لاهور (اسپورٽس ڊيسڪ) قومي ٽيم جو مينيجر طلعت علي سينيئر رانديگرن کي گٿا لفظ ڳالهائيندڙ هيڊ ڪوچ مڪي آرٿر جي دفاع لاءِ ميدان تي اچي ويو.
پي سي بي پاران جاري ڪيل پڌرائي ۾ وضاحت ڪئي وئي آهي ته سنچورين ٽيسٽ جي ٻئين ڏينهن راند ختم ٿيڻ تي مڪي آرٿر جي مينجمينٽ ۽ رانديگرن سان ملاقات ٿي هئي، پر ان ۾ ڪا ڳالهه معمول کان هٽيل نه هئي.
قومي ٽيم جي مينيجر طلعت علي جو چوڻ آهي ته پاڪستان ٽيم جي مينجمينٽ ۽ رانديگر متحد ۽ هاڪاري نتيجا ڏيڻ لاءِ پرعزم آهن.
ياد رهي ته سنچورين ٽيسٽ جو ٻيو ڏينهن ختم ٿيڻ تي ميڊيا ۾ اهي اطلاع هئا ته هيڊ ڪوچ مڪي آرٿر غيرذميواراڻي بيٽنگ تي سينيئر رانديگرن سان ڏند چڪ ڏنا هئا، ۽ ڊريسنگ روم ۾ پڻ ٽوڙ ڦوڙ به ڪئي.
پي سي بي ھيڊڪوچ مڪي آرٿر جي دفاع ۾ ميدان ۾ اچي وئي
مانجهند ڀرسان ڪار ڊرائيور جي ڪنٽرول مان نڪري وئي،هڪ فوت،3 زخمي
ڄامشورو (رپورٽر) انڊس هاءِ وي مانجهند شهر ۾ ڪار ڊرائيور جي ڪنٽرول مان نڪري کاهي ۾ ڪري پئي، حادثي جي نتيجي ۾ قاسم آباد واسي سلمان مهر فوت ٿي پيو، جڏهن ته ٽي ڄڻا فهيم عمراڻي، شهزاد ۽ سيد طالب شاهه شديد زخمي ٿي پيا،فوتي ۽ زخمين کي تعلقه مانجهند منتقل ڪيو ويو.
جيڪب آباد ڀرسان ٻه موٽرسائيڪلون ٽڪرائجي ويون،پيءُ فوت،ٻه پٽ زخمي
جيڪب آباد)رپورٽر)جيڪب آباد ڀرسان شمبي شاھ لڳ ٻه موٽرسائيڪلون ٽڪرائجي ويون،هڪ ڄڻو فوت ۽ ٻه ڄڻا زخمي ٿي پيا،صدر ٿاڻي جي حد شنبي شاھ لڳ ٻن موٽرسائيڪلن ۾ آمھون سامھون ٽڪر ٿي پيو ٽڪر جي نتيجي ۾ 50 ورهين جو عبداللطيف جکراڻي موقعي تي فوت ٿي ويو، جڏهن ته سيف الدين ۽ قمرالدين جکراڻي شديد زخمي ٿي پيا،علائقي واسين لاش ۽ زخمين کي سول اسپتال پهچايو،جتي زخمين جو علاج ڪيو پيو وڃي اطلاع ملڻ تي فوتي ۽ زخمين جا وارث اسپتال پھتا لاش کڻائي ڪري پنهنجي ڳوٺ روانا ٿي ويا ،صدر پوليس جي اھلڪار رابطي ڪرڻ تي ٻڌايو ته حادثو اسان جي حد ۾ ناھي ٿيو ،بلوچستان جو حد آهي اھا پوليس وڌيڪ ڪاروائي ڪندي ٻي پاسي فوتي ۽ زخمي پاڻ ۾ پيءُ پٽ آھن جن جو تعلق بلوچستان جي ٻڌائي پئي وڃي.
انساني حقن لاءِ جاکوڙيندڙ عورتن جي مسئلن لاءِ ريپڊ ريسپانس نيٽ ورڪ قائم
ڪلثوم ڀٽي فوڪل پرسن مقرير،نيٽ ورڪ ۾ صحافي، وڪيل ۽ پوليس عملدار شامل
معاشري مان تشدد جي خاتمي لاءِ سڀني کي اڳتي اچڻو پوندو: امداد انڙ
حيدرآباد)رپورٽ؛ فقير سليم) حيدرآباد ۾ انساني حقن لاءِ جاکوڙيندڙ عورتن توڙي مردن کي درپيش مسئلن ۾ مدد لاءِ وڪيلن، صحافين ۽ سول سوسائٽي جي نمائندن تي مشتمل ريپڊ ريسپانس نيٽورڪ قائم ڪيو ويو آهي، سماجي تنظيم ڊي سي ايچ ڊي پاران هڪ مقامي هوٽل ۾ ڪوٺايل گڏجاڻي ۾ مختلف ڌرين شرڪت ڪئي، گڏجاڻي ۾ ڳالهائيندي نغمه شيخ چيو ته انساني حقن جي خلاف ورزي جي خلاف هونئن ته سڀئي جاکوڙ ڪريون پيا، پر انهن جاکوڙيندڙ ماڻهن کي درپيش مسئلن ۽ انهن جي قانوني توڙي اخلاقي مدد جي ضرورت آهي، انهي نيٽ ورڪ جي قيام لاءِ اسين چاهيون ٿا ته حيدرآباد جا مختلف با شعور ماڻهو گڏ ٿين
ڊيموڪريٽڪ ڪميشن فار هيومن ڊيولپمينٽ جي ڪوآرڊينيٽر ڪلثوم ڀٽي چيو ته اسان وٽ سڀ کان ڏکيو ڪم ڪنهن متاثر جي مدد ڪرڻ آهي، هتي ناانصافين جا ڪيترائي ڪيس سامهون اچن ٿا، انهن جي خلاف مرد آواز اٿارين ته انهن کي ڪيترائي مسئلا درپيش آهن، پر عورتون انهن کان وڌيڪ پريشاني کي منهن ڏين ٿيون، عورتن کي ته هڪ ٻاهر جا خطرا ته ٻيو وري سندن گهر جا به ڪيترائي مسئلا درپيش آهن، ته هن وقت اهڙي نيٽورڪ جي ضرورت آهي جيڪو انهن ماڻهن جي مدد ڪري،.
