جيڪب آباد ۾ فٽبال رانديگرن جو مظاهرو

فٽبالر سهراب کوسي ۽ ٻين جي اڳواڻي ۾ رانديگرن مظاهرو ڪيو، شڪايت باوجود گرائونڊ مان گندو پاڻي نه ڪڍيو ويو، 4 ڏينهن کان راند بند آهي: رانديگر

فٽبال گرائونڊ مان پاڻي نه ڪڍڻ خلاف مظاهرو

جيڪب آباد (رپورٽر) جيڪب آباد ۾ رانديگرن پاران فٽبال گرائونڊ مان نيڪال جو پاڻي نه ڪڍڻ تي انتظاميه خلاف احتجاجي مظاهرو ڪيو ويو.
فٽبالر سھراب کوسو، ڪليم الله، نذر محمد ۽ ٻين جي اڳواڻي ۾ رانديگرن شاهه عبدالطيف ڀٽائي فٽبال گرائونڊ مان نيڪال جو پاڻي نه ڪڍڻ خلاف مظاهرو ڪري نعريبازي ڪئي. مظاهري دوران پي ٽي آءِ ايم پي ايم اسلم ابڙو پهچي گرائونڊ مان پاڻي نيڪالي لاءِ خاطري ڪرائي.
رانديگرن جو چوڻ هو ته فٽبال گرائونڊ مان نيڪال جو پاڻي اڃان تائين ناھي ڪڍيو ويو، جنھن سبب چئن ڏينهن کان راند بند آهي. هن چيو ته شڪايت باوجود فيفا جي فٽبال گرائونڊ مان گندو پاڻي نه ڪڍڻ سبب بدبو پکڙجي وئي آهي، ضلعي انتظاميا جو رويو مذمت جوڳو آهي.
رانديگرن راندين واري صوبائي وزير کان مطالبو ڪيو ته گرائونڊ مان پاڻي ڪڍڻ لاءِ ميونسپل انتظاميه کي حڪم جاري ڪري ته جيئن پنهنجي راند جاري رکي سگهون.
مظاهري دوران پي ٽي آءِ ايم پي اي اسلم ابڙو رانديگرن سان ڳالهيون ڪيون، پاڻي نيڪال لاءِ اپاءُ وٺڻ لاءِ ڊي سي عمران علي سان رابطو ڪيو، جنهن بعد اسلم ابڙو چيو ته ميونسپل ڪاميٽي جو چيئرمين شھر ۾ صفائي بدران شھرين کي ڏکيايون ڏئي رهيو آهي، فٽبالرن جي شڪايت باوجود ميونسپل عملي جو رويو ڳڻتي جوڳو آهي.

خيرپور ۾ راندين جو هفتو ملهايو ويو، جناح هائوس ٽيم فاتح

مختلف مقابلن ۾ جناح هائوس پهرين، ٽيپو هائوس ٻئين ۽ اقبال هائوس ٽئين پوزيشن ماڻي، ڪاليج جي پرنسيپال احسان علي فاتح ٽيمن جي رانديگرن ۾ ٽرافي ۽ انعام ورهايا

خيرپور: فاتح ٽيم جون رانديگرياڻيون انعام وٺندي

خيرپور (رپورٽر) خيرپور ۾ راندين جو هفتو شاندار مقابلن سان پڄاڻي تي پهتو. بحريه فائونڊيشن ڪاليج ۾ ڪرايل راندين جي هفتي جي پڄاڻي واري ڏينهن ڇوڪرين جي ٽيمن ۾ ٿرو بال جي فائنل مقابلي جناح هائوس ٽيم 1-2 تان ٽيپو هائوس کي شڪست ڏني.
راندين واري هفتي دوران ڇوڪرن جي ڊوڙ واري مقابلي ۾ ٽيپو هائوس جي آصف گوپانگ پهرين ۽ اميد کنڊ ٻين پوزيشن ماڻي.
مختلف مقابلن بعد پڄاڻي واري تقريب رکي وئي، جنهن ۾ جناح هائوس پهرين، ٽيپو هائوس ٻين ۽ اقبال هائوس ٽئين پوزيشن جو اعلان ڪيو ويو. خاص مهمان ڪاليج جي پرنسيپال احسان علي سھتو ٽيمن ۾ ٽرافي، شيلڊ ۽ ميڊل ورهايا.

