پنوعاقل (ن پ ا) پني عاقل ۾ گئس جي بحران سبب عام رواجي زندگي مشڪلاتن جو شڪار بڻجي وئي شهري سخت پريشان گهرن ۾ عورتون رڌپچاء لاء گئس نه هجڻ ڪري سردي جي موسم ڏکائين کي منهن ڏيڻ لڳيون عام ڏينهن هجن يا اسڪول جي کلڻ وارا ڏهاڙا اسڪولي ٻارڙا سرڪاري ملازم مزدور طبقو صبح جو بغير ناشتو ڪرڻ جي ويندا آهن گئس جي اڻ اعلانيل لوڊشيڊنگ ماڻهن جي پريشانين کي ٻيڻو ڪري ڇڏيو آهي گئس انتظاميا پريشر گهٽ هجڻ جو جواز ڄاڻائي ڪيترائي ڪلاڪ ڪڏهن پورا چويه ڪلاڪ به گئس کي بند رکيو وڃي ٿو سياسي سماجي ماڻهن جن ۾ جمال ناصر بلو مولانا مسعود شيخ اسحاق جسڪاڻي مراد شيخ ۽ ٻين جو چوڻ هو ته گئس جي بروقت فراهمي معطل ٿيڻ دراصل حڪومت جي ناڪامي آهي جيڪا ترقياتي ڪم ته نه ڪرائي سگهي پر بنيادي سهولتون بج کسيندي پئي وڃي اسان جا سڀ ڪم ڪار رولڙي جو شڪار آهن جيڪڏهن گئس جي صورتحال کي بهتر نه ڪيو ويو ته اسين احتجاج ڪنداسين هڪ طرف گئس جو بحران ته ٻئي طرف ڪاٺيون به اڻ لڀ هجڻ سان گڏوگڏ ڳاٽي ٽوڙ مهانگيون ٿي ويون آهن جيڪي 5کان اٺ سو روپيا مڻ وڪرو ٿين ٿيون ڪاٺيون وڪرو ڪندڙن جو موقف آ ته ٻيلا به ختم ٿي وڻ آهن ڪونه هيڪڙ ٻيڪڙ وڻ آهن جيڪي وڪرو ڪري ٻچن جو گذر سفر ڪيون ٿا مختلف اسڪولن جي شاگردن توقير ڪورائي عدنان مهر ماجدمهيسر جن جو چوڻ هو ته بجلي گئس جي لوڊشيڊنگ سبب اسانجا ڪپڙا ڊريسون استري ٿي نه ٿا سگهن سردي جي موسم ۾ صبح جو بک تي وڃون ٿا حڪومت گئس جي اڻ اعلانيل لوڊشيڊنگ ختم ڪري اسانجون مشڪلاتون حل ڪري نه ته اسان به احتجاج جو حق محفوظ رکون ٿا.
پني عاقل ۾ گئس جو بحران، شهري ڏکيائين کي منهن ڏيڻ لڳا
شهر ۾ گئس جي اڻ اعلانيل لوڊشيڊنگ ماڻهن جي پريشانين کي ٻيڻو ڪري ڇڏيو
سرحد ۾ چور دڪان جا تالا ٽوڙي روڪ رقم ۽ سامان چورائي ويا
سرحد(ن پ ا) سرحد مان اڻڄاتل چور دُڪان جا تالا ٽوڙي روڪ رقم ۽ سامان چوري ڪري فرار ٿي ويا. خبرموجب اسٽيشن روڊ تي واقع واپاري سنتوش ڪمار جي ڪريانه جي دوڪان جا تالا ٽوڙي دوڪان ۾ پيل هزارين روپيه روڪ رقم ۽ ٻيو سامان کڻي فرار ٿي ويا. دوڪان مان چوري جي واردات جو سرحد پوليس کي اطلاع پڻ ڏنو ويو.
نوازشريف کي اڊيالا جيل کان ڪوٽ لکپت جيل منتقل ڪيو ويو
نوازشريف کي ڪوٽ لکپت جيل جي بي ڪلاس روم ۾ رکيو ويندو: گهرو سيڪريٽري
اسلام آباد ( م ڊ ) العزيزيه ريفرنس ۾ گرفتار نوازشريف کي اڊيالا جيل کان ڪوٽ لکپت جيل منتقل ڪيو ويو، ڪوٽ لکپت جيل ۾ نوازشريف لاءِ بي ڪلاس ڪمرو تيار ڪيو ويو.
