دادو (ن پ ا) دادو ۾ پ ٽ الف جي سڏ تي ضلعي صدر عنايت علي جمالي ۽ دادو ٽائون جي صدر لياقت ڀٽي جي اڳواڻي ۾ وڏي انگ ۾ استادن هٿن پوٽريٽ ۽ پلي ڪارڊ کڻي مطالبن جي مڃتا لاء احتجاجي مظاهرو ڪري شهر جي مک ڪچهري روڊ تي ڌرڻو هڻي هڪ ڪلاڪ تائين ٽريفڪ بند ڪري ڇڏي ۽ مطالبو ڪيو آهي دادو جبري طور ڊاريڪٽر آفيس بدلي ڪيل عورت ٽيچر کي واپس ڪري اين ٽي ايس جي رهيل 168 ، استادن کي ريگيولر ڪري ڊي او اليمنٽري ريگيولر رکيو وڃي ٻي صورت ۾ سندن احتجاج جو سلسلو جاري رهندو
لطيف يونيورسٽي ۽ سپلا ۾ دنگل: ڪاليج سائيڊ جا امتحان ملتوي
خيرپور/سکر (نمائدن وٽان) خيرپور ۾ واقع شاهه عبداللطيف يونيورسٽي جي انتظاميه ۽ سنڌ پروفيسرز ۽ ليڪچررز ايسوسئيشن (سپلا) وچ ۾ اختلاف چوٽ چڙهي ويا، يونيورسٽي ماتحت ڪاليجن ۾ 28 ڊسمبر کان ٿيندڙ سالياني امتحانن جو سپلاءِ پاران بائيڪاٽ جو اعلان. يونيورسٽي انتظاميه امتحان ئي اڻ ڄاتل مدي تائين ملتوي ڪري ڇڏيا. شاهه عبداللطيف يونيورسٽي خيرپور جي انتظاميه ۽ سنڌ پروفيسر اينڊ ليڪچرار ايسوسئيشن (سپلا) سکر، لاڙڪاڻو ريجن وچ ۾ هڪ ڀيرو ٻيهر اختلاف چوٽ چڙهي ويا آهن، يونيورسٽي انتظاميه جي رويي تي سڏايل سپلا جو سڏايل هنگامي اجلاس گورنمينٽ سپريئر سائنس ڪاليج خيرپور ۾ ڪوٺايو ويو، جنهن ۾ سکر ۽ لاڙڪاڻو رينج جي عهديدارن شرڪت ڪئي. جنهن ۾ متفقه طور تي فيصلو ڪيو ويو ته يونيورسٽي انتظاميه طرفان گذريل سال لکت ۾ ڪيل معاهدي تي عمل ڪرڻ لاءِ ڪنهن به قسم جي سنجيدگي توڙي دلچسپي جو مظاهرو ناهي ڪيو، اِن سان گڏ اعلانيل امتحان ۾ صرف ٻه ڏينهن هئڻ باوجود وڏي انگ ۾ شاگردن جون امتحاني سلپون سينٽر تي نه پهچڻ توڙي استادن کي ڊيوٽين متعلق آگاهه ئي ناهي ڪيو ويو. جنهن ڪري گڏجاڻي ۾ شريڪ سپلا سکر ۽ لاڙڪاڻو رينج جي صدر پروفيسر سيد اصغر علي شاهه، جنرل سيڪريٽري پروفيسر مشتاق احمد ڦلپوٽو، ايڊيشنل جنرل سيڪريٽري عبدالجبار سولنگي، سينيئر نائب صدر پروفيسر الطاف کهرو، نائب صدر پروفيسر نظر احمد مهر، مختلف ڪاليجن جي پرنسپلز گورنمينٽ اسلاميه آرٽس اينڊ سائنس ڪاليج سکر جي پرنسپل پروفيسر محمد ايوب مري، گورنمينٽ ڊگري ڪاليج لاڙڪاڻو جي پرنسپل پروفيسر غلام سرور قريشي، پرنسپل گورنمينٽ سچل سرمست ڊگري ڪاليج راڻيپور محمد اطهر هنجراهه، سپلا سکر ضلعي جي صدر پروفيسر غفران الله بلوچ، گهوٽڪي جي صدر پروفيسر وقار احمد قائمخاني، شڪارپور جي صدر پروفيسر سعيد احمد منگي، خيرپور جي صدر پروفيسر لال بخش سوهو ۽ ٻين متفقه طور تي 28 ڊسمبر تي شاهه عبداللطيف يونيورسٽي خيرپور جي ماتحت ڪاليجن ۾ ٿيندڙ امتحانن جو مڪمل طور بائيڪاٽ ڪرڻ جو اعلان ڪندي چيو آهي ته يونيورسٽي انتظاميه جيستائين سنجيدگي جو مظاهرو نه ڪندي تيستائين امتحانن