شهدادپور ۾ سپرليگ جاري، عباس ۽ الحسيني ٽيمون ڪامياب

عباس اليون حيدري اليون ۽ الحسيني شهباز اليون کي شڪست ڏني، عباس اليون جي زاهد سروري ۽ الحسيني ٽيم جي احمد بروهي بهترين رانديگر جا ايوارڊ ماڻيا

شهداد پور (رپورٽر) شهدادپور ۾ مقصودو محب علي سپر ليگ ٽورنامينٽ جا دلچسپ مقابلا جاري آهن، کيڏيل ٻن ميچن ۾ عباس اليون ۽ حسيني اليون ٽيمن ڪاميابي ماڻي.
پهرين ميچ ۾ حيدري اليون ٽيم ٽاس کٽي پهرين بيٽنگ ڪندي 10 اوورن ۾ 47 رنسون ٺاهي سگهي، جواب ۾ بيٽسمين زاهد سروري جي30 رنسن جي مدد سان عباس اليون 5 اوورن ۾ هدف ماڻي ميچ کٽي.
ٻي ميچ ۾ شهباز اليون پهرين بيٽگ ڪندي پوري ٽيم 88 رنسون ٺاهي پويلين موٽي وئي، جواب ۾بيٽسمين احمد بروهي 45 رنسون ٺاهي پنهنجي ٽيم الحسيني کي ڪامياب ڪيو.
حسيني اليون نائين اوور ۾ ٽارگيٽ پورو ڪري 6 وڪيٽن تان ميچ کٽي. ٻنهي ميچن جي رانديگرن زاهد سروري ۽ احمد بروهي کي بهترين رانديگر قرار ڏنو ويو. ان موقعي تي خاص مهمان حاجي خان رند ۽ محب علي فاتح ٽيمن جي بهترين قرار ڏنل رانديگرن ۾ ميڊل ورهايا. جڏهن ته ٽونامينٽ جون وڌيڪ ميچون خميس ڏهاڙي کيڏيون وينديون.

خيرپور ۾ يوم قائد تي رسا ڪشي جا مقابلا ڪرايا ويا

خيرپور: رسا ڪشي مقابلو کٽيندڙ ٽيم ٽرافي وٺندي

خيرپور (رپورٽر) خيرپور ۾ قائد اعظم محمد علي جناح جي سالگره جي موقعي تي رسي ڪشي جا مقابلا ڪرايا ويا.
سکر ڊويزن ٽگ آف وار ايسوسيئيشن پاران ڪرايل مقابلن جو فائنل خيرپور ۽ سکر جي ٽيمن جي ۾ ٿيو، سخت مقابلي بعد خيرپور 1-2 تان مقابلو کٽي ورتو.
رسه ڪشي جي مقابلن ۾ سکر ٻئين ۽ گھوٽڪي ٽئين پوزيشن حاصل ڪئي. ان موقعي تي خاص مهمانن شفقت علي مھيسر ۽ شھمير عباسي کٽندڙ ٽيمن کي ٽرافي ۽ شيلڊ ڏنا.