ڊسٽرڪٽ بار حيدرآباد جي صدر امداد انڙ چيو ته ڪنهن به سماجي خدمت دوران متاثر ٿيندڙ هيومن رائٽس ۽ وومين رائٽس ڊفينڊر کي مفت ۾ قانوني مدد فراهم ڪرڻ لاءِ ڊسٽرڪٽ بار تيار آهي، اسان وٽ جيڪو به صدر هوندو اهو انهي نيٽورڪ جو رضاڪاراڻا ميمبر هوندو، هن چيو ته هن نيٽورڪ ۾ ميڊيا، پوليس ۽ عورتن جي حقن لاءِ جاکوڙيندڙ گڏجي جدوجهد ڪندا ته معاشري مان تشدد جو خاتمو اچي سگهي ٿو،
وومين ڊيولپمينٽ جي ڪمپلينٽ سيل جي انچارج قرت العين شاه چيو ته اسان وٽ جيڪي ادارا اڳي سرڪاري طور عورتن جي مدد لاءِ ميدان ۾ آهن، انهي جو اسٽاف به غير محفوظ آهي، کين عدالتن جا چڪر ڪاٽڻا ٿا پون، ضلعي ڪائونسل جي ميمبر زيب النساءِ ملاح چيو ته اسان وٽ اسان جي ڳوٺ ۾ عورتن تي تشدد کي روڪڻ لاءِ لڙاڪو نيٽورڪ موجود آهي، جنهن ۾ شامل مرد ۽ عورتون پنهنجي ڳوٺ ۾ عورتن تي تشدد خلاف آواز اٿاريندا آهن ۽ انهن جي مدد ڪندا آهن، ته جيڪڏهن ماڻهو ڪنهن به مسئلي جي حل لاءِ عملي طور ميدان ۾ ايندو ته ڪاميابي پري ناهي،
ايڇ آر سي پي جي انچارج غفرانا آرائين چيو ته عورتن تي تشدد ته وڏو مسئلو آهي پر جيڪي ماڻهو کنڀجي وڃن ٿا،انهي جي مالڪي جي به ضرورت آهي، انهي نيٽورڪ سان انهن ماڻهن جي مدد ٿي سگهي ٿي جيڪي جبري گمشدگين خلاف آواز اٿارين ٿا، رافيعه بنگش چيو ته اسان وٽ عورتن جي لاءِ شيلٽر هوم آهي، اتي ايندڙ عورتن جا وارث عدالتن ۾ وڃي اسان جي خلاف ڪيس داخل ڪرائين ٿا. گڏجاڻي ۾فرزانه پنهور، پرڀو ستياني، دارلامان جي شبنم عزيز، ايڊووڪيٽ صبا عروج، فضل چانڊيو، سيد صدر حسين، سوشل ويلفئير کاتي جو منير احمد ڀٽي، ظفر احمد برني، منصور ڏاهري، وومين پروٽيڪشن سيل ماروي اعواڻ، ابرار اعواڻ، شاهده پنهور، رقيه بنگش، منير آصف. سنيئر صحافي جئه پرڪاش موراڻي ۽ ٻيا به موجود هئا
شهبازشريف نواز دور جي آڊٽ اعتراضن کان ڌار، معاملو ذيلي ڪاميٽين حوالي
اسلام آباد (بيورو رپورٽ) پبلڪ اڪائونٽس ڪميٽي جي پهرين اجلاس ۾ مسلم ليگ (ن) جي دور حڪومت جي آڊٽ اعتراضن کان پبلڪ اڪائونٽس ڪميٽي جي چيئرمين شهباز شريف الڳ ٿيڻ جو اعلان ڪندي مسلم ليگ (ن) جي حڪومت جي آڊٽ اعتراضن کي ڏسڻ لاءِ 3 سب ڪميٽيون ٺاهڻ جو فيصلو ڪيو آهي. پبلڪ ڪائونٽس ڪميٽي جو پهريون اجلاس ڪميٽي جي چيئرمين شهباز شريف جي صدارت هيٺ ٿيو. اجلاس ۾ سيد نويد قمر، شيري رحمان، حنا رباني کر، رانا تنوير، فخر امام، شيخ روحيل اصغر ۽ ٻين شرڪت ڪئي. اجلاس پبلڪ اڪائونٽس ڪميٽي سيڪريٽريٽ پاران ڪميٽي کي پبلڪ اڪائونٽس ڪميٽي جي دائري ۽ ڪم بابت تفصيلي بريفنگ ڏني وئي. پبلڪ اڪائونٽ ڪميٽي کي ٻڌايو ويو ته چوڌري نثار علي خان جي دوري ۾ 9 آڊٽ رپورٽون قومي اسيمبلي ۾ پيش ڪيو ويون. چوڌري نثار علي خان جي دور ۾ پبلڪ اڪائونٽس ڪميٽي جا 404 اجلاس ٿيا، ان جي دور ۾ 117 ارب 89 ڪروڙ 40 لک روپين جون وصوليون ڪيون ويون جڏهن ته نديم افضل چن جي سربراهي دوران پبلڪ اڪائونٽس ڪميٽي جا 174 اجلاس ٿيا ۽ 30 ارب 90 ڪروڙ 30 لک روپين جون وصوليون ڪيون ويون. نديم افضل چن جي سربراهي ۾ پبلڪ اڪائونٽس ڪميٽيءَ نيب کي 33 ۽ ايف آءِ اي کي 13 مامرا انڪوائري لاءِ موڪليا. سيد خورشيد احمد شاهه جي دوري ۾ پبلڪ اڪائونٽس ڪميٽي 456 اجلاس ڪيا، ان دور ۾ 355 ارب 60 ڪروڙ روپيا وصول ڪيا ويا. سيد خورشيد احمد شاهه جي دور ۾ پبلڪ اڪائونٽس ڪميٽي 168 مامرا نيب ۽ 56 مامرا ايف آءِ اي کي جاچ لاءِ اماڻيا. پبلڪ اڪائونٽس ڪميٽي نيب کان سومر يا اڱاري تي انهن ڪيسن بابت ٿيل اڳڀرائي رپورٽ طلب ڪري ورتي آهي. جڏهن ته اجلاس ۾ ايف آءِ اي جون گريڊ 19 کان گهٽ گريڊ 18 جو آفيسر شريڪ ٿيڻ تي پبلڪ اڪائونٽس جي ميمبرن سخت ناراضگي جو اظهار ڪيو ويو جڏهن ته پبلڪ اڪائونٽس ڪميٽي هدايت ڪئي ته آئينده اجلاس ۾ ڪنهن به وزارت جو گريڊ 19 جو گهٽ آفيسر شرڪت لاءِ نه اچي. پبلڪ اڪائونٽس ڪميٽي جي اجلاس ۾ فيصلو ڪيو ويو ته مسلم ليگ (ن) جي دور حڪومت جي آڊٽ اعتراضن جي جائزي لاءِ 3 کان 4 سب ڪميٽيون ٺاهيون وينديون. شهباز شريف جو چوڻ هو ته مسلم ليگ (ن) جي دور جي آڊٽ اعتراضن کي مان نه ڏسندس جيڪو طئه ٿيو آهي ته ان تي عمل ڪنداسين اسان جي دور جي آڊٽ پيرائن جي جائزي لاءِ سب ڪميٽيون ٺاهيون وينديون. هن چيو ته پبلڪ اڪائونٽ ڪميٽي جي فيصلن تي عملدرآمد لاءِ مانيٽرنگ ڪميٽي ٺاهي ويندي، جڏهن ته عوامي نوعيت جي شڪايتن توڙي معامرن تي پبلڪ اڪائونٽ ڪميٽي ڪارروائي ڪندي. پبلڪ اڪائونٽ ڪميٽي سومر ڏينهن آڊٽ پيرائن بابت آڊيٽر جنرل کان بريفنگ طلب ڪري ورتي آهي. اجلاس دوران ڳالهائيندي پبلڪ اڪائونٽس ڪميٽي جي چيئرمين شهباز شريف چيو ته اسان جو مشن بنا فرق جي احتساب هوندو، ڪنهن جي به طرفداري نه ڪنداسين. ماضي ۾ پبلڪ اڪائونٽس ڪميٽي سٺي ڪارڪردگي جو مظاهرو ڪيو آهي ۽ هي ڪميٽي به غير