ڪوٽڙي(ن پ ا)ڪوٽڙي ۾ چور سرگرم،هڪ مهيني اندر 20 کان وڌيڪ موٽر سائيڪلون چوري ٿي ويون، ڪوٽڙي ۽ آس پاس وارن علائقن ۾ چورن تر تپائي ڇڏيو آھي درياءَ بند تان منظور احمد يوسفزئي جي موٽر سائيڪل چوري ٿي وئي،تعلقه اسپتال لڳ هڪ بئنڪ ڀرسان علي حيدر ڪانڌڙو جي موٽر سائيڪل چور چوري ڪري ويا،درياء بند تان قاضي محلي ۾ اويس عالم جي موٽر سائيڪل چوري ڪري ويا،مهاجر ڪالوني لڳ محمدي مسجد مرزا رضوان بيگ جي موٽر سائيڪل چوري ٿي وئي
مريم گارڊن مان رضوان جوڻيجو جي موٽر سائيڪل چور چوري ڪري ويا،سبحان الله ڪالوني مان رفيق جوڻيجو جو چور موٽر سائيڪل چوري ڪري ويا،هڏي مل ڀرسان بلوچ ڪالوني مان عبدالحميد مگسي کان هٿياربند رڪشا ڦر ڪري ويا،مريم گارڊن مان منصور بلوچ جي موٽر سائيڪل چوري ڪري ويا ،ملڪ گرائونڊ مان ماستر وجود علي شر جي موٽر سائيڪل چوري ڪري ويا،پٽاڻ ڪالوني مان آصف انصاري جي موٽر سائيڪل چور چوري ڪري ويا ,المدينه اليڪٽرڪ جي مالڪ فهيم عباسي جا چار وڏا ايڪو سائونڊ چوري ڪري ويا
پريس ڪلب ڀرسان حيدر ميڊيڪل اسٽور جا تالا ڀڃي پنجاھ هزار ڪيش ۽ 30 هزار جو سامان چور چوري ڪري ويا,ٿاڻي جي سامهون شاهجان نالي شهري جي گهر ۾ هٿياربندن داخل ٿي روڪ رقم ۽ سون جي چين ڦر ڪري ويا ،ڄاڻايل ڏوهن جي رپورٽ به ڪوٽڙي ٿاڻي تي داخل ٿيل آھي پر پوليس واقعن کي روڪڻ ۽ چورن جو گهيرو تنگ ناهي ڪري سگهي جنهن سبب ڪوٽڙي ۾ ڏوهي سرگرميون وڌي رهيون آھن ،متاثر شهرين رفيق احمد ،علي حيدر،رضوان جوڻيجو ۽ ٻين جو چوڻ هو ته ڪوٽڙي ۾ موٽر سائيڪل ڦر ڪندڙن شايد پنهنجي طريقو مٽائي ڇڏيو آھي جو موٽر سائيڪلون گهرن،دڪانن،هوٽلن سامهون بيهڻ شرط چوري ڪري وڃن ٿا.
رابطو ڪرڻ تي ايس ايچ او ڪوٽڙي طارق خانزاده ٻڌايو ته منهنجي علم ۾ 6 موٽر سائيڪلون چوري ٿيون آھن ان تي ڪم ڪريون پيا نشاندهي ٿي آھي چور هتي جا آھن جلد گرفتار ڪري چوري ٿيل موٽر سائيڪلون واپس ڪرائينداسين.

