سينچورين (اسپورٽس ڊيسڪ) ڏکڻ آفريڪا جي تيز ترين بالر ڊيل اسٽين پنهنجي ملڪ طرفان سڀ کان وڌيڪ ٽيسٽ وڪيٽون حاصل ڪرڻ جو رڪارڊ جوڙي ورتو آهي. ڊيل اسٽين پاڪستان خلاف باڪسنگ ڊي ٽيسٽ ۾ فخر زمان کي آئوٽ ڪندي 422 وڪيٽون پوريون ڪيون ۽ اهڙي طرح هن شان پولاڪ جي 421 وڪيٽن جو رڪارڊ ٽوڙي ڇڏيو. ڊيل اسٽين 89 ٽيسٽ ميچن ۽ 162 اننگز ۾ اهو رڪارڊ پورو ڪيو. ڊيل اسٽين 2004ع ۾ انگلينڊ خلاف ڊيبيو ٽيسٽ کيڏيو هو.
ڊيل اسٽين شان پولاڪ کان ٽيسٽ وڪيٽن جو رڪارڊ کسي ورتو
ڊيل اسٽين فخر زمان کي آئوٽ ڪندي 422 شڪار مڪمل ڪيا
باڪسنگ ڊي ٽيسٽ: پاڪستاني بيٽنگ لائين واري جي ڀت ثابت، 76 تي 4 آئوٽ
فخر زمان 12، امام الحق 0، اسد شفيق 7 ۽ شان مسعود 19 ٺاهي سگهيا
سينچورين (اسپورٽس ڊيسڪ) پاڪستان ۽ ڏکڻ آفريڪا وچ ۾ پهرين ٽيسٽ ميچ ۾ پاڪستان ٽاس کٽي پهريان بيٽنگ جو فيصلو ڪرڻ کانپوءِ سندس 4 رانديگر 76 رنسن تي آئوٽ ٿي ويا آهن. سينچورين جي سپر اسپورٽس پارڪ ۾ ٻنهي ملڪن وچ ۾ کيڏي ويندڙ ميچ ۾ ميچ سرفراز احمد ٽاس کٽي بيٽنگ جو فيصلو ڪيو. اوپنر امام الحق ۽ فخر زمان ٻوٽو ٻاري نه سگهيا ۽ صرف 17 جي مجموعي اسڪور تي آئوٽ ٿي ويا. امام الحق ٻڙي اسڪور تي رباڊا جو شڪار ٿيو، جڏهن ته فخر زمان 12 رنسن تي ڊيل اسٽين جو 422 هون شڪار بڻجي ويو. اوليور پاران پڻ ٻه شڪار ڪيا، اسد شفيق 7 ۽ شان مسعود 19 رنسون ٺاهي آئوٽ ٿيا. ڊيل اسٽين ڏکڻ آفريڪا طرفان سڀ کان وڌيڪ ٽيسٽ وڪيٽن جو شان پولاڪ وارو رڪارڊ ٽوڙي ڇڏيو. پاڪستان طرفان محمد عباس، شاداب خان ۽ هارث سهيل زخمي هئڻ ڪري ٽيسٽ ميچ ۾ شرڪت نه ڪري سگهيا.
علي عابدي جي قتل ۾ استعمال ٿيل پسٽل پهرين به استعمال ٿيو
10 ڊسمبر تي ساڳي پسٽل سان نوجوان احتشام کي نشانو بڻايو ويو: راجا عمر خطاب
ڪراچي ( م ڊ ) علي رضا عابدي جي قتل ڪيس ۾ اهم اڳڀرائي ٿي آهي، سندس قتل ۾ استعمال ڪيل هڪ پسٽل سان ڪجهه ڏينهن اڳ هڪ نوجوان کي به قتل ڪيو ويو هو، سي ٽي ڊي انچارج راجا عمر خطاب چيو آهي ته مارجي ويل نوجوان جو واسطو ڪنهن سياسي جماعت سان نه هو.
علي رضا عابدي جي قتل ۾ استعمال ٿيل 2 پسٽل جي فارينزڪ رپورٽ اچي وئي، رپورٽ جي حوالي سان ٻڌائيندي سي ٽي ڊي انچارج راجا عمر خطاب چيو ته علي رضا عابدي تي حملي ۾ استعمال ٿيل ٻن مان هڪ پسٽل 10 ڊسمبر تي ڪارروائي ۾ استعمال ڪيو ويو هو.