معمولي اهميت جوڳي آهي. مان اجلاس ۾ شريڪ ٿيندڙ تمام ميمبرن جي آجيان ڪيان ٿو. ڪميٽي جو ڪم قانون مطابق ٽيم ورڪ جي ذريعي ڪرڻ جي ڪوشش ڪنداسين. پبلڪ اڪائونٽس ڪميٽي ميڊيا ۾ خبرون هلائڻ جو فورم نه آهي. اجلاس دوران پي اي سي جي ميمبر فخر امام چيو ته نيب ۽ ايف آءِ اي کي جانچ لاءِ ڪيس موڪلڻ جو طريقيڪار ڇا آهي. تنهن تي پبلڪ اڪائونٽس ڪميٽي جي سيڪريٽري کيس ٻڌايو ته اهو پبلڪ اڪائونٽس ڪميٽي جي صوابديد تي آهي. (ن) ليگ جي روحيل اصغر چيو ته مان اڳ واري پبلڪ اڪائونٽس ڪميٽي جو ميمبر به هوس جيڪي ڪيس نيب ۽ ايف آءِ اي کي موڪليا ويا هئا ان جو نتيجو ڇا نڪتو. جنهن تي سيڪريٽريءَ ڪميٽي کي ٻڌايو ته هن وقت نيب ۾ 11 ڪيسن جي جانچ ۽ 17 جي انڪوائريون هلندڙ آهن. حنا رباني کر چيو ته گلف ڪلب جا مجرم اڃان تائين گرفتار نه ٿيا آهن نيب ۽ ايف آءِ اي اڄڪلهه گهڻا سرگرم آهن. روحيل اصغر چيو ته ڇا نيب سومر ڏينهن مڪمل رپورٽ ڏيندي يا بھانو بنايو ويندو. جنهن تي پبلڪ اڪائونٽس ڪميٽي جي چيئرمين اڱاري تي نيب کان رپورٽ طلب ڪري ورتي. اهڙي ريت ان بعد ايف آءِ اي کي به بريفنگ ڏيڻ جي هدايت ڪئي وئي آهي. اجلاس دوران پبلڪ اڪائونٽس ڪميٽي چوڌري نثار ۽ سيد خورشيد شاهه جي دوري ۾ پبلڪ اڪائونٽس ڪميٽي جي ڪم بابت تعريف ڪئي.
”فريال سنڌ بينڪ جي اڇي ڪاري جي مالڪياڻي ھئي“: جي آءِ ٽي رپورٽ
سنڌ بينڪ جا فيصلا فريال ٽالپر ڪندي آهي، هن 4 من پسند آفيسر ڀرتي ڪرايا
من پسند آفيسرن ذريعي جعلي اڪائونٽ کولرايا ويا، فريال وڏي وزير جا اختيار بھ استعمال ڪيا
ڪراچي (م ڊ) فريال ٽالپر سنڌ بينڪ جي اڇي ڪاري جي مالڪياڻي نڪتي، جي آءِ ٽي رپورٽ پول پڌرو ڪري ڇڏيو، سنڌ بينڪ جي صدر بلال شيخ جو فريال ٽالپر کي لکيل خط جي آءِ ٽي رپورٽ جو حصو بڻايو ويو، جي آءِ ٽي رپورٽ ۾ انڪشاف ڪيو ويو آهي ته فريال ٽالپر سنڌ بينڪ جا فيصلا ڪندي آهي، فريال ٽالپر بينڪ جي اڇي ڪاري جي مالڪياڻي هئي ۽ سمورن معاملن جي منظوري ڏيندي رهي، جي آءِ ٽي رپورٽ ۾ وڌيڪ چيو ويو آهي ته سنڌ بينڪ ۾ فريال ٽالر 4 اهم من پسند آفيسر ڀرتي ڪرايا، نور زهري، مختيار حيدر، وسيم حيدر ۽ بدرالدين شامل آهن، نور زهري کي نوابشاهه برانچ جو مينيجر مقرر ڪرايو،فريال ٽالپر من پسند آفيسر ذريعي بينڪ ۾ جعلي اڪائونٽ کولرائيندي هئي، رپورٽ ۾ وڌيڪ چيو ويو ته سنڌ جو وڏو وزير ڪو ٻيو وڏا فيصلا ڪرڻ واري فريال ٽالپر آهي، مراد علي شاهه ناڻي واري وزير طور سنڌ بينڪ جون سمريون منطور ڪندو هو.
ڀٽائي گهوٽ بعد شيخ ايازوڌيڪ پڙهيو وڃي ٿو، هن نوجوانن ۾ اتساهه پيدا ڪيو:ساڃاهه وند
شيخ اياز سنڌ جي ماڻھن ۾ شعور پکيڙيو، کيس صدين تائين ياد ڪيو ويندو
شهدادڪوٽ ۽ شڪارپور ۾ به تقريبون ڪوٺائي، مھا ڪوي شيخ اياز کي ڀيٽا پيش ڪئي وئي
ڪراچي(نمائندن وٽان)مها ڪوي شيخ اياز جي 21هين ورسي مختلف شهرن ۾ ملهائي وئي،ساڃاهه وندن شيخ اياز کي ڀٽائي کان پوءِ سڀ کان وڏو شاعر قرار ڏنو آهي، ثقافت کاتي جي صوبائي وزير سيد سردار شاهه ۽ قاسم سراج سومرو ڀٽ شاهه پهچي سنڌ جي مهان ڪوي شيخ اياز جي 21 هين ورسي جي موقعي تي مزار تي گلن جي چادر چاڙهي دعا گهري ـ ان موقعي تي ميڊيا سان ڳالهائيندي صوبائي وزير سيد سردار شاهه چيو تـ احتساب جي نالي تي انتقام نه ورتو وڃي، احتساب ۽ انتقام ۾ فرق آهي، اي سي ايل ۾ احتساب جي نالي تي نالا ڏنا وڃن ٿا ته وفاقي وزيرن جا نالا بـ شامل ڪيا وڃن، جيڪي عمران خان سان گڏ ويٺل آهن هن چيو تـ پيپلزپارٽي لاءِ اها ڪا نئين ڳالهه نه آهي پارٽي خلاف هميشا سازشون ٿينديون رهيون آهن ،لاول ڀٽو جو ڪهڙو قصور آهي،انڪوائري ڀلي ٿئي پر انڪوائري جي بنياد تي ڪير بـ استعيفا نٿو ڏيئي سگهي. وزير اعليٰ سيد مراد علي شاهه کان استعيفا جي گهر ڪندڙ وزير اعظم عمران خان استعيفا وٺن ، سيد سردار شاهه چيو تـ جيستائين ڪنهن تي جرم ثابت نٿو ٿئي اهو استعيفا نٿو ڏيئي سگهي، غير جمهوري حرڪتون ڪيون پيون سنڌ جو عوام اهڙو ڪو بـ غير جمهوري عمل برداشت نـ ڪندو ، هن چيو تـ پيپلزپارٽي غير جمهوري حرڪتن جو مقابلو ڪرڻ لاءِ تيار آهي، هن چيو تـ شيخ اياز جي شاعري ۾ پنهنجي ڌرتي سان محبت ۽ عشق سمايل هو، شيخ اياز پنهنجي دور ۾ نوجوان نسل کي سنڌ ڌرتي سان محبت جو سبق ڏنو، ان جهڙا شاعر صدين ۾ پيدا ٿيندا آهن ـ هن چيو تـ شيخ اياز اڄ اسان وٽ موجود نـه آهي پر ان جي شاعري ۽ ڪلام اڄ بـه اسان جي دلين تي راڄ ڪن ٿا ،ڀٽائي گهوٽ جي شاعري بعد شيخ اياز جو نالو تمام وڏو ليکيو ۽ پڙهيو وڃي ٿو ـ هڪ سوال جي جواب ۾ هن چيو تـ شيخ اياز جو ميلو ڪٿي بـه لڳائي سگهجي ٿو ان سان ڪو بـه فرق نٿو پوي، ان موقعي تي ثقافت کاتي جو ڊپٽي ڊائريڪٽر شير محمد مهر ،غلام مجتبا ، اياز علي ڏيرو ۽ ٻيا بـ ه موجود هئا ـ هوڏانهن شھدادڪوٽ ۾ مھا ڪوي شاعر شيخ اياز جي21 ورسي آزد فورم پاران پريس ڪلب ۾ ورسي ملھائي وئي، ـ ان موقعي تي ايس يو پي اڳواڻ پير بخش ڀٽي، ليکڪ محمد صديق ابڙو،قومپرست اڳواڻ حبدار ميرجت،سماجي اڳواڻ وھاب پندراڻي، پيرل ادبي سنگت جي عبدالله شاھ اطھر ، زيب سنڌي ۽ ٻين تصوير آڏو گل نڇاور ڪري ميڻ بتيون ٻاري شيخ اياز کي ڀيٽ پيش ڪندي چيو ته شيخ اياز گذريل صدي جو تمام وڏو شاعر، مفڪر۽ عالم ھو، جنھن وقت جي نزاڪتن کي سمجھندي جيڪي تحقيقون ارپيون اھي تاريخي آھن، اياز جي سوچ غلامي کان نفرت پيار ۽ آزادي جي سپنن جي سانڀيا جو گس آھي ھنن جو وڌيڪ چوڻ ھو ته اياز جي شاعري ۾ شاعراڻي رمز بدران فڪر جي تمام گھڻي اھميت سمايل آهي. شڪارپور ۾سنڌي ادبي سنگت پاران شيخ اياز 21هين ورسي جي تقريب پريس ڪلب شڪارپور ۾ زاھد سنڌو جي صدارت هيٺ ٿي گذري، ان موقعي تي تقريب کي خطاب ڪندي ممتاز منگي چيو ته اياز ماضي ۽ حال جو عظيم شاعر آهي، اياز فطرت مطابق شاعري ڪئي، هن کان علاوه ماڻهن دلين ۾ حب الوطني موجود آهي پر ان کي ٻڌائيندو ڪير؟؟ مهمان خاص زاھد سنڌو تقريب کي خطاب ڪندي چيو ته اياز جي شاعري ماڻهن جي روح کي گرمائي ٿي اياز سنڌ جو شعور آهي سندس شاعري مان اثر ورتو وڃي، اياز جي سموري شاعري ۾ هڪ اميد نظر اچي ٿي ۽ ڪٿي به مايوسي نظر نه ٿي اچي، ھمير چانڊيو ،عبدالستار ڪلادي ، آپا صفيه عباسي ،آغا سعيد پٺاڻ ، اقبال ڏيٿو، سيد نسيم شاھ بخاري، سميع بلالي، عديل مهر، نادر بلوچ، زاھد ڀنڀرو ۽ ٻين پڻ خطاب ڪيو.
نوابشاھ جي فوتي زميندار مومن ڏاھري جو نالو مني لانڊرنگ جي اي سي ايل لسٽ ۾ شامل!!
نوابشاهه(رپورٽ: اياز ڏاھري) وفاقي سرڪار مني لانڊرنگ ڪيس ۾ ڄاڻايل نوابشاھ جي فوتي زميندار مومن ڏاھري جو نالو اي سي ايل ۾ شامل ڪري ڇڏيو، اومني گروپ کي ٻانڌي شوگر ملز لاءِ پنهنجي زمين ڏيندڙ مومن ڏاهري 10 ڊسمبر تي وفات ڪري ويو ھو، اي سي ايل لسٽ ۾ نالو ڏسي سندس وارث حيرت ۾ اچي ويا.
فوتي مومن ڏاهري جي ڀاءُ رئيس عبدالغفار ڏاهري پنھنجي اخبار سان ڳالھائيندي چيو تھ منهنجي ڀاءُ مومن ڏاهري اومني گروپ کي 145 ايڪڙ زمين خريد ڪري ڏني هئي، جنهن جي اومني گروپ ڪجهه ادائيگي ڪئي هئي، جڏھن تھ ڪجهه رقم اڃا رھيل آهي. ھن چيو تھ منهنجي ڀاءُ جي 14 ايڪڙ زمين پڻ شوگر ملز جي قبضي هيٺ آهي، جنھن جي رجسٽري پڻ ٿيل ناھي، هن چيو ته اسين پهريان ئي ڏکايل آهيون پر مرحوم ڀاءُ جو نالو اي سي ايل لسٽ ۾ ڏسي وڌيڪ ڏک ٿيو آهي، اسان خانداني زميندار آهيون، اسان پنهنجي پراپرٽي وڪرو ڪئي آھي ڪا ڪرپشن نه ڪئي آهي.
سنڌ ۾ ڪارنهن جي ڪهاڙي 120 ڪنڌ لاھي ڇڏيا،143 ٻارن سان بدفعلي ٿي:ايڇ آر سي پي
جنسي زيادتي جا 195 ڪيس رپورٽ ٿيا، 89 اجتماعي زيادتي ۽7 بدفعلي جا ڪيس ٿيا : رپورٽ
حيدرآباد (رپورٽ:فيض کوسو) سال 2018ع دوران سنڌ ۾ 120 ڄڻن کي ڪاروڪاري جي الزام هيٺ قتل ڪيو ويو، جنهن ۾ 78 عورتون ۽ 37 مرد شامل آهن، جڏهن ته قتل ٿيلن ۾ 18 سالن جي عمر کان گهٽ عمر جا پنج ٻار به شامل آهن. هيومن رائيٽس ڪميشن آف پاڪستان جي سنڌ چيپٽر جي هڪ رپورٽ موجب سڀ کان وڌيڪ عورتون سيپٽمبر مهيني ۾ قتل ٿيون ۽ قتل ٿيل اهڙين عورتن جو انگ 10 آهي، جڏهن ته اپريل 2018ع دوران 8 عورتون ۽ 7 مرد ڪارنهن جي الزام هيٺ قتل ٿيا، انگن اکرن موجب جنوري 2018 ۾ 4 عورتون، ٽي مرد، فبيروري دوران 9 عورتون ٽي مرد، مارچ دوران 4 عورتون ٻه مرد ۽ ٻه ٻار، اپريل دوران 8 عورتون، 7 مرد ۽ ٽي ٻار، مئي دوران 8 عورتون، چار مرد، جون دوران پنج عورتون چار مرد، جولاءِ دوران 8 عورتون چار مرد، آگسٽ دوران چار عورتون ٽي مرد، سيپٽمبر دوران 10 عورتون، آڪٽوبر دوران 8 عورتون چار مرد، نومبر دوران 7 عورتون هڪ مرد ۽ ڊسمبر دوران 3 عورتون ۽ ٻه مرد ڪاروڪاري جي الزام هيٺ قتل ڪيا ويا، ايڇ آر سي پي جا هي انگ اکر صرف ٻهراڙي سنڌ جا آهن، جڏهن ته انهن انگن اکرن ۾ ڪراچي ڊويزن شامل ناهي، رپورٽ موجب جنوري 2018ع کان ڊسمبر 2018ع تائين مجموعي طور 349 ماڻهن خودڪشي جي ڪوشش ڪئي، جنهن ۾ 191 مرد، 125 عورتون ۽ 33 ٻار شامل آهن، اهڙي ريت 717 ماڻهو مختلف واقعن جي ڪري قتل ٿي ويا، جنهن ۾ 486 عورتون، 91 مرد ۽ 59 ٻار شامل آهن، انگن اکرن موجب جنوري 2018 دوران 24 مرد 16 عورتون ۽ ٻه ٻار قتل ٿي ويا، فيبروري دوران 30 مرد، 18 عورتون ۽ ٽي ٻار، مارچ دوران 36 مرد 19 عورتون ۽ 6 ٻار، اپريل دوران 44 مرد، 13 عورتون ۽ چار ٻار، مئي دوران 54 مرد 16 عورتون 6 ٻار، جون دوران 46 مرد، 18 عورتون، 6 ٻار، جولاءِ دوران 33 مرد ، 19 عورتون ۽ ٻه ٻار، آگسٽ دوران 67 مرد 13 عورتون 8 ٻار، سيپٽمبر دوران 58 مرد 21 عورتون 8 ٻار، آڪٽوبر دوران 30 مرد 8 عورتون چار ٻار، نومبر دوران 42 مرد 6 عورتون پنج ٻار، ڊسمبر دوران 22 مرد 5 عورتون ۽ پنج ٻار مختلف سببن جي ڪري قتل ٿي ويا.
