لاهور(م ڊ) جماعت اسلامي جي امير سينيٽر سراج الحق چيو آهي ته پاڪستان جو مسئلو آبادي ناهي پر وسيلن جي غير منصفاڻي ورڇ ۽ 60 سيڪڙو کان وڌيڪ بنجر زمين آهي. سينيٽر سراج الحق جو چوڻ آهي ته جن ملڪن آبادي گهٽ ڪئي اتي انفرادي ۽ اجتماعي سڪون ختم ٿي ويو. هن چيو ته اولهه ۽ يورپ آبادي ڪنٽرول کي ترقي جو ذريعو سمجهندا هئا، اڄ هنن آبادي وڌائڻ وارا پروگرام شروع ڪري ڇڏيا آهن. هن چيو ته اولهه جي ايجنڊا تي هلڻ بدران پاڪستان کي پنهنجي ايجنڊا تي هلڻو پوندو. جماعت اسلامي جي امير چيو ته پاڪستان جو مسئلو آبادي نه پر اختيارن جي غير منصفاڻي ورڇ ۽ 60 سيڪڙو بنجر زمين آهي. هن چيو ته حڪومت وسيلن جي منصفاڻي ورڇ، ڪرپشن جي خاتمي ۽ بنجر زمين آباد ڪرڻ ڏانهن ڌيان ڏئي. ڊيم فنڊن بابت ڳالهائيندي سراج الحق چيو ته چيف جسٽس ۽ وزير اعظم طرفان ڊيمن جي اڏاوت جو منصوبو فخر جوڳو آهي.

اسلام آباد(م ڊ) حريت اڳواڻ ياسين ملڪ جي گهر واري مشال ملڪ چيو آهي ته اڄ قوم جي ابي کي ڀيٽا پيش ڪرڻ جو ڏينهن آهي، قائد اعظم محمد علي جناح ڪشمير کي پاڪستان جي شهه رڳ قرار ڏنو هو. تفصيل موجب حريت اڳواڻ ياسين ملڪ جي گهرواري مشال ملڪ پاڪستان جي باني جي سالگرهه ۽ ڪرسمس جي موقعي تي پنهنجي پيغام ۾ چيو آهي ته اڄ قوم جي ابي کي ڀيٽا پيش ڪرڻ جو ڏينهن آهي، پاڪستان ۾ اقليتون آزاد هوائن ۾ ساهه کڻي رهيون آهن. هن چيو ته قوم ڪرسمس جي خوشين ۾ برابر جي شريڪ آهي، مسيحي برادري هميشه ڪشميرين جي حق ۾ آواز اٿاريو آهي. هن چيو ته قائد اعظم ڪشمير کي پاڪستان جي شهه رڳ قرار ڏنو هو جڏهن ته اقليتن هميشه ڪشميرين تي ظلمن خلاف احتجاج ڪيو.

لاهور(م ڊ) مسلم ليگ ن جي اڳواڻ عظميٰ بخاري کي مسلم ليگ ن جي سوشل ميڊيا جو سربراهه بڻائڻ جو فيصلو ڪيو يوو آهي جنهن جو نوٽيفڪيشن جلد جاري ڪيو ويندو. تفصيل موجب مسلم ليگ ن جي غير فعال سوشل ميڊيا کي ٻيهر موثر بڻائڻ جو فيصلو ڪيو ويو آهي ۽ ان ضمن ۾ متحرڪ عورت اڳواڻ عظميٰ بخاري کي اِها ذميواري ڏيڻ جو فيصلو ڪيو ويو آهي. عظمي بخاري کي موجوده صورتحال خاص طور تي نواز شريف جي ٻيهر گرفتاري بعد پارٽي نظريي کي سوشل ميڊيا تي موثر انداز ۾ پيش ڪرڻ جي ذميواري ڏني وئي آهي، عظميٰ بخاري جلد مسلم ليگ ن جي سوشل ٽيم کي چونڊيندي.

بيجنگ(م ڊ) پرڏيهي وزير شاهه محمود قريشي چيني هم منصب سان ملاقات ڪئي جنهن ۾ ٻطرفن لاڳاپن تي ڳالهيون ڪيون ويون. پرڏيهي وزير شاهه محمود قريشي 4 ملڪي دوري جي ٽئين مرحلي ۾ بيجنگ پهچي ويو جتي هوائي اڏي تي چين جي پرڏيهي وزارت جي اعليٰ اختيارين استقبال ڪيو، پرڏيهي وزير شاهه محمود قريشي بيجنگ ۾ چيني هم منصب وانگ اي سان ملاقات ڪئي جنهن ۾ ٻطرفن لاڳاپن ۽ خطي ۾ رابطن جي هٿي سميت ٻين اهم معاملن تي ڳالهيون ڪيون ويون. پرڏيهي وزير شاهه محمود قريشي چيني هم منصب وانگ اي سان ملاقات دوران وزير اعظم پاڪستان عمران خان طرفان چيني قيادت جي لاءِ پيغام ڏنو.

