سنچورين: (اسپورٽس ڊيسڪ) پاڪستان ۽ ڏکڻ آفريقا ۾ پهرين ٽيسٽ جي پهرين ڏينهن پاڪستان جي سڄي ٽيم 181 رنسن تي آئوٽ ٿي وئي، جڏهن ته ڏکڻ آفريقا جي اڌ ٽيم به 127 رنسن تي پويلين موٽي.
سينچورين ۾ پاڪستان ۽ ڏکڻ آفريقا ۾ ٽن ٽيسٽ ميچن تي ٻڌل سيريز جي پهرين ميچ جي پهرين ڏينهن بيٽسمين بالرن آڏو ڄمي کيڏڻ ۾ ناڪام ويا. پاڪستاني ٽيم ٽاس کٽي پهرين بيٽنگ جو فيصلو ڪيو. پاڪستاني بيٽسمين ڏکڻ آفريقا جي بالرن آڏو نه بيهي سگهيا، سموري ٽيم 181 رنسن تي پويلين ڀيڙي ٿي.
ڪپتان سرفراز احمد ۽ اوپننگ بيٽسمين امام الحق بنا ڪنهن رنس ٺاهڻ جي آئوٽ ٿيا، جڏهن ته اظهر علي 36، فخر زمان 12، شان مسعود 19، اسد شفيق 7، ياسر شاهه 4 ۽ محمد عامر هڪ رنس ٺاهي آئوٽ ٿيا.
بابر اعظم ۽ حسن علي نائين وڪيٽ تي 67 رنسن جي ڀائيواري جوڙي، جڏهن ته 178 رنسن جي ڪل اسڪور تي بابر اعظم 71 رنسن تي ربادا جو شڪار بڻيو. پاڪستان جي آخري وڪيٽ 181 رنسن تي شاهين آفريدي جي ڪري.
پاڪستان طرفان پهرين اننگ ۾ بابر اعظم 71، اظهر علي 36 ۽ حسن علي 21 رنسن ٺاهي نمايان رهيا. ٻي پاسي ڏکڻ آفريقا طرفان ڊيان اوليور شاندار بالنگ جو مظاهرو ڪندي 6 شڪار ڪيا، جڏهن ته ڪگيسو رابادا 3 ۽ ڊيل اسٽين هڪ وڪيٽ حاصل ڪئي.
پهرين اننگ جي شروعات ۾ ڏکڻ آفريقي اوپنر محتاط راند کيڏي، پر 30 رنسن بعد وڪيٽون ڪرڻ شروع ٿي ويون، اهڙي طرح ڏکڻ آفريقا 5 وڪيٽن جي نقصان تي 127 رنسون ٺاهيون. اوپنر مرڪرام 12 رنسن تي حسن جو شڪار بڻيو، اليگر کي 22 رنسن تي شاهين آفريدي پويلين ڀيڙو ڪيو. جنهن بعد ٽي بي برون 29 رنسن جي اننگز کيڏي آئوٽ ٿيو. هاشم آملا به 8 رنسن تي پويلين موٽيو. ڏکڻ آفريقي ڪپتان فاف دوپليسي بنا ڪنهن رنس ٺاهڻ جي شاهين آفريدي جو شڪار بڻيو. پهرين ٽيسٽ جي پهرين ڏينهن ڏکڻ آفريقا 5 وڪيٽن جي نقصان تي 127 رنسون ٺاهيون. باووما 38 رنسن ۽ ڊيل اسٽين 13 رنسن تان سڀاڻي ٻي ڏينهن جي راند شروع ڪندا.