جو بائيڪاٽ جاري رهندو. اِن ڏس ۾ رابطو ڪرڻ تي سپلا سکر ۽ لاڙڪاڻو ريجن جي صدر پروفيسر سيد اصغر علي شاهه پنهنجي اخبار کي ٻڌايو آهي ته شاهه عبداللطيف يونيورسٽي خيرپور جي انتظاميه ڪاليج سطح تي تعليمي عمل ۾ مڪمل طور غير سنجيده آهي جنهن متعلق مختلف وقتن تي وائيس چانسلر ڊاڪٽر پروين شاهه توڙي لاڳاپيل اختيارين وٽ پڻ شڪايتون ڪيون آهن پر لکت ۾ معاهدو ٿيڻ باوجود سنجيدگي جو مظاهرو ناهي ڪيو ويو. امتحاني شاگردن جون سلپون جيڪي گهٽ ۾ گهٽ 15 ڏينهن اڳ ڪاليجن ۾ پهچائڻون آهن اُهي امتحانن ۾ ٻه ڏينهن رهجڻ باوجود ناهن پهتيون. داخلا جي پاليسي ۽ سالياني تعليمي ڪئلينڊر جي تياري لاءِ گذريل سال لکت ۾ خاطري ڪرائي وئي جنهن تي به هن وقت تائين ڪو عمل ناهي ٿي سگهيو. يونيورسٽي انتظاميه جي اهڙي غيرسنجيده رويي سبب ڪاليجن جي پرنسپلز ۽ سپلا سکر ۽ لاڙڪاڻو ريجن جي عهديدارن متفقه طور تي 28 ڊسمبر کان شروع ٿيندڙ امتحانن جي بائيڪاٽ جو اعلان ڪيو آهي. بائيڪاٽ کان پوءِ لطيف يونيورسٽي جي انتظاميه 28 ڊسمبر کان ڪاليج سائيڊ جي ٿيندڙ امتحانن کي اڻ اعلانيل مدي تائين ملتوي ڪري ڇڏيو آهي. ان سلسلي ۾ لطيف يونيورسٽي جي ترجمان ابراهيم کوکر پڌرائي جاري ڪندي سپلا سکر ۽ لاڙڪاڻي ريجن طرفان يونيورسٽي انتظاميه تي لڳايل الزامن جي ترديد ڪندي ٻڌايو آهي ته يونيورسٽي جي ساليانه امتحان 2018 کان پهريان ئي سپلا جي نمائندن جا سمورا مطالبا مڃيا ويا هئا. تمام بقايائون ۽ معاوضا پڻ ادا ڪيا ويا آهن. جڏهن ته سپلا طرفان جاري ڪيل انگ اکر غلط فهمي ۽ مفروضن تي ٻڌيل آهن، يونيورسٽي طرفان ساليانه امتحان 2018 جون تمام تياريون مڪمل هئڻ باوجود سپلا جي بائيڪاٽ ۽ ڪاليج جي استادن جي اڻپوري تياري ڪري وقت تي امتحان ڪرائڻ مشڪل ٿي پيو آهي جنهن کي نظر ۾ رکندي يونيورسٽي انتظاميه شاگردن کي پريشاني کان بچائڻ لاءِ نيئن تاريخ تائين امتحان ملتوي ڪري ڇڏيو آهي.
بي بي جي فلسفي آڌار ذهني مريضن جو مقابلو ڪبو:آصف زرداري
شدت پسندن ۽ دهشتگردن خلاف اسان جي جدوجهد جاري رهندي
اسلام آباد (رپورٽر) اڳوڻي صدر آصف علي زرداري چيو آهي ته بي بي جي فلسفي تحت عدم برداشت جو شڪار ذهني بيمارن سان مقابلو ڪندا رهنداسين، آصف علي زرداري شهيد بينظير ڀٽو کي ورسي جي موقعي تي خراب تحسين پيش ڪيو، آصف علي زرداري جاري ڪيل هڪ پيغام ۾ چيو آهي ته آئين، جمهوريت ۽ انساني آزادي لاءِ بي بي جي فلسفي تي عمل ڪندا رهنداسين، شدت پسندن ۽ دهشتگردن خلاف جدوجهد جاري رهندي، پيغام ۾ سندس وڌيڪ چوڻ هو ته خودمختيار ۽ بااختيار پارليامينٽ جي اصول تي ثابت قدمي سان انهن عنصرن جو مقابلو ڪندا رهنداسين جيڪي پارليامينٽ کي ڪمزور ڪڻ چاهين ٿا، پيپلزپارٽي ڪمزور طبقن جي حقن جو تحفظ ڪندي رهندي.