ڀارت ،آسٽريليا سان باڪسنگ ڊي مقابلي لاءِ ميدان ۾ لهنديون

ڀارتي ٽيم جا ٻئي اوپنر ٻاهر، جديجا، اگروال ۽ روهت شرما ٽيم ۾ شامل

ميلبورن (اسپورٽس ڊيسڪ) آسٽريليا ۽ ڀارت ۾ ٽئين باڪسنگ ڊي ٽيسٽ سڀاڻي کيڏي ويندي. ميلبورن ۾ کيڏي ويندڙ ٽيسٽ ڪرسمس جي مناسبت سان باڪسنگ ڊي ٽيسٽ آهي. پهرين ٽيسٽ ۾ ڀارت آسٽريليا کي شڪست ڏني هئي، جڏهن ته ٻي ٽيسٽ ۾ ڪينگروز ڀارت کان بدلو ورتو هو. ڀارت ٽئين ٽيسٽ لاءِ ٽيم جو اعلان ڪيو ويو آهي، جنهن ۾ ٽي تبديليون ڪيون وينديون. اوپنرن مرلي وجي، ڪي ايل راهول ۽ فاسٽ بالر کي کي ٽيم مان ٻاهر ڪري آل رائونڊر رويندرا جديجا کي ٽيم ۾ شامل ڪيو ويو آهي، جڏهن هت ميانڪ اگروال پڻ آسٽريليا خلاف ٽيسٽ ڊيبيو ڪندو. روهت شرما صحتياب ٿيڻ کانپوءِ پڻ ٽيم جو حصو بڻجي ويو آهي. آسٽريليا طرفان پيٽرهينڊزڪمب جي جڳهه تي مچل مارش کي ٽيم ۾ شامل ڪيو ويو آهي. ڀارتي ٽيم ۾ ورات ڪوهلي، اجنڪيا راهاني، ميانڪ اگروال، هنوما وهاري، چتيشور پوجارا، رشڀ پانٽ، رويندرا جديجا، محمد شامي، اشانت شرما ۽ جسپريت ڀمرا شامل آهن. ڪينگروز جي ٽيم ۾ ايرون فنچ، مارڪس هيرس، ڪپتان ٽم پين، عثمان خواجه، شان مارش، مچل مارش، ٽريوس هيڊ، پيٽ ڪمنز، مچل اسٽارڪ، نيٿن ليون، جوش هيزل ووڊ شامل آهن.

مالي بحران سبب پاڪستان هاڪي سپر ليگ هڪ ڀيرو ٻيهر ملتوي

ايندڙ سال 12 کان 19جنوري تائين ليگ ٿيڻي هئي، نئين تاريخ جو اعلان نه ٿيو

ليگ ۾ پرڏيهي رانديگرن شموليت جو يقين ڏيارڻ باوجود سپر ليگ جتي تاريخ تبديل

لاهور ( اسپورٽس ڊيسڪ )پاڪستان هالي فيڊريشن پاران ايندڙ سال رٿيل پاڪستان سپر هاڪي ليگ ملتوي ڪئي وئي آهي. هاڪي کي هڪ ڀيرو ٻيهر مشهور ڪرائڻ لاءِ فيڊريشن طرفان پي ايڇ ايس ايل ڪرائڻ جو منصوبو جوڙيو پر پر هاڻ ان منصوبي کي ملتوي ڪيو ويو آهي، هاڪي ليگ 12 کان 19جنوري تائين رٿيل هئي. ذريعن جو چوڻ آهي ته فنڊ نه هئڻ ڪري ليگ ڪرائڻ ڏکيو ٿيندو پيو وڃي. پي ايڇ ايس ايل هاڻ لاهور ۾ مارچ ۾ ٿي سگهي ٿي پر ان حوالي سان حتمي تاريخ اڃان تائين ناهي آئي، ياد رهي ته 12 پرڏيهي رانديگرن پي ايڇ ايف کي ايونٽ ۾ شرڪت جي خاطري ڪرائي هئي.

