ذ ريعن موجب پيپلزپارٽي هن ڀيري مفاهمت بدران مزاحمتي پاليسي کي ترجيح ڏيندي.
نئون ديرو هائوس ۾ چيئرمين بلاول ڀٽو ۽ شريڪ چيئرمين آصف علي زرداري جي صدارت ۾ پيپلزپارٽي جي سيٽرل ايگزيڪيوٽو ڪميٽي جو اجلاس شام نئون ديرو هائوس ۾ ٿيندو.
اجلاس ۾ پارٽي جي مرڪزي اڳواڻن کانسواءِ صوبائي ڪابينا جي ميمبرن جي به شرڪت جو امڪان آهي، شهيد بينظير ڀٽو جي ورسي تقريبن جو جائزو وٺڻ کانسواءِ سنڌ ۾ ترقياتي منصوبن سميت اهم معاملن تي غور ويچار ڪيو ويندو.
اجلاس دوران مني لانڊرنگ ڪيس بابت جي آءِ ٽي رپورٽ تي مشاورت سميت ملڪ جي موجوده سياسي صورتحال جو جائزو وٺڻ بعد پارٽي جي نئين حڪمت عملي جوڙي ويندي، ذريعن موجب اجلاس دوران موجوده سياسي صورتحال ۾ مفاهمت بدران مزاحمت جي پاليسي اختيار ڪرڻ جو فيصلو ڪيو ويو.
ارشد پپو قتل ڪيس جي هڪ جوابدار جي ضمانت منظور، ٻئي جي رد ٿي وئي
سنڌهاءَ ڪورٽ ۾ ٻڌڻي ٿي ،عدالت چاند خان نيازي جي ضمانت منظور جڏهن ته جوابدار ذاڪر ڊاڊا جي رد ڪئي
ڪراچي (رپورٽر) سنڌهاءَ ڪورٽ ۾ ارشد پپو قتل ڪيس جي ٻڌڻي ٿي جنهن دوران عدالت هڪ جوابدار چاند خان نيازي جي ضمانت منظور ڪري ورتي جڏهن ته ساڳي ڪيس ۾ هڪ ٻئي جوابدار ذاڪر ڊاڊا جي ضمانت رد ڪئي وئي .ارشد پپو ڪيس ۾ 2 جوابدار يوسف بلوچ ۽ جاويد بلوچ پهريان ئي ضمانت تي آزاد ٿيل آهن .جاچ آفيسر عدالت کي استدعا ڪئي ته جيستائين ڪيس جي مرڪزي جوابدار عذير بلوچ کي ٽرائل ڪورٽ ۾ پيش نٿو ڪيو وڃي تيستائين جوابدارن جي ضمانت منظور نه ڪئي وڃي جنهن تي عدالت پڇاڻو ڪيو ته ڇا اوهان ان ڳالهه جي ضانت ڏيو ٿا ته ايندڙ ٻڌڻي تائين عزير بلوچ ۽ اکين ڏٺن شاهدن کي عدالت ۾ پيش ڪيو ويندو ..؟ جنهن تي جاچ آفيسر يامين گجر چيو ته هو ان جي ضمانت نٿو ڏئي سگهي .جاچ آفيسر عدالت کي ٻڌايو ته عزير بلوچ جي آءِ ٽي آڏو ان ڳالهه جو اعتراف ڪيو آهي ته هن پنهنجي پيءُ جي قتل جو بدلو وٺڻ لاءِ ارشد پپو کي قتل ڪيو .جڏهن ته ٻين جوابدارن جي وڪيل عدالت کي آگاهه ڪيو ته سندس موڪل واقعي واري هنڌ تي موجود نه هئا مٿن ڪوڙو الزام مرهيو ويو آهي جنهن کانپوءِ هڪ چڻي جي ضمانت منظور ڪندي ڪيس جي ٻڌڻي منظور ڪئي وئي .