سنچورين ٽيسٽ جو پهريون ڏينھن بالرن جي نانءُ : ڏکڻ آفريقا جي اڌ ٽيم 127 تي آئوٽ، پاڪستاني ٽيم 181 رنسون ٺاھي سگھي
پهرين اننگ ۾ محمد عامر ۽ شاهين آفريدي 2-2 شڪار ڪيا، حسن علي هڪ وڪيٽ ورتي
عابدي جو قتل وڏو سانحو آهي، دهشتگردن کي ٻيهر ڪر کڻڻ نه ڏبو: شهريار آفريدي
ڪراچي (رپورٽر) مملڪتي گهرو وزير شهريار آفريدي چيو آهي ته علي رضا عابدي جو قتل وڏو سانحو آهي، ڪراچي ۾ دهشتگردن کي ٻيهر ڪر کڻڻ نه ڏينداسين، ڪراچي ۾ مملڪتي گهرو وزير شهريار آفريدي ۽ وفاقي وزير علي زيدي گورنر عمران اسماعيل سان ملاقات ڪئي، گورنر کين علي رضا عابدي جي قتل واقعي ۾ ٿيل اڳڀرائي کان آگاهه ڪيو، ان موقعي تي مملڪتي گهرو وزير شهريار آفريدي ميڊيا سان ڳالهائيندي چيو ته قانون لاڳوڪندڙ ادارا گڏيل آپريشن ذريعي شرپسندن جي نيٽ ورڪ جو خاتمو آڻن،علي رضا عابدي جو قتل وڏو سانحو آهي، امن دشمن عنصرن خلاف سخت قدم کنيا وڃن، ڪراچي واسي پريشان نه ٿيو، حڪومت اوهان سان گڏ آهي، اسان کي هڪ ٽيم بڻجي دهشتگردي خلاف وڙهنداسين، ڪراچي سميت پوري پاڪستان کي پرامن بڻايو ويندو.
ملير جي جج جو ٿاڻي تي ڇاپو: وڪيل سڪندر شر بازياب: ھڙتال، عدالتي ڪارروائين جو بائڪاٽ
پوليس خلاف جمعي تائين احتجاج جاري رکڻ جو اعلان، عدالتي ڪارروائين جو بائڪاٽ ڪبو
ملير پوليس سڪندر شر کي گرفتار ڪري قانون جا بخيا اڊيڙي ڇڏيا آهن: ملير بار ايسوسيئيشن
ملير (رپورٽر(جوڊيشل مئجسٽريٽ نمبر 9 ملير آصف اڪبر شاھ لطيف ٿاڻي تي ڇاپو ھڻي باندي بنايل ملير بار جي نائب صدر سينيئر وڪيل سڪندر شر کي بازياب ڪرائي ورتو ۽ ايس ايڇ او شاھ لطيف کي رڪارڊ سميت سيشن ڪورٽ ملير طلب ڪيو،ان واقعي خلاف وڪيلن ملير ڪورٽ آڏو هاءِ وي تي احتجاجي مظاھرو ڪري ڌرڻو ھنيو.جنھن سبب ايندڙ ويندڙ ٽريفڪ معطل ٿي وئي.مظاھرين وڪيلن چيو ته شاھ لطيف پوليس بي ڏوھي وڪيل اڳواڻ کي ڪوڙي ايف آءِ آر داخل ڪري گرفتار ڪيو .جنھن کي عدالتي ڇاپي بعد بازياب ڪرايو ويو آھي.انھن چيو ته پوليس گردي ڪنھن به صورت قبول نه ڪئي ويندي ۽ ايس ايڇ او شاھ لطيف نيڪ محمد کوسو کي معطل ڪري سندس خلاف ڪاروائي ڪئي وڃي. ٻئي طرف ايس ايڇ او شاھ لطيف صحافين کي ٻڌايو ته پوليس لينڊ گريبر راجا آصف کي گرفتار ڪيو ھو جنھن تي ۲۵ ايف آء آر داخل آھن .انکي ڇڏائڻ لاء وڪيل رات جو شراب جي نشي ۾ ڌت ٿي ٿاڻي تي آيو ۽ پوليس سان بدتميزي ڪئي گھٽ وڌ ڳالھايو. جنھن کانپوءِ وڪيل اڳواڻ کي گرفتار ڪري ميڊيڪل ڪرايو ويو، ميڊيڪل رپورٽ ۾ پڻ نشو ثابت ٿيو آھي, هن چيو ت مون ڪو به غلط قدم نه کنيو آھي قانون جي دائري ۾ رھي قانوني ڪاروائي ڪئي آھي. ٻئي طرف ملير بار پاران واقعي خلاف ٽي ڏينهن هڙتال جو اعلان ڪيو آھي.