ايشيا جون وڏيون ٽيمون پهريون ڀيرو هڪ ئي ڏينهن ٽيسٽ ميچون کيڏنديون

ڀارت، پاڪستان ۽ سريلنڪا 26 ڊسمبر تي باڪسنگ ڊي ٽيسٽ ۾ حصو وٺنديون

پاڪستان ڏکڻ آفريڪا، ڀارت آسٽريليا ۽ سريلنڪا نيوزيلينڊ سان مقابلو لاءِ تيار

ڪراچي (اسپورٽس ڊيسڪ) ڪرڪيٽ جي تاريخ ۾ پهريون ڀيرو ايشيا کنڊ جون ٽي وڏيون ڪرڪيٽ ٽيمون پهريون ڀيرو هڪ ئي ڏينهن ٻين ملڪن سان مقابلو ڪنديون. 26 ڊسمبر تي ڪرسمس جي حوالي سان تحفي طور باڪس ڏنو ويندو آهي، جنهنڪري 26 ڊسمبر کي باڪسنگ ڊي ڪوٺيو ويندو آهي، جڏهن ته آسٽريليا، ڏکڻ آفريڪا، انگلينڊ ۽ نيوزيلينڊ ۾ عيسائي آبادي هئڻ ڪري اتي باڪسنگ ڊي خاص ڏهاڙو آهي، ڪرڪيٽ ۾ به ان ٽيسٽ ميچ رکي ويندي آهي ته جيئن وڌ کان وڌ تماشائين کي پاڻ ڏانهن ڌيان ڇڪائڻ سميت ان کي يادگار بڻائي سگهجي. هلندڙ سال جي باڪسنگ ڊي تي پاڪستان، ڀارت، سريلنڪا پهريون ڀيرو هڪ ئي ڏينهن ٻن گورن جي ٽيمن ۽ ڏکڻ آفريڪا جي اڌ گورن واري ٽيم سان مقابلو ڪنديون. پاڪستان ڏکڻ آفريڪا سان مقابلو ڪندو، ڀارت آسٽريليا خلاف ميدان ۾ لهي کيس دسڻ جي ڪوشش ڪندي، جڏهن ته سريلنڪا پڻ نيوزيلينڊ خلاف مقابلو ڪندي. اهو پهريون ڀيرو آهي جو ايشيائي ٽيمون هڪ ئي ڏينهن نه صرف ٽيسٽ ميچ کيڏي رهيون آهن پر باڪسنگ ڊي ٽيسٽ ۾ پڻ سندن پهرين شرڪت هوندي.

سيبسٽين گروسجين فرانس ڊيوس ڪپ ٽيم جو ڪپتان مقرر

پيرس (اسپورٽس ڊيسڪ) اڳوڻو فرانسيسي رانديگر سيبسٽين گروسجين ٻن سالن لاءِ فرانس ڊيوس ڪپ ٽيم جو ڪپتان مقرر ٿي ويو.
40 ورهين جو فرانسيسي رانديگر کي ڪيريئر دوران 4 اي ٽي پي ٽائٽل کٽڻ جو اعزاز حاصل آهي ۽ هن 2010 ۾ عالمي ٽينس تان رٽائرمينٽ ورتي هئي. گروسجين پنهنجي بيان ۾ چيو ته قومي ڊيوس ڪپ ٽيم جو ڪپتان مقرر ٿيڻ مون لاءِ فخر جوڳي ڳالهه آهي. هن چيو ته آئون هر چيلنج کي منهن ڏيڻ لاءِ پوري طرح تيار آهيان.
گروسجين 2001 ۾ ڊيوس ڪپ فاتح ٽيم جو حصو هو.

شهدادپور ۾ اسٽوڊنٽ ٽيم انٽر ڊسٽرڪٽ ٽورنامينٽ کٽي ورتي

شھدادپور: اسٽوڊنٽ ڪرڪيٽ ٽيم جو ٽرافي سان گڏ گروپ فوٽو

سانگهڙ (رپورٽر) شهداد پور ۾ اسٽوڊنٽ ڪرڪيٽ ٽيم رائل ڪرڪيٽ ٽيم کي شڪست ڏئي انٽر ڊسٽرڪٽ ٽورنامينٽ پنهنجي نالي ڪري ورتي.
عبدالسلام ٿهيم اسٽيڊيم ۾ قادر جوڻيجو جي ياد ۾ ڪرايل پهرين انٽر ڊسٽرڪٽ ٽورنامينٽ جي 30 اوورن تي ٻڌل فائنل ۾ اسٽوڊنٽ ڪرڪيٽ ڪلب پهرين بيٽنگ ڪندي 180 رنسون ٺاهيون.
رائل ڪرڪيٽ ڪلب جي ٽيم 24 اوررن ۾ 115 رنسن تي ڍير ٿي وئي. ان موقعي تي خاص مهمان عبدالقادر جوڻيجو ۽ رضا وساڻ فاتح ٽيم جي ڪپتان کي ٽرافي ڏني. ميچ جو بهترين رانديگر ٽنڊو آدم جي ڪاشف پرويز کي قرار ڏنو ويو، جڏهن ته ٽورنامينٽ جي بهترين رانديگر جو ايوارڊ رائل ڪرڪيٽ ڪلب شهدادپور جي قربان لاکو کي ڏنو ويو.