صنعتي پلاٽن جو ڪمرشل استعمال: واٽر ڪميشن سنڌ سرڪار کي پاليسي جوڙي رپورٽ پيش ڪرڻ جو حڪم ڏئي ڇڏيو
صنعتي پلاٽ ڪهڙي قانون تحت ڪمرشل لاءِ استعمال پيا ٿين: واٽر ڪميشن جو پڇاڻو
نالن تان ڪمرشل استعمال فوري طور ختم ڪيو وڃي: واٽر ڪميشن جو حڪم
ڪراچي(ن پ ا) صنعتي پلاٽ ڪهڙي قانون تحت ڪمرشل لاءِ استعمال ڪيا پيا وڃن، وضاحت ڏني وڃي: واٽر ڪميشن سنڌ سرڪارکي هڪ مهيني اندر پاليسي رپورٽ پيش ڪرڻ ۽ نالن تان ڪمرشل جو استعمال فوري طور ختم ڪرڻ جو حڪم ڏئي ڇڏيو، ايڊووڪيٽ جنرل سنڌ چيو ته صنعتي پلاٽس تي ڪمرشل سرگرميون ڪيترن ئي سالن کان جاري آهن، ڪيئن ٿيون ختم ڪري سگهجن؟
سنڌ هاءِ ڪورٽ ۾ واٽر ڪميشن حيدرآباد جا صنعتي پلاٽس ڪمرشل لاءِ استعمال ڪرڻ واري معاملي جي ٻڌڻي ڪئي، جنهن دوران ايڊووڪيٽ جنرل سنڌ، ڊي جي سنڌ بلڊنگ ڪنٽرول اٿارٽي ۽ ٻيا ڪميشن آڏو پيش ٿيا.
ايڊووڪيٽ جنرل سنڌ چيو ته صنعتي پلاٽس تي ڪمرشل سرگرميون ڪيترن ئي سالن کان جاري آهن، ڪيئن ٿيون ختم ڪري سگهجن؟، فيڪٽري ۾ ڪم ڪندڙ ماڻهن لاءِ به ڪجهه ڪمرشل شيون ٺهي ويون آهن.
ڪميشن ايڊووڪيٽ جنرل سنڌ کان پڇاڻو ڪيو ته صنعتي پلاٽس ڪمرشل بنيادن تي ڪيئن ٿا استعمال ٿي سگهن، 80 سيڪڙو صنعتي پلاٽ ڪمرشل بنيادن تي استعمال ٿي رهيا آهن، نالا کي به ناهي ڇڏيو ويو.
”ڪرپشن جو پئسو واپس ڪندس“ قمبر شهدادڪوٽ جي اڳوڻي اي ڊي او ممتاز طرفان سُپريم ڪورٽ آڏو ضمانت
عدالت اڳوڻي اي ڊي او جي مشروط ضمانت منظور ڪري ورتي،: عدالت
65 لک رُپيا جمع ڪرائڻ بعد ممتاز کي آزاد ڪيو وڃي
اسلام آباد (رپورٽر) سُپريم ڪورٽ قمبر شهدادڪوٽ جي اڳوڻي اي ڊي او جي ضمانت منظور ڪندي کيس 65 لک رُپيا جمع ڪرائڻ بعد آزاد ڪرڻ جو حڪم ڏئي ڇڏيو. سُپريم ڪورٽ ڪراچي رجسٽري ۾ قمبر شهدادڪوٽ ضلعي اندر تعليم کاتي ۾ ڪرپشن واري ريفرنس تي ٻڌڻي ٿي. جنهن دوران ريفرنس ۾ ڄاڻايل جوابدار قمبر شهدادڪوٽ جي اڳوڻي اي ڊي او ممتاز علي جي وڪيل عدالت کي ضمانت ڏني ته ڪرپشن ذريعي لُٽيل پئسو واپس ڪيو ويندو. جنهن تي نيب پراسيڪيوٽر چيو ته جيڪڏهن جوابدار ڪرپشن جو پئسو واپس ڪري ته سندس ضمانت تي اسان کي ڪوبه اعتراض نه آهي. عدالت اڳوڻي اي ڊي او جي ضمانت مشروط طور منظور ڪندي چيو ته جوابدار طرفان 61 لک رُپيا جمع ڪرائڻ بعد کيس ضمانت تي آزاد ڪيو وڃي.
