غوثپور (ن پ ا) ڪشمور ايٽ ڪنڌڪوٽ ضلعي اندر وڌندڙ قبائلي خوني تڪرارن جي خاتمي لاء غوثپور شهر جي سول سوسائٽي مذهبي سياسي سماجي ڌرين ،وڪيل ۽ قومپرست اڳواڻن امن ريلي ڪڍي ،امن زنده باد جا نعره هنيا . ريلي ۾ عبدالغني بجاراڻي سيد محبوب علي شاه جيلاني سائين منور علي شاه جيلاني مولانا خان محمد ملڪ زريت حسين مولوي اصدالله ڀيو نثار احمد ميراڻي اعجاز احمد بجاراڻي ڪامريڊ تاج محمد جعفري معشوق ڀيو عبدالحفيظ بجاراڻي ٻين شرڪت ڪئي . ميڊيا سان ڳالهائيندي اڳواڻن چيو ته ضلعي ڪشمور ايٽ ڪنڌ ڪوٽ جا جاگير دار وڏيرا پنهجا مفاد حاصل ڪرڻ لاء قبائلي جهيڙا ڪرائي انسانيت جو قتل عام ڪرائن ٿا هنن چيو ته اسان ورهين کان هتان جي نمائيندن کي ووٽ ڏيون پيا اسان جي ووٽن تي چونڊيل ايم پي ايز ايم اين اي اسان کي نوڪريون روڊ رستا تعليم صحت ۽ ٻيون بنيادي سهولتون نه ڏئي سگهيا آهن پر اسان کي امن به نه ڏئي سگهيا آهن هنن چيو ته قبائلي جهيڙن کي هٿي وٺرائڻ ۾ وڏيرن جو خاص ڪردار رهيو آهي ۽ انتظاميان به خاموش بڻيل آهي ضلعي ڪشمور اندر اڀرندڙ تيغاڻي بجاراڻي قبائلي خوني تقرار م هن محل تائين 28 نوجوان قتل ٿي چڪا آهن پر پوليس انتظاميان هن مهل تائين هڪ به جوابدار گرفتار نه ڪري سگهي آهي پوليس انتظاميان لاءِ ڪيترائي سوال پيدا ڪري ٿي هنن رينجرز توڙي عدالتن کان بدامني جو نوٽيس وٺي امن قائم ڪرائڻ جي گهُر ڪئي.

شھدادڪوٽ (ن پ ا) شھدادڪوٽ ۾ عورتن قرآن پاڪ کڻي معصوم ٻارڙن سميت اي سيڪشن ٿاڻي جي اهلڪارن خلاف ٿاڻي اڳيان احتجاجي مظاھرو ڪري پوليس کي پٽون ۽ پاراتا ڏينديون رهيون،ان ڏس ۾ اي سيڪشن ٿاڻي اڳيان سومرا ۽ مگسي برادري جي ماڻھن ۽ عورتن ۽ معصوم ٻارڙن سميت قرآن پاڪ کڻي احتجاجي مظاھرو ڪيو، مظاھرو ڪندڙ عورتن مسمات لعل خاتون مگسي، مسمات افروزخاتون، شاھ گل خاتون ۽ ٻين اُڀ ڏاريندڙ رڙيون ڪندي روئيندي دانھيو آھي ته اي سيڪشن ٿاڻي جي پوليس اسان جي نوجوانن شاھنواز مگسي ۽ اعجاز سومرو کي چوري جي ڪوڙي الزام ۾ گرفتار ڪري کين تشدد جو نشانو بڻايو آھي، جيڪي ھن وقت تائين گم آھن ، ھوڏانھن ايس ايڇ او اختيار شيخ رابطو ڪرڻ تي ٻڌايو ته گذريل رات شھباز کوسي جي گھران 10 لک روپين جي چوري ٿي ھئي، مالڪن جي فرياد تي 2 جوابدارن کي گرفتار ڪري انھن کان جاچ ڪري رھيا آھيون.

شاهپورجهانيان(ن پ ا) شاهپور جهانيان ۾ رهتون ڄاڻائي 20 کان وڌيڪ ڳوٺن جي ڪاٽيل بجلي 2 هفتا گذرڻ باوجود بحال نه ٿي سگهي آهي، جنهن سبب رهواسي عذاب ڀوڳڻ تي مجبور آهن. حيسڪو عملدارن جيئل ڏاهري، ننگرمڪان، مولابخش جويو، الھه بخش ڏاهري، محراب جسڪاڻي، مقيم ڏاهري، انگڙي،ڏهيسر، غلام حيدر ڏاهري ۽ ساهيا ڳوٺ سميت 20 کان وڌيڪ ڳوٺن جي بجلي ڪاٽي ڇڏي. رهواسين پنهنجي اخبار جي آفيس آڏو احتجاج ڪندي دانهيو ته بجلي بند هئڻ سبب راتيون جاڳي گذارڻ تي مجبور آهيون، جڏهن ته پيئڻ جي پاڻي جو به بحران ٿي ويو آهي. رهواسين مطالبو ڪيو ته بجلي جون رهتون قسطن جي مد ۾ جمع ڪرايون وينديون، جڏهن ته بجلي بحال ڪري پريشانين کان جند ڇڏائي وڃي.