مخدوم سعيد الزمان سروري جماعت جو چيئرمين ٿي ويو
ڀٽ شاهه (رپورٽ: راجا بوزدار ) هالا ۾ سروري جماعت پاڪستان جي اجلاس چيئرمين اڳوڻي ايم اين اي مخدوم سعيد الزمان عاطف جي صدارت ۾ ٿيو ـ جنهن ۾ سروري جماعت جماعت جا نوان عهديدارچونڊيا ويا ـ اجلاس ۾ سروري جماعت جي اڳوڻن عهديدارن ـ ميمبرن ۽ خليفن وڏي انگ ۾ شرڪت ڪئي ـ منعقد ڪيل اجلاس ۾ سروري جماعت جي روحاني پيشوا ۽ تنظيم جي سرپرست اعليٰ مخدوم جميل الزمان جي منظوري سان مخدوم سعيد الزمان عاطف چيئرمين ـ سيد نور محمد شاهه سينيئر وائيس چيئرمين ـ 5 وائيس چيئرمينن ۾ ميان مشتاق ڊوگر (پنجاب ) ـ پير عبدالرزاق ( بلوچستان ) ـ پير ڪوڙل شاهه ـ پير امجد شاهه ـ سرفراز راڄڙ مقرر ڪيا ويا ـ جڏهن تـ جنرل سيڪريٽري پير منصور ـ ايڊيشنل جنرل سيڪريٽري پير ضياءَ الحق ـ ڊپٽي جنرل سيڪريٽري انور ميمڻ ـ سيڪريٽري نشر اشاعت گل حسن درس ـ سيڪريٽري ماليات الهه رکيو ڏاهري ـ سيڪريٽري روزگار شبير راڄپر ـ سيڪريٽري صحت حميد چانهيون ـ سيڪريٽري تعليم ايوب ڪورائي کي اتفاق راءِ سان چونڊيو ويو ـ جڏهن تـ فيصلو ڪيو ويو تـ مرڪز جا وڌيڪ عهديدار بعد ۾ چونڊيا ويندا.
پي ايم يو اسپتال ۾ گندگي،مريضن جون دانهون، جج جي ايم ايس کي ڇنڊ
سول جج اوچتو اسپتال پھتو، گائني ۽ پيڊز وارڊن جي مريضن شڪايتن جا دفتر کولي ڇڏيا
وارڊن ۾ پکڙيل گندگي ڏسي جج پاران ڪاوڙ جو اظهار، صفائي ڪرڻ جي هدايت
نوابشاهه ( رپورٽر ) نوابشاهه جي سول جج جو پي ايم يو اسپتال جو اوچتو دورو، گائني، پيڊس ۽ ٻين وارڊن جي مريضن ۽ تيمار دارن جج آڏو شڪايتن جو دفتر کولي ڇڏيو،سول جج اسپتال جي ايم ايس کي ڇنڊ،ان ڏس ۾ نوابشاهه جي سول جج صفدر جتوئي اوچتو پيپلزميڊيڪل اسپتال نوابشاهه جو دورو ڪيو ۽ اسپتال جي گائني، پيڊس ۽ ٻين وارڊن ۾ داخل مريضن جي عيادت ڪئي ۽ انهن کان حال احوال معلوم ڪيا سول جج اسپتال جي مختلف وارڊن ۾ پکڙيل گندگي آلودگي ڏسي سخت ڪاوڙ جو اظهار ڪيو انهي موقعي تي گائني، پيڊس ۽ ٻين وارڊن ۾ داخل مريضن ۽ انهن جي تيماردارن سول جج آڏو شڪايتون ڪندي چيو ته غريب ۽ نادار مريضن جي اسپتال اندر ڪا به مالڪي نه آهي وارڊ جا وڏا وڏا ڊاڪٽر ۽ پروفيسر وارڊ کي ٽائيم ڏيڻ بدران ذاتي ڪلينڪن ۽ ميڊيڪل سينٽرن کي وقت ڏين ٿا،وارڊ ۽ انهن ۾ داخل غريب ۽ بي پهچ مريض نرسن ۽ وارڊ بوائز جي رحم و ڪرم تي ڇڏيل آهن هنن چيو ته مريض آپريشن جو سمورو سامان، دوائون پنهنجي خرچ تي ٻاهران وٺڻ تي مجبور آهن انهن کي مٿي جي سور جي معمولي گوري به اسپتال پاران نٿي ڏني وڃي،مريضن جي دانهن تي سول جج صفدر جتوئي اسپتال جي ايم ايس ڊاڪٽر شمس الدين سيال تي سخت ڪاوڙ جو اظهار ڪيو ۽ کيس هدايت ڪندي چيو ته اسپتال ۾ فوري طور تي هنگامي بنيادن تي صفائي سٿرائي ڪرائي وڃي ۽ مريضن لاءِ ايل پي وارو ڌار رڪارڊ ٺاهيو وڃي ۽ وارڊن ۾ داخل مريضن کي سموريون گهربل دوائون فراهم ڪيون وڃن.
