ڏينگڙو واهه تي آرڊي 46 وٽان واهه جي ڪپر تي بيٺل وڻ وڍيا پيا وڃن، آبپاشي عملو به موجود
وڻن جي واڍي ماحول دشمني آهي،عملدارن خلاف به ڪارروائي ڪنداسين: آبپاشي انجنيئر
گهوٽڪي(ن پ ا) گهوٽڪي ڀرسان ڏينگڙو واه تان وڻن جي وڍي جاري آپباشي جي عملي جي نگراني ۾ وڻ وڍيا پيا وڄن ڳوٺاڻن جو الزام، گهوٽڪي ڀرسان ڏينگڙو واھ جي آرڊي 46 وٽان سري عام ڏينهن ڏٺي جو واھ جي ڪپر تان ٻٻر جا وڻ وڍيا پيا وڃن ڳوٺاڻن غلام محمد کوسو امان الله کوسو صحافين سان ڳالهندي چيو ته آبپاشي عملدار داروغي امان الله سومري جي موجودگي ۾ ڏينگڙو واهه جي ڪپرن تي موجود ٻٻر جي وڻن جي واڍي ڪرائي پئي وڃي. آبپاشي انجنيئر چيو آهي ته وڻن جي واڍي ڪندڙن خلاف ڪارورائي ڪئي ويندي ۽ جيڪي آبپاشي عملدار ملوث آهن، اُنهن کي به بخش نه ڪيو ويندو.
آمريڪي حڪمران ايران کي خطي ۾ پنهنجي لاءِ خطرو سمجهن ٿا: ايراني صدر
تهران (ا ڊ) ايران جي صدر حسن روهاني چيو آهي ته آمريڪا ايران کي ڪمزور ڪرڻ چاهي ٿي. ملڪ جي سالياني بجيٽ پيش ڪرڻ دوران آمريڪا جي حوالي سان ڳالهائيندي ايراني صدر چيو ته آمريڪي حڪمران ايران کي پنهنجي لاءِ خطرو سمجهن ٿا انڪري ايران کي جهڪائڻ ۽ ڪمزور ڪرڻ گهرن ٿا. سندس چوڻ هو ته آمريڪي پابندين سان ايران جي معاشي ترقي ۾ رڪاوٽ پيدا ٿي آهي، ايراني عوام سان گڏ ڪمپنيون پڻ بحران جو شڪار ٿيون آهن، اهو سڄو عمل عالمي قانون جي ابتڙ ڪيو پيو وڃي. حسن روهاني چيو ته ايراني عزم کي شڪست نٿي ڏئي سگهجي، آمريڪا ناڪام ٿيندا.
جي آءِ ٽي رپورٽ مني لانڊرنگ کان لانڊري تائين اچي وئي آهي، ايترا وڏا الزام نه آهن جو سزا ملي سگهي: مراد علي شاهه
جي آءِ ٽي الزامن جو عدالت ۾ دفاع ڪنداسين، اُميد ته سُپريم ڪورٽ جي حڪمن يڃڪڙي ڪندڙن خلاف به ڪارروائي ٿيندي
ڪراچي (رپورٽر) سنڌ جي وڏي وزير سيد مراد علي شاهه جو چوڻ آهي ته جي آءَ ٽي ۾ جيڪي مامره سامهون آيا آهن انهن جو جواب عدالتن ۾ ڏينداسين .هن اهڙن خيالن جو اظهار ملڪ جي باني قائداعظم محمد علي جناح جي جنم ڏينهن جي حوالي سان سندس مزار تي حاضري کانپوءِ ميڊيا سان ڳالهه ٻولهه دوران ڪيو .صحافين پاران پڇيل مختلف سوالن جا جواب ڏيندي سنڌ جي وڏي وزير چيو ته پيپيلزپارٽي قيادت کي عوام جي خدمت ڪرڻ تي عدالتن ۾ گهليو پيو وڃي اسين عوام خاطر عدالتن ۾ ڪيسن کي منهن ڏيڻ لاءِ تيار آهيون .هن چيو ته پاور پلانٽ کي سبسڊي اڄ نه 2008 کان ڏني پئي وڃي اها سبسڊي به عوام جي ڀلائي لاءِ ڏئي رهيا آهيون .هن چيو ته اسين عوام جي دخمت تي يقين رکون ٿا . سيد مراد علي ساهه جو چوڻ هو ته آرمي پبلڪ اسڪول کانپوءِ ملڪ ۾ امن جي قيام لاءِ ڀرپور ڪوششون ورتيون ويون ۽ هن وقت امن امان جي حوالي سان صورتحال ڪافي بهتر آهي .
خورشيد شاهه جون رڙيون ٻڌائين ٿيون ته سندس تاريخ پڪي آهي: شيخ رشيد
حڪومت جي ڪوشش هوندي ته چور ۽ ڦورو قانون جي پڪڙ ۾ اچن: وفاقي وزير
ڪراچي ( ن پ ا ) ريلوي واري وفاقي وزير شيخ رشيد چيو آهي ته شهبازشريف آصف زرداري کان وڏو چور آهي، خورشيد شاهه جون رڙيون ٻڌائين ٿيون ته سندس تاريخ پڪي آهي، ملڪ ۾ ٺڳن ۽ چورن معيشت تي قبضو ڪري 20 ڪروڙ عوام جو جيئڻ جنجال بڻايو، عمران خان حڪومت جي ڪوشش هوندي ته انهن کي قانون جي پڪڙ ۾ آندو وڃي.