پشاور: وحشي صفت نوجوان پنھنجي والد، 3 ڀائرن ۽ چاچي کي قتل ڪرڻ بعد آپگھات ڪري ڇڏيو
واردات بعد نوجوان آپگھات ڪري ڇڏيو، جوابدار ذهني مريض هو، جاچ ڪريون پيا: پوليس
پشاور (م ڊ) پشاور ۾ نوجوان پٽ ۽ ڀائرن سميت 5 گهرڀاتين کي قتل ڪري آپگهات ڪري ڇڏيو، ٿڪال واري علائقي ۾ هڪ نوجوان گوليون هڻي پنهنجي پيءُ، ٽن ڀائرن ۽ چاچي کي قتل ڪري ڇڏيو، جنهن کانپوءِ جوابدار پنهنجي زندگي جو به انت آندو، پوليس واقعي واري هنڌ پهچي لاش ضروري ڪارروائي لاءِ اسپتال پهچايا، واقعي بابت پوليس جو چوڻ آهي ته نوجوان ذهني مريض هو، جنهن پنهنجي 5 گهرڀاتين کي قتل ڪرڻ بعد پاڻ به آگهات ڪيو آهي، واقعي جي وڌيڪ جاچ ڪئي پئي وڃي.
روجهاڻ مزاري ۾ حادثو، ڪشمور واسي 2 نوجوان فوت
ڪشمور(ن پ ا) پنجاب جي علائقي روجهاڻ ۾ روڊ حادثي جي نتيجي ۾ ڪشمور واسي 2 نوجوان فوت ٿي ويا، هڪ ٻار ۽ 2 عورتون زخمي ٿي پيون.
روجهاڻ ۾ انڊس هاءِ وي تي ڪار ۽ ٻن موٽرسائيڪل وچ ۾ خوفناڪ ٽڪر ٿيو، جنهن جي نتيجي ۾ ڪشمور واسي نوجوان شهزادو چاچڙ ۽ نور احمد گولاٽو ٿڌي تي فوت ٿي ويا.
حادثي جي نتيجي ۾ هڪ ٻار ۽ 2 عورتون به زخمي ٿي پيون، فوتين جا لاش ۽ زخمين کي روجهاڻ اسپتال پهچايو ويو، جتان ضروري ڪارروائي بعد فوتين جا لاش ڪشمور روانا ڪيا ويا
حمزه شهباز ۽ سندس ڪٽنب ٻنهي هٿن سان ملڪ کي لٽيو آهي: فياض الحسن
حمزه جو پيءُ، چاچو ۽ پاڻ جيل ۽ عدالتن جا چڪر پيا ڪاٽن، اڃا عمران خان اناڙي آهي؟
جهڙي طرح ملڪ لٽيو ويو، اهڙي ئي جذبي سان جواب ڏنو وڃي: صوبائي وزير
لاهور( م ڊ ) پنجاب جي سڌ سماءَ واري وزير فياض الحسن چوهاڻ چيو آهي ته حمزه شهباز جو پيءُ، چاچو ۽ پاڻ جيل ۽ عدالتن جا چڪر ڪاٽي رهيا آهن پوءِ به حمزه شهباز چوي ٿو ته عمران خان اناڙي آهي، جهڙي طرح ملڪ لٽيو، اهڙي ئي جذبي سان احتساب جي ادارن کي جواب ڏين.