ڇور ڀرسان سورهيه بادشاهه ٽيپ بال ٽورنامينٽ

ڇور(ن پ ا) ڇور ڀرسان سورهيه بادشاه ه ڪرڪيٽ ٽيم دستگير ڪلب کي هارائي ٽيپ بال ٽورنامينٽ کٽي ورتي.
ڳوٺ نوھيون ۾ مست ميرل فقير جي ياد ۾ڪرايل ٽيپ بال ڪرڪيٽ ٽورنامينٽ جي فائنل مقابلي ۾ پهرين بيٽنگ ڪندي ڳيريلي جي ٽيم دستگير ڪلب مقرر 10 اوورن ۾ 65 رنسون ٺاهيون.
جواب ۾نوهيون جي ٽيم سورهيه بادشاهه گهربل هدف 5 وڪيٽن جي نقصان تي ماڻي ٽورنامينٽ پنهنجي نالي ڪئي.
ان موقعي تي خاص مهمان استاد يوسف ۽ ٻين فاتح ٽيم جي ڪپتان اشرف نهڙي کي ٽرافي ۽ ٻين رانديگرن ۾ انعام ورهايا.

چيف جسٽس ڪرپشن فري پاڪستان سائيڪل ڊوڙ عرفان بلوچ کٽي ورتي

ڪراچي (اسپورٽس ڊيسڪ) چيف جسٽس ڪرپشن فري پاڪستان سائيڪل ڊوڙ عرفان بلوچ کٽي ورتي.
16 ڪلوميٽر ڊگهي سائيڪل ڊوڙ ۾ ذوهيب ٻئين ۽ اشعر بلوچ ٽئين پوزيشن ماڻي. ڊپٽي ڪمشنر جي آفيس وٽان خاص مهمان عابد علي ايڊووڪيٽ مقابلي جو افتتاح ڪيو.
سنڌ سائيڪلنگ ايسوسي ايشن جي چيئرمين ۽ مقابي جي خاص مهمان عابد علي ايڊووڪيٽ ڊپٽي ڪمشنر جي آفيس کان مقابلي جي شروعات ڪرائي.
ٽيم ڪراچي ايڪسپريس جي عرفان بلوچ 21 منٽ 30 سڪينڊن ۾ مقابلو کٽيو. ذوهيب بلوچ 3 سڪينڊ جي فرق سان ٻين پوزيشن ماڻي، جڏهن ته ٽيم ملير ٽائيگر جي اشعر بلوچ 5 سيڪنڊن جي فرق سان ٽئين پوزيشن حاصل ڪئي.

ڀارت خلاف باڪسنگ ٽيسٽ ۾ مارش جي شموليت جو امڪان

ميلبورن (اسپورٽس ڊيسڪ) آسٽريلوي ڪوچ جسٽن لينگر ڀارت خلاف رٿيل باڪسنگ ڊي ڪرڪيٽ ٽيسٽ ميچ ۾ پيٽر هينڊز ڪامب جي جاءِ تي مچل مارش کي شامل ڪرڻ جو اشارو ڏئي ڇڏيو.
آسٽريلوي ڪوچ پنهنجي بيان ۾ چيو ته ٽيم متوازن ڪرڻ لاءِ بالنگ آل رائونڊر هجڻ سبب اسان مچل مارش کي باڪسنگ ڊي ٽيسٽ ۾ کيڏائڻ تي غور ڪري رهيا آهيون، سندس تجربو به وڌيڪ آهي.
هن چيو ته اميد آهي ته مچل مارش بال ۽ بيٽ سان بهترين ڪارڪردگي ڏيکاري ٽيم کي سوڀ ڏيارڻ ۾ اهم ڪردار نڀائيندو. سندس چوڻ هو ته پيٽر هينڊز ڪامب ۽ مچل مارش ٻئي صلاحيتن وارا رانديگر آهن، ٻئي اسپنرز سٺو کيڏندا آهن، ان ڪري اسان لاءِ فيصلو ڪرڻ ڏکيو آهي، جڏهن ته ٽيم بهتر مفاد ۾ سخت فيصلو ڪرڻو پوندو.