سال 2018ع دوران جنسي زيادتي جا مجموعي طور 195 ڪيس رپورٽ ٿيا، جن ۾ 89 ڪيس اجتماعي زيادتي ۽ 106 جنسي زياتي جا ڪيس رپورٽ ٿيا، مجموعي طور 45 عورتون، 7 مرد ۽ 143 ٻار جنسي زيادتي ۽ اجتماعي زيادتي جو شڪار ٿيا. ايڇ آر سي پي جي انگن اکرن موجب ڪراچي کانسواءِ ٻهراڙي سنڌ ۾ جنوري دوران اجتماعي زيادتي جا 9 واقعا ۽ جنسي زيادتي جا 9 ڪيس رپورٽ ٿيا، جن ۾ 4 عورتون ٻه مرد ۽ 12 ٻار جنسي زيادتي جو نشانو بڻيا، اهڙي ريت فيبروري ۾ گنيگ ريپ جا 7 ۽ ريپ جا 7 ڪيس رپورٽ ٿيا، هن مهيني دوران صرف ٻار ئي جنسي زيادتي جو نشانو بڻيا، اهو انگ 14 آهي، مارچ ۾ گينگ ريپ جا 12 ۽ ريپ جا 8 ڪيس ٿيا، 3 عورتون هڪ مرد ۽ 16 ٻار متاثر ٿيا، اپريل ۾ گينگ ريپ جا 10 ۽ ريپ جا 18 ڪيس سامهون آيا، 7 عورتون هڪ مرد ۽ 20 نشانو بڻيا، مئي ۾ گينگ ريپ جا 2 ۽ ريپ جا 14 ڪيس ظاهر ٿيا، مجموعي طور 16 جنسي زيادتي جو نشانو بڻيا، جن ۾ 4 عورتون ۽ هڪ مرد سميت 11 ٻار شامل هئا، جون دوران گينگ ريپ جا 6 ۽ ريپ جا 16، جولاءِ دوران گينگ ريپ جا 5 ۽ ريپ جا 4، آگسٽ دوران گينگ ريپ جا 16 ۽ ريپ جا 10، سيپٽمبر دوران گينگ ريپ جا 9 ۽ ريپ جا 7، آڪٽوبر دوران گينگ جا 8 ۽ ريپ جا 6، نومبر دوران گينگ ريپ ۽ ريپ جا 4-4 ۽ ڊسمبر دوران گينگ جو هڪ ۽ ريپ جا ٽي ڪيس رپورٽ ٿيا. زيادتي جو شڪار ٿيلن ۾ هڪ خواجا سراءِ به شامل آهي.
بالي ووڊ جو ليجنڊ قادر خان بيماري وگھي وينٽيليٽر تي منتقل
ممبئي (شوبز ڊيسڪ) بالي ووڊ جو ليجنڊ اداڪار قادر خان کي سخت بيماري ۽ ساهه کڻڻ جي ڏکيائي سبب وينٽيليٽر تي منتقل ڪيو ويو آهي.
ورسٽائل اداڪار قادر خان ڊگهي عرصي کان بيمار رهڻ بعد هاڻي سندس طبيعت ويتر خراب ٿي وئي، کيس ڳڻتي جوڳي حالت ۾ اسپتال منتقل ڪيو ويو آهي.
ڀارتي ميڊيا موجب قادر خان بيماري سبب ڳالهائڻ ٻولائڻ بند ڪري ڇڏيو آهي، جڏهن ته کيس نمونيا بيماري به ظاهر ٿي رهي آهي.
هوڏانهن ميڊيا سان ڳالهائيندي قادر خان جي پٽ سرفراز ٻڌايو ته سندس پيءُ کي هلڻ ڦرڻ ۾ ڏکيائي ٿئي ٿي، هو هلڻ وقت هيٺ ڪرڻ کان ڊڄندو هو. هن چيو ته گذريل سال بابا جي گوڏن جو آپريشن به ٿيو هو، پر هن هلڻ ڦرڻ کان انڪار ڪري ڇڏيو هو، جنهن بعد سندس طبيعت ويتر خراب ٿيڻ لڳي.
سرفراز احمد اميد ظاهر ڪئي ته سندس والد جلد صحتياب ٿي ويندو.
اي سي ايل ۾ شامل ڪيل 172 نالن ۽ عھدن جي مڪمل فهرست
اسلام آباد (رپورٽ: ايم بي سومرو) مني لانڊرنگ بابت جاچ جندڙ جي آءِ ٽي جي رپورٽ تحت وفاقي سرڪار جن 72 اهم شخصيتن جي نالا اي سي ايل ۾ شامل ڪيا آهن. اُهي هيٺين ريت ترتيبوار ڏنا ويا آهن.
عبدالغني انصاري، اومني گروپ جي عبدالغني مجيد، پنڪ ريزيڊنسي جي عبدالجبار، سنڌ واسي عبدالمومن ڏاهري، چاچڙ اينڊ سنسز جي عبدالقدوس چاچڙ، ابوبڪر، عديل شاهه راشدي، آفتاب حسين پٺاڻ، توانائي جي سيڪريٽري آغا واصف، احسن احسن، سمٽ بينڪ جي صدر احسن رضا دراني، سنڌ بينڪ جي صدر احسن طارق، ايڪسيئن سنڌ ڪول اٿارٽي علي اڪبر ابڙو، ايس اِي سي پي جي ايگزيڪيوٽو ڊائريڪٽر علي عظيم اڪرام، اومني گروپ جي علي ڪمال مجيد، ايم پي اي علي نواز مهر، عامر پٽ محمد الياس، ڪمرشل اينڊ ريٽيل جي سربراهه عامر صديقي، امجد آفتاب ۽ اومني گروپ جي سربراهه انور مجيد خواجا جا نالا اي سي ايل ۾ شامل ڪيا ويا.