راجا عمر خطاب موجب 30 بور واري ان پسٽل سان 10 ڊسمبر تي لياقت آباد ۾ نوجوان احتشام کي قتل ڪيو ويو، جنهن کي 3 گوليون هنيون ويون هيون، احتشام جي وارثن موجب سندس ڪنهن به سياسي جماعت سان واسطو نه هو،
انچارج سي ٽي ڊي جو چوڻ هو ته جنهن پسٽل سان احتشام کي نشانو بڻايو هو، ان پسٽل مان ئي علي رضا عابدي تي گهڻيون گوليون فائر ڪيون ويون، حملي ۾ 2 پسٽل استعمال ڪيا ويا، ٻئي پسٽل مان رڳو هڪ گولي هلائي وئي، جنهن جي گولي ڪنهن به ٻئي واقعي سان ميچ ناهي ٿي.
راجا عمر خطاب جو وڌيڪ چوڻ هو ته علي رضا عابدي تي حملي وقت هٿياربند جي هٿن ۾ پسٽل هئا.
اختيار ڏيڻ باوجود ادارا امن قائم نه ڪري سگهيا: وڏو وزير
علي رضا عابدي جي قتل واقعي جا پيرا قائد آباد ڌماڪي ڏانهن وڃن ٿا: وڏي وزير کي اجلاس ۾ آگاهي
ڪراچي (بيورو رپورٽ ) ايم ڪيو ايم جي اڳوڻي اڳواڻ سيد علي رضا عابدي جي قتل کانپوءِ وڏي وزير سيد مراد علي شاهه جي صدارت هيٺ امن امان بابت اعليٰ سطحي اجلاس ٿيو ،جنهن ۾ چيف سيڪريٽري سيد ممتاز شاهه ،سڌسماءُ واري صلاحڪار مرتضي وهاب ، آءِ جي سنڌ پوليس ، ڊي جي رينجرز ، صوبائي گهرو سيڪريٽري ۽ ٻين شرڪت ڪئي . اجلاس دوران قانون لاڳو ڪندڙ ادارن بريفنگ ڏيندي ٻڌايو ته علي رضا عابدي جي قتل جا پيرا قائد آباد ڌماڪي سان ملن ٿا واقعي جي وڌيڪ جاچ هلندڙ آهي .اجلاس ۾ ٻڌايو ويو ته گذريل 4 هفتن دوران شهر اندر دهشتگردي جا 6 واقعا پيش آيا آهن جنهن ۾ قائد آباد ڌماڪو، چيني ڪائونسل خاني تي حملو ، ايم ڪيو ايم جي مذهبي تقريب ۾ ڌماڪو ، پي ايس پي آفيس تي حملو ۽ علي رضا عابدي جو قتل شامل آهي . جاري ڪيل بيان موجب وڏي وزير سيد مراد علي شاهه دهشتگردي جي واقعن تي ڳڻتي جو اظهار ڪندي چيو ته دهشتگرد هڪ ڀيرو ٻيهر گڏ ٿي رهيا آهن ۽ اسين خاموش ويٺا آهيون .هن چيو ته ٻڌايو ته نيٺ پوليس ڇا پئي ڪري ..؟؟ ٻيا قانون لاڳو ڪندڙ اداره ڇا پيا ڪن .؟ قانون لاڳو ڪندڙ ادارن کي مڪمل اختيار ۽ خودمختياري ڏني پر ڪي سٺا نتيجا هاصل نه ٿي سگهيا آهن .وڏي وزير چيو ته کيس هرحال ۾ شهر اندر امن ۽ شهرين جو تحفظ گهرجي ٿو ان ۾ ڪا به ڪوتاهي برداشت نه ڪئي ويندي .ڊي آءِ جي سائوٿ ٻڌايو ته علي رضا عابدي جي والد جو انٽرويو ڪيو آهي ۽ واقعي جي مختلف رخن کان جاچ ڪريون پيا .