دادو( رپورٽر) دادو ۾ ڪار جي ٽڪر ۾ عورت ۽ ٻار سميت 3 ڄڻا زخمي ٿي پيا آهن. دادو جي جُڊيشل ڪامپليڪس سامهون حادثو ٿيو، جتي تيز رفتار ڪار جي ٽڪر ۾ 3 ڄڻا زخمي ٿي پيا. زخمين ۾ امتياز چانڊيو، مسمات زليخان ۽ ٻارڙي شائستا شامل آهن. جن کي فوري طور اسپتال منتقل ڪيو ويو، جتي سندن حالت سڌرندڙ ٻڌائي پئي وڃي.

ٺاروشاھ (ن پ ا)ٺاروشاهه ڀرسان ڳوٺ ظفر آباد ڀاڳو ديرو ۾ سي آءِ پوليس نوشهروفيروز ڪارروائي ڪندي دولتپور مان پيار جو پرڻو ڪرڻ لاءِ پهتل ناري سيد عائشه ۽ پريمي نوجوان عمران گوپانگ کي گرفتار ڪري ورتو،سي آءِ پوليس پاران گرفتار جوڙي کي جوڊيشنل مئجسٽريٽ مورو جي عدالت ۾ پيش ڪيو ،جتي نوجوان بيوفائي ڪندي پريميڪا سان پيار جو پرڻي کان انڪار ڪري ڇڏيو جڏهن ته ناري پاران مائٽن ڏانهن واپس وڃڻ جي انڪار تي عدالت کيس دارالامان سکر حوالي ڪري ڇڏيو، سي آءِ پوليس نوشهروفيروز جي انچارج شهاب ڪولاچي ۽ ايس ايڇ او نوشهروفيروز محمد حنيف مهر رابطو ڪرڻ تي ٻڌايو ته عدالت ۾ ناري مائٽن ڏي واپس وڃڻ تي قتل ڪرڻ جو خدشو ظاهر ڪرڻ تي عدالت کيس دارالامان سکر حوالي ڪيو آهي. هنن چيو ته ناري جو نوجوان عمران گوپانگ سان موبائل تي رابطو ٿيو هو .جنهن بعد ناري شادي ڪرڻ لاءِ سندس ڳوٺ پهتي ته نوجوان شادي کان انڪار ڪري ڇڏيو ، ناري ٻڌايو ته مائٽ زبردستي هڪ پوڙھي سان پرڻائي رهيا هئا،نوجوان عمران گوپانگ سان پيار پرڻو ڪرڻ پئي چاهيو پر هن به مونکي قبول ڪرڻ کان انڪار ڪيو آهي .

دولتپورصفن)رپورٽر)پ پ پ اڳواڻ ۽ اڳوڻي صوبائي صلاحڪار محمد اسماعيل ڏاهري دولتپورصفن جي ميڊيا سان ڳالهائيندي چيو آهي ته پ پ ڪو چئيرمين آصف علي زرداري تي 20 سال اڳ جا ڪيس آهن،جيڪي عدالتون ختم ڪري چڪيون آهن،هن چيوته طاقت ور ڌريون 18 هين ترميم کي ختم ڪرڻ چاهين ٿيون ، صوبن کي ڏنل خود مختياري ختم ڪرڻ لاءِ پ پ تي پريشر وجهڻ لاءِ آصف علي زرداري تي اجايا ڪيس ٺاهيا ويا آهن، اسان 18 ترميم جو تحفظ ڪنداسين، هن چيوته عمران خان نفسياتي مريض آهي، هو حڪومت نه ٿو هلائي سگهي، جن کيس وزير اعظم بنايو آهي اهي به هاڻ سندس ڪمن جي ڪري ان مان بيزار ٿي پيا آهن، هن چيوته آصف زرداري کي گرفتار ڪيو ويو ته سڄي سنڌ ۾ باھ ٻري ويندي.

خيرپور (رپورٽر)خيرپور ۾ ضلعي انتظاميه طرفان پراڻي بس اسٽينڊ تي موجود دڪانن کي ڊاهي پٽ ڪرڻ واري عمل خلاف دڪاندارن،مسترين ۽ هوٽلن جي مالڪن سيشن ڪورٽ ٻاهران علامتي بک هڙتال ڪيمپ قائم ڪري ورتي آهي. بک هڙتالي ڪئمپ جي اڳواڻي ساجد ملڪ، عاشق حسين بگٽي، اعجاز جاگيراڻي، غلام قاسم ڪلهوڙو، عمران شيخ ۽ ٻيا ڪري رهيا ھئا. ان موقعي تي اڳواڻن صحافين اڳيان دانهيندي ٻڌايو ته ضلعي انتظاميه پراڻي بس اسٽينڊ تي موجود اسان جي دڪانن کي ڊاهي پٽ ڪري ڇڏيو آهي ،جنهن سبب اسان بيرزگار ٿي ويا آهيون ۽ اسان جا ٻچا فاقه ڪشي واري زندگي گذارڻ تي مجبور آهن. هنن چيو ته ايم اين اي ڊاڪٽر نفيسه شاهه اسان کي يقين ڏياريو هو ته 17 ڊسمبر تي اوهان کي متبادل دڪان ڏنا ويندا ته جيئن توهان پنهنجو روزگار ڪري سگهو پر ان تي هن وقت تائين عمل نه ٿي سگهيو آهي ان ڪري مجبور ٿي بک هڙتال شروع ڪئي آهي ان جي باوجود مسئلو حل نه ٿيو ته معصوم ٻچن سميت شروع ڪيل بک هڙتال جاري رکنداسين.