اشفاق احمد لغاري، ٿڌاڻي انٽرپرائيزز جي اشوڪ چتر ٿڌاڻي، اشرف ڊي بلوچ ڪنسٽرڪشن جي شهزاد جتوئي، اڳوڻي صدر ۽ ايم اين اي آصف علي زرداري، حوالا ڊيلر بشارت محمود، سنڌ بينڪ جي صدر بلال شيخ، پ پ چيئرمين ۽ ايم اين اي بلاول ڀٽو زرداري، دائود خان، دائود مورڪس، احسان علي چوڌري، احسن الاهي، سيد عامر شهزاد، فهد حسين، فهد سلطان احمد، فرمان علي، ايم پي اي فريال ٽالپر، غلام حسين، غلام مصطفيٰ ميمڻ، سيڪريٽري لينڊ يوٽلائيزيشن غلام مصطفيٰ ڦل، غلام قادر، غلام النبي، حافظ ربنواز اينڊ ڪمپني جي حافظ ربنواز، حاجي مريد اڪبر، حاجي سراج دين سومرو، حماد شاهد، حارس اينڊ ڪمپني جي حارس ۽ سي اي او ايس ٽي ڊي سي حسن رضا عباسي جا نالا اي سي ايل ۾ وڌا ويا.
چيئرمين پي ڊي ايس آءِ ڊي حسن ميمڻ، سمٽ بينڪ جي سربراهه حسين لوائي، عمران حيدر، عمران خان پٽ ظهير خان، عمران منصور علي جيواڻي، سنڌ جي توانائي جي وزير امتياز شيخ، مدني ٽي وي جي اقبال احمد خان، عرفان سليمان، جگديش جڳديش، نياز محمد خان اينڊ برادرس جي جهانزيب خان، جسوت ڪمار، ڪامران علي، ڪنول ڪمار، ڊپٽي ڪمشنر ملير قاضي جان محمد، خالد حسين، خالد مسعود چنا، اومني گروپ جي چيف آفيسر خواجا ايم سلمان يونس، خدا بخش ڪرٽيو، خرم نياز، سي اي سو ايم اي ڪنسلسٽنٽ خورشيد جمالي، پنڪ ريزيڊنسي جي اسلم قريشي، ايم عمير، گئليڪسي ڪسنٽرڪشن جي ڊاڪٽر دنشا، مجين فاطمه، بحريه ٽائون جي سربراهه ملڪ رياض، ڊي جي ايس بي سي اَي منظور قادر ڪاڪا، مسعود نقوي، مسعود الحسن، نيشنل بينڪ جي هيڊ ڪارپوريٽيڊ مسعود ڪريم شيخ، مئراج، محمد منعاف، سنڌ بينڪ جي مينيجر ثروت عظيم، محمد افضل، محمد احسن، محمد اعجاز هارون، محمد اڪمل، ايم اي سي انجنيئرنگ محمد علي چنا جا نالا اي سي ايل جي فهرست ۾ شامل آهن.
اومني گروپ جو محمد عارف خان، محمد اسد علي، نور محمد مغل جو پُٽ محمد اشرف مغل، محمد آصف، محمد فيصل پُٽ عبدالحبيب، محمد حنيف پُٽ شڪور، اومني جو ملازم محمد حسن بروهي، محمد عمران، محمد اقبال، ودود انجنيئرنگ جو محمد طيب اقبال، اوسز ڊرلنگ ڪارپوريشن جو محمد جهانگير يوسف، محمد جلال، محمد جاويد علوي، سنڌ بئنڪ جو مئنيجر محمد اختر احمد، محمد مشتاق پُٽ عبدالعزيز، محمد نعيم، سمٽ بئنڪ جو آپريشن مئنيجر محمد ناصر شيخ، محمد قدير، محمد رديف قريشي، محمد رفيق قريشي، محمد رشيد، محمد ساجد، محمد شبير، محمد شهزاد عالم، محمد سهيل، محمد طاهر محمود، محمد يوسف، وسيم بلڊرز جو محمد وسيم، محمد ياسين، پارڪ لين پرائيويٽ لميٽيڊ جو محمد يونس ڪدوائي، محمد يوسف، محمد يوسف عباسي پُٽ فجو خان عباسي، پنڪ ريزيڊنسي جو محمد يوسف ايڌي، ايم پي اي مڪيش چاولا، اومني گروپ مصطفيٰ ذوالقرنين ماجد، پيرامائونٽ بلڊرز جو نديم احمد خان، سنڌ بئنڪ جو گروپ هيڊ ڪريڊٽ نعيم الطاف ۽ نيشنل بئنڪ آف پاڪستان جو سربراهه نديم انور الياس جا نالا شامل ڪيا ويا آهن.
نديم حاڪم الدين مانڊوي والا، رياض لالجي، نويد اقبال، اومني گروپ جي نازلي مجيد، اومني گروپ جو نمر مجيد خواجه، ايڊيشنل سيڪريٽري فنانس نثار احمد شيخ، اڳوڻو وڏو وزير قائم علي شاهه، رائو محمد خالد، صاحبزاده ذيشان رحمان، سيف الدين، ٽيڪنومين ڪائنيٽڪس پرائيويٽ لميٽڊ جو سيد آصف محمود، سجاول خان، ساجد حسين، ساجد عباسي، سلمان سلمان، سيڪريٽري لينڊ يوٽيلائيزيشن ثاقب سومرو، سردار احمد، سعد سُمير، شبير وزير خان، شاهد علي، شاهد علي پُٽ محمد سلطان، شهزاده ڪامران انصاري، شيخ فيض الرحمان پُٽ شيخ منصور الحق، سراج شاهد پُٽ محمد شاهد، ايم پي اي سهيل انور سيال، سيڪريٽري فنانس سهيل راجپوت، نيشنل بئنڪ جو صدر سيد علي رضا، ٽيڪنومين ڪائنيٽڪس پرائيويٽ لميٽيڊ سيد عارف علي، سيد اسد عباس زيدي پُٽ توقير حسين زيدي، سيد ڪاشف رضا پُٽ سيد علي نقي اعجاز، وڏو وزير مراد علي شاهه، سيد نصرت علي پُٽ سيد ثروت علي، علي حسن زرداري پُٽ مير خان زرداري، ايس ٽي ڊي سي ڊائريڪٽر سيد شاهنواز نادر، سيڪريٽري انڊسٽريز سيد ضمير حيدر، ٽيڪنومين ڪائنيٽڪس اومني جو سيد زيشان علي وارسي، طٰحه رضا پُٽ نقي رضا، ايس اي سي پي جو وقت چيئرمين طاهر محمود، ايم بي سي اينڊ سنز جو طارق عزيز چنا، طارق بيگ پُٽ مرزا رب بخش، اي ون انٽرنيشنل جو طارق سلطان، ووڊ انجنيئرنگ جو سي اي او عذير تحسين، سمٽ بئنڪ جو ظهير اسماعيل، ذيشان احمد پُٽ محمد اقبال ۽ ميمبر آر اينڊ ايس (بي او آر) ۽ ايگزيڪيوٽو ڊائريڪٽر ايس اي سي پي عابد حسين جا نالا شامل ڪيا ويا آهن.