نوازالدين صديقي شو سينا سربراهه بال ٺاڪري بڻجندو
شو سينا اڳواڻ فلم جي هدايتڪار ڏني، ايندڙ سال فلم ريليز ٿيندي
فلم ۾ شو سينا سربراهه جا تڪراري پاسا نه ڏيکاريا ويندا
ممبئي (شوبز نيوز) هندو انهاپسند تنظيم شو سينا جي سربراهه بال ٺاڪري تي بالي ووڊ فلم ٺاهي پئي وڃي، جنهن ۾ نواز الدين صديقي مرحوم بال ٺاڪري جو ڪردار ادا ڪري رهيو آهي. نوازالدين صديقي پاران بال ٺاڪري جي روپ ۾ نظر ايندو، جڏهن ته ان حوالي سان نواز الدين صديقي جون تصويرون پڻ وائرل ٿي رهيون آهن. فلم جو نالو ٺاڪري ٻڌايو پيو وڃي، جڏهن ته فلم جي هدايتڪاري پڻ شو سينا ايم پي اي سنجي رائوت ڏني آهي. فلم کي ايندڙ سال مارچ ۾ پيش ڪرڻ جا امڪان آهن، جڏهن ته نوازالدين صديقي سان گڏ امرتا رائو، عبدل القادر امين، انوشڪا جهادو ۽ ٻيا اهم ڪردار ادا ڪندا. فلم کي هندي، مراٺي ۽ انگريزي ۾ پيش ڪيو ويندو.
”مشتاق منهنجو مڙس ناهي” مريم جو بيان، عدالت ناري کي والدين سان گڏ رهڻ جي اجازت ڏئي ڇڏي
سنڌ هاءِ ڪورٽ ۾ ٻڌڻي، ڀاءُ مشتاق جي زال مريم کي وارثن ناحق پاڻ ٽ رکيو آهي: درخواستگذار شوڪت سميجو
مشتاق مون کي اغوا ڪري ويو هو، ساڻس شادي نه ڪئي آهي: مريم جو عدالت آڏو بيان
حيدرآباد (رپورٽر) سنڌ هاءِ ڪورٽ سرڪٽ بينچ حيدرآباد والدين وٽ يرغمال ڄاڻايل ٿر واسڻ ناري کي سندس مرضي موجب والدين سان گڏ وڃڻ جي اجازت ڏئي ڇڏي، ناري چيو ته جنهن شخص کي سندس مڙس ڄاڻايو ويو آهي، ان سان سندس شادي ئي ناهي ٿي، پوليس چيو آهي ته درخواست ۾ ناري جو مڙس ڄاڻايل شخص چرس رکڻ جي ڏوهه ۾ جيل ۾ قيد آهي.
سنڌ هاءِ ڪورٽ سرڪٽ بينچ حيدرآباد ۾ داخل درخواست ۾ شوڪت سمجيو ناري شخص موقف اختيار ڪيو ته سندس ڀاءُ مشتاق سميجو مريم نالي ناري سان پرڻو ڪيو، ناري جي والدين ٻنهي کي ناحق باندي بڻائي رکيو آهي، درخواست ۾ ٻنهي جي بازيابي جو مطالبو ڪيو ويو.
بينڪرافٽ بال ٽيمپرنگ جي ذميواري وارنر تي مڙهي ڇڏي
وارنر بال خراب ڪرڻ لاءِ چيو، جنهن تي مون عمل ڪيو: بينڪرافٽ
غلطي جي وڏي قيمت ادا ڪرڻي پئجي وئي، ڪيريئر خطري ۾ پيو
ميلبورن (اسپورٽس ڊيسڪ) بال ٽيمپرنگ ۾ سزا ڪاٽيندڙ آسٽريلوي اوپنر بينڪرافٽ بال خراب ڪرڻ جي سموري ذميواري ڊيوڊ وارنر تي مڙهي ڇڏي آهي. آسٽريلوي ڪرڪيٽ بورڊ پاران بال خراب ڪرڻ جو ڏوهه ثابت ٿيڻ تي ڪپتان اسٽيون سمٿ، نائب ڪپتان ڊيوڊ وارنر ۽ بينڪرافٽ مٿان هڪ هڪ سال جي پابندي لڳائي. آسٽريليا ۽ ڏکڻ آفريڪا ۾ ٽيسٽ دوران بينڪرافٽ بال کي خراب ڪرڻ جي ڪوشش ڪئي هئي، جنهن تي هو پڪڙجي پيو هو. فاڪس اسپورٽس کي انٽرويو ڏيندي بينڪرافٽ جو چوڻ هو ته ڊيوڊ وانر کيس بال خراب ڪرڻ لاءِ چيو جيڪو هن ڪيو. سندس چوڻ هو ته کيس غلطي جي وڏي قيمت ادا ڪرڻي پئجي وئي، جنهنڪري منهنجو ڪيريئر خطري ۾ پئجي ويو.