نيب ٽيم صبح ڌاري اڊيالا جيل پهتي، جتان روڊ ذريعي نوازشريف کي ايئرپورٽ پهچائڻ بعد خصوصي جهاز ذريعي لاهور پهچايو ويو، جنهن بعد اڳوڻي وزيراعظم کي ڪوٽ لکپت جيل منتقل ڪيو ويو
پنجاب جي گهرو سيڪريٽري جو چوڻ آهي ته ڪوٽ لکپت جيل ۾ نوازشريف لاءِ بي ڪلاس ڪمرو تيار ڪيو ويو آهي، جنهن ۾ ٽي وي، هنڌ بسترو، ڪمبل، هيٽر، ڪرسي ۽ ميز رکرائي وئي آهي، کيس هڪ خدمتگار ۽ گهران ماني گهرائڻ جي سهولت به هوندي.
گهرو سيڪريٽري جو وڌيڪ چوڻ هو ته صوبي ۾ امن خراب ڪندڙن کي سختي سان منهن ڏنو ويندو، ڀڃ ڊاهه ڪندڙن خلاف دهشتگردي جا ڪيس داخل ڪيا ويندا، امن امان جي حوالي سان ڪشمنر ۽ آر پي کي خصوصي هدايتون جاري ڪيون ويون آهن.
سنڌ جو خوراڪ کاتو آبادگارن لاءِ قرض کڻي ڪڻڪ خريداري ڪندي پاڻ 104- ارب جو قرضي ٿي ويو!
خوراڪ کاتي پاران ڪڻڪ خريداري لاءِ بينڪن کان قرض کڻڻ سبب 14 لک وياج ڀرڻ تي مجبور
آبادگارن کي بارداڻو ڏيڻ کان وٺي ڪڻڪ کڻي پهچائڻ تي هر ٻوريءَ تي هڪ سئو رپيا وڌيڪ ڀرڻا پون ٿا
ڪراچي (رپورٽ:دودو چانڊيو) سنڌ جو خوراڪ کاتو آبادگارن لاءِ قرض کڻي ڪڻڪ خريد ڪندي بئنڪن جو 104 ارب رپين جو قرضي بڻجي ويو آهي. کاتي کي هر سال صرف وياج تي 14 لک رپيا ادا ڪرڻا پون ٿا، سنڌ جو خوراڪ کاتو هر سال آبادگارن کان هڪ ڪروڙ 10 لک کان هڪ ڪروڙ 20 لک جي لڳ ڀڳ ٻوريون خريد ڪندو آهي، جيڪو سنڌ ۾ پيدا ٿيندڙ ڪڻڪ جو 30 سيڪڙو هوندو آهي. آبادگارن کي بارداڻو ڏيڻ کان وٺي ڪڻڪ کڻي گدامن ۽ سينٽرن تائين پهچائڻ تائين سنڌ جي خوراڪ کاتي کي هر ٻوريءَ تي هڪ سئو رپيا وڌيڪ ادا ڪرڻا پون ٿا، اهڙي ريت سنڌ جي خوراڪ کاتي کي اها ٻوري چار مهينا مختلف گدامن ۾ رکڻ بعد ساڳئي اگهه تي فلور ملن ۽ اٽي چڪين کي ڪوٽا تحت وڪرو ڪرڻي پوي ٿي. هر سال توڙي جو ڪڻڪ جو امدادي اگهه الڳ هجي ٿو. خوراڪ کاتي وٽ ڇاڪاڻ ته پنهنجا پئسا ناهن، تنهن ڪري کاتو پهرين نيشنل بئنڪ ۽ هاڻي سنڌ بئنڪ کان هر سال قرض کڻي سنڌ جي آبادگارن کان ڪڻڪ وٺندو آهي، اهو قرض گڏ ٿي هاڻ 104 ارب رپيا ٿي ويو آهي، جنهن جو وياج ئي هر سال 14 ارب رپيا خوراڪ کاتو بئنڪن کي ادا ڪري ٿو، خوراڪ واري صوبائي وزير هري رام ڪشوري لال ٻڌايو ته سنڌ جي خوراڪ کاتي جو قصو هلي ئي قرضن تي ٿو جيڪو آئون25 سالن کان ڏسندو پيو اچان. هن چيو تهآئون بنيادي طور آبادگار آهيان، مونکي تازو خوراڪ کاتي جو قلمدان مليو آهي، بارداڻو غريب آبادگارن کي ملندو ئي ناهي، سڀ وڏيرا ۽ سيٺ کڻي ويندا آهن، صوبائي وزير چيو ته جڏهن ڪڻڪ لهندي آهي ته فوڊ انسپيڪٽر اسان وزيرن جو به فون ناهن کڻندا، مون اچڻ سان ئي سيڪريٽري خوراڪ کي هدايتون ڏنيون آهن ته جيڪڏهن ڪو فوڊ انسپيڪٽر فون نه کڻندو ته اهو معطل هوندو، آئون هن کاتي کي ضرور سڌاريندس.