خيرپور (ن پ ا) خيرپور ڀرسان ڳوٺ سائين بخش شر جي گورنمينٽ بوائز پرائمري اسڪول ۾ ٻن سالن کان استاد مقرر نه ٿي سگهيو آهي جنهن سبب اسڪول ۾ پڙهندڙ ٽي سئو کان مٿي شاگردن جو مستقبل داءَ تي لڳي ويو آهي. ان سلسلي ۾ اسڪول جي شاگردن ۽ انهن جي والدين علي ڏنو شر، ربنواز شر، عبدالڪريم شر، عاشق علي شر ۽ ٻين تعليم کاتي جي انتظاميه خلاف احتجاج ڪندي صحافين کي ٻڌايو ته گذريل ٻن سالن کان اسڪول ۾ استاد مقرر ناهي ٿي سگهيو جنهن سبب ٻارڙن جو مستقبل داءَ تي لڳي ويو آھي استاد مقرر نه هجڻ سبب سرندي وارا پنهنجي اولاد کي پڙھائڻ لاءِ ڪجھ ٻين شھرن ڏانهن لڏي ويا آھن جڏھن ته ڪجھ والدين پنهنجا گلن جهڙا ٻارڙا ست ڪلوميٽر فاصلي تي حسين آباد جي اسڪول ۾ پڙھائي رهيا آھن. هنن ٻڌايو ته اسان ڪيترائي ڀيرا ٽي اي او پرائمري ۽ ڊي اي او لياقت علي خاصخيلي کي درخواستون ڏنيون آھن پر انهن هر ڀيري اهو جواز ڄاڻايو آھي ته في الحال استادن جي مقررين ۽ بدلين تي پابندي لڳل آهي. هنن تعليم واري وزير سيد سردار علي شاهه کان مطالبو ڪيو ته ڳوٺ سائين بخش شر جي گورنمينٽ بوائز پرائمري اسڪول ۾ فوري طور تي استادن جي مقرري ڪئي وڃي ته جيئن ٻارڙن جي تعليم متاثر نه ٿئي.

حيدرآباد(بيورو رپورٽ) سنڌ جي زراعت کاتي جي وزير اسماعيل راهو چيو آهي ته سياسي جماعتن تي ڏکيو وقت ايندو رهندو آهي ۽ ماضي ۾ به اسان وڏن وڏن مسئلن کي منهن ڏنو آهي، پاڪستان پيپلز پارٽي اهو نٿي چاهي ته احتساب نه ٿئي پر اسين چاهيون ٿا ته احتساب بنا ڪنهن فرق جي سڀني جو ڪيو وڃي،اهڙو اظهار هن ڪالهه ڊائريڪٽر جنرل ايگريڪلچر ايڪسٽينشن شهباز بلڊنگ حيدرآباد م منعقد ڪيل آٽو لوڊرز جي آبادگارن کي فراهمي لاءِ اليڪٽرانڪ قرعه اندازي جي موقعي تي صحافين سان ڳالهائيندي ڪيو، هن چيو ته پاڪستان پيپلزپارٽي جي حڪومت ۽ قيادت سنڌ جي زراعت کي مضبوط ڪرڻ گهري ٿي، هن هڪ سوال جي جواب ۾ هن چيو ته ڪمند جا اگهه مقرر ڪيا ويا آهن ۽ اسانجي اها ڪوشش آهي ته آبادگارن کي مقررڪيل اگهه ڏياريا وڃن جڏهن ته سمورين شگر ملن ڪمند جي پيڙهائي وارو عمل شروع ڪري ڏنو آهي، هن چيو ته پاڻي جي ورڇ انصاف سان ڪئي وڃي، جيڪڏهن سسٽم ۾ پاڻي جي کوٽ هڪڙي ۽ سنڌ ۾ پاڻي جي کوٽ ٻئي هجي ته اها هڪ ناانصافي آهي، هن تحريڪ انصاف جي حڪومت تي تنقيد ڪندي چيو ته هيءَ حڪومت زراعت سان لاڳاپيل ماڻهن لاءِ سونامي ثابت ٿي آهي، وفاقي حڪومت پاران ڀاڻ ۽ زرعي استعمال جي شين ۾ جيڪا واڌ ڪئي وئي آهي، ان سان پاڪستان جي معيشت تي هاڃيڪار اثر پوندا هن چيو ته سي پيڪ ۾ جيڪو سنڌ جو حصو آهي، اهو سنڌ کي ضرور ملڻ گهرجي ۽ اسانجي ڪوشش آهي ته آبپاشي ۽ زراعت جا ڪجهه منصوبا به سي پيڪ ۾ شامل ڪرايون.