”مفاهمت يا مزاحمت“ اڄ پ پ جي سي اي سي اجلاس ۾ اهم فيصلن جو امڪان
نئين ديري ۾ اجلاس دوران جي آءِ ٽي رپورٽ سميت موجوده سياسي صورتحال تي مشاورت ٿيندي
لاڙڪاڻو (ن پ ا) پيپلزپارٽي جي سي اي سي جو اهم اجلاس اڄ نئون ديرو هائوس ۾ ٿي رهيو آهي، جي آءِ ٽي رپورٽ سميت مجموعي سياسي صورتحال جي حوالي سان نئين حڪمت عملي جوڙي ويندي، ذ ريعن موجب پيپلزپارٽي هن ڀيري مفاهمت بدران مزاحمتي پاليسي کي ترجيح ڏيندي.
نئون ديرو هائوس ۾ چيئرمين بلاول ڀٽو ۽ شريڪ چيئرمين آصف علي زرداري جي صدارت ۾ پيپلزپارٽي جي سيٽرل ايگزيڪيوٽو ڪميٽي جو اجلاس شام نئون ديرو هائوس ۾ ٿيندو.
اجلاس ۾ پارٽي جي مرڪزي اڳواڻن کانسواءِ صوبائي ڪابينا جي ميمبرن جي به شرڪت جو امڪان آهي، شهيد بينظير ڀٽو جي ورسي تقريبن جو جائزو وٺڻ کانسواءِ سنڌ ۾ ترقياتي منصوبن سميت اهم معاملن تي غور ويچار ڪيو ويندو.
اجلاس دوران مني لانڊرنگ ڪيس بابت جي آءِ ٽي رپورٽ تي مشاورت سميت ملڪ جي موجوده سياسي صورتحال جو جائزو وٺڻ بعد پارٽي جي نئين حڪمت عملي جوڙي ويندي، ذريعن موجب اجلاس دوران موجوده سياسي صورتحال ۾ مفاهمت بدران مزاحمت جي پاليسي اختيار ڪرڻ جو فيصلو ڪيو ويو.
فاطمه ثنا شيخ عامر خان سان لاڳاپن تي خاموشي ٽوڙي ڇڏي
ميڊيا بنا ڪنهن ثبوت جي بي بنياد خبرون نه هلائي: فاطمه ثنا
اهڙين خبرن سبب تمام گهڻو پريشان ٿي آهيان: دنگل گرل جون ڳالهيون
ممبئي (شوبز نيوز) فلم دنگل ۾ عامر خان سان گڏ پنهنجي ڪيريئر جي ڪامياب شروعات ڪندڙ فاطمه ثنا شيخ ۽ عامر خان وچ ۾ لاڳاپن جو خبرون ڀارتي ميڊيا ۾ هلي رهيون هيون. فلم دنگل ۾ فاطمه ثنا شيخ عامر خان جي ڌيءُ جو ڪردار ادا ڪيو هو. ان کانپوءِ عامر خان ۽ فاطه ثنا جي هڪ ٻي فلم سيڪريٽ سپر اسٽار پڻ ريليز ٿي هئي، جنهن ۾ عامر خا ن پڻ ڪردار ادا ڪيو هو.
فاطمه ثنا شيخ پاران ميڊيا تي هلندڙ خبرن کي بي بنياد قرار ڏيندي چيو ته اهڙي قسم جون خبرون ٻڌڻ افسوسناڪ آهي، اهڙن افواهن سبب سندس پريشانين ۾ واڌارو آيو آهي. فاطمه جو چوڻ هو ته اهڙين خبرن ڪري سندس خاندان به پريشان ٿيو هو. کي فرق نٿو پوي ته ماڻهو ڇا ٿا چون، ماڻهن جو ڪم ڳالهيون ڪرڻ آهي، جڏهن ته هوءَ سکي رهي آهي ته اهڙي قسم جي افواهن سان ڪيئن منهن ڏجي.