”مان جوئي آهيان، سوئي آهيان“ فيم موٽڻ شاهه بيماري جي بستري داخل
صوفي راڳي غربت سبب موٽڻ شاهه علاج ڪرائڻ کان به لاچار، سرڪار بھ سار نه لڌي
بابا سخت بيمار آهي، اسان ۾ علاج ڪرائڻ جي سگهه ناهي: موٽڻ شاهه جو پٽ
پير جوڳوٺ (رپورٽ: بلاول جوڻيجو) صوفي راڳي سيد موٽڻ شاهه بيماري جي بستري ڀيڙو ٿيويو آهي، غربت سبب علاج ڪرائڻ کان به لاچار آهي. ان سلسلي ۾ سنڌ جو مشهور صوفي راڳي “مان جوئي آهيان سوئي آهيان” “گھنڊ کول ديدار ويکائو مين آيا مک ويکڻ” مشهور ڪلام چئي شهرت جي بلندين تائين پهچندڙ سيد موٽڻ شاهه گذريل 4 سالن کان وٺي بيماري ڪري هن ڳائڻ ڇڏي ڏنو آهي. سيد موٽڻ شاهه جي پٽ پنهنجي اخبار کي ٻڌايو ته کيس باٿ روم تائين سهارو ڏئي آندو وڃي ٿو. هن چيو ته بابا جي سخت بيمار ٿيڻ ڪري سخت پريشان آهيون ۽ مسڪين ٿي وڃڻ ڪري هن جو علاج به نه ٿا ڪرائي سگھون.
موٽڻ شاهه سنڌي، اردو، پشتو، سرائڪي، فارسي ٻولين ۾ گيت ڳايا
پير جوڳوٺ: سنڌ جي مشهور صوفي راڳي سيد موٽڻ شاهه پنجن ٻولين سنڌي، اردو، پڇتو، سرائڪي، فارسي زبانن ۾ گيت ڳايا جيڪي اڄ به مشهور آهن. صوفي راڳي سيد موٽڻ شاهه کي ننڍپڻ کان ئي ڳائڻ جو شوق هو جيڪو مقامي سطح تي ٿيندڙ محفلن ۾ شريڪ ٿيندو هو ۽ بعد ۾ مشهور صوفي راڳي استاد غلام حسين خاصخيلي کان سکيا وٺي راڳ جي دنيا ۾ باقائدي پير پاتو.
صوفي راڳي موٽڻ شاهه لطيف ايوارڊ سميت ڪيترائي اعزاز ماڻي چڪو
پير جوڳوٺ: راڳ جي دنيا مڃتا ماڻيندڙ مشهور صوفي راڳي سيد موٽڻ شاهه ڪيترائي ايوارڊ ماڻيا آهن جن ۾ وڏو وزير ايوارڊ، گورنر ايوارڊ، شاهه عبداللطيف ڀٽائي ايوارڊ، سچل ايوارڊ ۽ ٻيا ڪيترائي ايوارڊ ماڻيا جيڪي هن وقت گھر جي ميز تي سجايل آهن، ايوارڊن جي باري ۾ پڇيل جي سوال جي جواب ۾ سيد موٽڻ شاهه نماڻي آواز ۾ چوي ٿو ته اهي مليل ايوارڊ منهنجي زندگي جو ته حصو ضرور آهن پر اهي پيٽ جي بک اجھائي نه ٿا سگھن انهن ايوارڊن کي ڏسي اکين ۾ لڙڪ لڙي ايندا آهن.
