ڏھرڪي ( ن پ ا ) ڏهرڪي پوليس معصوم شاگرد سان مبينا جنسي ڏاڍائي جي الزام هيٺ گرفتار ٻن جوابدار کي آزاد ڪري ڇڏيو، نينگر جي والد دانهيو آهي ته پوليس جي ڌٻاءُ تي راڄوڻي لاءِ راضي ٿي ويا آهيون پر فيصلي کان اڳ جوابدارن کي آزاد ڪرڻ زيادتي آهي، پوليس جو موقف آهي ته ڪيس داخل ڪرائڻ تائين جوابدارن کي حراست ۾ نه ٿا رکي سگهون
ڪجهه ڏينهن اڳ ڏهرڪي جي القطب ٽائون ۾ 6 هين ڪلاس جي شاگرد سان زيادتي جي جي وڊيو وائرل ٿيڻ بعد پوليس الزام هيٺ آيل ٻن جوابدارن فضل سومرو ۽ علي پنجابي گرفتار ڪيو هو، جن کي رات دير سان آزاد ڪيو ويو آهي.
رابطو ڪرڻ تي نينگر جي والد عبدلجبار ملڪ پنهنجي اخبار کي ٻڌايو ته پوليس دٻاءُ وجهي راڄوڻي لاءِ لکت ۾ راضپو حاصل ڪيو آهي، غريب آهيون، ڪجهه ڪري به نه ٿا سگهون، پر اڄ ڀرچونڊي پير ميان رفيق کان فيصلي جي تاريخ وٺڻي هئي، پر ان کان اڳ ئي پوليس جوابدارن کي آزاد ڪري ڇڏيو آهي.
رابطو ڪرڻ تي پوليس ٻڌايو ته ڌريون پاڻ ۾ ٺهي ويون آهن، جنهن سبب ڪيس به داخل ناهي ڪرايو ويو، ڪيس داخل ڪرائڻ تائين جوابدارن کي حراست ۾ نه ٿو رکي سگهجي

ميهڙ (ن-پ-ا) تحريڪانصاف تعلقي ميهڙ جي نائب صدر رئيس قربان بزنجو (بروهي ) جو ننڍو ڀاءُ عبدالله بزنجو لاڏاڻو ڪري ويو جنازه نماز اڄ عيد گاه ميهڙ ۾ ادا ڪئي ويندي ۽ گاهي مهيسر روڊ تنيه هائوس ڀرسان تڏو وڇايو ويو آهي، جتي شهرين ۽ سياسي سماجي اڳواڻن پاران مرحوم جي وارثن سان تعزيت جو سلسلو جاري آهي.