ملڪ جي باني قائداعظم محمد علي جناح جي جنم ڏينهن تي وفاقي وزير شيخ رشيد ڪراچي پهچي قائداعظم جي مزار تي حاضري ڀري، جنهن بعد ميڊيا سان ڳالهائيندي هن چيو ته اڄ هن عظيم شخصيت جي ڪري اسان کي آزاد ملڪ مليو.
شيخ رشيد چيو ته ٺڳن ۽ چورن ملڪ جي معيشت تي قبضو ڪيو ۽ 20 ڪروڙ عوام جي زندگين کي امتحان ۾ وڌو، وفاقي سرڪار جي ڪوشش هوندي ته انهن چورن ۽ ٺڳن کي قانون جي ڪٽهڙي ۾ آندو وڃي.
خورشيد شاهه جون رڙيون ٻڌائين ٿيون ته سندس تاريخ پڪي آهي، جهانگير ترين زبردست ماڻهو آهي پر ايل بي ڊبليو ٿي ويو.
بي ايس فيڊر ۾ پيرسن عورت جو لاش هٿ ڪيو ويو، عُمر اٽڪل 50 سال لڳي ٿي: پوليس
سڃاڻپ نه ٿيڻ ڪري لاش ڪشمور اسپتال جي سرد خاني ۾ رکيو ويو آهي
ڪشمور (ن پ ا) ڪشمور جي گڊو ٿاڻي جي حد ۾ سيف لاا محله جي ڀرسان بي ايس فيڊر ۾ 50 سالن جي عورت جو لاش گڊو پوليس ڪڍرائي ڪشمور اسپتال جي سرد خاني ۾ رکي ڇڏيو جڏھن لاش جي سڃاڻپ نه ٿي سگھيو. پوليس چيو آهي ته لاش جي سڃاڻپ نه ٿيڻ ڪري لاوارث حالت ۾ اسپتال منتقل ڪيو ويو آهي.
ڪراچي(م ڊ) باني پاڪستان قائداعظم محمد علي جناح جو 143 هون جنم ڏينهن ملهايو پيو وڃي، ان حوالي سان مزار قائد ڪراچي ۾ گارڊز جي تبديلي جي تقريب ٿي، جتي پاڪستان ملٽري اڪيڊمي جي ڪيڊٽس مارچ ڪيو. تقريب جو خاص مهمان ميجر جنرل اختر نواز مارچ پاسٽ جو معائنو ڪيو، جنهن کانپوءِ پي ايم اي جي چست دستي مزار قائد جي گارڊز جا فرض سنڀالي ورتا. ان موقعي تي دعائون پڻ گهريون ويون. قائد اعظم محمد علي جناح 1876ع ۾ ڪراچي جي وزير مينشن علائقي ۾ ڄائو. هن شروعاتي تعليم سنڌ مدرسته السلام مان حاصل ڪئي، ميٽرڪ جو امتحان ممبئي مان پاس ڪرڻ کانپوءِ اعليٰ تعليم لاءِ لنڊن ويو. محمد علي جناح 1895ع ۾ قانون جي ڊگري به حاصل ڪري ورتي. 1896ع ۾ هن سياسي زندگي جي شروعات انڊين نيشنل ڪانگريس کان ڪئي. 1913ع ۾ هن مسلم ليگ ۾ شموليت ڪئي، قائد اعظم محمد علي جناح پاڪستان جي آزادي لاءِ جاکوڙيو، جڏهن ته سندس لاڏاڻو 11 سيپٽمبر 1948ع ۾ ٿيو.
علي جهانگير 30 مئي تي سفير واري عهدي جي چارج سنڀالي هئي
ڪراچي (م ڊ) امريڪا ۾ مقرر پاڪستاني سفير علي جهانگير صديقي کي عهدي تان هٽايو ويو، جهانگير صديقي چيو آهي ته امريڪا سان اعتماد واري کوٽ ختم ٿي رهي آهي.
علي جهانگير صديقي کي هلندڙ سال 8 مارچ تي امريڪا ۾ پاڪستان جو سفير مقرر ڪيو ويو هو ۽ هن 30 مئي تي پنهنجي عهدي جي چارج سنڀالي هئي.
علي جهانگير صديقي جو چوڻ آهي ته ماضي ۾ پريس رليز ۾ فرق هوندو هو، پر هن ڀيري پرڏيهي وزير شاهه محمود قريشي ۽ امريڪي هم منصب وچ ۾ ملاقات بابت پريس رليز ۾ فرق نه هو.
هن چيو ته امريڪا سان اعتماد واري کوٽ ختم ٿي رهي آهي ۽ اعتماد گڏ ڪم ڪرڻ سان ئي وڌندو آهي، افغانستان کانسواءِ امريڪا سان به ڪيترن ئي معاملن تي گڏجي ڪم ڪري رهيا آهيون.