ڏهرڪي: فلمي سين، ڪار پٽڙين ۾ ڦاسي پئي، ٽرين ڏسي ڪار سوارن ٽپا ڏئي جان بچائي
ڏهرڪي (اعظم سهرياڻي ) ڏهرڪي ريلوي اسٽيشن ڀرسان,سانڪو روڊ جي کليل ڦاٽڪ ڪراس ڪندي ڪار ريلوي ٽريڪ جي پٽڙين ۾ ڦآسي پيئي، ڪراچي کان لاهور ويندڙ ڪراچي ايڪسپريس ٽرين پهچي ويئي ٽرين کي ويجهو ڏسي ڪار سوارن ڪار مان ٽپو ڏيئي جان بچائي، ٽرين جو ٽريڪ تي ڦاٿل ڪار ٽڪرا ٽڪرا ٿي ويئي، اکين ڏٺن شاهدن جو چوڻ آھي ته ڪار کي ٽڪر لڳڻ بعد ڪار سوار موقعي تان ڀڄي ويا. حادثي جو شڪار ٿيل ڪار جي ڊرائيور ميرپور ماٿيلو جي رهواسي غلام فريد شيخ والد غلام حسين کي ڏهرڪي پوليس گرفتار ڪرڻ جي دعويٰ ڪئي آھي. پوليس موجب ڊرائيور غلام فريد شيخ ميرپور مان سواري کڻي داد لغاري ڇڏي ڏهرڪي واپس اچي رهيو هيو ته ڪار پٽڙين ۾ ڦاسي پئي، ٽرين ايندو ڏسي ڊرائيور جان بچائي آھي، پوليس جو چوڻ آھي گاڏي جو مالڪ ڳڙهي چاجر جو رهواسي علي محمد بوزدار ٻڌايو وڃي ٿو.
پاڪستان سوڌو سڄي دنيا ۾ ڪرسمس ملهايو پيو وڃي
گرجا گهرن ۾ خاص عبادت جا انتظام، امن لاءِ دعائون گهريون وينديون
مرڪزي تقريب ويٽيڪن سٽي ۾ ٿيندي، پوپ فرانسس روايتي رسم ادا ڪندو
ڪراچي (ا ڊ) پاڪستان سميت سڄي دنيا ۾ مسيحي برادري پاران حضرت عيسيٰ عليهه اسلام جي جنم ڏهاڙي جي حوالي سان ڪرسمس ملها يو پيو وڃي. اڄوڪي ڏينهن تي گرجا گهرن ۾ گڏيل طور خاص عبادت جا انتظام ڪيا ويا آهن، جڏهن عبادت ۾ امن توڙي سلامتي لاءِ خاص دعائون گهريون وينديون آهن. مرڪزي تقريب ويٽيڪن سٽي ۾ ٿيندي، پوپ فرانسس روايتي رسم ادا ڪندو. ڪرسمس جي ڏينهن تي مسيحي برادري هڪٻئي ۾ تحفن جي ڏي وٺ ڪندي آهي، جڏهن ته مزيدار ۽ خاص کاڌا پڻ تيار ڪيا ويندا.
خيرپور ۾ جبلن جي غيرقانوني ليز، رائلٽي جي مد ۾ ڪرپشن، اينٽي ڪرپشن جاچ شروع ڪري ڇڏي
مائنز اينڊ منرل کاتي جي اختيارين کان 20 سالن دوران ٿيل ليز، بينڪ اڪائونٽ جا تفصيل طلب
مائنز اينڊ منرل کاتي جي عملدارن خلاف پٿر ۽ بجري جا غيرقانوني لائسنس جاري ڪرڻ جي جاچ
ڪراچي (رپورٽ:شاهد ميراڻي) خيرپور ضلعي ۾ پهاڙن جي غيرقانوني ليز ٿيڻ جو انڪشاف ٿيو آهي، رائلٽي جي مد ۾ به مائينز اينڊ منرل کاتي جي اختيارين پاران روزانو لکين روپين جا گھپلا، اينٽي ڪرپشن کاتي جي اختيارين جاچ شروع ڪري ڇڏي، ڊي جي مائينز اينڊ منرل کي جاچ ٽيم پاران 20 سالن ۾ ٿيل ليز، بئنڪ اڪائونٽ، رائلٽي ۽ ضلعي ۾ سائيٽن جي تفصيلن سميت طلب ڪري ورتو آهي. ان سلسلي ۾ مليل ڄاڻ موجب ته اينٽي ڪرپشن کاتي جي اختيارين پاران خيرپور ضلعي جي پهاڙي علائقن مان نڪرندڙ پٿر ۽ بجري جي رائلٽي جي مد ۾ مبينا طور روزانو ٿيندڙ لکين روپين جي گھپلن ۽ غيرقانوني طور من پسند ماڻهن کي لائسنس جاري ڪرڻ واري معاملي جي جاچ شروع ڪري ڇڏي آهي. اينٽي ڪرپشن کاتي جي اختيارين پاران ڊائريڪٽر جنرل (ڊي جي ) مائينز اينڊ منرل ڏانهن