ڀارت جو ون ڊي ۽ ٽي 20 سيريز لاءِ ڌار ڌار ٽيمن جو اعلان، ڌوني جي واپسي

ممبئي (اسپورٽس ڊيسڪ) ڀارتي ڪرڪيٽ بورڊ آسٽريليا خلاف ون ڊي، نيوزلينڊ خلاف ون ڊي ۽ ٽي ٽوئنٽي سيريز لاءِ ڌار ڌار ٽيمن جو اعلان ڪري ڇڏيو.
ڀارتي بورڊ جي سليڪشن ڪميٽي جي چونڊيل اسڪواڊ ۾ اڳوڻي ڪپتان مهندرا سنگهه ڌوني جي ٻيهر واپس ٿي، ريشب پنت کي ون ڊي اسڪواڊ مان ڊراپ ڪيو ويو، جڏهن ته سريش رائنه بدستور ٽيم جاءِ ٺاهڻ ۾ ناڪام رهيو، آل رائونڊر هرديڪ پانڊيا انجري کان ڇوٽڪاري بعد ٻيهر اسڪواڊ ۾ واپسي ڪئي، فاسٽ بالر اميش ياديو ٻنهي اسڪواڊز ۾ جاءِ ٺاهڻ ۾ ناڪام رهيو.
آسٽريليا ۽ نيوزلينڊ خلاف چونڊيل ون ڊي اسڪواڊ ۾ ڪپتان ويرات ڪوهلي، نائب ڪپتان روهت شرما، لوڪيش راهول، شيکر ڌون، امباتي رائيڊو، دنيش ڪارٿڪ، ڪيدر جاديو، ڌوني، پانڊيا، ڪلديب ياديو، يزويندر، جديجا، ڀونشور ڪمار جسپريت ڀمرا، خليل احمد ۽ محمد شامي شامل آهن.
نيوزلينڊ خلاف چونڊيل ٽي 20 اسڪواڊ ۾ ڪپتان ويرات ڪوهل، نائب ڪپتان روهت شرما، لوڪيش راهول، ريشب پنت، دنيش ڪارٿڪ، ڪيدر جاديو، ڌوني، هرديڪ پانڊيا، ڪرونل پانڊيا، ڪلديپ ياديو، يوزويندر اڇامل، جسپريت بمرا ۽ خليل احمد شامل آهن.

بي بي ايل: سڊني ٿنڊر سڪسرز کي 21 رنسن تان مات ڏئي ڇڏي

سڊني سڪسرز 170 رنسن جي جواب ۾ 149 رنسون ٺاهي هٿيار ڦٽا ڪيا، جوز بٽلر کي 65 رنسون جوڙڻ تي ميچ جو بهترين رانديگر قرار ڏنو ويو

سڊني (اسپورٽس ڊيسڪ) بگ بيش ليگ ۾ شاندار مقابلا جاري آهن، سڊني ٿنڊر سڊني سڪسرز کي 21 رنسن هارائي ڪاميابي ماڻي. سڊني جي شوگرائونڊ اسٽيڊيم تي کيڏيل ميچ ۾ سڊني سڪسرز ٽاس کٽي پهرين فيلڊنگ جو فيصلو ڪيو، جيڪو غلط ثابت ٿيو.
اوپنر بيٽسمين 63 رنسن جي مدد سان سنڊني ٿنڊر مقرر اوورن ۾ 9 وڪيٽن جي نقصان تي 169 رنسون ٺاهيون. ٻين بيٽسمينن ۾ سيمز 28، فرگوسن 23 ۽ ڪپتان شين واٽسن 19 رنسون ٺاهيون. سڊني سڪسرز جي بالرن ڪوران 3 ، ڪيفي 2، ايبٽ ۽ ورشوئس هڪ هڪ وڪيٽ حاصل ڪئي.
170 رنسن جي هدف پويان لڳندي سڊني سڪسرز مقرر اوورن ۾ 9 وڪيٽن جي نقصان تي 149 رنسون ٺاهي هٿيار ڦٽا ڪيا. ڪوران 62، سين ايبٽ 35، هينري ڪس 15 رنسون ٺاهي نمايان رهيا. سڊني ٿنڊر طرفان بهترين بالنگ ڪندي سيمز ۽ فواد احمد 3-3 شڪار ڪيا، جڏهن ته ڪُڪ، گرين ۽ رين برڊ هڪ-هڪ وڪيٽ ورتي.
بهترين بيٽنگ جو مظاهرو ڪندڙ بٽلر کي ميچ جو بهترين رانديگر قرار ڏنو ويو.