اسلام آباد (م ڊ) وزيراعظم عمران خان پاناما پيپر ۽ جعلي اڪائونٽن وارين جي آءِ ٽي رپورٽن کي رياستن جي ناڪامي ۽ قرض ۽ غربت جي واڌ جي حوالي سان هڪ ڪيس اسٽڊي قرار ڏئي ڇڏيو. سماجي رابطن واري ويب سائيٽ ٽوئيٽر تي جاري ڪيل پنهنجي پيغام ۾ وزيراعظم لکيو ته پاناما ۽ ڪوڙن اڪائونٽن جي جي آءِ ٽي رپورٽون ڪيس اسٽڊي آهن ته رياستون ڪيئن ناڪام ٿينديون آهن ۽ ڪهڙي طرح غربت ۽ قرض ۾ ٻڏي وينديون آهن.  وزيراعظم عمران خان وڌيڪ لکيو ته جنهن طريقي ۽ جنهن پيماني تي عوام پئسو چوري ڪيو ويو، اهو ناقابل يقين آهي ، وزيراعظم وڌيڪ لکيو ته مونکي انهن ماڻهن تعجب ٿئي ٿو، جيڪي رپورٽون پڻ بعد به لٽيرن جو بچاءُ ڪري رهيا آهن.

اسلام آباد (رپورٽ: ايم بي سومرو)پاڪستان تحريڪ انصاف جي حڪومت عالمي مالياتي اداي آءِ ايم ايم ايف جو بجلي مهانگي ڪرڻ وارو شرط مڃي ورتو آهي، جڏهن ته گذريل حڪومت ۾ ٿيل گيس چوري جا 65 ارب به عوام کان اوڳاڙڻ جو فيصلو ڪيو ويو آهي. ان سلسلي ۾ ٻڌايو پيو وڃي ته پي ٽي آءِ سرڪار بيل آئوٽ پيڪيج لاءِ عالمي مالياتي فنڊ جا چئن مان ٻه مطالبا مڃي ورتا آهن، جڏهن ته آءِ ايم ايف ڊالر مهانگو ڪرڻ واري شرط تان هٿ کڻي ويو آهي. ذريعن موجب حڪومت روينيو اوڳاڙي بابت آءِ ايم ايف جو مطالبو تسليم نه ڪيو آهي، حڪومت جو موقف آهي ته روينيو اوڳاڙي جو هدف 4700 ارب رپين بدران 4400 ارب رپين تائين وڌايو ويندو ، جڏهن ته ذريعن موجب حڪومت پاران عالمي مالياتي اداري جو بينڪن کان قرض تي وياج جي شرح ٻيڻ تي وڌائي 13 سيڪڙو تائين وڌائڻ جو مطالبو مڃڻ کان به انڪار ڪيو ويو آهي. ٻڌايو پيو وڃي ته بيل آئوٽ پيڪيج تي ڳالهين لاءِ آءِ ايم ايف جي وفد جي جنوري جي پهرئين هفتي ۾ پاڪستان اچڻ جو امڪان آهي، آءِ ايم ايف جي نه اچڻ جي صورت ۾ وڊيو ڪانفرنس تي ڳالهيون ٿينديون. هوڏانهن تحريڪ انصاف جي حڪومت مسلم ن جي گذريل حڪومتي دور جي پنجن سالن دوران ٿيل گيس چوري جا 65 ارب روپيا واهپيدار کان وصول ڪرڻ جو فيصلو ڪيو آھي، ان سلسلي ۾ اوگرا سئي نادرن گيس ڪمپني جي درخواست تي 2013 کان گذريل پنج سالن دوران ٿيل گيس چوري جي مد ۾صارفين کان 65 ارب روپيا وصول ڪرڻ جي منظوري ڏئي ڇڏي آھي، اها رقم صارفين کان مرحلي وار بلن ذريعي وصول ڪئي ويندي، سئي نادرن جي صارفين کان چوري ٿيندڙ گيس جي مد ۾ اڳ ئي ساڍا چار سيڪڙو وصولي ٿي رهي آھي، جنهن شرح ۾ واڌ ڪري 7.1 سيڪڙو ڪئي وئي آھي.

ٽوڪيو (دلچسپ نيوز) جاپان ۾ رنگين مڇين جي هڪ قسم “ڪوئي ڪارپ” جي ڳاڙهي ۽ اڇي رنگ واري مڇي دنيا جي قيمتي مڇي بڻجي وئي. مڇي کي 25 ڪروڙ رپين وڪرو ڪيو ويو.
هڪ ميٽر ڊگهي ان مڇي کي هيروشيما جي هڪ فارم تي نيلامي ۾ وڪرو ڪيو ويو، انهي مڇيءَ گذريل سال آل جاپان ڪوئي شو ۾ پهريون نمبر ماڻي انعام حاصل ڪيو هو.
مڇي جي خريدار نالو نام ينگائنگ آهي، جيڪو تائيوان سان واسطو رکي ٿو.
اها مڇي هڪ سال ۾ 5 لک بيضا ڏيندي، جن مان رڳو 5 هزار ئي وڪري لائق هوندا. جڏهن ته اها مڇي اڃا وڌيڪ ٻن سالن تائين شو ۾ حصو وٺي سگهي ٿي.