نوٽيس اماڻي کيس طلب ڪري ورتو آهي. جڏهن ته 1997ع کان هلندڙ مهيني تائين يعني 20 سالن جو سمورو رڪارڊ پڻ گھرائي ورتو آهي. مائينز اينڊ منرل کاتي ڏانهن اماڻيل نوٽيس ذريعي اينٽي ڪرپشن جي جاچ ٽيم پاران 20 سالن دواران لائسنس لاءِ درخواستگذارن جا تفصيل، رائلٽي جي مد ۾ ملندڙ رقم، ڄاڻايل عرصي ۾ جاري ڪيل لائسنس، بئنڪ اڪائونٽ جا تفصيل ۽ آڊٽ رپورٽ طلب ڪري ورتي آهي، سيڪريٽري مائينز اينڊ منرل چيو آهي ته اينٽي ڪرپشن جي جاچ ٽيم ڊي جي ڏانهن نوٽيس اماڻيو آهي، مون کان مدد ورتي وئي ته رڪارڊ ڏيارڻ ۾ ساڻن قانون موجب هر سهڪار ڪندس. ان سلسلي ۾ سيڪريٽري مائينز اينڊ منرل شمس الدين سومرو رابطو ڪرڻ تي “پنهنجي اخبار” سان ڳالهائيندي چيو آهي ته اينٽي ڪرپشن جي اختيارين ڊائريڪٽر جنرل مائينز اينڊ منرل کان رڪارڊ ورتو آهي. مون سان ڪنهن به رابطو ناهي ڪيو. هن چيو ته جيڪڏهن اينٽي ڪرپشن جي جاچ ٽيم پاران مون کان ڪا مدد ورتي وئي ته رڪارڊ ڏيارڻ ۾ مان ساڻن سهڪار ڪندس، ليز بااثر سياستدانن جي ويجھن ماڻهن ۽ سندن سفارشين کي ڏنا وڃن ٿا، قانون موجب پهاڙن جي ڪٽائي به نه ٿي ڪئي وڃي. ان سلسلي ۾ ذريعن وٽان مليل ڄاڻ موجب ته روهڙي رينج ۾ ايندڙ خيرپور ضلعي جي علائقن ابن شاھ، درگاھ ابراهيم آدم سلطان ۽ ٻين هنڌن تي موجود پهاڙون هيوي مشينن سان ڪٽي پٿرن جو وڏو ڪاروبار ڪيو وڃي ٿو. ذريعن جو اهو پڻ چوڻ آهي ته بااثر سياستدانن جي ويجھن ماڻهن کي آساني سان ليز ملي وڃي ٿي. جنهن بعد قانون جي ابتڙ پهاڙن جي ڪٽائي ڪئي ويندي آهي. پر ان باوجود مائينز اينڊ منرل کاتي جي اعليٰ اختيارين قانون کي حرڪت ۾ نه ٿيون آڻين.
ايجوڪيشن ورڪس ۾ 42 ڪروڙن جا گهپلا، هڪ جاچ مڪمل، ڪامورن کي بچائڻ لاءِ جتن
چيف انجنيئر تي 428 ملين رپين جي ڪرپشن جو الزام، اينٽي ڪرپشن جاچ مڪمل ڪري ڇڏي
ڪجهه عملدارن پاران ٻيهر جاچ ڪرائي جوابدارن کي فائدو پهچا ئڻ جي ڪوشش
حيدرآباد(رپورٽر)سنڌ ايجوڪيشن ورڪس ڊپارٽمينٽ ۾ 42 ڪروڙ 80 لک روپين جي رقم ۾ گهوٻين جو انڪشاف ٿيو آهي، اها رقم سنڌ جي 18 ضلعن ۾ اسڪولن جي تعمير ۽ مرمت جي حوالي سان ايجوڪيشن ورڪس کاتي کي ملي هئي، جنهن جي جاچ تي سنڌ جي اينٽي ڪرپشن کاتي جا ڪجهه آفيسر ڪرپشن ۾ ملوث عملدارن کي بچائڻ جي ڪوششن ۾ لڳي ويا آهن، جڏهن ته کاتي جا ٻيا آفيسر هن ڪيس کي ثابت ڪرڻ لاءِ سرگرم بڻيل آهن، اينٽي ڪرپشن کاتي جي ذريعن وٽان مليل دستاويزن موجب سنڌ جي ايجوڪيشن ورڪس کاتي ۾ 2017ع جي شروعات ۾ ٺيڪيدارن کي مختلف اسمن جي مد ۾ 10 سيڪڙو اضافي رقم ادا ڪئي وئي، جنهن تي هڪ غيرسماجي تنظيم اينٽي ڪرپشن کاتي کي خط لکيو ته ايجوڪيشن ورڪس کاتي جي چيف انجنئر فريدالدين صديقي انهن ٺيڪن جي مد ۾ 428 ملين روپين جي ڪرپشن ڪئي آهي، هن درخواست جي بنياد تي چيف سيڪريٽري سنڌ جاچ جي منظوري ڏني، ۽ اينٽي ڪرپشن