ميهڙ (ن پ ا) سيشن ڪورٽ دادو ءِ پاڻي ڪميشن جي چيئرمين رٽائرڊ جسٽس امير هاني مسلم جي حڪم تي ميهڙ جي مين روڊ سميت شهر جي مختلف رستن تان حد دخلين هٽائڻ واري ڪاروائي شروع ڪئي وئي آهي ا ن سلسلي ۾ عدالت جي حڪم تي اڃ به اسٽنٽ ڪمشنر عبدالفتاح پنهور، ايس ايڇ او اي سيڪشن امان الله چنو، ايس ايڇ او بي سيڪشن ممتاز سرڪي، ميونسپل ميهڙ جي چيف ميونسپل آفيسر اورنگزيب مگسي، مارڪيٽ ڪاميٽي جو چيئرمين مهراب لاکير ۽ ٻين جي نگراني ۾ وڏن پوليس اٽالن جي موجودگي ۾ شهر ۾ مين روڊ، مک بازار ,ريشم گلي سميت مختلف هنڌن وٽ دڪانن جا دڪا ڇپرا، منهن ڊاهيا پيا وڃن ۽ قبضا هٽايا پيا وڃن ان سلسلي ۾ ميونسپل ميهڙ پاران حد دخلين ڪندڙ دڪاندارن کي نوٽيس پڻ جاري ڪيا ويا هئا . ان سلسلي ۾ ميهڙ شھر ۾ ناجائز حد دخلين خلاف ميهڙ شھر جي رهائشي شفيق احمد شيخ پاران ڊسٽرڪٽ سيشن ڪورٽ ۾ داخل پٽيشن تي به ميونسپل اختيارن روينيو کاتي جي عملدارن ناجائز حد دخلين ختم ڪرڻ خلاف ڪيس داخل ڪرايو هو پر عدالت جي طلب ڪرڻ تي ايس ڊي ايم ميهڙ فهيم لاکير مختيارڪارميهڙ صابر حسين ميراڻي عدالت پاران طلب ڪرڻ تي نه اچڻ جو عدالت ۾ ڪيس داخل ڪرائڻ جي حڪم بعد عدالت پاران اسٽنٽ ڪمشنر عبدالفتاح کي قبضن هٽائڻ واري ڪم جو انچارج مقرر ڪري قبضا هٽائڻ جو حڪم ڏنو هو جنهن بعد اڄ به عدالت جي حڪم تي قبضن هٽائڻ واري ڪاروائي جاري رهي، هوڏانهن قبضن هٽائڻ واري ڪاروائي دوران شهرين نظير جانوري ۽ ٻين الزام هنيو آهي ته ميونسپل ميهڙ، مارڪيٽ ڪاميٽي وارا پئسا وٺي قبضا خورن سان مليل آھن انهن پئسن عيوض قبضا ڪرايا آھن ۽ قبضن هٽائڻ واري ڪاروائي صرف ڏيکاءُ آهي بااثر حڪومتي جماعت سان واسطور رکندڙ قبضا خورن جا قبضا نه پيا هٽايا وڃن تعلقه اسپتال ميهڙ ، اريگيشن آفيس ۽ ريوينيو آفيس ڀرسان ايس ڊي ايم جي پراڻي رهائش گاه تعليم کاتي في ميل جي ايس ڊي او آفيس جي سامهون ايريگيشن کاتي جي انجنيئر ايس ڊي او جي پراڻي رهائشي عمارتن ۽ راڌڻ روڊ دان روڊس کاتي جي آفيسرن جي آفيسن ۽ رهائشي عمارتن پلاٽن ۽ گهاڙي روڊ سان ڊرينيج جي مين نالن تي ببااثرن ڌرين جا قبضا برقرار آهن صرف ريڙهي گاڏنن وارن کي هٽائڻ سان گڏ دوڪانن جي اڳيان ٺھيل منهن ڊاهيا پيا وڃن، هنن گهر ڪئي آهي ته شهر ۾ ٿيل سمورا ٿيل قبضا نا جائز حددخليون بنا سياسي فرق جي هٽايا وڃن ءِ قبضا خورن خلاف ڪاروائي ڪئي وڃي مخصوص ماڻھن خلاف ڪاروائي ٿي ته شهر جا دوڪاندار واپاري احتجاج ڪندا.

ميان صاحب (ن پ ا) سلطان ڪوٽ شھر جي نامور سياسي شخصيت اڳوڻو صوبائي وزير آغا تيمور خان پٺاڻ جنھن گذريل عام چونڊن کان اڳ پيپلزپارٽي کي الوداع چئي جي ڊي اي ۾شموليت اختيار ڪئي ھئي ء جي ڊي اي جي ٽڪيٽ تي ھن پي ايس 7 تي عام چونڊن م حصو ورتو ء پنھنجي مخالف پ پ پ جي اميدوار امتياز احمد شيخ کان شڪست کاڌي ھئي، ھن وقت آغاتيمور خان پٺاڻ جي ويجھن ذريعن کان مليل ڄاڻ موجب آغا تيمور پٺاڻ جا جي ڊي اي کي ڇڏي ھاڻي پي ٽي آءَ ۾ وڃڻ جا امڪان نظر اچي رھيا آھن، ان سلسلي م معلوم ٿيو آھي ته جنوري جي پوئین ھفتي م وزيراعظم پاڪستان عمران خان جا به شڪارپور دوري تي اچڻ جا امڪان آھن جنھن بعد ھو آغا تيمور خان پٺاڻ سان به ملاقات ڪندو جنھن بعد آغا تيمور پٺاڻ پي ٽي آءِ ۾ شموليت جو اعلان ڪندو..