لاهور ۾ ڳالهائيندي صوبائي وزير فياض الحسن چوهاڻ حمزه شهباز جي بيان تي ردعمل ظاهر ڪندي چيو ته حمزه شهباز ۽ سندس خاندان ٻنهي هٿن سان ملڪ کي لٽيو ۽ ڦريو آهي، ڇا 165 کرب رپيا ڦرڻ وارن جون پيشيون عوام جي نظر ۾ اهميت نه ٿيون رکن؟
صوبائي وزير چيو ته جهڙي طرح ملڪ لٽيو ويو، اهڙي ئي جذبي سان احتساب جي ادارن کي جواب به ڏنو وڃي، فياض الحسن چوهاڻ وڌيڪ چيو ته حمزه شهباز جو پيءُ، چاچو ۽ پاڻ جيل ۽ عدالتن جا چڪر ڪاٽي رهيا آهن پوءِ به حمزه شهباز چوي ٿو ته عمران خان اناڙي آهي.
عمران خان کي سياسي انتقام مهانگو پوندو: حمزه شهباز
احتساب پويان انتقام جي ڌپ اچي ٿي، اهڙو نئون پاڪستان عوام رد ڪيو آهي
عمران خان پنهنجي ساڄي ۽ کاٻي پاسي ڏسي، کيس ڪرپٽ ماڻهو نظر ايندا
لاهور (م ڊ) پنجاب اسيمبلي ۾ اپوزيشن ليڊر حمزه شهباز چيو آهي ته احتساب جي پويان انتقام جي ڌپ اچي ٿي، عمران خان کي سياسي انتقام مهانگو پوندو، وزيراعظم پنهنجي ساڄي ۽ کاٻي پاسي ڏسي، کيس ڪرپٽ ماڻهو نظر ايندا.
نيب لاهور ۾ پيشي بعد ميڊيا سان ڳالهائيندي حمزه شهباز چيو ته عمران خان جي حڪومت جي قدمن کي ڏسي رهيا آهيون، انتقامي ڪارروايون حڪمرانن لاءِ ڦاهي جو ڦندو بڻجنديون، اهڙو نئون پاڪستان عوام رد ڪري ڇڏيو آهي.
حمزه شهباز وزيراعظم سان مخاطب ٿيندي چيو ته عمران خان صاحب اوهان مسٽر ڪلين ناهيو، سياسي انتقام اوهان کي مهانگو پوندو، جعلي احتساب جو دور گهڻو وقت نه هلندو، اسان ڄمي مقابلو ڪنداسين، عمران خان بني گالا حد دخلين تي قوم کان معافي وٺي ۽ جيڪڏهن همت آهي ته قوم کي حقيقتون به ٻڌائي.
هن چيو ته احتساب جي پويان انتقام جي ڌپ اچي ٿي، عمران خان پنهنجي ساڄي ۽ کاٻي پاسي ڏسي، کيس ڪرپٽ ماڻهو نظر ايندا، وزيراعظم هوش کان ڪم وٺي، ،معاشي حالتون خطرناڪ ٿي ويون آهن، ناڻي جي مٽا سٽا جا ذخيرا ڪجهه هفتن لاءِ رهجي ويا آهن ۽ هو احتساب جي پويان پئجي ويو آهي.
سري ديوي جي “زيرو” ۾ اداڪاري ڏسي مداح لڙڪ لاڙي ويٺا
سري ديوي جي مداحن سندس آخري پرفارمنس ڏسڻ لاءِ زيرو ڏٺي
ممبئي (شوبز نيوز) هلندڙ سال اوچتو لاڏاڻو ڪري ويل بالي ووڊ جي ناليواري اداڪاري سري ديوي آخري ڀيرو شاهه رخ خان جي فلم زيرو ۾ مختصر ڪردار ادا ڪيو هو. سري ديوي جا مداح سندس زندگي جي آخري پرفارمنس ڏسڻ لاءِ زيرو فلم کي ڏسي رهيا آهن، جنهن دوران ڪيترائي مداح سري ديوي کي ڏسي لڙڪ لاڙي ويٺا. سماجي رابطن واري ويبسائيٽ ٽوئٽر تي ڀارت ۾ سري ديوي جي نالي سان ٽرينڊ بڻجي ويو آهي ۽ مداح زيرو فلم ڏسڻ کانپوءِ سري ديوي کي آخري ڀيرو وڏي اسڪرين تي اداڪاري ڪندي ڏسڻ ويا، جنهن بابت هو تاثر ونڊي رهيا آهن.