اسٽيبلشمينٽ ڪراچي جي ڊپٽي ڊائريڪٽر ون هيڊڪوارٽر ضمير عباسي کي هن معاملي جي جاچ جو آفيس مقرر ڪيو، ذريعن موجب ضمير عباسي 15 آگسٽ 2018ع تي پنهنجي هڪ رپورٽ ۾ اهو ثابت ڪيو آهي ته ايجوڪيشن ورڪس کاتي ۾ فيبروري 2017ع کان جون 2017ع تائين ٿيل ٺيڪن جي مد ۾ 42 ڪروڙ 80 لک روپين جي ڪرپشن ٿي آهي، پنهنجي رپورٽ ۾ هن سفارش ڪئي آهي ته ان ڪرپشن ۾ ملوث عملدارن خلاف ايف آءِ آر داخل ڪري، کين گرفتار ڪرڻ جي اجازت ڏني وڃي، پر اينٽي ڪرپشن کاتي جي ڪجهه بالا آفيسرن ان رپورٽ تي عمل ڪرڻ بدران اها جاچ اسسٽنٽ ڊائريڪٽر (اي) سرڪل آفيسر اينٽي ڪرپشن اسٽيبلشمينٽ حيدرآباد جي عرفان علي ارباب جي حوالي ڪئي، جنهن پنهنجي رپورٽ ۾ لاڳاپيل عملدارن کي ڪرپشن ڪرڻ کان آجو قرار ڏيندي، پنهنجي بالا آفيسرن ڏانهن اماڻيل رپورٽ ۾ ذميوارن خلاف صرف کاتيوار ڪارروائي جي سفارش ڪئي آهي، ذريعن موجب اينٽي ڪرپشن کاتي جي ايڊيشنل ڊائريڪٽر ليگل رضوان احمد ترمزي پاران ضمير عباسي جي رپورٽ کي وڌيڪ ڪارروائي لاءِ اعليٰ عملدارن ڏانهن اماڻڻ بدران پاڻمرادو معاملي جي ٻيهر جاچ هڪ اسسٽنٽ ڊائريڪٽر عرفان ارباب حوالي ڪئي، جڏهن ته قانون مطابق اها جاچ ڊپٽي ڊائريڪٽر جي معرفت اماڻڻ گهرجي ها، پر ذاتي مفادن خاطر اها انڪوائري سڌي ريت هڪ اسسٽنٽ ڊائريڪٽر ڏانهن اماڻي وئي، ذريعن موجب هن معاملي تان اينٽي ڪرپشن جي عملدارن وچ ۾ شديد اختلاف هلندڙ آهن ۽ حيدرآباد جي ڊپٽي ڊائريڪٽر ذاڪر سمون، اسسٽنٽ ڊائريڪٽر عرفان علي ارباب جي جاچ تي اسسٽنٽ ڊائريڪٽر ليگل اينٽي ڪرپشن اسٽيبلشمينٽ حيدرآباد کان ليگل اوپينئن وٺڻ بعد هن ڪيس جي جاچ ٻيهر شروع ڪرائي آهي ۽ سرڪل آفيسر حيدراباد شير محمد سانگي کي جاچ حوالي ڪندي، کانئس 15 ڏينهن ۾ رپورٽ طلب ڪئي آهي. ذريعن موجب ڊپٽي ڊائريڪٽر اينٽي ڪرپشن ڏانهن اماڻيل ليگل اوپينيئن ۾ اسسٽنٽ ڊائريڪٽر ليگل ڄاڻايو آهي ته ڊپٽي ڊائريڪٽر ضمير عباسي جي رپورٽ ميرٽ ۽ ثبوتن تي ٻڌل هئي، جڏهن ته اسسٽنٽ ڊائريڪٽر عرفان علي ارباب جي جاچ رپورٽ جوابدارن کي فائدو ڏيڻ لاءِ جوڙي وئي آهي، اسسٽنٽ ڊائريڪٽر ليگل پنهنجي رپورٽ ۾ سفارش ڪئي آهي ته ضمير عباسي جي رپورٽ جي روشني ۾ هن ميگا ڪرپشن جو ڪيس جوابدارن خلاف داخل ڪيو وڃي، فيبروري 2017ع کان جون 2017 تائين سنڌ جي 18 ضلعن ۾ اسڪولن جي تعمير ۽ مرمت لاءِ 428 ملين روپيا آيا هئا ۽ ان دور ۾ مهانگائي جو جواز ڄاڻائي چيف انجنيئر ايجوڪيشن ورڪس فريد صديقي ٺيڪيدارن کي 10 سيڪڙو اضافي ادائيگي ڪرڻ جو ليٽر جاري ڪيو هو، جنهن تي اها جاچ نگران حڪومت ۾ شروع ڪئي وئي هئي، حيدرآباد: ضمير عباسي جي تيار ڪيل رپورٽ ۾ اهو انڪشاف ڪيو ويو آهي ته جنهن وقت ٺيڪيدارن کي ٺيڪن تي 10 سيڪڙو اضافي رقم ڏني وئي هئي، ان وقت گهربل سامان سستو هو پر ان جي باوجود اضافي ريٽ لڳائي رقم ۾ ڪرپشن ڪئي وئي.