ايندڙ فلم ڏسڻ کانپوءِ نقادن جا وات بند ٿي ويندا: ڪنگنا راناوت
ڪنگنا راناوت ايندڙ فلم ۾ جهانسي جي راڻي جو ڪردار ادا ڪري رهي آهي
منهنجي فلمن تي تنقيد ڪندڙ مانيڪارانيڪا ڏسڻ کانپوءِ چپ ٿي ويندا: ڪنگنا
ممبئي (شوبز نيوز) بالي ووڊ جي ڪوئين ڪنگنا راناوت پنهنجي ايندڙ فلم جي باري ۾ ايترو تي پراميد آهي، جو سندس چوڻ آهي ته هن جا نقاد ايندڙ فلم ڏسڻ کانپوءِ پنهنجا وار بند ڪري ڇڏيندا. انڊين ايڪسپريس موجب
ڪنگنا راناوت جو چوڻ هو ته سندس خيال آهي ته جيڪي هن ۽ فلم خلاف ڳالهائي رهيا آهن، اهي فلم ڏسڻ کانپوءِ پنهنجي وات بند ڪري ڇڏيندا.
سندس چوڻ هو ته شروع ۾ کيس اها فلم ڏکي لڳي پر فلم ٽيم جي مدد سان بهترين ڪم ڪيو ويو آهي. ڪنگنا فلم ۾ اهم ڪردار ادا ڪرڻ سان گڏ پهريون ڀيرو ڪو ڊائريڪشن پڻ ڏئي رهي آهي. فلم جي ليکڪ جي حوالي سان ڪنگنا چيو ته هن ايندڙ فلم به ساڳيو ڪهاڻيڪار لکي رهيو آهي، جيڪا هڪ پيار جي ڪهاڻي آهي. ڪنگنا راناوت جي مانيڪارانيڪا ايندڙ سال نمائش لاءِ پيش ڪئي ويندي.
سُپريم ڪورٽ طرفان ذولفي بخاري جي نااهلي واري درخواست رد
سُپريم ڪورٽ ذولفي بخاري کي وزيراعظم جي خصوصي معاون طور ڪم جاري رکڻ جي اجازت ڏئي ڇڏي
اسلام آباد ( م ڊ ) سپريم ڪورٽ ذلفي بخاري کي عهدي تان هٽائڻ واري درخواست رد ڪندي کيس صلاحڪار طور ڪم ڪرڻ جي اجازت ڏئي ڇڏي، سپريم ڪورٽ چيو آهي ته سرڪاري ملازمن جي ٻٽي شهريت وارو فيصلو ذلفي بخاري تي لاڳو نه ٿو ٿئي، پر هو مملڪتي وزير طور ڪم نه ٿو ڪري سگهي.
سپريم ڪورٽ لاهور رجسٽري ۾ چيف جسٽس جي سربراهي ۾ 3 رڪني بينچ ذلفي بخاري جي مقرري خلاف درخواست تي ٻڌڻي ڪئي، جنهن دوران ذلفي بخاري جو وڪيل اعتزاز احسن به پيش ٿيو، درخواستگذار جي وڪيل موقف اختيار ڪيو ته ذلفي بخاري وزير طور ڪم ڪري رهيو آهي ۽ ڪابينا اجلاس ۾ به شرڪت ڪندو رهي ٿو.
چيف جسٽس پڇاڻو ڪيو ته ذلفي بخاري ڪير آهي، ڪٿان آيو آهي، پوري سمري کڻي اچو، هن ويب سائيٽ تي مملڪتي وزير وارو عهدو ڇو لکيو، جنهن تي وڪيل اعتزاز احسن چيو ته ذلفي بخاري مملڪي وزير جو اسٽيٽس ڪليم ناهي ڪيو ۽ هُن جي ڪري برٽش ايئر ويز پاڪستان ۾ واپس آئي، جنهن تي چيف جسٽس چيو ته بهتر اهو هجي ها ته اوهان پي آءِ اي کي بهتر بڻايو ها.