ڪنڌڪوٽ (ن پ ا)ڪنڌڪوٽ اسپيشل ايجوڪيشن ۾ جعلي ڀرتين جو ڀانڊو ڦاٽڻ بعد اينٽي ڪرپشن ۾ ڪيس داخل ٿيڻ جي باوجود ڪيس جي جوابدارن عبدالرحيم بھلڪاڻي، اسپتال جي ايم ايس ڊاڪٽر نذير اعواڻ، سيڪشن آفيسر ناز پروين، ڊاڪٽر ڪشور ڪمار،اڳوڻو ايم ايس ھيرالدين گجراڻي، سرفراز احمد گھانگھرو ۽ عدنان قاضي سميت ڪنھن جي به گرفتاري عمل ۾ نه اچي سگھي،ڪيس داخل ٿيڻ بعد ڪيس ۾ نامزد عملدار فرار ٿي ويا جن جي گرفتاري لاءِ اينٽي ڪرپشن جي ٽيم پاران ڇاپا مار ڪاروائين جو سلسلو جاري آھي،ان سلسلي ۾ رابطو ڪرڻ تي اينٽي ڪرپسن جي سرڪل آفيسر شاھد بشير کوسي ٻڌايو ته اسپيشل ايجوڪيشن جي ڪيس ۾ جعلي ڀرتين واري ڪيس ۾ جوابدارن جي گرفتاري لاءِ ٽيم جوڙي آھي جوابدارن کي جلد گرفتار ڪيو ويندو ٻئي طرف ذريعن کان مليل ڄاڻ موجب ڪيس ۾ نامزد عملدارن پنھنجو پاڻ کي بچائڻ لاءِ ڪوششون شروع ڪري ڇڏيون جڏھن ته اعليٰ عدليه مان گرفتاري کان اڳ ضمانتون ڪرائي ورتيون.

ڪنڌڪوٽ(ن پ ا) ڪنڌڪوٽ ويجھو ڊيراسرڪي پوليس ٿاڻا جي حد صيفل لاڙو وٽ جوابدارن شھر طرف موٽرسائيڪل سوار زابر نندواڻي جو اڳ وٺي موٽرسائيڪل ڦرڪرڻ دوران جوابدارن ڌڪ ھڻي کيس زخمي ڪيو ان دوران موٽرسائيڪل تي ويٺل معصوم ٻارڙي زرينا به زخمي ٿي پئي جڏھن ت جوابدارفرار ٿي ويا جنھن بعد واقعي ۾ جوابدار گرفتارن ڪرڻ ۽ ڦرٿيل موٽرسائيڪل جي واپسي ۽انصاف لاء وارث عورتن.مردن زخمي زرينا۽سندس زخمي والد زابرنندواڻي کي کڻي ايس ايس پي آفيس جي مين گيٽ آڏو احتجاج ڪري انصاف جي گھر ڪئي ان دوران ريڍر ۽ ٻين پوليس عملدارن انصاف جي خاطري ڪرائي متاثر ڌر کي گيٽ آڏو اٿائي ڇڏيو.

دادو (ن پ ا) دادو ۾ محمد چنو ۽ زاهد حسين قاضي جي اڳواڻي ايس يو پي جي اڳواڻن ۽ ڪارڪنن هٿن ۾ پلي ڪارڊ کڻي احتجاجي مظاهرو ڪري ڪچهري روڊ تي ڌرڻو هنيو ۽ مطالبو ڪيو آهي ته سيد زين شاھ سميت آبادگارن تي داخل ڪوڙو ڪيس ختم ڪيو وڃي ٻي صورت ۾ سندن احتجاج جو سلسلو جاري رهندو