سنڌ ۾ فارورڊ بلاڪ ٺهي پيو، مراد علي شاهه استعيفا ڏئي: وفاقي وزير
سنڌ مان مني لانڊرنگ ۾ وڏو گند نڪتو، مراد علي شاهه کي استعيفا ڏيڻ گهرجي:شيخ رشيد
پ پ ۾ فارورڊ بلاڪ ٺهي پيو، (فيصل واوڊا) اي سي ايل ۾ نالا وجهڻ ايگزيڪيوٽو جو فيصلو آهي عدليا جو نه:فواد چوڌري
لاهور/ ڪراچي (م ڊ) وفاقي وزير وڏي وزير مراد علي شاهه کان استعيفيٰ جو مطالبو ڪري ڇڏيو، سنڌ ۾ جلد فارورڊ بلاڪ ٺهڻ جي دعويٰ، لاهور ۾ ريلوي واري وفاقي وزير شيخ رشيد فيصل واوڊا سان گڏ پريس ڪانفرنس دوران اهم مطالبو ڪيو، شيخ رشيد چيو آهي ته ڪو شرم هوندو آهي، ڪو حيا هوندو آهي، مراد علي شاهه کي هاڻي استعيفيٰ ڏيڻ گهرجي، ايترو وڏو گند نڪتو آهي، ايترو بدبودار مواد نڪتو آهي جو شهيد ذوالفقار علي ڀٽو جي مزار به اڄ ڳوڙها ڳاڙي رهي آهي، هن چيو ته هنن چورن کي 7 سال سزا ملي، اسانجي ڪرپشن ثابت ٿئي ته 14 سال سزا ملڻ گهرجي، اسان چاهيون ته هر ان شخص جي جاچ ٿيڻ گهرجن جا احتساب عدالت ۾ ڪيس آهن، هن چيو ته بلاول جي تقرير تي گهڻو پريشان آهيان، منهنجو خيال هو ته هو وڏو ٿي ويو آهي پيءُ جي پچ تي نه کيڏندو، پيءُ جي سياست جي واٽ نه وٺندو پر آصف زرداري پٽ کي استعمال ڪري رهيو آهي، هن چيو ته آصف زرداري جو ته جيل ٻيو گهر آهي، هن جي ڏوهن ۾ پي ايڇ ڊي ٿيل آهي، زرداري جا پوري دنيا جي ڏوهارين سان رابطا آهن، اها ڳالهه آئون ذميواري سان چوان ٿو پر آصف زرداري بلاول کي استعمال پيو ڪري، جنهن تي افسوس آهي، شيخ رشيد چيو ته هنن ملڪ لٽيو آهي، هر طرف بک ۽ بدحالي آهي، ان موقعي تي فيصل واوڊ ڳالهائيندي چيو ته پيپلزپارٽي ۾ فارورڊ بلاڪ ٺهي سگهي ٿو، ماڻهو رابطي ۾ آهن، هن چيو ته نوازشريف عدليا ۽ فوج کي بدنام ڪيو، نواز مودي جو وڏو دوست آهي، ايل او سي تي فائرنگ ۾ به نوازشريف ملوث هو، ڊان ليڪس ياد آهي، هن ڪراچي ۾ امن امان جي صورتحال تي ڳالهائيندي چيو ته علي رضا عابدي جي واقعي تي افسوس آهي، ڪراچي ۾ امن امن کي هر صورت ۾ يقيني بڻايو ويندو، دهشتگرن کي انجام تائين پهچائينداسين. هن چيو ته ڪراچي ۾ ڪجهه ماڻهن کي واڇ ڪري ٻيهر اٿارڻ جي ڪوشش ڪئي وئي پر اها ناڪام ٿي، شهر جو امن خراب ٿيڻ نه ڏنو ويندو، هوڏانهن سڌ سماءَ واري وفاقي وزير فواد چوڌري چيو آهي ته نواز ۽ زرداري جي ڪرپشن جو ڪاٿو تمام وڏو آهي، هنن حڪومتي اختيارن کي غلط استعمال ڪري پئسا ٺاهيا ويا، وفاقي وزير فواد چوڌري هڪ نجي ٽي وي چينل سان ڳالهه ٻولهه ڪندي چيو ته ي سي ايل ۾ نالو شامل ڪرڻ ايگزيڪٽو جو فيصلو آهي، عدليا جو نه، نالا اي سي ايل ۾ شامل ڪرڻ جي سفارش رڳو ايف آءِ اي نه پر جي آءِ ٽي جي آهي، گهرو وزارت جي ذريعي ايجنسي نالا اي سي ايل ۾ شامل ڪرڻ جي سفارش ڪئي، هن چيو ته انويسٽيگيشن ايجنسيون فيصلو ڪنديون آهن ته نالو اي سي ايل ۾ شامل ڪرڻو آهي يا نه، هن چيو ته پي ٽي آءِ اڳواڻن خلاف نيب جا وڏا ڪيس ناهن، ٻن وزيرن الزام تي استعيفيٰ ڏئي ڇڏي.