اسلام ڪوٽ ۾ آل سنڌ فيميل فٽبال ٽورنامينٽ ۾ شاندار مقابلا جاري

صوبائي وزير شهلا رضا افتتاح ڪيو, 12 ورهين کان گهٽ ڄمار وارين ڇوڪرين لاءِ ڪرايل ٽورنامينٽ 8 ضلعن جي ٽيمن شرڪت ڪئي

اسلام ڪوٽ: آل سنڌ فيميل فٽبال ٽورنامينٽ جي رانديگرياڻين جو صوبائي وزير شھلا رضا سان نڪتل گروپ فوٽو

اسلام ڪوٽ (رپورٽر) ٿر فائونڊيشن جي سهڪار سان دِيا وومين فٽبال ڪلب پاران شروع ڪيل فٽبال ٽورنامينٽ ۾ سنڌ جي 12 سالن کان گهٽ عمر وارين ڇوڪرين جي ٽيمن جا مقابلا جاري آهن. عورتاڻي ترقي جي صوبائي وزير اسيمبلي شهلا رضا ٽورنامينٽ جو افتتاح ڪيو.
ٽورنامينٽ ۾ ٿر فائونڊيشن پرائمري اسڪولن جي ڇوڪرين جي ٽيمن سميت سنڌ جي 8 ضلعن ڪراچي، ميرپورخاص، حيدرآباد، سکر، خيرپور ۽ حب جي ڇوڪرين جي ٽيمن شرڪت ڪئي.
ان موقعي تي ڪور ڪمانڊر ڪراچي ليفٽيننٽ جنرل ھمايون عزيز چيو ته ٿر تبدلي ٿيندو ۽ پاڪستان وارو نعرو سچ ثابت ٿي رهيو آهي، ٿر جهڙي علائقي ۾ اھڙي قسم جا ايونٽس ساراهه جوڳا آهن.
هن چيو ته ٿر جا ٻار انتھائي ھوشيار ۽ محنتي آهن، ٿر جي ٻارن کي آئون فوجي جنرل ڏسڻ چاهيان ٿو.
ٻي پاسي ڊي ٿرپارڪر آصف جميل شيخ چيو ته ٿر فائونڊيشن جو ڪم واکاڻ جوڳو آهي، جنهن ڏورانهين علائقي ۾ پروگرام ڪرايو. هن چيو ته ھتان جي ٻارڙين ۾ وڏو ٽيلينٽ موجود آهي، جنهن ٽيلينٽ کي اڀارڻ يقينن وڏو ڪم آھي.
ان موقعي تي ٿر فائونڊيشن جي تعليم واري شعبي جي مينيجر سبين شاهه چيو ته اسان فٽبال جي 8 ئي ضلعن جي ٽيمن کي ڦڙت ڏٺو سين. هن چيو ته ٿر فائونڊيشن جو مشن رڳو تعليم ئي نه پر ٿر جي عورتن کي هر طرح سان بااختيار بڻائڻ لاءِ ٻيا موقعا پڻ فراهم ڪري رهي آهي.
ٽورنامينٽ ۾ ڪور ڪمانڊر ڪراچي ليفٽيننٽ جنرل ھمايون عزيز ۽ ڊي سي ٿرپارڪر آصف جميل ٻارڙن ۾ ٽرافيون ۽ سرٽيفڪيٽ ورھايا.

پويون 1 2 3 4 5 6 … 9 اڳيون