165 کرب لٽيندڙن جون 165 پيشيون اهميت نٿيون رکن:فياض چوهاڻ
اسلام آباد (م ڊ) پنجاب جي سڌ سماءَ وارو وفاقي وزير فياض الحسن چوهاڻ چيو آهي ته 165 کرب لٽيندڙن جون 165 پيشيون اهميت نٿيون رکن، احتساب سڀني جو ٿئي پيو، پ پ اڳواڻ به پيشيون ڀوڳي رهيا آهن، صوبائي وزير فياض چوهاڻ ميڊيا سان ڳالهائيندي چيو ته احتساب جي ميدان ۾ عمران خان جهڙو رانديگر ڪير به ناهي، اسان ليگي نه پي ٽي آءِ وارا آهيون، عدالتن جا فيصلا قبول ڪنداسين، هن چيو ته ملڪ جي هي حالت ماضي جي حڪمرانن جي ڪري آهي، 165 کرب لٽيندڙن لاءِ 165 پيشيون اهميت نٿون رکن.
تحريڪ انصاف جي حڪومت 4 ووٽن تي بيٺل آھي، سندن خلاف به جي آءِ ٽيز ٺهڻ واريون آهن:راڻا ثناءُ الله
نوازشريف خلاف فيصلي ۾ ڪٿي به ڪميشن يا ڪرپشن جو ذڪر ناهي ڪيو ويو
نااهلي لڪائڻ لاءِ قيادت تي الزام هنيا پيا وڃن، حڪومت رڳو 4 ووٽن تي بيٺل آهي
اسلام آباد (م ڊ) مسلم ليگ ن جي سينيئر اڳواڻ ۽ پنجاب جي اڳوڻي صوبائي وزير راڻا ثناءُ الله چيو آهي ته نوازشريف خلاف فيصلي ۾ ڪٿي به ڪميشن يا ڪرپشن جو ذڪر ناهي، پي ٽي آءِ وارن خلاف به جي آءِ ٽيز ٺهڻ واريون آهن، اسلام آباد ۾ ميڊيا سان ڳالهائيندي راڻا ثناءُ الله چيو ته نوازشريف تي الزام آهي ته هن پٽ کان پئسا ڇو ورتا؟، فيصلي ۾ ڪرپشن جو ناهي چيو ويو، عدالتن جو احترام ڪريون ٿا، اسانکي پهرين به عدالت مان رليف مليو آهي، هن چيو ته پارليامينٽ ۾ حڪومت وٽ 156 ووٽ آهي، حڪومت رڳو 4 ووٽن جي سهاري تي بيٺل آهي، ٻڌايو وڃي ته هڪ رات ۾ 100 ارب ڪنهن ڪمايا، ريلوي جي آڊٽ پيرا شهبازشريف ڏسندو، هن چيو ته شهبازشريف جي 10 سالن جي حڪومت ۾ رپئي جي ڪرپشن جو الزام نٿو لڳائي سگهجي، شهبازشريف 100 ارب ۾ ٽي ميٽرو منصوبا مڪمل ڪرايا. وزير پنهنجي نااهلي لڳائڻ لاءِ اسان جي قيادت تي الزام هڻي رهيا آهن.
ميان صاحب ۾ ٻارڙيءَ فوت،وارثن جو ڊاڪٽر تي غلط انجيڪشن لڳائڻ جو الزام
ميان صاحب )ن پ ا (ميان صاحب ڀرسان شڪارپور کان مائٽن وٽ آيل معصوم ٻارڙي تيز بخار ۾ ڊاڪٽر جي مبينا انجڪيشن لڳڻ سبب فوت، وارثن ڊاڪٽر تي غلط انجيڪشن لڳائڻ جو الزام هنيو آهي،ان ڏس ۾ ميان صاحب لڳ ڳوٺ درزي واهه جي چانڊيا برادري جي ڳوٺاڻن علي رضا چانڊيو ۽ ٻين ميان صاحب پهچي صحافين آڏو دانهيندي چيو آهي ته اسان جي ٻن مهينن جي معصوم ننڍڙي شائنزہ ڌي ربڏنو چانڊيو ( شڪارپور واسي ) جيڪا پنهنجن وارثن سان ڳوٺ گهمڻ لاء آيل هئي،کيس تيز بخار هو ، علاج لاءِ جيڪب آباد جي هڪ خانگي ڊاڪٽر وٽ کڻي ويا سين جتي ڊاڪٽر ننڍڙي کي بخار ۾ انجيڪشن ڪئي ، اسان گهر پهتا سون ته ننڍڙي دم ڌڻي حوالي ڪيو. هنن گهر ڪئي ته غفلت ڪندڙ ڊاڪٽر خلاف ڪارروائي ڪئي وڃي،هوڏانهن معصوم ٻارڙي جي فوت ٿيڻ بعد سندس وارثن ۾ روڄ راڙو پئجي ويو.