فيض گنج ڀرسان ڳوٺاڻن پاران انڌي ٻلهڻ کي بلا سمجهي مارڻ جي ڪوشش
فيض گنج )رپورٽر) فيض گنج لڳ پنڌرهو واهه جي آرڊي نمبر 40کان 45 آرڊي جي وچ ۾ ڳوٺاڻن پاران واهه ۾ انڌي ٻهلڻ ڏٺي وئي آهي ڳوٺاڻن موجب لاڳتو ٽن ڏينهن کان انڌي ٻهلڻ واهه ۾ موجود آهي جنهن کي ڳوٺاڻن بلا سمجهي مارڻ جي پڻ ڪوشش ڪئي پر هو واهه ۾ هجڻ ڪري بچي وئي آهي،علائقي جي سڄاڻ ڌرين پاران انڌي ٻهلڻ جي موجود هجڻ بعد وائلڊ وائف کاتي سکر کي اطلاع ڪيو، اطلاع تي جهنگلي جيت کاتي جا عملدار ڄاڻا يل هنڌ پهچي ويا جن آرڊي 40 کان 45آرڊي تائين ٻهلڻ کي تلاش ڪيو، پر هو هٿ اچي نه سگجهي آهي جنهن بعد وائلڊ لائف کاتي جا عملدار واپس ٿي ويا آهن واضح رهي ته ڪجه ڏينهن اڳ ۾ ڳوٺاڻن ٻه انڌي ٻهلڻ ساڳي هنڌ ڏسي وائلڊ وائف وارن کي اطلاع ڪيو هو جن ٻئي ٻهلڻ هٿ ڪري سکر کان سنڌو درياه حوالي ڪيون هنيون جڏهن ته واهه ۾ انڌي ٻهلڻ جي موجودڳي واري افواهن بعد علائقي جا ڪيترائي ماڻهو ڄاڻايل هنڌ تي پهچي ويا
"انڊي" وارا ته "ڏنڊي" وارن جا محتاج آھن: حافظ حسين
جيڪب آباد (رپورٽر) جميعت علماء اسلام جي مرڪزي ترجمان اڳوڻو سينيٽر حافظ حسين احمد چيو آهي ته احتساب “ڏنڊي” وارا ڪري رھيا آھن، “انڊي” وارا ته “ڏنڊي” وارن جا محتاج آھن، مسلم ليگ وارا رستن تي نڪرڻ نه ٿا چاھين ان لاءِ ته ھائوس بدلائڻ جون ڳالهيون ڪن پيا، بي بي ۽ پنجاب جو ميان حقيقي اپوزيشن جو ساٿ ڏي ھا ته اڄ انھن جو اھو حشر نه ھجي ھا، حافظ حسين احمد پنھنجي اخبار سان ڳالهائيندي چيو ته احتساب “ڏنڊي” وارا ڪري رھيا آھن “انڊي” وارا ته “انڊي” وارا ئي آهن، ڇو ته “ڏنڊي” وارن کي سڌو نه ٿو چئي سگھجي ان لاءِ توپن جو رخ “انڊي” وارن جي طرف آهي ھي ڳالھ طئي ٿيل آهي ته “انڊي” وارا “ڏنڊي” وارن جا محتاج آهن، ان چيو ته اِن ھائوس تبديلي جون ڳالهيون ھلي رھيون آهن در اصل مسلم ليگ وارا رستن تي نڪرڻ نه ٿا چاهين بلڪ معاملن کي ماضي وانگي ڳالھيون ڪري ڊيل ڪرڻ چاھين ٿا، ان لاءِ ورڪرن کي مطمئن ڪرڻ لاءِ اِن ھائوس تبديلي جو ڳالھيون ڪيون پيو وڃن .هن چيو ته پاڪستان جي سياسي ۽ پارلياماني تاريخ ۾ اِن ھائوس تبديلي جا امڪان گھٽ ھوندا آھن جڏھن ته ھن وقت مختلف جماعتن جا پکي آکيرا بدلائي ڪري حڪومتي ڪيمپ ۾ وڃڻ جو سوچي رھيا آھن، ان چيو ته زرداري جو چوڻ آهي ته ھو اڪيلو سڀ ڪجھ ڪندو ھُو اڪيلو ڪجھ به نه ڪري سگھندو ھي سڀ اڪيلا ٿي ڪري اڪيلا ئي نقصان کائيندا،هن چيو ته زرداري کي اپوزيشن جي طرف واپس اچڻو پوندو اگر ھو ڪلھ اسان جي ڳالھ مڃي وٺن ھا ته اڄ ان طريقي سان سان پريشان نه ھجن ھا.
حيدرآباد ۾ 2000 خاندان ٻارن کي پوليو ڦڙا پيارڻ کان انڪاري: انتظاميه ناڪام
ضلعي انتظاميه والدين کي راضي ڪرڻ مختلف ادارن کان مدد وٺڻ جو فيصلو ڪري ورتو
نئين سال ۾ ڦڙا پيارڻ جي حدف ۾ به گهٽتائي، ايڊريس مٽائيندڙ ٻار به ڦڙن کان محروم
حيدرآباد (رپورٽ: فيض کوسو)حيدرآباد جي ضلعي انتظاميا سال 2018ع ۾به پوليو جا ڦڙا پيارڻ کان انڪاري 2هزار خاندانن کي راضي ڪرڻ ۾ ناڪام رهي، ڦڙا پيئڻ کان قاصر ٻارن جي والدين کي راضي ڪرڻ لاءِ نئين سال ۾ نئين حڪمت عملي جوڙي مخلتف ادارن کان مدد وٺڻ جو فيصلو، هدف ۾ به ٽي هزار ٻارن جي گهٽتائي. حيدرآباد جي ضلعي انتظاميا پاران سال 2018ع جي دوران ٽي لک 36 هزار ٻارن کي پوليو جا ڦڙا پيارڻ جو هدف مقرر ڪيو ويو هو، جنهن ۾ سال 2019ع جي لاءِ گهٽتائي آڻي اهو هدف 3 لک 32 هزار 263 مقرر ڪيو ويو آهي. گذريل سال دوران 3 هزار ٻارن کي پوليو جون ٽيمون ڳولڻ ۾ ناڪام رهيون، جڏهن ته ضلعي انتظاميا جون ٽيمون پوليو جا ڦڙا پيارڻ کان انڪاري 2 هزار خاندانن کي سڄي سال دوران راضي ڪرڻ ۾ پڻ ناڪام رهيون، ان سلسلي ۾ضلعي انتظاميا اهڙن خاندانن کي راضي ڪرڻ لاءِ چئمبر آف ڪامرس، پوليس ۽ ٻين ادارن کان مدد وٺڻ جو فيصلو ڪيو آهي، ضلعي انتظاميا پاران پوليو مهم جي لاءِ ضلعي جي 54 يونين ڪائونسلن ۾ هڪ هزار موبائيل ٽيمون، 117 فڪسڊ ٽيمون ۽ 23 ٽرانزٽ ٽيمون جوڙيون آهن، جنهن ۾ 890 ليڊي هيلٿ ورڪرس به شامل هونديون. پوليو مهم لاءِ 11 تعلقا سپروائيزر ۽ 83 يونين ڪائونسل ميڊيڪل آفيسر پنهنجون خدمتون سرانجام ڏيندا. ان سلسلي ۾ ڊپٽي ڪمشنر حيدرآباد سيد اعجاز علي شاه جي صدارت هيٺ هڪ اجلاس به ٿيو، جنهن ۾ ٻڌايو ويو ته ايندڙ سال 21 جنوري کان پوليو مهم شروع ٿيندي، جنهن ۾ مقرر ڪيل حدف وارن ٻارن کي پوليو جا ڦڙا پياريا ويندا. گڏجاڻي ۾ چيو ويو ته ايندڙ مهم دوران سو سيڪڙو نتيجا حاصل ڪرڻ لاءِ پنهنجي ٻارن کي پوليو کان بچاءِ جا ڦڙا پيارڻ کان انڪار ڪندڙ والدين کي راضي ڪرڻ لاءِ وڌ کان وڌ ڪوشش ڪئي ويندي، ان سلسلي ۾ چيمبر آف ڪامرس جي نمائندي کي اپيل ڪئي وئي ته سندن ادارو پوليو جي خاتمي جي لاءِ ضلعي انتظاميا سان سهڪار ڪري. پوليو جي ٽيمن کي سيڪيورٽي فراهم ڪرڻ جي لاءِ ضلعي پوليس جي انتظاميا کي هدايت ڪئي وئي ته شهر جي ٽرانزٽ پوائنٽس تي مستقل طور پوليس مقرر ڪئي وڃي، ته جيئن شهر مان ايندڙ ويندڙ ٻارن کي به پوليو جا ڦڙا پياري سگهجن، ٻئي طرف ڊي ايڇ او حيدرآباد ڊاڪٽر نسرين ميمڻ پنهنجي اخبار سان ڳالهائيندي ٻڌايو ته گذريل سال جي حدف ۾ ٽي هزار ٻار اهڙا هئا، جيڪي پنهنجي مستقل پتي تي نه پئي رهيا، ان ڪري هو پوليو جا ڦڙا پيئڻ کان رهجي ويا، جڏهن ته 2000 ٻار اهڙن خاندانن جا آهن، جن پوليو کان بچاءِ جا ڦڙا نه پيتا، هاڻي انهن کي راضي ڪرڻ لاءِ نئين حڪمت عملي جوڙي وئي آهي.