بجيٽ ختم ٿي وئي آهي، پيٽرول پمپن جا قرضي ٿي ويا آھيون:اي ايم ايس
مريضن کان تيل جي مد ۾ اوڳاڙي ڪئي آھي، ڪوشش آهي ته اوڌر تيل ملي وڃي
مٺي: اسپتال جي اي ايم ايس ڊاڪٽر چمن شرما رابطو ڪرڻ تي ٻڌايو ته اسپتال کي تيل جي مد ۾ مليل بجيٽ ختم ٿي ويئي آھي. پيٽرول پمپن جا قرضي ٿي ويا آھيون، جيڪي وڌيڪ اوڌر تي تيل نٿا ڏين انڪري اسان صرف اڄ کان مريضن کان تيل جي مد ۾ اوڳاڙي ڪئي آھي. ڪوشش ڪريون ٿا ته ڪنهن پينٽرول پمپ تان اوڌر تيل ملي وڃي ته جيئن بجيٽ اچڻ تائين مفت ايمبولينسز سروس جاري رکي سگهون. هن چيو ته اسان وٽ تيل جا ڏوڪڙ نه هوندا ته اسين پنهنجي گهران ته تيل ڀرائي ريفر ڪيل مريضن کي اسپتالن تائين نٿا پهچائي سگهون.
مٺي سول اسپتال انتظاميه مفت ايمبولنس سروس مهيني بعد بند ڪري ڇڏي، مريض دربدر
وڏي وزير سيد مراد علي شاهه جي هدايتن تي صرف هڪ مهينو ئي عمل ٿي سگهيو، ڳري ڀاڙي جي اوڳاڙي شروع
ريفر ٿيندڙ هر مريض کان اوڳاڙڻ خاطر ڪراچي لاءِ 10 هزار ۽ حيدرآباد لاءِ 7 هزار روپيه ڀاڙو مقرر ڪيو ويو
مٺي(رپورٽر)مٺي سول اسپتال انتظاميه بجيٽ ختم ٿي وڃڻ جي بهاني مريضن لاءِسنڌ سرڪار پاران شروع ڪيل مفت ايمبولينسز سروس اوچتو بند ڪري ڇڏي،مريضن کان ڳاٽي ٽوڙ ڀاڙو اوڳاڙي شروع ڪيو ويو آھي. جنهن ڪري مٺي سول اسپتال مان ڪراچي ۽ حيدرآباد سميت شھرن جي اسپتالن ڏانهن ريفر ٿيندڙ ڏڪار متاثر ٻارڙا توڙي عام مريض ڀاڙو نه هجڻ ڪري دربدر ۽ پريشان ٿي ويا آھن. ان ڏس ۾ وڏي وزير سيد مراد علي شاه پاران هڪ مهينو اڳ تيل جي مد ۾ اضافي بجيٽ جاري ڪندي ڏڪار متاثر مريضن لاءِ مفت ايمبولينسز سروس شروع ڪئي هئي ۽ ڏڪار جون هنگامي حالتون معمول تي اچڻ تائين مفت ايمبولينسز سروس جاري رکڻ ۽ ڪنهن به مريض کان ڀاڙو اوڳاڙي نه ڪرڻ جو اعلان ڪندي مقامي اسپتالن جي انتظاميه کي وارننگ جاري ڪئي هئي ته جنهن به مريضن کان ايمبولينسز سروس جي نالي تي ڀاڙو وصول ڪيو انکي جيل اماڻيو ويندو. ان اعلان کانپوءُ هڪ مهينو اڳ شروع ٿيل مفت ايمبولينسز سروس مٺي سول اسپتال انتظاميه بجيٽ ختم ٿي وڃڻ جو جواز ڄاڻائي بند ڪري ڇڏي آھي ۽ ريفر ٿيندڙ هر مريض کان ڪراچي لاءُ 10 هزار ۽ حيدرآباد لاءُ 7 هزار روپيه ڀاڙو جي نالي ۾ اوڳاڙي شروع ڪري ڇڏي آھي. مٺي سول اسپتال مان ڪيترائي ڪلاڪ اڳ ريفر ڪيل ڌار ڌار 3 مريض ۽ انهن جا وارث ڀاڙو نه هجڻ ڪري بيوس بڻجي اسپتال جي احاطي ۾ ويٺل هئا ۽ ان وقت اوچتو پي ٽي آءِ جو صوبائي جنرل سيڪريٽري ۽ سنڌ اسيمبلي ۾ مخالف ڌر جو اڳواڻ حليم عادل شيخ اسپتال وزٽ لاءُ پهتو ته اهي مريضن جا وارث سندس آڏو دانهون ۽ التجائون ڪرڻ لڳا.ان موقعي تي موجود اسپتال جي ڪلارڪ رياض هنڱورجو ٻڌايو ته اسان وٽ تيل جي بجيٽ ختم ٿي آھي. ان ڪري اڄ کان مفت ايمبولينسز سروس بند ڪري اسپتال انتظاميه کي آگاه ڪري ڇڏيو هو. ان ڪري ريفر ٿيندڙ مريضن کان رڳو تيل جا پئسا وٺي مريض اسپتالن ڏانهن موڪلي رهيا آھيون.