ڪنڌڪوٽ جي عدالت پاران قتل ڪيس جي ٽن جوابدارن جي ضمانت رد
ڪنڌڪوٽ (ن پ ا)فرسٽ ايڍيشنل سيشن جج مسٽرنديم بدرقاضي جي عدالت قتل ٿيل عورت سرتاج خاتون جي ڪيس ۾ ضمانت تي ٽن جوابدارن گل محمد،پرويز ۽ محمد بخش گولو جي ضمانت رد ڪري ٽنھي جوابدارن کي شڪارپور جيل اماڻي ڇڏيو .مذڪوره ڪيس نمبر172“ 2016 قتل ڪيس ۾ مقتولا جو مڙس سچل گولو پڻ فريادي آھي،جنھن جو ڪيس ھلندڙھو .جنھن تي عدالت ٽنھي جوابدارن کي جيل موڪلي ڇڏيو.
سنچورين ٽيسٽ جو پهريون ڏينھن بالرن جي نانءُ : ڏکڻ آفريقا جي اڌ ٽيم 127 تي آئوٽ، پاڪستاني ٽيم 181 رنسون ٺاھي سگھي
پهرين اننگ ۾ محمد عامر ۽ شاهين آفريدي 2-2 شڪار ڪيا، حسن علي هڪ وڪيٽ ورتي
سنچورين: (اسپورٽس ڊيسڪ) پاڪستان ۽ ڏکڻ آفريقا ۾ پهرين ٽيسٽ جي پهرين ڏينهن پاڪستان جي سڄي ٽيم 181 رنسن تي آئوٽ ٿي وئي، جڏهن ته ڏکڻ آفريقا جي اڌ ٽيم به 127 رنسن تي پويلين موٽي.
سينچورين ۾ پاڪستان ۽ ڏکڻ آفريقا ۾ ٽن ٽيسٽ ميچن تي ٻڌل سيريز جي پهرين ميچ جي پهرين ڏينهن بيٽسمين بالرن آڏو ڄمي کيڏڻ ۾ ناڪام ويا. پاڪستاني ٽيم ٽاس کٽي پهرين بيٽنگ جو فيصلو ڪيو. پاڪستاني بيٽسمين ڏکڻ آفريقا جي بالرن آڏو نه بيهي سگهيا، سموري ٽيم 181 رنسن تي پويلين ڀيڙي ٿي.
ڪپتان سرفراز احمد ۽ اوپننگ بيٽسمين امام الحق بنا ڪنهن رنس ٺاهڻ جي آئوٽ ٿيا، جڏهن ته اظهر علي 36، فخر زمان 12، شان مسعود 19، اسد شفيق 7، ياسر شاهه 4 ۽ محمد عامر هڪ رنس ٺاهي آئوٽ ٿيا.
بابر اعظم ۽ حسن علي نائين وڪيٽ تي 67 رنسن جي ڀائيواري جوڙي، جڏهن ته 178 رنسن جي ڪل اسڪور تي بابر اعظم 71 رنسن تي ربادا جو شڪار بڻيو. پاڪستان جي آخري وڪيٽ 181 رنسن تي شاهين آفريدي جي ڪري.
پاڪستان طرفان پهرين اننگ ۾ بابر اعظم 71، اظهر علي 36 ۽ حسن علي 21 رنسن ٺاهي نمايان رهيا. ٻي پاسي ڏکڻ آفريقا طرفان ڊيان اوليور شاندار بالنگ جو مظاهرو ڪندي 6 شڪار ڪيا، جڏهن ته ڪگيسو رابادا 3 ۽ ڊيل اسٽين هڪ وڪيٽ حاصل ڪئي.
پهرين اننگ جي شروعات ۾ ڏکڻ آفريقي اوپنر محتاط راند کيڏي، پر 30 رنسن بعد وڪيٽون ڪرڻ شروع ٿي ويون، اهڙي طرح ڏکڻ آفريقا 5 وڪيٽن جي نقصان تي 127 رنسون ٺاهيون. اوپنر مرڪرام 12 رنسن تي حسن جو شڪار بڻيو، اليگر کي 22 رنسن تي شاهين آفريدي پويلين ڀيڙو ڪيو. جنهن بعد ٽي بي برون 29 رنسن جي اننگز کيڏي آئوٽ ٿيو. هاشم آملا به 8 رنسن تي پويلين موٽيو. ڏکڻ آفريقي ڪپتان فاف دوپليسي بنا ڪنهن رنس ٺاهڻ جي شاهين آفريدي جو شڪار بڻيو. پهرين ٽيسٽ جي پهرين ڏينهن ڏکڻ آفريقا 5 وڪيٽن جي نقصان تي 127 رنسون ٺاهيون. باووما 38 رنسن ۽ ڊيل اسٽين 13 رنسن تان سڀاڻي ٻي ڏينهن جي راند شروع ڪندا.