ملڪاڻي شريف (ن پ ا) ملڪاڻي شريف جي شاخن ۾ پاڻي جي هٿرادو کوٽ ختم نه ٿي. فصل پوکجي نه سگهيا، سوين ايڪڙ آباد زمين بنجر بنجڻ لڳي آهي، آبادگارن جا ٻئي هٿ مٿي تي اچي ويا. آبپاشي سب ڊويزن خيرپور گمبوهه جي شاخن کوسڪي، آئيلپور، جرڪس، ٻنگار، خيرپور ۽ باگو مائينر سوڌو ٻين شاخن ۾ پاڻي جي هٿرادو کوٽ ختم نه ٿي سگهي، جنهن ڪري آبادگار ڪڻڪ، سرنهن، ڄانڀو، سورج مکي، اسپنگر، سايون ڀاڄيون ۽ مال جي چاري جو گاهه پوکي نه سگهيا آهن. فصل نه ٿيڻ ڪري آبادگارن، هارين سان گڏ واپاري، مزدور ، پورهيت طبقي کان به روزگار کسجي ويو آهي. پاڻي جي هٿرادو کوٽ ۽ پڇڙيءَ جي آبادگار اڳواڻ منظور چانڊيو سميت ٻين آبادگارن تي ڪوڙا ڪيس داخل ٿيڻ خلاف ملڪاڻي شريف ۾ آبادگارن ۽ نوجوان آزاد اتحاد پاران آبپاشي عملدار ايس ڊي او خيرپور گمبوهه ذوالفقار لاشاري خلاف مير مرتضا چانڊيو، غلام محمد ملڪاڻي، اميد علي چانڊيو، ڀيمراج ڀيل، نعيم ڀٽي ۽ ٻين جي اڳوڻي ۾ احتجاج ڪيو. ايس ڊي او خلاف سخت نعريبازي ڪئي وئي، اڳواڻن چيو ته آبپاشي عملدارن پاڻي جي هٿرادو کوٽ ڪري اسان جون سوين ايڪڙ زمينون بنجر بڻائي ڇڏيون آهن. فصل نه پوکي سگهيا آهيون ، اسان کان روزگار کسيو ويو آهي. هنن چيو ته آبپاشي عملدار پڇڙيءَ جي لاءِ پاڻي گهرندڙ آبادگار اڳواڻ منظور چانڊيو تي ڪوڙا ڪيس داخل ڪرائي هڪ مهيني کان جيل ۾ قيد ڪرائي ڇڏيو آهي. هنن مطالبو ڪيو ته آبادگاراڳواڻ منظور چانڊيو تان ڪوڙا ڪيس ختم ڪرائي پڇڙيءَ جي آبادگارن کي پاڻي مهيا ڪيو وڃي.

ڪچي پل (ن پ ا ) ڪچي پل شھر ۽ آس پاس ۾ رولو ڪتن جو آزار وڌي ويو هڪ هفتي اندر مختلف ڳوٺن ۾ رڍن، ٻڪرين ۽ ڍورن سميت ڪيترن ئي جانور کي رولو ڪتن ڏاڙهي زخمي ڪيو آهي، جڏهن ته مالوند پريشان آهن. ڳوٺ عيد محمد جاگيراڻي، پٺاڻ خان بوجاڻي، حاجي محمد حسن مگسي، ڪچي پل شھر ۽ خان واھ ۾ رولو ڪتا ٽولن جي صورت ۾ گهمي رهيا آهن. جنهن ڪري علائقي واسي خوف ۾ ورتل آهن. ڳوٺاڻن چيو آهي ته رولو ڪتن جي آزار سبب ٻارڙا خوف ۾ وٺجي ويا آهن، جڏهن ته ميونسپل انتظاميا کي شڪايت ڪرڻ باوجود رولو ڪُتن جو آزاد ختم نه ڪرايو ويو آهي.

حيدرآباد: سڄي دنيا سميت حيدرآباد ۾ به مسيحي برادري پنهنجو مذهبي ڏهاڙو ڪرسمس ملهائي رهي آهي، شهر جي مختلف چرچن ۾ عبادتن ۽ خاص دعائن جو سلسلو جاري آهي، جڏهن ته پادرين پاران ملڪ ۾ امن ۽ خوشحالي لاءِ خاص دعائون گهريون پيون وڃن. مذهبي تقريب ۾ عورتن توري مردن جو وڏو انگ شريڪ آهي. سڪيورٽي جا انتظام سخت ڪري پوليس ۽ رينجرز کي مقرر ڪيو ويو آهي.

خيرپورناٿن شاھ (ن-پ-ا) خيرپورناٿن شاھ ڀرسان ڳوٺ فتح پور سامهون انڊس هاءِ وي تي موٽر سائيڪل سلپ ٿيڻ سبب موٽر سائيڪل سوار فوت ٿي ويو، فوتي جي لاش کي اسپتال آندو ويو سندس جي خيسي مان شناختي ڪارڊ مليو جنهن ۾ سليم آرائين لکيل آھي، لاش جي وارثي نه ٿي سگهي لاش اسپتال ۾ پيل آهي.

سکر (ن-پ-ا) سکر سيڪٽر شديد ڪوهيڙي جي لپيٽ ۾ اچي ويو، نظر جي حد هالاڻي کان هنگورجا ٻڙي آهي، روهڙي ٽول پلازه کان سکر تائين نظر جي حد 20 ميٽر آهي، موٽر وي پوليس پاران ڊرائيورن کي احتياط کان ڪم وٺڻ جي هدايت ڪئي وئي آهي، جڏهن ته تيز رفتاري کان پاسو ڪرڻ جي پڻ هدايت ڪئي وئي آهي، ايس ايس پي موٽر وي جو چوڻ آهي ته غير ضروري سفر کان پاسو ڪيو وڃي، ايمرجنسي جي صورت ۾ وڌيڪ معلومات لاءِ هيلپ لائن 130 تي رابطو ڪيو وڃي.