باقراڻي واسي جو 11 سال اڳ قتل ٿيل پٽ جي قاتلن جي گرفتاري لاءِ احتجاج
لاڙڪاڻو(بيورو رپورٽ) باقراڻي تعلقي جي ڳوٺ ميان اسحاق کونهارو جي رهواسي پيرسن علي محمد ابڙو 11 سال اڳ قتل ٿي ويل پٽ جي قاتلن جي گرفتاريءَ لاءِ پريس ڪلب اڳيان احتجاج ڪيو. ان موقعي تي هن الزام لڳايو ته سال 2007ع ۾ نوجوان پٽ علي اڪبر ابڙو کي بااثرن عبدالرزاق موجائي ۽ الهه ڏنو موجائي قتل ڪيو هو، واقعي جو ڪيس حد جي باقراڻي ٿاڻي تي داخل آهي جنهن ۾ پوليس عبدالرزاق موجائي کي روپوش قرار ڏئي کيس گرفتار نه پئي ڪري.
جيڪو ڪيس تان هٿ کڻڻ لاءِ موتمار ڌمڪيون ڏئي رهيو آهي ان خلاف حد جي پوليس کي شڪايت ڪئي پر ڪاروائي نه پئي ڪري جنهن ڪري مون سميت منهنجي گهر ڀاتين کي جان جو خطرو آهي. هن آءِ جي سنڌ، ڊي آءِ جي ۽ ايس ايس پي لاڙڪاڻو کي اپيل ڪئي ته نوجوان پٽ جي قاتلن کي گرفتار ڪري انصاف ڪيو وڃي.
لاڙڪاڻي ۾ گاجي کهاوڙ جي واسي جو بااثر خلاف احتجاج
لاڙڪاڻو(بيورو رپورٽ) گاجي کهاوڙ تعلقي جي ڳوٺ لڌو خان ساکاڻي جي رهواسي بچل ساکاڻي بااثرن جي مبينا زيادتين خلاف پريس ڪلب اڳيان احتجاج ڪيو. ان موقعي تي هن الزام لڳايو ته منهنجي ديهه جوڳي ۾ ساڍا چار ايڪڙ زرعي زمين آهي جنهن تي نهال ميراڻي، مهرو ميراڻي، ممتاز ميراڻي قبضي جي ڪوشش ڪري رهيا آهن جن خلاف حد جي ٿاڻي جي پوليس کي شڪايت ڪئي پر پوليس به سندن جي خلاف ڪاروائيءَ لاءِ تيار نه آهي. هن آءِ جي سنڌ، ڊي آءِ جي لاڙڪاڻو ۽ ايس ايس پي قمبر شهدادڪوٽ کي اپيل ڪئي ته زرعي زمين تي قبضي جي ڪوشش ڪندڙ بااثرن خلاف ڪاروائي ڪري انصاف ڪيو وڃي.