علي رضا عابدي جو قتل ڪراچي جي سڪيورٽي تي سواليه نشان آهي: عاصم حسين
ڪراچي ( ن پ ا) اڳوڻي پيٽروليم وزير ۽ پ پ اڳواڻ ڊاڪٽر عاصم حسين چيو آهي ته علي رضا عابدي جو قتل ڪراچي شهر جي سڪيورٽي تي سواليه نشان آهي، قاتلن جي نشاندهي ڪري شهر ۾ امن برقرار رکڻ لاءِ قدم کڻڻ گهرجن.
ڪراچي جي احتساب عدالت ۾ ميڊيا سان ڳالهائيندي عاصم حسين نوازشريف سزا ۽ آصف زرداري جي ڪيس بابت ڪجهه به ڳالهائڻ کان انڪار ڪيو ۽ چيو ته نوازليگ ۾ قيادت ئي ناهي ۽ پارٽي ڪير به سنڀالي، ڪو به فرق نه ٿو پوي.
عاصم حسين علي رضا عابدي جي قتل تي ڏک جو اظهار ڪندي چيو ته علي رضا عابدي بهترين انسان هو، سندس قتل شهر جي سڪيورٽي تي سواليه نشان آهي، قاتلن جي نشاندهي ٿيڻ گهرجي.
هن چيو ته علي رضا عابدي جي قتل کانپوءِ ڪراچي شهر ۾ امن امان جي صورتحال بهتر بڻائڻ لاءِ ٻيهر اثرائتا قدم کڻڻ جي ضرورت آهي.
”7 سالن جيل ڀوڳڻ کانپوءِ آزادي“ گجرات واسي جوابدار آزاد
سُپريم ڪورٽ ٻن ڄڻن جي قتل ڪيس ۾ 7 سالن کان جيل ڀوڳيندڙ منير احمد کي آزاد ڪرڻ جو حڪم ڏئي ڇڏيو
جوابدار خلاف ثبوت نه مليا آهن، بظاهر پوليس رڪارڊ ۾ گڙٻڙ ڪئي آهي: جسٽس آصف سعيد کوسا
اسلام آباد (رپورٽر) پنجاب جي علائقي گجرات ۾ ٻن ڄڻن جي قتل واري ڪيس جي جوابدار کي 7 سالن کانپوءِ آزاد ڪرڻ جو حڪم ڏنو ويو آهي. سُپريم ڪورٽ ۾ جسٽس آصف سعيد کوسه جي سربراهيءَ ۾ 2 رڪني بئنچ گجرات ۾ ٻن ڄڻن جي قتل ڪيس جي ٻڌڻي ڪئي. عدالت 7 سالن تائين جيل ڀوڳيندڙ جوابدار منير کي آزاد ڪرڻ جو حڪم ڏيندي چيو آهي ته الزام هڻندڙ ڌُر جوابدار خلاف پڪا ثبوت پيش نه ڪري سگهي آهي، تنهن ڪري منير احمد کي شڪ جو فائدو ڏيندي آزاد ڪيو وڃي ٿو. ٻڌڻيءَ دوران ريمارڪس ڏيندي جسٽس آصف سعيد کوسه چيو ته مقتولن جي پوسٽ مارٽم رپورٽ جي اُبتڙ ڪيس داخل ڪيو ويو آهي، بظاهر پوليس رڪارڊ ۾ گڙٻڙ ڪئي آهي. تربيت هيٺ ججز کي چيو ويندو آهي ته قتل ڪيس تي فيصلو ڏيڻ اوهان جو ڪم نه آهي.