آلرائونڊر امجد جاويد رٽائرمينٽ جو اعلان ڪري ڇڏيو
امجد جاويد گڏيل عرب عمارات جي ڀلوڙ رانديگر ۽ اڳوڻو ڪپتان آهي
عالمي ڪرڪيٽ تان رٽائرمينٽ وٺڻ آسان نه هئي: اڳوڻو ڪپتان امجد جاويد
دبئي (اسپورٽس ڊيسڪ) گڏيل عرب عمارات جي اڳوڻي ڪپتان ۽ آل رائونڊر امجد جاويد عالمي ڪرڪيٽ تان رٽائر ٿيڻ جو اعلان ڪيو آهي. 38 سالن جو امجد جاويد ساڄي هٿ سان فاسٽ بالنگ ڪرڻ سان گڏ بيٽنگ به ڪندو هو. هن گڏيل عرب عمارات جي 15 ون ڊي ميچن ۾ نمائندگي ڪئي، جڏهن ته 22 ٽي 20 ميچن ۾ پڻ يو اي اي طرفان کيڏيون. امجد جاويد کي وڏي عمر ۾ ٽيم ۾ شامل ڪيو ويو هو، انڪري سندس عالمي ڪرڪيٽ اندر ڪيريئر گهڻو وقت هلي نه سگهيو. امجد جاويد تيز بالنگ ڪرائڻ سان گڏ بيٽنگ به سٺي ڪندو هو، جنهنڪري هو يو اي اي جو اهم ۽ سينيئر رانديگر طور ڳڻيو ويندو هو.
ريچا چڍا “سيڪشن 375” لاءِ وڪيل کان سکيا وٺڻ لڳي
ريچا چڍا پهريون ڀيرو ايندڙ فلم ۾ هڪ وڪيل جو ڪردار ادا ڪندي
سيڪشن 375 جي ڪهاڻي اصلي واقعن تي ٻڌل آهي: هدايتڪار
ممبئي (شوبز نيوز) بالي ووڊ ۾ منفرد فلمن جي ڪري مشهور ريچا چڍا پنهنجي ايندڙ فلم ۾ ڪيريئر ۾ پهريون ڀيرو وڪيل جو ڪردار ادا ڪندي. سندس فلم سيڪشن 375 کي اجي بهل ڊائريڪٽ ڪري رهيو آهي. فلم ۾ ڪردار سان انصاف ڪرڻ لاءِ هن ممبئي مان هڪ مشهور وڪيل کان ٽريننگ وٺڻ شروع ڪري ڇڏي آهي. سندس چوڻ آهي ته ڪردار ادا ڪرڻ کان اڳ هو وڪالت جي باري ۾ ڄاڻ حاصل ڪرڻ چاهي ٿي. ريچا چڍا فلم جي حوالي سان ڳالهائيندي چيو ته هوءَ هڪ اهڙي وڪيلياڻي جو ڪردار ادا ڪري رهي آهي، جيڪا ڪيس صرف انصاف ڏيارڻ لاءِ وڙهندي آهي.
ننگرپارڪر ڪرڪيٽ ٽورنامينٽ دلبر اليون سخت مقابلي ڪندي کٽي ورتو
مرحوم الهه بچايو ڪرڪيٽ ٽورنامينٽ ۾ ٿرپارڪر ضلعي 8 بهترين ٽيمن حصو ورتو
فائنل ۾ دلبر اليون سخت مقابلو ڪندي ڪنگز اليون کي 5 رنسن تان مات ڏئي ڇڏي
ننگرپارڪر (رپورٽ فيض کوسو ) ننگرپارڪر ۾ مرحوم الهبچايو مهر ميموريل ڪرڪيٽ ٽورنامينٽ ڳوٺ سوندر ۾ ٿيو. جنهن ۾ ٿرپارڪر ضلعي جي 8 بهترين ٽيمن دلبر اليون، ڪنگز اليون، شهيد غلام رحيم اليون، طوفان اليون، غوثيه اليون رامسر، غازي اليون اسلام ڪوٽ، حر مجاهد اليون، ڊينجرز اليون حصو ورتو.