عابدي جو قتل وڏو سانحو آهي، دهشتگردن کي ٻيهر ڪر کڻڻ نه ڏبو: شهريار آفريدي
ڪراچي (رپورٽر) مملڪتي گهرو وزير شهريار آفريدي چيو آهي ته علي رضا عابدي جو قتل وڏو سانحو آهي، ڪراچي ۾ دهشتگردن کي ٻيهر ڪر کڻڻ نه ڏينداسين، ڪراچي ۾ مملڪتي گهرو وزير شهريار آفريدي ۽ وفاقي وزير علي زيدي گورنر عمران اسماعيل سان ملاقات ڪئي، گورنر کين علي رضا عابدي جي قتل واقعي ۾ ٿيل اڳڀرائي کان آگاهه ڪيو، ان موقعي تي مملڪتي گهرو وزير شهريار آفريدي ميڊيا سان ڳالهائيندي چيو ته قانون لاڳوڪندڙ ادارا گڏيل آپريشن ذريعي شرپسندن جي نيٽ ورڪ جو خاتمو آڻن،علي رضا عابدي جو قتل وڏو سانحو آهي، امن دشمن عنصرن خلاف سخت قدم کنيا وڃن، ڪراچي واسي پريشان نه ٿيو، حڪومت اوهان سان گڏ آهي، اسان کي هڪ ٽيم بڻجي دهشتگردي خلاف وڙهنداسين، ڪراچي سميت پوري پاڪستان کي پرامن بڻايو ويندو.
ملير جي جج جو ٿاڻي تي ڇاپو: وڪيل سڪندر شر بازياب: ھڙتال، عدالتي ڪارروائين جو بائڪاٽ
پوليس خلاف جمعي تائين احتجاج جاري رکڻ جو اعلان، عدالتي ڪارروائين جو بائڪاٽ ڪبو
ملير پوليس سڪندر شر کي گرفتار ڪري قانون جا بخيا اڊيڙي ڇڏيا آهن: ملير بار ايسوسيئيشن
ملير (رپورٽر(جوڊيشل مئجسٽريٽ نمبر 9 ملير آصف اڪبر شاھ لطيف ٿاڻي تي ڇاپو ھڻي باندي بنايل ملير بار جي نائب صدر سينيئر وڪيل سڪندر شر کي بازياب ڪرائي ورتو ۽ ايس ايڇ او شاھ لطيف کي رڪارڊ سميت سيشن ڪورٽ ملير طلب ڪيو،ان واقعي خلاف وڪيلن ملير ڪورٽ آڏو هاءِ وي تي احتجاجي مظاھرو ڪري ڌرڻو ھنيو.جنھن سبب ايندڙ ويندڙ ٽريفڪ معطل ٿي وئي.مظاھرين وڪيلن چيو ته شاھ لطيف پوليس بي ڏوھي وڪيل اڳواڻ کي ڪوڙي ايف آءِ آر داخل ڪري گرفتار ڪيو .جنھن کي عدالتي ڇاپي بعد بازياب ڪرايو ويو آھي.انھن چيو ته پوليس گردي ڪنھن به صورت قبول نه ڪئي ويندي ۽ ايس ايڇ او شاھ لطيف نيڪ محمد کوسو کي معطل ڪري سندس خلاف ڪاروائي ڪئي وڃي. ٻئي طرف ايس ايڇ او شاھ لطيف صحافين کي ٻڌايو ته پوليس لينڊ گريبر راجا آصف کي گرفتار ڪيو ھو جنھن تي ۲۵ ايف آء آر داخل آھن .انکي ڇڏائڻ لاء وڪيل رات جو شراب جي نشي ۾ ڌت ٿي ٿاڻي تي آيو ۽ پوليس سان بدتميزي ڪئي گھٽ وڌ ڳالھايو. جنھن کانپوءِ وڪيل اڳواڻ کي گرفتار ڪري ميڊيڪل ڪرايو ويو، ميڊيڪل رپورٽ ۾ پڻ نشو ثابت ٿيو آھي, هن چيو ت مون ڪو به غلط قدم نه کنيو آھي قانون جي دائري ۾ رھي قانوني ڪاروائي ڪئي آھي. ٻئي طرف ملير بار پاران واقعي خلاف ٽي ڏينهن هڙتال جو اعلان ڪيو آھي.