لاڙڪاڻي جي مختلف علائقن مان گندو پاڻي نيڪال نه ٿيڻ خلاف مظاهرو
ڊسپوزل مشين 6 ڏينهن کان خراب هجڻ سبب گٽرن جو پاڻي روڊن تي بيٺل آهي: شهري
ميئر ۽ يوسي چيئرمين کي شڪايت باوجود ميونسپل عملو قدم نٿوکڻي، ڪارروائي ڪئي وڃي
لاڙڪاڻو(بيورو رپورٽ) لاڙڪاڻي شهر جي مختلف علائقن جي رهواسين گندو پاڻي نيڪال نه ٿيڻ خلاف پريس ڪلب اڳيان احتجاجي مظاهرو ڪري ميئر خلاف سخت نعريبازي ڪئي. ان موقعي تي حيدري محلا، ڪوثر مل، حسيني محلا، عارباڻي محلا، بروهي محلا ۽ نشتر روڊ جي رهواسين اظهر ڀٽي، جبار جمالي، طارق ڪلهوڙو، امجد کهاوڙ، عمران شاهه ۽ ٻين دانهيو ته علائقي ۾ لڳل ڊسپوزل مشين گذريل 6 ڏينهن کان ناڪاره بڻيل آهي جنهن ڪري گندو پاڻي گهٽين ۽ روڊن تي تلاءُ جيان بيٺل آهي جنهن کي نيڪال ڪرائڻ لاءِ ميونسپل عملي طرفان ڪي به جوڳا قدم ناهن کنيا ويا ان لاءِ ڪيترائي ڀيرا ميئر ۽ يوسي چيئرمين کي شڪايتون ڪيون پر هو مسئلا حل ڪرڻ لاءِ سنجيده نه آهن. هنن مطالبو ڪيو ته گندو پاڻي نيڪال ڪرائي ناڪاره ڊسپوزل مشين ٻئي هنڌ منتقل ڪري فوري طور صفائي سٿرائي جو ڪم شروع ڪيو وڃي ٻي صورت ميئر جي آفيس جو گهيراءُ ڪري سخت احتجاج ڪيو ويندو.
لاڙڪاڻي جي شهباز ڪالوني واسي جو بااثرن خلاف احتجاج
لاڙڪاڻو(بيورو رپورٽ) لاڙڪاڻي شهر جي شهباز ڪالوني جي رهواسي پورهيت محمد عظيم ميمڻ بااثرن جي مبينا زيادتين خلاف گهر ڀاتين سان گڏجي پريس ڪلب اڳيان احتجاجي مظاهرو ڪيو. ان موقعي تي هن ميڊيا آڏو دانهيندي ٻڌايو ته مون منور علي ڪلهوڙو کان سروي نمبر 398 شهباز ڪالوني ۾ 6 لک روپين عيوض 1200 چورس فوٽ پلاٽ خريد ڪيو جنهن پلاٽ جا سمورا پئسا کيس ڏئي چڪو آهيان، ڪجهه ڏينهن اڳ مون ڄاڻايل پلاٽ تي جڳهه ٺهرائڻ لاءِ سِرون ۽ ٻيو مٽيريل لهرائي جڳهه جي ڪم جي شروعات ڪئي جنهن تي بااثر منور علي ڪلهوڙو مون کي روڪي جڳهه ٺهرائڻ کان منع ڪري موتمار ڌمڪيون ڏئي رهيو آهي هن اپيل ڪئي ته بااثر خلاف ڪارروائي ڪئي وڃي.
دادو ۾ آپريشن متاثر دربدر، رت سڪائيندڙ ٿڌ ۾ کلي آسمان هيٺ ويٺل
ڊيٽا ۽ ٻرڙا شاخ جي پٽي تي آپريشن دوران 65 پورهيتن جا گهر ڊاهي پٽ ڪيا ويا، بااثرن خلاف ڪارروائي نه ٿي!
گهر ٻاهران پاڇو برداشت نه ڪندا هئاسين، اڄ نياڻيون جهوپڙين ۾ ويٺل آهن، ڇا عزت سان جيئڻ جو حق به ناهي؟: متاثر
دادو(ن پ ا) دادو جي ڊيٽا ۽ ٻرڙا شاخ واري پٽي مان 65 گهر ڊاهي پٽ ڪرڻ سبب متاثر خاندانن دربدري واري زندگي گهارڻ تي مجبور آهن، 15 کان وڌيڪ متاثر خاندانن ساڳين پلاٽن تي جهوپڙيون اڏي عورتن ۽ معصوم ٻارڙن سميت شديد سردي ۾ ويهي رهيا آهن. متاثر جهوپڙين ۾ راتيون گهارڻ تي مجبور آهن. آپريشن متاثر ڪٽنب جي هڪ عورت مسمات پٺاڻي ملاح لڙڪ لاڙيندي دانهيو ته گهر ڊاهي پٽ ٿيڻ سبب دربدر آهيون، چار جوان نياڻيون جهوپڙين ۾ رهن ٿيون. مسمات وزيران ٻڌايو ته گهر ڊاهڻ دوران سمورو سامان به ڀڃي ڇڏيو اٿئون، رڌ پچاءَ لاءِ ٿانوءَ ناهن بچيا، معصوم ٻارڙا لنگهڻ ڪاٽڻ تي مجبور آهن، پر ڪير دانهن ٻڌڻ لاءِ تيار نه آهي. غلام محي الدين سولنگي دانهيو ته انتظاميا بااثرن جا گهر ڊاهڻ بدران مسڪينن جي اجهن تي مشينري گهمائي ڇڏي.