ارشد پپو قتل ڪيس جي هڪ جوابدار جي ضمانت منظور، ٻئي جي رد ٿي وئي
سنڌهاءَ ڪورٽ ۾ ٻڌڻي ٿي ،عدالت چاند خان نيازي جي ضمانت منظور جڏهن ته جوابدار ذاڪر ڊاڊا جي رد ڪئي
ڪراچي (رپورٽر) سنڌهاءَ ڪورٽ ۾ ارشد پپو قتل ڪيس جي ٻڌڻي ٿي جنهن دوران عدالت هڪ جوابدار چاند خان نيازي جي ضمانت منظور ڪري ورتي جڏهن ته ساڳي ڪيس ۾ هڪ ٻئي جوابدار ذاڪر ڊاڊا جي ضمانت رد ڪئي وئي .ارشد پپو ڪيس ۾ 2 جوابدار يوسف بلوچ ۽ جاويد بلوچ پهريان ئي ضمانت تي آزاد ٿيل آهن .جاچ آفيسر عدالت کي استدعا ڪئي ته جيستائين ڪيس جي مرڪزي جوابدار عذير بلوچ کي ٽرائل ڪورٽ ۾ پيش نٿو ڪيو وڃي تيستائين جوابدارن جي ضمانت منظور نه ڪئي وڃي جنهن تي عدالت پڇاڻو ڪيو ته ڇا اوهان ان ڳالهه جي ضانت ڏيو ٿا ته ايندڙ ٻڌڻي تائين عزير بلوچ ۽ اکين ڏٺن شاهدن کي عدالت ۾ پيش ڪيو ويندو ..؟ جنهن تي جاچ آفيسر يامين گجر چيو ته هو ان جي ضمانت نٿو ڏئي سگهي .جاچ آفيسر عدالت کي ٻڌايو ته عزير بلوچ جي آءِ ٽي آڏو ان ڳالهه جو اعتراف ڪيو آهي ته هن پنهنجي پيءُ جي قتل جو بدلو وٺڻ لاءِ ارشد پپو کي قتل ڪيو .جڏهن ته ٻين جوابدارن جي وڪيل عدالت کي آگاهه ڪيو ته سندس موڪل واقعي واري هنڌ تي موجود نه هئا مٿن ڪوڙو الزام مرهيو ويو آهي جنهن کانپوءِ هڪ چڻي جي ضمانت منظور ڪندي ڪيس جي ٻڌڻي منظور ڪئي وئي .
باڪسنگ ڊي ٽيسٽ: پاڪستان جو ڏکڻ آفريڪا خلاف پهريان بيٽنگ جو فيصلو
پهرين ٽيسٽ ۾ زخمي هارث سهيل جي جڳهه تي شان مسعود کي ٽيم ۾ شامل ڪيو ويو
سينچورين (اسپورٽس ڊيسڪ) پاڪستان ۽ ڏکڻ آفريڪا وچ ۾ پهرين ٽيسٽ ميچ ۾ پاڪستان ٽاس کٽي پهريان بيٽنگ جو فيصلو ڪري ورتو آهي. سينچورين جي سپر اسپورٽس پارڪ ۾ ٻنهي ملڪن وچ ۾ ميچ سرفراز احمد ٽاس کٽي بيٽنگ جو فيصلو ڪيو. پاڪستان طرفان محمد عباس، شاداب خان ۽ هارث سهيل زخمي هئڻ ڪري ٽيسٽ ميچ ۾ شرڪت نه ڪري سگهيا، جڏهن ته فخر زمان فٽ ٿي ٽيم جو حصو هوندو. سينچورين جي پچ بالرن لاءِ سازگار ٻڌائي پئي وڃي، جيڪا تيز ۽ بائونسي آهي، جڏهن ته پچ تي بال سوئنگ ٿيڻ جا امڪان پڻ آهن. پاڪستان جي ٽيم ۾ فخر زمان، امام الحق، اظهر علي، اسد شفيق، شان مسعود، بابر اعظم، سرفراز احمد، حسن علي، ياسر شاهه، محمد عامر ۽ شاهين آفريدي شامل هوندا. ڏکڻ آفريڪا طرفان ڊيل اسٽين کي پنهنجي ملڪ طرفان سڀ کان وڌيڪ وڪيٽون حاصل ڪرڻ لاءِ هڪ وڪيٽ جي ضرورت آهي، جنهن سان ڊيل اسٽين شان پولاڪ جو 422 وڪيٽن جو رڪارڊ ٽوڙيندو.