ڪراچي / حيدرآباد(نمائندن وٽان + بيورو رپورٽ) سنڌ ترقي پسند پارٽي جي چيئرمين ڊاڪٽر قادر مگسي چيو آهي ته روشن خيالي ۽ لبرل ازم جي نالي ۾ ملڪ تي آمريت مڙهيل آهي، ملڪ ۾ رهندڙ قومن کي جيستائين قبول ڪري کين پنهنجا حق نه ڏنا ويندا، تيستائين هي ملڪ ترقي ڪري نه سگهندو، اهڙو اظهار هن ايس ٽي پي ضلعي حيدرآباد پاران ترقي پسند هائوس تي سندس ملهايل 56هين سالگره جي موقعي تي خطاب ڪندي ڪيو، هن چيو ته سنڌو درياِء تي ڊيمن جي اڏاوت خطرناڪ آهي، جنهن سان سنڌ پاڻي کان محروم ٿي ويندي، انصاف جي اعلي اداري جو سربراه ڪهڙن آئيني اختيارن تحت ڪالا باغ ڊيم سميت ٻين ڊيمن لاءِ چندو گڏ ڪري رهيو آهي، هن چيو ته اهڙي عمل خلاف پارليامينٽ کي سپريم جوڊيشل ڪائونسل ۾ ريفرنس داخل ڪرڻ گهرجي، ڊاڪٽر قادرمگسي چيو ته اسين پنهنجي وطن ۽ قوم جي آجپي ۽ خوشحالي لاءِ هڪ گهڙي به غافل ناهيون ٿيا ۽ مسلسل جدوجهد جي عمل ۾ آهيون، هن سنڌ جي ماڻهن تي زور ڏنو ته هو پنهنجي حقن جي حاصلات لاءِ متحد ٿين ۽ عملي جدوجهد ڪري پنهنجا سمورا حق حاصل ڪن، ان موقعي تي ايس ٽي پي جي چيف آرگنائيزر ڄام عبدالفتاح، ذوالفقار هاليپوٽو، منصور قادر جوڻيجو، نظير ناز، نسرين الطاف، قادر چنا، ڊاڪٽر عبدالحميد ميمڻ، محسن جويو، حفيظ ڏيرو ۽ ٻين خطاب ڪيو، تقريب ۾ ڊاڪٽر قادرمگسي جي 56هين سالگره جو ڪيڪ پڻ ڪاٽيو ويو. ٻئي پاسي سنڌ جي مختلف شهرن ۾ ايس ٽي پي ڪارڪنن پاران ڊاڪٽر قادر مگسي جي سالگرهه ملهائي وئي.

وڳڻ (ن پ ا)واره کان محترمه بينظير ڀٽو جي ورسي لاءِ نڪتل بپيادل قافلو وڳڻ پھچڻ تي آجيان ڪئي وئي ،واره کان نڪتل پي پي پي يوٿ ونگ جو قافلو پيادل محترمه بينظير ڀٽو جي ورسي لاء وڳڻ پھچڻ تي وڳڻ جي پي پي پي جي جيالن طرفان شاندار استقبال ڪيو ،وڳڻ ۾ پي پي پي جي جيالن ضمير حسين چانڊيو ،جھانگير بدر عباسي ر،ياض حسين عباسي ۽ ٻين اڳواڻن ڀرپور استقبال ڪيو جتي وڳڻ ٽائون جي چيئرمين خليل احمد خان وڳڻ قافلي تي گلن جي ورکا ڪئي وئي.

سکر(بيورو رپورٽ) پوري ملڪ جيان سکر ۾ به عيسائي برادري پاران ڪرسمس ڊي مذهبي جوش ۽ جذبي سان ملهايو ويو، اِن حوالي سان سکر جي سينٽ سويئر چرچ ۾ دعائي تقريب منعقد ڪئي وئي جنهن وڏي تعداد ۾ عيسائي برادري جي مرد عورتن توڙي ٻارڙن شرڪت ڪئي، اِن دوران مس سارا سحر ۽ ٻين دعائي گيت ڳائي مخصوص عبادتون ڪيون جنهن کان پوءِ هڪ ٻئي کي ڪرسمس ڏهاڙي جون مبارڪون ڏنيون. اِن موقعي تي مس سارا سحر ۽ ٻين جو چوڻ هو ته ميري ڪرسمس خوشين جو ڏهاڙو آهي.