ٽورنامينٽ جو فائنل ميچ دلبر اليون ننگرپارڪر ۽ ڪنگز اليون ننگرپارڪر جي وچ ۾ ٿيو، جيڪو انتهائي سخت مقابلي کانپوءِ دلبر اليون 5 رنسن تان پنهنجي نالي ڪيو. دلبر اليون پهريان بيٽنگ ڪندي 98 جو ٽارگيٽ ڏنو، جنهن جي جواب ۾ ڪنگز اليون 93 اسڪور ٺاهي سگهي.
ٽورنامينٽ جي ڀلوڙ رانديگر جو ايوارڊ ننگر پارڪر جي بهترين آل رائونڊر فضل حسين، بهترين بيٽسمين انظار حسين ۽ بالر جو ايوارڊ سجاد حسين حاصل ڪيو . آخر ۾ ونر ٽيم جي ڪپتان لجپت ڪولهي ۽ رنر ٽيم جي ڪپتان نصرﷲ کوسو کي فنڪشنل مسلم ليگ ليبر ونگ ضلعي ٿرپارڪر جي نائب صدر محمد خان مهر ٽرافيون ۽ ڪيش انعام ڏنو.
“ڪوٽڙي ۾ انتظاميا جي نااھلي” ڊرينيج سسٽم ناڪارا ھجڻ ڪري گندو پاڻي گھرن ۽ دڪانن ۾ داخل، شھري پريشان
ڊرينيج لائين بند ٿيڻ سبب شاهه لطيف چوڪ ،دريا آباد ڪالوني ۾ گٽر جو پاڻي گهرن ۾ داخل
باريچا چوڪ ،جهاجر ڪالوني ، پٺان ڪالوني واسي به گٽر جو پاڻي نيڪال نه ٿيڻ سبب پريشان
ڪوٽڙي(ن پ ا ) ڪوٽڙي جي مختلف علائقن، شاھ لطيف چونڪ، باريچا چونڪ ، ڀٽي پاڙي، دريا آباد ڪالوني ، جهاجر ڪالوني، پٽاڻ ڪالوني سميت ٻين ڪالونين ۾ گٽرن جو گندو پاڻي گهرن ۾ داخل ٿي ويو جنهن سبب علائقي واسي سخت پريشان آهن .هنن مطالبو ڪيو آهي ته سندن گهن مان گندي پاڻي جو نيڪال ڪرايو وڃي . علائقي واسين سلمان جوکيو ، شڪيل رضا صديقي ، ڪاشف حسين ڏاوچ ۽ ٻين ٻڌايو ته ميونسپل ڪميٽي ڪوٽڙي جي 2 ڪروڙ 25 لک روپيه مهينو بجيٽ هئڻ باوجود ڪوٽڙي واسي بنيادي سهولتن کان محروم آهن . هن وقت ڪوٽڙي جون مختلف ڪالونيون گٽرن جي گندي پاڻي جي هيٺ اچي ويون آهن ۔ڪيترائي ڀيرا ڊي سي ڄامشورو، ميونسپل ڪميٽي چيئرمين، چيف ميونسپل آفيسر اڳيان دانهيون آهي پر ڪو به نوٽيس وٺڻ لاء تيار ناهي.هنن چيو ته گندي پاڻي جي گهرن ۾ داخل ٿيڻ ۽ روڊن تي بيهڻ سبب ڪيترن ئي بيمارين منهن ڪڍيو .هوڏانهن رابطو ڪرڻ تي چيف ميونسپل آفيسر ڪوٽڙي اشوڪ ڪمار ٻڌايو ته 20 سال پراڻي ڊرينيج لائين آهي ، لائين چوڪ ٿيڻ سبب اهڙو مسئلو ٿيو آهي، ڪم جاري آهي جلد ئي ڊرينيج لائين بحال ڪري گندو پاڻي نيڪال ڪيو ويندو.