پشاور: وحشي صفت نوجوان پنھنجي والد، 3 ڀائرن ۽ چاچي کي قتل ڪرڻ بعد آپگھات ڪري ڇڏيو
واردات بعد نوجوان آپگھات ڪري ڇڏيو، جوابدار ذهني مريض هو، جاچ ڪريون پيا: پوليس
پشاور (م ڊ) پشاور ۾ نوجوان پٽ ۽ ڀائرن سميت 5 گهرڀاتين کي قتل ڪري آپگهات ڪري ڇڏيو، ٿڪال واري علائقي ۾ هڪ نوجوان گوليون هڻي پنهنجي پيءُ، ٽن ڀائرن ۽ چاچي کي قتل ڪري ڇڏيو، جنهن کانپوءِ جوابدار پنهنجي زندگي جو به انت آندو، پوليس واقعي واري هنڌ پهچي لاش ضروري ڪارروائي لاءِ اسپتال پهچايا، واقعي بابت پوليس جو چوڻ آهي ته نوجوان ذهني مريض هو، جنهن پنهنجي 5 گهرڀاتين کي قتل ڪرڻ بعد پاڻ به آگهات ڪيو آهي، واقعي جي وڌيڪ جاچ ڪئي پئي وڃي.
نوشهري فيروز جي مختلف ڳوٺن ۾ چوپائي مال بيماريون، ڀاڳيا پريشان
چوپايو مال مري رهيو آهي، لائيو اسٽاڪ کاتي وارا ڪو تحرڪ نٿا وٺن: ڳوٺاڻا
سياري جي بيمارين کان بچاءُ لاءِ چوپائي مال کي ويڪسين ڪئي پئي وڃي: عملدار
نوشهروفيروز(ن پ ا) نوشهروفيروز ضلعي جي مختلف شهرن ۽ ڳوٺن ۾ چوپائي مال ۾ مختلف بيمارين وبائي صورت اختيار ڪري ورتي، ڪيترائي ڍور مري ويا، ڳوٺاڻن ڊاڪٽرن جي ٽيم اماڻڻ جو مطالبو ڪيو آهي
ضلعي جي مختلف شهرن توڙي ڳوٺن ۾ چوپايو مال ۾ ڳنڍ، گوگهو، ٻيڪ، ڦڦڙن جي بيماري، گُهمرو، مهاڙو واريون بيماريون تيزي سان پکڙجڻ لڳيون، جنهن ڪري مالوند ماڻهن جا وٿاڻ خالي ٿيڻ لڳا آهن.
ڦل ڀرسان ديهه مينگهلو ۾ ڳوٺ ڌڻي بخش کوسو ۽ سومر کوسو ۾ پراسرار بيماري سبب 20 کان وڌيڪ مينهون ۽ ٻڪريون مري ويون، ڳوٺ زوار محمد خاصخيلي ۾ 4 ٻڪريون، 3 ڇيلا مري ويا. ڳوٺ خدا بخش شاهه ۾ هڪ مينهن مري وئي، ڳوٺ مٺا خان مري ۾ 2 ٻڪريون مري ويون، ابڙان شهر ۾ هڪ ٻڪري، 3 مينهون مري ويون ۽ ڀرنڊ ۾ 6 ٻڪريون مري ويون.
ڳوٺاڻن جو چوڻ هو ته بيمارين وگهي اسان جو مال مري رهيو آهي، اطلاع ڏيڻ باوجود لائيو اسٽاڪ کاتي جو عملو ناهي پهتو ۽ ڊاڪٽر گهر ويٺي پگهارون کڻي رهيا آهن، سنڌ سرڪار معاملي جو نوٽيس وٺي ڊاڪٽرن جي ٽيم موڪلي وڌيڪ چوپائي مال کي بچايو وڃي.
ٻئي طرف لائيو اسٽاڪ کاتي جي ڊپٽي ڊائريڪٽر راج ڪمار رابطو ڪرڻ تي ٻڌايو ته کين مختلف ڳوٺن ۾ جانورن ۾ پيدا ٿيل بيمارين بابت ڳوٺاڻن آگاهه ناهي ڪيو، تنهن هوندي به سياري ۾ نزلي، زڪام ۽ ٻين بيمارين کان بچاءُ لاءِ اي پي آر، اي پي پي ويڪسين ڪرڻ جو سلسلو جاري آهي، جيڪڏهن ڳوٺاڻا اطلاع ڏيندا ته بيمار جانورن جو ڳوٺن ۾ وڃي علاج ڪيو ويندو.