فيصل آباد (اسپورٽس ڊيسڪ) فيصل آباد ۾ قائد اعظم جي ڏهاڙي جي موقعي تي خانگي اسڪولن جي ايسوسي ايشن طرفان پنجاب ميراٿن ڊوڙ جو مقابلو ڪرايو ويو. ڊوڙ ۾ 700 ايٿليٽس شرڪت ڪئي، جن مان ساهيوال جي محمد حبيب 8 ڪلوميٽر جو ڊگهو فاصلو 24 منٽن ۾ طئي ڪري پهرين پوزيشن ماڻي.
ڊوڙ مقابلي جو افتتاح ڊي سي فيصل آباد سردار سيف الله ڊوگر ڪيو، سندس چوڻ هو ته ڊوڙ مقابلي جو مقصد نوجوان نسل کي صحتدمند سرگرميون فراهم ڪرڻ آهي.
8 ڪلوميٽرن جي ڊگهي ڊوڙ ڪشمير پل کان شروع ٿي ڊي گرائونڊ چوڪ تي پڄاڻي تي پهتي. جنهن ۾ ساهيوال جي ايٿليٽ محمد حبيب پهرين، محمد اختر ٻئين پوزيشن ماڻڻ تي خوشي ملهائي.
هوڏانهن ڊوڙ مقابلي ۾ مناسب سهولتون نه ملڻ تي انتظام ڪندڙ سان شڪايتون به ڪيون ويون.

لاهور (اسپورٽس ڊيسڪ) پاڪستاني ڪرڪيٽر محمد حفيظ لاهور قلندرز جي نوجوان رانديگرن کي عالمي ڪرڪيٽ جو تجربو منتقل ڪرڻ لاءِ ميدان ۾ اچي ويو.
لاهور جي نيشنل ڪرڪيٽ اڪيڊمي ۾ محمد حفيظ لاهور قلندرز جي رانديگرن کي خاص گر سيکاريا، ۽ آل رائونڊر رانديگرن کي ڪارڪردگي بهتر ڪرڻ لاءِ ليڪچر به ڏنو.
محمد حفيظ کي پي ايس ايل 4 لاءِ لاهور قلندرز جي ٽيم جو ڪپتان مقرر ڪيو ويو آهي.

ڪرائسٽ چرچ (اسپورٽس ڊيسڪ) نيوزلينڊ ٽيم جي بهترين فاسٽ بالر ٽم سائوٿي کي ٽيسٽ ڪرڪيٽ ۾ اڳوڻي ڪيوي بالر ڪرس مارٽن جي گهڻين وڪيٽن جو رڪارڊ ٽوڙڻ لاءِ وڌيڪ ٻن وڪيٽن جي ضرورت آهي.
سريلنڪا خلاف ٿيندڙ اڄوڪي ٽيسٽ ۾ جيڪڏهن ٽم سائوٿي 2 وڪيٽون حاصل ڪري ٿو ته هو گهڻيون ٽيسٽ وڪيٽون وٺندڙ ٽيون ڪيوي بالر بڻجي ويندو.
مارٽن 233، جڏهن ته سائوٿي 232 وڪيٽون ورتيون آهن. نيوزلينڊ طرفان ٽيسٽ ڪرڪيٽ ۾ گهڻيون وڪيٽون وٺڻ جو اعزاز رچرڊ هيڊلي وٽ آهي، جنهن 431 وڪيٽون ورتيون. جڏهن ته ڊينيل ويٽوري 361 وڪيٽن سان ٻئين نمبر تي موجود آهي.

سنچورين (اسپورٽس ڊيسڪ) پاڪستان ٽيم جي ڪپتان سرفراز احمد کي ٽيسٽ ڪرڪيٽ ۾ وڪيٽن پويان 150 شڪار مڪمل ڪرڻ لاءِ وڌيڪ 2 شڪار گهربل آهن.
سڀاڻي کان شروع ٿيندڙ ڏکڻ آفريڪا خلاف پهرين ٽيسٽ ۾ جيڪڏهن سرفراز احمد وڪيٽن پويان ٻن رانديگرن کي ڪيچ يا اسٽمپس ذريعي آئوٽ ڪري ٿو ته هو اهو ڪارنامو ڏيندڙ ٽيون پاڪستاني وڪيٽ ڪيپر بڻجي ويندو.
سرفراز احمد اڃا تائين 148 شڪار ڪيا آهن، جن مان 128 ڪيچز ۽ 20 اسٽمپس ذريعي بيٽسمين کي پويلين ڀيڙو ڪيو آهي.
پاڪستان طرفان وڪيٽن پويان وڌيڪ شڪار ڪندڙ جو اعزاز وسيم باري کي آهي، جنهن 228 شڪار ڪيا، 206 شڪارن سان ڪامران اڪمل ٻئين نمبر تي موجود آهي.