محرابپور ۾ ٽائون ڪميٽي جو پيرسن ملازم پگهار لاءِ دربدر
ٽائون ڪميٽي جي چيئرمين جي بنگلي آڏو پيرسن جو احتجاج، ملازمن ڌڪا ڏئي موٽائي ڇڏيو
11 سالن کان ڪم پيو ڪريان، عملدارن بنا جواز منهنجي پگهار بند ڪري ڇڏي آهي: پيرسن
محرابپور (ن پ ا) ٽائون ڪاميٽي جو پيرسن ملازم اجرت نه ملڻ ڪري دربدر ٿي ويو، ٽائون ڪميٽي چيئرمين جي بنگلي آڏو احتجاج دوران ملازمن پيرسن کي ڌڪا ڏئي موٽائي ڇڏيو، پيرسن چيو آهي ته ٻن مهينن کان پگهارون بند ڪري جيئڻ جنجال بڻايو ويو آهي.
ملازم غوث بخش سومرو قرآن شريف کڻي ٽائون ڪاميٽي جي چيئرمين فاروق احمد لوڌي جي بنگلي آڏو احتجاج ڪيو ۽ نعريبازي ڪئي، جنهن بعد پريس ڪلب ۾ ميڊيا سان ڳالهائيندي پيرسن غوث بخش سومرو دانهيو ته مان گذريل 11 سالن کان ڊيلي ويجز تي بيلدار طور ڪم ڪري رهيو آهيان پر پورهيت دشمن چيئرمين من پسند ماڻهن کي رشوت عيوض پڪو ڪرايو پر منهنجي لاءِ ڪجهه به نه ڪيو.
پيرسن الزام هنيو ته ٽائون ڪميٽي چيئرمين جي حڪم تي ڪلارڪ ٻن مهينن کان منهنجي پگهار بند ڪري ڇڏي آهي، پگهار وٺڻ لاءِ چيئرمين جي بنگلي تي ويس پر سندس واٺن ڌڪا ڏئي موٽائي ڇڏيو،
پيرسن ملازم دانهيو ته ٻن مهينن کان پگهارون نه ملڻ ڪري منهنجا ٻچا بکون ڪاٽي رهيا آهن، اسپتال ۾ داخل بيمار گهرواري جو علاج رڪجي ويو آهي، معاملي جو نوٽيس وٺي فوري طور پڪو ڪرائي رڪيل پگهارون جاري ڪيون وڃن.
”قرض ڇو نه ڏنو“ بالي ووڊ اداڪار ارجن رامپال تي ڪيس داخل
ارجن رامپال هڪ ڪمپني کي هڪ ڪروڙ قرض واپس نه ڪيو
مقرر تاريخ تي قرض ادا نه ڪرڻ تي ڪمپني ارجن خلاف ڪيس داخل ڪرايو
ممبئي (شوبز نيوز) بالي ووڊ ادڪار ارجن رامپال ڏکيائين ۾ ڦاسي پيو آهي، هڪ ڪمپني کان کنيل قرض وقت تي نه ڏيڻ خلاف مٿس ڪيس داخل ڪيو ويو آهي. واءِ ٽي اينٽرٽينمينٽ ڪمپني پاران ارجن رامپال کي هڪ سال لاءِ 12 سيڪڙو وياج تي هڪ ڪروڙ روپيا ڏنا هئا، جيڪي ارجن رامپال ادا ڪري نه سگهيو آهي. ارجن رامپال پاران ڪمپني کي هڪ چيڪ ڏنو، پر اهو وقت تي پاس ناهي ٿيو.