صنعتي پلاٽن جو ڪمرشل استعمال: واٽر ڪميشن سنڌ سرڪار کي پاليسي جوڙي رپورٽ پيش ڪرڻ جو حڪم ڏئي ڇڏيو
صنعتي پلاٽ ڪهڙي قانون تحت ڪمرشل لاءِ استعمال پيا ٿين: واٽر ڪميشن جو پڇاڻو
نالن تان ڪمرشل استعمال فوري طور ختم ڪيو وڃي: واٽر ڪميشن جو حڪم
ڪراچي(ن پ ا) صنعتي پلاٽ ڪهڙي قانون تحت ڪمرشل لاءِ استعمال ڪيا پيا وڃن، وضاحت ڏني وڃي: واٽر ڪميشن سنڌ سرڪارکي هڪ مهيني اندر پاليسي رپورٽ پيش ڪرڻ ۽ نالن تان ڪمرشل جو استعمال فوري طور ختم ڪرڻ جو حڪم ڏئي ڇڏيو، ايڊووڪيٽ جنرل سنڌ چيو ته صنعتي پلاٽس تي ڪمرشل سرگرميون ڪيترن ئي سالن کان جاري آهن، ڪيئن ٿيون ختم ڪري سگهجن؟
سنڌ هاءِ ڪورٽ ۾ واٽر ڪميشن حيدرآباد جا صنعتي پلاٽس ڪمرشل لاءِ استعمال ڪرڻ واري معاملي جي ٻڌڻي ڪئي، جنهن دوران ايڊووڪيٽ جنرل سنڌ، ڊي جي سنڌ بلڊنگ ڪنٽرول اٿارٽي ۽ ٻيا ڪميشن آڏو پيش ٿيا.
ايڊووڪيٽ جنرل سنڌ چيو ته صنعتي پلاٽس تي ڪمرشل سرگرميون ڪيترن ئي سالن کان جاري آهن، ڪيئن ٿيون ختم ڪري سگهجن؟، فيڪٽري ۾ ڪم ڪندڙ ماڻهن لاءِ به ڪجهه ڪمرشل شيون ٺهي ويون آهن.
ڪميشن ايڊووڪيٽ جنرل سنڌ کان پڇاڻو ڪيو ته صنعتي پلاٽس ڪمرشل بنيادن تي ڪيئن ٿا استعمال ٿي سگهن، 80 سيڪڙو صنعتي پلاٽ ڪمرشل بنيادن تي استعمال ٿي رهيا آهن، نالا کي به ناهي ڇڏيو ويو.
”ڪرپشن جو پئسو واپس ڪندس“ قمبر شهدادڪوٽ جي اڳوڻي اي ڊي او ممتاز طرفان سُپريم ڪورٽ آڏو ضمانت
عدالت اڳوڻي اي ڊي او جي مشروط ضمانت منظور ڪري ورتي،: عدالت
65 لک رُپيا جمع ڪرائڻ بعد ممتاز کي آزاد ڪيو وڃي
اسلام آباد (رپورٽر) سُپريم ڪورٽ قمبر شهدادڪوٽ جي اڳوڻي اي ڊي او جي ضمانت منظور ڪندي کيس 65 لک رُپيا جمع ڪرائڻ بعد آزاد ڪرڻ جو حڪم ڏئي ڇڏيو. سُپريم ڪورٽ ڪراچي رجسٽري ۾ قمبر شهدادڪوٽ ضلعي اندر تعليم کاتي ۾ ڪرپشن واري ريفرنس تي ٻڌڻي ٿي. جنهن دوران ريفرنس ۾ ڄاڻايل جوابدار قمبر شهدادڪوٽ جي اڳوڻي اي ڊي او ممتاز علي جي وڪيل عدالت کي ضمانت ڏني ته ڪرپشن ذريعي لُٽيل پئسو واپس ڪيو ويندو. جنهن تي نيب پراسيڪيوٽر چيو ته جيڪڏهن جوابدار ڪرپشن جو پئسو واپس ڪري ته سندس ضمانت تي اسان کي ڪوبه اعتراض نه آهي. عدالت اڳوڻي اي ڊي او جي ضمانت مشروط طور منظور ڪندي چيو ته جوابدار طرفان 61 لک رُپيا جمع ڪرائڻ بعد کيس ضمانت تي آزاد ڪيو وڃي.