شهيد راڻي بينظير ڀٽو جي 11 هين ورسي، ڳڙهي خدابخش ۾ سڪيورٽي جا غير معمولي انتظام
سڄي ملڪ مان جيالن ۽ پ پ ڪارڪنن جي ڳڙهي خدابخش آمد جاري، واڪ ٿرو گيٽ قائم
27 ڊسمبر تي مُک جلسي کي بلاول ڀٽو، آصف زرداري ۽ ٻيا اڳواڻ خطاب ڪندا
نئون ديرو(رپورٽ:افتخار علي شاھ) شهيد راڻي بينظير ڀٽو جي سڀاڻي يارهين ورسي ملهائي ويندي، ورسي تقريبن ۾ شرڪت لاءِ سنڌ سميت ملڪ جي ڪنڊ ڪڙڇ مان پيپلزپارٽي جي قافلن جي ڳڙهي خدا بخش آمد جو سلسلو جاري آهي، سڪيورٽي لاءِ هزارين اهلڪار مقرر ڪيا ويا، مک جلسي کي بلاول ڀٽو ۽ آصف زرداري خطاب ڪندا.
شهيد بينظير ڀٽو جي ورسي جون تياريون مڪمل ڪيون ويون آهن، تقريبن جي شروعات ڳڙهي خدابخش ڀٽو ۾ مزار تي سڀاڻي صبح ڌاري قرآن خواني سان ڪئي وئي، ورسي جي موقعي تي مزار جي چوڌاري ۽ ڳڙهي خدابخش ايندڙ ويندڙ رستن تي پوليس اٽالا مقرر ڪيا ويا آهن.
ورسي تقريبن ۾ شرڪت لاءِ سنڌ، پنجاب، بلوچستان، خيبرپختونخوا ۽ گلگت بلتستان سميت سڄي ملڪ مان پيپلزپارٽي جي جيالن ۽ ڪارڪنن جي قافلن جي صورت ۾ ڳڙهي خدابخش آمد جو سلسلو جاري آهي، جيڪو سڀاڻي شام تائين جاري رهندو.
شهيد راڻي بينظير ڀٽو جي ورسي جي موقعي تي مک جلسو منجهند هڪ وڳي شروع ٿيندو، جنهن کي پ پ جو چيئرمين ۽ شهيد راڻي جو پٽ بلاول ڀٽو زرداري ۽ پ پ جو شريڪ چيئرمين آصف علي زرداري خطاب ڪندا، انهن کانسواءِ ٻيا به پارٽي جا مرڪزي اڳوڻ پڻ جلسي کي خطاب ڪندا.
ورسي جي موقعي تي سڪيورٽي لاءِ 7 هزار پوليس اهلڪار مقرر ڪيا ويا، جنهن ۾ 28 ايس ايس پيز، 76ڊي ايس پيز، 92 انسپيڪرز، 290 سب انسپيڪٽرز،465 اي ايس آئيز، 520 هيڊ ڪانسٽيبل ۽ 5429 ڪانسٽيبل ذميواريون نڀائيندا، کانسواءِ اسپيشل برانچ، آر آر ايف ڪمانڊوز ۽ رينجرز جا جوان پڻ مقرر هوندام، سڪيورٽي صورتحال جي سي سي ٽي ڪئمرائن ذريعي به نگراني ڪئي ويندي، واڪ ٿروگيٽ ۽ بم ڊسپوزل اسڪواڊ جي مدد سان چيڪنگ به ڪئي پئي وڃي.
ڳڙھي خدا بخش ڀٽو ۾ ملڪ جي ڪنڊ ڪڙڇ مان پهچندڙ جيالن کي رهائڻ لاءِ 200 کان مٿي ڪيمپون لڳايون ويون آهن، مزارن جي ويجهو فري ميڊيڪل ڪيمپڳن لڳائي صحت کاتي جو عملو مقرر ڪيو ويو آھي، شهيد ذوالفقار علي ڀٽو ۽ شھيد راڻي بينظير ڀٽو جي زندگيء جون پنجن هزارن کان مٿي تصويرون رکيون ويون آھن.